(May 29, 2011) PCCF Weekly Online Sermon

Thawngttha Chimtu

Pastor Thawng Hei

Thlacam le Rian

(Pathian sin ah thlacam u sih law, kan tuan ding mi rian zong kha i lim ve hna u sih)

Jn. 6: 5-15; Matt. 14:13-21; Mk. 6:31-44; Luk.9

Pathian cu a min thangthat in um ko seh! Amah dawtnak le zaangfahnak ruangah hi caantha hi ka hmuhnak le ka hman khawhnak a si. Bawipa nih ahman mihna PCCF upa vialte cung zongah thlachuah tling phan hram ko seh. Members vialte zong ngaihthiamnak hal kan duh hna. Relationship gap a um ruang ah ka sermon thlah mi a vun tlai deuhnak a si. Bawipa nih thlachuah kan pe cio hram ko seh.

Tutan thawngtha caah ka thim mi Bible cacang cu: Jn.6:6-15 hi a si lai.

Hi kan I thim mi Bible chung ah kan hmuh khawh mi cu Jesuh nih nga pahnih le changreu panga in minung thongnga rawl a danghnak hna kong te hi a si ko. Hi tuanbia he peh tlaih in Matt. 14: 13-21; Mk. 6:31-44: Mk. 9 chung zong ah kan hmuh khawh mi a si.

Kan I thim mi Bible chung ah vun lut hna u sih! Jesuh cu minung tampi nih rawltam le thihal philh tiang an zulh cuahmah ko nain, kan Bawipa nih cun an takpum (physical) nih rawl a hlam kha tha tein a hmuh piak hna caah Philip kha a hal “Hi hna caah changreu khoika dah kan cawk lai?” Bawipa nih mah hna pawl caah zeitindah kan tuah lai ti kha a theih ko nain, Philip kha testnak caah a hal hrim. Philip nih a si khawhtawk bak in a vun ruah ve I a leh mi cu “thlariat chung kan riantuan mi hmanh nih an ei ding mi cu zalak in a caw kho lai lo” a ti. (Jn.6:9, NIV) Tuah khawhnak lam le thilsining cu a theih ko nain zeihmanh a tuah kho ve lo.

Peter a naupa Andrew nih a vun leh ve mi cu “Bawipa hi ka ah hin chang panga le nga pahnih a keng mi pa te a um ko” a ti. A sinain a peh rih mi cu “mah te nih cun minung hi zah caah cun zeitin dah a zat lai” a ti. Jesuh nih mah nga pahnih le chang panga hi za lak in a karhterkhawh ti a zum bak lo, a theih zong a thei fon lo. Andrew nih mah thinlung te cun mah nga pahnih le chang panga cu Jesuh a pek.

Jesuh nih cu nga pahnih le chang panga te cu a lak I, lomhnakbia chim bu in thla a cam. Mah thla a cam tiang ah khan mah nga pahnih le chang panga kha a mah ning te an si rih ko. Jesuh nih a zul tu hna kha phaw hna uh tiah a fial hna. A foi lo ngai mi a si. A zultu pawl nih nga pahnih le chang panga te a si kha an mit nih a hmuh I, an thinlung nih a theih. Mah bak kha minung thongnga phawt ding cu rian har (challenging) tak tak a si. (Hruh ngai lo ah cun mu) A si nain a zultu pawl nih cun zumhnak bak in an phawt hna tik ah khuaruahar thil tak tak ah a rak cang. Minung thongnga nih khim tein an ei pin ah, a sai bak in sai hleihnih bak a hlei rih tiah Bible ah a tial.

Jesuh nih a mah rian te kha a tuan. Thla a cam I a phawt ter hna. Zultu pawl zong nih an rian te an tuan ve. Zumhnak in an phawt ve hna. Hi tuanbia chung ah thazang kan I lak khawh ding mi thil pali a um. (keimah hmuhkhawh tawk ah)

Pakhatnak, minnung I khuaruahnak le tuahtankhawhnak cu ri (limit) a ngei mi a si. Minung cu Pathian nih sermi kan si. Pathian cu Sertu, minung cu sermi a si. Thil zeimawzat ah cun Philip bantuk in thil sining le a tuah dan kan theih ko lai nain, a phi ngai ngai kan chuak kho ton lo mi thil tampi a um. A ruang cu minung hi ri a ngei mi kan rak si caah a si.

Pahnihnak, Minung nih Pathian kan herh. Amah hi kan zumh, kan i bochan a herh. Amah sin ah zumhnak in thla kan cam a herh. Kan vision le saduhthahnak vialte hi Amah kan chimh or ap a hau. Anderew bantuk in kan ngeih mi zong, cun kan ngeih rih lo mi le kan saduhthah mi vialte zong Bawipa sin ah kan chimh le ap a hau ko. (Prov.3:5)

Pathumnak, Pathian nih kan ngeihchun te hmang in thil liangan pi a tuah khawh. Mihrut nu/pa te nih a ngeih mi thil te hmang in khuaruahhar thil a tuah kho tu Pathian a si. Na ngeih mi vial te kha zumhnak in pe hmasa ve law, mah cung ah khan thil lianngan pi ah a ser ko lai. Hngakchia pa te nga pahnih le chang panga in minung thongnga khim tein a cawmkho tu Pathian a si.

Palinak, Bawipa nih nangmah/keimah nih tuanding/limding mi rian te kha a kan pek ve.Kanmah lei kap in kan ngeih mi rian te kha kan tuan ve le kan i lim ve kha a hau. Cu lawng ah cun teinak tak tak cu kan caah a si lai. Zultu hna nih zumhnak in nga pahnih le chang panga an phawtzam ve bantuk in, tuanding kan ngeih mi cu kan tuan bak ve a hau hrim ko. Cu zawn te ah cun minung nih izuamnak le teimaknak kan herhnak cu a si.

Minung nih Pathian dawt, upat, tihzah, zumh le bochan kan herh tuk ti mi cu kan i thim mi bible nih a kan cawnpiak. A si nain, minung lei kap in kan i pumpeknak, zuamnak, teimak, tuaknak cu kan herhbak mi thil a si ti zong a kan cawnpiak fon. Kan Bible nih thil pahnih fiang tein a kan cawnpiak. Tuni kan sianginnkainak le hmailei Pathian rian kan tuannak ah:

1. Pathian kan dawt a hau. Cu thil cu Jesuh nih a kan cawnpiak mi nawlbia vialte lak ah a ngan bik mi nawlbia a si. (Matt.22:37; Ps.37:3-4)

2. Na tuanding rian te kha na lim a hau ve. Mah rian hi keimah nih ka tuan awk a si tiah na theih mi te kha zuamnak thinlung tak he na tuan ve le na lim ve kha a hau mi a si. Cu nih thathut lo ding a kan fial.

James cauk nih zumhnak le rian cu an kal ti awk a si tiah a kan chimh. Zumhnak cu rian ah a langh a hau. PCCF members vialte kannih zong, Pathian kan zumhnak cu kan sianginnkainak le kan riantuanak ah kan langhter ve awk hrim a si. Pathian zeitluk in dah kan dawt ti cu zuamnak le teimaknak he kan cawn mi kan ca le kan tuan mi kan rian ah kan langhter hrim awk a si. Kan thlacamnak le kan riantuanak nak hi a kal ti awk hrim a si. Thla zong kan cam ve lai, cun kan rian zong kha kan tuan ve hna lai! Teinak cu kanmah tha a si ko lai!

Bawipa nih thlachuah kan pek piak hram ko seh!

Nan Unau

Thawng Hei

AGST

Manila, Philippines

May 22, 2011 PCCF Weekly Online Sermon

Thawngttha Chimtu: Pastor Uk Ceu

Text : I Peter 5:6-8

“cucaah cun a tthawngmi Pathian kut toiah toidor tein khuasa u law amah nih a caan a rem a ti tikah an hlorh te ko hna lai.7 Amah nih an zohkhenh hna caah nan lungretheihnak vialte kha amah cungah chia dih ko u. 8 Fimhring tein um u, ralring tein um u! Nan ral Khuachia cu, she awk kawl ah, chiandeih bang in a vak cuahmah ko”.

Biahmaitthi

Athawngttha bia chim kho ding in caanttha an kan petu kan Pathian amin thiang thangtthat in um koseh. Nan umnak hmun cio in nan dam lio asi ko hna lo maw? Nan zate alang lo thlangdang le ram dang in nan kut kan tleih hmasa hna. Bawipa kan Pathian nih thluachuah in pe cio hram ko hna seh ti ka thlacamnak asi. Cathiang chungah kan lut hna lai.

A pkhatnak ah verse 6 zoh tuah uh sih law.

“Cucaahcun a tthawng mi Pathian tuk toiah toidor tein khua sa u law amah nih a caan a rem a ti tik ah an hlorh te ko hna lai”.

Toidor nun hi a har ngai mi a si a sinain kan bible nih le toidornak cu teinak hram pi a si a ti fawn Filipi 2:6-8 tiang kan zoh ahcun Pathian si nak kha za ah za a ngeih ko nain cu vialte cu a mah lungtho tein a hlawt I minung ah a hung cang I mi toiah aa dor I nawl ngeihnak lam kha thih tiangin a zulh ti kan hmuh kan bawipa Jesus teinak ngan pi a lak nak cu toidor nak in vailam cung I a thihnak ah khan a si. Kan nih ve zong kan ni toidor ah cun tei tu kan si ve ko lai.

Joseph nunnak kan theih dih mi asi ko sual an puh a sual lo nain tong an thlak aa in ko I a donghnak ahcun Egypt ram chung I bawi nganpi ah a cang kan kawl hloh incun onekyi a si kan ti lai cu. Mi tampi nih kan ni pal tawn mi cu mi teirul va cham khawh khi tei ah kan ruah tawn kan palh dimdiam mi asi. Mi pakhat khat he nan ni sik asi lo le bia hna nan el I toidor tein aa kei mah ka palh ti I na va nawl ahcun na tei bak a si nain puarthau ngai in kan ti khawh rua na timi khi na sungh bak asi cucaahcun toidor nak in teinak la hna uhsih ti sawm kan duh hna.

Cun a pahnihnak ah verse 7 kan vun zoh tuah lai.

“Amah nih an zohkhenh hna caah nan lungretheihnak vialte kha amah cungah chia dih ko uh”. Bawi pa bo chan nun a kan cawnpiak ka duhtuk mi bible verse pakhat cu ka fa le zong kan by hart ter mi hna cu proverb 3:5-6 “Bawipa kha na lung chung dihlak in I bochan law nangmah fimnak kha I rinh hlah. Na kalnak lam kip ah amah kha hngal law amah nih na lam kha a tluanter hna lai.” Pakhat te question an hal ta hna ning law kan lungretheihnak nih zei tal a chuah pi maw? Chuah pi hlah a chuah pi lo nangmah le nangmah lungrethei in na um len nak cun na lungretheihnak vial te kha a mah Bawipa cung tuah hei chia dih ko law hna ngam tein um ko hmeh a mah a bochan mi hna cu amah nih an lam a tluan ter leng mang ko hna.

Jesus le a zultu pawl khual an tlawn lioah thlichia a harn ciammam i an lawng cu let dih hnik a zalh cang zultupawl cu minung si nakin an buai ngaite nain an pawng i Lei le Van a ser tupa a umko kha an theilo Jesus cu daitein a hngilh diam ko ee kan si kho ti ne lo an ti i Jesus an hung tthngah/hloh kan ti kho ti ne lo Bawipa ziah na hngilh ko ti in a mah cung ah an lungretheihnak an van sangnak vialte an vun khin le cangkaa bak in Jesus nih thlichia le tilet cu a deih ter ve. A nunnak ah lungretheihnak va san nak a tong mi kan um ahcun Bawipa sin ah pe uh sih. Philippines ka rak lai ah hin Yangon in hawi ka kawl a rung cu Vanlawng ka cit bal lo cu pinah mirang hloh zong thiam hlah ramdang kal cu chim lo Yangon hmenh cu vawihnih thum lawng a phan bal mi ka si ka ttih tuk hringhran kei mah lawng kal ding kha mahcaahcun hawi ka kawl i Philippines kal a tim pah ti kan theih mi paoh phone ka chawnh hna ka kawl hna ka hmu ti hna lo ka lung a rawh ning hi thlakhat dengmang ka cam a donghnak ahcun Bawipa sihah ka up top le ka thawnh ko Bangkok ka phan le aw transit counter i a thu minih bia an ka hal i ka theilo suimilam a cheu deng hrawng cu a si lai a hnu ahcun an lung a dong i a si lai cu seat an ka pek i ka pass khawh cun vanlawng ka lut lai ah anmah Philippines mi he kan ni tong i hawi kom ah kan cang colh ko cu a mak ning cu Philippines kan phan i ka hawi pa nih airport ah a rak ka don kan ni tong hlan lo an ka hngah phone an ka chawnh piak kan ni tong lawng in an ka kal tak ka chim duh mi cu U le nau hna Bawipa kan ni bochan ko ah cun a mah nih kan lam a tluan ter ko ti a si.

A pathumnak ah verse 8 zoh tthan rih ta uhsih law “Fimhring tein um u, ralring tein um u! Nan ral khuachia cu, seh awk kawl ah, chiandeih bangin a vak cuahmah ko.”

Ralring tein um u, dawt mi U le Nau hna Sehtan hi kan mah hrawnh dingah nitin in a vak lengmang ko. A hleice in ram dang khua dang kan rak phak tikahhin ralrin ka herh mi a tamtuk a tawinak deuh in kan chim ahcun kan pawngkam i a um mi vialte hi i ralrin ding lawngte asi. Twenty first century ah hin cun mi nung zong kan tthang cho tuk kan fimtuk cang bantukin Sehtan zong hi a fimtuk ve cang i a tu ahcun a ki le a lu pi he a vak ve ti lo i a thaw ngai mi beer hna, a dawh ngai mi nungak hna khin dah kaw kan mah hrawh awk ah a zuam cang cu a tu kan umnak Philippines lebang cu kal nak pohah nungak an um beer men hna hi ti men nakin a fawi deuh duh tik paoh ah khin din khawh asi dawtmi hna i ralrin ngaingai lo ahcun rawhralnak a fawi tuk minung zeizah dah zawtnak ttha loin a thi cang hna zawtnak ttha lo kan timi hna hi aw i ku/chawnh nak hi ralkap kuli phorh tlukin har seh law kan zam tak dih lai i ku/chawnh zong a har deuh ko hnga nain a dawh ngaimi nungak hna in dahkaw an ni chawnh cu aw a nuam tuk mi nu le pa sualnak hna in dah kaw i chawnh le ku a si cu. A tu ahcun Sehtan zong hi a fim chin lengmang ve cang i a phunphun in an kan hlen ve cang mahcaahcun ralring tein um i zuam hna uh sih. ICor.10 : 12 “ ka dir kho ko tiah aa ruatmi cu a tluk sualnak hnga lo i ralring seh.” a ti. Dawtmi hna ka dam lioah hin zawtnak kan ngeih lonak dingah i ralring hna usih, sualnak kan tuah hlan ahhin sual lo dingin i ralring hna uhsih, thlarau lei in kan tthawn ko lio ahhin ka tluk sual lonak dingah i ralring hna usih. Kawl te nih “Nawngttah sura nawng hma ttah re” an ti. Kan tlaituk sual lo ding a biapi tuk zei zong vialte ah fimhring tein um usih.

Biatlangkawmnak

Kha dawt mi hna Peter 5:6-8 chung asi i a pakhatnak kan chim mi cu toidor nun asi. Pahnihnak cu Bawipa bochan hna usih ti a si i a pathumnak ahcun fimhrin tein um usih law ralring te in cawlcang uh sih ti a si. Toidor nak hi kan ral tei nak hriamnam ttha ah hmang hna uh si. Cun kan lungretheihnak le kan van san nak vialte Bawipa cungah chia usih law a mah bochan in nung hna uhsih. Ni tin kan tlawnlennak le kan tthut dir nakah hin Sahtan mi ttha lo pa nih hrawh ding she ding in a kan bawh zungzal i cu sahtan nih a kan hrawh khawh lo nak ding le a kan she khawh lo nak ding ah fimhrin te le ralring tein um i zuam hna usih ti hi a tu can i kan chim khawh mi siseh law ka lawm tuk. Kan Pathian nih thluachuah kan pek piah ko seh. Amen.

(May 15, 2011) PCCF Weekly Online Sermon

Tlangtaar: Khuachia raldohnak hmun ah philhmi Hriamnam

Text: Ephesians 6:12, “zeicahtiah kannih kan doh mi hna cu minung kha siloin, vancung khua I a um mi thlarau sual tthawnnak hna le uktu hna le nawl ngeitu hna le hi a mui mi chan lianhngannak hna hi an si”.

Vuleicung tuanbia kan rel tikah raltuknak tampi kan hmuh. Culakahcun vulei history ah philh khawhlo tiangin mipi thinlung ah a tutiang a caam I zeitikhmanhah philh khawh zong a si lai lo timi raltuk nak hna cu vulei ralpi pakhatnak le pahnihnak first & second world war hna hi an si. Zeiruangah dah cuti lawmmam cun philh khawh lo ding in tuanbia ah a hung can timi cu nan theih cia dihmi a si ko caah kan chim ti lai lo. Sihmanhsehlaw culawng cu si loh ram khat le ramkhat I tuk/dohnak cu tutiang ah a dong kho rih lo. Cun, ram pakhat chung ah an uknak a tthatlo ruangah maw silole an uknak anlung atlin deuhlo ruangah maw ramchung mi lila I tuk I kahnak (Civil War) tehna hi ram tampi ah a um ti cu nihin tiang in theih le hmuh asi. Hlanlio raltuknak tuanbia tampi zohhmanh hau loin nihin Africa ram tthenkhat Libya, Ivory Coast le Syria tbk ah mithmuh le hnatheih in a um cuahmah lio asi.

Raltuknak ahhin HRIAMNAM timi hi zeitlukindah a biapit ti cu chim hau lo in theih a dih mi asi. Hriamnaam iken loin raltuk nakah kal angah lo. Raltuknak thuam I hruk a hau, meithal I put a hau, lukhuh I khuh a hau. I ken ding thil tamliangluang in a um, riahcaw tiang in I ken le I rawnh a hau. Dangkhat in kan zawt kan fah sual ah tiin sii le aii tiang in I ken an hau. Micheu khat lebang hnacu, an nupi le an fa le hmanthlak le video record tbk tete an tuah mi hna tiangin an I ken hna. Cucu vuleicung raltuknak hmun I kal tik ah an herh mi le kel lo awk ttha lo thil tampi lak ah a herh khun mi an si hna.

Asiah kan nih Khrihfa mi hna hitah raltuk ding kan ngei ve maw? Ral atu mi Khrihfa tah kan si maw? Kan tukmi ral tah zeibantuk ral dah asi? Pakhat le pakhat kan i huat/duhlo ruangah kan I tuk/doh mi ral maw an si? Kan uknak a tthatlo ruangah a cozah kan dohmi hna ral maw ansi? Sihlah ee!!! Kan nih kan tuk/doh mi ral cu vuleicung uknak ruangah kan doh/tuk mi a si lo…Kan nih Khrihfa mi hna nih kan tuk mi ral cu minute, second te hmanh I dinh awk attha lo mi ral a si. Cucu zei ral dah a si tiah cun, Ephesians 6:12 chungah Paul nih,“zeicahtiah kannih kan doh mi hna cu minung kha siloin, vancung khua I a um mi thlarau sual tthawnnak hna le uktu hna le nawl ngeitu hna le hi a mui mi chan lianhngannak hna hi an si” tiah a timi kha asi.

Martin Luther bia an hal mi a leh lio hna I a donghnak ah a chim mi bia cu, “cucaahcun, zumhnak le dawtnak kan ngeih I thlacamnak in kan ralpa “Satan” ral doh nak ah hin hi bia aka hal mi hna le ka chim mi ah alung a tling mi hna poah nih cun an kan bomh hrimhrim awk a si” tiah a ti bal. Cucaahcun Martin Luther nih a kan cawnpiak mi cu Khrihfa nun timi cu zumhnak, dawtnak le thlacamnak ngeih lawnglawng hi a si lo cupin in kan nih cu muihnak chung I a ummi thlarau sualtthawnnak a dotu hi kan si tihi fiangten a kan cawnpiak mi a si. Sihmanhsehlaw, vuitampi cu nifa te kan nunnak ah hin sualmuih tthawnnak chung ah a um mi kan ralpa satan ral a do mi Khrihfa kan si tihi kan I philh ttheo tawn. Satan ral te hna cu dohawk tlak zong a si tiah aruatmi zong kan um tawn. Sihmanhsehlaw satan nih cun zeitik ahdah ka thleh kaboah dih hna lai ti in akan ngiat/bih peng. Mah le mah kilven nak tlawmdeuh kan ngeih chungpoah kan pawngkam ah kan him lo deuhdeuh. Cucaahcun, 1 Pet. 5:8-9 kan rel tikah kan hmuh mi cu, “Fimhrim tein um u, ralringte in um u! Nan ral khuachia cu, seh awk kawl ah chiandeih bangin a vak cuahmah ko. Nan zumhnak ahkhan fekte in um u law amah cu rak do u, zeicahtiah vawleicung khuazakip I a um mi zumhnak lei in nan unau a si mi hna kha, cu ban temhnak cu an ing ve ti kha an hngalh”. ti mi hi fiang te’n kan hmuh khawh.

Asiahcun, zeitin dah kan ral Satan pa cu kan doh? Zungzal nunnak he pehtlai in kan caah Satan hi tei asi cang maw? A sung cang maw? Pakhatnak:

1. Kanral pa Satan le a tthawnnak vialte cu Vailam cungah arak tei I a rak hrawk dihtu hriamnam hmang in kan doh.

Cucu hriamnaam cu zeizah a si tiahcun, Jesuh Khrih Thisen kha asi. Amen! Kan nih kan sualnak vialte cu Jesuh Khrih nih Vailam cungah amah thisen thengte kha raithawinak ah ahman I cucu raithawinak nih cun Pathian thinhunnak in ngaihthiam kan si dih. Kan sualnak le kan ningzahnak vialte akan huhphenh piak dih I a thisen thengte nih Pathian he remnak a kan ser piak. Zisuh Khrih a thihnak, a biakamnak kan I bochan nak le kan zumh nak ruangah kan nih cu a thisen in huhphenh mi tangah kan um. Cucaah cun dakaw, “hihi ka thi le kasa asi nanmah nan sual ngaihthiamnak caah ka thlet mi ka thi a si” tiah a rak ti nak zong kha a si cu. Cucaah Bawipa zanriah kan hman tik hna ah hin kan nih cu khuachia thlarau ttha lo a tthawl mi le a do mi kan si ti hi kan I philh lo aw asi. Dangkhat in khuachia thlarau kan dohnak lam pakhat cu, Zisuh Khrih nih a thlet mi a thisen cu keimah ka sual ruangah a si ko tiah kan zumh I kan co hlan nak in kan doh.

2. A pahnihnak cu Pathian biathli phuanmi bia (Bible) akan pek mi hmang in kan doh.

Kan nih Khrihfa mi hna nih Satan ral kan doh tikah tah zeibantuk hriamnam dah kan I ken awk an si I cubantuk hriamnam I ken ding mi pawl cu tah tlamtling in kan ngei maw? Kan ngeih mi chung te in tah zeibantuk hriamnam biapi khun mi dah kan iken awk an si hna I ken lo in kan philh mi hna an um sual maw? Pathian bia cu “Thlarau Hriamnaam” thiangthlarau nih thlarau tthalo le khuachia rianttuannak vialte le lih le hrawkhrol chim mi kan ralpa Satan dohnak caah pek mi hriamnam asi. Kan thinlungah hin Satan pa rianttuannak hi a interest bik asi, sihmanhsehlaw Bible nih atimi cu, khuachia le thlarau tthalo pawl cu, lih chim hmang, mithat hmang, le mihrawkhrol a thlite in mithil lak hmang mi hna khi an si tiah ati. Khuachia nih ati ve mi cu, kan nih cu mitha kan si an ti ve. Bible nih cun kan nih cu misual, Pathian dawtnak le zaangfah nak a herh mi kan si tiah a ti. Khuachia nih cun kan nih cu sualnak kan tuah lengmang ruangah Pathian nih hin a kan huat, zeihmanh ah a kan rel lo, akan zohkhenh lo mi kan si tiah akan chimh. Bible nih a chim mi cu kan nih kan biakmi kan Pathian cu mi cungah zaangfahnak angei mi le a lung/thin a sau mi asi caah a Fapa Jesuh khrih hmangin vulei I kan sualnak vialte cu man in a pek I mittha ah a kan ser tiah ati ve. Zeipoah asiah Pathian Bia kan zoh tikah Satan cu tei in a um I cucu tei asi nak thawng in kan nih cu kan thlarau caah le kan khamhnak caah lomhnak kan ngei I Pathian ah kan hna a ngam. Paul nih Ephesus khuami hna sinah thazaang arak pek hna mi cu, an ral a si mi khuachia rianttuannak le Satan ral doh ding kha a fial mi hna asi. Paul nih hin Pathian lawng nih a tuah khawh mi hell ram hauka chung in luat khawhnak ding caah Pathian duhnak tuah lawng kha a si lo, “dir uh” law Satan ral kha do uh tiah thazaang a pek mi hna afial hna kha kan hmuh.

Cucaah kan nih nihin Khrihfa mi hna zong nih zeidah kan tuah awk a si tiah cun, fektein kan dir i kan ralpa Satan ral cu kan doh ve awk asi. Cucu raldohnak ahcun hriamnaam zeibantuk dah kan i ken aherh? Silole kan philhmi hriamnaam hna an um sual maw? Bawipa Zisuh Khrih nih a rak hman mi a “thisen” le ai phuan I mipi sinah rak pek cang mi a “biathiang” hna hi kan ralpa Satan ral kadohnak ah kan philh mi hriamnaam hna an si sual hnga maw…. I check tthan hna u si law philhmi hriamnaam zeihmanh um lo te in kan ral Khuachia dohnak hmun ah teinak alaan (flag) he kal hna usih.

Lewis Cung Cinzah

(May 8, 2011) PCCF Weekly Online Sermon

A Mankhiahkhawh lomi Nu le Dawtnak

Phungthlukbia 31: 10-31

Mizeipoh nih Nu le an Sunlawining cu kantheih in kan teh dih cio ko. Asinain cu an man neihnak cu phaisa in zeizatman dah a si hnga tiah tah khawh a si bal lo.

Inchungkhar Khuasaknak kongkau ah

Kan ngakchiat lio deuhahhin kanu nih a chimtawnmi ka philh khawh lomi cu, kapa hi nitin zung a kai, zanlei a hawnglawi i thil pakhatkhat a tlam a tlin lo, inn hna a hnawmh deuh ahcun chunnitlak zei hme nan tuah tiah kanu cu a ti tawn. Kanu nih a lehmicu Thaithawh kan ei khimbak khan dinh caan um loin chun nitlak kai tuai ve ko, kaba ngai ve heih tiah ati tawn. Apeh rihmi cu innrian silomi lokal,thingphurh, chawlehthal ti bantuk a leng rian ttuan hmanh kai duh deuh, inn rian cu chunnitlak tthut mui hmu loin kan cawlcang peng ko na tein zei hme ka ttuan mi asi tiah chim awk set a um lo, asinain kan tha le aba tuk tawn tiah a ti ttheu.

Nifate nu le nih an ttuanmi innchungkhar rian hi midang a man phalh in fial siseh law phaisa zeizat dah a dih lai tiah USA i Nu dirhmun a kherhlaimi “ insure.com” i an Senior Managing Director Amy Danise nih a tlangpi in hitinhin a ti.

Amy Danise nihcun nifatin ‘insurance information’ he pehtlai in Nu pawl i anriantuan cu kumfatin US$ 61,436 man asi tiah a ti. A tlangpi in (a cipciar si loin) Nu le nih nifatin rianantuanmi cu fa le caah rawl chuan, innchungkhar ah fa le zohkhenh, fa le pawl sianginn ah va thlah, innchungkhar thianghlimh, innchungkhar caah a herh mi vialte tawlrel hna hi an si. Nu (mother) anei lomi nihcun nifate inchungkhar thianhhlimh ternak dingah (house maid) man nazi pakhat ah US$ 9.40 hrawng hman a herh hnga, cucu kum khat caah US$ 7,104 a si lai. Sianginn kai dingah Motor mawngtu (driver) hlannak le hman chukchonak dingah nazi pakhat ah US$ 13.43 hman a herh hnga le cucu kum khat chungah US$ 6,285 hman a herh lai. Nu anei lomi nihcun ‘nau umhnak caah’ nazi pakhat ah US$ 17.90 hrawng a dih hnga le, hngakchia umhnak le zohkhenhnak caah nazi pakhat ah US$ 24.99 hrawng a dih. Cu vialte cu Nu le ttuan mi an si. Amy Danise nihcun hngakchia caah Nu le rian biapi bikbik phun(14) a thimmi pawl cu midang fial an si ahcun kum khat chungah US$ 61,436 a dih lai, cupinah chungkhar pabik caah a tuah piakmi pawl tuakchihding tampi a um rihfawn tiah a ti.

Chungkhar ah pa le nih an kawlhawlmi le an chuahpimi izatnak ding tein a tuaktan tu kan Nu le hna hi thangtthat lo awk an ttha lo. Voi tampi cu an thluak a fak tuk tawn ve lai. Asinain kan theih thiam piak tawn hna lo.

Va le caah

A minthangmi ramhruaitu hnu lei ah afimmi nupi an um. Minih an bochanmi le uarmi Pathian rianttuan tu hnulei ah mipi a dawtu nupi an um. A hlawhtlingmi chawletchawhrwltu hnu lei ah rinhtlangmi nupi an um. Asinain mihmaiah minih thangtthat mi le conglomh a tongmi cu an Pa le kha an si. Puanzar hnu lei ah a dirkamhtu hna Nu le cu a ho nih theihset loin, lungsi tein an va le cu an dirkamh hna.

Ramchungah siseh, ram lengah siseh fimnak a cawngmi kan pa le hi innlei ah faktthup in inchungkhar a rak zoh tu Nu le ruangah hna ngam lungdai tein ca nan cawn khawhnak asi. A cheu kan Nu le hna cu Pa le tluk le Pa le nak hmanh in an thluak zong a ttha deuh ko lai nain Pa le tukha hmaiah an chuah ter hna i an nih tu cu chungkhar zohkhenh le kilkawi kha Bawipa fialmi rian a si ko tiin puanzar hnu leiah an thiltikhawhnak vialte an hman hna.

Fa le caah

Minung tlamtling kan si khawhnak dingah kan Nu le nauinn le anmah kilkawinak hi a biapi tuk hringhran. Bawhte kan si lio in kum zeimawzat tiang Nu le khurhawmhnak tangah kan tthang. An thisen le an hnukthlum, an mitkuh hrak le an retheih nak hi aman in tuak awk a ttha lomi a si. Kannunnak he ai pehtlaimi a si.

Nu, fale caah a thlumbikmibia a chimmi cu aman in tuakkhawh a si lo.
Nu, fa le caah Cungzing-Pathian nih thlawchuah a kan pekmi
Nu, fa le caah dawtnak thla a kan zarh zungzaltu .
Nu, a dawtnak ni a liam ballo mi
Nu, ttialhaulo in, a dawtnak, relkhawh a si mi
Nu, ttiallo in, a hmurkaa thlum, theihkhawh asi mi.
Nu, a kan pawitu, akan hringtu le minung tlamtlingah akan canter tu
Nu, a kan cawnpiaktu, lam a kan hruaitu le thazang thar akanpe zungzaltu

Cutluk a kan dawtu kan Nu le cu an nun chung teah kan si khawhtawk in an lungnuamh ter khawh, dawt le cawmken khawh i zuam cio hna uhsih.

Elly Mang

(May 1, 2011) PCCF Weekly Online Sermon

KHAMHNAK CAAH A NUNGMI ZUMHNAK

By

David That Mang

"Nannih cu vel an ngeih hna caah an khamh hna ii khamhnak nan hmuh cu amah nan zumhnak thawngin asi. Khamhnak nan hmuhmi cu nanmah tuahmi a si lo, Laksawng asi. Hi kongah hin nan ii phorhlawt khawhmi zeihmanh a um lo, zeicahtiah nanmah cu tuahnak thawngin nan hmuhmi a si lo" (Eph.2:8-9)

Hlanlio piin atu tiang zumtu mi hna nih kan i buaipi ko rua tiah ka ruahmi cu ‘khamhnak hi zumhnak lawnglawng inmaw co asi, asiloah tuahsernak he dah?’ ti hi asi. Hi bia halnak hi Growth Group (Cell Group) i Filipino pawl Bible ca ka chimh hna nakah a hung chuak tthan. Kan caah a tthahnem hnga maw tiah ka cawnpiakmi hna ka van chuah pi.

Khamhnak kong ah hi biahalnak a rat poahah Paul le James cawnpiaknak hna kha thlir an si tawn. Kei zong hi hna pahnih cawnpiaknak hna hi keimah hmuh ning in zohkeep ding kai tim.

Khamhnak (Pathian he remter kan sinak) cu zumhnak thawng lawnglawng in a si tiah kan Cathiang nih a ti, “Zeicahtiah minung cu Pathian he remter a sinak cu zumhnak thawng lawnglawng in asi, Nawlbia nih, tuah u, a timi tuahnak thawngin asi lo, tiah pei kan ti cang kha”.(Rom.3:28)Nawlbia zulhnak (or) tuahsernak cun a si lo tiah Cathiang nih hitihin a nawlh, "Nannih cu vel an ngeih hna caah an khamh hna ii khamhnak nan hmuh cu amah nan zumhnak thawngin asi. Khamhnak nan hmuhmi cu nanmah tuahmi a si lo, Laksawng asi. Hi kongah hin nan i phorhlawt khawhmi zeihmanh a um lo, zeicahtiah nanmah cu tuahnak thawngin nan hmuhmi a si lo"(Eph. 2:8-9) Dawtmi u le nau hna, nang le kei tah Pathian he remter kan si cang maw? A tawinak in, khamh kan si cang hna maw?

Zeiruangahdah khamhnak cu zumhnak thawng lawnglawng in a si tiah Cathiang nih a ti ko ahcun mi tampi kan i awttawm ne kun? Zumtu tampi a kan buai tertu cu James cakuat hi a si. James nih hitin ati, “Cu caah cun minung cu an zumhnak thawng lawnglawng khan si loin, an tuahmi thawng khan Pathian he i remnak an hmu ti cu nan hngalh” (James 2: 24). Hi cawnpiaknak hi Paul cawnpiaknak he zohhruak ahcun ai kalh ngaingai mi a lo ko. Cucaah zumtu tampi cu zumhnak lawng irelh loin tuahsernak in Pathian he remnak tuah (khamhmi si) kan i zaal. Dawtmi u le nau hna, nang le kei teh tuahsernak in khamhnak hmuh ai zaalmi lakah kan i tel ve sual maw? Lamkaltu 15: 10-11ah tuahsernak or nawlbia zulhnak in khamhnak hmuh khawh a sii lo zia le zumhnak lawnglawng hi Judahmi hna caah siseh, Gentile mi hna caah siseh khamhnak a si zia hitin kan hmuh; “Cucaah, zeicahdah kan pupa nih si hna seh, kannih nih si u sih, kan phorh khawh lomi thilrit cu an liang cung i chonh nan timhnak thawng hin Pathian cu henksak dek nan duh? Asilo, kannih zong kha kan zumh i pei Bawipa Zisuh vel thawng cun khamhnak kan hmuh kha, annih zong cu cu bantukte cun pei an si ve ko cu, tiah a ti.”

Paul mithmuh ah Zumhnak: Cusiahcun Paul i zumhnak a timi hi zeidah asi kun? James izumhnak ati mi he zeidah aidang? Kei ka hmuh ning ahcun Paul chimmi zumhnak hi James chim mi zumhnak bantuk a si lo. Hmuhthiam awlnak dingah a tanglei kan zoh ahcun;

James’s faith (Faith alone) = Death faith (a thimi zumhnak)

Paul’s faith = Living faith (a nungmi zumhnak)

Paul nih zumhnak a ti lengmang mi hi a nungmi zumhnak tiin min ka pek. Zeicahtiah, Paul nih zumhnak a ti tikah Gospel cauk chung ii Zisuh nih zumnak ati mi he khin (original Greek word) ai khat. Cu zumhnak cu Zisuh nih tlang a thawn khotu a si ati (Matt. 21”21); Cu zumhnak cu mizaw adamh khotu a si (Mark 5: 34; 10:52); Cu zumhnak ruang ahcun minung cu sual ngeihthiam an si (Luke 5: 20); Cu zumhnak nihcun minung a khamh khawh (Luke 7:50).

Cu lawng si loin, Paul hmuhnak hrim ahhin zumhnak timi hi hmurka i chim men mi, zeihmanh a chuahpi kho lomi bia sawhsawh bantuk a si lo. Paul caah cun zumhnak cu minung nunnak a thleng khotu thil (thazaang or force) a si. Zeitindah kan theih tiahcun Khrih cu kan caah a thi cang i a thotthan cang nain, a zum lotu caah cun vailam tahnak cung i Khrih a thihnak le a thawhtthannak kong cu zeihmanh lo a si ko. Sihmanhsehlaw, a zumtu caah cun Pathian hmual asi ati (I Cor. 1:18). Khrih thawngttha hmaul a neih tertu cu zumhnak asi. Cu zumhnak nihcun Judah mi le Gentile mi hna kan i dannak vampang a hrawk (Rom. 3:22); Cu zumhnak ruang ahcun Moses Nawlbia a zul lomi Gentile kan nih zong thiam coter kan si (Rom. 9:30); Cu zumhnak lo cun thilttha tuah le thil tthalo i sum hna kha pakpalawng an si (Rom: 7:5; 8:8); Cu zumhnak nih cun nawl a ngaimi (Obedient) akan si ter (Rom. 16:26); Cu zumhnak nih cun Paul hrim zong cu mi hrawktu in thawngttha chimtu ah a thlen (Gal. 1:23); Cu zumhnak nih cun Khrih ah a kan nunter in minung thar (new creation) ah akan ser (2 Cor. 5:17). Paul caah cun zumhnak cu hmurka in phuan sawhsawh i zeihmanh aphi achuak lomi bia bantuk asilo, minung nunnak a thleng khotu a nungmi zumhnak a si. Philippi Khrihfami hna cu an zumhnak nih can har lio ko zong ah mi nunsiang, mi khuaruat ah a ser hna i Paul rianttuannak kha biatak tein an bawmh (Phil. 4:15-16). Cubantuk zumhnak cupei James nih a Jewish Khrifa hawi pawl zong nei hna seh ti aduh tuk i a sawmnak hna cu a si cu (James 2).

James Mithmuh ah zumhnak: A cunglei kan chim bantukin James nihhin a careltu pawl hi a nungmi zumhnak nei ve hnaseh tihi aduh piak ngaingai hna. James2 kanzoh ahcun, Khrihfabu chungah thleidannak a umnak kong kan hmuh khawh (v. 6). Mi sifak kha nan neek hna tiah James nih amawhchiat hna. Nanmah nan idawt bantukin nan innpa zong nan dawt ve hna lai tiah a cawnpiak hna. Thleidannak nan neih ahcun Nawl buartu nan si a ti. Cucaah, nan chim bantukin ttuan tuah u tiah a forhfial hna.

James nihhin kaa lawng bia chim hi a doh ngai ti kan hmuh khawh (1:19; 3:5). Chim bantukin ttuanding asi tihi a kal pimi asi. James 2: 14 in 26 chung bia ruang ah hin, mi tampi nih James i zumhnak lawng (faith alone) a timi le Paul i zumhnak lawnglawng in (by faith) a timi hi ai dang ah kan ruah i khamhnak a si loah Pathian he remter kan sinak cu zumhnak lawng in a si rua lo tiah kan ruah phahnak a si. Faith alone timi bia hi Paul cakuat ah kan hmu lo i, James 2:24 lawngah kan hmuh khawh. Kan fiannak ding ah a tang lei hi kan zoh ahcun;

James’s faith alone = Hmurka in chimmi, tuahsernak nih a zulh lomi zumhnak, Zeihmanh a phi a chuak lomi zumhnak

Paul’s zumhnak lawnglawng = Nawlbia zulhnak tello in a nungmi zumhnak lawng (Nunnak in a langmi, a phi a chuak khomi zumhnak)

Hika ah afiang micu, James chimmi zumhnak (faith alone) hi Paul chimmi zumhnak lawnglawng he ai dang ngaingai. Paul nih zumhnak lawnglawng a ti tikah Nawlbia lo in a tinak a si i, James nih faith alone ati tikah zeihhmanh a chuahpi kho lomi, tuahsernak ah alang kholo mi, hmurka lawng chimmi zumhnak tinak asi. Curuang ahcun nan chim bantuk in ttuan u ati nak cu asi. Khamhnak caah zumhnak ai zaa lo, Nawlbia zong nan zulh chih ahau a tinak asilo. Zumhnak kan nei nanti ahcun nan lakah dawtnak zong a umding a si, thleidannak hna le mi sifak neeknak hna hi a um ding a silo, nan nunnak in a langh ding asi atinak tuhi asi deuh.

Paul le James hi zumhnak kongah an ruahnak ai khat. Pual ca zongah, James ca zongah zumhnak cu hmurka lawng chimmi biavaivuan bantuk asilo. Zumhnak cu aphi alang khomi, tuahnak ah a langmi, le minung nunnak le nunzia tiang a thleng khomi asi. Cu bantuk zumhnak nihcun Khrih kan ca I athihnak le athawhtthannak cu sullam a ngeihter i hmual zong angeihter. Cu zumhnak ruang ahcun pei kan nih vialte cu sual ngeihthiam kan si i, miding bantuk in cohlan kan sinak cu asi cu. Zumhnak lei pa tiah kan timi Abraham zong cuarpar tan asi hlan ah pei a zumhnak ruangah thiam coter asi kha (Rom. 3:12). Kanmah zong Nawlbia kan zulh le thilttha kan tuah ruangah siloin, kan caah a thi i athotthanmi Khrih kan zumh ruangahpei a sualmi kannih vialte Pathian he remter tthan kan si cu.

Biadonghnak: Cucaah U le nau hna, a nungmi zumhnak nihcun kan nunzia zong akan thlen, kan thlarau nun zong a tthancho ter, kan lungchung ah dawtnak zong a ser i, ruamkainak lungthin tehna, mi thleidannak lungthin tehna kha a tei khawh. Cu a nungmi zumhnak lawnglawng nih cun Nawlbia zulh hau loin Pathian he akan remter. Cu zumhnak nihcun zungzal nunnak lamah akan kalpi. Cu zumhnak cu a thimi zumhnak bantuk asi lo caah ttuannak le a theitlai in alang kho. Cu zumhnak lawnglawng cu khamhnak hmuhnak ding caah ai zaa mi asi. Khrih nih kansual man pekdingah a thihnak le a thawhtthannak kha cu zumhnak cun kan zumh a herh. Nawlbia zulh le thilttha tuahnak in kan hlawh khawhmi asi lo. Cucaah ahohmanh nih khamhnak kongah kan i phorhlawt i, pakhat le pakhat kan i soisel ding asi lo. Azumtu pa zong Vancung pennak cu a co lai i, tuahsernak a herh chih ko a titu pa zong a zumhnak thawng in Vancung pennak cu a co ve ko lai. A tuahsernak thawngin a hlawhmi asi lailo, zeicahtiah Nawlbia zulhnak le tuahsernak cu Khrih khamhnak kongahcun thil hleivuang an si. Vancung pennak a co lo dingmi hna cu a zum duh lomi hna lawng ansi.

Ni khat cu minung pathum Gate tan(phiat) i khatlei ral kal an i tim. Cu gate a phiat dingmi poah cu Valid ID pakhat ai ken ahau ti asi. A pakhatnak pa cu valid ID pakhat te cu gate congtu pa kha a piah i khatlei ral ah apet. A pahnihnak pa cu valid ID pakhat lawng cu ai zaa sual lalo a ti i, a birth certificate he a marriage certificate he ai ken chih. Gate congtu pa cu ai kenmi dihlak cu a piah. Gate congtu pa nih cun a zeidang(Certificates) zoh piak loin a valid ID te a cohlan i gate phiatnak nawl apek ve. A pathumnak pa bel valid ID a neihlo caah gate phiatnak nawl pek asi lo. U le nau hna, khamhnak hmuhnak ding caah zumhnak lawng aherh na ti zongah, zumhnak pinah tuahsernak zong aherh chih ko na ti zong ah Pathian he remter na sinak cu misual tlanh dingah a nunnak a petu Khrih a thihnak le a thawhtthannak kha a nungmi zumhnak in zumh tu kha a si. Kan buai lenmi doctrine nih khan Vancung pennak chung zong a kan luhpi lai lo i, a hlat zong akan hlatter hlei lailo. Pathian he remter tthan kan si i a Vangcung pennak kan co le co lo cu, thilhman kan theih le theihlo, kan fian le fian lo ahkhan a tlu lo ii, kan zumh le zumh lo tu ah khan a tlu deuh. Cathiang nih hitin ati;

“Cuticun Pathian nih Vawlei hi a dawt hringhran caah a Fapa neihchunte kha a pek, cucaah amah a zummi poah cu an thi lai lo, zungzal nunnak an ngei lai. Zeicah ti ahcun Pathian nih a Fapa cu vawlei cungah hin vawlei biaceihtu si awkah a run thlah ttung lo, vawlei khamhtu si awkah pei a run thlah cu. Fapa kha a zummi poah cu biaceihnak kha an ing lo, sihmanhsehlaw a zum lomi cu sual phawt an si ko cang, zeicahtiah Pathian Fapa ngeihchun khan an zum lo (John 3: 16-18).

Nannih cu vel an ngeih hna caah an khamh hna ii khamhnak nan hmuh cu amah nan zumhnak thawngin asi. Khamhnak nan hmuhmi cu nanmah tuahmi a si lo, Laksawng asi. Hi kongah hin nan ii phorhlawt khawhmi zeihmanh a um lo, zeicahtiah nanmah cu tuahnak thawngin nan hmuhmi a si lo.(Eph. 2:8-9)

A ttha le lakawktlak a um ahcun kan dihlak caah thluachuah siseh law, chamhbaunak a ummi poah keimah mawh a si. Kai lawm!