(December 27, 2009) Zarhpini Online Sermon.

Christmas Thawngtha

By Dr. L. Van Cin Thang

Luke 19:10 “ Zeicatiah Mi fapa cu a tlaumi kawl awk le khamh awkah a ra,” tiah a ti.

Luke 2:11 “ Tu zan hrimhrim ah hin David khua chungah nan Khamtu kha a chuak cang- Khrih Bawipa cu!"

Japan ah atu bantuk caan December thla ahhin Television interviewer pa pakhat nih lam ah aa chok mi hna kha interview a tuah hna ti si. Ngaknu pakhat nute cu a dir ter i, “Christmas timi sullam hi zeidah si” tiah a hei hal. Ngaknu nute nihcun nih pah buin.. “aaa… ka theih ve lo, Jesuh thih ni khi si ko lo ma?” tiah a leh ti si. Chim duhmi cu Christmas sullam hi kan hal cio hna sehlaw, a sullam kan hrilhfiah ning le kan langhter ning aa dang cio men lai dah. Atawinak in cun, Christmas timi cu Pathian nih vawlei mi a kan khamh ni tiah kan ti khawh. Zeitiahcun kan caah Bawipa Jesuh vawlei ah a rat ruangah nunnak le khamhnak pe kan si. Cu caah Christmas timi zeidah si timi nakin zeitindah kan hman, kan cohlan timi hi abiapi deuh in ruah a hau tiah ka ruah. Cun Christmas kan ti tikah kan Bawipa Jesuh Krih a chuahnak kong lawnghi a sawh duhmi siloin a thihnak (mission of the cross) zong hi a phuan chung chih cang. Christmas carol hla kan sakmi hna zong hi Cross mission phuan pakhat a si ve. Tu zingah thazang ilak tti dingin ka duhmi cu: David khua chungah a chuahmi Khamtu Bawi Jesuh (Luke 2:11) nih a rak kan phorhmi thawngtha/ laksawng tampi lakah pahnih kong hi a si. A pakhatnak ah;

Kawlnak: Kan Bawipa Jesuh vawlei ah a rat lai nak kong hi Bible chung profet cheukhat (Isaiah, Jeremiah, Hosea) nih BC 700 hrawngah an rak chimhchung cang. Zeitiahcun Pathian nih vawlei mi khamh awkah timhtuahnak a rak ngei cia cang. Paul nih a timi cu “Sihmanhsehlaw caan cu a hung phak tikah, Pathian nih A Fapa kha a run thlah. Nu chung khan a hung chuak i Judah mi Nawlbia tangah khan a um, cu cu Nawlbia tang i a ummi hnakha luatter awk le kannih kha Pathian fa i canter cak caah a si (Gal 4:4,5). Hika i “caan a hungphak tikah” timi nih a langhter mi cu Vawlei pi hi Pathian khamhnak kan herh cang, Khamtu kan caah chuah a herh cang, a tlaumi kan si,” ti hi a si. Atlau mi thil cu kawltu um locun va tlau thai ding khi a si hnga. Tlau timi cu “um nak ding hmun ah um loin hmundang pi ah va um khi” a si ko. Phundang in chim ahcun kan umnak le sining ihngalh lo khi a si. Kawltu ngeilo le a tlaumi ka si lio caanah kan mah kawl awkah Bethlahem ah Bawipa Jesuh a hung chuah. Cucu Christmas kan timi cu a si i, kan caah thawngtha nganbik a si. Cucaah Unau hna, a kan kawltu he kan i ton hi a biapi ngaingai mi a si. Jesuh kanmah kawl awkah vawlei ah a rak tum nak hi kumsau pi a si cang ko nain nihin nitiang a hman (valid) zungzal mi hi kan caah thawngtha nganbik a sinak cu a si.

Khamhnak/Nunnak: Jesuh vawlei ah a rat cu kanmah kawl awk lawng siloin zungzal nunnak pekawk le khamh awkah a si (Luke 19:10),Pathian fa siter awkah a si. Jesuh nih “Midingmi hna kawl awkah siloin misual mi hna kawl awkah le kham awkah ka ra” a ti. Misual mi hna khamhnak kan hmuh mi hi Christmas i a muru te cu a si. Kan Bawipa Jesuh vawlei ah a rak tum i, Bethlehem khua aniam biknak hmun cawrawl einak kuangah a chuahnak nih kan tuanbia a thlen pinah vawlei pi tuanbia zong a thlen chih dih. Kan tuanbia thatlo mi vialte (zeitik hmanah khamhnak a hmuh kho ti lo dingmi dirhmun) a kan thlen piak dih. Muinak in ceunak ah a kan chuahpi. Ruahchanhnak a kan pek. Kan caah Khamtu a hung si i, nunnak thar (zungzal nunnak) a kan pe tu a si. Cu khamhnak a kan petu kan bawipa Jesuh Krih cu a ka khamtu bawi a si tiah kan cohlan taktak lawngah nihin Christmas hi kan caah sullam le man a ngei hnga.

Dawtmi unau hna, hi ni caan sungluai mi, kan Bawipa Jesuh chuahnak ni caan hi holiday in maw kan hman deuh awk si, holy day in maw ti hi tuakawk ngaingai a si. Pathian fa le pawl caah, hi nicaan hi caan sungluai bik ni a si bantukin thil dang nakin kan Bawipa Jesuh cu kan thinlung ah hmunhma thabik (first priority) pek i kan conglomh awk a si. Kan upat awk a si. Kan caan, kan ruahnak le kan nunnak zong a thiangmi Christmas lungput he hman khawh izuam cio hna u sih. Christmas lungput timi cu Khrih lungput ngeih khi a si ko. Cucu “ Pathian nih an(Josep le Mary) mang ah Herod sin i kir ti lo ding i, lam dangin an ram ah kir than dingin a rak chim hna (Matt2:12) bang khan kannih zong nunhlun kha kaltak i Khrih ah nunnak thar (II Cor 5:17) ngeih ding khi kan si ve. Thlarau thazang thar ilak ding kan si ve. Kan Christmas lungput cu Pathian thlarau nih a hmun a rolh zong a herh. Cun Pathian fa le caah cun Christmas hi December thla theng te lawng ahhin siloin nifatin te’n a si awk zong a si fawn.

Nihin kan Bawipa Jesuh cu nang le kei kawl awkah le khamh awkah a sangbiknak hmun in a niambiknak hmunah rak tum riangmang i thawngtha/laksawng a rak kan phorh mi cu pumpak pekchanhnak he conghlawmh cio hna u sih. Paul nih a kan timi cu “ nifate in pei ka thih deng lengmang ko hi”( I die daily) (I Cor 15:31). Jesuh caah nifa te in nun hi Jesuh caah kan laksawng sungbik pakhat a si ve. Kan nunnak ah kan herhbik mi cu a zeidang nakin Khamtu Bawi Jesuh hi a si. Catial thiampa pakhat nih a ti mi cu “Minung nih kan herh bikmi hi seh lei thiamnak (technology) a si ahcun Pathian nih Scientist hna a rak rat ter hnga i, phaisa a si ahcun chawleh thiammi (economist) hna a rak rat ter hnga. Sihmanhsehlaw misual nang le kei nih kan herhbik mi cu Khamtu a si caah Pathian nih a kan Khamtu Bawi Jesuh a rak kan peknak hi a si”. Cucaah dawtmi u le nau hna, Pathian nih a kan pekmi sungluai bikmi laksawng a fapa Jesuh Krih cu pumpak in a cohlan mi ca lawngah sullam a ngei i, nunnak taktak a si caah thinlung le nunnak dihlak in cohlan hna u sih. Conghlawmh cio hna u sih.

Nan dihlak cungah Christmas lawmhnak le deihnak um ko seh!

(December 20, 2009) Zarhpini Online Sermon.

Tho u sih law sa u sih

By Andrew Mang Len Pau

Nehemiah 2:17,18.

Biadomhnak

Christmas zong cu a nai cang. Phungchimtu hna le catialtu hna tam deuh nih cun Christmas he pehtleih in an chim an tialmi a um cang ko lai.. Hi thla hi vawileicung Khrihfa vialte nih an i ngaihtukmi thla cu a si. Kannih Laimi zong nih kan ni ngaihtuk ve. Zeitluk indah kan ni ngaih hna tiah cun December ni khat in Christmas tu ah cu kan ni thawk cang hna. Christmas le NewYear caan hi kannih zumtu hna zong Thlarau lei le pumsa lei in kan nunnak le kan ruahnak kan i tharchuah caan le zumhnak ruahcahnak thar he kan nun nak Pathian sin ah kan pek caan a si . Chim ka duhmi cu hi thla hi kan nih Laimi hna caah cun pumpak i check nak thla a si.

Nihin kan ram le kan mi phun sining hi a ho pohnih theihdih a si ko. Laimi zapi nih kan chim uar deuhmi cu kan lairam kong a si ti loh. Kan phung le kan lam kongzong a si ti loh. Kan chim uar deuhmi cu ram dang kong a si deuh cang. Kawlram lei kan chawnh tikhna zongah Lai lei kong a tam ti loh. Kan chim cio deuhmi cu Malaysia, Austrilia le American etc…hi a si ko hna.. Curuangah tu thla ah hin Kan ram kan mi phun caah thiltha zeidah kan tuahlai ti le, ka ram le ka miphun hi kan zawnruat taktak maw ti hi pumpak te in i check hna u sih ti ka duh. Nehemiah nun hmang in kan van zoh hna lai cu!

Nehemiah cauk hi B.C. 443 hrawngah an rak tialmi a si. Cauk hmete a si ko na tein cawnawk tlak thil tampi a um .A kong cu Bibal ah kan rel cio ko cang caah tam chim ka tim lo. A nunnak nih a kan cawnpiak mi le a kan hmuhsakmi thil pakhat hnih tu kan zoh ti hna lai cu!

1. Ram le Miphun caah thlacam a cawnpiak

Suza i Siangpahrang inn ah a um lio ah Judah lei in a unau le a hawi le nih an rak tlawng. Nehemaih nih a nung rihmi Judah mi (sal in chuahmi) hna kong le Jerusalem khua kong kha a hal hna. A u nau le a hawi nih Jerusalem khua i an dirhmun le an khuasakning cu an chim. Nehemiah cu an chimmi an bia a theih bakah a thu i a tap. Saupi ngeihchia in a um i rawlulh in thla a cam colh (v. 4). Dawtmi u le nauhna, nihin ah hmunkip kakip in kan lairam le ramdang a peemmi u le nau hna kong cu kan theih peng ko hna. Anih caah kan tap bal maw? Rawl ulh le biatak in thla kan cam piak bal hna maw? Nehemaih nih, rawl ul thlacamnak ah biapi in a chimmi cu a mah le a innchungkhar nih an tuahmi sualnak le Israel mipi nih an tuahmi sualnak caah ngeihthiam hal a si. Kan nih tah zei tin…? Ni hin kan nih kan thlacam he cun a dang ngai ko. Nihin kannih kan thlacam micu kan mah pumpak nun nawmhawk le duhdimnak caah an si deuh tawn. Cu caah Pathian kan biak ning le kan thlacam ningzong hi i check than hna uh sih.

2.Ram le miphun caah tuan a kan cawn piak

Jerusalem kong an chimh lioah Nehemiah a ngeih a chiat ter bikmi cu Jerusalem kulhnak vampang a cimhnak kong hi a si ko lai. Siangpahrang inn ah um i khuasak riantuan cu zei tluk in dah aa nuamh lai mu!. Nehemiah cu thlacam lawngin a ram le a miphun a dawtnak cu a donh ter loh. Siangpahrang sinah a kal i a mah bak nih va kal i va remh dingah nawl a va hal. Siangpahrang hmai valuh cu a ngeihlah tuk ko lai . A si natein ram le mi phun caah thih le thih nun le nun ti bakin a va tawn ko. Kan nih tah kan ram le kan mi phun caah Nehemaih bantukin kan ngamh hnga maw? Jerusalem a phanh hnu zongah pumpek in hruaitu dir hmun ah a dir thiamthiam.. Pathian bia in lungkhat pumkhat si ding in thazang a pek hna. Cu lawng si loin amah bak nih a tuanpi hna. A ram le a miphun hna caah cun a mah a philh peng. A mah ca a ruat bello. Kannih tah a mah bantukin kan huam hnga maw? Mahzawnruat lo hruaitu tha hruainak tangah mipi an tangrual i, Jerusalem khuakulhnak vampang cu ni 52 bak ah an lim ko.

Biadonghnak

Khua pa khat a dir khawhnak a hrampi pakhat ah a tel ve mi cu khuakulhnak vampang hi a si. Ni hin kan miphun le kan ram kanzoh ah ,kan zumhnak hauhruang vampang cu a rawp thluahmah cang (Religious wall). Kan sipuazi vamping zong hi a rawk cuahmah cang (Economic wall). Fimcawnnak kan vampang zong hi a cim caumah cang (Educational wall). Kan vampang vial te cu mei nih a hrawh dih cang hna (1:3).

Kan ram le kan miphun siamnak dingcu kan mah rian a si. Cu remh nak ding ah Pathian nih tuanvo a kan pek. U le nau hna …Nehemiah nih a unau Judah mi pawl sin ah thazaang pek nak bia a chim mi bang , kan nih vial te zong nih “tho u sih law sa u sih.”

(December 13, 2009) Zarhpini Online Sermon.

Hnerhte Sin In Zeibantuk Umtuzia le Fimnak Dah Kan I Lak Lai?

By Lal Awi

Bible caang Thim: Maw zaangthupa, hngerhte sinah khin va kal tuah; an umtuzia khi va ruat hna law fimnak i lak tuah. Bawile upa le uktu zeihmanh an ngei lo nain, tthal caan ah an rawl kha a timh hna i rawlttuan caan ah an i caw

mnak ding kha an pumh an khawmh hna (Phungthlukbia 6:6-8).

Lunglomhnak: A hmasa bik ah caanttha caan sunglawi a kan serpiaktu kan biakmi kan Pathian a min thangtthat si ko seh. Cun, thawngtthabia chimnak caan a ka pe tu PCCF-ttuanvo ngeitu kan upa le hna nan cung zong ah lunglomhnak biachim ka duh fawn.

Thawngtthabia:

Kan thawngtthabia i hrawm ding mi ah kan lut colh lai. Kan Bible caang-thim mi van rel bak ah a lang colh mi thil drama pathum an um. Cu hna cu Cawnpiaktu, Zaangthupa le Hngerhte an si. Tutan ah kei kha thawngtthachimtu le cawnpiaktu dirhmun ah ka um tik ah cawnpiaktu mifim ka si tinak lei ah si lo in ( cun, nan nih kha zaangthupa kan tinak hna zong a si hlei fawn lo) kan zapi te nih Hngerhte sin in zeibantuk umtuzia le fimnak dah kan i lak lai ti kha ka duhnak bik cu a si. Cucu pumpak kan sican ning le dirhmun ca tiang lawng ah si lo in kan Lai miphun huap in van zoh kho u sih law tiah kan sawm duh hna.

Hngerhte (Harvester Ants) sin in pumpak kan caah siseh, cun Laimi kan dihlak nih umtu-ziaza le fimnak kan i lak ding ah a herh ko tiah ka ruahmi thil pathum in ka rak langhter lai:

1. Nun i hrawmhnak le Nun i cheuhnak

Kan theih bantuk in, hngerhte nih rawl le sa ei ding mi ai hmuh le a ton a si cun a rauhhlante ah a dang hngerhte vialte zong a sin an phanh pi a chimh hna i, ti le rawl ei din ding mi an hmuh mi cu an i hrawm cio kho hna. Zeitindah rang ngaingai in an i pehtlaihkhawh ti hi khuaruah har ngaingai a si. Mobile Phone zong an ngei lo i Internet in mail zong an i kua fawn hna lo. Scientists nih an chim ning ahcun chemical smells in an i pehtlai e an ti.

Laimi zong nih cu nunzia cu i cawn kan herh ngaingai. Lawmh a um tuk tawn tiah ka ruah mi cu Lai-forum, Rungcin, Metkhuabo, YCCf biaruahnak ah kan rel tawn mi cu hika hin rian ttuan ding a um e tiah thawng kan i thanh tawn mi te hna, Cuka college le University ah sianginn kai khawh, training kai khawh a si tiah thawng kan i thanh mi te hna le ramdang hmundang ah Laimi tampi fimnak kan cawn khawhnak ding ah lamsialtu vialte hna thawng, Mautam ruang ah Lairam ah paam a tlung i cu kan paamnak le sifahnak chanhchuahnak ding ah hetchet tiah rian ttuannak vialte hna le Concert hna tuah mi te hna, a dang zong an tampi rih.

Cun, kanmah PCCF sining le dirhmun in kan chim a si ahcun sianginn kan luhkhawhnak ding ah pakhat le pakhat sianginn arem bik lai le a ttha bik lai tiah kan i chimh tawn mi tete hna le visa kong he pehtlai in ruahnak kan i cheuh mi le kan i bomh mi pawl hna zong hi an si ve ko. Kan dam lo kan zawt kan fah le ngaihchiatnak kan ton tik ah pakhat le pakhat kan i zoh le kan i hramh te hna zong hi an si. Pakhat nih phaisa hman ding kan ngeih lo can i kan lungre a theih tuk lio ah hawile nih nan kan hman ter mi te hna zong khi an si.

Pakhat le pakhat zawnruahnak thinlung he kan inn pa le chakthlang sin ah, kan Laimi miphun hawi sin ah, kan minung hawi sin ah hika hin tilerawl ei ding a um e, rakra ve ulaw nun rak i hrawm ve u... ti mi dawtnak awthawng hi thang chin lengmang ko seh ti hi thla ka cam. Keimah ka pawkhim ahcun a za ko, midang zeiti an um zong ah ka zei poi lo... ti mi thinlung put cu um hrimhrim hlah seh.

2. A hlan kan in thil rak hmuh kho tu si nak, i timhtuahnak ngeih cia peng le rian fak pi in ttuannak

Kan Bible ah kan rel le kan hmuh bantukin hngerhte cu tthal can ah rawl an khawn hna i ruanttuan can ah an rawl kha an pumh hna ti a si.

Tanghnih kan cawn lio ah a si rua tin ka ruah. Kan rak cawn bal mi pakhat cu “Hngerhte le Khautezik”(pazuatseih and Hnankawng) ti mi tuanbia a si. Cu tuanbia ahcun Hngerhte cu tthal caan ah rian fakpi in le teimak taktak in rian a a ttuan. A ttuan mi chung in a hmuh mi rawl pawl kha a ei dih in a hmang dih bal lo. Hmailei ca-ah tiah khon mi le chiah mi a ngei peng ti a si. Sihmanhsehlaw, Khautezik cu tthalcan-caanttha a ngeih lio ah rian ttuan zuam lo in a um. Nuamnak lawng a rian. A ttuan ko zong ah nikhat a ttuanmi nikhat ah a ei dih peng ti a si ko hnga. Fur caan a chuak, ruahpi a van sur cang i eiawk le dinawk ah rianttuanawk a tthat ti lo tik ah Khautezik cu awklokchong-vansang au in a um. A donghnak ahcun, ka thih cang ne ttung lai, thihnak cha cun tiah Hngerhte sin ah rawl ei awk a va hal ti khi a si.

Laimi hi a tlangpi in kan sining le kan khuaruahning, kan rian ttuanning culture zoh tik ah proactive si lo in reactive lei hi kan si deuh tawn. Cucu pakhatnak ahcun kan tha a thut ve ruang zong ah a si kho men. Cun caan tampi ah, kan ruahnak nih a phanh khawh ve hrimhrim rih lo zong a si kho. Cun proactive ngaimi kan si zong ah a phunphun ruang le sining ruang ah reactive kan si nak zong cu a um ve ko lai. Chim duh mi tu cu kan khuaruahning ah le thil kan tuah-tuannak ah hmuansam hmuansam tal in cun proactive lei ah i thlen cu kan hau ko ti hi kei ka hmuhning a si. Cucu miphun kan tthancho khawhnak ding ah le mi puithling kan si khawhnak ding ah a herh ngaingai mi a si tin ka zumh.

Ramkhelnak lei in kan zoh a si cun kan hruaitu tthattha hna a cheu khat cu proactive ngaimi minung kan ngei hna. Cucu kan van a tthat ngainak a si. A sinan a cheu khat politicians pawl ve zong cu ralkap cozah nih thil a ttha lo mi an tuahmi le an rianttuannak kong he pehtlai in an phunzai thlorchiar sawhsawh fang lawng khi a si tawn hlah maw aw ti khi ruahnak a um tawn. Cu bantuk phunzai le i ceihcum sawhsawh nak nih kan ram a thleng ter kho lai lo i, kan miphun zong a tun mer kho theng lai lo.

Cun, ruahawk a um ngai mi cu, kan miphun tuanbia rel le zoh tik ah a tlangpi in, kan pupa hna chan in a tutiang zong ah , Kawl he kan i pehtlaihnak ah le miphundang he kan i pehtlaih-kawmhnak zong ah kan dirhmun hi passive tiang lawng dirhmun hi kan si tawn hna. Cucu Lungfak ngai kan si nak cu a si.

Cu bantuk cun biaknak lei hruaitu zong rian tampi kan ngei. A bik in siahngakchia a si mi kan dihlak nih a tu lio can hi timhtuah-timhlamh lio can, caan ttha ka ngeih lio caan a si ti i theih peng hrimhrim a hau. PCCF chung ah ah thil harsa tete kan ton lengmang tawn. A ruang cu proactive minung kan si lo ruang ah a si tawn i kan ton mi pawl hna, kan passport kong le immigration ah siseh, kan visa kong ah siseh, kan sianginn kainak ah siseh, kan chawleva kan hmanning cio kong ah, etc an si bik tawn. Reactive minung kan si tawn ruang ah kanmah le kan mah harnak kan i pe tawn i a herh lo ah risk kan tuah mi pawl zong an tam. Cun a herh lo ah a hlei in phaisa zong a dih khun tawn.

Cun mi tampi cu kan nunnak le kan sican ning ah sonhtarnak (excuses) chim ding hi kan ngei tuk tawn. Laimi ka si ruang ah, uknak tthat lo ruang ah, kan sifah harsat ruang ah, curuang ah- kha ruang ah ti khi a si peng tawn. Cucu a ttha lo ngai mi a si tin ka ruah. Caan tampi ahcun excuses kan ngeih mi pawl hi a hman taktak ko lai. A si na in kan mah le kan sining le dirhmun te in a tthabik lei dirhmun ah kan phak khawh ding in i fak pin zuam ding kan si. Cun a taktak ahcun vawlei cung minung pohpoh hi excuses chim ding cu an ngeih dih cio ko hna lai i cu ngeih cio ko bu ah fak pi in ai zuam mi minung kha a puitling mi ah ii chuah mi an rak si ko. Cun Excuses kan ngeih mi pawl hna hi can tampi ahcun kan tha a thut deuh ruang ah le a hlankan in thil timhtuahnak le rian ttuannak kan ngeih lo deuh ruang hna zong ah a si ve kho tawn.

3. Lungrualnak

A pathum nak i hngerhte sin i kan hmuh khawh rih mi umtuzia le fimnak cu team spirit a si. Hngerhte nih rawl le sa an i hmuh si cun pakhat-hnih nih an tuankhawh lo mi le an tei lo mi cu an zapi te in an i bawm, an i zawn hna i ttangrual te in an khur le kua ah an tlunh-phurh tawn. Phundang in kan chim a si cun lungrualnak an ngei kan ti lai.

Laimi kan mifim deuh hna le catial thiam hna nih an ttial-an chim tawn mi cu Laimi cu Khua, Peng le Tlang thinlungput a tthawng tuk, kan ngei tuk ti hi an ttial an chim tawn lengmang. An ttial duhnak le an chimduhnak chung in a fiang ngai in a lang mi cu, cu thin lungput le ruahnak kan ngeih mi cu tthanchonak lei kan karhlannak ah le rianttuannak ah a kan dawntu ngaingai a si ti khi a si tawn. Cucu nan rel lengmang mi le nan theih lengmang mi bia cio a si ko lai.

Kei cu hi kong he pehtlai in kaphnih in ka ruahnak a si zungzal. Cun Khua, Peng le Tlang thin lungput a tthawng tuk tiah negative ngai in criticize an tuah ngai tawn mi hi kei ka philosophy ahcun positive ngai in ka hmuh chel caan a tampi. Cun can tampi ah kan semnak le chuahnak kan khua cio dawtnak thin lungput a tthawng ngai mi le hetchet tiah si khawhning cio in tthancho khawhnak ding i an i zuam mi le fak pi in rian an ttuan mi hi thil ttha tuk a si tiah ka hmuhning peng a si. Mah balte kan miphun i lungruallo nak nih a chuah pi mi result an si hna ding cu a si hrim lo. Cun a si lai ti zong ka zum fawn lo.

Voi tampi cu British ka hawipa he Baguio City he ai hlat ngainak khuate ngai pakhat ah ministry kan tuah tawn. Philippines ram cu ram sifak kan ti ko bu ah, Democracy ram ti cu, an khuate zong ahcun lam tthaten an cawhpiak hna, dinding ti an khuachung ah an ngei kho, mei tthaten an pek khawh hna. A si nan, cu khuate i khua a sa mi minung i an khur khuaruahnak le thin lungput cu a si a fak ngaingai tin ka hmuh. Thinlung khurkhuaruahnak ah an si a fah tuk ahcun a lulu in innlo-khuasak tintuknak lei zong nih a zulh colh ve ko. An fa le hna sianginn kainak kong ah thazang an pe bak hna lo i sianginn an kai hna lo. An fanu le hna ai dawhdeuh poh cu Japan le Middle East ( Arab) lei ah entertainment rian (Bar i lam rian)) ca ah khuapi i um mi mirum pawl nih an chawhhmuhnak le chawlehnak ah an hman hna.

Hi bantuk hmun ah rian kan ttuan fatinte Lailei kan khuate sining kha ka mitthlam ah a cuang tawn. Hika zawn ah fiangngai in hmuh khawh a si mi cu, kanmah Laimi bantuk in mah Laihri tannak khua dawtnak thinlung an ngei lo ca ruang ah le pakhat le pakhat i bawmhnak le fim i chimhnak a um lo ruang ah hi thiltiang an cannak le an tonak hna ve hi a si tin ka hmuhning a si.

Cun khat lei ah, a kan hruaitu le mifim kan ngeih mi nih an kan ti tawn bantuk in, kan Lairam ah Khua, Peng le Tlang thin lungput fak tuk in a cah le a tthawn tuk ruang ah a ttha lo mi thil a cang mi le a chuak cia mi le chuak ding mi tampi a um taktak. Cun, hi zawn ahhin kan i ralrin ding a herh tuk mi a si. Miphun huap in rianttuannak le cawlcanghnak ah Khua, Peng le Tlang thinlungput a thawntuk i cu nih cun hmunkhat ah rian a kan ttuanter khawh lo i, cabuai pakhat ah tthu in ah bia a kan ruahti ter khawh lo ahcun cucu kan miphun ca ah a poi cem mi le kan zawtnak ttihnung taktak thil a si ding a si fawn. Cun, hi thin lungput a thawn tuk sual cun hruaitu ttha kan ngeih mi hna cu hruaitu si kho lo in um khawh a si i, cu nih cun i miphun ca ah kan sunghnak taktak a chuak kho mi a si fawn. Cu ca-ah cun kan miphun nih hngerhte sin in i lungrualnak, hmunkhat ah rianttuanti khawhnak thin lungput, ziaza le fimnak i lak kan hauh tuk nak cu a si.

Biatlangkawmnak: Laimi phun hi miphunpi pakhat kan si ve. Kan miphun kan sican-ning le kan tuanbia rel le zoh tik ah lungfah can a tlawm hrimhrim lo. Kan lungfah tiang le kan phunzai tiang lawng maw a si lai? Sinaisaihlah! Kan dihlak in kan liang cung ah ttuanding mi rian tampi ai khinh ti mi khi kan theih peng ding hrimhrim a si i kan ttuan ding hrimhrim zong a si. Cu rian kan ttuan hna tik ah, kan herh ngaingai mi, kan miphun nih kan i ngeihding mi ziaza, thinlungput pawl hna cu:- Nun i hrawmhnak le i dawtnak; Hmailei ah kan ton hnga ding mi hmu kho cia tu si nak le i timhtuahnak ngei in fak pi in rian ttuan le Lungrual te in rianttuan ti khawhnak hna hi an si.

Thawngtha ai hrawmmi kan dihlak Bawipa nih thluachuahnak kan pe ko seh. Amen.

(December 6, 2009) Zarhpini Online Sermon

Christmas Lungput lak ah ka uar ngai mi

“Lungput Pakhat”

Rev. Dr. Za That

Bible Caang Thim: Matthai 2:14, Josef cu a tho i ngakchia le a nu cu Izipt ram i zampi awk ah zan ah khan a thawhpi hna.

Biahmaitthi: Laimi nih kan ngeih mi puai lak ah a sunglawi khun mi hna cu Christmas le Thawnhthan hi an si. Cu hmanh ah cun Christmas hi kan inuam khun. Philippines ah cun October thla cheu cun Christmas hla an chuah le Christmas thlam a len ter cang. Kan nih laimi tu cu December nikhat a hung chuah bak in Christmas thla kan phan kan ti le zei kan tuah mi paoh ah Christmas thlam kan len ter le kan langh ter ve. Kei le bang cu December a hung chuah bak in cun kan ram le kan khua, kan Khrihfabu ngaih a zual khun. Kan no lio can ah cun hawi he ram kan riak, sur kan hrawng le zankhua dei khuasih zong kan thei lo. Zudawn hna kan van riah i zan khuadei pheikalh or cep kan ven cu a nuam hringhran ve mi pakhat ah ai tel mi a si. Cu vial te cu ram dang ah hmuh khawh lo mi le tuah khawh lo mi an si hna le Christmas can ah hin cun lung a leng khun i khua lei le chungkhar cu ngaih a um khun ko. Hi lunglen can theng le khua lei ngaih lio can theng i Online sermon ka van tinco ve cu pathian min ka thangtthat. Ttuanvo ngeitu PCCF upa hna nan cung ah lunglomhnak bia ka vun chim fawn.

Kan Sermon chung ah van lut colh ko hna uish law, Christmas lungput hi a phunphun in an chim tawn. Herod lungput, Minfim hna lungput, Mary lungput, Josef lungput, Tukhal hna lungput ti bantuk in sermon ah ka theih pah tawn. Tutan ah hin a ho lungput tiah chim awk zong ka thei setsai na lo pi khin Christmas lungput lak ah ka uar ngai mi lungput pakhat ka hei ti ve phawt ko le cu lungput cu van ruat cio in van sut hlam tuah hna usih!

Voikhat cu pakhat pa rap a chiah cuahmah ti a si. A chiah cuahmah lio ah cun mi pakhat a ra le, na rap chiah cu a awh maw ti ah a van hal an ti. Rap a chiah cuahmah mi pa nih cun, na hrut maw rap chiah lio ah cun zeitindah awh seh na ti tiah aw hrang ngai in a van leh ve ti a si. Mipa nih cun a van leh ve tthan mi cu “na rap cu na chiah lio i a awh lo ah na luah hnu ah maw a awh te ne lai” tiah a vun ti ve tthan an ti. Hi hna pa 2 bia halnak le bia lehnak hi a biafang in thlir i nang maw kei ti in i al ah cun i tei awk ah a har ngai ding khi a si.

Bawi Jesuh chuah lio can ah khan Heord nih kum 2 tang ngakchia caah mi lurelnak a tuah ding mi le a thah dih hna ding kha Pathian nih a rak hngalh cia cang. Mi khamhtu Jesuh zong cu thah ding ah ai tel ve. A ruang cu kum 2 tang hngakchia a si ve ruang ah a si. Jesuh thah lo ding in luat ternak lam hi Pathian nih hin a phunphun in a tuah khawh ko lai dah. A duh ah cun Herod zong kha a nunnak tiang hmanh a lak khawh ko. A duh ah cun Herod lungput zong a thlen khawh le a rian zong in a dinh ter khawh. Nawl ngei lo zong ah a chiah khawh ko. Herod teinak ding caah Pathian nih zei paoh a tuah kho ko nain dohnak le teirul icham in nang maw kei tiah rian a ttuan lo. Herod teinak ding caah Pathian hriam nam ttha bik cu Herod hrial kha a si, Matt. 2:14 ah kan hmuh ban tuk in “Josef cu a tho i ngakchia le a nu cu Izipt ram i zampi awk ah zan ah khan a thawhpi hna”. Herod a hrial ter hna tik ah Herod nih Jesuh cung ah le a nu le a pa cung ah fahnak le rawhnak zeihmanh a ttuah kho lo. A donghnak ah cun Pathian nih Herod cu a tei i Jesuh cu vawlei ah Bawi bik ah a hung cang. Mi vial te Khamhtu ah a hung cang. Jesuh Khrih cu Bawipa a si (Filipi 2:11).

Mi bu pakhat a si lo ah Khrihfa bu chung i rian kan tuannak cio le kan tthut kan dirnak cio ah hin mi dang he ihua hlah usih, dawntu si hlah ning, mi dang thil rit si hlah ning ti kan duh ah cun piahtana (problem) a si ding mi thil tuah le ttuan le bia chim hna khi Josef le Mary nih Jesuh he Herod an hrial bantuk in hrial khawh izuam hna usih law Pathian duh ning a si deuh ko hnga lo maw tiah ka ruat tawn. Nang maw kei tiin kan i entainak le tthawn le nawl ngeihnak (power) kan icuhnak nih hin kan khua le kan Khrihfa bu hna ah hin damlonak le rawhralnak hna a chuah pi tawn. Tahchunnak ah Khuabawi nai cuh ruang i nan khua a dam lo le a zawt peng ding ah cun khuabawi cuhnak khan chuak law zam diam ko. Senior Pastor nai cuh ruang i na Khrihfa bu a dam lo peng ding ah cun senior Pastor cuhnak khan chuak law zam diam ko. Founder le president si nai cuh ruang ah bu tthen hmalnak le dohkalhnak a chuah ding ah cun nangmah tu kha i phet diam law zam diam ko, hrial diam ko hna. Nangmah he ai cuh mi hna an dam le khua mi le Khrihfa bu an tthat kha ilawmh awk a si ko. Nangmah an raltu le an duh lo tu hna zong an ziamh caan le an tha a dih caan le an dongh caan a phan ve te ko lai. Caan nih bia a chim ve tik ah cun nangmah kha Khuabawi, President le Senior Pastor ah an in hlam caan a um ve te ko lai. Cu tikah cun daihnak le remnak, dawtnak le zawnruahnak a karh lai. Na rian ttuannak cu a ngan chin lai i na ram cu a kau chinchin lai.

Pathian nih khan Herod kha rak dodal in Jesuh luatnak ding caah lam dang rak kawl seh law piahtana phun dang in a chuak kho tthan men. Lehrul lo le dohdalnak um lo tein a hrial tu in a hrial ter ziar hna tik ah Jesuh Khrih cu Bawipa a sinak le mi Khamhtu a sinak tu ah a lam a tluang. Vawlei teitu ah Pathian nih tthawnnak a pek. Herod tu kha lung rethei in vansang a laam. Jesuh teinak ding ah zeihmanh a tuah kho lo. Cu caah cun sawm kan duh mi hna cu Christmas caan nih hin “Mi Dang Kianhkhawhnak, Hmunhma Pekkhawhnak le Hrialkhawhnak Lungput” hi kan ngeih ter cio seh law cu nih cun kan ram le kan miphun, kan Khrihfa bu a dam ter deuh hnga maw, a tthawn ter deuh hnga maw tiah Christmas Lungput lak ah ka uar ngai mi Lungput Pakhat ti in tlang ka tar duhnak le ruah tti aw ah kan sawm duh mi hna a si.

Christmas Lomhnak le Hnangam Daihnak cu nan dihlak cung ah a thar in tlung ko seh. Amen!

(November 28, 2009) Zarhpini Online Sermon

Zeiruang ah dah sal ttha lo kan si?

By Bei Rona

Ttizah upat awk tlakmi Lai tlai U le Nau,Ni le Far hna,Online in thawng ttha chimh ding ah ka tlak lo buin nan ka thiah ve caah a kan hruaitu kan U le hna cung ah le,nan zapi cung ah kai lawmtuk hring hran. Chimh ka duh ve mi hi Mathai 25:14-30 chung sal pathum hna bianabia hi a si. A sau ngai i,ka ttial lo, zaangfahnak te in rel hram uh tiah kaan nawl ko hna.

Hi ka Bible nih a kan chimh mi sal pathum hna bianabia lak ah hin a pathum nak peso 1000/pekmi pa kong hi chim ka duhmi a si nain zei ruang ah dah tluk cio tein a pek hna lo ti hi chimh chih ka duh.

01.Tluk cio tein pek lonak
Zei ruang ah dah an Bawipa nih hin tluk cio tein a pek hna lo ti hi ruah awk a phu mi a si. Pakhat pa/nu peso 5000/ a pek, cun a dang pakhat pa/nu peso2000/ a pek, cun a hnubik pathumnak pa/nu hi peso 1000/pek ti a si. Zei ruang dah a si? A pakhatnak pa/nu peso 5000/ pekmi pa /nu hi Dr a si caah a si tiah ka ruah. Cun peso 2000/pek mi pa/nu hi master a si lai tiah ka ruah. Cun peso 1000/pekmi pa/nu hi Bachelor a si lai tiah ka ruah. An Bawipa nih hin an cung ah duhdannak (or) thleidannak a ngeih hna siloin an thil tikhawhnak le thazang an ngeihmi theih piak bu te in a pek mi hna a si ko tiah ka ruah.

02.Peso 1000/pekmi pa/nu kong
Zei ruang ah dah peso 1000/ a tlawm bik a pek? A fimnak le thiamnak,a thil tikhawhnak a hme deuh rih caah a mah le a tikhawh dingmi tawk tein a bawipa nih a pekmi a si. Dr le Master hna tluk in a ruahnak ah siseh, theihhngalhnak ah siseh a phanh rih lo caah a mah le a tikhawh ding mi tawk kha a bawipa nih a hngalh piak caah peso 1000/hi pek a si nain a ti kho ko ding mi kha vawlei a cawh riangmang i tang ka cu a va thuh diam.

A hnu ah an Bawi pa cu a rat than tik ah a dang Dr pa/nu, le Master pa/nu pahnih cung ah a lung aa lawm caah, ra law ka lunglawmhnak hi I hrawm uh a ti hna. Nain peso 1000/pekmi pa /nu cu “mi zaangthu, sal ttha lo” tiah a ti. Cu lawng hmanh za lo ee! tang ka kha la uh law thonghra ngeimipa kha pe uh a ti.(ka hawi pa hi mi piahtah ngaimi a si i, Ceiseh! a ti. Ziah ka ti i a dang 5000, 2000 pek mi hna hmanh zumh tlak te in an um ko a mah 1000/te lawng pek mi mah ti a um cu a si kho bak lo a ti) Ummm …ka thei ve lo ka hei ti ko. Hi lawng hmanh za rih lo sal santlai lopa hi a leng khuamui lak ah va hlonh u; khi ka ah va ttap seh law a hacang va rial len seh, a ti chap. An Bawi pa hi a si bak te a si duh lo ti awk tlak ngai a si. Cun a ngeimi cu chapchin an si lai i, a hlei vuang an ngeih tiang in an ngei lai; sihmanhsehlaw zeihmanh a ngei lomi cu a ngeihmi hnihchunte hmanh kha chuh a si lai.ti a si hawi.

Donghternak
Hi Bible nih a kan cawnpiakmi cu; damnak, tthawnnak le caan a ngeihmi chung ah fak piin aa zuammi pa/nu cu Ph.D,Th.D le D.Min a si cang hmanh ah a si rih kho ti hi a si ko. Bachelor le Master te a cawng liomi hmanh sisehlaw Pathian nih pekmi damnak, thawnnak le caan hna chungah fakpiin aa zuam lo ahcun Diploma hmanh a hmuh kho lai lo t hi a si ko. Cun Ph.D, Th.D le D.Min hmanh sisehlaw aa hman lo ahcun Diploma pa/nu hmanh a tluk lo kho ko ti zong hi a si fawn. Zei ruang ah dah sal ttha lo kan si?............. Asiah, zeitindah kan um lai? .........

(November 22, 2009) Zarhpini Online Sermon

KAN ZUMH CIO KO TUNG

By Dr. Roland Ceu

Hi bantuk in caanttha caansunglawi a kan petu kan biakmi kan Pathian a minthiang thangtthat si ko seh, A Men!!! Kan Pathian sin in a ra mi deihnak, hngangamnak, lunglomhnak cu PCCF chungtel nan cung cio ah a thar in tlunghram ko seh, Caan a ka petu PCCF nawl ngei tu nan cung ah ka lawm.

“Zumhnak pakhat lawng a um” (Ephe 4:4)
“Zumhnak tak tak kha na ngeih kha ka hngalh a tu zawng ah hin na ngeih ko tiah ka zumh” ( 2 Tim 1:5).
“Bawipa bawipa a ka ti mi poh in van cung pennak chung ah an lut kho lai lo” (Matt. 7:21).

Kan lairam cu a min men in cun Krifa ram kan ni ti ko i Bu (Church) le pawl zawng kan tam ngai ngai cang. A sinain bu khat le bu khat zong zumhnak ah i lawh dih a si lo ii, bukhat chung lila zongah zumhnak aa khat kho fawn lo. Anih bu zumhnak, kan nih bu zumhnak, an nih zumhnak ah cun, kei ka zumhnak ah cun…ti in zumhnak i dang lengluang in kan um. Kan Bible ca nih cun “zumhnak pakhat lawng a um a ti” ko ca ah, zumhnak palh (Palh zumhnak) in a zummi kan tam pi lai ti cu a fiang fawn.

Mi tam pi (aho poah) nih “ kan zumh cio ko” ti dih a si. Pathian cu zuding sa-ei(zutama) zong nih an zumh ko. Hlawh hlangmi zawng nih an zumh ko. Lainawngmi zawng nih an zumh ko. Lihchim mi zawng nih an zumh ko, Khuachia zawng nih an zumh tuk i, a ther in an ther ko. (Jerimiah 2:19).

John 3:16, chung ah,” a zummi poah…zungzal nunnak an ngei lai” a ti fawn. Cu ti a si ah cun a cung lei i kan chimmi zutama, hlawhhlang. mifir, lainawng, lihchim, khuachia,… nih teh an zumh dih cio ko ttung, zungzal nunnak van ram an co dih cio ko ne hnga maw? tiah biahalnak a um lai. An co lai lo, ti cu a hmanmi biatak a si fawn.

Cucaah cun ‘zumhnak kan ti mi ah hin “khamhnak a phan mi zumhnak le khamhnak a phan lo mi zumhnak” ti in a um ti cu a fiang colh ko lai. Cu zumhnak cu vun fianter ka duhmi cu a si.

Zumhnak hi atlang pi in phunhnih in tthen a si. (I) vawlei lei in kan ichuahpimi zumhnak, (II) Cunglei in amah Pathian nih a kan pek mi zumhnak hna hi an si. A pakhatnak zumhnak kan ti mi chuahpi zumhnak hi cu mivial te nih kan ngeih cio mi a si. Kanmah Krifa lawng si lo in pathian a bia lo mi vial te zong nih (lawkih zong nih) an ngeih ciomi zumhnak a si. Cu chuahpi zumhnak cu Mirang nih (“Head belief”) thluak zumhnak) an ti. A pahnihnak zumhnak kan ti mi cu Amah pathian nih cung lei in a van kan pek mi zumhnak (khamh zumhnak) kan ti mi, zumhnak cu a ra” (Faith is come) (Gal.3:25, Rom10:17) a ti mi kha a si.

A cungah ka chim cang bantuk in nihin kan lairam zumtu cheukhat ai ti mi mi tam pi nih pathian cu kan zumh cio ko kan timi kan zumhnak hi “ kan i chuah pi mi zumhnak a si. Zutamaa, hlawhhlang, mifir, lainawng, lihchim, lawkih kan ti mi hna vial te nih an “zumhnak” cio khi a si ve ko. Kan nih lai mi le bang hi cu kan nu le kan pa Krifa a minmen an si ruangah an fale zong a tam deuh cu Krihfa kan i ti cionak a si ko. Kan thluak nih pathian a um ti a theih i, kan i chuah pimi zumhnak in kan zumh cio i a si ko. Cu chuah pi zumhnak (Thluak zumhnak- Head belief) kan ti mi in pathian kan zumh ve poah ah cun “khamhfian hngangamnak tak tak” hmuhkhawh a si lo. Cu zumhnak cu pathian nih a co hlan mi zumhnak a si lo/ aphan mi zumhnak a si lo.

Apahnihnak zumhnak kan ti mi, cung lei in a mah Pathian nih an kan pek mi zumhnak cu Mirang nih "Saving Faith" an ti i, “khamhzumhnak” ti a si. Cu khamh zumhnak kan ti mi a ngei mi poh cu an mah thluak in zumh si ti lo in, an thlarau ram ah khamh hnangamnak (khamhfiannak) zumhnak an ngei, cu zumhnak cu Bible nih, “Zumhnak pakhat lawng a um a ti mi zumhnak nung cu a si (Ephe 4:4).

Cu zumhnak (khamhfian zumhnak) kan timi cu khrifa mi hna nih zumhnak ah pacan kan ngeih mi Sander Singht nih cun, “Mutthai i a thlumnak cu a hmawmmi lawng nih an hngalh bantuk in, khamh fian hnangamnak tak tak zong hi Krih ah a hrintthanmi lawng nih an ngeih ve,” a ti.

Dawt mi u le nau hna, Nang na zumhnak tah zei ban tuk zumhnak dah a si? Thluak zumhnak/thluak fiannak zumhnak (Head Belief) in maw kan pathian hi na zumh a si lo ah cung lei in a mah Pathian nih a kan pek mi Khamh zumhnak (Saving Faith) in dah na zumh?, Thlauk zumhnak (Head Belief) in kan zumhnak a si ah cun pathian co hlan mi zumhnak ( Saving Faith) a si lo. Cung lei in a mah Pathian nih pek mi ( Saving Faith) Pathian co hlan mi zumhnak in dah kan zumh? kan mah le kan mah i check ding in kan sawm hna. A bia thiang ai hrawm mi hna nan zate bawi pa nih a thar in thluachuah in pettthan ko hna seh. A Men...

(November 15, 2009) Zarhpini Online Sermon

TIMHTUAHCHUNGNUN

"Life of Advent"

By Ram Ceu Hnin

Isiah 9:2

"Muilak i a rak i chok mi hna nih khan ceu nak ngan pi an hmuh cang! Thihnak thladem tang ah a rak um, sihmenhsehlaw atu cu ceunak nih a ceuh cang hna. Bawipa, nangmah nih an nih cu lunglawmhnak nganpi na pek hna i an tha na nuam ter hna. Minih rawl an tuan tikah an i lawmh bantuk le an tlaih mi hranchaw an i phawt tikah an i lawmh bantuk in Nangmah nih natuah piak mi hna cungah khan an i lawm."

Mtt 25: 13

"Cucaah cun, a ni siseh, acaan siseh, nan hngalh tung lo caah ralring te in um ko u!"

Biahmaikal

A Hmasabik ah P.C.C.F laithlai U le Nau nan dihlak vialte sin ah Online thawngtha Chimnak caantha ka hmuh caah ka lawm tuk hringhran.Kan nunnak ah Damnak tlamtling a kan pe i lam a kan hruai tu, Caantha zeizong vialte a kan sersiam piak tu kan Biak mi Pathian min thangthat si koseh. Ni thaizing Bawipa Thawhthan ni ah hmun khat te ah i ruah ti hna uh sih ti ka duh mi cu ca hlun Chung ah(Is 9:2) i Prophet Isaiah nih Isreal miphun hna nih hmailei ah an khamh tu Missiah a chuah lai nak i ruah channak an ngeih mi kong ah lungdong lo te’in timhtuah nak ngei ko uh sih ti i a forhfial nak le lungdong lo in kan umnak nih Pathian ceunak chung ah lawmhnak he a kan hruai lai ti le Cathar Mtt 25:13 chung ah Mathai thawngtha chimtu nih zeithil kong pauh ah kan mah nih kan theih mi a um lo cucaah cun timhcia te le ralringte in um ko uh a ti mi hi tlawmpal te i ruah ti hna u sih ti ka duh mi asi.

Hmet lio can le X’mas Timhtuahnak

Novenber thla dih lai hrawng i Hakha, Thantlang, le khuate lei kan nun ning te kha kan mitthlam ah vancuan ter than hna usih ti hi nihin ah sawm ka duh mi asi.

Lai lei kan sining te kha Philippines sianginn kai ah a rak phan mi nih cun kan philh hrim lai ti hi cu ka ruat hrim lo, zeicaah kan ti asi ahcun Noveber thla dih hrawng hi lai lei fanau kan caah cun philh khawh ding a si lo a ruang cu X’mas a hun neih cuahmah lio can te a si i hi ah hin ka fing/tlang zoh tik ah lung hi a hmui tuk hringhran, FingTlang kip in Phaizawngpar an par saling te asi. Hi nih a langter mi cu Kan Bawipa Jesuh chuahnak nithla a phan deng cang ti hi kan fingtlang le kan nunning te nih a langhter. Cu ti kan chimh khawh nak a ruang cu mitam u hi cu Chrismas caah tiah timhtuah nak aphunphun in an ngei cio hna,a cheu khat Khrihfa bu nih cun an ti khawh tawk in Biakinn an tamh, cu lio ah tu kum cu a nih te chung nih X’mas an kan tuah piak lai ti a si tik ah cu kong cu Ceihphai lio caan a si. Cu tik ah an chung khat asi mi le hawi kom asi mi Khuate in khuapi deuh i sianginn a kai mi le khua a sa cang mi fanau hna le hawikom siaherh deuh mi pauh kha cu le theih ter an rak i zuam hna, cu tik ah khua pi lei sianginn a kai mi nih mah cu maw kan duh lai tiah Chrismas zaan Pumh service le laksawng i chuah nak Programe a dih in nuamh nak caah ti in laam a phunphun le Drama piah awk a phunphun in timtuahchung nak an rak ngei ve, Lai hlum Nungak tlangval zong nih mah cu maw kan duh lai kan unau hna sianginn a kai mi zong an rak tlung lai i a tu kum cu nuamtak in an kan hman pi lai ti thawng an van theih bak in a cheu tlangval cu umh!!!Khuapi lei nungak kong lawng te a rak tuak mi zong an rak um ve bantuk in a cheu tlangval/nu nih cun zei hla dah kan remh piak hna lai i zei laksawng dah kan chuah hna lai ti an ruah ah an ni hngilh kho ti lo,Cun a cheu khat pawl nih cun hi puai ah zeithil hna dah ka hrukeih lai ti in a rak buailulh cio mizong tampi rak um asi ve. Cu ticun lai lei cu X’mas kong lawng te cu i ceih hmai cio asi i a rak nuam tuk hringhran. Hi nih a langhtermi pakhat te cu aw! Kan Bawipa Jesuh Chuah cam tuak lai i minung kan nunnak nih a sunlawiter ning le kan nunnak ah Timhtuahchungnun kan rak ngeih mi te kha Philhawk le ruahlo awk a rak tha hrimhrim ve lo mi a si.

Nihin Kan caan le X’mas Timhtuahnak

Nihin Phillipine ram sianginn a kai mi kan dih lak nih kan hmuh/theih cio bang in Phillipine ram hmunkip kan zoh tik ah Bawipa Jesuh Chuah camtuak hi an rak sunsak ning hmuh tik ah lung a hmui tuk hringhran, Atu lio S.M le Robinson tibantuk kal hrimhrim ah hin cun VanCungkhua ah dah ra kan um ko ti awk in tin huam zong asi ti lo.hihi zeiruang bikah dah asi hnga tiahcun an nitimhtuahchungnak nih mi tampi thinlung ah aw! A kan khawmh tu Jesuh a chuah cam tuak asi ti kha fiangte in a kan theihter.

Timhtuahchungnun cu zeidah a si? (What is Advent?)

Timhtuahchungnun ti mi hi Kawl holh in cun “Aacu” ti a si ko. Hi biafang hi zoh tik ah Latin holh advantus in a ra mi asi i mirang in “Advent” a sullam cu “coming” or “arrival “ti a si. Hi ti i timhtuahchungnun a rak hmanghmasa bik mi hna hi france “Celtic monks” paul nih Fourth Century A.D. ah hin an rak thok ti asi i a thok nak a ruang bik cu X’mas a phak hlan zerh 6 a duh ah hin devotional pumhcaan ah hin an rak thawk mi a si. Hinih a hei langter duhbik mi cu vawlei mi vialte kan caah mikhamh tu Jesuh rat lai nak kong kha biatak tein cawnpiak le Nunnak ah a thar in Timhtuahchungnun an ngeihkhawh nak hnga theihterthan nak an rak tuah mi kha a si.

Biakamhlun nih a kan cawnpiak mi

Kan Bible ca hlun chung kan zoh tik ah Vawlei hramthok ka in Pathian nih a mi vialte hna nih an theihkhawh nak hnga ding caah hin thil a phunphun in a rak timhtuahchung nak hi a lang. Gen.17:1-22 ah Pathain Abrham le Sarah sin ah a chim mi cu Nan duh mi caah timhtuahchungnak nan ngeih mi le Na ni ruahchannak cu ka tlinter lai ti kha biakam nak a pek hna.Cun Ex.1:15; 2:10 ah kan hmuh than rih mi cu harnak nan ton mi chung in himnak kan pek hna lai a ti. Cun Isaiah 11:6-9; 61:1-3a ah cun a mah Pathian an hngalh nak thawng in daihnak “Peace” mi vialte sin ah a phan lai ti kha a chim. Cun Isaiah 7:14 chung kan rel mi ah cun Pathain fapa Jesuh hrimhrim kha mi vialte nih khamhnak an co khawh nak hnga ding caah ti in rak Timhtuahchung mi a sinak kha a langhter.

Cathar nih a kan cawnpiak mi

Mtt.3:1-24; Mk.1:1-8; Lk.3:1-18 chung kan rel tik ah Tipil petu Johan nih Israel mipi hna sin ah a rak chim mi cu Nan nunnak kha a thar in i check than uh law Nun nak thar ah i mer uh, Cun nan ca i a ra lai mi Jesuh caah Hmun hmathar ser piak uhlaw a rat lai nak ah dawnkhan tu thil vialte hna kha hlothau hna uhlaw Timhtuahchung nak kha ngei uh.Cun Lk 1:26-56; Mtt.1:18-25 chung ah kan hmuh mi cu Minung kan tluktlak lo bu in a dawtnak chung ah a zungzal um ding ah a rak kan timhtuah piak nak kha fiang tein kan hmuh khawh.cu pin ah Mtt 25:13 chung ah zei tluk in dah Timhtuahchungnun ngeih hi a bia pit ti kha a langter fawn.

Biafunnak

A donghnak ah Chim ka duh mi cu minung nih zei bantuk thil kan tuah tuan lai pauh ah kan herh bik mi cu thate in Timhtuahchung nak ngeih asi.Cu ti i timhtuahchung nak nih cun kan nunnak ah Lunglawmhnak le teinak theipar tam pi a chuah pi bantuk in timhtuahchung nak ngeih lo nak nih a chuahpi mi cu vaivuanhnak,beidonghnak theipar a chuah pi ve. Cuca’h Kan Bible ca rel mi chung ah Prophet Isaiah nih Isreal mipi hna sin ah a rak chim mi cu nan nunnak hi a thar in i check than tuah uh, Nihin nan nunning hin nung ti hlah uh thar chuah than hna ulaw lungdong in um hlah uh, kan mah khamh tu ding ah Missiah a ra lio, lungdong in nan umnak nih zeihmenh a chuahpi lai lo,Lungdong i kan nunnak tu nih Pathian dantat nak cungah a kan phak ter sual lai ti kha biatak tein a phuan mi asi. Hi ka zawn te ah lak ka duh mi cu kan nunnak ah kan rak ton cia cang mi harnak vialte zohchih bu in nihin ah timhtuahchung nak ngei in, hmailei ah kan ton te hnga mi harnak vialte le kan ton cuahmah mi thil vialte hna hi thachia lo tein zeipauh ah lungtho tein um le kan zumhnak chungah ruahchannak ngei bu tein thutdir ding hi Prophet Isaiah nih nangmah le keimah zong siter a kan duh mi asi.

Cun caah cun, Matthai thawngtha nih a ni siseh, a can siseh nan hngalh tung lo caah ralringte in um ko u.Cu ti ralringte le timhtuahchung nak ngei bu tein, nifa kan nunnak ah a mah bochan in hmai nan kal ahcun Patthian sin in a ra mi Ceunak thladem tang ah kan nunnak lam a hruai lai i lunglawmnak, daihnak le hnangamnak cu Pakhat cio kan nunnak ah a tlung ko lai.

Timhtuahchungnun nan ngeihnak cio ah Bethlahem cawrawl einak kuangchung i a chuak mi nau te Jesuh nih pakhat cio nan cung ah thluachuah nak in pe ko hna seh.

(November 8, 2009) Zarhpini Online Sermon

By Bawi Lian Mang

A hmasa bik ah caan ttha a kan pe tu Pathian a min thangthat si ko seh .Tuzing i kan zapi ruah tti ding ah Bible ca ka thim mi cu Prophet Haggai cauk hi a si. Hi hi tu chan laimi khrihfa kan nunnak ah tahchunh ding in ka vun i thim mi a si .

Hi cauk hi Prophet Haggai nih BC 520 hrawng ah khan Pathian sin in a theih mi thil pawl kha a rak tial. Judah mi hna cu Babylon ah khan kum 70 reng lo sal ah an rak taang cu lio ah cun harsatnak le retheihnak tampi an rak tawng i, bawmhhal ding ah Pathian cu an rak nawl i Pathain dawtnak thawng in cu sal an taan nak cun an khua Jerusalem ah cun an rak kir than. Jerusalem an phak hnu kum 15 hrawng hnu ah khin hi bia hi Pathian nih Jerusalem biakinn a rawk mi kha remh than ding in a fial mi hna bia a si.

1. Avoikhatnak prophet Haggai sin in a ra mi Pathian bia.(1; 1-15)
A. Kan i silhnalh nak kha ngol hna uh sih (1;1-4).

Judah mi hna Babylon sal in an luat hnu kum 15 tiang ah khan Pathian biak inn a rawk mi kha remh duh lo in kan rian a tam tuk rih, kanmah inn ca hmanh kan tuan dih kho rih lo ti in an rak i silhnalh. Tuchan kannih Laimi Khrifa aa ti mi hna zong hi harnak kan tawncaan lawng ah hin Pathian hi kan thei i cu harnak in a kan luat ter tu Pathian theihthannak ding tu ah cun a phunphun in kan i silhnalh tawn hna . Tha tein ruat tthan hmanh hna uh sih. A nung mi kan Pathian hmai kaa ah hin kan ni silhnalh kho tak tak hnga maw? Cucaah cun kan ni silhnalhnak kha ngol hna uh sih law kan hmailei ca tu ah khin khuaruah thawk cang hna uh sih ( Rom.1;19-20 luke 14 18)

B. Kan hmai lei kanthatnak caah khua ruat hna uh sih (5-11).

Pathian hmai I,i silhnalhnak a tam tuk tik ah hin kan sualnak kha kan i hmu kho ton lo i Pathian tu kha kan mawhchiat tawn. Cu ruang ahcun khuaawng kan tawng lo i sunghzatlaknak lawng te kan tawng tawn. Pathian nih zeidah tuah hna seh ti a kan duh, cu cu kan caah zeidah a thahnem lai ti kan thei tawn lo. Cucaah cun Pathian nih kan hmailei caah zeidah a kan ruah piak ti le zeidah tuah hna seh ti a kan duh ti mi kha tha tein ruat hna uh sih .( Heb 12;11 Mtt 6;31-33)

C. Pathian nawl zulh kha i zuam hna uh sih (12-15).

Pathian nih a fale a kan kawh auh tik ah hin kan ngeih mi kan fimnak kan chawva kan thawnnak kha si lo in a mah nih tuah hna seh ti a kan duhpiak mi a nawl kan zulh tu kha a sang bik i a kan cohlan nak cu a si.(1Samuel15;22, Isaiah 1;1-11).

2. Avoihnihnak prophet Haggai sin in a ra mi Pathian bia (2;1-9).
Pathian nih a um pi mi hna le a um pi lo mi hna

A.Pathian nih a um pilo mi hna 1-3

Pathian duh ning kan zulh lo tik ah cun a dawtnak le a velngeihnak he ka ni hlat i

Kan minung sinak in kani bochan tawn mi kan fimnak kan thiamnak kanthawnnak le kanrumnak kan chawva vial te hna cu Jerusalem biakinn a rawk mi ban tuk in pakpalawng men ah an cang dih tawn .

B. Pathian nih a um pi mi hna (4-9)
Pathian nih a mah nawl a zul mi hna cu nifatin a biakam nak in a um pi hna.
a. Lungthawng in um uh (4).

Harnak temhinnak ngeih chiat nak hna kan ton tik ah lam dang pial lo in lung thawng ngai in a kandaw tu kan pathian tu kha fuh hna uh sih. (ps,31:24,2Chro 32:7-8)

b. Tih hlah uh (5).

Pathian nih tih hlah uh kei mah nih kan um pi hna lai tiah bia a kan kamh. Bible ca thiam pawl nih tih hlah uh ti mi biafang a sullam hi voi 365 an hmuh. Cucu nifatin kannunnak caah hin nikhat pakhat in kum khat ca a kan nguh ti a si.(Isaiah 41;10 ,63;11-14Zech 8;13Nehe9;20)

c. Ka sunparnak in kan um pi hna lai (6-7).

Ka nawl kha zul uh law ka sunpar nak kha kan hrawmh hna lai i sunparnak kha nan hmuh ve lai tiah bia a kan kamh.( Isaiah 40;1-5 ,43;1-7)

d. Nan herh mi vialte kha kan pek hna lai (8-9).

Vawlei cung thilvial te hi kei mah ta a si ka nawl nan zulh ahcun kha hlan i nan tthawnnak, nan i dawhnak, nan fimnak, nan thiamnak le nan chawva nak khan a let in thluachuah kan pek hna lai tiah bia a kan kamh. (John15;7Isaiah 40;28-31Deu32;10-11)

3. Avoithum nak prophet Haggai sin in a ra mi Pathian bia (2:10-19).
A. A thiang lo mi pekchanhnak (10-14).

Mi nung nihhin kan leng lei langhnak i a thianghlim mi sinak hi kan kawl i kan duh. cu cu Pathian sin ah a thiangbik pekchanhnak ah kan ruah tawn. cu vial te cu Pathian hmai ka ahcun santlai lo ah an cang dih tawn. kan minung si nak in kan i zuam mi thianhlimhnak nak in a kan fial mi tuah kha a thiang mi pek chanh nak cu a rak si deuh (Mark7;8-14,17).

B. Pathian thluachuah conak (15-19).

Kan biak mi Pathian kha theih lo in le a mah duhnak a zul lo mi hna caah cun vawlei cung i a um mi thilri vialte hna hmanh hi a lak ah ancang dih ko. cu caah cun a mah thluachuah co nak caah ruahchannak zeihmanh ngei hlah hmanh uh sih law a kan kawh auhnak kha thei than in a thluachuah conak caah tuah hna seh ti a kan duh mi kha tuah I zuam hna uh sih.

4. Avoi li nak prophet Haggai sin in arami Pathian bia (2:20-23).
A. Pathian nih ral rin a kan peknak (20-22).
Caan a naih tuk cang caah Pathian a thei lo mi , a nawl a zulduh lo mi le a bia zei i a rel duh lo mi hna cu biaceihnak kha an ing lai (Heb12; 25-29 John15;5-6).

B. Pathian biakam tlinnak (23).
Pathian a thei mi le a nawl a zul mi hna caah cun an nun chung i thluachuah co nak lawng si lo in Pathian pennak chung ah khan zungzal in an um lai.

Ahmanung bik ah ka chim duh mi cu Pathian dawt nak kha thei lo in lam kan tlau lio ko ah hin Pathian a dawtnak le a velngeihnak nih cun a kan hnah peng ko.

1. Ngaihmanh uh nan i silhnalhnak kha ngol uh law, nan hmailei i tthatnak kan chiah piak mi hna kha ruat tuah uh,ka nawlbia kha zul uh law thluachuah kan pek hna lai.

2. Kanawl nan zulh duh lo ahcun hnulei ah kan mer tak hna lai i nan i bochan mi nan fimnak, nan thiamnak le nan tthawnnak vial te cu pakpalawng ah an cang dih lai. Ka nawl nan zulh i kan fial mi hna nan tuah ahcun ka thluachuahnak in kan um pi hna lai.

3. Nan minung si nak in nan i zuam mi thianhlimnak le nan tuahsernak in nan i pek chanhnak vial te cu ka caah san tlai lo lawng te an si dih.tuah hna seh ti kan duh mi hna kha tuah nan i thawk bak in ka thluachuahnak cu kan pek hna lai.

4. Cuticun ka bia zei i a rel lo mi le ka nawl a zul duh lo mi cu rawhralnak ka phak ter hna lai.ka nawlbia kha a ngai I, tuah hna seh ti kan duh mi hna a tuah mi poh nih cun ka thluachuahnak le zungzal lununnak kha an hmuh lai.

Prophet Haggai cauk hi funtawm in kan chim a si ahcun nan sualnak khan rak kir than uh law kan fial mi hna kha nan tuah ah cun thluachuahnak kha a let in kan pek than hna lai ti a si.

Cherhchan mi.

Lai bible, Kawl bible le Mirang KJV bible hna an si. Kan mah le kan tlaunak cio khan a kan daw tu Pathian sin ah kir than in thluachuah kan hmuh khawh cio nak hnga careltu kan za pi cung ah Pathian nih a thar in thluachuahnak kan pek piak ko seh. Amen.

(November 1, 2009) Zarhpini Online Sermon

Unau! Kan Tlau Sual Maw?

Luke. 15:11-32

By Thawng Hei

AGST

Manila

A hramthawkbik ah Philippine ram a kan phanhtertu le fimnak cawnkhawhnak caan ttha a kan petu a nungmi kan Pathian a min thangtthat in um ko seh! Philippine ram chung ah a um mi ka unau vialte zong Bawi khrih min in nan kut kan tlaih hna! Pumpak nan nunnak cio ah le nan cawnmi cio cung ah Pathian thluachuahnak um ko seh! Caanttha ka hmuh mi chungte ah hin ka unau vialte sin ah zei dah ka chim lai tiah thla ka cam ve. Ka thinlung ah Pathian nih a vun ka pek ko tiah ka zumh mi cu "Unau! Na Tlau Sual Maw?" Ti mi biahalnak te hi a si. A tu hi Ka tlau sual maw? tiah nangmah tein rak i hal ve hmanh !

Baible ka thimmi cu Luk. 15:11-32 hi a si. Zapinih kan theih cio mi fapatlaupa tuanbiate kha a si ko. Laimi nih hi tuanbia kan chim tik ahhin a hniang deuh pa kong tu hi kan chim a tam deuh! A si nain mifim zeimawzat nih cun fa upa a tlaunak kong a langh termi zong an um ve. Kan chim khawh mi cu a naupa bantuk in a upa zong a tlau ve tinak a si. A nau deuhpa cu a pa sin i ro vialte a lak i a pa sin in a chuak caah a tlauning kha a fiang tuk. Sihmanhsehlaw upa deuhpa a tlau dan kha ttih a nung ngei mi a si. A pa sin ah a um ko nain, a rak tlau ve. A naupa a rak tlun tikah a zei ti hmanh in a Pa nih a tuah mi lomhnak puaichung ah a lut duh ti lo. A felnak, inchungkhar rian teimak in ka rak ttuan timi le “keimah” ti mi a thinlung nih khan a tlau ter.

Cattial minthang, a hma mi lungthin a dam ter tu (wounded healer) tiah an uah mi Henry Nouwen nih cun fa upa tlau bantuk in ka tlau tiah a phuan. Henry Nouwen hi Netherlands ram ah a chuak mi a si. Sianghleirun a dih hnu ah thlangbawi (priest) ordination an pek i, Notre Dam le Yale ah professor a ttuan. Cu hnu ah Harvard ah ca chim ding in an sawm. A tuanbia kha a zohtthan tikah mahvialte caanchung kha fa upa bantuk in ka rak tlau ee a ti. A tu cu ka pa inn ah ka kir tthan cang lai a ti i a minthan nak le zeizong vialte kaltak in “minung sinak a tling lo mi” (disabled community) hna sin ah rian ttuan dingah a nunnak a pek. Phillippine ah a um mi unau hna, nang le kei tah pa sin ah a um mi kan lo ttung nain a tlau mi kan si sual lai ti hi phan a um ngei! Bible bia cu Bible sianginn ah ni fate rel le cawn ko tung i, Bible a ttial tu kan Pa sin in kan tlau ah cun a poi tuk lai. Pathian a rianttuan mi ministers ka si kan ti ttung i fa upa bantuk, a tlau mi kan um ahcun sungh bak kan si lai. Kan tlau sual maw tiah ka ruah mi thil te te a um. A tanglei biahalnak pahnih tein kan nun i check tthan hna u sih!

A tanglei biahalnak pahnih tein kan nun i check tthan hna u sih!

I. Pathian kan daw maw?

Bible cahlun chung ah nawlbia pahra kan hmuh khawh i, cu hna cu mifim pawl nih Chrihfa nunzia caah i zohchunawk (ethical norm) caah Pathian nih a kan pek mi a si tiah an zumh. Cu nawlbia pahra chungah a pakhatnak ah kan hmuhkhawh mi cu “an sertu na Pathian kha na thinlung dihlak in na dawt lai” ti a si ko, (Exo.20). Kan Bawipa Zisuh zong nih “na Pathian kha na nunnak dihlak in na dawt lai” ti cu nawlbia lak ah a pakhat nak a si tiah a nawlh tthan. (Matt. 22:37-38). Khrih ah unau hna, a zeibantuk kan si zong ah Pathain dawt lo le tih lo hi cu kan tlaunak hrampi a si. Kan cawn mi zeizong vialte hi Pathian kan duh/dawt khawh chin deuh nak lei ah a kan hruai tu a si ahcun kan cawn mi fimnak hi kan miphun le ram caah thluachuah mi a si ko lai. Pathian kan dawtnak lei ah a kan dontu thil pathum ka hmuh mi hna cu:

A. Ka fim ko/ ka theih ko ti mi lungput

Phuntlukbia. 3: 5-7 nih a kan cawnpiak mi cu nangmah le nangmah kha ka fim/ ka thieh tiah va i ruah hlah ti hi a si. Kan cawn mi le kan ngeih mi fimnak nih hin Bawipa ttihzahnak lei ah a kan hruai a hau. Mi cheukhat nih kan fimnak le ka thiamnak nih ram a dam ter lai tiah kan zumh. Ka zumh ve! A si nain kan fimnak kha Pathian nih thluachuah a pek i, a hman lo ahcun kan nunnak lawng hmanh si lo in minunnak hmanh tlaunak le sunghnak lei ah a kan hruai khawh mi a si. Vawlei cung a hrawk tu thil tam deuh cu ka fim/ ka theih a ti mi pawl i an fimnak le an ruahnak in a ra mi a si.

A. Ka ruah

Laimi nih tuahmi meetting kip ah ka fim a ti mi u pa pawl nih kan chim cio mi kan biahram le kan bia donhnak cu “ka ruah” ti mi biafang hi a si. Kan nih Senthang peng lei meeting bang ah cun “ka ruah” ti mi a tam tuk i ceihmai mi bia a phi a chuak kho lo. Ka ruah ti mi nih hin “keimah” ti mi lungput a chuah pi. Kan ruah mi kip ah hin Pathian nih a kan ruahpi lawngah teinak cu kan mah ta a si lai. Pathian a ruahnak cu keimah minung i ka ruah mi nakin a ttha deuh i, a tling deuh fawn. Nangmah le keimah kan ruahnak sawh sawh men nih kan ram a tlen khawh lai tiah na zum maw?

B. Kan Degree

Mirangnu ka Sayamah pakhat nih Laimi hi degree cu nan uar taktak a ka ti. Nan mah nak in a zualdeuh mi cu Korea lawng an si tiah a ka ti. Kawlram i tthang mi Lai mi pakhat nih a chim ve mi cu Chin Fellowship ah kal ka duh lo a ka ti. A ruang a vun chim mi cu Laimi cu degree in mi chonhbiak kan hmang ee a ti. Ruah awk cu a um ngai. Kan degree maw a bia pi, a si lo ah kan cawnmi fimnak maw a biapi ti hi ruah a hau cang! Kan degree nih mitlaumi miphun ah a kan ser ah cun a poi tuk lai. Mipa pakhat nih zei degree dah a lak ti mi nakin zeiban tuk fimnak dah a cawn i, a ngeih ti mi a biapi deuh men lai. Cu vialte nakin a biapi deuh mi cu kan degree vialte nakin kan Pathian hi a ngan deuh tiah zumh hi a si. Kan biak mi kan Pathian hi cungnungbik ah a chia mi degree nih kan ram cu a dam ter te ko lai!

II. Minung kan daw hna maw?

Minung tiah kan ti tik ah hin a kau deuh. A si nain ka chim duh mi cu kan pawng i a um mi kan innpa le unau kha a si. A si kun ah laimi caah kan unau le kan innpa cu a ho dah a si hnga? Lai mi unau diklak an si lo. Kan Bawipa Zesuh nih “na innpa kha nangmah bantuk in na dawt lai” ti cu a pahinh nak a nganbik mi nawlbia a si tiah a chim. (Matt. 22:39). Pathian a daw mi nih cun a unau a dawt lai ti hi Johan cakuat nih a kan cawnpiak mi a si ve. (I Jn. 4: 7-21)

Vawleicung ah mifim tiah kan ti mi hna vialte zongnih minung hi minung bantuk in kan dawt ding a si ti hi an au pi cio mi a si. Vawleicung mifim le hruitu ttha paoh poah hi minung a dawmi an si. Mi nih zeirel lo mi sifakmi, hlawtmi le tonghduh lo mi, le mifabik (the smallest people) a dawtu pawl hi minih upat mi ah an i chuah. Cu chung ah Gandhi bantuk biaknak dang a bia mi hruaitu ttha zong tampi an i tel.

Minung dawt kan ti mi hi mipa pakhat i a minung sinak kha upatnak le ttihzahnak kan pek mi khi a si ko. A ngeihchiah, miphun sinak, degree le zeidang ah khan a si lo. Pathian muisamkeng a si nak “minung” ti mi te khi kan va dawt a si. Tu ni laimi kan innpa kan dawt tiah kan ti mi hi zei bantuk dawtnak dah a si? Minung tampi ramdang ah fimnak a phunphun kan cawn cio hna i, minung zeizah nih dah kan lai mi phun le kawlram mi caah nunnak pek kan i timh hnga?

Laimi cu chuncaw caah zil pumkhat a keng in sianginn a rak kai mi kan si. A caan ah micheu hna cu ken awk hmanh an ngei lo i, chuncaw ei lo bak in sianginn kai a rak si. (Sengthang peng sining in ka chim mi a si) Tu ni zong ah kan unau tampi kan mah bantuk in sainginn an kai ko. Cu hna caah cun zei vision dah na ngeih? Zei thongtha dah phorh na timh hna? Zeitindah na dawtnak na langhter ve lai? Philippine kan um lio tein ruah le thlacamnanh kan hau cang! Kan ram kan tlun tik ah zeibantuk thluachuah dah na unau caah na tlun pi ve lai?

Biafunthomnak

U le nau hna Pathian nih Joseph bantuk in kan miphun le ram chanhchuah ding caah fimnak cawn dingin hi ka hmun ah a rak kan thlahcang! Hi ka kan rat hnawh chan cu zeidangruang ah a si lo. Philippineram nih a ngeih mi fimnak cawnruah ah a si ko. Cu nih a tinh mi cu kan ram ah a um mi kan unau vialte kha cu kan cawn mi fimnak hmang in chanhchuak khi a si ko. Kan ram ah a um mi kan miphun le kan krihfa bu cio nih an ni ruahchanmi kan si. Unau! Kan tlau sual ah cun a poi tuk lai!

A tlau mi kan rak si sual zong ah Pathian hmai ah “ka Pa na hmai le minung hmai ah ka sual cang” ti in ingeihchihnak (repentance) lungput he a kan dawtu Pa sin ah cun kir tthan hna u sih! Pathian dawtnak cu a tleng bal lo. Ka dawt mi ka fa hi zeitikdah a rak kir tthan lai tiah a dawtnak nih innka in a kan hngak peng ko. Pathian dawtnak nih a ngeihthiam khawh lo mi sualnak a ngei lo.

Thazang thar i lak tthan hna u sih! Amah Pathiantu hi zeizong vialte nakin a pakhatnak ah chia u sih law, kan unau\innpa a si mi kan miphun le kan krihfabu cio caah timhtuahnak vision a ngan pi i chiah cio hna u sih. Pathian sin ah vision hal hna uh sih! Thazang fak piin vunchuah tthan hna u sih law, kan cawnmi cio ah a thiam tak mi si ding in i zuamchin hna u sih! Pathian nih kan zapi tein kan umpi sehlaw, thluachuah kan pe ko seh!

Reference:

Yancey, Philip. Soul Survivor. Manila: OMF Literature INC., 2006.
Nouwen, Henri J.M. The Return of the Prodigal Son. New York: Doubleday, 1994.