Sunday, March 25, 2012

Khrihfa nun cu Khrihcaah nun nak pek hi a si

Tuzing Bawipa thawhṭhan zingah damte le lawmtein a thawngṭhabia a hrawmtu zumtu nan zapicungah Pathian thluachuah a tharin um ko seh! Pathian dawtnak le PCCF dawtnak thinlung he thawngṭhabia a kan chim tu Ptr.Cung Bik cungah lunglawmhnak langh ter kan van duh. Khrihfa nun cu Khrih caah Nun hi a si timi pehtlaiin an kan chimh i kan i lawmhnak a sang chin.



Dawtmi zumtu unau, khrihah pumkhat a si mi nan zapiten an kut kan tlaih hna, thawngṭhabia i hrawmṭidingah ka duhmi cu khrihfa nun cu Pathian ram caah nunnak pek in ṭuan hi a si ko. Mission rianṭuan hi a si kan ti lai cu, mah he pehtlai in chim ka duh. Zumtu hna kan nunnak hram cu Khrihcaah nun i pek hi a si. Cucu kan bible chungah hmuntampi ah hmuh khawh a si.

Pastor Cung Bik

Khrihfa timi cu Khrih caah nun hi a si

Galati 2:20,Filipi 1;21, Rom 6:4, John17:15, John17:18

Filipi 1;21 Nunnak hi ka caah zeidah a si? Kei ka caah cun nunnak cu Khrih a si ko.

Zumtu hna kan nunnak/kan thawnnak cu Khrih a si.

1. Galati 2: 20 cucaah a nungmi cu keimah kha ka si ti lo, ka chung i a ummi Khrih tu hi a si deuh. Atu i ka nunmi nunning hi, a ka daw i ka ca i a nunnak a pemi Pathian Fapa zumhnak thawngin ka nung. Paul nih Galati khuami hna sinah ca a kuatmi hna kan zoh tik ah tu i a nungmi hi ka chungah a um mi khrih a si a ti. Dawtmi unau caan tampi ah khrihfa ka si kan ti, thlarau in ka khat kan ti, zumhnak nung ka ngei, Ka piangthar, kan ti, sihmenhsehlaw caantampi ahcun cu kan zumhnak/khrihfa ka si kan ti nak hna cu a lo i kan ralpa sehtan nun in kan nun caan a tam theo, Zumtu khirhfa ṭha taktak a si mi nih cun nifatin kan nunnakchung ah Khrih kha kan nunter deuhawk a si ti kha kan bible nih a kan cawnpiak mi cu a si. Na nunnak i lam an hruaitu/ nunnakṭhawnnak an petu kha mizei dah a si ve? Pawl nih cun tu i a nungmi cu keimah si lo in ka chungah um mi khrih tu kha a si deuh a ti. Kan chungah nunnak/thawnnak a kan petu hi khrih a si ve cio hnga maw?

2. Filipi 1;21 Nunnak hi ka caah zeidah a si? Kei ka caah cun nunnak cu Khrih a si ko. Pawl i a nunnak ahcun kei ka nunnak hi cu Khrih a si ko a ti ṭhiamṭhiam. Cucu zeitin dah a si khawh ti ahcun khrih cu khamhtu le bawipa ah a co mi hna khrih an zumhnak ruangah tipil a ingmi hna i an tuahmi khan a hungfiang chinchin lai ka zumh. Cucu Rom 6:4 Cucaah tichung i tipilnak kan vung in ah khan amah he vui ṭi kan si i a thihnak ah khan kan thi ve; cu bantuk ṭhiamṭhiam in Khrih cu Pa sunparnak ṭhawnnak nih a thawhter bang khan kannih zong nunnak thar ah kan nung ve lai. Dawtmi pathian fa le hna khrih thihnak le thawhhan nak a zum mi kan nih zong nih teh cucu kan cohlan kho taktak ve maw? Cu khrih a zumtaktak mi hna nih kan nun dingmi cu a mah khrih caah nunnak pek in nun kha a si ko. Ka piangthar ko e kan ti taktak ahcun Khrihcaah nunnak pek in a rianuan hna usih. Khrih he nan um ahcun hawnnak na ngei lai i na tuahduhmi kha na tlantling fawn lai.Khrih he nun i a biapituk hi mu …cucaah Khrih nih a kan cahmi bia cu a thawngha au pi le a zum lo tu hna sinah khamhnak thawngha va aupi i zumtu ah va serding kha an kan cawnpiak i an kan fial mi rian zong a si cucu Mtt 28:17-19 ah fiangte in kan hmuh.John17:15 Vawlei cung hin la hna tiah kan nawl a si lo, sihmanhsehlaw Mi Ṭhalopa sin khan him tein chia ko hna ti kha kan nawl, a ti Dawtmi Pathian fa le hna fakpi in ruah hna usih law ti ka duh mi cu Kan mahbantuk a si ve mi minunghawi Bawipa dawtnak thei lo mi hna mitampi an um rih, sualnak hmun ah a ciahmi unau an um, phundang i chimahcun khrih nih a ka dawt i a kan khamhnak thawngha a thei lo le a cohlang kho lo mi hna tampi an um kha philh hlah! Mah hna caah khan khrihnih rian uan dingah an fian mi na si zongkha thei pengfawn law .. Na dawtmi na minung hawi a zum kho ve rih lo mi hna caah Na thlacamnak le na chawnva, na caan pe zungzal rih ko. CuCu khrihfa i a nunnak cu a si. Kan Chungah a nungmi khrihnih an fial mi rian lianngan bik cu a si. Keimah na ka thlahban tuk in vulei um mi kha kei zong nih rian ka pek ve hna, mah na thawngha chim dingah ka fial ve hna a ti.John17:18 Vawlei ah na ka thlah bantukin kei zong nih vawlei ah ka thlah ve hna. Nang mah le kei mah kha vulei i thlah ve mi hna cu kan si. John 17:4 Vawlei cungah na sunparnak cu ka langhter cang; na ka fialmi rian cu ka lim cang. tiah John nih a ti bantuk in khrih a zumtu mi hna nangmah le kei mahnih kan ti kho ve hnga maw?

Biadonghnak

Dawtmi khrihah unau Pathianfa le hna i nun nak a si dingmi cu khrih he nun i , Khrih cu kan hawnnak thazang ah ser khawh i, Cu kan hawnnak thazang vialte cun Bawikhrih ram kauh nak ding caah rian lianngan kan ngei cucu kan nunchung i kan lim khawh ve dingah i zuam hna usih law ti ka duh. Khrihfa na si ahcun Khrih caah nunnak pe, Na chawva le na caan pek a herh, Nangmah pumpak zong in uan. Khrihfa si mi kan nunnak cu Khrih ramkau ter, sehtanram bitter kha a si. Mission na uan awk hrimhrim kha a si.

Kanzapi caah Bawipa nih a thar in thluachuah kan pekpiak ko she!

Cung Bik ( Thawng Thawng pa)

Philippine

Tuesday, March 20, 2012

Saya Sui Chan Lian le PCCF i ton nak


Saya Sui Chan Lian

PCCF:Na min le na chuahnak, na nu, na pa le Unau pawl a tawinak in nan kan chim kho hnga maw?

SCL: Keimah cu Benjamin Sui Chan Lian, ka chuahnak Hakha. Ka Pa Lian Hmung, Ka Nu Par Ṭial an si. Nau le pathum ka ngeih, David Lian, Bawi Cung Lian le Dawt Hmen Sung an si. A hniangbik ka farnu hi keimah min sak a si. Pathian dawtnak in Kumkhat chungah tanghra kan awng kho dih hna.

PCCF: Na sianginn kainak, nan um nak le na khrihfabu na kan chim kho hnga maw?

SCL: Tanghra awn tiang Hakha ah ka kai, Kumkhat le cheu ACTS Bible College ah M.div ka kai, cu dih cun Philippines ah ka phan i, Master of Divinity le Master in Arts Theological Studies ka dih. Hakha ah kan um, Khrihfabu cu Church on the Rock, kan Founder cu Pu Lian Sai a si.

PCCF: Na sianginn kai chungah sianghngakchia pakhat dirhmun in a harbik tin a ruahmi le, a nuambik tiah na ruah mi, na kan chim kho hnga maw?

SCL: A harbik tiah ka ruah mi cu, cawva lei in kan chamhbau ngai lio caan hna le, Philippines cu rian aum lo tikah, chungkhar kuat mi dah ti lo, mah tein kawl khawhnak lam a um tuk lo caah, lungre a theih ngaingai tawn. A tlangpi in cun, Philippines life cu a nuam ngaingai ko, democracy ram a si caah, kan zaa a long, zeipoah zalong tein kan chim, kan rel, kan tuah kho. Anuambik tiah cun kan cawn mi tlawmtling tein kan dih khawh ni khi a si ko.

PCCF: Hmailei na rian ṭuannak ding he pehtlai in, saduh na thah mi, na chungmang?

SCL: Hmailei kong a si caah Pathian tu nih lam ka hruai ko sehlaw, sianginn a ka kai ter cu Korea Ka pu le pawl hi kumtlawmtal cu an rian bawmh kai tim, khihnu pinlei zong ah kai tim mi cu a um ko. A tu ah kan chim khawh mi vialcu, kan ram le miphun caah kan ti khawhna lamkip in rianṭuan cu ka chunmang nganbik si ko.

PCCF: Philippines mino hna sinah thilṭha cawnawk tlak na hmuh mi?

SCL: Democracy ram chungah a chuah mi mino sinah cawnawktlak thilṭha tete cu an um ngai ko, an nih cu, courteous, frank, smiling face. i suai a um lo. i tamh an thiam , an hrim a hmui. Kan cawn tik hnaah a herh ngai tiah ka ruah mi cu, thilṭha kan cawn mi tu kha kan Lai nunning le sining lungput tlau lo tein cawn thiam le, mah cung tu ah ṭhatter le dawhter chin tu kha a biapi ngai tiah ka ruah.

PCCF: Kan Laimi nuning\ sining pawl thlending ah na sia a herh bik mi zeipawl?

SCL: Kan lai mi nunning/sining pawl cu thlending ka duh mi zeihmanh a um lo, Pathian nih hawi lo lo tein a kan pek mi kan sining le nunning hi a tha bik ko. Asinain, cawnding lawnglawng kan hau (ngei). Cucu, Ralkap- uknak tang i kan lungput hi democracy uknak lungput lei tu in duhsah tein kan cawn a herh. Uknak that ahcun a mah tein zeipoah kan thiam dih te ko lai.

PCCF: Laimi Mino tampiin Philippines ra ve cio hna sehlaw tiah ah na duhpiak mi hna hi zeiruang ahdah a si?

SCL: A si ko, No lio tein ramdang sianginn kai khawh ahcun a ṭha, zeicaah tiah, mino cu an leidang a zaang a nal caah, holh zong caan tawite ah an thiam kho, hawi sining le nunning zong caan tawite ah an cawnthiam kho. Asinain, khatlei kham ah ralrin awk tete zong a um ve mi cu, democracy ram a si caah, luatnak kha a chiatnak lei in an hmang lo tu ding kha abiapi ngai mi a si.

PCCF: PCCF sinah siaherh bia chimh na kan duhmi a um maw?

SCL: PCCF hi i hawikhomhnak hmun a si pinah, kan nu inn pi bantuk a si, A si khawh ahcun Philippines kan um chungah ahohmanh mah isolated in um lo tein, kan nu kan pa hawikhom inn bantuk ah ruah in, Kan ruuninn pi ahhin hawikhomhnak ngei kho cio ve lengmang hna sih.

PCCF: Tlangval liote ah a nuam mi ram si ve mi Philippines in na lim khawh mi cungah kan in lawmhpi, hnakruh hna na hmuh cang maw? Na kawl lio dah?

SCL: Hahaha, Kai lawm ko! Hnakruh bantuk deng cu a lo ngai ko, asinain, public theih ding in chimnak nawl a ka pek rih lo caah kan chim kho rih lo. A ruah hlan ah chimh khawh kan zuam te lai.

PCCF : Can na kan pek i kan i lawm kho tuk. God Bless.

Sunday, March 18, 2012

Thlachuak Mi Kan Si!

Dear Dawtmi PCCF Unau

Tuzing Bawipa thawhṭhan zingah damte le lawmtein a thawngṭhabia a hrawmtu zumtu nan zapicungah Pathian thluachuah a tharin um ko seh! Pathian dawtnak le PCCF dawtnak thinlung he thawngṭhabia a kan chim tu Saya Thawng Hei cungah lunglawmhnak langh ter kan van duh. Thlachuak Mi Kan Si timi pehtlaiin an kan chimh i kan i lawmhnak a sang chin.

Thawngthachintu tuanbiatawi: Senthangpeng, Khuapi um Pu Sai Hei (tleicia)le Pi Nawn Caan i anfa le 11 chungah a 10 nak a si. Biak Sung Ngun nupi dawtte he fapa Jonathan Thian Cung an ngeih. Amah cu AG khrihfabu i an i bochan taktak mi a si.2006-2009 Calvary Bible College (Hakha) ah cachim a si. Tu hi M.Th (Asia Graduate School of Theology), Manila ah a kai mi a si. PCCF nih kan bochan taktak mi saya Thawng Hei a si. Bawipa nih a rianṭuannak kip ah thluachuah pe chin in, Bawipa ram kaunhnak le Kan miphun caah hmanchin ko seh ti in thlaza kan campiak.

Saya Thawng Hei

Thlachuak Mi Kan Si! (Genesis.12:1-3)

Pathian cu a ṭha i zumawkthla a si! Amah a ṭhatruang ah keizong Philippine ah ka rak phanh khawhnak a si. Bawipa ṭhatnak le zumhawkthlak a sinak nih thlachuak mi ah a kan ser. Laimi hi thlamtling lo ngaimi le chanbaunak tampi a ngei mi miphun kan si. Sihmenhsehlaw, Bawipa ṭhatnak le zumawkthlak a sinak nih thlachuak mi ah a kan ser. PCCF le Chungtel pakhat cio (nangmah le keimah) zong hi Bawipa nih thlachuak pek mi kan si ve. Bawipa nih mi pakhat/miphun pakhat thlachuah a pek tik ah suallam ngei tein thlachuak a pek. Zeiruangah or zeicaah dah thlachuah a pek ti hi a ruang/suallam a um. Hi ka sermon nih a tinh mi cu Bawipa nih thlachuah a kan pek mi a ruang/sualam hi theih fian ding le hman thiam ding hi a si.

Kan i thim mi Bible Chung ah vun lut hna u sih. Gen.12:1-3 a si. Bawipa nih Abram cu thlacuah mi ah a ser tik ah hin Biakamnak (promise) pathum a pek. A pakhatnak cu nangmah pumpak hi thlachuah kan pek lai a ti. A pahninh nak cu thlachuak mi na si lai a ti. A pathum nak ahcun vawlei miphun vialte nih nangmah hmang in thlachuah pek an si lai a ti. Cu biakamnak pathum cu vun zohtuah hna usih. Bawipa nih Abram cu amah pumpak hrim kha thlachuah a pek. Amah pumpak, Abram (a taksa, thinlung le thlarau) hrim kha thlachuah pek mi a si. A ngeih a chiah le saṭil kha cu amah pumpak thlachuak a zultu le theipar (leihpuai) an si. Bawipa nih thlachuah a pek tik ahcun a mah hrim kha thlachuak ah a cang. A pakhatnak le pahnihnak hi a pek tlai. Bawipa nih Abram pumpak kha thlachuah a pek ruang ah thlachuakmi ah a caannak kha a si. Cu thlachuah pek mi a sinak le thlachuak a si nak cu mivial te caah a si ti kha a pathumnak nih a langhter. Amah pumpak le chungkhar ca lawng ah si lo. Mivialte caah a si, a pawngkam ah a um mi minung hna taksa, thinlung, thlarau damnak caah a si.

Bawipa nih nangmah le keimah pumpak kha thlachuah a kan pek. Thlachuak ah a kan ser fawn. PCCF member pakhat cio hi Bawipa nih thlachuah pek mi kan si. A group in a thawk mi a si lo. Pakhat cio hi thlachuah mi kan si ruangtu ah group hi thlachuak mi a si nak a si. Nangmah le keimah pumpak, pakhat cio hi a biapi ngaingai mi a si ti hi a fiang. Pathian nih thlachuah pek mi le thlachuak mi kan si hi a herh ngei ko. Cunihcun Bawipa nih dawtmi kan si ti mi mah le mah i zumhnak (confidence) a kan pek lai. Cu confidence nih cun kan cawnmi le kan ṭuanmi rian ah ralṭhatnak, thawnak le teimaknak a kan pek lai. Cu ralṭhatnak le ṭhawnak cu mah tein i pawrhlawtnak le mi zeirelonak lungput a si bal lo. Mi caah ṭuanduhnak le ipumpeknak lungput le nun lei tu ah a kan hruai. A ruang cun Bawipa cu kan hrampi, kan thlachuah hrampi a si ti kha kan theih fian ruang ah a si.

Thlachuak a si mi pumpak nun nih mah inchungkhar le khua le ram ah thlachuah a luh pi. Pathian nih thlachuah pek mi minung pakhat nih a innchungkhar thlachuah a luh pi. A Chrihfa bu le a ṭuanak bu ca zong ah a luh pi fawn. Kan hmunhma (local) cio hi thlachuak hmun le hma ah a caan ter tu hi minung tam pi le a bu nak in, Bawipa thlachuah pek mi minung pakhat te hi an si ton. Laimi kan hmunhma (local) cio te a ṭhangcho tertu ding zong hi nangmah le keimah pumpak te hi kan si. Chin kan timi cu miphun tampi, peng le tlang he a fonh i a dirṭi mi miphun pakhat kan si. Thlachuah mi Chin kan si nak ding ah cun kan mah inchungkhar cio le hmunhma cio hi thlachuah mi le a dam mi a si a hau. Thlachuah mi denomination pi pakhat kan sinak ding caah thlachuak mi local church cio a si kan herh bantuk in CND (Philippines) thlachuak mi a si nak ding caah thlachuah mi PCCF a si a hau ve. Thlachuah mi Chin a si nak ding caah thlachuah mi Hakha-Thantlang a si a hau ve thiam thiam.

Thlachuah mi inchungkhar, khua le ram nih mi dang zong kha thlachuah ah a luh pi hna. Abraham thlachuak mi a sinak cu a mah le a chungkhar ca lawng ah a si lo. Amah chungkhar kha nih zeizong vialte ah founder le leader tuan ding caah a si lo. Mi dang caah le vawlei mi hna caah thlachuah mi va si ding tu khi a si. Bawipa nih Krihfabu pakhat, PCCF, Hakha-Thantlang, CHIN thlachuak a kan pek mi hi kan mah pumpak ca lawng ah a si lo. Laimi nun a dawh ngei mi nun kan ngeih zungzal mi cu siaherhnak le cheuhbauhnak nun kan ngeih mi te hi a si. Kan thlachuah vial te hi midang ca ah a si. Krihfa bu pakhat nih midang caah, PCCF nih PMCF caah, Hakha-Thantlang nih Chin mi caah, Chin mi nih Kawlram caah, Kawlram nih vawlei caah thlachuah kan va si ding mi khi Bawipa nih a kan tinh piak mi a si.

A tawinak in kan chim a si ah cun keimah pumpak ka thla chuah cu keimah le ka inchung khar ca lawng ah tinh chih mi a si lo. Keimah catial/phungchim tu (Thawng Hei) cu Hakha peng Sengthang mi ka si. Cucaah Bawipa nih thlachuah pek mi ka si nak cu kan sengthang peng caah, Sengthang cu Hakha caah, Hakha cu Chin mi caah, Chin mi cu Kawlram mi caah, Kawlram cu vawilei caah a si ti mi hi kan theih/zumh a herh ko rua tiah ka ruah. Ka ruah ti mi cu ka zumh tinak a si. Biaknak lei zong ah kei hi AG minister pakhat ka si. Cu caah thlachuak mi AG minister pakhat ka sinak cu AG ca lawng ah a si lo, Chrihfabu dang dang ca zong ah ka si ve awk hrim a si. Theology a cawng mi ka si caah, 21st century ah Asia-Afarica-Latin ah hin contextualization le local theology hi kan uar ngai ngai. A si nain, local theologians tampi lila nih an hmuh ṭhan mi cu local theologies lawng cun a si kho lo an ti. Globalization chan ah hin nang wetern, kei Asian or African or Latin ti mi a dik tuk lo ah an ruah. Cu caah theology cafang thar an chuak mi cu “GLOCAL” ti hi a si. Local and Global ruahnak (spirit) hi kan herh ko ti a si.

Cu caah U le nau hna, Bawipa nih pumpak in thlachuah a kan pek mi a suallam le a ruang cu kan inchungkhar, krihfabu, peng/tlang, khua le ram ca lawng ah si hen lo in midang, chungkhar, chrihfabu, khua le ram, le vawilei cung dihlak caah kan si hi ruat hna u sih law, zum hna usihlaw, kan nung in langhter hna u sih tiah ka saduh thahnak te hi ka tial/chim ve. Tuni na nunnak ah na langhter duh a si ah cun napawng te ah a um mi hna krihfabu/peng/tlang/khua/ram dang minung pakhat sin ah khan hmang chun tuah u sih! Na thinlung te ah daihnak na hmuh ko lai tiah ka zumh ko! Bawipa thlachuah nih kan umpi chin ko seh!

Philippine Chin Christian Fellowship

Manila