Sunday, April 19, 2015








 

Dawtmi Unau hna,
Happy Sunday!
Tuzing Online Sermon a kan hrawmhtu saya Lai Uk Thang (saya Lai) cungah lunglawmhnak tampi kan ngei. Amah hi Adventist International Institute of Advanced Studies (AIIAS) ah Master of Arts in Religion (M.A.R) a cawng cuahmah liomi a si. Thantlang peng Leitak khuami a si. Pathian nih thluachuah pe chin ko seh tiah PCCF nih thlaza kan cam piak!



THIL THA KHA NA TUAH KHAWH CHUNGIN TUAH KO
 “Cu caah thatnak tuah kha baa hlah uh, kan ngol lo ahcun a theitlai kan zun caan kha a phan te ko lai.”
(Gal 6:9)

Biahmaithi:
Thil tha tuah hi a tha ti kan theih ko nain caan tampi ah cun kan tlolh theu tawn bantukin a theipar kan hmuh colh lo ruangah tuah lo tu aa thimmi zong kan rak um theu tawn ve. Zeiruangdah thil tha tuah hi a tha ko ti kan theih ko nain tuah lo in kan um theu tawn, cun kan tuah ko nain kan ngol tawn hi a si hnga? Thil tha tuah a kan ngoltertu thil tiah ka ruahmi hna cu:
  

Gal 4: 11
1. Thil tha kan tuahmi kha theipar kan hmuh colh lo bantukin pehzulh in kan tuahmi theipar tha nih a zulh lo ti kan ruah caah,
2. Kan thil tha tuahmi hi pakpalawng ah a cang sual lai ti kan phannak nih thil tha tuahnak in a kan kham tawn,
3. Thil tha kan tuahmi ah kan baa tuk tawn i chikhatte kaa din ta rih lai i ka pehzulh than te lai tiah kan ti nain kan i din lan theu tawn…,

Dawtmi zumtu u le nau hna, kannih zumtu cu thil tha tuah dingah khamh kan si tiah Efesa 2:10 nih fiang ngai in a ka chimh. Cu caah Khrih khamhnak zumhnak in a co cang kannih hna nih hin,
1. Thil tha tuah ah kan lung dong lo in thazang chuah, pehzulh in kan nun awk a si
2. Theipar tha ca lawngah kan nun awk a si lo
3. Theipar zun lawng ruah in kan nun awk a si lo, thil tha tuah ding ah khamh kan si ti tu theih peng ding a si.
Cu caah dawtmi ka u le ka nau hna, ka tuah mi theipar zun lawng aa ruahchantu zumtu maw kan si, a si lo le theipar kong ah buai lo in nun herh a zoh deuh tu dah kan si ti hi, kan nun kan i zohfian dingah ka duh ngai ngai. Kan hmai ah a um ko mi thil tha tuah dingah kan liamter sualnak hnga lo…,
1. Pathian nih a kan zaangfah caah hi rian hi a kan tuanter i kan hnabei a dongh awk a si lo (2 Kor. 4:1).
2. Jesuh hrim kha mi vialte nih an herhmi thil tha kha tuah piak dingah thawnnak a pek i khua zakip ah aa chawh bantukin (Lam 10:38), Khrih hnuzultu cu thil tha tuahnak dingah Pathian thawnnak he a nungmi kan si ti hi kan theih peng ah a tha.
3. Thil tha kan tuah hi Khrih khamhnak kan co hnawh chan ah aa telmi a si ti theih peng ah a tha.
Cu bantuk thil tha tuah ahcun a minung kan thim awk a si lo i, a kan dawtu sin lawngah si lo in, kan ral hna sin hmanh ah khan thil tha cu kan tuah awk a si tiah kan bible cawnpiakmi a sinak cu:
1. Hi hi kan chimh hna, na ral kha va daw law, an hua tu hna sinah thil tha kha va tuah, chiat an serhtu hna kha thluachuah va pe hna law, zei an rel lotu hna caah thla va cam piak hna ( Luke 6:27-28), zeiruang  ah dah cutin kan tuah awk cu a si?
2. Midang nih an dohmi asi zongah thil tha a si ko ahcun kan tuah awk a si ko (John10:32)
3. Pakhat le pakhat kan i dawtnak le kan i zohkhenhnak nih hin Khrih zultu kan sinak a tehte asi kha kan philh lo awk a si (John 13:35).

Biadonghnak
 Dawtmi ka u le ka nau hna, Paul nih Timothy sinah midang cawnpiak ve dingah a chimhmi le a cahmi cu, “Thatnak tuah le thiltha tuahnak i rum le nun sian le thil thenh sian kha na chimh hna lai” tiah a ti.  Caan tampi cu kan sining a pha lo, kan thazang nih a tei lo tiah thil tha tuah hi kan ngol theu  tawn. Kan nunnak ah i cinken awk ah ka duh mi cu, kannih cu, “Thawnnak a ka petu Khrih thawngin zeipoah ka tuah khawh ko hna.” Filipi 4:13. Thil tha kan tuah mi kipah theipar kan hmuh lo zongah Pathian kan pPa nih a cinken dih ko ti hi theih peng in thil tha kha kan tuah khawh cungin tuah ko hna u sih, tiah Jesuh min in kan sawm hna.

Khirh ah,
Lai Uk Thang