( July 31, 2011 PCCF Weekly Online Sermon

ZULTU THA

Baibal Cherhchan Matthai 16:21-27

By

Pastor Ram Ceu Hnin

Biahmaikal:

Vawlei chan kal ning nih a kalpi cuahmah mi Ni le Caan chung ah Pathian dawtnak thawng in PCCF kan nih vialte hna zong 2011 cacawn kum dam te-in lam a kan hruai tu kan Biak mi kan Pathian a hmasabik ah a min ka thangthat. A tubantuk in caan a ka petu hruaitu Upa nan dihlak cung zong ah ka lawm i hmailei nan riantuannak ah Pathian tu nih lam in hruai ko hna seh.

A tutan ah kan dihlak in iruahti hna usih ti ka duh mi cu: Matthai thawngtha 16:21-27 chung i kan Bawipa Jesuh nih a zultu hna sin ah a ton hnga ding mi biathli a ruah mi hna kong hi kan dihlak nih zoh hna usih ti ka duh. Hi thawngtha chung ah Jesuh nih a chimmi chung in a biapi in langter ka duh mi thil Phun 6 in zoh hna uh sih ti ka duh.

1. Mah ruahnak

Kan nunnak ah hin voi tampi cu kan mah kan ruahnak in nun le tuah/tuan kan hmang, a ruang cu kan hmai ah thil a cang mi phun pawl hi kan duhlo mi phun a si tikah cu cu kan ralbantuk ah kan hmuh, cucaah minung kan sinak nih a hei phanh khawh ti lo mi pin lei ah khin Pathian nih khua a khan mi a um ti hi kan zumh ngamlo ruang ah asi, Cu bantuk in Jesuh nih hmailei i a ton te hnga mi thil kong a zultu hna sin a chim tikah Peter nih Jesuh cu hmundang deuh ah a kal pi i a sik ti kan hmuh, zeiruang ah dah Peter nih Jesuh hi a sik hnga ti hi kan nunnak ah tuak le ruah a hau. Jesuh nih cun Peter cu thalo te in a sik. Pathian ruahnak le nangmah ruahnak cu zeitindah a khah khawh lai a ti (Mtt.16:21-22). Cuvebantuk in nihin laimi hmundang ram dang ah sianginn a kai mi lawng silo in hmunkip ramkip ah khua a sa mi kan dihlak zong nih hin Pathian duhnak hi zeidah a si ti hi a hmasa ah kawl khawh le hmuh khawh izuam hna u sih, cu ti kan hmuh khawh nak hnga ding ahcun kan mah ruahnak le kan mah duhnak kha hmai ah chia lo in kan Pathian duhnak tu kha zeidah a si ti in nifa ruat in a mah sinah kan nun kan pek hnu lawng ah kan sianginn kai nak siseh, pumpa cawmnak rian kan tuannak, ramkhel rian kan tuannak ah siseh, Pathian rian kan tuannak ah siseh, vawlei kan nunchung pauh Pathian duhnak kha kan nunnak ah a ngan bik a si ahcun zultu tha dirhmun ah a mah Pathian bia nih lam a kan hruai zungzal lai ti hi a pa khat nak ah sawm kan duh mi hna a si.

2. Tuarinn khawhnak

Ni hin laimi khrihfa kan nunning le Pathian kan biak ning zoh tik ah hlan lio khrihfa hna an nunning le Pathian an biak ning he hin cun a lo hrimhrim rua lo tiah ka hmuh. Cucu zeidah asi ti ahcun Mtt 16:24 chung ah Jesuh nih a zultu hna sin ah a chim mi bia pakhat te cu “A hohmenh nih zulh nan ka duh asi ahcun nanmah le nanmah nan iphilh i nan mah vailamtahnak khan an i put i nan ka zulh a herh” a ti hna. Zeiruang ah dah Jesuh nih hi bia hi a chim hnga ti hi ruah awk ah a herh ngai mi asi tiah ka hmu. A ruang cu Hlan lio kan Pu/pi hna cu Pathian an zumhnak Pathian an biaknak ah zeihmenh nih a don khan kho hna lo. Nihin khrihfa mi nih Pathian kan biaknak le kan zumhnak ah tah zeitel nih a kan don khan maw? Ti hi ruah a hau cang. A tu ah lai mi Pathian kan biak tik ah a kan donkhan tu thil a tam chin lengmang cang, hi hi tah zeiruang ah dah asi hnga ruat cang hna uh sih. Jesuh nih ni donghnak lai ni ah a zultu vialte kha a auh hna i bia a ruah hna hlan ah atuah mi thil pakhat kan i nunpi awk ah ka duhmi cu: “Nan Bawipa le nan Sayapa keimah nih nan ke kan kholh hna a si ahcun nannih zong pakhat le pakhat nan ken nan ikholh ve awk a si,” a ti, (Johan 13:4-14). Nihin laimi kan nunnak ah Pakhat le Pakhat ke ikholh piak cu chim lo midang cungah Bawi si, nawl ngeitu si le mahnak in aniam deuh mihna kha namnet (nek) i an cung ah um le thut hi kan duh tawn, cu nih cun kan khrihfa sinak ah zultu tha kan sikhawhnak hnga ding caah kan thanchonak ah a kan dawn tu ngai thil pakhat ah an hung cang tawn. Nanmah lakah pakhatkhat nih a hamsabik si nan duh ahcun sal/sinum asi hmasa a hau. Mi Fapa cu riantuanpiak mi si loin riantuanpiaktu (Servant) “Sal” si awk ah ka ra,"a ti,(Mtt 20: 26-28).Roman Catholic hi an zumhnak ah cohlan khawh lo ding a tam ngai nain, Pope nih Bishop pawl rian a pek hna tikah an ke a kholh piak tawn hna mi zoh tik ah duh a nung ngai.) Cu cu nihin lai mi Khrihfa kan nun zong ah cawn awk a tha ngai mi le kan biak mi kan Pathian nih siter a kan duh piak mi a si ti hi philh hna hlah uh si ti hi ruatcang hna uh sih.

3. Mah sinak Philh

Emanuel Kant nih a chim mi cu “Pathian cu a zungzal a tha”, “Asinain Khrihfa kan zumhnak ahcun Thlarau lei ah kan ral nganpi Pathat asi ti” Chimduh mi cu Khrihfa kan nunnak ah voi tampi cu Bawipa cu a tha tuk i zeiti kan um zong ah a kan ngeihthiam ko lai ti mi ruahnak nih kan nunnak thinlung ah thazang peknak le forhnak a ngeih tikah kan mah zumtu a si mi lei in zeihmenh tuahhau lo a mah kan thangthat mi hi a za ko ti chim lengmang a si tikah mah sining ibochannak, pumh zuamnak lungthin kha a tlau ter. Phungthlukbia 6:16-19 ah a kan cawnpiak mi cu “Bawipa nih ahuat mi thil paruk a um, a fihmi thil pasarih an um i cu hna lak ahcun thatlonak lei ah khua a khangtu kan “Lungthin” a tel ve. Cu tikah kan lungthin nih zeihmenh a tuah tuan huam ti lo tikah Pathian kan zumhnak ah kan thazang a derthawm ter i kan zumhnak zong kha a tlau ter, Cu tikah zumtu tha kan si khawhnak hnga ding caah cun kan mah sinak in kan kawl a si ahcun zeihmenh kan hmu kho lai lo. Cu cu kan baibal ca chung ah fiang te in kan hmuh khawh Mtt 16:24 ah Jesuh nih a zultu hna cu a thawh hna “ Ahohmenh nih zulh nan ka duh a si ahcun nanmah le nan i philh i nan vailamtahnak nan ni put i nan ka zulh a herh” tiah a ti hna, hi ka zawn ah Jesuh nih a kan cawnpiak mi cu Pathian duhnak kha nanmah duhnak lei ah mer hlah uh, nan mah sinak kha kaltak uh law Pathian nih an fial mi hna rian kha Pakhat nak ah chiah i zuam uh ti hi a si.

4. Nun ngamh

Laimi kan zatlang nun kan zoh tik ah thil hi a fawi te in chim le rel kan hmang theo tawn, kan zumhnak lei a si ah, vawlei lei asi ah kan chim tawn mi cu mah rian ah hin cun thih ka ngamh tuk, Nangmah co lo ah cun thih ka ngamh ti le lai lei i Phung kan chim ah cun kan or zong hi a pit dih i vanmi nunnak hmanh in kan thianghlim deuh rua ti awk khin kan um nain rammui lak i Pathian bia chim le Pathian riantuan cu kan ngamh bak tawn lo. Tleicia kan pa Rev. Dr. John Cuai Sang nih a rak chim mi bia pakhat ka lung ah a tang ngai mi cu:”khrihfa kan nunnak ah hin thih ngamh nak in Nun Ngamh hi a biapi deuh” tiah a rak kan chimh mi ka tuak tik ah nihin zumtu hna nih kan zumhnak ah hin nunngamh hi kan rak hau hrimhrim, a ruang cu Bawi Jesuh zong nih a zultu hna sin ah a chim mi cu khah ka dua le hna hmai lei ah riantuan tu nan si vete tik ah a mah nunnak humhak a duh mi nih hin cun zungzal nunnak chung a luh vete tik ah laksawng a ngei lai lo hih, cu caah mah nunnak hi pek a hau, Khrihfa kan nunnak ah thil a biapi ngai mi pakhat cu kan nunnak ah hin zeibantuk thil kan tonpauh ah Nunngamh nak ngeih hi kan Baibal nih siter a kan duh mi a si.

5. Pumpek Nun

Pathian rian kan tuan kan ti tik ah voitam pi ah hin cun kan tuan mi riancung ah ilung silo nak kan ngei theu tawn, cu tikah a chuak mi cu kan rian kha kan dawt lo caah le kan upat lo caah a si i a phi a hungchuak mi cu hlawhtlin lo nak nih a hun zulh tik ah kan phunzai theu tawn, cu caah Paul nih Rom khua mi hna sin ca a kuat mi hna le a chawnpiak mi hna cung ah kan hmuh mi cu pakhat le pakhat kha i dawt cikcek uh law i hmaizah uh, fakpi in riantuan uh nan tha thu hlah uh. Tiah a cawnpiak hna, Laimi Thlarau lei in ka pa a si mi Rev. Dr. Stephen Hre Kio nih a chim mi bia ka uar ngai mi cu: Pathian sin i a pum aa pe taktak lomi nih Pathian caah thilpipa an tuah ngaingai bal lo. Pathian sin i pum aa pe taktakmi sinah Pathian tthawnnak a phan i cuticun Pathian caah thilpipa an tuah khawh. Pumpek timi hi (Life Commitment) nun chung vialte ca i i pek khi a si tiah a chim, Kan pumsa, kan lungthin, kan fimnak, kan caan, kan thazaang le kan chawva tiangin aa tel dih. Luke 12:16-20, Jesush nih amah ca i rawl tampi a khongtu mirumpa in bianabia a chim: "Pathian nih cu mirumpa sinah a chim mi cu: 'Mihrut, tuzan hrimhrim ah na nunnak a dih lai. Na ca i na khon ciami na thilri vialte hi aho nih dah a co lai?" a ti lai" tiah a chim.

Mah zawn lawng ruatin mah ca lawng i thilri khon lengmang hi Pathian hmai ah"Hruh" asi.
Paul nih; Ka u le ka nau hna, a lianngan mi Pathian zaangfahnak ruangah hin nan pumpuluk in a thiangmi le Pathian lunglawmh tertu cohlanawk raithawinak bangin Pathian sinah pe tuah u, tiah kan sawm hna. cucu Pathian sin i nan pek awk a simi biaknak taktak cu a si," tiah a ti. (Rom 12:1)."Kan nun ahcun Bawipa ah kan nung; kan thih ahcun Bawipa ah kan thi," tiah Paul nih a ti bantuk in zei rian kan tuannak hmun pauh ah mah ca lawng si lo in mah hawi a si mi le kan biak mi kan Pathian sunparnak caah ti in kan tuan a si ahcun Cucu a tlam a tling bikmi pumpek nun ngeih cu a si hnga.(Rom 14:8)

6. Tangdornun

Khrihfa zumtu kan thancho nak ah thil akan don ngai tiah ka ruah mi cu Tangdor nun kan ngeih khawh lo mi nih hin kan khrihfa sinak a muru hi voitam pi ah cun a hlohthlau tawn tiah ka hmuh. Laimi cu a porhlaw ngai mi kan si tik ah tangdor nun hi kan ngei kho lo, Cu tik ah Pathian nih hman ding tluk in a kan hmang lo thluachuah zong hi hmuh ding tluk in kan hmu kho ti lo,phak ding zong kan phan kho ti lo cu tikah kan hmuh hnga mi zong duh ning tluk in kan hmu kho ti lo cu cu tangdor nun kan ngeih lo ruang le kan ni porhlawt ruang ah asi theu tawn. Bia kam hlun cauk chung i minthang bik pakhat, Pathian i a hmanbik mi cu Moses a si. “Moses cu zeiruang ah dah Pathian nih a hman khun hnga ti hi kan zoh a si ah cun Moses cu mi tangdor a si pin ah milungnem ngaingai mi zong a si, Cu caah a mah cu vawlei pumpi mi vialte lakah lungngembik a si," tiah a um. cucaah Pathian nih a hman khun nak hi a si. Prophet Isiah nih a chim ve mi cu: Mi toi ah a dor i an sualnak a ngaihchih i a ka tih i ka nawl a ngai mi cu an cungah ka lung aa lawm, tiah a ti. Cu bantuk in Pathian nih a lawmh mi Pakhat cio kan si khawh ngak hnga ding ah Mi tangdor mi le mi lungnem kan si khawh nak hnga ding ah Pathian bia hi kan nunnak ah nunpi khawh izuam hna uh sih.

Biatlang komhnak:

Zeitindah Zultu Ttha kan si khawh nak hnga ding caah tiah Zumtu Pakhat cio kan nunnak ah Jesuh nih a kan cawn piak mi cu:

Mah ruahnak nun kan hlawt le thlau ding a kan fial

Tuarinn khawhnak nun a zungzal kan ni tlaih a hau

Mah sining philh a hau (i Seihchiah tuk lo ding)

Nun ngamh hi kan nun ah a si ding a si, (Thihngamh hi Jesuh nih a duh lo)

Pumpek nun hi kan tlaihtleng a si awk asi

Tangdor nun in zeithil pauh kan tuah/tuan khawh ding hi a zungzal kan izuam awk ah ka Bawipa Jesuh nih siter a kan duh piak mi a si.

A cung lei thil phun 6 hna nih a kan cawnpiak mi cu Hruaitu ttha kan si lo hmeh ah Zultu Ttha kan si khawhnak hnga kan dihlak nih izuam hna usih law cu ti kan izuamnak cung ah kan mah sinak irinh lo in kan zumh mi Jesuh nih zeidah siter a kan duh piak mi a si ti kha a hmasa ah thei hngalh khawh le inunpi ding a kan fial, cu ti kan nun a si ahcun Amah Jesuh zultu ttha kan si lai i laksawng a hmu mi zumtu ah amah nih lam a kan hruai zungzal ko lai ti hi nan dihlak sawm kan duh mi hna asi. A rel tu nan dihlak cung ah Pathian nih Nifa kan nunnak caah thilthar kan hmuh kan theih/hngalh khawh nak ding caah thlua kan chuah piak seh law, Pumpak Pakhat cio nan cungah a mithmai thar in tlanter ko seh….Amen..

Sunday, July 24, 2011 PCCF Weekly Online Sermon

Thumthlak hrihrual cu a fek i chah a har

Bawipa thawhṭhan zingah thawngṭha a hrawmkho mi nan zapi cungah Bawipathluachuah a thar in um ko seh! Can ṭha can sunglawi a kan petu kan Pathian a min ka thangṭhat, Can tlatu le hruaitu upa nan cungah le zapi nan cungah ka lung a lawm hringhran ti kha chim ka duh.

Tu zingah hrawmṭi ding ka thimmi bible cu Phungchimtu 4:9-12 a si la. Zapi relṭi hna usih.

Pahnih cu pakhat nakin an ṭhahnem deuh, zeicahtiah an ṭuanmi rian khan tam deuh an hmuh khawh. Pakhat kha a tluk sual ahcun pakhat nih khan a bawmh khawh. Sihmanhsehlaw mi pakhatkhat cu amah lawng a si i a tluk sual ahcun a poi ngaingai ko amah a bawmtu ahohmanh an um ti lo. Khua a sih tikah pahnih in hmunkhat ah nan ih ahcun nanmah le nanmah kha nan i lumh kho, sihmanhsehlaw nangmah lawng cun zeitindah naa lumh khawh lai? Pakhat lawng a teitu ral kha pahnih nih cun an rak doh khawh lai. Thumthlak hrihrual cu chah a harmi a si.

Biahmaitthi:

Tulio Laimi hrihfa hna hi hmunkip le kakip ah kan um kan I ṭhen hna. Panhnak hmun cio ah khrihfabu le hawikomhnakbuu tete um cio a si. Pathian thangṭhatnak zong kan ngei cio hna. Bawipa lam hruainak thawnglawngte an si ko. Laimi cu dawtnak le zawnruahnak thlachiat ruahnak thinlung a ngeingai mi kan si kan titawn nain can saudeuh um ṭi taktak ahcun a rem kho lo ngai mi le a daw kho lo ngai mi kan lo tawn. Cucaah chim ka duhmi cu Khuika hmun kan um zongah Laimi hi thumthlak hribang in I hrual ṭi peng ko hna usih, Miphun fate kan si ko zongah kan I komhṭhipṭep ahcun a nganmi miphun tluk in kan thawng ve ko lai. Cubantuk in kan baibal chung a kan cawnpiak mi zongkha zoh in kan nunak ah thumthlak hribangthual hna usih ti zong ka duh fawn. Cun pathum hna cu:

1 Dawtnak:

Khrihfami hna kan nunnak kengruangruh pi a si vemicu Dawtnak hi a si. Ahmun zungzalmi thil pathum an um Cuhna cu Zumhnak le ruahchannak le dawtnak an si, cu hna lak I a nganbik mi cu Dawtnak a si.Ikorrin 13:13.Cucu John 3:16 ah Pathian vulei a dawttuk caah a fapa ngeih chunte kha apek a ti. Dawtnak thinlungin vulei ah Jesuh khrih cu a ra. Cucaah John15:12 ah keimah nih kan dawthna bantuk in pakhat le pakhat zong I daw ve uh a kan ti. Rom 12:10 ah Pakhat le pakhat kha Khrih ah u le nau bantukin I daw cikcek u law pakhat le pakhat kha I hmaizah u. Filipi 2:2

Kan fial duhmi hna cu hihi a si: lungthin ah ikhat u, pakhat le pakhat idaw u, lungrual tein um ulaw kaa lawmhnak hi tlinter u. Hebru 13:1 Khrih chungah unau nan si bantukin pakhat le pakhat I daw zungzal u. Thilrit phunnak ah a thawng cem mi cu Dawtnak hi a si. Mah dawtnak in kan khrihfabu le khua le ram, kan I hawikomhnak bu hna le Kan miphun hna hi phurh I zuam cio hna usih.

2 Dinnak:

Laimi phun cu dinnak a ṭanhmi le a dingmiphun kan rak si ko. Kan pi le kan pu chan lio ahcun inn ka hmenh hrenh a rak si lo. Mirang pawl zongnih Laimi cu a dingmi miphun an si ti mi kan rak si. Zei rianṭuan nak hmunpoh ah dinnak he a rak nungmi lai mi kan rak si. Tuchun ni ahcun Laimi khrihfa a timi nih dinnak cu kan kal tak ziahmah cang. Laimi umnak hmunah dinnak a um tu ti lo, din lo kha hmai asa deuh cangmi a lo cang. Kan laimi lakah din nak cu a kawl in kawl a hau ve cang I hmuh a har ngai cang. Chun laicer ah mei-inn fate i van in lam ah a vaak cuahmahmi Socarates cu siangpahrangpa nih “Zeidah na tuah” tiah bia a hal i a lehnak cu “Dinnak ka kawl” ati an ti.Dinnak cu miphun a lianhngantertu a si tiah Cathiang nih a kan cawnpiak ko nain lam i kawl a hauh ahcun fak deuh in ruah a hau cang. Khoika hmun kan phak hmanh ah kan nunnak ah dinnak a umlo ahcun kan thangcho kho taktak hnga maw? Hawi he teh rian kan ttuan kho hnga maw? Miding kan si tiah ai chawr vemi Laimi phun hna nih dinnak cu kan kaltak ko ne lai maw ?

3 Daihnak

Daihnak he pehtlai In chim ding nan ngei cio ko lai. Laimi khrihfami hnasin ah hi daihnak cu um taktak hnga maw?A piangtharmi, khrihfa ti mi hna um nak hmun ahcun daihnak in an khat ko lai,an khrihfabu cu a dai zungzallai. kan mah nih zei tluk in chim rel khawh zongah, kan biakmi Pathian nih acohlan lo mi cu a sawhsawh a si ko kan ti lai. Jesuh khrih cu a chuahhlan in Isaiah n ih a chim cang, A mah cu daih nak bawi a si lai,cu a chuahka zongah van mi nih an rakchim mi cu aumnak nak vuleiah rem nak leng ko she an ti. Johan 14:27 “Daihnak kan chiahtak hna, keimah daihnak cu kan pek hna. Vawlei nih an pek hna bantukin kan pe hna lo. Lungrethei le vansang au in um hlah u: nan thin zong phang hlah u”.

Biadonghnak:

Dawtmi ulenau hna nifatin kan nun nak ah hin a ram cu a daizungzal lai,a ti bang kan Ram cio ah deihnak um cio maw?A ding mi le dawtnak a ngeimi, daihnak a ngai mi kan si cio maw?Dawtnak , daihnak, le din nak hna cu kan ram, kan khua le khrihfabu sin ah biatak in kan chim le kan rel cu a herh bak mi a si. Ka chim duhmi cu Laimi khrih fami nih hin3D hna hi thumthlak hri bang kan hrual awk asi.Dinnak, dawtnak le daihnak um nak hmun ahcun Jesuh khrih cu a um ko lai. 3d hi thum thlak hribangni hrual ṭi uh sih law, Vancung pennak cu vulei ah hin a tlung ko hnga.cucaah dawtmi u le nau hna, tuzing I ka chim duh bik mi cu dinnak,dawtnak le daih nak hi thumthlak hribang in hrual hna u sih.

Lomhnak tampi he,

Pastor Cung Bik

Cavite, Philippines

(July 17, 2011) PCCF Weekly Online Sermon

Nawlngaihnak nih a chuahpi mi le nawlngaihlonak

nih a chuah pi mi (1 Sam.15; 22-23)

By Amos Sang Hlei

Pathian nih cantha cansunglawi akan pek mi cungah lomhnak tampi ka ngei. Zeicatiah cun hitibantuk in thawngthabia chimnak caan ka hmuh ve caah a hleice in Bawipa min ka thangthat ko. Tuzing ah i ruah tti hna usih ti kaduh mi cu siangpahrang Saul nawl a ngaih lo ruangah Pathian nih siangpahrang sinak in a tthumhnak le nawlngaih lo cu ttih a nun zia le nawlngaihnak nih a chuah pi mi lunglomhnak, thluachuahnak a si zia kha ruatti hna usih ti ka duh.

A tawi fiannak in Israel mi le Saul siangpahrang kong kan van zoh ta lai. Israel mi hna cu pathian nih Egypt ram sal tannak hmun in a van chuah pi hna I thase ramcar chung in khin Canaan ram (a kamh mi hna ram) an luh tiang siangpahrang an ngei bal lo. Pathian cu an siangpahrang le an uktu a rak si. Cu chung vial te cu “biaceihtu” (judges) nih an rak hruai hna i Samuel hi a donghnak bik biaceihtu a si I cun prophet zong a si mi a si. Samuel chan cu a hung si i cu tikah Israel mi hna nih siangphrang ngeih kha an duh ve (Chap.8) zeicatiah cun an pawng an kam I a um mi hna ram cu uktu siangpahrang an rak ngei dih cang. Cubantuk cun Israel mi hna nih cun siangpahrang ngeih kha an duh ve tik ah Samuel hmang in Pathian nih Saul cu Israel siangpahrang ah a rak thim. Cu ticun Saul cu Israel siangpahrang a hmasa bik a si I kum 40 hrawng a uk hna.

Sihmanhsehlaw Pathian nih Saul cu a hlawt, zei ruang ah tiahcun Bawipa nawl bia a ngaih lo ruangah a si. Avoi (1) nak Chap.13, voi 2nak Chap.14, voi 3 nak Ch.15 chungah Amalek mi hna dohnak kongah khan a si.

A cheuchum lawng nawlngaihnak

Pathian nih Saul cu Amalek mi kha va kal law va do hna, na tei hna lai i an minung si hnaseh an sattil sihnaseh na thah dih hna lai…na zuah hna lai lo tiah nawl a pek. Cu tikah Saul nih cu Bawipa bia bang cun akal I Amalek mi hna cu a va tuk hna I a tei taktak hna. Sihmanhsehlaw Bawipa bia kha tling tein a zul lo, an siangpahrang pa Agag zong a that loh cun an cawtum thau hna le an sathil thau mi pawl zong a zuah hna, a that hna loh, raithawinak ah a ti…Saul nih raithawinak ah a ti tikah kamkhat lei van ruah duak ah cun thil tha a si ko lo hme maw ti awk in a um. A si nain Bawipa duhlo zawng tak a raksi. Hi kaah van langhter ta ka duh mi cu a caancaan ah cun Pathian kan biaknak ahhin kan mah duhning in Pathian kan biak tawn. Phundang in van chim ahcun minung nih kan thluak in kan tuak i cu chungah cu Pathian hi khumh kan timh tawn, kan mah nih atha arem kan ti ningin kan biak ve tawn. Kan mah duhnak tu ah luhpi kan timh tawn. A taktak le a ngaingai ah cun Pathian duhnak chung tuah khan sermi thil vialte hi a cawl a cang I khua a sa ding kan rak si. Pathian duhnak tu hi kawl le hmuh khawh I zuam hna usih tiah kan sawm tthan hna.

Cun hi ka zawn ah afiang mi hna cu pathian nih a cheu bang lawng nawlngaihnak hi a duh lo ti kha a lang. Pathian hmaika ahcun a cheubang lawng nawlngaih cu nawlngaih lo he ai tluk bak mi a si. Tling tein a nawl ngaih hi a duh mi cu a si. Cucaahcun nawlngaihnak hi a biapi taktak mi a si. Kan krihfabu chungah siseh kan zatlaangnun ah siseh kan innchungkhar ah siseh, pumpak kan nunnak ah siseh nawlngaihnak a umlo ahcun “daihnak” a um kho ve loh. kan lakah daihnak umseh ti kan duh ahcun nawlngaih hmasa a hau. Saul zong Bawipa bia angaih lo tikah a cungah daihnak, hnangamnak le lomhnak aum kho ti loh. Cucah nawlngaih lo nih a hei chuahpi micu thihnak, fahnak tehna, sunghnak te hna, lungretheih vansan aunak tehna kha an si. Kan Bible chungah hin nawlngaihlo ruangah harnak atong mi tampi kan hmuh hna. Adam le Eve (Gen.1-3) ah Pathian nawl an ngaihlo ruangah Eden dum chung in chuah lawng hmanh siloin thihnak tiang in a chuak. Cucaahcun Adam sualnak kan ti tawn mi hi nawlngaihlo ruangah a chuak mi a si. Cun Jonah zong Bawipa nih kal a fial nakah akal duhlo ruangah Ngapi pawchung tiang a phan, vansang au in a um khah. Cun Israel mi phun zoh rih hna usih, Bawipa bia an ngaihlo ruang ah kum zeizat dah miphun dang kut tang ah sal ah an tan? hremnak an tuar? Hi vialte hi Bawipa nawlngaihlo ruangah a chuakmi lawngte an si dih.

Nawlngaih cu thluachuahnak

Sihmanhsehlaw nawlngaihnak nih a chuahpi mi cu thluachuah hmuhnak, lunglomhnak asi. Abraham (Gen.12:1-4,22:1-20) Bawipa nih kal a fial nakah a kal, cun a fapa ngeih chunte hmanh kha Bawipa nih raithawinak rak kape ati i a fial bantuk in a tuah ko. Cucaah Abraham cu Pathian nih thlua achuah I miphun hna hringsortu le zumhnak lei zong ah “Pa” tiah ti kawh asi. Jesuh nawlngaihnak (Phil.2:1-11), Peter nawlngaihnak (Lk.5:4 -10), cun Deut.28 chungah Bawipa bia ngaih cu thluachuah hmuha asi zia, miphundang uktu sinak tehna, cinthlak nak leiah siseh, satil zuatkhalhnak ah siseh thluachuah hmuhnak asi zia kha fiangtein kan hmuh khawh. Cun Bawi Jesuh nih a timi cu “ka bia a ngai I ka nawl a zul mi cu zungzal nunnak an hmuh lai a ti. Cun John 14:15 ah Jesuh nih “If you love me keep my commandments” ati. Cucaah cun Bawipa nawlngaih hi a mah lungton khawhnak zong a si I thluachuah hmuhnak zong asi I zungzal nunnak hmuhnak zong asi tihi atharin thei than hna usih ti kaduh.

A donghnak ah A.D 410 lioah khan Augustine nih a chimmi cu “thilttha vialte a chuahpi tu, a hringtu cu nawlngaihnak a si” tiah a rak ti. Cucaahcun theology thatha, fimnak thiamnak thatha hnahi nawlngaihnak nih a zulhlo ahcun aping an su tawn anti. Cun zumhnak kan timi zong amah Pathian duhnak tuahnak aitello ahcun athi thiamthiam ve anti. Cucaahcun Pathian nawlbia ngaihnak in kan nunnak kanhman ahcun kan minung hawi he I remnak, I dawtnak, thluachuah hmuhnak lam a si tihi kan zate in van thei tthan hna usih ti kha a thar in kan sawm tthan hna. Hi sermon tawite hi a theitu a reltu le a ngaitu nan zate hrangah Bawipa a hna a tlak ahcun a mah nih thluachuahnak kan pek piak hram ko seh. Amen!

By Amos Sang Hlei