“Zeitindah Pathian nih
kan thlacamnak akan leh?” 2 Korin 12:9
Ahmasabik ah keimah bantuk tling lo le
tlak lo te zong Pathian Biathiang phuang kho ve ding in nunnak, damnak aka petu
Pathian cungah kai lawm, ih caantha a ka serpiaktu PCCF upa te thok in member
pakhat cio nan cungah lunglomhnak tampi ka ngei ti kha chim hmasa ka duh.
Pathian mithmai zoh buin hi thawngtha a rel mi pumpak pakhat cio nan cungah a
dong lo Pathian thluachuah tlung hram seh ti kha ka thlacamnak a si.
Bishop TD Jakes timi pa nih thawngttha
a chim I a ti mi cu, “Pathian nih hin zawtter an duh hna lo! Ngaihchia in umter
zong an duh hna lo! Sifahter zong an duh hna lo! Pathian nih Chanrelnak 7: 14
ah a timi cu, “Kamin in kawh mi ka mi hna
nih khan an lung an itthumh I thla an cam I ka hmai kha an kawl I an lam tthalo
khan an I mer ahcun, van khin ka run theih lai I an sualnak cu ka ngaihthiam
hna lai I an ram cu ka damter lai” tiah a ti. Cucaahcun, chawlehthalnak a
tthatkhawhnak ding caah siseh, na cancer a dam khawhnak hnga ding caah siseh,
na zawtnak a damnak hnga ding caah siseh Pathian kha zum ko! Pathian nih na dam
ding hi a duh mi a si, na damlonak vialte damter kha an duh mi a si I Jesuh
Khrih ah zeizong vialte hi teitu siding kha an duh mi a si” tiah hipa nih hin a
chim len. Thawngthabia a ngaitu vialte an lung a thawhter ngaingai hna. Khua
pakhat aka ruahter ngai mi cu, Bishop TD Jakes bantuk hin khoika hmun paoh ah
kal in a cung I a chim mi pawl bantuk hin kan chim ngam ve hnga maw? Church
pakhatkhat ah maw hmun pakhatkhat ah maw kal in “Pathian nih na cancer damter
an duh” tiah va chim tuah usi law; “zei
kong dah na chim len ko?” a luan cang mi caan ah ka pasal, ka va, ka u ka nau,
ka nu ka pa etc… cu cancer in a zaw, ka thinlung um ek dihlak in nifatinte
Pathian sin ah thla ka cam sihmanhsehlaw a thi tthiamtthiam. Cucaah hi bantuk
kong hi cu chim ti hlah tuah. Ziah tiah keimah pumpak hrimhrim nih ka tonmi a
si, cu caah daite khan um ko tiah a ti ding minung tampi an um kho men. Cu nih
biahalnak a hun chuahpi ding mi cu “zeiruang ahdah Pathian nih hin mah hna an
pa maw, an nu maw, an u maw an nau maw an chungkhar ah pakhatkhat cancer a ngei
ih a dam khawhnak hnga ding caah heh tiah thla an cam ko mi cu leh lo in a um
hna hnga I a bomh hna hnga lo timi biahalnak a hung chuak hnga. Jesuh nih “hal
u law pek nan si lai, kawl u law nan hmuh lai, king ulaw innka cu on nan si
lai” tiah a ti lo maw? Jesuh Khrih nih “zei zong vialte hi ka min in hal u law
pek nan si lai I nan mah ta a si lai” tiah a ti lo maw? Jesuh nih “zeizong
vialte ka min in nan hal ahcun kan tuahpiak hna lai” tiah a ti lo maw? timi
biahalnak pawl khat thup in kan ngei hnga. Ziah Zisuh Khrih chim mi vialte hi a
dik lo mi lawngte maw an si kun ne hnga tihi ruah len awk in a um.
Sihmanhsehlaw, Pathian nih hin kan
thlacamnak hi a kan leh ko. A sinain kan mah nih kan duhning bantuk in cun a
kan let lo. Pathian nih zeitikhmanhah “nan thlacamnak hi nan mah nih kan
duhning bantuk hin kan let seh ti nan ka duh bantuk in kan leh hrimhrim hna
lai” tiah bia akan kamh bal lo. Sihmanhsehlaw afiang ngaimi pakhat tu cu Bible
nih a kan cawnpiak bantukin Pathian nih kan thlacamnak hi a phi (answer) pathum
in a kan leh tawn.
A caan ahcun Pathian nih kan thlacamnak
hi “Yes” “OK” a ti bak I kan hal mi hi a kan pek bak ve. Pathian nih kan
thlacamnak a kan leh tik ah hin kan ilawm tuk tawn. Thawngthachimtu pakhat nih
a ti mi cu “Pathian nih ka thlacamnak a ka leh tik ah hin kai lawm tuk, a ruang cu
ka duh mi vialte a ka pek caah si lo in ka duh mi ka hal mi vialte hi Pathian
zong nih ka caah a duh mi an rak si mi a si caah kai lawm khun” tiah a
ti. Ahman ngaingai ka ti ve. Voitampi cu kan I lomhnak hna hi kan duh mi kan
ngah ruang lawng hna ah a rak si tawn nain cunak fakdeuh in ruahding le lomh
ding a si mi cu kan duh mi le kan herh mi Pathian nih a kan pek tik ahhin akan
pek ruang lawnglawng ah si lo in kan caah thil tha a si tiah Pathian nih a ruah
I a kan pek mi tu a si mi cung ah hin kan ilawmh deuh awk a si rak sitawn.
Cun, a caan ahcun Pathian nih kan
thlacamnak hi “Not yet” “Umrih” Hngakrih” nan duh mi kan pek ko hna lai
sihmanhsehlaw caan tlawmpal cu na hngah rih a hau tiah a kan leh tawn. Nupi
caah thla a cam mi tlangval pa pakhat kong ka rel bal, ih a timi cu, “nupi ttha
te Pathian a daw I keimah zong a ka daw I keimah zong nih ka thih hlan tiang a
mah ca lawng bak ah nung kho ve ding in rinhchan awk a tlak mi nupi caah
Pathian sin ah thla ka rak cam, hmanhsehlaw kum riat (8) arauh hnu lawnglawng
ah Pathian nih ka thlacamnak aka leh i a tu ka nupi khi aka pek” e a ti. Ih, a
ti rih mi cu kum riat tiangtiang rak hngah ding hi thei ning law Pathian nih
hngak rih ko a aka ti mi hi Pathian zei bia dah na chim lengmang ko mah
tiangtiang cu ka hngah khawh ttung lo tiah ka rak ti hnga ee tiah a ti bal.
Ih a chim rih mi cu, sihmanhsehlaw ka
nupi caah thla ka cammi kumriat chung ka rak hngah mi kha ka van ruahtthan tik
ah Pathian sin ah hin kai lawm tuk ee a ti. Zeiruang ah tiah cun mah lio ah hin
kum 21 lawnglawng ka rak si rih I nupi tthit ding ah ready ka rak si rih lo. Ka
rak no tuk rih, lung nih a rak duh sawhsawh lio, ngeih duh menmen lawng khi a
rak si. Cucaah kan thlacamnak Pathian nih a kan leh colh lo tik ah thinhun len
nakcha in Pathian sin ah lomhnak bia tu kan chim ding a si e tiah mah cauk te
ahcun ka rel bal. Lungsau le thinfual hi thiltha hmuhnak ding caah innka pakhat
asi.
Cun Pathian nih hin a caan ahcun kan
thlacamnak hi let bak lo in a kan um tawn. No! hihi cu kan pe bak lai lo a kan
ti caan zong a um ve. Bible chung ah zumtu hna thlacamnak kha No! tiah a ti mi
hna tampi kan hmuh khawh. Moses nih “Mawi Bawipa kamhmi ram (kanaan ram) ah kal
ka duh ee” tiah thla a cam. Sihmanhsehlaw Pathian nih NO! a ti. Abraham nih
“Bawipa ka fapa Ishmael nih ram thlachuah vialte hi co seh,” tiah thla a cam.
Sihmanhsehlaw Pathian nih NO! hihi cu Isaac caah an si tiah a ti. 2 Samuel 11
chungah kan hmuh mi cu David le Bathsheba nih fapa te an hrin I cei lak ten a
zawt tik ah David nih vawlei ah a bawk I nifatin te ti awk in rawl ulh bak in
Pathian sin ah thla a cam, “Pathian ka fapa nunnak hi na khamh a si ahcun na
caah zeipaoh ka tuah ko lai” tiah a hal. Sihmanhsehlaw, Pathian nih NO! a ti
tthiamtthiam.
Cucaah Pathian nih Moses le Abraham
hmanh nih thla an cam I Pathian nih NO! ati hna ahcun kan mah zong hi No! akan
ti caan hi a um ve hrimhrim awk a si ko tihi kan pom khawh a hau. 2 Corinth 12
chung zong ah kan hmuh mi cu Apostle Paul nunnak hmanh ah Pathian nih No! a ti
caan a um len ve.
Paul nih a timi cu “Sihmanhsehlaw ka
hmuh mi thil a tam ruangah porhlaw ruamkai in ka um sualnak ngak hnga lo ka pum
ah hin fahnak pakhat a ka pek I cu fahnak Satan thil cu porhlaw in ka um sual
nak hnga lo a ka dawntu dingah a hman” tiah 2 Korin 12:7 ah kan hmuh. Paul
nunnak ah hin dawnkhantu thil pakhatkhat a um hrimhrim I cucu nih cun Paul hi
um thiam lo in a umter ti hi kan hmuh. Ih Paul nih hin voithum hengte Pathian
sin ah a nawl mi cu “Bawipa ka chung I a um mi fahnak hi ka lak piak sawh ko”
toidor tein ka umnak hnga ding caah ka nunak ahhin Satan zong hibantuk fahnak
pek ding ah nawl na pek a si ko…Lamkaltu 9 chung zong ah na caah hin zeitluk
harnak tuar ding dah ka si tikha na ka chimh mi ka theih ko…sihmanhsehlaw ka
Bawipa a za cang ka tuar kho ti lo… hihi fahnak hi ka lakpiak ko cang… ka
nunnak chung hrimhrim in hihi fahnak hi run la cang ko” tiah a ti, sihmanhsehlaw,
Pathian nih zei tin dah a leh tiah cun, “NO”! A si lo, “Ka vel hi na caah a za
ko” tiah a ti.
Tuchun ni ahhin kan nunnak ah fahnak a
tuar mi tampi kan um men lai…na ke ah fahnak a um men ko lai…na kut ah maw na
paw ah maw na lu ah maw na takpum cungah hin fahnak a tuar mi kan um liangluang
men ko lai… caan tampi cu zei hmanh ruat ti lo in Pathian sin ah daitein I dinh
cang ding a si ko nain thih zong thih khawh ttung lo in chun nitlak zaan khuadei
hna tthutdan cung ah zeihmanh tuah kho lo in chun he zaan he tthut I “Pathian
zeiruangah dah mah vialte hi ka cung ah na tlunter…? Ziah ka thlacamnak na ka
leh lo? Ziah naka bawmh lo? Ziah hi vialte fahnak ka in mi hi na ka zoh sawh ko
na ka lakpiak lo? tiah aphun a zai I heh tiah Pathian sin ah biahalnak a tuah
mi tampi kan um men lai…
Sihmanhsehlaw, Pathian nih cun
zeitindah a kan ti tiah cun… “Ka vel hi na caah a za ko, hi vialte harnak
fahnak vialte hi kan lakpiak khawh ko ih a tuah zong ka tuah men ko lai…a si
nain zeidang vialte nak in theihter kan duh mi cu “zeibantuk harnak le fahnak
vialte hmanh ing in tuar ko law na caah kan dawtnak le ka vel vialte hi na caah
a za tuk mi a si ko” tiah Pathian nih cun a kan ti men ko lai…
Joni Earachson Tada timi nu kong hi na
ruat bal ve dik maw? Joni Earachson Tada cu kum no te a rak si lio in a zeng mi
nu a si. Pathian sin ah thla a cam tawn mi cu, “Maw Bawipa, ziah hihi ka
zawtfahnak le ka zennak vialte hi na ka lak piak ko lo ee…? Johan 9 chung zong
ah mitcaw mi hna na damter ko hna tung??? Bethesda tibual kam ah kum 38 tiang a
zeng cang ko mi zong na damter ko ttung??? Ziah vancung in rungttum duak in kei
ka intuarnak vialte zong na ka damter ve lo??? tiah a ti tawn…
A sinain Pathian nih a timi cu, “ka velngeihnak
hi na caah a za ko…zeiruang ah tiah cun nangmah bantuk in pumsa/thazaang in a
derthawnm mi hna sin ah rianttuan ding ah kan herh caah a si…tiah a ti. Khrih
ah u le nau hna, kan tthawnnak lawnglawng hi Pathian nih a herh lo a caan ahcun
kan derthawmnak hna hi Pathian sunpar langhternak caah a rak biapi tuk mi an
rak si tawn ti kha philh hlah hna usih. Cuticun, Joni zong nih cun vawileicung
khuazakip ah kal in mitlamtling lo mi hna sin ah rianttuan hram a rak tawk ti
kha kan hmuh. Joni hi amah pumpak hrimhrim in mitlamtling lo rak si hlah sehlaw
hibantuk in mitlamtling lo mi hna sin ah rian a ttuan kho lai ti hi na ruat dik
maw??? A ttuan bal lai lo…!!! Asinain Pathian nih Joni ih a derthawmnak te kha
la riangmang in a tlamtling lo mi hna le a derthawm mi hna thazaang
tthawnternak le bawmhnak ding caah a hman. Pathain thiltikhawhnak kha Joni a derthawmnak
ah biatak tein a lang.
Terry Fox timi pa zong hi a luancia kum
zeimaw zat lio I hla ngaingai a rak tli kho mi a si nain a ke ah cancer a rak
ngeih caah a ke zong cu an rak tan piak. Sihmanhsehlaw tuahpiak chawmmi ke a
ngeih hnu ah hin Canada ramkulh chung vialte ah a mah bantuk in a damlo mi hna,
cancer a ngei mi hna caah zei tin dah damter khawh an si lai ti mi kha heh tiah
baitaktein research a rak tuah mi pa a si , ih tuchun ahcun Terry min put tein
Canada ramchung ah cancer zawtnak research tuahnak kha an ngei I cancer in a
dam lo mi hna caah Terry minput tein phaisa kawl nak hna an ngei…ka chim duh mi
cu, Terry hi cancer zawtnak hi rak ngei hlah sehlaw hibantuk hin amah min hmang
riangmang in Canada ramkulh chungah canser zawtnak damnak research hna hi an
tuah hnga maw??? An tuah lai lo!!! Sihmanhsehlaw Pathian tthawnnak kha Teery ih
a dethawmnak bik ah khan a lang…
Zeiruang ah dah mi tampi sin ah an
thiltuah ning bantuk in thil hi a can I cheukhat hna sin ah a can ve hnga lo? Zumh
awktlak taktak a si mi Faye Nevenhoven te hna zawtnak phunkhat hnu phunkhat an
tuar cuahmah lio ah zeiruang ahdah mi cheukhat hna hi zawtnak zong an ngeih bal
hnga lo timi hna hi ka ruat tawn. Zeiruang ah dah Pathian nih hin micheukhat
thlacam nak cu “Yes” a ti i micheukhat thlacamnak cu “NO” a ti hnga…???
Asinain Pathian nih kan thlacamnak kha
“NO” a ti tik ah hin, kan mah nih kan ruahkhawh mi le kan duh mi nak lengtiang
in akan ruahpiak mi le a kan duh piak mi le pek a kan duh mi thil tampi an rak
um ti hi kan theih a hau...kan zawtfahnak ahhin Pathian nih timhtuahpiakmi pakhatkhat
a ngeihmi a um ti kha theih ter akan duh…cucu vialte cu nihin ah kan hmu rih
men hna lai lo I kan lung zong a fiang men lai lo, sihmanhsehlaw zeibantuk
hmanh tuar in ing ai kun usih Pathian a vel hi kan caah a za ko.
Lawmhnak tampi he
Lewis Cung Cinzah
