Sunday, May 24, 2015


 

Dawtmi Unau hna, Happy Sunday!
Tuzing Online Sermon a kan hrawmhtu saya Tluang Peng (Hriphi) cungah lunglawmhnak tampi kan ngei. Amah hi UTS ah D Min. a cawn cuahmah liopi a si. Bawipa nih thluachuah chin sehlaw, a rian ah hmang chinchin ko seh tiah PCCF nih thlaza kan campiak!


Bawipa Hneksaknak na tong cang maw?
 James 1:12 Hneksaknak a in tikah fek tein a ummi cu a lung aa lawm, zeicahtiah cu bantuk hneksaknak kha a tei khawh caah Pathian nih amah a dawtu hna a kamhmi nunnak kha laksawng ah a hmuh lai.
Phungthlukbia 17:3 Sui le ngun cu mei in hneksak an si, minung lung cu Bawipa nih a hneksak.

Hi bantukin Khrih thawngtha hrawmh khawhnak caan tha, keimah hna nih ka hmuh khawh ve caah a hmasabik ah hremhmun in luatnak a kan ser piaktu a nung Pathian sinah lunglawmhnak bia ka chim. Cun, rian tlaitu hna an dih lak cung zongah lunglawmhnak chim cawk lo ka ngei ko. Bawipa nih zaanghlei cawi in hi rian an tuannak thawnghin let tampi in thluachuah pe ko hna seh. Mahlawng si loin, hi Pathian Thawngthabia a reltu nan dihlak cungah kaa lawm fawn i hi a biathiang nan relnak thawngin Pathian nih thlarau thazaang thawnnak an pe chin ko hna seh. Amen!

Kan zaate iruah than hna u sih ti ka duhmi cu a cungah ka tial cang bangin, ni fate kan nun ah kan tonmi Pathian nih a kan hneksaknak maw, a si lo ah Sehtan tukforhnak dah kan ton tikah zei hi dah kan dirhmun a si ti kha a si. Theological approach lei in maw a si lo ah philosophical approach leiin dah ka tial lai ti ka ruah tikah ka khur khuaruahnak (reasoning power) thluak nih a phan deuh lo i keimah si tawk tein ka van tial ve ko lai i, nan rel tik zongah biafang maw, sullam aa pehtonh deuh lomi um zongah a reltu nih a rel zia ka thiam piak hram uh tiah kan nawl hna. 

Thawngthabia chungah lut colh ko usihlaw, hneksaknak ka ti tikah hin Baibal chung kan zoh a si ahcun mi pakhat le a dang pakhat Pathian nih a hneksak daan hna aa dang tawn. Bianabia ah Adam, Abraham le Job tibantuk pawl kan ti ko lai. Adam cu Eve in a hneksak kha mu. Atu zongah tonglo tam deuh nih cun ziahhme hi bantuk hin a kan hneksak ve hnga lo a ti mi zong kan um ve kho men ko. Abraham zong kha Amah Pathian bak nih na fapa na ngeihchun, kan pek mi kha raithawinak in ka pe than a ti ko. Kan hngakchiat lio ah kan ule nih a kan ti tawnmi cu midang na pek ciami thil na hal than hna lai loh, na hal than hna ahcun na taw a ping lai, ti a si. Cucaah, mi kan pek ciami thil kan rak hal than ngam bal ti hna lo. Pathian nih hin, Abraham fapa a pek ciami kha rak hal than thai taktak sehlaw, a taw a ping kho ve men mi bak a si. A hal than thai lo caah a luat kan ti lai (hngakchiat lio ruahnak). 

Nihin ni caan ah zumtu hna nih hneksaknak phunphun kan tong. Cheukhat cu Adam bantukin (phun tha kan ti ko lai) kan ton. A fekfuan lomi zumtu caah lunglawmh awk ngaingai a si. Zeiruangah ti ahcun kan duh phun tuk cu pei a si fom cu. Chikhatte ah kan ibual chih mu. Cheukhat cu Abram bantukin hneksaknak kan tong i mah ah hin tuar ngai ding a si ko nain cheukhat cu kan zei a poi tuk rih lem lo ka ti lai, zeiruangah ti ahcun kanmah bak nih kan tonmi le kan tuarmi a si lo caah, “vawlei cung a si caah a phung a si ko” kan ti khawh ko men rih. Nain Job dirhmun kan zoh a si ahcun thihtlang bak ah a dir. A temhtuar ning kha ka in chim khawh awk a tha lo. Mah ah hin cun zumtu tampi cu lukheuh in kan i ruat than cang. 

Iraq le Syria khrihfa hna an dir hmun kan zoh tikah. Kei cu a ruah hmanh ka ruat ngam lo. Ka mitthlam ka cuanter chun ah khin Bawipa him tein na ka chiah caah ka lawm ti lawng khi ka chim khawh. Khrihfa tampi nih an zumhnak ruangah an nunnak an pek. Hngawng tan tiang a tongmi an um, mei in khangh a tong mi zong an um, meithal kahmi zong an um, thih tiang hrem a tong mi zong an um ko lai. Khua ka ruat tawn, ziah kan Theology ah kan cawnmi “tribulation” kan hluan ko lo hme maw ka ti. Vawlei cung tuanbia kan zoh tikah Thawngthabia ruangah a nunnak a pe mi tampi an um. Harnak tampi lakah hehchat tiah an i ngeihmi Khrih khamhnak Thawngtha cu an phuan. Rev. Pa Hrang a rak rat lio i a chimmi ka lungah a taangmi tampi lakah pakhat cu MIT i BD a rak kai lio ah sianginn kai lo ni ahcun ka dangah kal in khamhnak Thawngtha ka chim tawn a ti. 

Pathian hneksaknak a teimi kan si ahcun hi bantuk hin kan si ve ding a si tiah ka ruah. A cawng lio mi si ko hmanh usihlaw Pathian nih hin hman a kan duh ve ko. Nain, a kan hneksaknak te kha kan tei khawh rih lo caah a kan hman rih lo bia tu a si tiah ka ruah. Nihin ah kan pawngkam ah khamh a si rih lomi tampi an um ko, nan hngalh, cio kan hngalh ciomi a si. Khi hna sinah Pathian dawtnak le khamhnak kong hi na chim bal maw? A siloah cu i a chuahpi dingmi ningzahnak maw a siloah harsatnak na tih ruangah dah na tuan ngam rih lo. Na tuar na in dingmi hi a lak a si lo dah kaw James nih cun nan tuar ruangah nunnak laksawng (mirang: crown of life) nan hmuh lai tiah a kan ti ko dahkaw. Phungthlukbia nih sui le ngun cu mei in hneksak an si a ti bantukin nang le kei zong Pathian hneksaknak hi a fak deuh khun men ko lai nain kan tei ni ahcun kan ruah khawh lomi le kan mit nih a hmuh khawh lomi laksawng cu kan mah caah asi ko lai. 

Bawipa nih thluachuah an pe cio ko hna seh. Amen!
Tampi ka lawm.

Tluang Peng



Sunday, May 3, 2015



Zohchun tlak Ngaknu

“Nun a nemmi cu lunglawmmi nan va si dah! Pathian nih an kamhmi hna kha nan co lai (Matt. 5: 5). “… nan lak i pakhat khat nih ngan a duh ahcun nan sinum a si awk a si. Ahohmanh pakhatnak si a duhmi cu nan sal a si awk a si. Cuticun pei Mi Fapa hi a si cu, rian tuanpiak dingah ka rat tung lo, mi tampi an rian tuanpiak awk le annih tlanhnak ca i ka nunnak pek awkah pei ka rat cu,” tiah a ti hna.” (Matt. 20: 26- 28).

Muidawh ngai tlangval pakhat a um i amah cu siangpahrang a si. Nupi kawl dingah a siangpahrang sinak vialte kha chiahtak in nupi kawl dingah aa thawk. Sal dirhmun in nupi ka kawl lo ahcun dawttu taktak ka hmuh kho sual lai lo ti a phang caah athuam vialte chiahtak in ramdang ah nupi kawl ding cu a kal.

Tlangval pa cu sifak santlai lo bantukte in le mithmai pante in lam ah cun aa chawk. Ngaknu pakhat kha a ton i cu ngaknu nih tlangval pa cu a hmuh le cangka in biatak tein a duh colh. Tlangval pa nih ngaknu cu bia a hal, “Na ka duh taktak maw” tiah a hal. Kan duh taktak tiin ngaknu nih a leh. A dongh tiang na ka duh kho bal lai lo, kei ka lam cu sahrang lak le hling lakah ka kal, cu bantuk lam cu na kal kho ve lai maw tiah a hal. Cenghngia le vate nih bu an ngei keicu lu chiahnak hmanh ka ngei lo tiah a ti. Ngaknu nih cu kan duh taktak ko a ti thiamthiam. Asi ahcun ka hnu ka zulh a ti i, an ram ah cun a tlunpi. Tlangval pa nih cun ngaknu hneksak duh ah lam a harnak zawn in a kalpi, ngaknu nu cu hling le saar lak a kalnak ah hling nih a chunhnak a taksa vialte hma in a khat. Nain zeihmanh phunzai lo tein dawtnak thinlung he a zulh.

Cu ticun, an ram ah an va phan. An ram an va luh cangka in kan siangpahrang a rak tlung nupi a rat tlun pi e, an ti i khuami an dihlak in an rak don. A nupi cu tha tein an thuamh hnuah siangpahrang lukhum cu an khumhter i an hmaiah cun an kun i upatnak an pek. Ngaknu nu nih cun, “sifak le zeihmanh a ngei lomi vaa maw ka rak ngei ka ti lio ah siangpahrang nupi maw ka si lai a mak tuk e”, a ti i a lunglawmhnak mitthli a tla.

Ka chim duhmi cu, Bawi Jesuh Khrih zong hi vawlei a rat lioah Pathian sinak in a ra lo, sal dirhmun, midang riantuan piak dingin a ra. Nang le kei kha a nupi bantuk in harsaknak, lungretheihnak, le ngaichiatnak he a kan thit. Mi nih zeirellonak, zawmhtaihnak ah kan taksa le kan thinlung cu hma bantuk a khat ko lai, harnak tampi kan tuar caan zong a um ko lai, a sinain cu bantuk caan ah phunzai lo, holh lo tein Jesuh hnu kan zulh ahcun, vancung ah siangpahrang nupi bantuk kan si ve lai.
Lawmhnak tampi he,
Filip Lian