(August 22, 2002) Online Sermon.

SUAL NGEICHIHNAK I A PHI CHUAK

By Ester Van Cherry

A hma sa bik ah a kan dawtu kan biakmi kan Pathian Amin thangṭhat si ko seh!

Dawtmi PCCF nu le pa u le nau Saya/Sayamah vialte nan cungah lunglawmhnak chimcawk lo ka ngei.A bikin hi online sermon pe kho dingin caan ṭha a ka petu PCCF hruaitu nan dih lak cung zong ah lunglawmhnak chim cawk lo ka ngei.

Tuzarh online in nan nih he ruahṭi dingah ka thim mi cu a tanglei bantukin ka van langhter.

Texts: Luke 19:1-10.

Jesus cu Jerikho khua ah cun a vung lut I khua cu a hei tan. Cu ka ah cun ngunkhuai khawltu upa bik pakhat a min Zakia a si mi a rak um, a mah cu mirum ngaingai a si. Jesus cu a hodah a si hnga ti kha hngalh a duh caah hmuh aa zuam, asinain Zakia cu miniamte a si caah mizapi nih an phenh dih caah Jesuh cu a hmu kho lo. Cucaah cun hmai ah khan a rak tli I Theipi kung pakhat ah, cu ka lei I a kal mi Jesuh hmuh duh ah cun a rak kai. Cu ka hmun cu a phak tikah Jesuh nih cun cung lei kha a zoh I Zakia cu, “ Zakia, khulrang in rung `um, na inn ah kan tlung lai,” tiah a ti. Zakia cu, khulrang in a ṭum I lunglawmhnak in a inn ah cun a tlun ter. Cu a hmumi vialte cu an zai I, “Hi pa hi misual mi inn I tlun awk ah a kal,” an ti. Zakia cu a dir I Bawipa cu, “Bawipa,, ngai hmanh, misifak caah ka ngeihmi thil hnarcheu ka pek lai; cun ka hlenmi hna an um ahcun alet li in ka cham hna lai,” tiah a ti. Jesus nih cun a thawh i, “Nihin ah hin na inn ah khamhnak a phan; hi pa zong hi Abraham tefa a si ve. Zeicahtiah Mi Fapa cu a tlaumi kawl awk le khamh awk ah a ra,” tiah a ti.

Sual ngeihchihnak ti mi hi Pathian nih kan caah laksawng ṭha a kan pekmi a si ti hi theih a herh ngiangai mi a si.

Lamkaltu 5:31 ah “Israel mi kha I ngaihchihnak caan `ha le sual ngeihthiamnak pek awk ah Amah cu Pathian nih a orhlei kamah khan Hruaitu le Khamhtu in a ṭhut ter cang”.

Sual ngeihchihnak hi Khrihfa mi hna kan caah Khrih he a kan tontertu le Amah he kan I neihniam khawh nak caah lamhmuhsaktu thil a si hi philh hna hlah u sih.

Luke 13:1 “cu caan ah cun Jesuh cu, Pilat nih Galilee mi hna Pathian sinah raithawinak an pek chanh lio I a thahmi hna kong kha an rak chimh.”

Luke 13:2 “Jesus nih a leh hna I, “Cu Galilee mi hna cu, cu bantukin thihnak an in caah Galilee mi a dang hna nakin a sual deuh mi an si tiah nan ruah maw?”

Luke 13:3 “ Asilo, nannih zong nan nunning nan `hinh lo ah cun an mah thih bantukin nan thi ve lai.”

Sual ngeihchihnak ti mi cu voikhat men thinlung I thlen duak khi a si lem loh, kan ruah ning, kan lungput kha zungzal ca in kan I thlen I Amah Pathian ca I kan nun hman khawh hi Pathian nih a kan duh piakmi nun ithlennak cu asi deuh. Pathian kong ah si seh, kan mah kong ah siseh , mi dang kong ah si seh kan thinlung kan I thlen kha suallam a ngei mi ngeihchianak ti mi cu a si. Kan chung lei in kan thinlung, kan ruahnak kan I thlennak kha leng lei I kan nung ning cang nih khan langh ter ding kha kan rian a si. Tahchunhnak tampi chim hau lo in Zakia nunnak ah hin zoh u sih law Nun Ithlennak cu kan I fiang cem lai tiah zumnak ka ngei.

Zakia cu Sual ngeihchih a herh mipa a si.

A rum ngai nain, a nuam lo mi pa a si.

Chawva le thil ṭha tampi a ngei nain chambaunak in a thinlung cu a si fak.

Khuapi chungah mi tam pi he a um ko nan a ning ṭi peng mi a si.

Hmailei caan ruat loin a tu caan lawng nuamhnak I a rak nung mi pa asi.

Zakia hi zudawr ngeitu a si. Rome cozah tangah ngunkhawi khawltu a si. Cun Publicans vialte lakah u pa hmai suang pakhat a si. Ngunkhawi khawltu u pa vialte lakah a lu bik dirhmun in a um caah a rum ti cu fiang ngai in a lang.

A ram zei ah a rel lo mi a si.

Cun an ram chung minung pawl hi tangka in a rak hlen hna.

Cun chiaṭha thleidannak lungput a ngei khomi pa a si lo.

Cun Zakia hi mi nih an hlawtmi le an huatmi pa a si.

A cung lei nunning le kan nunning a tlakmi te te a um le um lo hi I zoh ṭhan hna u sih. Kan nunnak ah mah bantuk te te nunnak a um si ah cun Khrih he kan I pehtleihnak ah dawnkhantu thil an si hnga. Cu caah cun kan sining I zoh ṭhan hna u sih law Khrih he kan I pehtleihnak ah pakhat cio nih I tleng kho dingin Pathian sinah thlacamnak he hal cio hna u sih.

2. Zakia nih a Sualnak a ngeih chih!

A. Jesuh cu mi tlaumi kawl awk ah cun Jericho khua lei ah a vung lut. Jericho khua cu khua rum, Ung kung a tam nak, a ṭhatnak, khua nuam ngaingai mi a si. Cu caah cun Josephus nih cun “Divine Region” tiah a kawh. Cun hi khua I an cin mi Rose pangpar hna nih Jericho khua lawng si loin ramdang tiang nih panh mi minthang ngai ngai mi pangpar tiang a chuahnak khuadawh ngai ngai mi a si . Cun Jericho hi Israel le Jordan tiva nelrawn kar lak ah a um mi khua a si. A cung lei kong he pehtlaiin hi thil vialte nih hin Jericho khua hi Palestine ram chung I ngunkhuai khawlhnak ah a san cemnak a si ti a fiang. Zakia nih vawlei in nuamhnak a kawl cuahmah lio ah Jesuh nih cun a fekmi a dawtnak le a vel in tlenh a duh. Jesuh Khrih cu misual kan caah kawltu a si zungzal.

B. Jesuh Khrih nih misual ngai a si mi Zakia a nunnak thlen dingin a kawlnak cu Zakia nih a rak kawl ve hma sa caah khan a si. Zakia nih Jesuh a kawl duhnak a ruang cu midang a hawi le hna nih Jesuh kong hi a hlan kan in Zakia sinah an rak chim langmang caah a si kho men.

Zakia nih Jesuh hi zei bantuk minung dah a si ti hi hmuh a rak duh tuk. Nabeltein zei tluk I a zuam zong ah khan Jesuh cu a rak hmu kho loh a ruang cu a niam tuk ruangah le mi an rak tam tuk ruangah a si..

Vs.4- Asinain Jesuh hmuh duhnak le Khrih he I tonnak dingah cun Lungdonghnak a ngei lo ti kha Zakia nunnak ah a lang. Midang nih an phenh viar I a hmuh khawh lo caah. Theipi kung cungah a kai I Jesuh cu a cuanh.

Jesuh nih Zakia cu a hmuh tikah Jesuh nih cun a thawh I “Zakia thing kung cung khan rianrang in rung ṭum tuah, na inn ah ka tlung lai” tiah a ti. Midang vialte nih an cuanh len ve ko nain Zakia nih lungthin tak tein hmuh a duhnak le kawl a duhnak tu kha Khrih nih a theih caah Zakia cu kawh a si.

Jesus cu Zeizawng vialte hngal dihtu Pathian Fapa a si. Kan sining zei hmanh hi Amah sin in kan I thup kho lo.

Jesus khrih hi Pharisee mi hna le Lawki mi pawl nih len an sawm mi hi a co hlan ti kan hmuh (Luke 7:36-11:37). Asinain a tu tan lawng lawng hi Amah le Amah ai sawm, zei caah tiah Zakia rak ṭum tuah na inn ah ka tlung lai a ti. Cun Zakia cu thingkung cung in a rak ṭum I Jesus Khrih cu lunglawm tein a don I a cohlan kha kan hmuh.

V.7 nak ah van kal uh sih law, Mipi nih cun Jesus Khirh cungah an phunzai len. Zei ca tiah, misual ngai ngai ah ruahmi Zakia I a khual pei a si ko hi an ti I a phun phun in an volhpamh, an congoih .Asinain Zakia nih Jesus ka tong lai ti in bia a rak I khiah cia cang caah zei thil hmanh nih a dawn khan lo.

3. Zakia cu Jesuh Khrih he an I ton hnu ah aa thlennak kha tette (witness) in a langh ter.

Zakia cu duhhakkauhnak in mihrawkhrawl a si nak kha midang caah petu misiang a si mi pa ah ai thleng.

Luke 19:8 ah “ Zakia cu a dir I Bawipa cu, “ Bawipa, ngai hmanh, misifak caah ka ngeihmi thil hnarcheu ka pek lai; cun ka hlenmi hna an um ah cun a let li in ka cham hna lai,” tiah a ti.”

Zakia cu Khrih he an I ton hnu ah a sualnak cu a ngeihchih I a nunhlun kha mer takin Khrih nunzia kha a nunnak ah a lang. Tangka sal sinak in misiang mi nun ah a chuah. A thilri hnarcheu kha misifak pawl a pek hna. Mi a hlenmi vialte hna zong kha a let li in a cham ṭhan hna .

Sual ngeihchihnak nih hin mi pakhat thlennak hrampi a rak chuah ter.

A donghnak ah cun Jesus Khirh hi ho dah a si ti a theih I a nunnak vialte kha Jesus duh ning in thlen I nun aa zuam. Mah duhnak lawng a rak I ruat tawn mi thinlung in khan Pathian thangṭhatnak nun in a thleng.

Zakia nih hin a thinlung a thlen I Khirh nun in a nunnak hi miza pi sinah a langh ter.

Khrih he an I ton hnu ah Zakia nih a nun a thlen I midang caah ṭuanpiaktu a si nak kha a langh ter.

Khrih ah hawi dawt u le nau hna, a cung lei I kan langhter mi Zakia nunnak bangin kan si cio maw? Tangka/ phaisa sal kan si sual maw? Sual sal tang kan si sual maw? Mi huat kan tong maw? Asinain, sual ngeihchihnak thinlung kan ngeih I Jesus Khrih kan kawl ve a si ah cun Pathian nih dong lo tein a kan sawm zungzal. Kan sualnak ngeih thiam dingin a kan sawm zung zal ko. Pathian nih kan pawngkam ah zei thil dah a tuah ti mi hi ṭha tein kan ruah I kan mit fak pi in I au hna u sih. Khrih nih misual ka caah vailam cung i a thihnak nih kan nih cu miluat ah a kan ser cang caah le kan nih cu thisen in cawkmi kan sinak hi philh hlah u sih. Zakia nih Khrih he an I ton hnu ah a nun a thlen I nun thar in a nun bantukin kan nih zong nih thisen in tlenhmi kan sinak hi a thar in ruat ṭhan hna u sih law Khrih nih a kan duh piak mi nunnak in kan nunnak hi hman I zuam cio hna u sih. Cucaah cun kan sualnak hi I thei hna sih law sual ngeihchihnak ngei hna u sih. Zei catiah sual I ngeihchihnak nih Khrih he a kan tonter lai I cu nih cun Muihnak in Ceunak ah a kan hruai lai. Khrihfa mi nih kan I ruahchan mi Vancung ram nuam phanh khawhnak ding ah cun Khrih nih kan ca I a thihnak le Vel in a kan tlenhnak le thisen in cawkmi kan si nak hi thei in kan nun hlun kal tak hna u sih law Khrih nih a kan duh piakmi Nunthar lam zul cio dingin kan sawm hna.

Bawipa nih Sunparnak co hram ko seh!

(July 18, 2010) Online Sermon

By Sayama. Julie Sui Hluan Zing

Nan umnak cio ah dam in nan um lai ti ka zumh. Kan PCCF group mail ah thawngtha chimnak can ka hmuh ve ii Pathian ka thangthat, can a ka pet u upa pawl dih lak le a rel tu nan dih lak cung zong ah lunglawmhnak tampi ka ngei ti chim ta ka duh.

Tutan online phungchim ding in can pek ka si cu ka ca ah a sunglawi khun. Zei ca kan ti cun, online in ka phungchim bal nak a voikhatnak zong si pin ah, tu chun July 18 ni bak hi ka chuah ni zong a si. Hi ban tuk in i ton sual hi cu har bak mi si lai dah ka ti. Ka upat deuh hnu cun ka chuah ni phanh ah hin khua ruat lo nawn in ka chim cun kaa nuam theng lo. Si nain Pathian dawtnak le a thlachuah vialt e ka rel than ah hin cun lawmh lo in ka um kho than tawn lo.

Tuni can zong ah ka chuah ni a vun neih deuh deuh , zei kong dah ka chim ah that lai ti ka vun ruah tik ah ka lung ah rak chuak tuk mi cu, Psalm 23 hi a si. A luan cia mi can ah, nifatin ka um kal nak ah si seh, ka sianginn kai nai ah si seh a zei lei poah in Bawipa cu ka tuukhal tha bik a si mi le, harna ka inn can i zei tin ka tuah lai ti ka theih lo ka lungretheih can zong ah, lam a ka hraui i a ka um pi zungzal tu a si mi hi cu kaa fiang a thar in kaa fian than. Ka hmai lei ah zei ka ton lai ti ka theih lo lio can zong ah lam a ka hraui tu a tha bik in lam a ka sersiam piak tu a si zungzal ti zong hi zumhnak a thar in ka ngei than.

Ka um ka kal nak zei thil ka tuah poah zong ah ka ca ah a tha bik in lam a ka sersiam piak tu le lam a ka hruai tu um cun zei dah ka tih ti lai ii zei dah phan ding a um hnga, hna ngam tein um le Bawipa kut ah zeizong vial te chiah in lungdam hnangam tein um kal hi ka rian a si ko lo maw ti zong hi a ka ruah ter than fawn.

A luan cia mi ka can ka zoh tik ah keimah le keimah ka lung si lo nak te te an tam theu tawn. Fak deuh in rak i zuam ning law a tha deuh hnga ka ti mi a um len. Paul nih 2Timote 4:7 ah tlik zuam nak ah khan ka tha dih um nak in ka chuah cang, a dongh tiang khitkhat in ka tli cang, zumhnak kha fek tein kaa tlaih zungzal, tiah a ti mi kan hmuh. Kei mah le keimah zong kaa ruat tawn, cun ruat ti hna uh sih ti zong ka duh mi cu, kan nih cio tah kan tha dih um nak in kan i zuam in zumhnak fek tein kan tlik zuamnak cio ah kan i pe maw. Kan si khawh tawk a dih um nak in kan tuah mi cio ah kan i zuam sual lo si cun a hnu bik can, a phih chuah tik ah i ngaihchih nak tam tuk te hnga.

Paul nih cun aa zuam nak thawng le a zumhnak thawng in 2Timote 4:8 ah a ti than mi cu, a tu cu teinak lak sawng nih khan a ka hngah ko cang, cu lak sawng cu ka Bawipa, dinnak Bawi nih, cu Ni i a ka pek lai mi dinnak sui luchin cu a si… ti kan hmuh. Kan nih cio zong i ruat than ta hna uh sih law, Paul ban tuk in zei kan tuah mi poah cungah Bawipa kan i bochan nak thawng in le kan i zuamnak thawng in teinak kan hmu te lai ti mi zumhnak kan ngei cio maw. Pual he cun tah chunh ngam ding cu ka si lo ti hi cu kaa theih tuk, a si nain Khirhfa cio a si mi nih cun Paul ban tuk in kan mah le ka sin ning cio te te ah khua bia tak tein ruat bu tein, kan nun cio ah tha hnga lo maw. Pual kan va zuam si lo in a mah ni a rak tuah mi thil tha kha kan lam a kan hmuh sak tu kan tanh fung ah i chiah in i zuam cio hi Khrihfa mi a si mi pakhat cio I kan rian a si tiah ka ruah.

Kan nunnak cio ah Bawipa kan Pathiam hi harnak kan in can ah a kan um pi ii thil tha kan hmuh khawh nak ding ca lam a kan hruai tu a si. Cun pi ah kan ca a tha bik in tinhnak ngei tu si philh lo bu tein kan si ning cio te ah a that nak bik I zuam cio hna uh sih ti sawm kan duh hna. Cu ti kan i zuam nak thawng in hmai lei zongah, ngeih chih nun ngei lo tein, a liam cang mi kan rak tuah cia cang mi thil cung ah i lungsak in Pathian kan thangthat khawh nak si te hnga. Kan dih lak, kan tuah mi cio cung ah i lungsak in Pathian thangthat kho peng mi si cio hna uh sih ti saduh thahnak he..

Dam tein mangtha cio uh!

(July 11, 2010) Online Sermon

A HODAH KA SI?

By Saya. Ngun Biak Nawl

Tu zing caan ah hi bantuk “ Onlin Sermon” chimnak caan tha a ka pe tu kan Pathian cung ah le PCCF tuan vo ngei tu U pa hna cung ah kaa lawm tak tak ti kha biahmaithi ah chim ta ka duh. PCCF chungtel vialte, hi ka hmun hin nan dih lak in nan kut kan tliah hna. A hramthawk ah cun hi bantuk mi fim pi pi, kan U le kan Pa le hna sinah keimah hna nih “ThawngTha Bia” vun chim ve cu aw tiah kan lung chung in mi hoih kaa rak tim. Nain Philippines um Laimi cu Functionalism lawng te an si ko tiah ka hmuh caah le keimah le keimah training kaa lak nak tal si ko seh ka ti than caah ka tling tlak lo bu pi in a tang lei bantuk in kaa van ot ve than.

A Ho Dah Ka Si?

Mt 16:12-16 chung ah Jesuh nih a zul tu hna kha, “A ho dah ka si?” tiah a hal mi hna kan hmuh. Kum thum khel te Jesuh an zul, a it ah an a pawng te ah an it ve, a thawngtha bia chim mi ni tin an ngai ko nain a zul tu nih a ho a si an i fiang lo. A mak ngai ngai ko. Kan nih Jesuh a mui chim hlah a aw zong a thei bal ve lo mi nih hin Krihfa zumtu pawl Jesuh hi a kan kamh tu le Cung Nung bik Pathian fapa a si ti hi i fiang in kan zum tak tak maw? Kan zumh ko ah a nawl bia pek mi tah kan zul tak tak kun maw? Ruah ngai kan hua. A ho ka si tiah Jesuh nih a zul tu hna a rak hal hna tikah an leh mi cu Jeremiah, tipil petu Johan, Elijah a si lo ah prophet pakhat khat na si an hei ti leh lam. Simon Peter pakhat lawng lawng nih a Nung mi Pathian fapa “Messiah” na si tiah dik tein a leh kawh. Simon Peter zong hi a kaa lawng in chim sawhsawh seh law zum tak tak hlah seh law a dawh. Ziah ti ah cun Jesuh an tlaih zaan ah khan Peter nih Jesuh cu voithum khel te zaan khat bak ah a hlawt ti kan hmuh (Mt.26:70, 72,74). A voithumnak ah cun hlawh sawh sawh hmanh si lo in chiat serh bak in a hlawh. Jesuh zul tu dih lak nih hin Jesuh hi a ho a si kha tha tein an rak i fiang tak tak lo i zumh zong an rak zum fawn lo. Mah lio chan ah hin mi fim pakhat aa ti ve mi cu zul tu tam pi an ngei i an fim nak kha an zul tu pawl cu an rak chimh, an rak cawn piak tawn hna. Cu ban tuk ceo in Jesuh hi a zul tu pawl nih rak zul hna seh law a dawh ngai. Chim duh mi cu Jesuh kha a thih lai te tiang ah a zul tu hna nih a ho a si tak tak kha aa fiang bantukin an um nain an rak i fiang taktak lo i an rian ah khua awng an tong lo ti kha kan Bible ah kan hmuh. Jesuh a ho a si an i fian lo caah an mah pumpak hrimhrim zong kha zeibantuk minung dah kan si ti an rak i fiang lo. Nain Jesuh nih “Thih nak” a tei hnu, a zul tu hna sin ah aa vun phuan than hnu tu ah cun a zul tu Piter thawk in milung khong ngai a si tiah theih mi Thomas tiang an vun i fian taktak tik ah an dih lak in Jesuh caah sarthih in an Nun nak an i pe dih (Biathlam tial tu ah ruah mi Johan dah ti lo cu). Cu ti i fian bu le zaang tho ngai in a zul tu hna nih an rak i pek chanh than ngam ruang ah nihin ni ah Krihfa milu cu vawi lei cung ah tam bik kan si. Jesuh zul tu hna nih a Nung mi Pathian fa pa i a zul tu tha kan si tak tak ko ti tha tein an i fian tak tak hnu lawng ah hlawh tlin nak an hmu ti kha Bible nih a kan cawn piak.

Tu zing caan zong ah Philippines ram um mi Laimi nu le pa, u le nua pawl Jesuh a zul tu hna sin in fim i lak ti hna u sih ti ka duh mi pahnih a um. Pakhat nak ah (a) kan man le kan mah a ho dah kan si hi i fiang hrimhrim ve hna u sih. Pahnih nak ah (b) kan pawng kam a si lo ah kan hawi nu kan hawi pa hi a ho a si ti kha i fiang chih hna u seh.

(a). Caan tam pi ah cun kan mah le kan mah hi a ho kan si kan thei tawn lo i a ruah zong kan ruah huam lo. Kawl ca tial tiam minthang P. Moenin nih cun nangmah le nangmah a ho na si kha ni khat ah a tlawm bik minute 5 lengmang naa ruat lai a ti. Caan tam pi ah a ho kan si kan i fian lo tik ah chim ding tu chim lo in chim lo ding tu kan chim tawn i tuah ding tu tuah lo in tuah lo ding tu kan tuah tawn caah kan pawng kam caah hmunthur (hnawm) kan si caan a um theu tawn. Mi nih kan hnu lei in “Mah hngal lo” ti kan tuar sual tawn. Mah hngal lo ti hi hlan kan Pi Pu hna nih an rak i fak sak tak tak mi bia a si . An rak i ti sual cit cet ah cun siapi bak rak liam a si. Kan mah le kan mah a hodah kan si i philh hlah u sih, i hngal zung zal hna u sih. Thinghnah khi thing kung cung ah a um lio caan ah zeitikhmanh ah hmunthur kan ti bal lo i muthai hawng zong khi muthai a fun tuam lio te ah cun hmunthur kan ti bal ve lo. An um lo nak hmun pi ah an um i, um nak an tlua caan tu ah khan zeihmanh thathnemnak a ngeih lo leng ah hnahnawhnak a chuah pi tu “Hmunthur” tiah kawh an si . Cu ve bantuk in minung zong hi caan tam pi ah cun kan um nak hmun te ah um lo in kan tlua sual ve tawn. Kan mah le kan mah kha hawi caah thil rit si lo ding in um i zuam hram hna u seh. Phillippines kan rat hnawh chan hi zei a si ti zong i fiang hna u sih ti ka duh. Mi tam u cu fim cawn ah kan ra. Fimnak chawn ti mi a sullam zei dah a si?. M.Scott Peck, MD nih cun, “Learning means to welcome sufferings or problems” a ti. Fim nak cawn ti mi a sullam cu hi pa nih hin a khen tak tak ka ti. Cu si lo in, “ learning means to welcome pleasure” ti hna a let ta lam in kan i lak sual ah cun ka tlau cang, mah hngal lo, hmunthur kan si cang, ti kha i fiang hna u sih tiah van chim ka duh.

(b). Nikhat cu Grik mi fim pakhat a si mi Aristotle kha tlangval bu pawl nih vawlei cung ah zeibantuk minung dah mi fim cem ah na chiah hna? tiah an hal ti si . “A mah le a mah a limit aa thei i mi an limit zong a thei piakchih mi kha mi fim cem ah ka chiah hna”tiah a leh hna ti a si . Caan tam pi ah cun kan hawi nu kan hawi pa a si lo ah kan pawng kam limit kha ruah lo in rian kan vun ot tik ah a suukha dih tawn i rian hma a kal lo leng ah lung zong nuam lo in kan um caan a tam pi. Kan nih Khrihfa mi cu kan pawng kam mi caah rian khinh mi kan si ti zong kha i fiang hna u sih. Jesuh nih nan nih cu vawilei “Cite” nan si a ti (Mt.5:13). Kan thlum al nak a loh a si ah cun vawilei ah lamh chih kan si sual lai. Kan minung hawi caah kan thlum al kawh nak ding ah cun kan va dawt hna awk a si hnga. Dawt nak kan va langh ter nak caah thiltha pakhat khat kan tuah piak hna hnga. Cu ti thatnak kan va tuah piak cu an caah a herh mi kan va tuah piak kha a si ko hnga. Cu tin an herh mi tuah piak kan i timh tik ah a khua sik mi puan pek lo in rawl kan pek sual nak hnga lo le a rawltaam mi kha rawl pek lo in puan kan pek sual nak hnga lo thlei dan thiam ngai kan herh hnga. Chim duh mi cu kan hawi nu kan hawi pa a si ning kha kan i fian hnu lawng ah kan hei dawt khawh tak tak hnga i a caah kan hei thlum al kho tak tak hnga. Cucaah vawilei thlum al ter tu kan si kawhnak caah hawidang limit zong kha i fian in theihkhawh i zuam hna u sih tiah kan sawm hna. Ka bia dongh nak ah Jesuh zul tu hna nih an mah le an mah i fiang tak tak hnu lawng ah “Hlawh tlin” nak an hmuh bantuk in kan nih Philippines um “Laimi” zong a hodah kan si ti le zeidah kan rian a si ti kha i fiang cikcek bu in Bawipa rian ah kaar hlang cio ve hna u si law “Hlawh tlin” nak cu zungzal nun nak a ngei mi kan Khuazing nih thlua rak kan chuah hram ko seh!

Online Sermon

THAWHTHAN NUN

By Rev. Za Biak Ling

Lk. 24: 1-12; Mtt. 28: 7b “….Zeicahdah a nung mi cu a thi mi lakah nan kawl? Hika ah a um lo, a tho cang…”; “…Thihnak in thawh ter a si cang i atu cu nan hmai ah Galili ram ah a rak kal chung cang…”

Cantha ka hmuh mi cungah lunglawmnak tam pi ka ngei. Paul Knitter chim mi kan i hrawm ah cun, darkhing pahnih a thang. (i). Ralrinpeknak dar (Alarming Bell), (ii). Sawmnak dar (Invitation bell) an si a ti mi nih hin kan Bawipa Jesu Khri thihnak a tei i athawhthannak a thar in a kan thei ter i, thawhthan nun a thar in i thrawm ding ah a kan sawm.

Kan Bawipa Jesu Khri nih minung a thawhternak hi; Lazaruh, Jairus fanu le nuhmei nu fapa a thawhternak tiin kan hmuh. Lazaruh thawhternak he pehtlai in, Palestine ram hi a lin ngai mi a si caah nili ah hin cun an ruak hi a thu ngai cang lai. Lazaruh hi thawh ter a si hnu ah kum 30 a nung rih i, thut hnu i thawh ter mi a si ca ah zeitikhman ah a hmai a pan bal lo an ti.

Lazaruh thawhter nak zawn i Jesu Khri chim mi pawl kha tlawm pal in vun ruat ti ta hna uh sih. Lazaruh ti can ah hin Jesuh dawtmi (philos) ti a hman lengmang. (John 11:3, 36, etc.) Cucaah hihi pumpak Lazaruh si lo in Jesuh dawtmi Khrihfami vialte can ah hman in zumtu vialte thawhthannak kong cawnpiaknak a si ti in kan lak kho ve hnga. Cuca-h thawhthannak nih tinh mi thil biapi a um ko ti cu a fiang.

1. Lazaruh thawh ter a si lio ah Jesuh nih "Ka Pa, ka bia na ka theihpiak caah kaa lawm," a ti. Pa le Fapa pumkhat si nak a lang ter. Zumtu nun cu Jesu Khri nun i hrawm a si ti hi Bible nih a kan cawnpiak. Jesu le Lazaruh hawikomnak, i pehtlainak (intimate relationship) nih thihnak in a thawh ter. Jesu thinak in thawhter a si nak cu Pathian thawnnak in a si. Voitampi cu vawleicung thil kan tawn mi ah hin kan thi ve tawn (thi ka ti mi hi pumsa si lo in thiltha tuah kholo nak) thinak. Cu Pathain he i pehtlai nak, i hawikomnak nih thihnak in thawh ter kan si ve. Cuca-h teitu nun kan ngei ti nak a si. Thawhthan nun nih Pathian duhnak tuah ding a kan fial. Voitampi cu nun i i hawikomhnak, a duhnak tuahnak nak in thlacam rumro i rinh hi kan hman tawn. Kan pal thlu lo na-in, thlacam ngai tung a duhnak tuah tung lo hi a poi taktak. Cucaah thla cu kan cam lai. Asinain i hawikomhnak le a duhnak tuah hnu ah cam a herh.

2. “… anni nih keimah cu nangmah thlah mi ka si kha an ka zumh khawh nak hnga caah a si….” A thihnak a sau hnu ah a thawhter tik ah Jesuh thiltikhawhnak an zumh deuh nak hnga caah a si a timi an um. Jesu nih Judea ram Lazaruh um nak vakal ding a chim hna lio ah lung cheh ding in an rak i tim nak hmun a si caah kal lo ding in zultu pawl nih an chim. Hi kong hin Johan catialtu nih fiangte in cawnpiak a kan duhmi cu Jesuh nih harnak a hrial lo i, sunparnak (glory) le temhtuarnak (cross) hi then awk a tha lo ti hi a si. Kan bawipa Jesus Khri vailam cungin temntuarnak nih thawhthannak sunpernak ah a canc ter. Cucu Khrihfabu cawnpiak a duh bikmi hna cu a si. Kan thawhthan nun hi Krifa mi lak long ah si lo in zumlotu pawl sin ah nunnak bak in langter ve ding a si. Temhinnak nih hmai a sak lomi sunparnak cu Khrih sunparnak he aa ralkahmi a si.

3. Lazaruh thawhter ding ah a kal bantuk in sermi thil vialte ca ah a nunnak pek dingah a kal ti zong in chim khaw a si. Dawt a tlak lo vawleimi caah a Pa duhnak le dawtnak ruat bu in a chiatha thleidan hnu ah thih fuh ngamh ralthatnak a si. Hi bantuk ralthatnak hi kan herh bik mi a si. Krifa kan si cu ruah lo pi in thil a cang mi a si lo. Harnak ton ding kong rumro ruah nak in a herhnak tu zoh in raltha ngai in hmailei nor ding hi zumtu rian a si tawn.

Socrates hi dinnak kong a chim ruangah thong ah an thlak. Thah ding a si lai ni ah nawlngeitu nih thah an sian lo i zaam an fial, a duh lo, i an thah. A thih hnu kum 200 ah Epictatus nih Socrates hi rak zaam sehlaw a rak thi hnga. Biatak a dirpi i a zaam lo caah a takpum cu a luan cia kum 200 ah a thi cang nain nihin tiang Socrates cu a nung peng a ti. Jesuh cu midang nunter dingah a mah a thi. A mah tu cu aa kaltaak ko. Cucaah nihin tiang a nung peng ve. Cucu nihin ih kan her mi thawhthan nung kan ti mi cu a si.

4. Jesuh nih Lazaruh ruak zualnak thuampi, Phoih uh law kal seh tiah a ti. Judahmi hi an thih tikah Iziptmi bantuk in thu lo ding in an i tuah lo. Ruakpuan zualnak tu in an pum le an kut kha fek tein an temchih hna an ke zong hri in an tem hna. Lai mi zong aluan ciami can ah khan kan rak tuah ve tawn. Lazaruh thawhternak nih hin hlanlio a luan cia kum 2000 lio ah Bawi Jesuh nih mipa pakhat Lazaruh cu a thihnak ni-li nak ah a thawhter ti men kha a kan cawnpiakmi a si lo. Kan thawhthan nun ah hin Pathian ram ca-h temtawntu vial te phoihpiak si kan herh.

“…Zeicahdah a nung mi cu a thi mi lakah nan kawl? Hika ah a um lo, a tho cang…”; Thihnak tei in a thothan mi cu thawnthan nun lawng in kan ton khawh lai. Thil ti khawh nak ngei ding in thawhthan nun a kanpek tu Pathian thang that uh sih.

“…Thihnak in thawh ter a si cang i a tu cu nan hmai ah Galili ram ah a rak kal chung cang…” Galili hi public ministry hi a lang ter peng mi a si. A ram caah riantuannak in nihin ni i thihnak in a thothan mi cu thawhthan nu he tong hna uh si.