January 19, 2014 PCCF Weekly Online Sermon

Thiltha a Tuahtu Kut

By: Pastor Siang Zi

 

Pastor Siang

 

Mattai 26: 13 "Hihi philhhlah uh hi thawngtha hi vawlei cung khuazakip I an chimnak hmunpaoh ah,a tuahmi thil hi a mah philh lonak ah chim a si zungzal ve lai", tiah a ti hna.

Hi Bible caang hi Jesuh khrih Bethani khua, thinghmui Simon inn ah rawl a hrawn lio i minu nih zihmui a manfakngaingai mi a toih caah Jesuh chimmi bia kha a si. Thil sining pakhat te zohta hna sih.Voikhat cu sayapa nih a siangakchia kha nan khan chungah a ho kut dah aa dawh bik tiah a zuam ter hna. An mah le an kungcungah an kut a chiah ter dih hna I a zoh piak hna. Cu hnuah ka kut ai dawhbik ko a ti mi minung pathum rak chuak uh law, nan kut zeitluk in aa dawh kong hun chim tuah uh tiah a ti hna. Hmai lei I a thumi nu pathum an hun chuak. Pakhat hnu pakhat in zeitluk in an kut aa dawh kha an chim. Sayapa nih hi nu pathum chung in pakhat hi na kut aa dawh bik tining law a tang mi pahnih an lung a tling lai lo ti a theih caah kha va thu rih uh a ti hna. Cu hnu ah khanchungah ai chok i khan killei te ah minak te, a sam kir mi nute kha sayapa nih hmaiah a hun hruai I nan mah vialte lak ah mah nu te kut hi aa dawh bik a ti hna. Minu te a kut cu a thlir piak . Minu te cu a ning a zaktuk zeica tiah a kut cu a nak ngaingai, carnawn te in a um. Khanchung um mivial te zong nih khuaruahhar ngai in sayapa cu an zoh. Sayapa nih cun hi nu te hi kan innpawng te ah a um mi a si. A nih cu zingka te in a tho a nu “acaw” a zuar ding te kha a phomhpiak nak kut te a si. A nu “acaw” zuarnak kheng a tawl piak tu kut a si. Hi kut hi nule pa rian a bawmtu kut, nu le pa mithli hnawttu kut a si caah aadawh bik mi kut a si a ti hna.

Bethani khua ah minu pakhat nih zihmui a man fak ngaingai mi a rak I put I Jesuh rawl a ei lio ah khan a lu ah a rak toih. Zultu Iskariot nih athawh i zeicadah hi zihmui hi zuar in sifak a bawmh nak hnalo ee, a ti. Jesuh nih a theih tikah ziah hi minu hi nan hna hnawh ee, a tuahmi mi thil tha le thil dawh pei a si cu, a ti hna. A taktak ahcun Judas nih midang zawn a ruah caah si lo, tiah Johan 12:6 ah a chim. Minu nih a ngeihmi lak ah a man a sung tuk mi cu Jesuh sinah a rak put. Kan nih mi vialte lakah a sungbik Jesuh sin kan rak pu kho cio hnga maw? A man a sungngai mi zihmui cu Jesuh cungah a toih tik tikah, inn cu zihmui rim thaw in a khat. Cu inn a hmui hlan ah minu kut kha a rakhmui hmasa. Zeicatiah Jesuh cungah thil tha le thil dawh a tuah caah a si. Nifatin kan nunnak ahhin midang kan bawmhhna rua, midang kan pek chanh hna rua tiah kan ruah lio ahhin a taktak ti ahcun kan mah kut tu hi a rak hmui hmasa tawn. Midang cungah thil tha tuah mi hi, mi theih lo te in tuah zongah cu tiltha cu a mah te in a au tawn.

A mahbel te kan I ralrih ve a herh mi cu, mitam pi nih cun minih ka thangthat hna seh ti duhnak thinlung he thiltha tuah aa zuam mi um theu a si. Thiltha pakhat te tuah tikah minih an theisual lai lo ti a phang mi zong kan um theu. Hihi mi depde pawl thiltuahning a si. Midepde nih cunmi nih kan thangthat hna seh, ti in an tuah. Hihi Philh hlah uh an tuanman cu tlamtling te in pei an hmuhcang cu! (Matthai 6: 2). Thiltha, kan tuah tikah le mi kan bawmhtik hna ah minih a kan hmuh lo zongah a kan hmutu Kan Pathian a um ko tikha philhhlah sih.

Midang cungah thiltha kan tuah tikah thluachuah kan hmuh lai tikan zumh. A si kan hmuhtaktak, caan tampi ahcun thluachuah hi chawva lawng in katah tawn. Hawitluk in chawva hna kan ngeihlo tikah thluachuah kan hmurua lo tiah kan ruah theu, mi cheu chaw le va tampi a ngei ko nain mithinlung chungah hmunhma a ngei ve lo mi zong um a si. A taktak tiahcun mithinlung chung I hmunhma kan rak ngeih le mi nih dawtmi si hna hi Pathian thluachuah a sang taktak mi an si. Jesuh zihmui a toih tu minu athiltuah mi philhawk a tha lo, mi thinlung ah a cam zungzal.

Jesuh nih “Hihi philhhlah uh hi thawngtha hi vawlei cung khuazakip I an chimnak hmunpaoh ah, a tuahmi thil hi a mah philh lonak ah chim a si zungzal ve lai, tiah a ti hna” nihin zong kan sinah chimthan a si. Vawlei a dihhlan tiang hi thil sining hi chim le phuan peng a si rih lai.

Kai lawm

Pastor Siang Zi

January 12, 2014 PCCF Weekly Sermon by Saya Khen Lian Thang

Jesuh Zoh in Kal Ko Usih

By

Saya Khen Lian Thang

Bible Cangthim: Mattai 14:22-32

Jesuh nih cun vun, “ra ngat,” tiah a ti. Cucaah Piter cu lawng cun a vung tum I ti cungah cun a ke in Jesuh lei ah cun a kal. Sihmanhsehlaw thilitu a fah zia kha a vun hmuh tikah a thin a phang I ti chungah cun a pil cuahmah i, “Bawipa, ka khamh tuah tiah au, (Matthai 29-30)

Hi tuanbia kong cu kan theih cio bantuk in Jesuh nih a zultu hna kha rili khattelei kam ah khan a hmai ah a kal ter chung hna I Jesuh a ke in ti cung I a kal nak kong kha a si. Peter nih Jesuh zoh in a kal lio ah khan ti cungah a kal kho. Nain, tanglei rili a zoh tik ah ti chung ah a pil. Ahopoah nih hin harsatnak, tih phannak , lungretheihnak,etc.., kan tong cio hna.

Pathian nih cu kan ton lio ah cun a mah lei zoh lawng kha a kan duh piak. Noah nih lawng a ser ah khan a cunglei ah thlalangawng a chiah, minung zohnak in cun hruh khi a si. Ahohmanh nih inn an sak ah thlalangawng cu a kamlei ah chiah tawn phung a si. Minung ruahnak le Pathian ruahnak cu ai dang tuk. A cunglei a tuahnak asullam cu Pathian zohnak ding caah a si. A ki lei le a sir lei zoh kha Pathian nih a duh lo. Hi nih a langhtermi cu harnak, lungretheihnak a phunphun kan ton tikah kan minung hawi sinah bawmh hal loin amah sinah hal kha a kan duh piak.

Kan piahtana kan zoh chung poah cu mah chungah cun kan pil peng ko lai. Peter ti chungah a pil bantuk in. Kan nih zumtu cu cunglei zoh in a nungmi kan si, zumhnak in hmailei ah kar a hlang cuahmahmi kan si. Cucu a si kho hnga maw? kan ti men lai. Tahchunhnak pakhat chim ka duh: Khrihfa nun cu zei he dah ai lawh tiah cun, Bicycle a ke pahnih a ngeimi kan i cit ah khin kan kal chung poah cun kan tlu lo. Kan dir poah ahcun kan tlu tawn. Cu ve bantukin zumhnak in amah Pathian zoh buin kan kal ahcun zeitik hmanh ah sualnak chungah kan pil kho lai lo. Pathian zoh loin kan piahtana kan zoh chung paoh cu, cu piahtana ahcun kan pil peng ko lai.

Kan biakmi Pathian cu kan piahtana nak in a ngan deuh ti kha thei peng hna uhsih! “Jesuh kha fekte in I zohchih uh sih. Amah cungah cun kan zumhnak cu a hramthawk in a dongh thiang a um…….” Hebrew 12:2

Pathian nih sermon reltu dihlak thluachuah in pe hna seh!

2014 PCCF President Welcome Speech

 Dawtmi PCCF Chungtel Hna,

Bawi Khrih min in nan kut kan tlaih hna. KumtharThluachuahnak Nan Cungah Um Ko Seh!
Nihin ah PCCF riantuantu a hlun le a thar rian pekchanhnak tlamtling tein kan tuah kho. President dirhmun in nan sinah kuttlaihnak ka rak tial.

Laimi cu phaisa ah kan harsa in thinlung ah a rum mi kan si. Cucaah PCCF a nun khawhnak a si. Unau thinlung nih a kan fun. Kan umnak poah ah kan ihlam. Phaisa nih a cawk khawh lomi bawmhchanhduhnak thinlung kan ngeihmi cu zahpi ding a si lo.
2013 chungah PCCF caah ngeihchiah chawva pin ah caan le nunnak he rian a tuanmi, President thok in riantuantu nan dihlak cungah kan ilawm. Rian tampi nan kan tuanpi. Ro tha nan taanter mi cungah PCCF chungtel hna nih upatnak kan in pek hna. Riantuantu tharzong nan kan dirkamh lai ti zumhnak nganpi kanngei.

Chungtel zapi hna, riantuantu thar nih tukum chung rian kanlak ngam nak hi nan mah dirkamhnak bochannak he a si. Kan santlaihnak cio kan fonh hna lai. Kan ruahnak, kan zumhnak kan samh hna lai. “Unau thinlung” he kan ichawn bia hna lai. Kan theihhngalhnak kan ihrawmh hna lai. Naihniam unau taktak kan si kha langhter chin lengmang hna usih ti kan sawm duh hna.

Manila um, unau hna, nan ca cawnnak tluang koseh. Baguio ah khua sami kan nau le hna, nan itinhmi cungah Pathian nih hlawhtlinnak in pe hna seh. Luzon lei ummi, hawi le hna, nan khuakhannak Pathian nih tlinter seh. Cavite ummi, unau vialte hna, nan lungthlitum Pathiannih in pe hna seh! “Nangmah nai tel hi PCCF hlawhtlinnak a si.”

Tukum 2014 riantuantu thar thimmi hna cu:

President: Pastor Duh Sang
Vice President: Rev. Ram Hu
Secretary: Saya Lewis Thla Peng Cung
Assistant Sect. Saya Khen Lian Thang
Treasurer: Pastor Dawt Mang
Assistant Treasurer: Sym Run Tha Hlei Par

Auditors:

Rev. Paul Thaung Tin (Chief Auditor)
Rev. Pastor Walter Paneh (Ass. Auditor)

Advisors:

1. Rev. Dr. Dennis Shu Maung
2. Ptr. Berona
3. Dr. Van Ivan
4. Rev. Salai David
5. Ptr. Hrang Kulh Lian
6. Sym Siang Zi

Pastor Duh Sang 

PCCF President

2014