January 12, 2014 PCCF Weekly Sermon by Saya Khen Lian Thang

Jesuh Zoh in Kal Ko Usih

By

Saya Khen Lian Thang

Bible Cangthim: Mattai 14:22-32

Jesuh nih cun vun, “ra ngat,” tiah a ti. Cucaah Piter cu lawng cun a vung tum I ti cungah cun a ke in Jesuh lei ah cun a kal. Sihmanhsehlaw thilitu a fah zia kha a vun hmuh tikah a thin a phang I ti chungah cun a pil cuahmah i, “Bawipa, ka khamh tuah tiah au, (Matthai 29-30)

Hi tuanbia kong cu kan theih cio bantuk in Jesuh nih a zultu hna kha rili khattelei kam ah khan a hmai ah a kal ter chung hna I Jesuh a ke in ti cung I a kal nak kong kha a si. Peter nih Jesuh zoh in a kal lio ah khan ti cungah a kal kho. Nain, tanglei rili a zoh tik ah ti chung ah a pil. Ahopoah nih hin harsatnak, tih phannak , lungretheihnak,etc.., kan tong cio hna.

Pathian nih cu kan ton lio ah cun a mah lei zoh lawng kha a kan duh piak. Noah nih lawng a ser ah khan a cunglei ah thlalangawng a chiah, minung zohnak in cun hruh khi a si. Ahohmanh nih inn an sak ah thlalangawng cu a kamlei ah chiah tawn phung a si. Minung ruahnak le Pathian ruahnak cu ai dang tuk. A cunglei a tuahnak asullam cu Pathian zohnak ding caah a si. A ki lei le a sir lei zoh kha Pathian nih a duh lo. Hi nih a langhtermi cu harnak, lungretheihnak a phunphun kan ton tikah kan minung hawi sinah bawmh hal loin amah sinah hal kha a kan duh piak.

Kan piahtana kan zoh chung poah cu mah chungah cun kan pil peng ko lai. Peter ti chungah a pil bantuk in. Kan nih zumtu cu cunglei zoh in a nungmi kan si, zumhnak in hmailei ah kar a hlang cuahmahmi kan si. Cucu a si kho hnga maw? kan ti men lai. Tahchunhnak pakhat chim ka duh: Khrihfa nun cu zei he dah ai lawh tiah cun, Bicycle a ke pahnih a ngeimi kan i cit ah khin kan kal chung poah cun kan tlu lo. Kan dir poah ahcun kan tlu tawn. Cu ve bantukin zumhnak in amah Pathian zoh buin kan kal ahcun zeitik hmanh ah sualnak chungah kan pil kho lai lo. Pathian zoh loin kan piahtana kan zoh chung paoh cu, cu piahtana ahcun kan pil peng ko lai.

Kan biakmi Pathian cu kan piahtana nak in a ngan deuh ti kha thei peng hna uhsih! “Jesuh kha fekte in I zohchih uh sih. Amah cungah cun kan zumhnak cu a hramthawk in a dongh thiang a um…….” Hebrew 12:2

Pathian nih sermon reltu dihlak thluachuah in pe hna seh!

2014 PCCF President Welcome Speech

 Dawtmi PCCF Chungtel Hna,

Bawi Khrih min in nan kut kan tlaih hna. KumtharThluachuahnak Nan Cungah Um Ko Seh!
Nihin ah PCCF riantuantu a hlun le a thar rian pekchanhnak tlamtling tein kan tuah kho. President dirhmun in nan sinah kuttlaihnak ka rak tial.

Laimi cu phaisa ah kan harsa in thinlung ah a rum mi kan si. Cucaah PCCF a nun khawhnak a si. Unau thinlung nih a kan fun. Kan umnak poah ah kan ihlam. Phaisa nih a cawk khawh lomi bawmhchanhduhnak thinlung kan ngeihmi cu zahpi ding a si lo.
2013 chungah PCCF caah ngeihchiah chawva pin ah caan le nunnak he rian a tuanmi, President thok in riantuantu nan dihlak cungah kan ilawm. Rian tampi nan kan tuanpi. Ro tha nan taanter mi cungah PCCF chungtel hna nih upatnak kan in pek hna. Riantuantu tharzong nan kan dirkamh lai ti zumhnak nganpi kanngei.

Chungtel zapi hna, riantuantu thar nih tukum chung rian kanlak ngam nak hi nan mah dirkamhnak bochannak he a si. Kan santlaihnak cio kan fonh hna lai. Kan ruahnak, kan zumhnak kan samh hna lai. “Unau thinlung” he kan ichawn bia hna lai. Kan theihhngalhnak kan ihrawmh hna lai. Naihniam unau taktak kan si kha langhter chin lengmang hna usih ti kan sawm duh hna.

Manila um, unau hna, nan ca cawnnak tluang koseh. Baguio ah khua sami kan nau le hna, nan itinhmi cungah Pathian nih hlawhtlinnak in pe hna seh. Luzon lei ummi, hawi le hna, nan khuakhannak Pathian nih tlinter seh. Cavite ummi, unau vialte hna, nan lungthlitum Pathiannih in pe hna seh! “Nangmah nai tel hi PCCF hlawhtlinnak a si.”

Tukum 2014 riantuantu thar thimmi hna cu:

President: Pastor Duh Sang
Vice President: Rev. Ram Hu
Secretary: Saya Lewis Thla Peng Cung
Assistant Sect. Saya Khen Lian Thang
Treasurer: Pastor Dawt Mang
Assistant Treasurer: Sym Run Tha Hlei Par

Auditors:

Rev. Paul Thaung Tin (Chief Auditor)
Rev. Pastor Walter Paneh (Ass. Auditor)

Advisors:

1. Rev. Dr. Dennis Shu Maung
2. Ptr. Berona
3. Dr. Van Ivan
4. Rev. Salai David
5. Ptr. Hrang Kulh Lian
6. Sym Siang Zi

Pastor Duh Sang 

PCCF President

2014

Nawlngaihnak by Dr. Amos Sang Hlei

"......Nawlngaihnak hi raithawinak nakin a tha deuh...1Sam.15:22" Pathian nih damnak a kan pek I kum 2014 dam le lawm tein kan phanh khawh caah Bawipa kan thangthat I nan dihlak cungah kum thar lawmhnak le daihnak tlung ko seh. Tuchun ah tlawmpal tein i ruahti hna usih ti ka duh mi cu "Nawlngaihnak" ti si. A tawifiannak zoh usih. Israel miphun chungah a hmasa bik Siangpahrang cu Saul asi i kum 40 chung amah nih a pen hna. Cu hlan cu biaceihtu nih an rak hruai hna i Samuel hi a hnu bik Biaceihtu zong asi i Prophet zong asi chih. Pathin nih Saul cu Israel siangpahrang ah a thim ko nain, Saul nih Bawipa nawl a ngaih lo caah hlawt le siangpahrang sinak tiang in thumh a rak si. A tu kan relmi Dal 15 nak hi Saul nih a voi 3 nak Pathian nawl a ngaih lo nak asi. Pathian nih Amalek mi kha va tu hna law va that dih hna, mizeihmanh na luat ter hna lai loh tiah Saul cu a chimh. Sihmanhsehlaw, Saul nih a va tuk taktak i a tei tik hna ah Pathian nih a chimh bangin a tuah lo,an siangpahrang pa Agag zong thah loin a um, an sathil thauthau kha a lak hna i raithawinak ah a ti. Duak tiah van ruah ahcun raithawinak ca asi ahcun a tha ko lo hme maw ti awk khin a um. Sihmanhsehlaw, Bawipa nih a duh lo ngaingai mi thil a rak si. Hika zawnah van langhter ka duhmi cu kan nih Khrihfa mi zong Pathian kan biaknak ahhin kanmah duhning in Pathian kan biak tawn. Phundang in van chim ahcun kanmah duhnak chungah khan Pathian kha luhter i kan duhmi kha duh ve seh ti kan duh tawn. kanmah duhnak tuah luhpi kan timh tawn. A taktak le a ngaingai ahcun Pathian duhnak chung tuah khan luh i a duhnak tuah le zulh tu kha a kan duhpiak mi cu asi deuh. Cun, Pathian nih hin a cheuchum lawng nawlngaihnak hi a duh loh ti hi a lang. Pathian hmaika ahcun a cheubang lawng nawlngaih cu nawlngaihlo he ai khat bak mi asi. A tlingmi nawl ngaihnak hi a duh mi cu asi. Saul nih Bawipa nawl cu a cheubang lawng a ngaih caah Pathian nih nawlngaih lo ah a chiah piak. Cu caah a siangpahrang asinak tiang kha chuh asi. Minung kan nunnak ah hin nawlngaihnak timi hi a biapi taktak mi asi. Kan innchungkhar ah siseh, kan Khrihfabu chung ah siseh, kan community chungah siseh, kan society chungah siseh le a bu in rian kan tuannak kip ah 'nawlngaihnak' ti mi a um lo chung paoh cu zeitikhmanhah "daihnak" "Remnak" a um kho lai lo. Daihnak le remnak a um lonak hmun cu hell ram bantuk khi asi ko hnga. Saul zong Pathin bia a ngaihlo ruangah a chungah daihnak, hnangamnak a um kho ti lo.Nawlngaihlonak nih a chuahpimi cu lungretheihnak le buainak lawngte an si. kan lakah daihnak le remnak um seh ti kan duh ahcun Pathian nawl kan ngaih hmasa lai, cun hruaitu kan thimmi hna nawl kan ngaih a hau. Cucu Pathian duhmi cu asi ko hnga lo maw.. Cun, a donghnak bik ah PCCF kan i thithruainak zong ah hin nawlngaihnak hi a biapi tuk hringhran ve. Pathian nih tu kum 2014 PCCF hruaitu ding ah chiti a thuhmi hna kan upa le hna nawlngaih ding hi a biapi tuk fawn, cu ti an nawl kan ngaih hna ahcun Bawipa nih a duhmi zong asi fawn lai tiah ka zumh. Tukum cu PCCF caah "Nawlngaih Kum" siseh ti hi kei ka saduhthah cu asi. A bu in riantuannak ah a herh bikmi cu "nawlngaihnak" hi asi bantukin "Daihnak le Remnak "innpi chung luh khawhnak ding caah "Nawlngaihnak" hi kan tawhfung si hram ko seh..... Amos Sang Hlei Cavite

Mupi Bantukin by Salai Khua Za Rung

1. MUPI BANTUK IN… Deuteronomi 32: 11-12 Mupi nih a bu kha a hninh i a fano kha a vun zuanhnawh hna I a thla a vun I samh I, a thal cung ah a futter i a zuanpi hna bantuk in, Bawipa nih khan a hruai hna; Bawipa lawnglawng an hruaitu a si i ram dang pathian zeihmanh an i tel lo. Hi kaa chung i ka lak duh i ka chim duh mi cu zeidah si tiah cun mupi kong cu keimah nak in nan theih deuh mi a si ko i a thar in chimthan ka duh mi cu zei dah si ti ah cun mupi cu fa an ngeih hna tikah thingkung a sang mi khi an i thim I bu an I ser ti si. An fano hna cu an vun thang deuh tikah a bu kha pakhat tete in a zut ti si, tlawmpal zuan an vun thiam ah khin cun a sangnak ah khin a kai pi i a tang lei cu a hung thlak ti si. An fano te cu a tang lei ah a hung thlak ti si zei caah a zuang kho deuh rih lo caah a si, a hung tlak cuahmah lioah khan a nu nih a kal tak maw ti si ahcun a kal tak lo a thli te in a zoh ko i vawlei ah a hung phanh deuh hlan ah cun a nu nih a hung kham than i a sang deuh nak ah a kai pi than a hung thlak than ti si. Chimh ka duh mi cu zei dah si ti ah cun kan nih zong fim nak ka cawn cuahmah lio caan ah hin har nak nih a kan kulh lai i kan tha a der caan hna a um lai nain Pathian bohchan in thlacam uh si kan Pathian nih cun zeitikhmanah a kan kal tak lai lo kha theih hna uh si, mupi nih a fano te a thli te in a zoh i vawlei ah a phak hlan ah a nu a hung donh than bantuk in ka Bawipa pathian nih cun a kan zoh ko lai i zeih tik hman a tangah a kan phanh ter lai lo ti ruahchanh nak he Bawipa bochan bu in nung u sih tiah sawmh kan duh hna. Isaiah 40:29 chung ah kan hmuh mi cu a dermi le a bami kha thazang a pek hna ti si i thazang kan ngah nak ding ah cun um sawsaw ah si lo i Pathian I kha bochan i a zungzal I pehtlai hna u si. 2. HRUAI TU THA Hruai tu tha kan chuah kho nak ding ah hin zei dah a her ti ah cun a pakhat nak ah fimthiamh nak a si i fimthiamh nak cu kan cawn lawng ah kan ngeih khawh lai, fim nak cawn lawng a za fawn lo zei catiah fim nak cu Bawipa sin ah um i kan Bawipa i bochan a hau. Kan nih cun fim nak a cawn mi lawng kan si degree hi a bia pi tuk in chiah lo in kan cawn mi course ceu tu ah hin thiam khawh i zuam i kan ram le miphun caah ti in temak ceu hna u si. Chimh ka duh mi cu degree lawng a sangsang lak i kan thiam lo i kan ram le miphun caah kan hmang khoh lo ah cun a poi tuk lai. Hraui tu tha kan chuah kho nak ah hin Pathian bochan bu in i zuam ceu hna u sih. Joseph kong kha kan zoh tikah Pathian bochan bu in a nung tikah a lam a tluang. Pahian kan bochan ah cun kan lam a tluang lai i teinak kan hmuh ko lai, teinak kan hmuh lawng ah hin HRUAI TU THA kan chuah khawh lai. Jonah nih teinak cu Bawipa ta a si a ti ban tuk in Bawipa kan in ngeih ah cun teinak zong a lolo ( အလုိလို ) in kan mah ta a si ve ko lai. Ka palh mi a um ah cun ka ngaithiam u law a ruat zia ka thiam piak u tiah ka bia ka dong ter. PCCF chungkhar cung ah lunglawmh tam ka ngei. Salai Khua Za Rung Electronics Engineering University of the Cordilleras, Baguio City