Weekly Online Sermon

Weekly Online Sermon
by
Rev. Ram Hu 

 Rev. Ram Hu

Biaceihtu: 14:14 “ Eitu chung in ei awk achuak. A thawngmi chungin a thlummi a chuak.”

Damnak aka petu Pathian min ka thangthat. Can tha a ka petu hna cungah ka lung aa lawm, Pathian bia areltu nan dih lak cung ah Pathian riantuannak khuaruahhar cu athar in tlung hram ko seh.

            Hi biahleng hi zeitindah na hmuhning asi ve, eiawk cu eitu chung in asi na ti ve lai maw? Na nunnak ah a thlummi na tonmi hna hi khuazei in dah an si.? Israel mi hna cu kamhmi caanan ram an lut lai te ah, Moses nih ram va hlathlai ding ah miphun ai awk ah minung 12 a thlah hna. Ni 40 chung Pathian kamhmi ram cu an va zoh, an kal lio ah khan cu group khat in an kal, an rak kir than tik ah group 2 ah an cang. Group khat cu minung 10 an si, pahnihnak cu 2 an si. Ram thatnak kong an chimh cio ah an I khat dih, cawhnuk le khuihlati luannak ram cu asi tak , asi nain cu Pathian kamhmi ram cawhnuk le khuaihlati an luannak khua le ram cu, Anak mingan pawl, kulhmi khua a ngaimi eitu hna sin ah cu arak um ai. Minung 10 nih khan, kan nih cu an caah rawl kan si an ti, asi nain Kaleb le Joshua nih cun an nih cu kan rawl an asi anti. Kaleb le Joshua caah cun eitu chung in eiawk cu achuaktak hmai sai ko, athawngmi hna chung in atlumi cu an co tak tak ko. Minung 10 nih cun, mit nih a hmuhkhawh mi vawlei thil le tihnung zoh lawng in an kal, asi nain minung 2 nih cun mit in hmuhkhawh lomi bawipa an Pathian in an kal.

            Pathian nih pumpak caah, chungkhar caah, khua le ram caah thiltha tampi an kan kamh. Cu a biakam, eiawk le a thlummi cu eitu hna sin ah le kanmah nak in athawngdeuhmi hna sin ah arak um kho ti hi kan rak theih kho lo. Khi tik ah harnak ngan pi pi kan rak hmu tik le kan ton tik ah Pathian hnatlak asi rua lo, asi lo ah zeitindah asi khawh lai tiin thiltha ei kho lo in le athlummi tep kho lo in ka um can atam pi ve. huatdingmi minung ka ton tik hna ah, eitu ah an cang, ka duh lo ning in thil arak can tik ah ka caah arak thlum kho ti lo. Sualnak tuah ding can tha kan hmuh tik ah sualnak nih cu aka ei thluahmah, keimah nak in athawng deuhmi ka titsa duhnak ral he ka rak I do tik ah kan nunnak cu khatnak in ka khat tawn,a thlumi kan rak ei kho lo. Kan feeling, emotion le mithmuh in kan kal tawn, zumhnak in kan kal lo caah a kan eitu ah thil cu an cang kan caah akha tukmi ah aa cang. Pathian mi hna, Isreal mi lak ah ti rawl a um ti lo, asi nain an ral hna Assiria sin ah cun Isreal mi hna caah rawl tampi a rak um, thinghmui 4 hna nih an ral hna sin ah kan thih le thih tiin an vakal tk ah Pathian an sin aum caah, Isreal mi hna nih rel cawk lo tirawl cu dotu le eitu hna sin ah cun an hmu. Somson cu Pathian thawnnak in eitu chung in ei awk ahmu, a thawngtukmi chung in atlum bikmi khuihliti a co. kan mahnak in athawng deuhmi le tihnung thil eitu hna zong he kan ton tik ah Kan pathian he kan si caah nikhat khat cun cu athawngtukmi kan timi le eitu kan timi hna chung in eiawk rawlthawbik le athlum bikmi khuihlati cu arak luang ve te ko lai. Pathian he kan umtinak le kan tuantinak paoh ah thlachuah aum, thlachuahnak, rawl le athlummi hna hi eitu le kanmah nak in athawng deuhmi hna sin ah hin arak um tawn.

            Pathian kan thangthatnak hi kan feeling le pawngkam zulh in silo in Bawipa kan Pathian tu ah sisehlaw, mithmuhnak in kal loin zumhnak tuin hmailei ah kan kal lai. Dohtu, eitu, kan thazang, kan sining, kan fimnak nak nakin athawngdeuhmi he kan ton tik ah, kanmah leiah atang zungzaltu kan pathian he kankal lai, kan ton ti lai i hi thil hna chung in eicawk lo rawl le athlum bikmi khuihlati hna cu kan co ve te ko lai.

Lawmhnak tampi he,

Rev. Ram Hu

February 16, 2014 PCCF Weekly Online Sermon

“Bawipa kan dir pi ko” 

By

Saya Lewis Thla Peng Cung

 Saya Lewis Thla Peng Cung

U.S phaisa (US$, currency) ah ai tial mi catlang pakhat te cu “In God We Trust” timi a si. Hi nih a chim duh mi cu USA ram pi nih hin Pathian cung ah alu ai hlinh i a luan cia caan chungah siseh a ra lai mi hmai lei caan chung zongah siseh kan har sat nak ah le kan lung retheih nak zongah siseh lam akan hruaitu le lam akan hmuh sak tu ding motto asi lai tiah ruahchannak he an ttial mi catlang pakhat te (phrase) a si. Hihi an motto “In God We Trust” timi hi ahmasa bik an phaisa ah arak cuannak cu an phaisa pia 2 (2-cent) cungah arak si. Asinain 1864, April 22, hnu i Congress party nih phaisa piahnih te cung i ai ttial mi “In God We Trust” miti cu an phaisa vialte cungah ttial si cangseh an ti hnu in hun ttial le hun hman cu a si. Cun July 30, 1956 hnu in hi catlang (phrase) te cu an ram pumpi i an motto ah ahung cang ti asi.

Tuzing ah saduh ka thah ngaimi pakhat cu kan nih krihfa mi hna zong nih hihi “In God We Trust” timi te hi kan motto nganbik ah si ve sehlaw kan nun chungah amah Pathian lawnglawng hi i bo chan ko hna usih timi hi a si.
“In God We Trust” timi nithaizing ah chim le rel ding in kai timh mi a si lo, sihmanhsehlaw hihi he ai khat nawn mi catlang pakhat acung i ka ttialmi “Bawipa Kan Dir Pi Ko” timi he pehtlai tu in hun chim kai timh deuh mi asi.
Hi he peh tlai in nihin kan khua kan ram kan miphun akan cawisangtu kan biak kan Pathian nih hin hi thinlung ngeih ding zong hi pumpak pakhat cio kan cungah akan duh piak bikmi asi lai tiah ka ruah i cun amah Pathian kan auh nak “Maw!!!Bawi pa kan dir pi ko” kan ti nak, le “nangmah lawnglawng hi bochan ding kan in ngei” kan ti tawn nak au aw akan theih piak nak ruang zong ah laimi a hlei in PCCF hi tluk dirhmun i kan dir khawh nak zong hi asi lai tiah ka zumh.

Zeiruangahdah Pathan dirpinak cu kan herh peng ko ti hi chim ka duh ko. Nitin kan nunnak ah hin kan Pathian dirpinak tel lo in kan mah te in zeihmnah kan tuah khawh mi a um lo, kan mah lawng kan si lo minung asi mi poahpoah nih Pathian ttanpinak le dirkamh pinak tel lo in kan tuah khawh mi samfa fangkhat tia te hmanh a um lo. Cucaah cun Pathian dirpinak cu kan herh zung zaal ko. Vawleicung ah mithang kan ti mi hna ral tuknak lei kam ah siseh azei lei poah in mi tthawng kan ti mi hna hmanh khi an mah tthawn nak lawnglawng cun zei hmanh tuah kahwh mi an ngei lo, Bible chung in kan zoh ahcun minthang mitthawng tam pi lak ah Samson te Goliath te cun Nebuchadnezzar te hna hmanh kha an mah minung tthawn nak lawnglawng an i rinh poah ah khan an sung zungzal ti kha kan hmuh. Asi nain amah tthawn nak zei hmanh tel bak lo in Pathian tthawn nak lawng bak ai ttanh mi pa David tu cu tei nak in sun par nak kha ahmu ti kha kan hmuh mi si. 1samuel 17: 45 chungah Pathian dirpinak le ttanpinak kha lak zau in teinak ahmu.

Culawng sirihlo kan nih minung cu thil fate tuahkhawhmi kan ngeih ah khin kei mah thil tikhawhnak asi rua tiah ruah kan hmang cucu kan Biak kan Pathian nih aduhlo taktak mi asi, Babylon siangpahrang pa Nebuchadnezzar zong kha a inn cung in aa chok i Babylon khua lipi cu azoh tikah “mah hihi alianngan mi Babylon, keimah nih siangpahrang umnak caah kei mah tthawnnak anganmi le keimah upatnak langhternak caah ka sermi asi lo maw?” tiah a au. Cucu achim lio ahcun Vancung in aw pakhat athang i “Maw! Nebuchadnezzar siangpahrang ka bia hi ngai tuah: na pen nak cu “chuh” na si cang, Minung bu hna sin in tthawl na si cang ramsa hna sin ah khua na sa lai” (Daniel 4:30-32) Aw!!! Kan tuah mi thil fate hmanh hi kan mah tthawnnak in kan tuahkawhmi asi ko ti kan ruah ahcun zeitluk in dah ttih ava nun!!… Nebuchadnezzar siangpahrang pa bang in minung hna sin in tthawl kan si ve sual lai.

Cucaah kan nih laihri tlai unau vial te hna zong nih nihin ni ah kan sining te kha philh lo in le hi tiang dir hmun ka si nak hi kei mah thil ti khawh mi pakhat te hmanh asi ttung lo Pathian thil ti khawh nak le dirpinak ruang ah pei asi ko cu ti mi thin lung ngeih zungzal hi philh hlah hna usih. Nihin ah inn le lo tthattha kangeihh khawh nak le vawlei cung ram tthattha hna kan phanh khawh nak le fimnak cawngin sianginn thatha hna ah sianginn kan kaikhawhnak hna hi kan mah ti kawh mi si lo in Pathian tu kan i bochan i kan au nak aw “Bawipa kan dir pi ko” kan ti nak tu akan theih piak i hi tluk tiang akan cawi san tu hi Pathian lila asi ti kha philh hin lo te in hmailei zong “maw Bawipa nang mah dirpinak lawnglawng hi kan herh ko” ti au tthan bu in akan dirpinak cung ah lomh nak bia chim dai thlang lo tein kar kan hlan khawh nah hnga Bawipa tu nih kan dir pi rih ko seh…

February 09, 2014 PCCF Weekly Online Sermon

 “Dawtnak”

Hebru 13:1-2

By: Saya Tluang Peng 

Saya Tluang Peng

 “Khrih chung ah unau nan si bantuk in pakhat le pakhat idaw zungzal u.”

Biahmaithi: Dawtmi le upat awk a tlakmi PCCF nu le pa, u le nau hna, Pa Pathian le Zisuh Khrih min in nan kut kan tleih hna. Tuchun ni ah nan zaa te sinah hi bantukin thawngtha phuannak caantha ka hmuh caah tampi ka lawm. A hleice in caan a ka petu riantlaitu kan u le hna cungah tampi lawmhnak ka nei ko. Bawipa tunih PCCF le riantlaitu hna cungah thluachuah pe chin ko hna seh. Taktak ahcun, tuni hi keimah thawngtha chim caan cu asilo, nain tuzing i caan a tingmi kha aa manh deuh lo caah keimah nih caan ka rak laknak hi asi.

Tuchun i chim kaa timhmi hi ‘Paul nih’ tining law ka palh lai lo dah ka ti. Zeiruangah ti ahcun, Hebru cakuat hi a tialtu taktak cu theih asilo nain Paul nih a tial ko lai ti hi zumh deuhmi asi caah asi. Paul nih temhtuarnak ruangah zumhnak a chuah taak dengmang cangmi Hebru mi hna kha thazaang a peknak hna asi. Tuzing ah hi Paul thazaang peknak chunghin unau idawtnak kong hi iruah than hna usih tiah sawm kan duh hna.

Unau dawtnak kan timi hi: Hika ah kan hmuhmi cu “unau nan si bantuk in pakhat le pakhat idaw zungzal u” ti asi. Hi cacaang hi Johan 13:34 ah kan hmuhmi Jesuh nih nawlbia thar, kan pek hna a timi kha asi. A tawinak in kan chim asi ahcun unau dawtnak kha asi ko. Keimah kong hei ichim ko ning law, ka hngakchiat lio  hin Laitlang, Thantlang peng khuate ah a thangmi ka si. Keimah ka cung ahhin keimah he aa changmi u  pahnih ka ngeih hna. Kum thum kum li hrawng ka si lio hin Lai lei cu va pel le ram tang i vah tam rak si kaw, an kal nak poh ah zulh ka rak duh ve hna. Anmah he ka kal ahcun hna ka rak chet tuk hoi i an pelmi va nih an kan zuan tak dih tikah keimah zulh kha an duh hrim hrim lo. Cucaah an ka hrial. An kal lai ka theih i zulh ka timh hna cun an ka hlen zawn, asilole an ka vuak ta i an ka kal tak zawn khi asi. Mah lio hrawng i ka rak ruahmi cu unau hi cu idawt asi hrim hrim lo. Ka unau cu aa ka vuatu le aa ka tahtertu kha an rak si deuh.

Asinain, kan hun thang deuh hna i kha kan zia kha aa thleng. Kan ram sining nih a pek bantukin, an nih ram dang an kal kei sianginn ka kai. Hei chim ko ning law, B.Th ka kai in a tu tiang, Bible sianginn ka kai hi a kum in chim ahcun kum 10 leng asi cang. Anmah nih zohkhenhmi ka si, na sianginn kai a sau tuk tiah voikhat hmanh an ka ti bal lo. Ram dang ah har lengmang tein an hlawhmi man kha anmah hman ding pocket money chung in an ka kuat. Atu Philippines ka um hrim hi cu, kum nga ka kai hnu ah ka pa a dam lo caah ka va tlung. Degree pakhat hmanh kumnga chungah ngah ta loin ka tlung. Khah ka dissertation tialmi peh than ka duh ka ti tik hna zongah degree pei na ngah a hauh cu an ti i zei hmanh vuivai lo tein phaisa an ka kuat than i ka rak ra than. Ka hngakchiat lio i ka rak ruahmi le a tu i ka ruahmi hi aa dang tuk cang. Unau dawtnak timi cu mah hi maw asi ka ti. Atu ceu in tlamtlinlonak, sualnak le palhnak lak chung zongin ingaihthiam le pakhat le pakhat ibawmh hi pei unau dawtnak taktak cu asi ko hi tiah ka lung a hung fiang. Atu ahhin ka u le caah thlacam piak le lunglawmhnak biachim ti dah lo cu zeihmanh ka tuah piak khawhmi hna a um lo.

Atu zongah, PCCF cu unau kan si hna ee kan iti. Tu kum PCCF kan President zong nih unau kan sinak cathluan a rak tial cang kha. Asinain, biavakvai maw asi hnga, ka theihmi bia pakhat cu PCCF chungah kaa dang/ramdangah kal in thawngtha chimnakah Philippines i sianginn a kaimi cu zuu le sa an ei an ding dih, a ding a ei lomi cu keimah le cucu khakha lawng kan si ti a chimmi kan um an ti. Ka lungah a rak chuakmi cu aw! kan chung zongah pei farasi bantuk kan rak um rih ko hi ka ti. Lamkam ah dir in gentel mi ka si lo caah ka lawm a timi kan lo rua ka ti. Atu sining in kan chim ahcun, hawi bantukin na ka din na ka ei ter lo caah ka lawm kan hei ti hnga. A ding a ei mi cu kan um taktak ko hnga nain a ding a ei lomi kan rak tampi thiamthiam ko ti kha kan philh lo a herh tiah ka ruah. Cu lengah, hi pa nih hin unau dawtnak lungput ngei sehlaw, kha ti khan mi sinah thangchiatnak bia kha chim loin Pathian sinah thla tu hna a cam piak hna hnga i asiloah a ding a ei mi pa sinah va kal in na tuahmi hi a tha lo tiah va cawnpiak seh law cucu unau dawtnak kan timi cu asi deuh hnga tiah ka ruah. Kha ti a chim ruangah kan unau pakhat cu a u le nih cikhat cu phaisa zong an kua duh lo an ti. Kha a chimtu pa cung zong khan a lung a tha lo ngai zei ruangah ti ahcun kha an rak kuat duh lo mi pa kha a ding a ei ve mi asilo ruangah asi. Khua fak deuh piin ka ruah than a hau.

Biadonghnak

Kei ka chimduhmi cu unau dawtnak lungput taktak ngei hna usih law, kan sualnak iphuang loin ihuhpheng hna usih. Kan tlamtlin lo cio buin kan sualnak, kan palhnak ichim hna usih law daw tein khua sa ti hna usih ti hi asi. Hngakchia lungput hi kal tak cang hna usih, upa lungfim lungput ngei hna usih law keimah ka tha bik keimah ka fel bik timi mah le mah thatnak lawng ihmu hna hlah usih. Zisuh nih farasimi a hmuh hna bantukin Pathian nih a kan hmuh ve sual lai ti zong hi phang ve hna usih ti ka duh. Tung tungkhat lawng itleih in tuahnak i din le fel lawng zong hin a zaa lo kan pawngkam, kan hawi le sinah zei tin dah kan nun/khua kan ruah/bia kan chim ti zong hi tampi ruah kan hau.

Kan tial khawhmi cungah Bawipa nih thluachuah kan pekpiak sehlaw, lungkhat thinkhat kan ngeihnakah kan serpiak hram ko seh, tiah iruah chih buin…….

Lunglawmhnak tampi he nan hawi Tluang Peng

February 02, 2014 PCCF Weekly Online Sermon

Hreitlung Fang Ti Cungah A Vuan

(2Siangpahrang 6:6)

By

Pastor Dawt Mang  

Bible Relnak: Cun Pathian mi nih cun, “Khuazei ah dah a tlak?” tiah a ti. A hmun kha a hmuhsak tikah fung pakhat a sah i khika ah cun a hei hlonh i thir cu a hun vuan. Cun “Hei la tuah,” tiah a ti. A kut in a hei banh i a lak.

Profet fapa hna nih Elisha cu an thawh i kan umnak hmun a hmet tuk caah Jordan tiva ah thing thluan khat cio va la usilaw cu ka ahcun umnak hmun kau deuh in ser ding in an ti. Jordan tiva kam ah cun thing an hau hna. An mah chung in pakhat nih a hman lio mi hreitlung fang cu Jordan ti chungah a tlakter sual. A au i Aize!!! Ka bawipa hlan mi asi e a ti. Khuaruahhar ngai in an um, a ruang cu:

1.      Mi sinah hlanmi hreitlung tichung a tlakter sual cu liam than a hau? Zeitin kan tuah kun lai ti a si?

2.      Hreitlung cu tichung a pil cang, a tlaknak zawn lawng theikhawh a si, khawika zawn tiah a umnak dik a thei kho ti lo, a hmuh zong a hmu kho ti lo.

3.      A ngeitu pa sin, kut lawngin ton lai a phang tuk.

4.      Ahme/bi tuk an ti mi hmun kauh ding cu chim lo, cu a hme/bi tuk mi hmunte ah lungrethei in khua sak than ding. (thahnem ka kawl pamchin ka tong timi phungthluk bang)

Philh hlah uh sih, hi thil vialte an thok hlan le an ton hlan ah Profet Elisha theihpi a si. Profet Elisha he thokmi cungah a cangmi thil a si ko. Profet fale nih an tuah hnga ding cu an i theih, a ngeitu sinah hreitlung pek than ding a si. Cu ruangah an lungre a thei khun ko. A ngeitu sin pek than ding a si tiah pek duhnak lungthin na ngeih ahcun pek ding a um/ngei lo ti a um bal lai lo. Peter nih Jerusalem ngunkhuai pek ding a ngei lo, pek duhnak lungthin a ngeih kha philh hlah uh sih. (Mtt.17:27 Cucaah rili ah va kal law sio vathla, na sio hmasa bikmi nga kha a ka va keu law a ka chungah cun kan pahnih ca i a za ding tangka na hmuh lai; cun va kal law biakinn ngunkhuai cu va pe hna,” tiah a ti i Jesuh bia bang Peter nih a tuah. Tlam a tling ti kan hmuh.

Thil sining kong cu Profet an chimh. “Khuazei ah dah a tlak”? tiah a hal hna I atlaknak hmun cu an sawh piak i, fung pakhat a sah i cuka ahcun a hei hlawnh i thir cu ti chungin a hung vuan, cun a lakter hna ti kan hmuh. Ruahnak le tuaktannak mit in an zoh i phannak le lungretheinak he a khat mi sinak cu thlarau thil tikhawhnak an hmuh tikah thlarau mit khua an hmu. Joseph cu Faro siangpahrangpa nih a philh cia mi a mang hmanh kha a chimh khawh than lawng hmanh siloin a sullam zong a let ter kho tu Pathian a si.

Ti chungah a pil cangmi le a umnak hmun hmanh theihfiang lo mi thir hreitlung cu ti cungah a hun i vuan cu a har ngai ko, sihmanhsehlaw Pathain caah a harmi a um lo bantuk in a fale kan ca zongah a har lo. Mtt. 19:26 “Pathian caah cun zeizong vialte hi asi kho ko”. Thaizing kongah lungrethei tuk in um hlah uh sih. Van i a zuangmi va, ramlak i a kho mi lili pangpar hmanh a ho zohkhentu an ngei lo, an nung ko, cu nakin a mah muisam lo in sermi minung cu kan hlawk deuh. Bawipa cu sawm peng cio ko uh sih!

A reltu dihlak Bawipa thluachuah nan cungah um ko seh! Amen.

Kai lawm...