(March 27, 2011) Online Sermon

A Hodah Vancung Pennak Chung ah a Lut Lai?

Matt. 5:3 “Thlarau ah mi chambau kan si ti ai hnngal mi cu mi lunglawm nan va si dah! Vancung pennak cu nanmah ta a si”

By
Rev. Dr. Za That

Bawi Jesuh Khrih cawnpiak ning hi midang cawnpiak ning he a ning ai dang ngaingai. Voikhat cu Jesuh nih Kalili ram kulh khua pa 10 ah khan Vancung pennak kong thawngttha cu a cawn piak hna. A zaw a fak mi le fahnak aphunphun a ing mi kha a dam ter hna (Matt. 4:23-25). A cawn piak ning hna hi phungbia cawnpiaktu saya hna le Farasi mi hna cawnpiak ning he ai dang ngaingai. Annih nih cun nan izuam khawh le nan tuah khawh, nan pek khawh, nan ttan khawh ah cun Pathian lung nan ton lai i vancung pennak cu nan co ko lai ti kha a si. Jesuh tu nih cun hi ti hin a cawn piak hna. Ka ti kho lo, ka pe kho lo, ka santlai lo, ka ttang kho lo ti nan itheih bu te in Pathian kha nan biak ah cun; cu nih cun Pathian pennak lei ah an kal pi hna lai a ti hna. A thei mi dihlak hi an khuaruah a har ter dih hna. Jesuh cu tipil a in bak in Thiang Thlarau pek a si. Cu le cang ka in Thawngtthabia chim ah kal ai thok colh. A hmasa bik ah a chim mi cu; A can kha a nai cang caah nan sualnak kha kal tak hna u law thawngtha bia kha zum tuah uh (Mk. 1:15). PCCF u le nau hna “Thawngttha bia cu na zum ve cang maw tiah kan hal hna seh law, zeitindah kan leh ve hna hnga? Bible ca cawng cio mi le church zong ah rian a ttuan ve cang mi, Church school saya/ma zong a ttuan ve cang mi kan i ti hnga le kan thin a hung ngai lai ti ah ka zumh ko.

Vokhat ah pa pa 2 cu Guitar tum cawn ah an ithawh. Pakhat pa te nih cun saya pa kei cu zeihmanh ka thei bak lo, ka thiam bak lo le nangmah bochan bak a si ko, a herh na ti ning in ka cawn ko lai a ti le ks. 2500 na ka pek lai a ti an ti. A pa 2 nak pa tu cu lai lei i perhkalh hrawng hrang ttuktak a thaim ngai pah ve mi a si rua le ai seihchiah tuk ve. A nih nih a vun ti ve mi cu saya pa kei cu ka thiam ngai ko cang le tam cawn ka hau ti lai lo. Cu caahcun zahceo cu na ka tthumh a hau lai tiah a ti ti a si. Saya pa nih a van leh colh mi cu ka thiam cang tiah nai uanthlar mi ruang ah a hlei in 2500 na liam lai le a zate ks. 5000 na ka pek lai. Ks. 2500 hi na thiam cia mi hrawhnak ah a si lai a ti le a ar ko. Tangdor te in ka thiam lo ee, zeihmanh ka thei lo ee a ti mi pa te cu a si ning te in ks. 2500 a liam ko le a dih ko. A si nain kai za ve ko, ka thiam ve ko cang tampi cawn ka hau ti lai lo a ti mi pa tu cu ai uahnak le keimah ve ti lungput a ngeih nak nih a hlei liam a khinhnak cu a si. Thiam duh le hngalh duh ah midang kan va fuh hna hnu ah cun an dang ah idor kan herh, an nawl ngaih kan herh, an duhnak zulh le zuam kan herh. Cu lawng ah kan duhnak a tlam a tling kho lai. Rian kan ttuannak cio zong ah kan ttuan piak mipa/minu i a duhnak kha philh piak lo le theih piak peng kan herh. Cu nih cun kan i pehtlaihnak lam a tluan ter lai. Thil ttha a chuah pi fawn lai.

Kan Bible rel mi ah khan van lut tthan ta hmanh u sih. Jesuh cu Kalili peng khua pa 10 timi ah a cawnpiak hna hnu in amah he rian a ttuan tti bak mi a zultu hna kha a auh hna. Tlangcung ah a kai pi hna le thli thiang dawp pah in khuaking dai te ah khin anmah te lawng a cawnpiak tthan hna. Jesuh nih cun amah he kum 3 chung rian a ttuan ttimi hna an si tik ah a upat ve hna le a hmaizah ve hna. Cucaah cun an mah Judah phung ning te in a tthutnak ttha te in ai remh hnu ah tthut bu te in a cawn piak hna. Kawlram phung ah cun biatak deuh te in bia kan chim cang seh kan ti ah cun kan dir zau le dir bu te in kan chim. Dir kha kan nih phung a si bantuk in Judah phung ah cun tthut kha a si ve. Bia a van thoknak ah a chim mi cu “Thlarau ah mi chambau kan si ti ai hngal mi cu lunglawm mi nan va si dah, Vancung pennak cu nanmah ta a si” ti ah a van chimh hna. Ankhuaruah a har ngai ko. A ngaingai tiah cun Jesuh dah ti lo ah a zultu nak in Thawngttha bia theihnak lei ah si seh, chim le rel lei ah si seh, thlacam ti phul lei ah si seh a ti kho an um lo. Anmah kha a thiam bik an rak si ko. Zei caah tiah cun Jesuh sin ah kum 3 chung training a kai mi an rak si caah a si. A si nain Jesuh nih cun tlamtlin thlu ti a um kho lo. Chamhbaunak nan ngeih tu kha Pathian sin ah ithei peng deuh ulaw cu nih cun vancung pennak chung ah an luh ter hna hlei ah Thlarau tthawnnak pek nan si lai ti kha a cawnpiak duh mi hna cu a si.

Laimi hi mah kong ceihnak in mi kong ceih a huam deuh mi kan si tawn. Kan Pathian kan biaknak hrimhrim ah khin kan pastor pa cu phungchim zong a thiam lo ee, a nih te chung khi cu chim ding an um lo eh ti in mi chamhbaunak hmuh a thiam ngai mi kan si. Pulpit cung in mi dang chamhbaunak chim zau in mah mak (mark) lak ai tim mi le a hmang mi kan tam ngaingai fawn rih. Evangelist cheukhat cu pulpit cung in mah i thangthat zau in pastor te le upa hna tlamltinlonak kong chim an thiam ngaingai hna. Philippines ca cawng pawl zong hi mah thiamlonak kong nak in mi dang thiam lonak kong a chim thiam mi kan tam ngai ve hoi. Mi dang thiamlonak kong chim in mah thiamnak si seh law, cu ko cu kan lo. A ngaingai ti ah cun midang chamhbaunak theih kha Jesuh nih a kan cawnpiak bak lo mi a si. Kanmah kan chamhbaunak te tu kha itheih zau in Pathian na hmai ah mi tling lo mi ka si, misual mipalh ka si ko ti in Pathian fuh panh tu kha Jesuh nih a kan duh piak mi cu a si deuh.

Tahchunnak ah: Fimnak sang deuh phanh le phak kan duh ve ah cun, fimnak lei ah ka cham bau rih, ka thiam lo ti i hngalh hma set kan herh. Cu ti hngalhnak kan ngeih hnu lawng ah fimnnak a sang deuh mi cawnduhnak a kan ngeih ter lai. Cun i zuam duhnak zong a kan ngeih ter chih lai. Cu hnu ah cun a thiam deuh mi a kan si ter lai. Cu ruang ah cun Philippines ram ah kan ra hna tiah ka ruah. Cu bantuk cun zeithil kan tuahnak paoh ah ka tling thlu rih lo, ka thiam thlu rih lo ka chambau rih ti kan i theih hnu lawng ah i zuamnak le teirialnak a kan ngeihter lai le a tlam a tling deuh mi dirhmun ah a kan phak ter lai. Cu caah cun Jesuh nih a zultu hna kha ka sin ah nan um ruang ah le ka zultu nan si ruang ah uang thlar in um hlah uh. Zeihmanh kan tuah khawh mi a um lo ti tu kha nan lungput si peng seh law, cu nih cun i biataknak le Pathian sin ah i pumpeknak nun le thlacam nun an ngeih ter hna lai i thlarau lei ah a tthawng mi nan si lai. Cu ti si lo in hawi nak in ka thawng deuh, ka ti kho deuh, ka thiam deuh, ka fim deuh ti lungput nan ngeih sual ah cun Pathian sin ah pumpek nun an donh sual hna lai, zuam duhnak ngeihnak an donh hna lai, thlacam an dai thlan ter hna lai le Thlarau lei ah a derthawm mi le a ttumchuk mi an si ter hna lai ti kha a cawnpiak duh mi hna cu si dawh bik a si. Hawikom dawt hna, midang chambaunak a hmu thiam mi lai mi si lo in kanmah chambaunak le tlamtlinlonak ai hmu kho mi tu si usih law, cu nih cun rualremnak le tthanchonak a kan pek pin ah Pathian pennak chung ah him te in a kan chiah lai. Pathian nih thlua kan chuah piak ko seh. A men.

(March 20, 2011) Online Sermon

ZUMHNAK NUNG & ZUMHNAK THI

“Pumcu thlarau lo in athih bantuk in zumhnak zong tuahnak lo in athi ve”. Jeim 2:26

By Rev. Za Mang

Zumhnak (4)

1. Jehovah Pathian zumhnak

2. Thawngtha bia zumhnak

3. Pathian Biakam zumhnak

4. Thiangthlarau laksawng zumhnak

Zumhnak timi hi Baibal ah tampi kanhmuh ko na in pa (4) lawng hi langhter ka duh.

1. Pathian cu pakhat lawng asi ti nanzumh.Atha ko.Khuachia zong nih cu cu an zumh ve ko. (Jeim 2:19) Biakam hlun kan zoh tikah Israel mi cu Pathian nih Keimah Israel Pathian thiang hi nangmah an khamhtu cu kasi a ti. Pathian nih Ami thiang hna le prophet hna hmang in bia a chim. Hi ka nawlbia hi nanzulh i nantuah ahcun nandam lai i nan nung lai a ti hna.Amah Pathian bia zumhnak le tuahnak thong in Khamhnak an hmuh.Cu lawng si lo in sualngaihchihnak thawng in khamhnak an hmuh nak kong zong kan hmuh. Biakamhlun ahcun nawlbia zumhnak le tuahnak thongin khamhnak an hmuh nain Biakamthar ah cun nawlbia zumhnak le tuahnak thongin khamh nak kan hmu kho ti lo.

2. Nannih cu vel an ngeih hna caah an khamh hna i khamh nak nan hmuh cu a mah nan i bochan caah asi. (Efesa 2:8). Kawl baibal le mirang baibal ahcun Avelngeihnak zumhnak thong in khamhnak kan hmuh ati.Jehovah Pathian nih a fapa thihnak le thisen in a kan khamh. Cu fapa Zisuh zumhnak thongin khamhnak damnak kan hmuh i zungzal Nunnak kan ngei.Fapa a zum mi paoh cu zungzal nunnak an ngei,Fapa azumh lo mi paoh cu nunnak an ngei lo i Pathian thinhunnak cu an cungah a um zungzal ko lai.(Johan 3:36)

3. Biakamhlun le biakamthar ahhin a tling cang mi le a tling rih lo mi tiin phunhnih in a um.Biakam thar cu Pathian nih a fapa in bia a kan kamhmi asi.Jeim 2:26 ah Zumhnak zong tuah nak lo in a thi ve.” zumhnak a thi ti mi hi thlarau thihnak a si lo ti hi biapi in chim ka duh mi asi. Gen.15:5-6 ah Pathian nih Abraham cu “Na tefa cu khi arfi zat khi ansi lai a ti.Gen. 2:14-26 kan zoh tik ah Abraham zumhnak le tuahsernak kan hmuh.Pathian biakam a zumh mi kha a tuahsernak in a langhter.Gen 22:1-2 ah Pathian nih Abraham a hneksak nak kan hmuh.

Abraham nih Pathian biakam cu a zumh.Azumhnak cu Pathian nih a hneksak.Athimi zumhnak maw, Anung mi zumhnak dah ti in a hneksak mi a si.”Tefa tampi kanpek lai” ti mi biakam cu a zumh ko nain Isak hi khanghthawinak ah a pek ngam lo ahcun Abraham zumhnak cu zumh nak thi a si hnga.Afapa raithawinak I a pek caah Abraham zumh nak cu zumhnak nung asi.

Malakhi 3:11-12 ah cheuhra cheukhat nanpek ahcun thluachuah kanpek hna lai tiah Pathian biakam kan hmuh.Nazumh tuk ko nain na pek lo ahcun tuahsernak tel lo zumhnak thi a si.Napek ah cun na zumhnak kha tuahsernak in nalanghter caah zumhnak nung a si.

Jeim 2:15-16 ah Hni le puan a ngei lo mi cu hni le puan ka pek hna ah cun an khua a lum lai ti cu nazumh nahngalh nain na pek hna lo ah cun nahngalh mi zumhnak cu zumhnakthi asi .Na pek hna ahcun nahngalh mi zumhnak cu a nungmi zumhnak a si.

Jeim 2:26 nih hin zumtu micheukhat a buai ter hna.Cawnpiak tu cheukhat nih thlarau a thi tiah an cawn piak hna.Thlarau thih nak cu Pathian nih Fapa ZisuhKrih thisen in kansualnak vial te a kan ngaihthiam nak le avelngeihnak zumh lo ruang ah asi.Avel ngeih nak zumhnak thong in Khamhnak kan hmuh i zumhlo ruang ah thlarau thih nak a si

Pathian nih KrihZisuh in bia akan kamh mi Biakam, zumh lo ruang le tuah lo ruang ah thihnak asi lo.Abiakam kan zumh I kantuahser nak in kanlangh terkhawh lo mi cu ttuan man laksong kansungh hlei ah Lei thluachuah sungh nak a si.Minmei cung zumtu biaceih nak ah ttuanman laksong suiluchin kanhmu lai lo.Leicung nanun chung ah Hnangam daihnak le thluachuah arocar lai ti nak a si. Khamhnak sungh nak a si lo.

4.Thiangthlarau laksong hi phuntampi a um.Pathian nih zumtu hna aherh ning in a kanpek cio.Kanco ning aakhat cio lo. “Azum mipawl cu hi thawnak hmelchunhnak hipek an si lai,holhtheih lo in an holh lai,rul kha antlaih hna i sivai an din zong ah an zeihmanh a ti lai lo;mizaw cungah an kut an chuan lai i an dam lai, tiah a ti.”(Mk 16:17-18)

Micheu khat zumtu nih hi zumtu tthawn nak hmelchunhnak hi nan ngeih lo ah cun Khamh nan si lo,nan hrinthar lo ti a si.Hi cawnpiak nak zong hi a dik lo kan ti khawh.Zeicahtiah Thawnnak hmelchunhnak a si i, Khamhnak hmelchunhnak a si lo.

Biadonghnak: Thawngthabia zumhnak thong in khamhnak kan hmuh.Pathian Biakam kanzumh i tuahsernak in kanlangh terkhawh ah cun kanzumhnak anung i Leihnangamnak le dam nak thluachuah kan hmuh hlei ah ttuan man laksong suiluchin kan hmuh te lai.Kanzumh ko na in tuahser nak nih a pehzulh kho lo ah cun ttuan man, lawmhman laksawng na sungh long si lo in Lei hnangamnak le Lei thluachuah na co/hmuh lo hlei ah nanunram a rocar lai ti nak a si.

Sunparnak cu Anung Pathian nih cokoseh!

Rev. S.Za Mang

Manila

(March 13, 2011) Online Sermon

I sum nak

By

Pastor Hniang Uk

I Thess. 4:4“nan pum uk kha nan thiam awk a si,..

nan thianter awk le nan upat awk a si”

Fidi, fitlaw pawl hi an min an vun thang bak ah hin cun, hlan lio ban tuk in an vak, an chuak ti lo, zeisi lo in mibupi sin ah an lang duh lem ti hna lo, kan min than nak a tla sual lai ti an phang. 2000 hrawng i Zomi Theological College, Falam ah bible siangin ka kai ton ah hin fitlaw Thet Mon Myint hi dawr a hngak ton i thil cawk pah in kan hei chawnh pah lengmang ko. Nihin ah cun Yangon i an inn hmai in bawh len zong ah a mui hmuh khawh dawh si ti lo.

Yangon sianginn ka kai lio ah ka hoi pa Tan Jar nih fitlaw Khin Lay Nwe te inn ah a ka len pi i, an ka chim mi cu, “Khin Lay Nwe cu video thlak ding ti lo ah cun a leng ah a chuak bak lo,”an ka ti. Ziah ka ti hna i, "mi nih a leng ah hmuh lengmang ah cun an uar ding tluk in an uar ti hna lo” an ka ti. A min than nak a tla sual lai ti a phang!

Ka hoinu Kipte nih a ka chim bal mi cu “Sung Tin Par nih, ‘ka ngai bik mi cu hlan lio (hla tap phel kaa chuah hlan) i ka hoi le he inn hmai ah, veranda hna ah duhpoh in laphehtoh hna kan ei pah in hla kan au, kan sa mi hna kha ka ngai tuk ton ee’ a ti” tiah a ka chim bal. nihin ah cun aa sum cang, a min than nak a tla sual lai ti a phang!

Voikhat ah Lay Phyu cu lampong i an zawr mi butikyaw kha ei a duh tuk nain, vok thau in reu mi hna si sual lai a ti i a ei ngam bak lo an ti. A aw ţhatnak, san nak hna a rawk sual lai ti a phang!

Khua a ka ruahter ngaingai mi cu: vawleicung minthang, cansau a daih lo mi, zungzal nunnak lei zong ah a nguh lo mi ruang hmanh ah hin tuah an duh mi an i sum, ei an duh mi an i sum, chuah/vah hoi le he i nuamh an i sum, inn bak ah in i khumh i video thlak tik ah chim ding mi bia hna kha heh tiah by heart in ngah ding in an i zuam hi mu…….

Nang le kei, vanram deng tiang min a thang ve mi, Thlarau in hrinthan kan si bak ah vancung in van mi hna nih hla sak piak mi, vanmi nih lawmh pi mi, kan minthannak zong zungzal tiang a nguh ding mi nih zeidah kan i sum ve? Tuah kan duh mi, ei kan duh mi, din kan duh mi poh zeihmanh i sumnak um loin Pathian duh nak he aa kalh mi hna kan tuah thiamthiam maw? Kan thinhunnak teh kan i sum maw, mi lehrulh kan duh nak teh kan i sum maw? Pathian hi a ţha tuk lei lam khi si i, kan mah tu hi ‘a ka ngaihthiam ko lai’ ti phun in kan luan tuk ton. Khrih aiawhtu, Khrih ca i lamkaltu, Khrih zultu kan si i kan i sum awk zong a tam ngaingai ko.

Kan Bible chungah, Danial hi kan zoh ah cun, Babylon a phanh ah tlangval mino te a si rih bantukin, duhpoh in siangpahrang inn ah um i, siangpahrang raw ei ve, din ve cu a nuam ngaingai mi a si ko lai nain, Daniel cu dingfel tein a um peng i, “…..siangpahrang nih a ka pek mi rawl le zu hin kaa thurhnomh hrimrhim lai lo…….”a ti (Daniel 1:8)

Cun, Judah Siangpahrang Josiah hi a sual tak mi siangpahrang rak sisehlaw a mawh lo kan ti hnga, zeicahtiah, a pu Manasseh hi Judah siangpahrang lakah a sual bik mi pawl a si: afapa zong khanghthawinak ah a hman, a sual lo mi thisen tampi a chuah fawn. Cun apa Amon zong hi Manasseh bantuk in a sual tak mi si ve hoi. Pathian duhlonak long te a tuah ve (2 Siang. 21:1-22). Josiah cu siangpahrang a si lio kum riat long a si rih fawn tik ah a pa le a pu keneh zulh awk kha a fawi ngaingai mi si. A um nak pongkam, a chungkhar hnazong Pathian a zawmhtlaih mi, a nih sawh mi longte an si tik ah anih zong anmah bantuk in si ve awk hi a fawi tuk mi a si.

Sihmanhsehlaw, Josiah cu apa le apu Manasseh hna lam kha zulh lo in, Bawipa mithmuh ah a dikmi thil kha a tuah i a pu David lam kha a zul, orhlei ah siseh, kehlei ah siseh a pial lo, a ti. (2 Siang. 22:2ff)

Ca uk min thang, Experiencing God tial tu pa Blackaby nih cun, “Christian life is denying fleshly desires everyday” a ti.

A tanglei bible cang in ka bia ka dongh ter:

I Thess. 4:4, 6, 7 4Nan dihlak in nan pum uk kha nan thiam awk a si, nan pum cu nan thianter awk le nan upat awk a si, 6Ahohmanh nih nan u nan nau kha an pawcawmnak rian ah hleng in deh hna hlah u, ningcang loin lemsoi hna hlah u; cu bantuk ṭhat lonak a tuahmi cu Pathian nih dan a tat hna lai tiah kan in chimh cang hna i fak piin ralrinnak kan in pek cang hna. 7Pathian nih sualnak tuah lengmang dingin a kan au lo, mithiang si ding tu ah a kan auh.

Pathian thluachuah nan dih lak cungah um ko seh

Pahniang

/////////////

(February 27, 2011) Online Sermon by Rev. Van Bik

Text: John 1:14a “Bia cu minung ah a cang i kan lakah khua a rung sa”.

Kan Biafang le kan Khuaruah

Bia hi thawnnak (thiltikhawhnak- power) a ngei, ti a si. Cucaah cun, kan pupa hna nih “bia chim sawhsawh hlah, hla sa sawhsawh hlah” an rak titawn. Ruat setmat loin bia chim sawhsawh mi le hnuhmai tuak lem loin duh paoh biachim mi nihhin midang rawhralnak le mah pumpak rawhralnak tiang a phanh ter tihi asi. Kan Biblethiang zong nih “Bia cu minung ah a cang i kan lak ah khua a sa”, a ti.

Biafang kan hmanmi nih kan sining, kan khuaruah ning, kan dirhmun tampi a langhter. Cu lawng siloin cu kan biafang hmanmi nihcun kan nunning, kan khuaruahning zong akan sersiam fawn. Biadang in kan chim ahcun kan philosophy le kan theology zong a kan sersiam, tinak a si hnga.

Biafang kan hmanmi a biapit ning an hmuh fiang tuk caah mifim le khuatuak deuh nihcun ralring tein hman khawh an izuam tawn. Tahchunhnak ah: Dis-able titawn mi kha Less-able; Illegal worker kha Undocumented worker (minung hi illegal timi a um kholo, an ti) tiin an auh hna. Mit-caw timi nakin khua-hmulo, ti ahcun ngaih adam deuh; Ngahtah cawmnak timi nakin Ngakchia zohkhenhnak, ti cu thinlung a dam deuh ngai ko.

Kan Chinmi Khrifa nitin kan hmanmi biafang tete chungin pakhat hnih te kan vun zoh tti tuah lai:

1. Leimi nih HRUT ka ti hna seh ka zei poi lo.

Chinmi zumtu le hrintharka pawl nih kan uar ngaimi kan hla pakhat cu; “Leimi nih hrut ka ti hna seh ka zei poi lo” ti a si. Paul nih Korin Khrifa hna sinah “Kannih cu Khrih ruangah mihrut kan si; nannih tu cu nan fim” (1 Kor. 4:10; Rom 1:22; 1 Kor. 1:27 etc.) timi pawl kha lak in; Fimnak kong (nungak fim; sal fim etc.) pawl a kan cawnpiaknak hna cu ihmuh ter loin; kan um tawn hna. Apoi rih mi cu; cu “hruh” cu cathiam lo sinak le catang sang kailonak he khin kan peh ter rih. Hi biafang pawl hi catang ngeilo phungchim vak pawl nih mah i humhak nak caah le thatein Bible sianginn akaimi hna doh nak ah an thlir bik mi Bible cacang a rak si. Nihin ahcun anmah pawl zong fimnak catang sang phunphun kai in le an fa le hna zong sianginn thatha ah fimnak sangsang an cawn ter cang hna. Amahbelte, cu an rak aupi mi “hruh zong a poi lo” timi cu Laimi Khrifa kan nun ahcun a kan ciah liopi a si rih ko. Catangsang akaimi thapek khawh lonak, tanpi duhlonak, soiselnak timi Negative thil hmuhning pawl tampi ahrin. Hi bantuk mipi ruahnak le zumhnak a pialter khomi biafang le zumhnak hna hi, nihin hruaitu hna nih kan i hmaithlak ding thilpi pakhat a si.

Pathian nih mihrut si hi a kan duh piak ballo; minung a hohmanh nih mihrut si cu kan duh ballo bantuk in kan khuaram le kan miphunpi zong hi a lamkip in a fim ding cu tuanvo kan ngei. Kan miphun tthatnak ding caah cun hrawhawk ttha cu kan hrawh lai i, thlenawk tthami cu kan thlen hna lai.

2. Jesuh min in kan in sawm.

Nihin kan Khrifabu canhmannak le meeting tuahnak hna ah kan hman tam ngaimi bia cu: Jesuh Min in kan in sawm, timi hi a si. Tahchunhnak ah: “Solo sak ding ah Jesuh min in kan in sawm” “Thawngthanhtu ding Jesuh min in kan in sawm” “Laksawng lak dingah Jesuh min in kan in sawm” etc. ti pawl an si.

Jesuh min in zeizongte tuah uh, (Kol. 3:17) ti a si kolo maw; a ttha kolo maw; Jesuh min in tuah mi paoh cu kan ti kho men. A dik nak zawn a um ko lai nain, hi thil umtu ning nihhin kan khuaruahning (philosophy) le kan Pathianbia hmuhning (theology) tampi a langhter. Kan Bawipa Jesuh nih a kan cawnpiak mi cu, ka Pa sin ah keimah (Jesuh) min in hal uh, timi tu hi a si deuh. MIN an hmannak cu; mah nakin thil tikho deuhmi, a tthawng deuhmi, mah sinak nih a phan khawh lomi hna kha chawnbiak le ton duh tikah; Amah he aa theihngalmi maw, a siloah, amah nakin huham ngei deuhmi maw, an Min kha hmang in chawnhbiak le ton kha a sitawn.

Kan solo satu hna le kan Thawngthanhtu pawl hi cutluk tiangtiang in huham ngeimi le fial ngamlo le chawnh ngam lo ding tiang in le Jesuh Min tiang ilak hnawh ding tiangin a liannganmi cu maw an si kun. Zomi Baptist Convention (ZBC) General Secretary Rev. E. Hlawn Piang kha Biakinn pakhat ah Pumh cantlaitu nih khan “A tu cu Phung chim ding ah Rev. Hlawn Piang, Jesuh min in kan sawm” a vun timi kha; “Keimah menmen phungchim ding hna, Jesuh Min in nan ka sawm cu aw … ka ning leitu a zak” a rak ti bal. (Hlawn Piang kha Jesuh min iput in va sawm lawng ah phung a chim lai ding bang; cubangin, kan Khrifabu ah Thawngthanhtu zong khi Chairperson nih sawm lawng incun thawng a thanh duh lailo bang le (huham a ngei tuk i a bawi tuk i) Jesuh min in kan sawm lawng ah (Jesuh min kha a zah lai i) Thawng hna a kan thanh colh lai bang khin, kan can ter.

Hi thil pawl nih a langhtermi pakhat cu Chinram cu Khrifaram (Khrifa milu tamdeuh) a si caah zeizong vialte kha kan khrifa-ter (Christianize) sawhsawh bia a si hnga maw. A sullam ruat setsai lo le tuak setsai loin hawi tuah mi paoh kha kan hei tuah ve bia hna a si hnga maw. Khrismas can ah Khrifa-silomi unau cheukhat Guitar pakhat he Khrismas hla innkip ah kal in an va sak; laksawng an hmuh mi kha zuu an dinnak, bantuk fang hrawng khi a si. Constantine siangpahrang chan ah rammi kip Khrifa an luh ter hna i Khrifa pennak (empire) pi an ser nain zumhnak leiin cun biatak tein an tlak can ah a cang (Kan ram ah Khrifa donkhamnak le ri khiah piaknak a um len mi zong hi a herh nak a um hrim ve ko rua).

Kan mawh lonak pakhat te tu cu, kan uktu bawi pawl ton kan duh tikah; bawi dang pakhat min in a si loah amah catial piak mi lawngin ton khawh a simi ram ah kan um caah kan nun ahhin kan i ziak ngai colh zong a si ko lai. Asinain, kannih a tu Jesuh min kan hman ning hna hi cu, cu he cun a lettalam a si hoi; a cung a tang kan leh dih (duhsah tein ruat te).

Kan Pathian min hi ningcang deuh in hmang ding le sullam ngeih tein hman ding zong kan Bible cawnpiaknak a si (Exodus 20:7). A cungnungbik Pathian he bia ruah kan duh tikah kan Bawipa Jesuh min in thla kan cam lai; kan sinak nih a tei khawh lomi Setan khuachia thawl kan duh tikah a tei khotu Jesuh min in kan tthawl hnga. Kan Bawipa Jesuh min cu ningcang te le tihzah tein hmang hna uhsih.

3. Chairman le Chairperson.

Doctor degree a hmu cangmi Chinmi kan pacan pakhat nih bu by-law a suaimi chungah hitin a tial: Chairmanpa cu meeting vialte hruaitu a si lai, a ti (Pumh Uktu rian cu pa lawng nih tuan phung asi timi ruahnak nih a ciah tuk rua). Kan Chinmi zapi (buaktlak in) lung chung ahhin gender (nu le pa) aaruang kho naisai rih lo; tampi a chambau rih, tihi a lang ngai. Cathiam mifim deuh (educated) lak hmanh ah aaruang deuh in hmunhma kan ipe kho hrimhrim rih lo; kan i cawithlir thiam deuh rih lo, ti cu a lang ngai. Kan miphunpi huap in nu an tam deuh na buin nu hna hmunhma aa ruang tal in pek ding kan i tuak chih deuh lo ahcun miphun thanchonak cu aaruang kho bal lailo, ti cu alang.

Kan hnuzarh Chin National Day (CND: Philippines) ah committee 10 thim an si i; cu chungah nu pakhat lawng telh a si. Cu CND committee rian (President, Secretary, etc.) cu Philippine a phanmi a ho Chinmi nu paohpaoh nih an ttuan kho dih ko lai; a tuan kho deuh hmanh an um len ko lai. Kan Khrifabu cio le kan bu cio zong ah cu dirhmun cu kan si rih ko. Chairman chan cu a dih cang i Chairperson chan a si cang; a biafang lawng hman siloin nu le pa aa ruang in Bawipa riantuan le ram riantuan ah kut tlaih in ttuan tti izuam hna uhsih. Hi rian vialte zong hi nihin hruaitu nang le kei cung ah tampi aa hngat ko.

Kan biafang hmanmi tete hi lungfim te le sullam ngei tein hmanmi siseh law, cuticun cu “bia cu minung ah a cang” ko hnga i kan sin ah khua a sa ko hnga. Cucu kan thlacamnak si cio ko seh.

Bawipa nih thluachuah in pe ko hna she

Rev Van Bik.