MANUALS 2009

HANDBOOK 2009 Health: 1. Drink plenty of water. 2. Eat breakfast like a king, lunch like a prince and dinner like a beggar. 3. Eat more foods that grow on trees and plants and eat less food that is manufactured in plants. 4. Live with the 3 E's -- Energy, Enthusiasm, and Empathy. 5. Make time to pray. 6. Play more games. 7. Read more books than you did in 2008. 8. Sit in silence for at least 10 minutes each day . 9. Sleep for 7 hours. 10. Take a 10-30 minutes' walk every day. And while you walk, smile. Personality: 11. Don't compare your life to others'. You have no idea what their journey is all about. 12. Don't have negative thoughts or things you cannot control. Instead invest your energy in the positive presen t moment. 13. Don't overdo. Keep your limits. 14. Don't take yourself so seriously. No one else does. 15. Don't waste your precious energy on gossip. 16. Dream more while you are awake. 17. Envy is a waste of time. You already have all you need. 18. Forget issues of the past. Don't remind your partner with his/her mistakes of the past. That will ruin your present happiness. 19. Life is too short to waste time hating anyone. Don't hate others. 20.. Make peace with your past so it won't spoil the present. 21. No one is in charge of your happiness except you. 22. Realize that life is a school and you are here to learn. Problems are simply part of the curriculum that ap pear and fade away like algebr a class but the lessons you ea rn will last life time. 23. Smile and laugh more. 24. You don't have to win every argument. Agree to disagree. Society: 25. Call your family often. 26. Each day give something good to others. 27. Forgive everyone for everything. 28. Spend time with people over the age of 70 & under the age of 6. 29. Try to make at least three people smile each day. 30. What other people think of you is none of your business. 31. Your job won't take care of you when you are sick. Your friends will. Stay in touch. Life: 32. Do the right thing! 33. Get rid of anything that isn't useful, beautiful or joyful. 34. GOD heals everything. 35. However good or bad a situation is, it will change. 36. No matter how you feel, get up, dress up and show up. 37. The best is yet to come. 38. When you awake alive in the morning, thank GOD for it. 39. Your Inner most is always happy. So, be happy. Last but not the least: 40. Please Forward this to everyone you care about. Have a blessed day. ------------------- Note: Mah message hi Maahliap nih 20 APR 2009 ah a thlahmi tarchin mi a si.

Mifim Bia 20

Source: Thawngpang Group Mail (on 20 APR 2009) ( 1 ) Still water runs deep - Tidai cu thuuk pi in aluang" ti nak asi. Asawh duh mi cu minung ah hin a holh tamtuk mi nak in dai tein um zir i thuuk pi in khua ruat mi khi mifim an si deuh ti asi. ( 2 ) The want of money is the source of all evils - Phaisa duhtuk hi thatlonak vialte te i ahrampi asi" ti nak asi. Asawh duh mi hi hakkauh tuk i aza ti hngal loin phaisa mit lawng au ahcun thatlonak zong in phaisa hmuhnak asi poh ahcun kal asi cang caah thatlonak thingkung i ahrampi cu phaisa duhtuk hi asi tinak khi asi. ( 3 ) A wise foe is better than a foolish pal - Mihrut hawikom ngeihnak in mifim he i ral hman atha deuh" tinak asi. Asawh duh mi cu na thanchonak ding le na hngalhthiamnak kauhter nak caah zeihmanh santlai lo i hruh lei lam lawng an pialpitu hawikom ngeihnak cun afim mi naral kha atha deuh ti asi. ( 4 ) Action speaks louder than words - Tuahnak cu chimmi nak in a aw a thang deuh" tinak asi. Asawh duhmi cu kaa lawng chim len nak incun a tuah bak tuah mi nih khan chim hau ti loin tuahnak nih khan achim viar cang ti nak khi asi. ( 5 ) It is no use crying over spilt milk. - Atlecia mi cawhnuk cung ah va tah len cu san atlai lo" tinak asi. Asawh duh mi cu a thicia mi ruak cung ah kan dawt tuk ee tiah va tah len cu san tlai ti lo tinak zong asi. ( 7 ) A bad excuse is better than none - Thiam lo bu pi in ngeihthiam hal cu hal lo nak in atha deuh" tinak asi. Minung nih kan palh kan theih ko nain ka palh ti duh lo hi kan palhnak kha kan dirpi ko ti alawh lo caah ka palh ko ti poh kha chim loin um nak cun atha deuh zungzal ko tinak asi. Greece phungthlukbia asi. Laimi nih kan chanbaucem nak te asi fawn. ( 8 ) Don't hear one and judge two - Bia kamkat lawng theih cang ka in kam hnih in biachahnak tuah colh hlah" ti asi. Asawh duh mi cu - Minung pahnih buainak kong ah pakhat chim mi lawng ngeih in an pahnih ah ahodah palh / palh lo ti ah biachahnak tuah colh phung asi lo ti asi. ( 9 ) All that glitters is not gold - A tleu mi poh sui an si lo" tinak asi. Asawh duh mi cu zeithil poh hi asimi alo nain asi lomi an um dih caah thleidan thiam ahau ti asi. Kawlholh cun: Atuh - Asit ti khi asi hnga.. ( 10 ) Among the blind the one eyed is king - Mitcaw lak ah mit pakhat tein khuahmu mi cu an lak ah siangpahrang asi" tinak asi. Aduh nak cu zeihmanh hngal lo mi zapi lak ahcun arak hngaltu te pakhat aum ahcun cu pa cu an siangpahrang tluk asi ko ti nak asi. ( 11 ) Beauty is only skin-deep - Dawhnak cu titvun caan lawng athuuk" tinak asi. Asawh duhmi cu muidawh hna i ani dawh cu an titvun cung te ah ai benh sawh sawh mi khi asi ko tinak asi. ( 12 ) Bad news travel fastest - Thawngchia hi a khualtlawn arangbik" tinak asi. Chim duh mi cu thawngpang tha nak in thawngpang thalo hi mi nih theih afawi deuh tinak asi. ( 13 ) Danger past, God forgotten - Thinphan thlalau nak adih tik ah Pathian kha philh asi" tinak asi. Asawh duh mi cu tihnak /thinphan nak / harnak um tik poh ah Pathian auh zokzok i mah tihnak le harnak in vun luat tik ah Pathian kha philh diam asi tawn tinak khi asi. ( 14 ) Eat to live and not live to eat - Na nunnak ding ah ei law ei ding lawng tu ah nung hlah" tinak si. Ei lawng rianh i tuan ve lo kha minung phung asi lo tinak asi. ( 15 ) Medicines cures the man who is fated not to die. - Athi ding asi rih lo mi pa cu sii nih adamh khawh" Tinak asi. Thihcaan achuah cang ahcun zeitluk thlopbul zong ah an thi ko tinak khi asi. Chinese phungtlukbia asi. ( 16 ) People who have little to do are excessive talkers - Aholh tamtuk mi khi rian tlawmte lawng atuan mi an si" tinak asi. Asawh duh mi cu mi holh kho tuk khi an holh nak ah an rian tu atlolh mi an tam deuh ti nak asi. ( 17 ) There is no secret that is known to three. - Minung pathum nih theih cang mi biathli cu biathli asi ti lo" tinak asi. ( 18 ) Open rebuke is better than secret love - Lungchung uam mi duhnak nak in lenglang in i sik hmanh a tha deuh" tinak asi. Asawh duh mi cu phuan ngam tung lo in mi fak pi in duh i mah pi lawng nih thideng in rak tuar len nak cun va kal i va sik len hmanh hmanh khi atha deuh ti khi asi. ( 19 ) A live dog is better than a dead lion - Anung mi uico cu athi mi chandeih nak in a tha deuh" tinak asi. ( 20 ) Speech is silver but silence is golden - Biachim hi Ngun asi i daite um hi Sui asi" tinak asi. Ka peh than te lai. Kawi Khen Kitchener, ON "The genius, wit, and spirit of a nation are discovered in its proverbs". Francis Bacon ------------ --------- --------- --------- --------- --------- --------- --------- Keimah phuahchom mi: A look that cheats, a book that teaches A hook the catch, a rook that loots A wise who search, a wick who weeps A man who feats, a dump who fails A wife who rules, a hub who loses A house that hosts, a bowl that boils A son who learns, a boy he is A turn that comes, a man he is ================= Life is like a book, everyday is new pages

Rev. Dr. Dennis Shu Maung te chungkhar thlahnak

Filippines ram ah a rak phan mi Laimi vial te (a hlei in PCCF chungtel) hna caah a herh tik caan poah ah a herhning poah in NU CAN PA CAN ah a kan dir piak zungzal tu kan nu kan pa a si mi Rev. Dr. Dennis Shu Maung te chungkhar thlahnak cu April 19 ni ah hluanghlai ngai in tuah a si. PCCF chungtel dih lak caah kan thluachuahnak le kan suttung pi a si mi nih ramdang ah a kan thial taak tak hnga ding hi cu sian an um hrim lo. Pathian tu nih an thutdirnak kip ah Laimi hna caah thluachuah chin zungzal ko hna seh. Kan nih zong nih Rev. Dr. Dennis Shu Maung le a chungkhar kan dawtnak hna langhternak ah a biacah mi "zeibantuk harnak nan ton hmanh ah a sungpe hlah uh" ti mi a bia hi philh lo in kan siangca cawnnak ah le nifa kan nunnak ah thazaang caah i lak hna uh sih law i nun pi cio hna uh sih.

Hmanthlak zong ka hin zoh khawh si.

Mittha mi hna rolung phun cu mi thinlung ah a si!

Mittha mi hna rolung phun cu mi thinlung ah a si! Nai hrawng cu ka khua ruah mi chung ah, kan nu le kan pa a si mi, Sisi Nu le pa, an I tel peng. A rauh hlan ah Australia ah an chungkhar ning in an kal cang lai ti mi thawngpang ka hawile sin in ka theih I khat lei ah, chungkhar ning in Australia ah nuamten khua an sak ding mi cu lomh a um tuk ko na in, khatlei ah an kal tak ding mi an fanau le hna kan sican dinning van ruah zawn ah nu lo ngakttahfa bang heih kan veih ne lai hi aw … tiah kai ti sek len. Cun a dang ka ruah tawn mi pawl le thinlung chung ah a cam ngai mi kong hna zong a tawi nak in ca in ka van ttial ve. Thuro Megazine nih, ( kan pa) Sisi pa interview an tuah mi Philippines ka phak hnu ah ka rak rel bal I a donghnak bik I a biacah mi kha nihin tiang ka philh kho lo. Cu a bia cu a bianing te in ka ttial kho ti lai lo ca ah kai cinken peng rih mi ning in ka van ttial hmanh lai. Cucu - Laimi pakhat le pakhat I dawt le I bomhchanh kan hauh nak; Lamttha a hmu kho tu hna nih miphun ca ah lam sial piaktu ttha kan si a herhnak; Miphun ca ah lam phittu le tthanchonak dawntu kan si lo ding mi kong pawl zong hmual ngei taktak in bia ca in a rak chim. Cucu these ram, ramcar I din ding mi ti thiang a hmu ko na in midang a chim siang lo tu bantuk kan si lonak ding kong zong he a chim I a tahchunh. Hi bia sunglawi hi, kan pa nih, a mah pumpak nunnak le inn chungkhar hrimhrim nih an tuah hmasa I an nunnak nih an langhter. Zeitluk in dah ai zuam I duhsak nak nganpi he Laimi degree sang le cathiam kan um khawhnak ding le kan fim khawhnak ding ah ai zuam ti mi le a zeizong kan herhnak ah, a kan bawm peng tu kan pa a si ti cu kan thinlung chung ah roca bang in ai ttial cang viar mi khi a si ko. Ka Pa Sisi pa hi a ral a ttha, a piatta, a punhlin tuk ti hi an chim peng. Laimi kan pa ciammam bak! Harnak le lungretheih vansannak kan ton can ah kan nu le kan pa sin ah kan ra tawn I ruahnak kan hal, bawmh zong kan hal tawn I a kan bomh, ruahnak zong a kan pek. An thladem tang ah hnangam te in kan um zungzal hna. Kan nu le kan pa a si mi, Sisi Nu le pa te chungkhar hi Laimi kan ca ah (Laimi ca lawng hmanh ah a si lo) heu le dih, tlum le ral an i siang peng. Pathian nih Abhram sin ah biakamnak a ser i a rak ti mi bia cu "You will be the blessing of others" ti mi kha a si i cu bantuk ve in Sisi nu le pa hi Laimi kan ca ah thluachuah kan hmuhnak an si ve hrimhrim. Lai mino tampi kan nunnak a tlangpi in kan zoh ahcun self esteem le self confidence te hna hi kan ngei kho lo ngai I can tampi ah miphun dang sin ah inferiority lungput kan ngei tawn. A ruang cu kan ram cozah uknak politics a tthat lo ruang ah ttih le phannak hna kan rak ngeih peng i kan thi tiang an kan hrawh; kan education le system tthat lo tuk ruang zong ah a si lai; cun kan economics dirhmun hna ruang zong ah an si ko lai. Hi nih a van langhter mi hna cu Laimi tampi tthancho kan herh tuk ti nak a si ko. Cun khat lei ah, harnak phun tampi chung hna in life struggle a tuah ve mi kan si mi hna zong nih kan nunnak hi a sunglawi ter, a haar ter ve i man a ngeih ter ngaingai ve. Kanmah kan i hmuh nak ahcun Laimi kan tthangcho tuk ti hi a si. A tthangcho zong kan tthang cho taktak ko (midang he tahtthimh awk kan va tlak rih lo hmanh ah). Kan u le chan hna, kan pa le chan sining hna an kan chimh tawn mi tuanbia he tuaktthimh ahcun tampi tthanchonak lei ah kan I thleng ve. A hlan ahcun Laimi a si mi hna nih Laimi ka si ti hi mi tampi nih an I zah pi ti a si. A tu ahcun Lai mino hna nih Laimi ka si ti cu kan i uan pi tuk cang. Cucu kan nu le kan pa le hna, miphun an dawtnak ruang ah le an I zuamnak ruang i a thei par a rak si ko. Cun kan pa Sisi pa thawng in, Laimi dihlak, Philippines ah hmai a hngal i hmailei mino hna kan ca ah thazang tampi a kan pek, lamttha a kan hmuh sak i confidence zong a kan ngeih ter. Kan nu le kan pa nih an kan kal tak cang lai.. An kal hnu cun UTS campus pi zong khi, Laimi kan ca ah tthing demduam deuh pi khin a um cang lai ti khi ka mitthlam ah a cuang. A tu, an umnak run inn hna ah khin, laimi kan neh le nang a um kho ti lai lo i neh le nang tthing hna kha nehbuar an kai cang hna lai. Cu hlan bantukin kan chumh kan chuannak kan lungthu tappi hna ah meikhu hna zungzal in a zam mi kha a tu cu ttian hram an i thok cang lai mu ka ti; Kan aw kan an, kan nih kan rak lennak thawngpang hna kha an dai cang lai. Inncar haipi kung tang I lungpherh cung tthut le hawile he duhbia phainak hmun le hma zong kha pang an kai cang hna lai mu ka ti. A sinain kan nu le kan pa a si mi, Sisi nu le pa nih kan nunnak ah chimcawk lo mi influence an kan tuah mi thilttha hna cu kan miphun le ram ca ah ceunak a phurtu le damnak a phurtu a si hrimhrim lai. Laimi phun an dawtnak, an dir kamhnak, an fa nau le an kan zohkhenhnak, duhsak piak nak, bomhnak le dawtnak hna cu an buar kho ti lai lo i a tlau kho ti lai lo. Zeicatiah mittha mi hna an rolung phun cu mi thinlung ah a si i zeitikhmanh ah an ttial cia mi tuanbia ttha kha philh khawh an si ti lo. . Upat pek bu he, Lal Awi, Baguio ================= Life is like a book, everyday is new pages

Ram chungah himnak a tlawm chin lengmang

Source: Laiforum Mail (14 April 2009) Ram chung ah himnak a tlawm chin lengmang Naite ah khan Rangoon ah a ummi ngakttah sianginn le biaknak lei college cheu khat cu Kawl Ralkap Uktu hna(KRU) nih khar ding in order an pek hna, ti asi. Cu lak ah college pakhat cu 1970 thawk in tazawin tein registration a tuah mi asi, tiin theih asi. KRU nih kanhnulei kum hra hlei nga thawk in Krifami le tlangcung mi pawl hremnak le namnehnak an rak tuah mi kha atu ah an hun tthanter  chin lengmang mi asi Kum 2008  December thawk in nihin ni tiang ah KRU nih Rangoonkhua kiangkap i a um mi biakinn  100 leng an khar cang. Pastor 50 hrawng kha pumhnak tuah khawh ti lo ding in biakamnak min an thut ter hna, ti asi.  Cu ti an tuah mi nih Rangoon ah a ummi biakinn 80% kha harnak a pek hna, tiah Christian Solidarity Worldwide (CSW) nih thawng a thanh. KRU nih cu ti a tuahnak a ruangpi pakhat cu; Nargis rili tilet ruangah harnak a tongmi hna bawmhnak ah khan Krifabu  an i tel ca-ah asi, tiah khuaruahar ngai in theih asi.    KRU nih cun Kawlram chungah Kawl miphun pakhat lawng kan um.  Ethnic nationality nan timi "taingzintaa" an um lo, tiah New York khua ah a um mi UN zungpi ah an chimh hna. Asullam cu, Chin, Kachin, Karen, Shan tbk., pawl hi mi phun dang an si lo, Kawl lawngte an si dih ko, an va ti hna.  Laimi nih "unau laihri tlai kan si," kan ti ttheu bantuk hin an nih nih "Tta u ttung sinn, ngi a ko zin kan si", tiah rul nih a meite a hngerh i, zu le va nih rawl ah an ruah i, an rak tlanh sual cangka a dolh hna bantuk khan, a aw-an aa thlum ter i, a thei lo nih i zumh sual ah dolh dih ding in setan ngian in a kan lem mi asi.  Cu kong fiang deuh in hmuh khawhnak cu atu KRU nih an suaimi constitution ah an langhter mi Kawlram puanlang(national flag) thar ah "ARFI' pakhat te lawng an cuanter mi kha asi.    Ram chungah cun Laimi bantuk "taingzintaa" timi pawl zapi kha Kawl holh holh dih ding in le Budit biak dih ding in ciammam tein timhlamhnak an ngei i, cu rul policy cu biatak tein an lo hma can ah an kalter.   Mah kha, Kawlram ah Krifa biaknak hloh i, Budit biakter dih hnu ah Laimi sinak hloh i,  Vaimi siter dih ding in an timh mi cu asi.  Mah kha "Ethnic Cleansing" kan ti tawn mi le "Burmanization" an tuah ee, kan ti tawn mi hna kha an si. Phun dang in chim ahcun KRU cu Laimi cungah "RUL POLICY" a ngei, tinak asi ko.    Laimi cu Budit biami ram ah Krifa kan si i, a hlum tein kan um ca-ah kan Krifa sinak hi kan miphun theihtlei identity ah aa cang.  Kan Laimi sinak le kan Krifa sinak cu tthen khawh lo tiang in aa tlaih-tthup i, fek tein aa sengh tikah Laimi(Chin) vun ti le cangka Krifa asi lai, tiah ruah asi colh bantuk in Kawlram mi ka si, Krifa ka si, vun ti le cangka Laimi asi lai, tiah ruah colh asi.  Cu tikah kan Krifa sinak hloh cu kan Laimi(Chin) sinak ci hloh kha asi ko.   Kum hmasa deuh ah khan kawlrawn ah a um mi fanau le pawl sianginn an up tik hna ah, an Lai min, Tluang Khar, Thla Hre, Hram Uk, timi pawl kha Kawl min ah thleng dih uh, tiah hranhram in an fial hna.  Kha ngakchia Lai fanau le pawl kha an hun upat tik ahcun an Laimin tete kha an philh lai, asiloah zei ah an rel ti lai lo.  An min hram ah "Salai" asiloah "Mai" tete an chiah lo ahcun a dongnak ah cun an miphun Laimi(Chin) sinak zong kha a lo te lai. "Nga Chin ma hoh, a phe Chin phit de," aa timi cazin ah khulrang ngai in an lut te lai.   A cunglei kan chimmi "Rul Policy" kha atu ah KRU cu tazawin cozah an si lo ca-ah thli thup  deuh in an tuah cuahmah ko nain a theimi mit chung ah cun fiang put in a lang ko. Zoh u law, Rungtlang ah vailam tung bunh mi phoih riangmang i, cuka hmun ah phungki lukawng dir ter cu, kan in tei hna, kan in uk hna, kan ke tang ah nan um, hei ti kha asi ko.  Cu cu hlan lio Kawl siangpahrang nih Shan te hna, Mon te hna Rakhaing te hna an rak tuk i, an tei hna tikah tlangbo cungah puanlang tar i, kan tei cang, kan uk cang hna tinak langhternak can ah budit pura an rak sak tawn bantuk kha asi.    KRU lutlai Tang Suai cu a mah le a mah siangpahrang ah aa ser i, hlan lio siangpahrang nih ram a rak ukning sattal in ram uk a duh.  Nepyidaw ah Anawratha, Bazinh naung, Alawng paya, hei ti bantuk hlan Kawl siangpahrang panga hna milem kha sang pipi in a sak hna i, a tar hna kha nan hmuh lai. Bogyoke Aung San bantuk ram a sersiam mi hruaitu hna kha cu hloh khawh aa zuam lai.  Atu ah Kawl tangka caku cung ah saram zuk lawng a cuan kha nan hmuh lai.  2010 kum thimnak kha hranhram in a nam chih te lai i, a dih tik ah cun atu ah  firkhut in a tuah mi pawl hi tazawin in langhngan in a tuah te lai.  A ka nih cun 'democracy' a chim lai.  A taktak  democracy kong a chimmi  hna kha cu a tlaih hna lai i, kum 45 tiang thong a thlak hna lai.  Federal kong a chimmi cu kum 90 leng thong a thlak hna lai.  Cu bantuk in kan hmaika ah thil tampi a tuah kan hmuh ko bu ah zeitiin dah kan zumh khawh ti hna lai. A zeiti hmanh in zumh khawh ding an si lo.    KRU nih 2010 ah thimnak kan tuah lai, an timi hi mah "rul policy" bak cu asi.  An firkhutnak vialte kha tazawin ah an canter lai i,  mifir nih tazawin in ram uk khawhnak lam an sialmi tu asi kha ramchung ramleng khuaza kip ah a ummi Chin miphunpi nih kan theih dih ding ah ka hun phuan mi asi.  Ramleng rian ttuanmi hna nih ram chungah kan kuat mi hnik khat tete hi KRU caah cun an nunnak ca ah thazaang si asi ve.    Cuca-ah ramleng rian ttuan mi hna nih khuazing Pathian nih an zaangfah i, an pekmi Bawipa thluachuah sunglawi asimi nan tangka ngeih mi hnik khat tete kha KRU bank ah chiah ding ah cun fak piin iruat hmasa nan hau lai.  Ziah tiah KRU cu setan ngian a ngei.  Setan rul cu dolh a hmang.  A pelte hmanh zumh awk tlak asi bal lo.   Salai Vantu

EASTER SUNDAY SERMON by Vawkuu

Kan Bawipa Jesuh nih a kan phorhmi Thawngttha Text: Marka 16:1-8 “Sabbath ni kha a dih tikah Mary Magdalin le Jeim nu Mary le Salom nih khan Jesuh ruak thuh awk caah cun zihmui kha an i cawk. Zarhpi Ni zingkate, nichuah kate ah khin, thlan ahcun an va kal. Lam ah cun pakhat le pakhat kha. “Thlan khar lung kha ahodah a kan thawnpiak te lai” tiah an iceih. (Akhar cu lung nganpi a si). Cun an hun zoh i lung kha a rak i thawn cang. Cu caah thlan chungah cun an lut i puan rang aa aih i orhlei kam i a rak thumi tlangval pakhat an hmuh i an lau ngaingai. Cu pa nih cun, “Nan thin phang hlah u. Vailam ah an tahmi Jesuh, Nazareth khua mi kha nan kawl ti kha ka hngalh. Sihmanhsehlaw hika ah hin a um ti lo- a tho cang! An vuinak hmun hi zoh hmanh u…………” Dawtmi Unau hna, kan phanh bal rih lo mi nihin ni zingceudawh nih nang le kei caah thawngttha pakhat a rak kan phorhmi cu; 'Kan Bawipa Jesuh Krih cu thihnak in a tho than cang!' ti hi a si. Thihnak teitu kan Bawipa Jesuh Krih min thangthat si ko seh! Vawlei cung ah biaknak tampi he zumhmi phunphun an um cio. A sinain cu an biakmi pathian hna cu thihnak teitu Pathian an si lo. Kan Bawipa Jesuh cu zultu hna sin le kan sinah bia akan kamh bantuk in nithum hnu ah a tho than! Kan Bawipa Thawhthannak cu kan caah a sunglawi tuk hringhran i, sullam angei taktak. Zeitiahcun Paul nih I Corin 15:17-18 ah a kan ti bantuk in, kan Krihfa sinak le kan zumhnak hi Bawipa Jeush thawhthannak nih sullam a ngeihter caah a si. “17 Cun Khrih cu thawhter a si lo ahcun, nan zumhnak cu hlennak men a si hnga i nan sualnak chung i nan tlau ko rih a si hnga. 18 Cuhleiah Khrih a zummi a thi cangmi zong kha an lo tlau dih ti a si fawn hnga” Cu caah tuzing caan ah kan Bawipa Jesuh thawhthannak nih Thawngtha (Goodnews) akan phorhmi hna lakah pathum hi ihrawmtti kan duh hna. Nunnak thar Jesuh thawhthannak (Resurrection) ti cu “thih hnu nunnak ngeih” ti khi a si ko. Tu Vawlei cung pumpaluk in kan zohtik ah, Easter Sunday timi biafang nak in Resurrection Sunday ti hi mikip nih an hman duh deuh ngai cang. A sullam cu an va ikhat ko hna nain Resurrection Sunday ti hi ka uar deuh ve. Hi nih a langhter mi cu nang le kei zong Jesuh chungah kan um i, Jesuh zong nih kan chungah a nun ve ahcun kan thih hnu zongah nunnak thar pek kan si lai ti hi a si. Cu ruangah Pathian fa a si i, Amah a zum mi poah cu thih hnu nunnak kan ngei dih ve, a thicia mi zong siseh, a thi rih lo mi zong kan dihlak caah nunnak thar petu Bawi a si. A thihnak ah kan thi ve, a thawhthannak ah thawhter than kan si i Amah nunnak thar kan ihrawm ve. Cu caah Jesuh thawhthannak nih a kan fianter mi cu vawlei cung ahhin voikhat cu kan thi ve dih cio ko hna lai i, a thawhthan bantuk in thawhter than kan si dih ve te lai. Cun Jesuh he zungzal nunnak kan ihrawm than te lai khi a si. Cu cu nang le kei caah Thawhthannak (Resurrection) sullam cu a si. Thawngtha sungluai tukmi a si. Pathian min thangthat si ko seh! Ruahchannak thar Kan Bawi Jesuh a rak thih lio ahkhan azultu hna le a nu Mary le innchungkhar hna cu ngaihchia lungkuai in an rak um. Sihmanhsehlaw cu tin an ngaih a rak chiat tuk lio caan, ruahchanhnak zeihmanh an rak ngeih ti lo lio ah khan, a thawhthan nak nih lunglawmhnak, le ruahchanhnak a vun pek than hna. Dawtmi u le nau hna, nifa kan nunnak ah ngaihchiatnak phunphun, beidonghnak, lungdonghnak le harnak phunphun kan tong cio ko hna lai, sihmanhsehlaw nang le kei ruahchanhnak pek awk ah nihin ni zingah kan Bawipa Jesuh a tho than cang! Ngaihchiami hnemh awk ah le, lungdongmi hna ruahchannak pek awk ah, nihin Amah a zummi kan pumpak cio ah a nung than cang. Na zumh ahcun na chungah a nung i, na caah ruahchannak le hnangam daihnak petu Bawi a si. Jesuh thihnak in a thawh hnuah Zarhpi ni zingkate ahkhan Mary Magdalin sin ahkhan a lang hmasat bik (Marka 16:9), Mary nihcun a hawi le kha a chimh hna. Nihin ah kan pawngkam ummi kan hawidawt hna zong hi thawngtha hi hrawm ve hna u sih. Beidong mi hna le lungreithei ngaihchia mi hna zong hnem hna uhsih, bawm hna uhsih, dirkamh hna uhsih. Thazang pe hna uhsih. A nungmi, adikmi ruahchanhnak le thih hnu nunnak (life after death) a ngeimi kan sinak hngalhter ve hna u sih. Lungrualnak thar Cun kan Bawipa Thawhthannak nih a kan phorhmi cu ruahchanhnak lawng si lo in lungrualnak le idawtnak zong akan phorh chih. Mary le a hawile pawl, le a zultu pawl hna nih hi thawngtha an theih lio ahkhan, pakhat le pakhat cungah an lung aa lawm i, lungrual tein mikip sinah hi thawngtha hi an rak aupi ti kan hmuh. Cucaah u le nau hna, Pathian a zultu le a zumtu kan si bantuk in, kan umnak cio te ah lungrualnak he pakhat le pakhat cungah dawtnak ngeih hi nihin ni zing ah Jesuh thawhthannak nih a kan hmuhsak mi a si. Cu cu Krih a fa sinak aa hngatchannak pakhat zong a si. Lungrualnak (Unity) ngeih hi Pathian fa kan sinak tehte pakhat a si i, Krih ah pumkhat kan sinak tehte zong a si (Eph 4:4). Cun teinak le hlawhtlinnak hrampi pakhat zong a si chih. WCC an motto tlangtar ah doctrine divide, Service Unite an ti bantuk in kan biaknak background le kan chuahkehnak hna ai dan cio ko zongah Jesuh ah pakhat kan sinak, lungrualnak le dawtnak he tuanti, tangti, thangthat ti hna usih. Kan nunnak ahhin Krih ah pumpkhat kan sinak lungrualnak hi kan upat i sullam kan ngeihter si ahcun kan cawnnak le kan tuanhawlnak ah hlawhtlinnak kan hmuh zungzal ko lai. Pathian sunparnak a lang zungzal ko lai. Nihin nithar ah kan Bawipa Jesuh thawhthannak nih akan phorhmi thawngtha pathum; Nunnak thar, ruahchanhnak le Lungrualnak thluachuah cu kan dihlak cungah hmun caamcim hram ko seh. Nan Unau, VawKuu PS: Mah sermon hi 12 APR 2009 Easter Sunday ah chimmi a si. ================= Life is like a book, everyday is new pages

LAWMHNAK MITTHLI LENHOI

Soure: Metkhuabo Group Mail on 10 April 2009 [Lanhtak Puai thengte ah Bawipa Jesuh a thihnak le Lomhnak Mitthli kong Sermon ttha ngai a si]   "Lomhnak Mithli Lenhoi"   Cawn nili ni zingka fingrei a cah hlan. Hi ni cu tlakrawh sermi liim ding asi caah tuan ah rian ot ding a si. Judah cu tuan ah ka tho lai a ti nain, a thawh hlan ah a innpa hna kio le rak thawng nih a hun thangh. Tual ah a chuak i a hna a tun cu, "Maw ka fapa, na nun a tawi tuk ee, a kan cawmtu ding fa upa bik na si hi na thei lo maw?.... " ti'n a nu a ttap len ko. Alu ai khun i, "An fapa upabik pei a thi hi" tiah a lung chung tein a chim. Cu hnu ah inn dangdang zong in ttah thawng cu a hun theih chin lengmang. Chungkhar tampi in an fa upabik cio an thihnak nih a thinlungah mei bang in a hun kangh...   Inn chungah a lut zokzok i, a fapa upabik Silas, a it ko mi cu a thi maw a nung ti hngalh duh ah a thintur a va tongh. A fapa Silas cu ai tthang i, "Ka pa ziahdah na ka tongh?" a hun ti. Apa nih zei bia chim loin a kaltak. Judah cu a nupi Ruth sinah a va kal. Judah le Ruth nih cun a sullam an hngalh cang caah, cu bantuk ttahhram thawng lak ahcun holh lo ring loin hmaitonh in an i kup. Judah nih din tein a chimmi bia cu, "Jaweih min thangthat si ko seh" a ti i a nupi Ruth nih din tein "Amen" a hun ti piak. An mitthli haimi cu an i hnawh piak veve.   Terual ngai si hna kaw, an fa le cu pakhat hnu pakhat an hong tho. Hngakchia bik nute, holh tam ngaimi Melodi nih bia a hun hal hna.   Melodi:  "Nunu ziah dah hiti mi an ttah zeidah a cang hnga?". Anu nih a pheicungah a hun pom i anu cu fawi le bai ah a holh kho lo, a mitthli cu a fanu biang ah a hong tla.   Melodi: "Nunu ziah na ttah ve?".  Anu nih a lu a thin i, a fanu biang cung mitthli te cu a hun hnawh. Cu hnu ah din tein a hna kam te ah a chimmi cu,   Ruth: "An fa upa bik poah kha vancungmi nih an thah hna".   Melodi: "Nunu, vancungmi cu an va sual ve, ziah ka u Silas hi an thah ve ne lo?". Anu nih a let kho ti lo. A fa upabik cu a hei zoh i alung chung in na naunu hi ngaithiam ko ti'n a mit a hei ttheh.   Judah: "Nan zapi tein mileng khan ah ra u law thla kan cam hna lai" ti'n mileng khan lei ah a kalpi hna. An fanu hniang Melodi cu holh ai tiim nain, a pa nih a kut in a hmur a phihkanh caah a dai tthan.   Judah: "Nizan i sa kan thah mi kha a sullam a tling cang. Kan pu Moses sinah Jaweih Pathian nih a fialmi a si. Sathi kha innka ba ah neh u, a kan ti caah kan nehnak kha a si. Zan lai ah vancungmi an ra i, innka ah sathi ai neh mi inn poah an lanhtak hna. Sathi ai neh lomi inn chungah an lut i, an fa upabik kha an thah hna". Thaba ngai in a hun i din i, a cil a hun dolh. Bia ka peh lai a ti lio ah a fanu Melodi cu inn lengah a va chuak ta duak i, an innka ba cu cho zoh in a hei zoh. Nizan ah apa nih sathi a nehmi a hmuh hnu ah a rak lut tthan.   Melodi: "Papa sathi nehmi inn poah i vancungmi an luh ve lo cu zei sullam dah a si hnga?". Cu biahalnak cu fawi le bai ah an let kho lo. Lanhtak Ni (Passover) sullam tu nih cu Melodi biahalnak cu a fianter. Thla an cam. Thla an cam lio ah an chungkhar dihlak in an i lomhnak mitthli an biang ah a luang. An nu le an pa cu an thlacam bia hmanh an khek kho lo, an ttahnak ah. Thlacam a dih cun Melodi hmanh cu a mitthli a hai ve. An upa bik Silas ko a thlacam thawng a than hlei ah a ttah thawng zong a thang bik. An innka ba ah sathi rak neh hna hlah sehlaw a hei thi ve ko hnga ti a ruah ah a celh in a celh lo.   Khua ahung ceu chin lengmang. Zumlotu Izip chungkhar kip ah ruak pakhat cio an ngei. Ruak hmanh ah fa upa bik, minchawngtu an si hna. Thisen ai nehmi Isarel chungkhar tu cu chung tling tein Bawipa Pathian an thangthat.   Cu ni, an luat ni cu "Lanhtak Ni (Passover)" ai thok ni a si.  Jaweih Pathian nih, "Hi Lanhtak ni hi nan techin fapar tiang na ulh zungzal lai" a ti hna. Isarel mi nih atu tiang hin Jerusalem khualipi ah an ulh zungzal.   Bawi Jesuh le a zultu zong cu Lanhtak puai zawh ding ah Jerusalem ah an kal ve. Jesuh cu an rak tlaih i a sual bia an ceih. A sualnak pakhat hmanh an hmu lo. Pilot nih, "Fung in tu u law, nan Lanhtak puai poah ah misual pakhat thlah a si tawn bantuk in ka thlah tthan lai" a ti hna.   Mipi nih, "Lainawng Barabas tu kha thlah law, Jesuh tu hi vailam ah khenh si ko seh" ti'n awreng chuak in an au. Pilot nih zei a chim ngam ti lo. An kut ah a pek hna. An tuk, an vuak, cil an chak, hnu ah vailamtung an put ter i Kalvary tlang ah an khenhchih. Lanhtak ni le caan theng te ah Jesuh a thih hi Pathian nih a ruahcia mi le a khan cia mi a rak si. Nangmah le keimah kan luatnak hnga ca dingah a si. Hi dawtnak thisen luangmi nih hin na thinlung chungah mei bang an kangh ve cang maw?   Lanhtak lio ah Jesuh a thi, misual Barabas a luat. Lanhtak lio ah Innka thisen nehmi an luat, ai neh lomi fa upa an thi.   Melodi te chungkhar, thisen thawng in Lanhtak ni ah an luat caah "Lomhnak Mitthli" a luang. Jesuh nih hell mei tili in kan luatnak hnga a thisen a thlet. Cu thisen ai nehmi (zummi) poah cu an luat lai... Luatnak Jubilee darklhing cu tum a si cang. An tum tthan ti lai lo. Zungzal ca in an tum cang. Hla nih, "Maw khuaruahhar tiva a luang a kan Khamhbawi chung in, van phak khawh tiang ka hla ttha cu thisen thletmi a si" a ti.   Nihin Lanhtak ni sunglawi ah hin a ttapmi chungkhar maw na si, lomhnak mitthli a luangmi chungkhar dah?   Pu Mang Cung Nung   ================= Life is like a book, everyday is new pages

PCCF EC Visiting

April 8 zan in 10 ni zing tiang caan pek in PCCF hruaitu upa (6) nih Baguio i a um mi PCCF member pawl sin ah an va tlawn hna. Hi caan chung ah Baguio i a um mi PCCF member pawl he i hawikomhnak le thazaang peknak hna zong ngeih a si. Cun Baguio i a um mi PCCF member pawl nih Baguio khua i a dawhnak le a nuamnak hmun hna zong ah an kal pi hna i an i nuam khun hna. Tian zan cu i sian lo bu te in le i hawikomhnak cim lo te in tian a si.
Hmanthlak zoh le download a duh mi caah hika hin hmeh i luh khawh a si.

Biazai

By Robert Cung Cinzah

HAWI DAWT

Khuptthirual he len cim lo in
Va bang tlengkhat lungthin khat in
tlang kan liam tawn ho van hai lo
tthennak phan maw cu ka thin cu
naichailo tin chuah laang ka tha
zei tha hnemlo tlanghra dan hnu

Cerlian ni bang liam tuan ai ee
maw kan caanttha mit tthep kar ah
La bang zeel laang ti awk ttha hlah
liam cia caan hna ai ze ka thin
rua bang tuai tthan um te hnga maw
ti lawng kai nawl ttuan zuam lo in....

SUTTUNG BANG DIR PCCF

Na kum rup lo Na thawng lei hluan
Hoi len hna seh cuailo par bang
ceihphai hna maw na chuah zawn ah
naichailo tin chuncha bang dir
miphun vialte catiang hluan in
Na thawng hal hi ka dai lai lo....

Kan biak Zingnu hal hna u sih
lungthin khat le dawtnak fek he
kan ruah ramttha kan phak hlan tiang
ralttha lungrual kaamlo chuncha
suttung bang dir P. C. C. F
ram le miphun ca zungzal in....!

Atulio Kawlram lei Thawngpang tete

Source: Laiforum Mail (7 April 2009)

Dear, Ramkip um laihri tlai hna,

Kan kawlram lei thawngpang te te theih nan rak duh cio ttheu lai.

1. Kan lai hla sak thiam pawl an man hna

(a) Lai hla phuah thiam le hlasa thiam mi kan nau Samuel HratHmung cu April, 2009 zarhkhatnak ah ( Fantthen khua nu ) he tthitumhnak puai an tuah ti thawng kan theih.

(b) A tu lio i , lai hla sak ah a laar ngai mi Nungak Bilsung cu , March 2009 thok khan nungak a si ti lo, Nutung a si cang. A pasal hi Yangon i a um mi Pu.LalHmung a si. kan lawmh pi hna.

(c) Kan lai tlang lawng si lo in kawlram chung huap in a min a thang mi hla sak thiam LengSungTinPar zong a rauh hlan ah , Va a ngei cang lai ti thawng kan theih. A pasal ding hi, Pu VaiSe le Pi MahKhin an fapa u pa bik ( a min ??) a si i , Japan ram ah engineer a kai lio mi a si. April. 09 a zarhkhat ah khan kap hnih nu le pa nih hna tlak pi nak zong an ngei cang ti thawng kan theih.

2. A tu lio thil man pawl

A tu lio kawl ram ah thil man a mah ning ti awk an si.

-Datsi Gallan 1= FEC 2.50 Ks- 3000/ Dizel gallan 1= FEC 2.30 ks- 2300 an si.
- GSM mobile man cu ting 17 in 20 kar hrawng a si.
- Motor man an tla ngai te nikum 2008 lio i ting 500 hrawng a si mi Suzuki wagon R cu a tu ah ting 320 hrawng lawng a si, 2008 lio i, ting 120 a phan mi Nissan sunny cu, a tu ah ting 60-70 kar lawng a si. a dang motor phun pawl zong a man an tla dih hna.
-

Motor cit man
a. Yangon- mandalay Ks- 10400- 9000 kar
b. Mandalay- hakha ks- 16000/-
c. Mandalay- kalay ks- 8000- 10000 kar.
d. Kalay- hakha ks- 6000- 7000 kar
e. Kalay - tio ks- 8000- 12000 kar an si hna.

-Yangon khua chung taxi man an tla ngai.. Sule in N. dagan ks 3000 hrawng a si. khuachung lam neih nak te te cu ks- 1000/- in kal khawh a si.
- Yangon khua chung taxi an chia ngai hna ( aircon ) ai tel mi an um ti lo. a tam deuh cu CNG ti mi ( Gas) in mawngh mi deuh hi an si hna.
- 2008 kum ah Nagis thlichia nih kawlram thlang lei a deng ruang ahkhan Yangon khua zong fak ngai in a den ve. Yangon khuachung ah thingkung tamtuk a thluk caah, tukum thal ah Yangon khua cu kumdang nak in a lin khun.

Rawl ei man
Yangon le mandalay kar motor ai dinhnak ah rawl ei ( sa phun 2 le vegetable phun 1 ) ah ks-2000/ saphun 1/ veg phun 1 a si ah cun ks-1500 a si. Mandalay le hakha kar cu ks-2000 in ks-2500 kar an si i, Tio le kalay kar tu cu ks-2500 a si.

Adangdang thil man pawl

a. facang bag 1 ah ks-12000 - 24500 kar an si . ( a phun a tam ngai hna)
b. Chiti cuai 1 ah ks- 3000-2500 kar a si.
c. Ngasa cuai 1 ah ks- 2500- 6000 kar an si..
d, Voksa cuai 1 ah ks- 3000- 6000 kar
e, arsa cuai 1 ah ks- 5500-6500 kar
f. arti /cawmpei ti pum 1 - ks-90 in 100 kar
g.Lakphak ti hrai 1 ks- 200/-
h. beer hrai 1 ks- 500/-
i. thingthei hang pawl ks- 400/-

3. Summer Camp

Kawlram ah April 13 in 18 kar hi yelawngpuai a si caah, zung kip le sianginn kip zong an khar cio hna lai, hi lio caan ah kan nau le kan fa le pawl an vaivun sual lai ti in khua kip um kan nu le kan pa le pawl khua khan nak in khua kip ah an mah le si khawh ning cio in camping le training tuah ding in an i tim lam cio hna, Yangon le mandalay um lai mi tam nawn zong lai tlang lei ah chungkhat tlawn ding in an va tlung ta cio hna, Tu kum Mandalay le Yangon kan lai mino pawl cu ( TanTaungkyi ) khua pawng ah summer camp ngeih ding in timhtuahnak an ngei ti thawng kan theih.

A cung lei thil man le thawng pang te te pawl hi Yangon le Mandalay khua 2 thil man deuh an si.

Kai lawm.

Thangzalian
Mandalay.