DINFELNAK
By
Sylvia Van Dawt Zi
“Miphun a lianhngantertu cu dinnak a si, sualnak cu zei miphun paoh caah ningzahnak asi.”
Phungthluk bia 14: 34
Tanghra ka rak kai lio ah hin kanu le kapa nih Maymyo NweSanda bawda ah an rak ka chiah. Bawda sianginn luh lai zerhkhat a duh ah kapa he siangngachia letkhan tu sazapa kan va ton i kapa nih sazapa sinah kan harsa deuh i hmakhatah bawda man kan pe kho lai lo i vuaithumli in pek dingah na kan zangfah kho hnga maw tiah a nawl. Sazapa nih Laimi krifa nan si ko lo maw tiah ka pa cu a hal i kan si ko,keimah zong hi Mandalay i Pastor tuan mi ka si a ti. Sazapa nih Laimi cu krifa nan si i siangngakchia zong nawl an ngai, an fel, an ding, ca zong an i zuam i distinction hna tampi an hmu i kan bawda min an that ther. Annu le anpa zong an biakam an fek i kan zumh tuk ko hna. Nan siarem ningpoh in rak kan pe ko u a ti. Hmaizah tele upat tein kapa kha a chonh.
Kapa nih kha ka fa na thei ko lo maw, kanmah hlan i a rak kai mi siangngakchia le annu anpa an dinfel ruangah Laimi dihlak midingfel ah an kan hmuh dih hi na thei ko lo maw, nangzong dinfel na zuam lai mu a ka ti. Kapa nih a chim thanmi cu Phakanh ah cun Lungcawhnak ah “Lawban lawng a lu sih di, Chin let ma khan” ေလာဘန္းေလာင္းအလိုရွိသည္ ခ်င္းလက္မခံ tiah ca an tial hi ka hmuh. A kong cu Phakanh i kuli a tuanmi Laimi an sual tuk le an hrokhrol tuk caah a si a ti. Laimi ciocio cungah Phakanh mirum pawl le Maymyo cathiam pawl i an kan hmuh ning a rak i dang tuk hringhran. Maymyo kaimi pawl dinfelnak nih Laimiphun a cawisan a lianhngan ter i Phakanh riantuan pawl saulnak nih laimiphun ningzahnak ah a huah ter.
Krifa mi nih kan i cawnpiak bikmi hi dinfelnak a si bik ko rua tiah ka ruah. Tuahsernak le thatnak in khamhnak hmuh ding le vancung kai ding ti cu kan i cawnpiaknak hrampi a si lo nain dinfelnak timi tuah sernak hi cu zumhnak he a then thiam lomi tilenga, thimlela bantuk ansi. Paul nih pum cu thlarau he a then ah cun a thi i zumhnak zong dinfel tuahnak he a then ah cun a thi a ti. Hlaphuahtu zong nih zumhnak cu rian ah lang seh ati. Dinfelnak a tel lo mi zumhnak cu a tlingmi a si kho lo ti a fiang. Dinfelnak kan ti mi cu tuahsernak ah a lang mi asi. Dinfelnak cu zuamnak, temhinnak le sikaan ngeihnak a si i, inunpi mi thil a si. Zumhnak, ruahchannak le dawtnak kong kan i cawnpiak lengmang mi hi kan nunnak ah langh lengmang ding asi. Dinfelnak in khamhnak co ding ti a si lo nain khamhnak co cang mihna nunzia ah cun dinfelnak nih a zulh lengmang. Dinfelnak nih nun thianhlimhnak, mahlemah i uk khawhnak le riantei hmakal nak a chuah pi.
Krifa minih kan dinfelnak ding a pakhatnak cu kan biakmi Pathian cung le krifabu cungah kan dinfel hmasabik ding a si. Zisu kri cu a pa Pathian hmaiah a dinfelnak a langh bentuk in Pathian hmuhnak ah kan dinfelnak ding le Kripum a si mi krifabu cung ah kan dinfel ding a si. Pathian cu kan thinlung kan khuaruahnak a hmu dih tu le kan samfa zong a rel kho dih tu a si i Pathian hmaiah zeihmanh kan thup kho lai lo. Kan thlacamnak, kan pekchanhnak le a rian kan tuannak ah kan dinfel a herh. Daniel le a hawi le Shadrak, Meshak le Abednego hna cu Pathian cungah an dinfel caah anmah nih thluachuahnak riansang an hmuh lawng si lo in miphundang le biaknakdang hna sin ah an Pathian thawnnak an langh ter i an miphun thang an that ter.
Dinfelnak cu Pathian cung lawng ah si lo in kan minung hawi cung zong ah kan langh ter ding a si. Mi dingfel mi cu zumhtlakmi an si zuangzal. Mi cung ah dawnak, zawnruahnak zangfahnak an ngei i nahchuahnak, zirngeihnak, thatlo tuahnak, hnahnawh peknak le sunghlio ternak an tauh lo. Joseph nuncan kan zoh tikah harnak a dotdot in a tong nain a umnak le a phanhnak hmu poh ah dinfelnak in a nung i a mah hrim hrim a nunank cawisan a ton lawng si lo in a chungkhar le a miphun zong Izyipt ramthabik ah a luhpi hna. Pathian lamhruainak in a tu cu laimi hi krifa kan si pin ah vawleicung ramkip ah kan phan cang. Vawlei cung miphunkip sin ah dinfelnak in kan miphun thang kan that ter lai maw? Kan chiat ter lai ti hi kan i ralrin ding asi. Pathian cung le minung ah kan dinfel pauh ah cun kan phaknak ram le hmun pauh ah cawisan kan tong ve ko lai. Zumhawktlak kan si lo le kan sual ah cun kanmah ningzah ton lawng si lo in kanram le kan miphun zong ningzah le thangchiat kan phurh ter lai ti hi kan ruah ding a herh.
Pathian le minung hawi cung lawng zong ah si lo in kan pawngkam thil le vawlei cung zong ah dinfel ding kan herh. Sermi thil le minih thatnak caah an tuah mi thil cung ah rawhral ter lo ding le thurhnomh ter lo ding zong in sikaan kan ngeih a hau. Kan umnak kan pawngkam minung hna nih an duh lo mi nuncan ziaza, thutdir le chonhbiak ning zong kan i ralrin thiam a hau.
A dongnak ah kanmah le kanmah cung ah kan dinfel ding a herh. Mifim mi hna bia ah mah le mah i uk khawh hi thawnnak nganbik a si an ti. Mah le mah i uk khawhnak ah a herhbik mi cu sikaan ngeih a si. Mah pumsa le nunnak i zoh kheng thiam, i thianhhlimh thiam le i cognhhramh thiam te hna hi dinfel pakhat a si. Thathut le canhman thiam lo hna hi dinfel lo a si. Pumsa damnak le than cho nak a dawntu thil thalo le thilthiang lo hman hna hi dinfel lo ruang ah a si. Dinfel lo nak nih zawtfahnak, nunkhua tawinak le sifah tumchuhnak a chuah pi.
Hlan lio ah dinfelnak arak tanh mi laimiphun le Pathian zummi Lami khrifa hna nih kan phaknak ram le hmunpauh in Pathian hmai ah siseh, kan minung hawi sin ah siseh, kan pawngkam thilri cung le kanmah le kanmah cung ah zumhawk tlak in kan dinfel ah cun kanmah pumpak nih thluachuah kan cohlan pin ah kan ram le kan miphun zong lianhngan thluahchuahnak a hmu lai i kan sual le kan dinfel lo ah cun kanmah he kan miphun he thangchiat le ningzah kan tong lai ti hi ruah ti ding ah kan sawm hna.
