April thla pumhnak Activity

Pathian hi Laimi bantukin mi tampi/mibu sin lawngah ai phuangmi le ai nuam mi sisehlaw April thla kan ipumhnak hna ah hincun aiphuang in ai tel duh naisai hnga lo i kan pumh zong a nuam men hnga lo. Aruang cu milu in kan tlawm lio caan te a si caah a si. Sihmanhsehlaw Abaraham, Isac le Jacob Pathian cu milu in kan tlawm ah siseh kan tam ah siseh thinlung tak tein a biami hna sin poah ah ai phuangmi Pathian a si caah tutan PCCF pumh cu milu in kan tlawm nain thlarau riantuannak hmual alang khun i aipum mi hna pakhat cio nih kan ilunghmuih ngaingai cio hna. Atang lei hna hi kan cawlcangh ning le kan ipumhning caan kan hmanning hna an si...

Pumh kal pah ah kan van zikzek ta>>>

 

Kawl nih "a sah kaung mah a hnaung techia dae" an ti bantukin pumh tehna zong ah hin pumh hruaitu nih pumhnak a thawk dan hi a biapi taktakmi a si ve. Tutan kan pumh cu a thawkka hrimhrim in kan tluang cang. Tutan pumh akan hruaitu cu Pastor Mose Van Nun Ceu a si.

Kan hlasak khi kanmah le kanmah nih cun kan awk a tha tiah kan itingam lai lo nain akan ngaitu hna rak um hna sehlaw khoika gospel team dah an si hnga tiah pakhat pakhat an ihal hrimhrim hna lai...hlasak a nuam, a tui bak in kan tui hna... 

Kan secretary pa bia siaherh he herh lo he a chim lio a si...

 Thawhlawm caah Saya Tluang Zel Thang nih thla acam lio a si. Milu in kan tlawm ngai nain kan thawhlawm cu voidang tawn tluk te a si ve thiamthiam ko...

Kan thinlung dihlak te le kan awzai te he Pathian kan thangthat lio...

Pastor Cung Bik Thawng nih Zapi caah thla a cam lio... Khualtlawng lamli mi kan unau vialte hna caah thla kan incampiak peng ko hna...

Tutan cu gospel team kal lai i hla a cawngmi hna kan lo pah. Aruang cu kan dihlak ten groupsong kan sak a tam...

Dr. Ngun Biak Nawl nih Bible ca aithim mi a rel lio a si...

A ngaingai tiah Bili Graham  hmar ka ngai hrimhrim lo....Mi kan tlin lo cu a va pam hringhran kan ti cio...

Tutan pumh i Saya Khen Lian Thang nih rawl a kan danghmi cu hramhram in ithloh lo ahcun a ngol ti lo ding kan tam ngai... inn phan kho deng lo mi hna kan um pah len...

Taal in kalh lo ahcun a tho ti lo ding lawngte an si ko hna hih...

Tutan kan ipumhnak ah zeipoah te tuanvo a kan lak piak i retheih a kan inn piak tu hna innteek Saya Khen Lian Thang le Pastor Bei Rona an si...

Inn tin lai ah kan van zikzek ta hna... 

Country song sakthiam concert ah an sawm i a va zulmi hna kan lo pah rua...

Then lai cu kan isiang cio hrimhrim hna lo. Sihmanhsehlaw thennak a um lo ahcun tonthannak a um kho lo ti a si bantukin hmai thla ah iton kan duh tthan caah hiti te hin tian zai kan rel hna... 

Taylor Swift he hlasak an sawm hna i a rak phan rih lo a hngak mi hna a lo pah lo maw???

PCCF nih pa can taktak ah kan iruah mi Rev. Paul Thaung Tin a si. 

Rev. Paul Thaung Tin nih a timi cu hihi bak hi bawi inn ipumh cu a si a ti... voidang i kan ipumh tawn ahcun kheng le pakaan hna nan mah ten itawl uh chia ta hlah uh ankan ti lengmang nain tutan cu tawl hrimhrim hlah uh tiah kan tawl hnik mi hmanh akan lakpiak than dih, bawi inn pumh timi cu mah bak hi a si a ti...Saya Khen Lian Thang bantukin rinh awk tlak le bochan awktlak, zeibantuk rian hmanh nautat lo tein a tuan i a phun zai bal lo mi hruaitu nih kan hruai peng hna sehlaw zeitluk in dah a va that hnga a ti mi kan tlawm te lo... 

 Sayamah Mac Awlin nih hramthawknak caah thla a cam lio a si... amah te lawnglawng hi far fangkhat kan ngeih chun mi a si...

 Kan chairman pa nih kan pumhhruainak caah Bible ca a rel lio a si... a zoh dan khi a mit tha dih pah mi a lo nan ti cio dik maw, a ngaingai tiah tulio cu Premier League le Champion League zoh a tui cingling cu sikaw khitluk tal cu a si ve hau ko hnga...

April thla pumhnak ah a rak chuak kho mi pumpak pakhat cio cungah hruaitu aiawh in kan lunglawmhnak roca kan tial. Hmaithla ah damten itong than hna usih...

April 13, 2014 PCCF Weekly Online Sermon

!!Jesuh Nih Na Ka daw Maw Tiah Bia A Kan Hal?!!

By: Pastor Charles Cung Bik Thawng

Pastor Charles Cung Bik Thawng

Jesuh nih Johan fapa Simon na ka daw maw?(Simon Son of John Do You Love Me?)Cun Jesuh nih cun "Johan fapa Simon na ka daw maw? tiah a ti tthan hoi.Jesuh nih voithum tiang na ka daw maw, tiah a hal caah khan Peter cu a ngaih a chia i "Bawipa nangmah nih zeizong vialte na hngalh dih kan dawt cu na hngalh ko hen cu a ti.Jesuh nih cun Ka Tuu kha zohkhenh hna. (John 21:17). "Thihnak in a thawhter a si hnuah atu hi Jesuh nih a zultu hna sinah a langh voi thumnak a si.Rawl an ei hnuah Jesuh nih Simon Peter cu a thawh i "Johan fapa Simon na ka daw maw? tiah a ti."A si,Bawipa kan dawt kha na hngalh tiah a leh.Jesuh nih a thawh tthan i Johan fapa Simon na ka daw maw tiah a ti tthan.Asi, Bawipa kan dawt cu na hngalh tiah a leh.Jesuh nih Johan fapa Simon na ka daw maw? tiah voithum tiang a hal caah Peter cu a ngaih a chia i,Bawipa nangmah nih zeizong vialte na hngalh dih, kan dawt cu na hngalh ko hen cu a ti.(Lord you know everything; You know that I love you).

Jesuh le zultu kong tlawmpal te an tuanbia kan zoh ahcun zeidah kan hmuh khawh?Minung an si ve caah Jesuh an zul ko nain an chambaunak a um tawn. cucaah Jesuh nih Simon zong voithum tiang na ka daw maw tiah bia hal ve.Zultu hna lakah zumbik mi Treasurer Judas hna kha kan zoh ahcun Jesuh kha a hnam hmasa hnuah ral kut chungah petu a si.Judah phung ahcun Hnam cu dawt bikmi long hnam khawh a si.Judas nih Jesuh a rak hnam kha a dawt tuk rua anti nain Dawtnak si loin huatnak or chiatserh(hrawk le thah) duhnak kha a rak  si. Cucaah Jesuh nih Judas cu a nu paw chungin a chuak lo hmanh a ttha deuh a ti. Cu ve bantuk in Peter zong Jesuh an tlaih lioah khan an tlaih ve i Jesuh zultu na si maw an ti. Ka si lo a ti hna. Na aw cawi hi Jesuh zultu na si ko an ti zongah ka si lo a ti rih hna i ar voithum a khuan hlan ah Peter nih Jesuh cu voithum khelte a hlawt ve.

Dawtmi zumtu vialte hna Bawipa rian saupi kan ttuan,kan piangtharnak saupi,thla kan cam tawn ko.Thawngttha kan chim tawn ko.Crusade,Campign le Revival ah caan saupi kan um ko.Bible Sianginn kan kai ko.Evangelist kan ttuan ko.Missionary kan ttuan ko.1/10 kan pek ko.Tlamtling ko lo maw? Cu vialte kan tuah ko buin Jesuh nih maw ka fa dawt na nunnak taktak in na ka daw maw? tiah bia a kan hal ve.zeitin na leh ve lai.Nan pastorpa chimhmi maw na chim ve te lai. A si lo ah, Piangthar le thlacam tthawng deuh maw na zoh hmasa hna lai.

Jesuh nih ka fa dawt na ka daw maw tiah bia a kan hal ve kan nunnak i check ve hna usih.The very Important question a si.sianginn kai lio a thiam deuhmi le mi nih ca firmi copy btk khan awn khawh a si lo.Nan Pastorpa le piangtharpa, nan chungkhar na nulepa nun zong hrawm a ngah lo.Jesuh nih na ka daw maw? tiah nangmah an hal.

Jesuh nih Simon Peter voihnih na ka daw maw? tiah a hal lioah a lehmi cu Bawipa kan dawt cu na hngalh ko hen cu a ti.A donghnak ah Jesuh nih Johan fapa Simon na ka daw maw? tiah a hal lioah a lehmi cu Peter cu ngaihchia bu tein Bawipa nangmah nih zeizong vialte na hngalh dih kan dawt cu na hngalh ko hen cu a ti.(Lord you know everything; You know that I love you).

Bawipa Jesuh nih maw ka fa dawt Na ka daw tak maw? tiah a kan hal ve.Minung hmai ahcun kan piangthar ngai,Thawngttha chim ttha ngai,thlacam a ttha ngai,kan si ning zeizong vialte hngalh dihtu Bawipa a si.Peter btk in Bawipa kan dawt bak hi aw kan dawt hi na hngalh ko lo maw? kan ti ngam ve lai maw?Cun Bawipa zeizong vialte thei dihtu na si i kan dawt le dawt lo cu na hngalh ko kan ti kho ve lai maw?a biapi cemmi cu Bawipa nih kan sining vialte a thei dih ko caah kan nunnak hi Bawipa nih a cohlangmi si dingah kan nunnak Bawipa pe hna usih..Bawipa kan dawt ko na fa misual ka si.Ka nunnak hi ka cohlang ko law na caah pumpek(sacrifice )zumhawktlak (Faithfulness) ka nung cang lai ti hna usih.Ka nunnak ngeitu na si i na sunparnak caah ka hmang cang lai.

an dihlak caah Bawipa nih thlua kan chuah piak ko seh..

Lawmhnak tampi he...

Pastor Charles Cung Bik Thawng

March 30, 2014 PCCF Weekly Online Sermon

JESUH NIH PATHIAN PENNAK THAWNGTHA KHA A CHIMH HNA

By

Salai Paul Khin Maung Thein

“A can kha a phan cang,Pathian Pennak cu a phan dengmang cang.Nan sual nak kha kal tak hna u law thawng tha kha zum tuah u” tiah a ti hna" Mathai4:17

Bia Domhnak

Pathian pennak ram chung luhnak dingah hin midingmi pakhathmanh kan um hna lo caah Jesuh hi vawlei ah nunnak pek tiangin misual  tlanhding in a ratnak a si. Jesuh a chimmi Pathian Pennak thawngtha nih zei lam dah zul hnaseh ti akan duh biak ti hi bible vun zoh hna u sih.

Jesuh nih A Pa rian tuan ai thok tikah  a chim hmasami bia a si: Mathai4:17

 
Jesuh cu a Pa a Pathian nih a fial mi rian tuan ai thok tik ah a chim hma sa bik mi bia cu Pathian pennak kong a si.Pathian pennak ram a luh duh mi hna nih zei hi dah Pathian pennak luh cu a si tiah ai ruat palh mi hna sin ah biatak chim hram ai thok.Judah cawm piak tu hna le Farasi mi hna nih cun Pathian pennak cu thilthal an tuah nak thawng in kan lut kho lai tiah an I ruah.An mah tluk thil tha a tuah kho lo mi hna tu kha an nihsawh hna.An hrial hna.Thla an cam hmanh ah an mah bantuk in ka sual lo caah ka lawm tiah an thla an cam.Thil tha tuah nak in Pathian pen nak ram chung luh an I tim.Jesuh nih a chim mi Pennak ah cun “nan sual nak kha kal tak hna u law thawngtha kha zum tuah u,” tiah a ti hna.Pathian pennak a ti mi cu Pathian uk nak tinak a sual lam a si.Jesuh nih a chim mi thawngtha nih Pathian pen nak nih a uknak kha vaw lei cung ah a thawk cang ti a langhter.Khamh nak nih minung sual nak le khuachia dohnak kha a tei tiah Pathian pennak nih a chim.Minung kan tuah ser nak nih Sehtan pen nak cu kan tei khawh lo ding ai fiang tuk caah Jesuh hi vaw lei ah a rak chan cu a si.Kan mah te in thil tha kan tuah thluah mah lai I kan thih hnu hlawng ah pei vawlei ah kan rak tuah ser nak hman tlak in Pathian nih bia an kan ceih te lai .tiah thih hnu vawcung pen nak kong ah ai ruat mi an um ve.Jesuh nih cun  Pathian Pen nak cu a tu hi a ra lio tiah a thanh.Luke10:9 ah  Pathian Pennak cu nan pawngte a phancang,tiah va chim hna u a ti.Kan um nak vaw lei ah Pennak pek kan si cang nak thawngtha kha athanh..Amen…….

Pathian Pennak ram luh ai palhmi cawmpiaktu  hna 

Mathai23:13 Phungbia cawm piak te saya hna le Farasin mi hna,nan caah ngaihchia a va si dah!Midepde hna.Van cung pemnak cu mi kha nan kharkanh hna.asinain nan mah cu nan lut duh tung lo I luh a duhmi zong nan awmh tung hnalo.
Pathian pennak luh nak ding ah cun Nansualnak kha kaltak hna u ti hi nan sual nak kha I ngaihchih u ti nak a si.Nan lung I thlen u ti nak a si.Lungtlen ti tik ah sual nak nih a rak uk ton mi a thinlungnih a rak duh bik mi sual nak he ai ciahmi pa nih sual nak a huat I akal tak kha sual ngaihchih le lungthlen a sullan cu a si .Pathian velngeih nak lo in khamh nak a um kho lo.

Pathian Pennak luh ding in mah nun I chek ta a hau

 
Mirum tlang val pa nih cun “Saya ,hi nawl bia vialte hi cu ka ngak chia lio in ka zulh leng mang ko cang hna” tiah a ti.cu caah Jesuh kha,Zeidah ka bau rih “tiah a hal.Jesuh hmai ah a mah cu Pathian nawl bia ka buar lo I a sual lo mi hmai zarh awk tlak le midik a si ti kha a langhter.Jesuh nih dengteo in a vun zoh I,”Pakhat lawanglawng nabau,va kal law na gneih mi vialte kha va zuar law tangka cu sifakmi khat va then hna:cun van cung ah rothil na ngei lai: cun ra law ka zul’tiah a ti.Jesuh le mirumtlang val pa khar lak I a um mi cu a ngeihmi thil vialte kha a si.Zung zal nun nak co awk ah a caah dawntu cu arum nak kha a si.Pathian I bochan lo in a rum nak kha a bochan.Pathian biak lo in a rum nak kha a pathian a si I a biak ti kha Jesuh nih a hngalh.Mah fim nak hnga kan I bochan tuk sual maw.Bible sianginn ka kai tiah mah cawmnak kha a pakhat nak ah chiah in Pathian tu kha a pahnih nak hna  kan chiah sual  maw?Khrih fa bu  le peng le followship kan dawt kan ti nak ah thla rua tlau chanh chuah manh  lo  in kan um  sual maw? Mathai 16:19 ah Jesuh nih Peter cu. Vancung pennak hun nak tawhfung cu kan pek lai I vawleicung I na hrenhmi cu vancung zong ah hrenh a si lai I vawlei cung I na awmhmi cu vancung zong ah awnh a si lai,tiah a ti .Zei kan tuah mi poah ah an kan hmu tu kan  Pathian hi tih ko u sih.Vawi lei hmanh ah zumh awk tlak in kan nun lo ah cun a tianghlin tuk mi van mi hmanh nih a thiang,atiang ,a tiang,tiah ah  an thang that peng mi  vancung um ding  ah awnh an si lai lo tiah bible bia a si.A thawh I,Zungzal nun nak hmunh awk ah pakhat te hlawng na bau.Jesuh nih mirum thlang valpa cu a herh mi thleng te kha a chimh.Na ngeih mi thil vial te kha va zuar hna.Na zuarmi tangka cu misifak kha vape hna law ,cun vancung ah chaw na ngei lai.Cu ti I na tuah hnu ah cun ra law,rak ka zul,tiah a ti.

 
Pathian nih minung hi a mah Pennak chung luh nak ding in a kan awh tik ah minung kan sining te in an ka awh.Cheu khat cu sifak,hlawh hlang,mifir,a zaw mi hna le nga tlai ,ngun khuai khawl tu ti an si cio hna.Minung an si caah pakhat le pakhat a awhhna ning an I lo cio ve loh.Jesuh nih mirum tlang val pa cu zul tu hna bu chung I luh ve awk ah a sawm.Zultu hna bu chung I luh ve awk ah cun,a hmasa bik ah a ngeih chiah,chawva le thilri vialte khan a hilh phuah a hau.Mirum pa a awh nak hi phun (2) te in zoh tuah u sih law,pakhat ah cun mirumngai ngai a si caah a ngeih mi chaw va le thil ri vial te kha a zuar dih I tang ka kha misifak pek a fial.Cun mirum pa cu uk tu pakhat a si caah toidornak a si hnga mi vai lamtah nak I put I am ah zulh kha a fial ,Jesuh nih zung zal nun nak Pathian Pennak cu co ding in a chim ,sihmahsehlaw a ruah ning kha a khup le thal a leh.Kan nih cio zong Pathian Pennak kan co khawh nak ding ah vaw lei thil nih an ka tleih rih mi a um maw.Kan thlau kho rih lo mi keimah ti lung put ,ka fim ka thiam ,ka rum ,a ruang phun phun tam pi lak ah thil pakhat te hna nih Pathian pennak chungluh ding ah donkhan tu hna kan I ngeih rih sual maw? Mathai.5:3 ah “Michan bau ka si ti aa hngalmicu lung laawmmi nan va si dah.Van cung pennak cu nan mah ta a si.” Haleluijah.. 

Thiltha tuahnak in Pathian Pennak ram luh khawh a si lo.

 
Mat19:16 nih cun “Saya zungzal nunnak coawk ah thil tha zei dah ka tuah awk a si?” tiah a hal a ti. Mah pa hal pa hi(Mat19.22) ah cun “A mah cu tlangval mirum ngai ngai a si tiah a ti .Luka18:18 ah cun “A mah cu Judah mihruai tu a si tiah a ti.Nikodemu bantuk in pumpak in Jesuh cu zan ah thli te in a fuk lo.Mizapi hmai ah langhngan te in lamka lai ah khan a khuk aa bil I Zung zal nun nak kong ah tuah ding mi a hal mi pa a si.Mirum tlang valpa nih zung zal nun nak co aduh caah a hlat hlai .Thil tining le zia za ning cang kha a ngei tak tak.A lungchung ah thla rau lei thil duh nak a um tak tak .Cucaah zung zal nun nak co awk ah zei dah tuah a herh tiah a tik ah Jesuh cu fak aa zuam hma sa I “Saya,nangmah cu mitha na si.Zungzal nun nak hmuh awk ah zei dah ka tuah lai? Tiah a hal.Mitha ti cu nemnak in fak nak bia a si.Jesuh nih cun”zeicah dah ,saya tha,na ka ti?Pathian dah ti lo cua hohmanh a tha mi an um tung lo”.Jesuh nih mirum tlangval nih hin a ka fak ti kha a hngalh I a fak nak cu a hlawt.A men…Jesuh cu Faknnak bia theih kha a duh lo.Minung hlawng hi fak a duh mi kan si.Mah rian ka tuan lio ah le Hruai tu ka si lio ah  mah thil tha ka tuah mi a si.Kei mah umhlah ning law mah rian pi hi a tlam tling hna loh’.A can ah kan si lo mi kha cu cu na si,na thiam,na hngal, naa dawh,midawh iangei na si tiah an kan fak tik ah kan I lawm I faknak cu theih kan duh chinlengmang.Jesuh cu fak a duh lo.A men………

Miphun kip le khua za kip ah Pathian Pem nak ram kauh ter kho tu si ding in Pathian rian tuan khawmh nak tha zang thar thla chuah kan  pe ko seh..Amen.

 
 Khrih ah U pat nak he,

Khin Maung Thein

March 23, 2014 Weekly Online Sermon

ZEIRUANGAH HRINTHAN A HERH

By: Pastor Hrang Kulh Lian

1.                  Minung cu a thi ding kan si.

Mi vialte cu kan sual dih cio ko i Pathian sunparnak kha kan bau dih cio ko. (Rom 3:23; Eze 18:4). Kan nih nih sualnak kan ngei lo kan ti ahcun kanmah le kanmah kan i hlen a si i kan chungah bia tak a umlo(1Jn 1:8). Cucaah nifatin kan nunnak ding caah rian tuan kan hau. Cu kan tuan mi rian cu sullam a ngei i man zong a ngei fawn. Cucaah zei thil paoh hmanh nih man an ngei dih cio. Cu bantukin sualman cu thihnak a si (Rom 6:23). Cu thihnak nih cun mi nung a kan thlei dang lo i mi zei paoh kha a kan huap dih. Cu thihnak kong kan van ruah tik paoh ah hin a thi hmasa ding mi cu zawtnak a ngei mi, mi zaw zual, le tar nu tar pa hna kan mit thlam ah kan cuan ter hna i kan mah cu i telh chih kan duh lo.  Sihmanhsehlaw cu thihnak fak bik cu taksa thihnak lawng si lo in zungzal thlarau thihnak tiang a chuhpi caah tih nung bik a si. (Gen 2:17). Cun hell chungah pum he tlarau he a that kho tu Pathian tu kha va tih u (Mtt 10:28b).

2.                  Pathian sin in kan tlau

Luke 15:1 ff, kan zoh tik ah thil tlau pathum kong kan hmuh.  Pakhatnak ah kan hmuh mi cu Tuu tlau kong a si. Kan nih cu kan dihlak in a tlau mi tuu bantukin kan si. (Isaiah 53:6a). Tuu tlau cu a Bawi pa le a hawi le sin in lam hlat nak ah a kal. Amah te lawng a si caah ai nuam ngai. Caan a hung rauh deuh i khua a hun muih tik ahcun thil dang tihnung mi a van ton i thin phang in a um caah ai chir. Asinain kir nak ding lam a thei ti lo. Cuve bantukin mi tampi sualnak chungah kan tlu, kan thi cang lai ti kan i thei ko nain sualnak chung in kan chuak kho lo i kir thannak lam zong kan hmu kho lo. Satan nih kan nunnak a uk caah a si.

 Pahnihnak cu tang ka tlau kong a si. Tang ka cu a ngei tu nih inn chungah a thlau mi a si. Sihmanhsehlaw a tlau mi tang ka nih a tlau le tlau lo ai thei lo. A tlau nain tang ka a si nak a man a zawr hlei lo. Asinain hman khawh a si ve lo. Cu bantukin mi tampi kan Khrihfabu chungah, kan phanhnak hmunkip ah kan tlau. Hman awktlak, bochan awktlak, le zumhawktlak lo tiangin kan nun a tlau ko nain, kan  tlau le tlau lo kan i thei lo. Kan khrihfa sinak men lawng a tang.

Pathumnak cu fapa tlau kong a si. Pa inn chungah le Pa duh dawtnak chungah umnak in mah te in um kha kan duh deuh. Sual chungah a nuamh khawh chungin kan vak vai i kan i nuam. Sual si a har zia le a thei par a khat zia kha kan van theih tik ahcun kan nunnak a donghnak ah a phan cang. Cucaah Pathian thluachuah he a tlau kho mi kan sinak a langhter.  Pathian he nuam tein a leng ti ding kan si nain kan sual ruangah Pathian he kan i then, cucaah Rom 1:18, “Pathian thin hunnak cu van cung in a rung lang i minung sualnak le that lonak dihlak cungah khan a rung tlung; cu an that lonak cu biatak kha langkho loin a dawntu an that lonak kha a si.”

3.                  Taksa hrin cu taksa a si.

Cucaah nu le pa nih hrinnak cu taksa hrinnak lawng a si caah, cu taksa nunnak a dih ahcun thlarau caah tih nung a si. Kan dihlak in thihnak kan hrial kho lo. Kan chuah ah kan tap i kan thih ah kan tap. Cucaah taksa nun lawng ai rinh mi paoh cu taknak in kan i thok i tahnak in kan nun a dong than. Vawlei ah nun man kan ngei lo. Minung ti mi hi cu vial lawng maw kan can tawk a si kun? Cu vial lawng kan si ding ahcun ram sa he kan i dannak a um tung ne lo.  Cucaah Joh 3:6, chungah kan hmuh mi cu; “Pumsa lei in ti ahcun mi cu a nu le a pa chungin a chuak mi a si, asinain thlarau  hrin si awk ah cun Thlarau in a chuakmi a si awk a si.” Cu bantukin taksa in voikhat lawng hrinnak cu zungzal thihnak a si. Cucaah cu a thimi thlarau cu zei hmanh a tuah kho mi a si ti lo caah, bawmtu a herh cang. Cu thlarau thihnak in a kan thawhter kho tu cu “Jesuh Khrih thiangthlarau” bawmhnak thawng lawnglawng in a nungthan mi kan si. Cucaah Eph 2:5 chung ahcun, “A nawl kan ngeih lo ruang i thlarau lei in kan thih ko lio ah khan  Khrih sinah cun a kan nun ter. Khamh nan sinak cu Pathian vel thawng in a si. Cucaah Pathian pennak chungah kan luh khawh nakhnga hrinthan/ pianthar kan herh ko. (Jn 3:3).