(August 21, 2011; Bible Sunday) PCCF Weekly Online Sermon

PATHIAN BIA KAN TEINAK

(The Words of God is Our Victory)

By

Rev. Than Thio

“Mithalo hna khuakhannak ah aa tel lo i Misual hna lam zong a zul lo i Pathian a nih sawh mi hna sin ah a thu lo mi cu Thluachuakmi an si. An i lawmhnak cu Bawipa nawlbia tu ah khan a si i cu nawlbia cu chunzan in an ruat. Tivakamah a khomi thingkung, a can hman tein a thei a tlai i a hnah a uai bal lomi bantuk an si. An tuahmi thil kip ah khua awng an tong” (Salm 1:1-3).

Minung hi teitu si a duh mi lawng te kan si. Teinak hmuh a duh lomi a hohmanh kan um lo. Vawlei chawva kan kawlnak ah siseh, fimthiamnak kan kawlnak ah siseh teinak hmuh a duhmi lawngte kan si. Cu teinak kan duhtukmi kan hmuh khawhnak cu Pathian Bia ah a um. Pathian bia nih a kan cawnpiak ning tein kan nun ahcun teitu kan si ve ko lai.

Kan laimi tampi ram kipah kan phan hna, a cheu cu Pathian bia thukdeuh kan hngalkhawh nakhnga tiin Baibal kan cawng hna, a cheu vawlei lei fimnak kan cawng, a cheu vawlei chawva kan kawl hna. Hi thil vialte kan tuahnak ah teitu le hlawh a tlingmi (khua awng a tongmi) kan si nakhnga Pathian bia nih a kan cawnpiak ning in nun ding le, Pathian bia chunzan in ruahpeng ding ah Salms ca ttialtu nih a kan fial. Zeicaah kan ti a si ahcun Pathian bia ruahpeng le hngalhpeng le theihpeng cu hlawhtlinnak a si zia kha fiang tein a kan hmuhsak. Minung nih kan taksa nunnak le tthawnnak caah nifatin te rawl kan ei bantukin kan thlarau thazang tthawnnak ding caah Thlarau rawl a si i Pathian Bia tampi in kan ei a herh ve. Cu lawngah kan tthawng lai i teitu kan si ve lai. Pathian Bia kan rel lo le kan ruahlo ahcun teitu dirhmun kan phan kho lai lo. Pathian Bia a ruat pengmi hna le Pathian bia ning in a nungmi hna cu khua awng a pemhmi le teitu dirhmun a phanmi an si.

Israel miphun Canaan ram ah a hruaitu hna Joshua zong kha Bawipa nih bia a cahmi cu “khua zei na kal hmanhah khua awng na pemh nakhnga, orh lei ah siseh keh lei ah siseh i mer hlah, Pathian bia nih na ka kha chuak tak hlah seh” (Joshua 1:7,8). Joshua nih Isarael mipi kha pathian bia ning tein le phungbia cawnpiak ning tein a hruai hna i Pathian nih phak ding in a tinh piakmi hna cawhnuk le khuaihliti a luannak Cannan ram a phanh pi hna. Kan miphun hawi dawt vialte hna Pathian lam hruainak le umpi nak thawng in hmunkip ramkip ah kan phan cio hna. Kan umnak hmun le ram cioah khrihfabu le fellowship hawikomhnak kan ngei cio hna. Kan miphun hruaitu vialte hna le unau vialte hna pathian nih si hnaseh ti a kan duhning tein le a mah bia ruatbu tein kan ram le kan miphunpi hi kan hruai ahcun Pathian nih a kan tinhpiakmi hmun kan phan ve ko lai. Kan i tinhmi kan phak hlan ah lam laklawh ah kan vaivuanhnak hngalo, keh lei orh lei pial lo tein Pathian bia i tlaih bu tein hmai ah nor chin ko hna u sih. Kan tuahmi kip ah khua-awng kan pemh hlan tiang lungdonglo tein le Pathian bia nih an kan cawnpiak ning tein kan miphun hi hruai i tim hna u sih. Minung bia in kan ram kan miphun kan hruai i kan kalpi ahcun lam kan tlau lai, Minung bia cu teinak pe khotu a si lo. Pathian Bia lawng kan teinak a si. “Pathian bia cu a nung i a tthawng, kaphnih har vainam nakin a hardeuh” (Heb.4:12). “Na bia cu ka ke caah mei-inn a si, ka lam ah ceunak a si,” (Salm 119:105). Pathian bia ning tein kan ram le kan miphun hi kan hruai ahcun teinak a hmumi miphun kan si ve ko lai.

Jesuh khrih zong hi Pathian fa a si ko nain minung ah aicang i kan lakah khua a sa. Minung pumsa in vawlei a tlonlen lioah Sehtan nih a rak tukforh ve. Sahtan nih a rak tukforh lioah hriamnam ah a lakmi cu Pathian Bia hi a si. A voikhatnak tukforhnak ah Sehtan nih a timi cu “Nagmah cu Pathian Fapa na si ahcun hi lung hi changreu ah canter hngat” tiah a ti. Jesuh nih a lehmi cu, “Cathiang nih pei Minung nunnak cu rawl lawng in a si lo, a ti cu,” tiah a ti . A voihnihnak Sehtan nih a thawh i, “Hi lianhngannak vialte le chawva vialte hi kan pek lai, cucaah ka hmaiah na khuk i bil law hi vialte hi na ta an si dih ko lai,” tiah a ti. Cathiang nih pei “Bawipa na Pathian cu na biak lai i a mah rian lawng na ttuan lai, a ti cu” tiah a leh. A voi thumnak ah a thawh rih i Biakinn parpahhlek ah a thutter. Cun a thawh i, Nangmah cu Pathian Fapa na si ahcun hika hin vung zuang tuahhngat. Zeicatiah cathiang nih pei, Pathian nih nangmah kha ttha tein zoh khenh awkah a vancung mi kha a fial hna, lungah na ke na khawng lai lo tiah a ti fawn tiah a ti. Jesuh nih a tawh i cathiang nih pei, “Bawipa na Pathian cu va hneksak hlah, a ti ve kha,” tiah a leh (Luke 4:1-11).

Jesuh tukforh innak kan zoh tikah Sehtan a sung i, Jesuh a awng. Phundang in kan chim ahcun Jesuh nih sehtan a tei. Sehtan tukforhnak a tei khawhnak cu meithal zong ai lak lo, nam zong ai lak lo. Pathian bia bak te kha a hriamnam ah a hman i sehtan cu fawi tein a tei ko. A tei khawhnak cu Pathian bia in a si. Cucaah Pathian bia cu teitu a si zia Jesuh tukforh innak in kan hmuh khawh. Dawt mi u le nau hna kan nih cio zong kan umnak le kan riantuannak cio ah nifatin te sehtan tukforhnak kan tong cio ko hna lai ti ka zumh. Sehtan tukforhnak kan tei khawh nak kan hriam nam tthabik cu Pathian Bia (The Words of God) hi a si. Cucaah salms ca ttialtu nih a kan fial bantukin Pathian Bia hi chunzan in a ruat pengmi le Pathian bia nih a kan cawn piak ning tein kan umnak hmun le ram cio ah kan thut dir ahcun, kan tuahmi kipah khua-awng kan tong lai i, hlawh a tlingmi le teinak a hmumi kan si ko hna lai. “Pathian Bia cu Kan Teinak” a si tihi philh hna hlah u sih. Amen!

kai lawm.

(August 14, 2011) PCCF Weekly Online Sermon

Thiangthlarau volhpamh sual

By

Pastor Khar Ling

Bible cang. Mi fapa ralchan in bia thalo a chimmi cu ngaihthiam khawh an si ko lai, Sihmanhsehlaw Thiangthlarau ralchanh in bia a chimmi cu tuchan ah si seh, hmailei chanah si seh, ngaihthiam khawh an si lai lo. (Mt. 12 : 32, Lk. 12 : 10).

Bawi Jesuh nih ngaihthiam khawh lomi sualnak a si tiah a chimmi hi Biakam thar chungah hika hmun lawngah kan hmuh khawh. Hi Bible cang hi micheukhat nih kan hrilhfiah ning le kan hmuh ning hi phun dang ngai a si tiah ka ruah caah kan caah tlawmpal tal bawmtu a si hnga maw tiah a tang lei ahhin fianternak ka vun i zuam tuah hnik hmanh lai.

Hi Biblecang hi Matthai, Mark le Luke nih an ttial cio i, Matthai le Luke nihcun Mit a cawmi le a holh kho lomi pa Jesuh nih a damter ruangah khuachia bawipa Beelzebul a hrolh caah a si tiin an puhnak in a thawk. Mark nihcun Jesuh le a zultu hna kha mi nih an zual tuknak, cun mi nih Jesuh kha a hrut cang an ti i a chungle nih va hnuh an timhnak in a thawk. A chungkhar lila zong nih va hnuh timh hi Jesuh kha a molh cang tiah an ruah caah va tuahmi khi si dawh a si.

Hihi Jesuh Khrih a nun lio ahcun Jesuh mesiah a sinak hi aa thup (messianic secret) i hngalh khawh a si lo tiah Mark nih a ruahmi chung in a chuakmi theology a si. Vawlei a nun lio ahhin Judahmi, Sadusi le Farasi mi chim lo a chungkhar lila zong nih an thlarau mit a caw rih caah mesiah a sinak an fiang kho lo i, thihnak a tei i a thawhtthan hnu lawngah an fiang kho ti hi mark theology a si caah a chungkhar lila hmanh nih Jesuh a hrut tiah an ruah i hnuh an va timh tiah a ttialnak hi a si.

Mi fapa ralchan in bia thalo a chimmi cu ngaithiam khawh an si ko lai, Sihmanhsehlaw Thiangthlarau ralchanh in bia a chimmi cu tuchanah si seh, hmailei chanah si seh, ngaihthiam khawh an si lai lo. Zeicatiah zungzal nunnak sualnak kha an tuah cang. Hihi thumkomh Pathian (Trinity) lei in kan hrilhfiah tawn i fapa ralchanh in a timi hi Jesuh a nun lio ah a riantuannak zumh lo le sersat cu ngaihthiam khawh a si ko. A ruangcu a mah a thattu Rom ralkap hna hmanh kha a ngaihthiam khawh ko hna tiah cherhchan kan lak thio. Nain a tu Thlarau chan i thlarau nih minu mipa pakhatkhat sin in a phuanmi, asi lo ah khuaruah har langhnak tbk zumh lo hi Thiangthlarau volhpamh a si tiah mitampi nih hrilhfiah tawn a si. Hi hi Jesuh nih a chimh duhmi a si lem lo kho. Zeicatiah Jesuh rianttuannak le Thlarau rian ttuannak hi Khristian kan in tlaihmi Bible thiang chungah a tthen in a langh ternak a um lo.

Cun a biafang umtu ningah hin Mifapa ti hi Hebru holh le Jesuh a hmanmi Aramaic holh ahcun minung ti in hman a si ve. Cucaah Armaic holh a thiammi nihcun hi ka zawnah Mifapa tiah a ti mi hi minung sawhsawh can/ai ah a hmanmi a si lai tiah an zumh. Cucaah minung cu a palh i a sual khomi a si caah minung tuahmi zumh lo le ral chanh cu ngaihthiam khawh a si ko. Asinain Pathian Thiang Thlarau rian ttuannak le khamhnak a phuannak Jesuh zumh duh lo le a cung i sersat le volhpamhnak bia chim cu a tu chan in hmailei chan tiangah ngaihthiam khawh a si lai lo, zeicatiah a zumh duh lo cu ta tinak a si lai tiah an zumh.

Cucaah Thlarau volh pamh ti cu minung hawi nih chimhmi thlarau nih a ka fial/ chimh ti le langhnak ka hmuh tiah an timi va zumh lo khi a si lo. Jesuh mesiah a sinak le vawlei i a rianttuannak sersat, zei te i rel lo le Khamhtu a sinak zumh duh lo tu hi a si lehlam. Volhpamh (blasphemy) tihi bia chiakha taktak a si i Rabbi pawl nih Pathian zei i an rel lonak le a rianttuan lianngannak pawl al tikah hmanmi sualnak biafang a si. Hngalh lo si loin hngalh ko bu i tuahmi (deliberate Refusal) ah hmanmi a si.

Buttrick nih cun sualnak nih a penmi le setan duhnak a tuahtu le setan fa ah aa cangmi misual kha khamh in tlanh, cun a ngeitu taktak Pathian sinah kalpi le khamh dingah a rami Jesuh zumh duh lo cu mah ziaza lila i mah i thah (moral suicide) a si, a ti. Cu bantuk Khamhtu le bawmtu panh duh lo cu a dam kho ti lomi le ngaihthiam khawh lomi sualnak a si i Thlarau volhpamh sual cu a si.

Dawtmi unau hna nihin Khristian tampi kan dirhmun kan zoh tikah Jesuh nih vawilei i a rak dirhmi Pathian Pennak le Uknak nakin thlarau nih a ka chimh, a ka fial, cu ti cun langhnak ka hmuh tiah a au sawh menmi hna papek deuhmi kan tlawm ti lo. Jesuh cawnpiaknak dinnak le dawtnak tu kha hnu kan chit cang ai.

Hi Biblecang hi mi tampi kan hrilhfiah tawnmi Pathian thlarau nih a ka chimmi a si i nan zumh lo ahcun tiah minung hmurkaa men in a chuakmi zumh lo kha thlarau volhpamh a si tiah hrilhfiah ti lo in Pathian zong a si i Thlarau zong a si mi Jesuh Khrih nih a rak tuahmi zumh lo tu hi ngaihthiam khawh lomi thlarau volhpamh cu a si tiah ti cang hna u sih.

Jesuh Khrih a rian ttuannak hi setan pennak hrawk kha a si. Cun sual pennak chung in dinnak taktak a simi kan Pa Pathian sinah a kan kalpi tu mesiah rian ttuannak a si. Cucaah cu mesiah cu zumh lonak ngeih lo tein panh ding le, dinnak pennak chungah a lutmi fale si ding kha Jesuh duhmi cu a si. Nan dihlak cungah Pathian thluachuah um ko seh. A men.

Miphun Dirkamhtu PCCF

Sangchin Capar tlan ve lang ti in

Lairam zilthli nem le khuachuah hauhnar hna

Khrihfabu hna le ttuanrelpi hawi zong

Chumtual rawn le chungkhar sian lo tiang

Kal tak rih lang rili ral panh in

Siangchin kai ve tluang chin khua thuat ah

Dang hram har in ngaih kan tuar zawn caan

Thlung le liang bang a thla hun samh maw

Miphun dirkamhtu PCCF

Kan ram kan miphun ca ah ti in

Na ban tha pum rengh in cawl ve lang

Ttuan rel cu cang ti ai kun hna maw

Hmai suang cem ah fong in dir cuh law

Na kepi nih vawlei chun in dir fek tuah

Ho kian ve hlah kan ram tthanchonak rian ah

Ser chin rih law lairam khuazung dawh

Rua bang kui in chimthli bang hrang law

Miphun dirkamhtu PCCF

PCCF na biartung reng chin rih ko law

Na cawn vairang capar thai hna nih

Cawr bang chuang in ni bang tlan lai cu

Ho val le maw leng nih iang ve hlah

Miphun ram rian le maw Khrihfabu ca

Na cawn vairang capum cu thlir in

Ttuan cu ai cang ti in Lairam panh lai cu

Sungkhun ti hna LAI hngak rual hna nih

Miphun dirkamhtu PCCF

Nan Hawi,

Za That

(August 07, 2011) PCCF Weekly Online Sermon

Zumhawktlak Sal Tha

By

Pastor Siang Zi

Bile Caangthim: A bawipa nih cun, ‘Sal ṭha, zumhawktlak sal, na tuahmi cu a ṭha ngaingai. Tangka tlawmte na lehthalnak ah zumhawktlak na si, cucaah tangka tampi tawngthamtu ah kan chiah lai. Ra lut law ka lunglawmhnak hi i hrawm ve,’ tiah a ti.( Matthai 25:21)

Minung kan nunnak ah kan dawttuk mihna nih kan mah tluk in a kan dawt lo tik le, kan zumhtuk mi hna nih an kan lei rawi tikah a hlei in kanlung a fak khun.Cucu minung kan sining a siko ticun kan palh lailo dah.

Zumhawk tlak saltha kong he pehtlai in thawngtha chim hi kan theih zungzal mi a si ko. Thawngtha chimtu hna nih a phunphun in sullam an hrilhfiah cio. A tawinak bik in a tuanbia kan zoh than ahcun, Vancung pennak cu khual tlawn I aathawh mi mipa bantuk a si. A sale kha an mah le thil tikhawh ning cioin ngun taangka a pek hna. Pakhat cu thongnga a pek, a dang pakhat cu thonghnih a pek I,pakhat cu thongkhat a pek.Cun khual tlawn ahcun aathawh. Khual tlawngpa sining le lungput khuaruahhar a si nak cun zeitin dah a sal le hi hivial te phaisa hi a pek tak ngam hna hnga ti hi a si. Phaisa thongnga hi a tu kan chan sining in cun a tlawm te a si ko nain a liam cia kum thonghnih lio sining in van zoh ahcun a tam taktak.Jesuh nih mi thongnga rawl danghnak ah khan zeizat dah a dih lai tiah Filip a hal tik ah Filip nih cun:“ Tlawm te cio eidin hmanh ah changreu tangka Zahnih leng man a herh lai”tiah a leh( Johan 6:7). Tangka Zahnih nih minung thongnga rawl a dangh khawh, Jesuh Khrih chan lio ah phaisa man a rak ngeih ning thongnga hna a rak tam ning cu hi thil sining nih fiangngai in a langh ter.Nihin kan chan ahhin the hi vial te phaisa a sal le sin ah a pengam tu an umhnga maw ti hi ruahlo awk a tha lo. A bik in kannih laimi sinah phaisa thongkhat hnih hmanh kan I cawi kho ti hna lo, pakhat le pakhat kan I zumti hna lo va si kaw, hitluk a tam mi phaisa I cawih le I hlanh cu a umkhohnga maw?.

Hi tluk a tam mi phaisa a pe ngam tu hna an Bawipa cu kan Pathian sining he tahchun zungzal a si cu kan hngalh dihko. Zeiruangah dah a pek ngam hna? A fiangko mi cu a salle hi a zumhhna caah a si ko. Kan Pathian nih hin a sale a si mi nang le kei zong hi a kan zumh ve ko. Phaisa tampi tawngtham ding ah tuanvo pek a kanduh ve ko, rian lianngan khinh ding ah akan zumh ko. Zeicatiah amah kut chuak, a mui cuang in ser mi , ahnak kar ah a kan tenh mi, a kan dawtmi kan si.

1.A mah kutchuak a mui cuang in ser kan si

Pathian nih minung cu a mah mui lo in a ser( Gen.1:27),pin ah thluachuahnak a pek. Cu a ser mi a mah kut chuakbak a si mi minung cu a ser mi thil vial te zohkhenh ding ah tuanvo a pek( Gen.1:26, 2:15).Cun a sermi saram vial te min sak a fial, mipa nih min a rak sak mihna kha an min ah a cang thai(Gen.2:19).A ser mi minung zeitluk indah a bochan a zumh ti fiangte in kan hmuh. Kan Pathian nih a mahmui lo in a kan sermi kan si caah zeibantuk rian, tuanvo ngan a si zongah fialding le tuan ter ding ah a kan zumhngam ko. A rianthiang tuan dingah a kanzumh ko, Ram hruaitu ding ah, Khrihfa bu nganpipi thihruai tuding ah, Miphun luatnak humhaknak riantuan tu ding ah, Khua le ram Sang le zawl, chungkhar thihruai tu ding ah a kan zumh ko. Tuanvo a kan pek ngamko.

2. A hnakkar ah a kan tenh mi kan si

Salm catial tu panih a nunnak ah a tonmi thil sining a ruah lengmang tik ah Pathian sinah a chimmi bia a si. Minung hi zeidah a si i na hnakkar ah na tenh? Minung menmen a simi hi zeidah a si i a zawn na ruah? ti hi ka ruat. Nangmah lawnglawng hi a cungaha ummi na si i sunparnak le upatnak cu a lu ah na chinh. Na sermi thil vialte a uktu ah na ser i zeizong vialte hna dihlak cungah khan na chiah( Ps. 8:4-6). Hnakkar tenh nak thinlung cu Moses nih Isreal mipi hna a hruainak ah kan hmuh ve. Isreal mi hna nih Moses tlang cung a kaikar ah Sui Cawfa an ser I an biak caah Pathian cu a thin a hungtuk hringhran.Moses nih a mipi hna ai awh in Pathian cu a nawl. Isreal mihna nih sualnak an tuah ko cang. Ancaah sui cawfa an ser a sinain an sualnak cu ngaithiam sawh ko hna. Cun na ngaihthiam khawh hna lo ahcun, nangmah nih na tial mi cauk khan keimah min tu kha hlo ko, a ti.(Exodus 32:32). Moses tuanbia nih hnakkar tenhnak ti mi cu fiangngai in a kan chimh ko. Minung a si mi Moses hmanh nih hi tlukin a mihna a hnakkar a tenh hna ahcun, a kan ser tu kan Pa chinchin nih zeitluk in dah a kan siaherh I a hnakkar a kan tenh ti cu ruahdawmh khawh a si.

3. A kan dawt mi kan si

Minung cu Pathian nih a kandawt tuk hringhran caah zeidang thil cu chimlo fapa ngeih chun tiang a kan pek siang ko.”Pathiannih vawlei hi a dawt tuk hringhran caah fapa ngeih chun te kha a pek”. ( (Johan 3: 6) Cun tluk in a dawt mi cu zumh lo cun a um kho hnga maw? um kho hlah. Cucaah Kan Bawipa Jesuh nih zultuhna cu a mah can ah rian tuan ding ah a thlah hna “ Khuaza kip ah va kal u law miphun vial te kha ka zul tu ah va ser hna u( Matthai 28:19). Cun “ka tehte nan si lai”( Lam.1:8). Nihin kan nih vial te zong hi a kan zumh I a mah can ah vawlei ah a kan thlah mi kan si.

Kanmah minung sining in heituak tikah,amah mui cuang in a kan ser I a hnakkar ah a kan tenhpeng tu, a kan dawtu kan Pathian caah zumhawk tlak in kan nun ve lo tikah zeitluk indah kan Pathian a lung a fah lai. Kan caah Zumhawk a tlak zungzal I a biakam a let bal lo tu kan Pathian caah kanmah le kan thil ti khawh ning cio, kan sikhawh tawk cio in a rianthiang zumh awk tlak in kan tuan cio ahcun, Sal ṭha, zumhawktlak sal, na tuahmi cu a ṭha ngaingai. Tangka tlawmte na lehthalnak ah zumhawktlak na si, cucaah tangka tampi tawngthamtu ah kan chiah lai. Ra lut law ka lunglawmhnak hi i hrawm ve,’ tiah a ti mi kan si ve lai.