(September 19, 2010) Online Sermon.

Bawi Jesuh Khrih Kan Hnangamnak le Kan I Lawmhnak

By Siang Chin Tial

Lunglawmhnak

“Nunnak, damnak he thluachuahbongmalza a kan pe zungzaltu kan biakmi kan Pathian a hmasabik ah thatthat si ko seh.” Tu zingka caan ah Thawngttha chim dingin ttuanvo a ka petu PCCF upa te nan dihlak cungah lawmhnak chim cawk lo ka ngei.

Bible: Matthew 14:28-31

28 Cun Piter nih khan a hun chonh i, “Bawipa, nangmah na si taktak ahcun na sinah ka ke in ti cung in ka rat ter tuah,” tiah a ti. 29 Jesuh nih cun, “Ra ngat,” tiah a ti. Cucaah Piter cu lawng cun a vung ttum i ti cungah cun a ke in Jesuh lei ah cun a kal. 30 Sihmanhsehlaw thlitu afah zia kha a vun hmuh tikah a thin a phang i ti chungah cun a pil cuahmah i, “Bawipa, ka khamh tuah,” tiah a au. 31 Hmakhatte ah Jesuh nih a hei banh i a tlaih i, “Na zumhnak a va hme hringhran dah! Zeicahdah lung awttawm in na um?” tiah a ti.

Rel chih ding: Matthew 8:23-26 (Jesuh Nih Tilet, Thlichia A Daih Ter nak)

Ca tial tu pakhat nih a timi cu thawngtthabia hi theih lengmang asi ko zongah a biapimi cu a thar in thazang i lak tthan kha asi tiah ati. Cuve bantukin tu zing i kaa thimmi zong hi kan theihcia tuk asi ko lai nain, a thar in thazang laktthan ding in a hmasabik ah kan sawm hna.

Minung hi harsatnak, ngaihchiatnak, zatlaknak, sunghnak le sualnak (etc) hna he kan i tthen kho lo ti hi cu al awk ttha lo asi. Mirum, mifim, milianngan, misifak, muidawh, misang, mingo (etc) hual lo in ton cio dihmi asi. Harsatnak le sualpalhnak he kan i tthen kho hna lo timi ah kan i khat dih. Amah belte kan i khah lonak cu zeitindah cu kan tonmi pawl cu kan in, zeibantuk lam in dah tei kan i zuam timi tu ahcun kan i khat kho dih lai lo. Aruang cu kan theihcia bang, minung cu pakhat le pakhat kan sining, kan ruahning kan i dan caah asi ko. Mi cheu nih kan nunnak ah kan tonmi hna hi, chaw le va, ngeih le chiah in maw, degree in maw, rank in maw tibantuk in tei aa zuammi zong kan um kho men. Cu ti vawlei lei sining in tei kan timh tikah kan tei kho ngai maw ti hi ruah lo awk ttha lo asi. Kamkhat in chim ahcun minung nih kan tonmi thil hna hi vawlei sining in tei kan timh tikah, chunglei hnangamnak taktak le lawmhnak taktak kan hmu kho maw ti hi ruah ngaingai kan hau. Kei ka dirhmun ahcun, kan nunnak ah kan tonmi thil hna hi rikhiah asimi minung sinak le vawlei sining in tei kan timh ahcun, kan tei khawh lai ti hi cu ka zum lo. Kan nunnak ah Bawipa Jesuh Khrih lo in cun, kan tonmi hi kan tei kho lai lo ti hi kei ka dirhmun asi.

Kan Bible cacang thimmi kha kan zoh ahcun, kan theihcia bantukin Peter le kan Bawipa Jesuh Khrih ti cung i an umnak kong asi. Kha ah khan, Peter nih kan Bawipa Jesuh Khrih kha dengteo in a zoh i a pawngkam rili thil sining a zoh lo lio ahkhan ti cungah ttha tein a kal kho. Sihmanhsehlaw, a pawngkam thil sining a zoh tikah ti chungah pil hnik aa tim. Kan theihcia bantukin Judah mi hna hna nih rili hi thil ttha lo, ttihnung a umnak hmun asi tiah an zumh. Hi Bible sining he pehtlai in Khrihfami hna kan nunnak zongah kan Bawipa Jesuh Khrih kha zoh lo in, pawngkam sining kha kan zoh peng ahcun cu kan pawngkam sining chungah kan pil cuahmah ve ko lai. Kamkhat in chim ahcun kan Bawipa Jesuh Khrih kha kan nunnak ah kan i tlaih lo le kan i bochan lo ahcun, Khrihfa kan si ko ah, pastor si ko ah kan pawgkam sining nih a kan dolh ko lai. Abiana ah thihnak kan ton tik zongah a in zia kan thiam lai lo i, cu thihnak nih khan kan nun a den lai i, kan nun ah ngaihchiatnak lawngte a khat ko lai. Cuve bantukin kan Bawipa Jesuh Khrih kan zoh lo i, kan i tlaih lo ahcun, sualnak nih a salmi ah kan tang peng lai i kan nunram ah i ngaihchihnak le i tthinhnak a um hnga lo.

Matthai 8:23-26 kha kan zoh ahcun, Kan Bawipa Jesuh Khrih a zultu hna nih lawng an i cit lio ah, tilet thlichia an ton i an awlokchon tuk ah kan Bawipa Jesuh Khrih an va tthanghnak kha asi. Hi kaa zawn ah a zultu hna nih anmah thazang le minung lei sinak in kha tilet thlichia kha an tei kho lo. An lawng kha ti chungah pil hnik aa tim. Sihmanhsehlaw, kan Bawipa Jesuh Khrih kha an va tthangh tik ah kan Bawipa Jesuh Khrih nih kha tilet thlichia kha a daihter ti kha fiang tein kan hmuh khawh mi asi. Hi kaa zawn ah ruah awk a ummi cu a zultu hna nih khan kan Bawipa Jesuh Khrih kha tthangh loin um hna sehlaw, tilet thlichia kha a dai hnga lo. A zultu hna nih an tuahmi cu kan Bawipa Jesuh Khrih sin va kal i va tthangh kha asi. Cuve bantukin kannih Khrihfa mi hna zong nih minung kan nunnak ah kan tonmi thil hna hi kan tei khawhnak hnga kan pawng ah a zungzal a kan umpitu Bawipa Jesuh Khrih kha kan nun ah sawm peng ding kha kan rian asi. Kan nunram ah kan Bawipa Jesuh Khrih kha kan sawm peng i, kan i bochan peng ko ahcun a kan kaltak hrim lai lo. Minung lei in kan rian tu tlolh lo a hau. Mi cheu tampi cu harsatnak, thihnak, lohnak hna kan ton tikah Bawipa Jesuh Khrih nih a kan kaltak tiah kan ruah ttheo tawn. Keimah lila zong nih tanghra ka awn ka (ka rak zawtfah tuk lio) ah ka rak ruah bal. Pathian a um lo ti tiang in ka rak ti bal. Thla zong ka rak cam duh lo chikhat cu! A ngaingai ahcun kanmah tu nih kan rak kaltak tu a rak si deuh tawn. Kan pawng i a um komi kan rak theih lo le kan rak sawm lo tu a rak si deuh. Phundang in chim ahcun, lamnai te ah a um komi kha kanmah lila nih lamhla pi ah kan va umter tu khi a rak si deuh.

A donghnak ah chim ka duhmi cu: ka nunnak ah ka tonmi ka zawtfahnak le ka sining chungin ka nun a ka tonghtukmi hla pakhat a um i, cu cu kan Khrihfa hlabu no. 349 (Jesuh nih a ka ruat hnga maw?) ti khi asi. Hi hla a sining hi micheu nih cun a theih zong kan theih cang ko lai nain, a thei rih lomi hna kan um sual ah tlawmte in hi hla sining te hi van langhter ta ka duh. Hi hla a phuahtu hi Frank E. Graeff asi i, amah hi Philadelphia ah pastor a rak ttuanmi a rak si. Pastor a ttuan lio ah a khrihfabu ah buainak nganpi a rak tong ti si. A hawikom cheuhkhat zong nih an rak kaltak. Cu lio ahcun a tonmi buaibainak le lungretheihnak cu amah minung sinak in tei a rak timh. Asinain, a minung sinak in a tei khawh lo kha a van theih tthan i “Kan nunnak ah minung nih kan tonmi hi kanmah minung sinak in kan rak tei khawh lo zia le kan pawngah a um komi zeizong vialte a kan teipiak khotu, a kan hnemtu, a kan umpi zungzaltu kan Bawipa Jesuh Khrih a um ko ti a philh kha a van thei than i, “Kan Bawipa Jesuh nih kan thil a rih, kan lam a har, kan lungre a theih, kan mitthli a tlak, kan ngaih a chiat, kan khuaruah a har, kan van a san lio ah a kan kaltak lo i, kan pawng te ah a um peng ko” ti kha a nunnak i a tonmi thil sining cung in a phuah mi asi. Hi he pehpar in le a cunglei i ka langhtermi he pehpar in kan nunnak ah kan Bawipa Jesuh Khrih kha dengteo tein kan zoh lo, kan nun ah a hmasabik ah kan i bochan lo i kan minung sinak kha kan i bochan ahcun kan nun lam a har lai i, kan nunnak ah kan tonmi harsatnak, sualnak hna hi kan tei kho lai lo. Sihmanhsehlaw, zungzal a nungmi a kan hnem zungzaltu, a kan umpi pengtu, hnangam daihnak a kan pe zungzaltu, a kan khamhtu, a kan ngaithiamtu kan Bawipa Jesuh Khrih kha kan nun ah hmasabik ah kan chiah i nifatin kan nunnak ah kan sawm i Amah he kar kan hlan peng ko ahcun kan zawtfah cuahmah ko bu ah siseh, kan sifah/harsat ko bu ah siseh, thih lohnak kan ton ko bu ah siseh, chunglei hnangam daihnak taktak nun kan ngei lai i (in khawnak kan ngei lai), kan sual cuahmah ko bu zongah, i ngaihchihnak le i tthinhnak nun kan ngei lai i kan nunnak ah chunglei lawmhnak taktak nun kan ngei ko lai.

Cucaah, kannih PCCF chungtel zapi te zong nih kan nunnak ah kan tonmi thil hna hi, kan minung sinak in tei i zuam lo in, zeizong vialte a tuah khotu, chunglei hnangam daihnak taktak le chunglei lawmhnak taktak a kan petu a kan khamhtu kan Bawipa Jesuh Khrih kha a hmasabik ah chiah i, i bochannak le Amah he nifatin kan nun karhlannak thawngin tei i zuam hna usih tiah kan sawm hna. Lawmhnak tampi ka ngei.
“Bawipa thluachuahnak kan zapi te cungah um hram ko seh”. Amen!!!!!!!

(September 12, 2010) Online Sermon.

DINFELNAK

By Van Nun Thang

A tu vaw lei cung thil si ning kan zoh tik ah, khui ka hmun poh ah corruption hi kan hmuh khawh. Sual khi sual ah hmuh lo in a phung si ko tiah kan ruah i, zei rel lo in mitam pi cu kan um. Cu caah din fel nak hi , kan sin ah hmuh a har ngai mi thil a si cang. Zei hmanh kan rel lo mi thil nih kan nunnak a kan hrawh ti hi kan theih lo. Cu caah Khrih ah unau a si mi hna kan nun ning hi i check than uh si tiah kan sawm hna.

Bawipa nih a duh mi cu nun thiang hlim a si ti hi kan theih dih mi a si. Sinain zei kan rel lo i, “ma hi cu zei a pawi lai lo” kan ti, kan mah te in excuse kan i pe. Mah hi kan nunnak a kan hrawk tu a si kan theih lo.

Cu caah kan nunnak ah buaibainak tam pi kan tong i , a phi kan hmuh khawh lo nak a si. Dinfelnak hi kan Bawipa zong nih a duh ngai mi a si. Proverb 10:3 ah kan hmuh mi cu, “Bawipa nih miding mi cu rawl taam in a um ter siang hna lo” tiah kan hmuh. Ding fel te in kan nung ko na in har nak

kan tuar a si ah cun, Bawipa nih a kan hnek sak mi a si i a rau hlan ah a phi kan hmuh cawlh te ko lai. Sinain, can sau pi ei awk ngei lo, rian zong ngei lo kan um i har nak kan tuar a si ah cun, kan nun ning i check a hau than cang. Thil pakhat Khrihfa tam deuh kan palh mi cu, har nak kan tuar tikah zei ruang ah a si ti ruat lo in , “bawipa nih hnek sak mi a si, a dong nak ah cun a tha te ko lai” tiah kan i hnemh ton. Kan din fel lo ruang ah, kan nun ning that lo raung ah Bawipa nih a kan chimh hrin (rebuke) a si tiah kan thei kho lo. Cu caah ah kan sual peng i, kan bawinak le problem chung in kan chuah khawh lo nak a si. Proverb 11:1-11 ah kan hmuh mi cu, ding fel tein a nung mi le mithalo kong kan hmuh. Ahme 8 ah cun mi ding fel mi cu har nak chung in a luat ( kawl bible in) tiah kan hmuh.

A tu Khrifa kan problem pa khat cu, kan mah le kan mah sual chung ah kan um ti mi kan hmuh kho lo. Tahchunhnak ah, lih chim ( lie) a tha lo ti kan theih ko na in, lih chim cu sual ah kan rel ti lo, a ho poh nih lih kan chimh dih (cf. John 8:44, 1 John 2:4, 21,22). Satan nih kan mit an kan phen i kan that lo nak kan hmun kho lo. Cu caah khrih ah unau hna, kan nun ning hi a bia bi tuk. Khua le ram kan dawt kan ti si ah cun, nun ning dawh te in nung hna uh si. Bible nih tang ka nih khua le ram a than ter a ti lo, din fel nak nih mi phun a than ter ti kan hmuh (Prov. 14:34). Khua le ram kan mi phun kan dawt tak tak a si ah cun, kan um nak hmun poh ah le kan rain tuan nak poh ah ding fel te in bawipa tih za ngai in kan nun ding asi. Ding fel te le bawipa tih zah tein na nun a si ah cun thluachuah na hmuh lai ( Prov. 21:21).

Si ah zei tin ding fel te in kan nung khoh lai? Kan mi nung si ning in kan i zuam len ah cun a har ngai ngai mi a si, sinain bawipa thlarau nih a kan bawmh ah cun zei zong vial te a fawi dih. Cu caah bawipa he pehtlaihnak (relationship) kan ngei a herh. Zei tin dah pehtlaihnak kan ngei kho lai ti si ah cun, thlacam nak le bible rel nak in. Zing ka ten zei hman kan tauh hlan ah bawipa sin ah thlacam le bible rel in kan nun nak kan ap a herh.

Cucaah unau hna, a tu ni thawk in dinfel te in nun khawh i zuam u sih. Bawipa nih Abraham sin ah a ti mi cu, mi ding ( ding fel te in a nung mi ) pa 10 an um ah cun Sodom le Gomorrah ka hrawk lai lo a ti (Gen. 18:32). Sodom le Gomorrah cu mi nung tam ngai mi khua a si. Bawipa nih mi thiang mi or din fel te in a nung mi a dawt tuk ruang ah 10 an um ah cun ka hrawh lai lo a ti nak a si. Mi tam pi cu duh poh in an nung ko lai, sihmanhsehlaw nang le kei cu ding fel tein nun i zuam ko uh sih, Bawipa nih nang mah pa khat ding fel tein na nun ruang ah, na in chung khar, na khua le na mi phun thlachuah an co te lai. Bawipa nih thlachuah an pe ko seh!!!!

(August 29, 2002) Online Sermon.

VANCUNG PENNAK LUHNAK LAM

By Cung Bik

Lunglawmh nak:

Lai miphun a daw i lam a kan hruaitu kan Pathan amin thiang thangtthat si ko seh. Philippines Ram ah um mi laimi(PCCF) zumtu nan sin ah thawngttha bia hrawmtti nak can ttha ka hmuh caah, cantawl reltu upa te le zapi nan dih lak cung ah lunglawmh nak chimcawk lo ka ngei. Hi thawngttha chim nak capar in nan kut kan tlaih hna.

Tu zing can ah kan zapi te i hrawmtti hna u sih ti ka duhmi Baibal caang kai thim mi kan rel hna lai.

Matthai 5:3 “ Mi chambau kan si ti aa hngalmi cu, lunglawmmi nan va si dah! Vancung pennak cu nanmah ta a si”.

Biahmaitthi

Kan rel mi baibal caang hi Bawi Jesuh nih Tlangcung ah a cawnpiak mi hna a si. Tlangcung timi hi Jesuh chanlio ah hin a rak biapi tuk mi hmun a si. A muihmai a thlen ah siseh, thla a cam ah siseh, tlangcung peng ah a kai ti kan hmuh. Cun a cawnpiak nak zong hi tlangcung tthiam a si, cun Matt 5: 3 hi a cawnpiak nak ah, a hmasa bik ah a chim mi a si. A biapi tuk mi a si ti a lang, (Matt.5:12). Cun Gandhi nih tlangcung cawnpiaknak hi ram hruainak ah a ka bawm tu ttha bik a si a rak ti ti a si. Vancung pennak a lut dingmi nih cun mah ah hin nun nak hram kan bunh awk zong a si a ti.

Laimi/ Khrihfa kan thinlungput:

Vulei cung mifim hna nih Vulei cung ah ral ngan bik an kawl, an hmu loh, an hmuhmi cu kan mah hi kan si ko an ti. Khrihfa bu /Lai mi kan ral nganbik cu kawlpa, vai pa an si lai loh i, kan mah lai mi lila hi kan si ko lai. Kan nih Laimi hi kan hmurka in cun ai toidor ngaimi kan si nain kan lung chung tein cun mi cungcuan/kai a duh bik mi kan si kan ti ah cun kan palh lem lai loh dah! cucaah Laimi nih kan santlaih lo nak dirkamh peng kan hman mi hi kan sual nak phun khat a si. Kan pa le nih uk hruainak ah a kan dawn tu bik cu, bik/ cem thinlung put hi a si an ti.Cucu min kan i sak nak ah a lang, (e.g kan thilti khawh nak te kha i chuankhan in min kan i sak. Salian deuh pakhat te kan kah le Kap Lian Thang ti ban tuk kan i sak colh, thluachuah kan hmuh deuh le Van Tha Bik kan I sak, sianginn sang deuh kan kai le Siang Lian Thang ti banti in kan I sak colh. etc…). Mi dang nak in ka theicem/ ka hngal bik timi lung put hi tthandawntu, Pathian he a kan hlat ter tu thil phunkhat/ sinak a si. Kan baibal ahcun mi nung hicu zeihmenh kan si lo tholung le cangcel bantuk men kan si(Job 25:6). Mi ding le mi ttha zong kan um loh an i khat dih ko (Rom3:10-12).Jesuh nih “Keimah loin nan tuah khawhmi zeihmanh a um lo (John 15:5) a ti. Chimduhmi cu minung nih kan tthawng,kan fim,kan thei, kan rum, thil kan tuah kho, kan ti lio zong ah kan chambau tthiamhtthiam ko ti kha a langh ter. Prophet Amos kan zoh ahcun Isarelmi hna an i nuambak lio caan le biaknak lei zong ah kan za ngai an i ti lio can te, thil kan ti khawh ko tiah an mah tein cun an i ti , i seihchiah ngai in an um lio caan ah khan pathian nih chim a fial mi bia cu i uanthlar nak thinlung put le midang zei rel lo nak thinlung putte kha a rak doh bik mi a si. Zeizongvial te hi Bawipa sin lawngte in kan hmuh mi an si hih! Pathian kha philh hlah uh, mah tin nan nun ahcun dantatnak nan cungah a tlung lai ti kha a si. Tu chun ni ah dawtmi Ulenau hna nang le kei nih teh kan chanhbau nak zawn te hi kan I thei kho ve hna maw? Kan cawnfim nak/ a thuachuah kan relmi hna hi midang nunhrawmh khawh nak si lo in kan lungthin a lianhter tu le mi cung kai nak ah kan hmang sual ve maw?micham bau kan si hi kan i thei cio maw?

Krihfa/zumtu kan lungthin put ding :

Emanuel Khant nih, michambau ka si ti i theih hi, a ttha bik nak in a ttha deuh a rak ti anti.

Kan baibal ah, Tipil petu John nih kei cu “A keden hriphoihtu hmenh ah kai tlak loh”, (Luka 3:16 ) a ti. Mithiang Paul nih, mi sualbik lak ah mi sual bik ka si a ti.Hi lungthin put hi kan nih zong ngeih ve kan herh. Kan bawipa Jesuh khrih zong “Mi toi ah aa dor i nawlngeih nak lam tu a zul….. min vialte lak ah min cungnung bik kha a pek” (Pilipi 2:5-11). Cucaah Zumtu nu le pa ule nau hawi kawmdawt hna zumtu nih cun Jesuh khirh ah hin thlalang kan i bih ve hna awk a si, kan chamhbau i hngalh hi kan damnak a si. Khrih he hmunkhat ah kan um tti nak ding lam ttha bik zong a si.

Thawngttha bia aa hrawmtu kan zapi caah Pathian nih thlua kan chuahpiak ko seh. Amen!

(August 22, 2002) Online Sermon.

SUAL NGEICHIHNAK I A PHI CHUAK

By Ester Van Cherry

A hma sa bik ah a kan dawtu kan biakmi kan Pathian Amin thangṭhat si ko seh!

Dawtmi PCCF nu le pa u le nau Saya/Sayamah vialte nan cungah lunglawmhnak chimcawk lo ka ngei.A bikin hi online sermon pe kho dingin caan ṭha a ka petu PCCF hruaitu nan dih lak cung zong ah lunglawmhnak chim cawk lo ka ngei.

Tuzarh online in nan nih he ruahṭi dingah ka thim mi cu a tanglei bantukin ka van langhter.

Texts: Luke 19:1-10.

Jesus cu Jerikho khua ah cun a vung lut I khua cu a hei tan. Cu ka ah cun ngunkhuai khawltu upa bik pakhat a min Zakia a si mi a rak um, a mah cu mirum ngaingai a si. Jesus cu a hodah a si hnga ti kha hngalh a duh caah hmuh aa zuam, asinain Zakia cu miniamte a si caah mizapi nih an phenh dih caah Jesuh cu a hmu kho lo. Cucaah cun hmai ah khan a rak tli I Theipi kung pakhat ah, cu ka lei I a kal mi Jesuh hmuh duh ah cun a rak kai. Cu ka hmun cu a phak tikah Jesuh nih cun cung lei kha a zoh I Zakia cu, “ Zakia, khulrang in rung `um, na inn ah kan tlung lai,” tiah a ti. Zakia cu, khulrang in a ṭum I lunglawmhnak in a inn ah cun a tlun ter. Cu a hmumi vialte cu an zai I, “Hi pa hi misual mi inn I tlun awk ah a kal,” an ti. Zakia cu a dir I Bawipa cu, “Bawipa,, ngai hmanh, misifak caah ka ngeihmi thil hnarcheu ka pek lai; cun ka hlenmi hna an um ahcun alet li in ka cham hna lai,” tiah a ti. Jesus nih cun a thawh i, “Nihin ah hin na inn ah khamhnak a phan; hi pa zong hi Abraham tefa a si ve. Zeicahtiah Mi Fapa cu a tlaumi kawl awk le khamh awk ah a ra,” tiah a ti.

Sual ngeihchihnak ti mi hi Pathian nih kan caah laksawng ṭha a kan pekmi a si ti hi theih a herh ngiangai mi a si.

Lamkaltu 5:31 ah “Israel mi kha I ngaihchihnak caan `ha le sual ngeihthiamnak pek awk ah Amah cu Pathian nih a orhlei kamah khan Hruaitu le Khamhtu in a ṭhut ter cang”.

Sual ngeihchihnak hi Khrihfa mi hna kan caah Khrih he a kan tontertu le Amah he kan I neihniam khawh nak caah lamhmuhsaktu thil a si hi philh hna hlah u sih.

Luke 13:1 “cu caan ah cun Jesuh cu, Pilat nih Galilee mi hna Pathian sinah raithawinak an pek chanh lio I a thahmi hna kong kha an rak chimh.”

Luke 13:2 “Jesus nih a leh hna I, “Cu Galilee mi hna cu, cu bantukin thihnak an in caah Galilee mi a dang hna nakin a sual deuh mi an si tiah nan ruah maw?”

Luke 13:3 “ Asilo, nannih zong nan nunning nan `hinh lo ah cun an mah thih bantukin nan thi ve lai.”

Sual ngeihchihnak ti mi cu voikhat men thinlung I thlen duak khi a si lem loh, kan ruah ning, kan lungput kha zungzal ca in kan I thlen I Amah Pathian ca I kan nun hman khawh hi Pathian nih a kan duh piakmi nun ithlennak cu asi deuh. Pathian kong ah si seh, kan mah kong ah siseh , mi dang kong ah si seh kan thinlung kan I thlen kha suallam a ngei mi ngeihchianak ti mi cu a si. Kan chung lei in kan thinlung, kan ruahnak kan I thlennak kha leng lei I kan nung ning cang nih khan langh ter ding kha kan rian a si. Tahchunhnak tampi chim hau lo in Zakia nunnak ah hin zoh u sih law Nun Ithlennak cu kan I fiang cem lai tiah zumnak ka ngei.

Zakia cu Sual ngeihchih a herh mipa a si.

A rum ngai nain, a nuam lo mi pa a si.

Chawva le thil ṭha tampi a ngei nain chambaunak in a thinlung cu a si fak.

Khuapi chungah mi tam pi he a um ko nan a ning ṭi peng mi a si.

Hmailei caan ruat loin a tu caan lawng nuamhnak I a rak nung mi pa asi.

Zakia hi zudawr ngeitu a si. Rome cozah tangah ngunkhawi khawltu a si. Cun Publicans vialte lakah u pa hmai suang pakhat a si. Ngunkhawi khawltu u pa vialte lakah a lu bik dirhmun in a um caah a rum ti cu fiang ngai in a lang.

A ram zei ah a rel lo mi a si.

Cun an ram chung minung pawl hi tangka in a rak hlen hna.

Cun chiaṭha thleidannak lungput a ngei khomi pa a si lo.

Cun Zakia hi mi nih an hlawtmi le an huatmi pa a si.

A cung lei nunning le kan nunning a tlakmi te te a um le um lo hi I zoh ṭhan hna u sih. Kan nunnak ah mah bantuk te te nunnak a um si ah cun Khrih he kan I pehtleihnak ah dawnkhantu thil an si hnga. Cu caah cun kan sining I zoh ṭhan hna u sih law Khrih he kan I pehtleihnak ah pakhat cio nih I tleng kho dingin Pathian sinah thlacamnak he hal cio hna u sih.

2. Zakia nih a Sualnak a ngeih chih!

A. Jesuh cu mi tlaumi kawl awk ah cun Jericho khua lei ah a vung lut. Jericho khua cu khua rum, Ung kung a tam nak, a ṭhatnak, khua nuam ngaingai mi a si. Cu caah cun Josephus nih cun “Divine Region” tiah a kawh. Cun hi khua I an cin mi Rose pangpar hna nih Jericho khua lawng si loin ramdang tiang nih panh mi minthang ngai ngai mi pangpar tiang a chuahnak khuadawh ngai ngai mi a si . Cun Jericho hi Israel le Jordan tiva nelrawn kar lak ah a um mi khua a si. A cung lei kong he pehtlaiin hi thil vialte nih hin Jericho khua hi Palestine ram chung I ngunkhuai khawlhnak ah a san cemnak a si ti a fiang. Zakia nih vawlei in nuamhnak a kawl cuahmah lio ah Jesuh nih cun a fekmi a dawtnak le a vel in tlenh a duh. Jesuh Khrih cu misual kan caah kawltu a si zungzal.

B. Jesuh Khrih nih misual ngai a si mi Zakia a nunnak thlen dingin a kawlnak cu Zakia nih a rak kawl ve hma sa caah khan a si. Zakia nih Jesuh a kawl duhnak a ruang cu midang a hawi le hna nih Jesuh kong hi a hlan kan in Zakia sinah an rak chim langmang caah a si kho men.

Zakia nih Jesuh hi zei bantuk minung dah a si ti hi hmuh a rak duh tuk. Nabeltein zei tluk I a zuam zong ah khan Jesuh cu a rak hmu kho loh a ruang cu a niam tuk ruangah le mi an rak tam tuk ruangah a si..

Vs.4- Asinain Jesuh hmuh duhnak le Khrih he I tonnak dingah cun Lungdonghnak a ngei lo ti kha Zakia nunnak ah a lang. Midang nih an phenh viar I a hmuh khawh lo caah. Theipi kung cungah a kai I Jesuh cu a cuanh.

Jesuh nih Zakia cu a hmuh tikah Jesuh nih cun a thawh I “Zakia thing kung cung khan rianrang in rung ṭum tuah, na inn ah ka tlung lai” tiah a ti. Midang vialte nih an cuanh len ve ko nain Zakia nih lungthin tak tein hmuh a duhnak le kawl a duhnak tu kha Khrih nih a theih caah Zakia cu kawh a si.

Jesus cu Zeizawng vialte hngal dihtu Pathian Fapa a si. Kan sining zei hmanh hi Amah sin in kan I thup kho lo.

Jesus khrih hi Pharisee mi hna le Lawki mi pawl nih len an sawm mi hi a co hlan ti kan hmuh (Luke 7:36-11:37). Asinain a tu tan lawng lawng hi Amah le Amah ai sawm, zei caah tiah Zakia rak ṭum tuah na inn ah ka tlung lai a ti. Cun Zakia cu thingkung cung in a rak ṭum I Jesus Khrih cu lunglawm tein a don I a cohlan kha kan hmuh.

V.7 nak ah van kal uh sih law, Mipi nih cun Jesus Khirh cungah an phunzai len. Zei ca tiah, misual ngai ngai ah ruahmi Zakia I a khual pei a si ko hi an ti I a phun phun in an volhpamh, an congoih .Asinain Zakia nih Jesus ka tong lai ti in bia a rak I khiah cia cang caah zei thil hmanh nih a dawn khan lo.

3. Zakia cu Jesuh Khrih he an I ton hnu ah aa thlennak kha tette (witness) in a langh ter.

Zakia cu duhhakkauhnak in mihrawkhrawl a si nak kha midang caah petu misiang a si mi pa ah ai thleng.

Luke 19:8 ah “ Zakia cu a dir I Bawipa cu, “ Bawipa, ngai hmanh, misifak caah ka ngeihmi thil hnarcheu ka pek lai; cun ka hlenmi hna an um ah cun a let li in ka cham hna lai,” tiah a ti.”

Zakia cu Khrih he an I ton hnu ah a sualnak cu a ngeihchih I a nunhlun kha mer takin Khrih nunzia kha a nunnak ah a lang. Tangka sal sinak in misiang mi nun ah a chuah. A thilri hnarcheu kha misifak pawl a pek hna. Mi a hlenmi vialte hna zong kha a let li in a cham ṭhan hna .

Sual ngeihchihnak nih hin mi pakhat thlennak hrampi a rak chuah ter.

A donghnak ah cun Jesus Khirh hi ho dah a si ti a theih I a nunnak vialte kha Jesus duh ning in thlen I nun aa zuam. Mah duhnak lawng a rak I ruat tawn mi thinlung in khan Pathian thangṭhatnak nun in a thleng.

Zakia nih hin a thinlung a thlen I Khirh nun in a nunnak hi miza pi sinah a langh ter.

Khrih he an I ton hnu ah Zakia nih a nun a thlen I midang caah ṭuanpiaktu a si nak kha a langh ter.

Khrih ah hawi dawt u le nau hna, a cung lei I kan langhter mi Zakia nunnak bangin kan si cio maw? Tangka/ phaisa sal kan si sual maw? Sual sal tang kan si sual maw? Mi huat kan tong maw? Asinain, sual ngeihchihnak thinlung kan ngeih I Jesus Khrih kan kawl ve a si ah cun Pathian nih dong lo tein a kan sawm zungzal. Kan sualnak ngeih thiam dingin a kan sawm zung zal ko. Pathian nih kan pawngkam ah zei thil dah a tuah ti mi hi ṭha tein kan ruah I kan mit fak pi in I au hna u sih. Khrih nih misual ka caah vailam cung i a thihnak nih kan nih cu miluat ah a kan ser cang caah le kan nih cu thisen in cawkmi kan sinak hi philh hlah u sih. Zakia nih Khrih he an I ton hnu ah a nun a thlen I nun thar in a nun bantukin kan nih zong nih thisen in tlenhmi kan sinak hi a thar in ruat ṭhan hna u sih law Khrih nih a kan duh piak mi nunnak in kan nunnak hi hman I zuam cio hna u sih. Cucaah cun kan sualnak hi I thei hna sih law sual ngeihchihnak ngei hna u sih. Zei catiah sual I ngeihchihnak nih Khrih he a kan tonter lai I cu nih cun Muihnak in Ceunak ah a kan hruai lai. Khrihfa mi nih kan I ruahchan mi Vancung ram nuam phanh khawhnak ding ah cun Khrih nih kan ca I a thihnak le Vel in a kan tlenhnak le thisen in cawkmi kan si nak hi thei in kan nun hlun kal tak hna u sih law Khrih nih a kan duh piakmi Nunthar lam zul cio dingin kan sawm hna.

Bawipa nih Sunparnak co hram ko seh!