An Announcement & Good News

Dear BawiKhrih ah Unau rual PCCF Chungtel dihlak,

Vawlei ah a dawtmi minung hna kan caah titsa ah a hun i cang i kan sinah khua a hongsa ve mi Bawipa Zisuh nih thihnak a tei i a thawhtthannak camtuak ni sunglawi cu kan neih cuahmah tthan cang. Tthal sianginn khar le mikin caan, thlavaikianh le lunglen caan theng teah hi thawhtthan ni a um hi cu a va ttha hringhran dah! Hi Bawipa thawhtthannak ruangah kan nih vialte nih ruahchannak he amah Bawipa caah nun kan ngamhnak zong a si fawn.

2011 Bawipa thawhtthan ni hi Philippines ram ah fimnak acawngmi fanau dihlak nih sunglawi khunin kan hman khawhnak dingah Bawipa nih a kan timhtuahpiaknak kanruah tikah Bawipa nih zeitluk indah a fale hi a kandawt i thluachuah a kan pek ti kha kan nunnak nih a tehter mihi Bawipa a min kan thangtthat hringhran ko. Bawipa a daw i kannih PCCF unau hna a kan siaherh tu Pu Za Tthio Lian ( USA) nih Chuncaw le Leng Dawt Zi (USA) nih Zanriah le zan ah sathluak thawtaktak in an kan tuah piak lai tikah hin an cungah kan lung ai lawm tuk hringhran. Hi bantuk in siaherh zawnruat kho dingin lam a kan sial piak tu Pastor Ram Ceu Hnin le Saya Lewis Cung ancung hrimhrim ah kan lung ai lawm khun.

Cu caah 2011 thawhtthan cu sunglawi ngai in chun nitlak caan kan hmang hna lai. Baquio, Luzon le Manila i a um mi PCCF unau vialte zong hi thawhtthan lunglomhnak ni ahhin nan lamcaan sau ko hmanh sehlaw nan zapi te in nan rak i tel khawh cio nak lai kan in sawm hna. Zan zongah lengkhawmh a um rih lai caah thawhtthan zan khi Cavite riak ding in timhtuahnak nan van neih khawhnak lai kan in sawm hna.

Hi thawhtthan ni ah Caan a kan hman piak tuding Silas group hotu Pastor Khin Khin nih tlamtling tein thawng a kan thanh dih cang i kan i lawm tuk. A caan belte tlawmte kan thawn tthan caah na kan theih thiamnak lai kan in nawl hna. A ruangcu Chuncaw le zan program a van i chap caah hin a si.

A hmun ---------- Dr. Dennis Shu Maung inn (Cavite, Philippines)

Ani ---------- April 24, 2011

Chuncaw ei caan---- 12 noon

Pumh caan ------ 4 PM

Zanriah ei caan--- 5:30 - 6:30 PM

Zan lengkhawmh caan --- 7:00 PM -

Note: Lengkhawmh adih tikah Sathluak kan i hrawm tti te hna lai.

Lamhlaa khualtlawng lamlimi kan pabik Rev. Dr. Dennis le PCCF unau cheukhat zong thawhtthan kan van neihcuahmah cun nan bau ai thei khun le kan in hlam tuk hna. Dawtmi chungkhar le zumtu Khrihfabu hna he thawhtthanni cu nuamkhun in van hmang ve ne uhlaw Cung Pathian tunih nan lamtluan terin damte tontthan nak caan tu kan ser piak ko seh.

Khuaza vanraang toiah a ummi PCCF Unau dihlak cungah thawhtthan lunglomhnak le ruahchannak cu a thar in um ko seh!

Nan rianttuan hawi,

Pastor Elly Mang

PCCF President

Kan president, Secretary le Treasurer Khual an tlawnnak in damten an rak phan tthan cang

Dear Chungtel hna,

Nizan tihni ah thawng kan thanh cang bantukin kan kan president, Secretary le Treasurer cu Baguio um mi kan unau hna tlawnah ah kal. Pathian nih lam ahruai hna i an kal hnawhchan mi zong tlam a tling tiah thawng kan theih i an mah zong zanhan zaan ah kan sinah damten an rak phan tthan cang. An kal hnawhchan mi tlam atling mi cungah chungtel dih lak zong kan i lawm dih cio ttheo lai tiah zumhnak ka ngei. Pathiain nih rianttuan tu hna le Baguio um mi kan unau hna an dihlak thluachuah pe hram ko hnaseh tiah thlaza kan cam.
Baguio an caam chung kan unau pawl he biaruahnak an ngeih mi tete hna zong theih kan duh cio ttheo lai nain zeihmanh a fiang in ka theih ve rih lo caah kan secretary nih maw president maw fiang deuh in a kan chimh a kan ruah te ttheo lai tiah zumhnak ka ngei. Baguio an caam chung ah an umkal nak tete le an tthut um ning tete hna kha hmanthlak in record an chiah mi tu KA HIN rak zoh khawh a si lai.
PCCF adaw i ka rian a si Pathian sunparnak caah asi ti a thei i caan le thazaang ngeihchiah pek in rian a ttuan tu hna kan hruaitu hna an dihlak Pathiain nih thlua chuah hna seh law an thluachuah cu an hruaimi hna kan dihlak cung ah Aron luthlungin a angki hngawng ah a rung luang mi Olive chiti bantuk in luang ve hram ko seh.

PCCF President le Tresurer Baquio Tlawnnak Thawngpang

Dear PCCF chungtel dihlak,
Kum 2011 kum hramthok PCCF GM meeting ah biachah cang bantuk in kan president le treasurer cu Baguio kan unau pawl sin tlawn dingah nithaizing 9/02/2011 in Baguio lei panh in an i thawh tiah thawng kan theih. An kal hnawhchannak a ruang cu kan theih bantuk in Baguio kan unau pawl nih thil dangdang tlamtlin deuh lo ruang ah pccf in i dinh dingin ca an rak ttial mi kha PCCF upa te le member dihlak nih ruahpi nak an tuah i zeikhom a si ah kan u kan nau pei an si cu thawng i theih lo le fellowship hna in i chuah tak ding cu a si kho hrimhrim lo tiah an ruah caah rianttuan tu upa te nih va kal hnawh hna i thil sining le um tu ning tete va chimh ruah hna i kan chuah tak hram hlah uh zeipoh kan har le kan fawi ah kan chiat le kan tthat ah hmunkhat ten rianttuan ti le thawng i theih tti hi a ttha bik ko ti va chimh le va nawlpat ah an kal nak bik a ruang cu a si. A i thawh hnu caam tlawmpal a rauh ah Manila in Baguio kalnak Gate in thawng an kan thanh mi cu dam ten Manila zong kan phanh i a ruah hlan ah Baguio lei cu kan i thawh lai tiah thawng kan theih. I Pathiain nih lam a hruai hna i zanlei sang ah Baguio lei zong cu dam ten an phan ti zong thawng kan theih tthan. An phanh hnu i thil an tuah ding tete le meeting hna an ngeihnak ding tete kong bal tlamtling in kan thei rih lo. Cucaah kan President le treasurer an khual tlawnnak le an meeting ngeihnak ding kong kau caah member dihlak nih thlacam piak hram hna usih tiah kan sawm hna. Atu ca ka tial cuahmah lio ah thawng ka theih mi cu kan u nau pawl he cun tonnak cu an ngei lio ti a si nain a phi zei a lawh lai bal ai thei rih lo ti a si. Cu caah kan dihlak te nih an kal hnawhchan mi tlam a tlin khawhnak hnga thlacam nak in bawm hram hna sih.

Reporter,
Lewis Cung Cinzah
Moderator
PCCF

HIKA hi hmet law Baguio khuachung na phan ve ko lai.

2010 PCCF Retreat Hundred Islands Ah.

PCCF retreat cu 2010 PCCF hruaitu upa hna hruainak in Philippines ram i minthang bik hmunhma pakhat ah a tel ve mi Hundred Islands ah December 29, 2010 in January 1, 2011 tiang hluanghlai nai in tuah a si. Hundred Islands cu Manila in nazi 6 hrawng Bus in kal si i, a min a than khunnak cu, fingtlang le tiram a dawh lawng si lo in, tikulh zakhat(hundred islands) hmunkhat te ah a um nak hmun a si ca hrim ah hin a min than khunnak hi a si. Hi retreat ah hin kum dang tawn bang in Seminar, Kumthar donnak, General meeting le a ra lai mi kum caah hruaitu thar hna thimnak zong tuahchih a si caah a kal kho mi le PCCF cawlcanghnak caah cun hi rethreat hi hlawhtlinnak taktak a si tiah kan ti khawh. Hi rethreat ah Seminar hruai tu le cawnpiak tu cu PCCF kan pa bik a si mi Rev. Dr. Dennis Shu Maung a si.

Hi retreat ah 2011 caah PCCF hruaitu thar thimnak zong tuah a si bantuk in hruaitu thar thim mi hna cu

1. President - Sayama Elly Mang

2. Vice President - Saya Uk Ceu

3. Secretary - Rev. Za Biak Ling

4. Assist. Secretary - Saya Sui Chan Lian

5. Treasurer - Rev. Than Thio

6. Assist. Treasurer - Lal Awm Pui

7. Moderator - Saya Lewis Thla Peng Cung

8. Auditor 1 - Saya David That Mang
9. Auditor 2- Saya Van Nun Thang

2011 PCCF OB/EC Members

Advisor hna cu

1. Rev. Dr. Dennis Shu Maung

2. Rev. Dr. Za That

3. Rev. Za Mang

4. Pu Van Thio

5. Dr. Anna Sui Hluan

hna hi an si.

Note:

* 2010 Kumdih General Meeting Minute ka hin rel khawh a si.

* 2010 Kumdih Secretary Report ka hin rel khawh a si.

February Thla Pumh

A hmun - Saya. Thawng Peng le hawi le inn. Kamuning, Quezon City, Manila.
A ni - February 15, 2009.
PCCF i February thla pumh cu tlamtling te in kan tuah khawh caah Pathian min thangthat si chin ko seh. Hi pumhnak ah Sayamah. Siang Chin Thial(Siang Siang) nih caan a kan hruai i Sayamah. Hau Hau nih thawngtha(forhfialnak) a kan chimh. A tel kho vial te kan i lawm dih. Thlakhat voikhat te kan i ton mi hna hi cu a sunglawi tuk hringhran ko.


Hmanthla zoh le download a duh mi nih hika hin hmet.

Biapeh chap . . .
Hmaithla(March) pumh cu Cavite ah si lai. A cacawn a dih i a tlung ding pawl thlahnak tuah si lai caah chungtel kan dihlak chuahkhawh i zuam cio hna uh sih.