(Feb 21, 2010) Online Sermon.

Pathain Dawtnak

By Tluang Uk Lian

A hram thawk bik ah mi sual mi ttha thlei dang lo in dawt nak le zaangfah nak he a khat mi kan biak mi kan Pathian a min thangthat si ko seh. Cun caan a ka pe tu pccf tawl rel tu hna nan dih lak cung ah lunglomh nak tam pi ka ngei ti kha vun chim ka duh.

(Hosea 11:1) “Israel cu ngakchia a si lio in ka dawt; Ka fapa cu Iziptram chung in chuah awk ah ka auh.”

Hosea ca uk kan rel tik ah hin mi nung hi dawt awk tlak lo ka si bu ah Pathian nih zei tluk in dah a kan dawt ti hi fiang tein kan hmuh khawh. Dawt awk a tlak lo mi dawt ti mi hi a har ngai mi thil a si. Mi nung hi dawt awk a tlak lo mi le, dawt aa hlawh lo mi kan si. Zei cah tiah Pathian bia kan ngai lo i Pathian sin in pial kan hmang theu tawn. Kan theih cio bantuk in Israel miphun kha Pathian nih a dawt hna i sal an si nak in a khamh hna, har nak phun za kip chung in a bawmh hna. Si hmanh seh law Israel miphun pawl nih Pathian bia an ngeih lo caan le Pathian sin in an pial caan a tam tuk hrinhran. Cu bu ko zong ahcun Pathian nih a khamh ttiam ko hna. Pathian nih a mah he an I tthen lai le a sin in an pial lan lai hi a siang hrim hna lo.

Pathian nih Israel mi a dawt nak hna hi Hosea le a nu pi Gomar sining he hin a tah chunh I a kan hmuh sak tiah ka ruah. Israel mi pawl kha Pathian nih a dawt tuk ko hna bu in Israel mi pawl nih Pathian bia ngai lo in an duh ning paoh in an um, siasal an bia, zumhawktlak in an um lo. Cu ve bantuk in Gomar zong kha Hosea he fa an ngeih dih hnu ah zumhawktlak in a um ve lo I hlawhhlang rian a ttuan. Hi nih hin mi nung dawt awk tlak kan si lo nak le dawt kan I hlawh lo nak kha a langhter.

Sual nak kong he pek tlai in pakhat te chim ka duh mi cu, sual nak phun phun vial te lak ah Pathian thin hun tar nak bik sual nak hi siasal biak hi a si lai tiah ka ruah. Zei cah tiah Pathian nih Sinai tlang cung in Moses nawl bia pahra a rak pek mi a pakhat nak bik nawl bia cu “Kei mah hlei in pathian dang zei hmanh nan bia lai lo” (Exodus 20:3) ti a si. Hi pathian dang biak hi a duh lo bik mi le Pathian a thin hung tar tuk bik mi a si. A ruang cu Pathian nih, mi nung pawl nih hin a dang pathian he hawi komh nak ngeih a duh lo I a mah he lawng lawng a zungzal hawi komh nak ngeih a duh caah a si.

Cu caah Israel mi pawl nih siasal an baik tik ah khan Pathian a celh hrim lo i ngai thiam kho lo deng tiang in khin a lung a fak lai ti ruah nak ka ngei. Si hmanh seh law Pathian a dawt nak hi mi nung sual nak nak in a ngan deuh I, a mah he i tthen ding a duh lo ruang ah lamkal tu hna (profet) pawl kha sual I ngeih chih ding le a mah duh ning zul ding in Pathian nih rian a fial hna. Hi sual nak an tuah ruang ah hin Israel mi hna nih biaceih an huah lai caah profet Hosea cu Pathian nih Israel mi pawl an sual an I ngeih chih nak hnga ding ca ah a thlah mi a si.

Pathiannih profet Hosea hi a auk i rian a fial tik ah hin a bia phuan ding lawng si lo in tuah ser nak he mi a kan dawt nak hna hi a langh ter. Bia kam hlun ca uk hi a fawi nak le, a tawi nak in kan chim a si ahcun Pathiannih a thim mi miphun Israel mi hna, bia an ngeih lo ruang ah Pathiannih dang a tat hna nak le, a khamh tthan hna nak le, rem nak a tuah tthan nak ca uk a si ti hi kan theih dih cio bang a si ko. Cu bia kam hlun ca uk vial te chung ah hin Pathian sining hi, hi profet Hosea nunnak ahhin a lang I minung kan sining hi Gomar (Hosea nu pi) nunnak ah hin a lang tiah ka hmuh.

Pathian nih Hosea kha zumhawktlak lo nu Gomar va tthit ding ah a fial, cu cu zei he dah aa lawh tiah cun Pathian nih zumhawk tlak lo minung he um tti a duh nak he aa lo. Cun Gomar le Hosea an i hawikomh nak nih a langhter duh mi cu Pathian le Israel mi pawl an i hawi komh nak kha a si. Gomar nih a mah le a mah kha hlawhhlangnu aa can tar bantuk in Israel mi pawl zong nih Pathian biak lo in a dang pathian (siasal) an bia. Cu ruang ahcun Pathian nih Israel mi hna he an I hawikomh nak kha dih cang seh, ka daw ti hna lai lo ti in a um I cu caah cun Hosea fanu kha Lo-ruhamah tiah mi a sak tar. Asullam cu “dawt lo (Not loved)’ ti nak a si. Pathian hi Israel mi hna cung ah hin a lung a sua zungzal i an sual a ngeih thiam zungzal ko hna.

Sihmanhsehlaw Israel mi hna nih Pathian nawl an ngai lo i a dang pathian an I ser ruang ah hin an sual man cu har nak tuar ve ko hna seh tiah har nak tam pi Israel miphun nih an ton ve. Cu caah Pathian duh ning kan zulh lo i kan mah duh ning kan zulh tawn tikah hin har nak kan ton theu cio tawn. Israel miphun pawl hi Pathian nih ka miphun nan si tiah a thim mi hna an si. Si hmanhsehlaw pathian dang an i ser ruangah le nawl an ngeih lo ruang caah ka miphun nan si ti lo tiah a ti hna I Hosea a fa pathum nak kha a min ah Lo-ammi tiah a sak tar. Asullam cu “Not my people” ti nak a si. Pathiannih Israel mi hna he an I hawikomh nak kha caan tlawmpal chung te cu a vun chah. Cu kar lak vial te cu Israel mi pawl nih har nak an ton.

Pathian cu a lung sau mi a si dawt nak le zaangfah nak in a khat mi Pathian a si caah a sin in a thim mi miphun hna an tlau lai kha a sian hrim hna lo I ka khamh tthan hna lai I ka thim mi miphun tiah ka auh ttha hna lai a ti. Zei caah tiah Pathian cu a lung sau mi Pathian a si, a bia kan ngeih lo zong I a duh ning I kan um lo zong ah a sin ah kan sual nak kan I ngeih chih le a sin I kir tthan kan I timh ah cun a zungzal co hlan tthan ding in a kan hngah zungzal ko. An sual an I ngeih chih i ka sin an rak kir tthan ah cun ka mi phun ka ti tthan hna lai a ti ruang ah Lo-ammi ti mi kha Ammi tiah auh a sit tthan lai i cu a sullam cu ka miphun “my people” ti nak a si lai a ti.

Hosea ca uk kan rel tik ah hin a tu le a tu kan hmuh khawh me le kan theih khawh mi cu Pathian nih mi nung a kan dawt tuk I mi sual santlai lo le dawt awk tlak kan si lo bu cuah mah ko zong ah hin le Pathian he kan I tthen cuah mah ko bu zong ahhin Pathiannih khamh awk ah a kan kawl tthan zungzal (God loves us and reaches us no matter how unworthy we are). Si hmanh sehlaw Pathian nih a kan dawt nak a ngan zia le a thuh zia hngalh tar a kan duh nak ah hin har nak zong hi a kan ton tar tawn ko (sometimes God allows us to suffer the painful consequences of our sins to bring us to our sense).

Cu caah cun Hosea ca uk nih a kan cawn piak mi cu kan sual man cu dang tat a si lai. Si hmanhsehlaw kan sual nak kan I ngeih chih i Pathian lei kan i mir tthan ahcun Pathian nih kan sual nak a kan ngeih thiam lai i ka thim mi miphun nan si ka fa le nan si taih a kan co hlan lai I zungzal don lo in hawikomh pehtlaih nak kan ngei zungzal lai ti hi a si. Pathian nih kan dih lak caah a ttha ti ning in thluachuch kan pek piak hram ko seh. (The story of Hosea’s love for Gomar his wife is the story of God’s love for Israelites and for us, through unfailing love of God, we can be restored and enjoy an intimate relationship with Him).

(Feb 14, 2010) Online Sermon

By Maa Hliap

Happy Valentine’s Day!!!

Matthai 22:37-40

Feb 14 cu vawlei cung ram kip nih Valentine’s day tin min an pekmi ni a si. Valentine’s Day cu, kan theih cia bantuk in, nungak le tlangval pawl caah cun special day bak a si. Hi ni a phak ah hin cun nungak tlangval aa duhmi cu chim lo, darling ngei lo mi pawl hmanh hi kan lungthin cu a zeiti maw tein a rak um cio ve ko. Hi ni ah hin pakhat leh pakhat an dawtnak langhternak dingah laksawng maw, biazia dawhdawh in maw, etc.. an i pe tawn. Asinain hi ni ah hin zeibantuk laksawng tha, sui, ngun, biazai an si zong ah, lungthin dihlak le nunnak taktak in langhtermi dawtnak tluk i a man sungmi an um lai lo.

Valentine’s Day hrimhrim hi zeitindah a rak i thawk ti zoh hmanh uh sih:

Kumzabu pathum lio ah, Rome Siangpahrang Claudias II nih 'Nupi ngei ciami mi ralkap nakin nupi ngei rih lomi tlangval pawl hi ralkap caah an ttha deuh' tiah a rak ruah. Cu caah a ralkap pawl kha nupi ngeih a thlauh hna. Tlangval a si mi ralkap paoh nupi ngeih a ngah loh tiah nawl a chuah. Cucu tlangbawi Valentine nih, "hihi a ding lo mi a si" a ti i, a thli tein ralkap pawl caah biakinn ah tthitumh thlacamnak a tuahpiak tawn hna. Cu ti Tlangbawi nih a thli in thil a tuahmi kha siangpahrang nih a theih tikah, Valentine cu thong a thlak i a thah. Mipi caah nunnak tiang pek ngam in zawnruahnak, dawtnak lungthin a rak ngei mi St.Valentine philh lo nak caah Feb-14 cu Valentine’s Day tiah ti a si. (Note: Valentine’s Day kong hi tuanbia phun in an chimmi dang zong a um ve).

Kan nunnak ah dawtnak hi zeitluk a biapit ti hi kan theih cio ko lai. Dawtnak lo in a nung kho mi kan si lo. Dawtnak in zeithilpaoh kan tuah khawh dih. Asinain, I John 3:18 nih cun, “kan i dawtnak hi hmur le kaa lawnglawng a si awk a si lo, dawtnak taktak, thil ti nak ah a lang mi dawtnak a si awk a si” tiah ati. Cucaah dawtnak kan ti tik zong ah hin hmur le ka in a chuak sawhsawh mi si lo in, mit hmuh kuttongh in a lang kho mi dawtnak langhter ding hi Bible nih a kan fial deuhmi cu a si. St. Valentine nih a rak langhter mi dawtnak cu thil ti nak in a rak lang mi dawtnak a rak si. Cubantukin Pathian nih a kan dawtnak zong hi hmur le ka lawng in a kan chimh si lo in a fapa ngeihchun pek nak in zeitluk a kan dawt zia a rak langhter. John 3:16 chungah, “… Pathian nih vawlei hi a dawt hringhran caah a Fapa ngeihchunte kha a pek, cucaah amah a zummi paoh cu an thi lai lo , zungzal nunnak an ngei lai” tiah ati. Zungzal nunnak ka co nak hnga fapa cu kan caah pek asi. Kei mah ca lawng ah a si lo kan dihlak caah a si.

Rom 5:8 zong ah, Paul nih hi kong hi fiang tein a tial ve, “ Asinain Pathian nih cun zeitluk in dah a kan dawt kha hitihin a langh ter: kannih cu misual kan si ko rih lio ah khan Kri cu kan caah a thi” ati. Pathian nih zeitluk in dah a kan dawt ti mi hi a thisen in tehte a piah. Hawidawt nangtah mi cung i dawtnak na ngeihnak hi zeitindah na langhter ve lai? Biathiam sawhsawh le holh thlum chimthiam sawhsawh in maw na langhter lai, asiloah na nunnak in dah? Zeitindah kan langhter lai ti cu a cungah ka rak langhter cang bantuk in Bible nih fiang tein a kan cawnpiak ko. Nifatin kan nunnak ah Pathian kan dawtnak siseh, kan minung hawi kan dawtnak dihlak hna hi biathlum le holhthlum chimthiam sawhsawhnak in si lo in kan nunnak hrimhrim in langhter ve ding a kan cawnpiak. Matthai 22:37-40 zong nih, “ Bawipa na Pathian cu na lungthin dihlak le na ruahnak dihlak le na nunnak dihlak in na dawt lai, ti hi a ngan bikmi le a biapi bik a simi nawlbia cu a si. A hnu changtu biapi bik nawlbia cu…. Na innpa cu nangmah naa dawt bantuk in na dawt lai” ti a si. Lungthin dihlak le ruahnak dihlak in Pathian dawt ding le innpa dawt ding timi hi kanmah tuah ding mi a si. Pathian cung ah le kan innpa cung ah lungthin dihlak le ruahnak dihlak le nunnak dihlak in dawtnak kan langhter khawh asi ah cun cu vialte hna cu a mah Pathian min sunparnak ah a cang lai. Cutin dawtnak kan langhter khawh ah cun kan family chung zong ah lawmhnak a khat lai. PCCF chung zongah hmur le ka sawhsawh si loin lungthin dihlak le nunnak tiang in a lang khomi dawtnak kan langhter khawh a siah cun Pathian thluahchuah kan dong chin lengmang ko lai.

Ka bia donghnak ah, Valentine’s Day ah hin hawidawt nang hi dawtnak co tu na si. Pathian nih an dawt, a dawtmi na si . Pathian sin in a ra mi dawtnak hi vawlei dawtnak bantuk a si lo, hmur le ka ii dawtnak sawhsawh zong asi lo, nangmah le keimah nih thatnak kan hmuhkhawh nak dingah nunnak tiang a pe ngam mi dawtnak asi. A tuah Pathian kan dawtnak ah siseh, kan minung kan dawtnak ah siseh, PCCF kan dawtnak vialte hna hi lungthin dihlak le nunnak tiang a pe ngammi dawtnak siter ve hna uh sih ti sawm bu in ka bia ka donghter.

(Feb 7, 2010) Online Sermon

Preacher - Uk Ceu

Atucanah canttha a kan sersiam piak I tthawngttha chim kho ding in nunnak a kan hrawmh rihtu kan Pathian min ka thangtthat cu pinah can a ka petu PCCF upate, tawlreltu hna cung zongah lunglawmhnak lianpi ka ngei ko ti vun chim ta ka duh. A si le catiang rel hna uhsih law.

II Timote 1:6-7

“Cucaah na cung i ka kut ka rak chuan tik i Pathian nih an pek mi laksawng kha na nunter peng nak hnga chimh than kan duh. Pathian nih a kan pekmi thlarau nih cun mi ralchia ah a kan ser lo, tthawnnak le dawtnak le mah le mah i uk khawhnak tu khan a kan khathter.”

Biahmaitthi

Timote pahnihnak hi Paul nih thlarua lei i ( II Tim. 1:2) a fa a si mi Timote sinah a kuatmi a si ti cu zapi theih a si. Pual nih a cakuat in biacah a duh bikmi cu,“harnak le hremnak le sifahnak ka inmi chung i zumhnak le lungsaunak le dawtnak le thlachiat ruahnak ka ngeih bantuk hin, nang zong ngei ve, ti hi a si.” Baihmaitthi ah kan hmuh khawhmi a si.

Kan cathiang rel mi chung ah lut colh ko uhsih law Paul nih na cung i ka kut ka rak chuan tik i Pathian nih an pekmi lak sawng kha na nunter peng nak hnga a ti tikahhin zei lak sawng dah asi hnga? Nunter peng a titikah hin teh a nungmi cu zeitindah a umawk a si hnga?

II Timothy 1:6 “ This is why I remind you to fan into flames the spiritual gift God gave you when I laid my hands on you.”( NLT). A rak comi a si loah Pathian nih a rak pekmi kan ti lai cu Thiangthlarau laksawng meizik kha chem/zap peng a duhnak cu mihter hlah “NUN” ter peng ti a si. Ephesians 4:11, chung kan zoh ahcun Pathian nih khrifabu chungah gifts/laksawng a kan pekmi a um cio. Cucu hmanding le karhter dingah a si chiah sawh ding a si lo. Takchunnakah hlasak a thiammi nih hla saknakin thawngttha chiam a thiammi nih thawngttha chimnak in Pathian nih a kan pekmi kan gifts/laksawng cio kha kan nunter peng i pathian caah rianttuan ding kha a biapi tukmi a si. Khrifa nun Christian life timi cu a dinhawk a si lo a mah le thil tikhawhtawk tein Khrih le Khrifabu caah a cawlcang pengding a si. “NUN” timi zoh ta uhsihlaw minung pakhat a nung ko ti kan theih khawnhnak cu a cawlcaknak ah khan asi. Kan chim thawntheu mi bia cu ka hngilhtuk ning cu a thih in ka thi ko ti a si. Chim duhmi cu cawlcaanghnak a ngei ti lomi a hgilhmi cu a thimi he a lo ko cang tinak a si. Minung pakhat, khrifabu pakhat, fellowship pakhat a nun ko ti kan theihkhawhnak cu a cawlcanghnak/action ahkhan a si. Khrifabu zong hi zeitluk a ngan zongah zeitluk a hmet zongah a cawlcangh ti lo i Pathian nih a pekmi laksawng daitein a chiah i rian a ttuan tilo ahcun a nung ko ti awkahcun a harngei cubentuk thiamthiam in kan PCCF pi zong hi kan ngan, minung zakhat/100 leng kan si tinakin kan nun i rian a ttuanmi kan si ding hi biapi deuh in ka hmu. Mifimbia ah “A dog live is better than a dead lion” timi a um. Rumra hna ngeihngai dawhngai ttung doctor hna zong pahinh le pathum lak, biachim hna thiamngai ttung i, cu vialte Pathian nih a kanpekmi laksawng cu a mahcaah hman ttunglo nakcun Pathian sinah rawlul le khup bil in mithli he thla a cam mi nuhmei le santlailo i kan ruahmi hna nun khi Pathian hmai ahcun a sunglawi deuh ko lai dah ti hi vun langhter ka duhmi a si.

“NUN” a nungmi cu a thang lai a nung ttung i a tthang lomi cu a thih lo hmenhah a damlo/zawtnak a ngeih biatal cu a silai. Efesa 4:15 “ kan lu a simi krih leiah khan a lam kip in kan tthan awk a si”. a ti bantukin a lamkip in tthanawk a si. Stature pum/tung, wisdom fimnak, knowledge hngalnak, ah kan tthan awk a si. Cuvebantuk in Khrih nih a kanpekmi Thiangthlarau zongin kan tthan ve awk a si. Kan piangthar kan ti thlaizing ahcun kan mah kel kan si tthan tawn kan lai phungthluk ah “Vui tu lai le Sai at lai bang” ti mi a um. Nihin lai mi cheukhat kan ti ko lai vawikhat lungthawh saphut ah Vui tu lai le Sai at lai ko cu kan lo tak ko vaan hmenh cim shelaw a dohlai phun in biachim i thlahnih thlathumnak hrawng ah cun vaan chimh cu chimlo paiperkhatlo ruahpi a sur hmenhah kan ni pum huam ti lo. Philippines siningin kan chim ahcun Cavite in Manila cu a hlat tuk Manila nih Cavite cu a hlattuk timennih pum lo hna in a kan um termi hi fahdeuh in tuak le ruah a hau ko rua ti hi chuahpi ka duhmi a si.

Biatlangkawmnak

Nihin kan Krihfa nun ah emotion lungthawhnak lawngin kan kal i pehzulhnak leiah kan daithlannak hngalo ding hi a biapi ngai. Paul nih a Fapa Timote kha Pathian rian na ttuannak ah a mahnih an rak pekmi laksawng thliangthlarau mei kha mih ter hlah NUN ter peng kan vun pehpiak deuh ahcun cu thawng cun dahkaw tthawnnak, dawtnak, mah le mah i uk khawhnak cu na ngeih lai i a rianttuannak ah ral tthat nak an pek lai cu. Cucaahcun nihin kan Khrifa sinak ah Pathian nih a kan pekmi phungdang deuh in kan chim ahcun kan comi flame mei bantuk in a hlio mi te kha mih ter lo in NUN ter peng uhsih cuticun a rian kan ttuan nak ah hin tthawnnak le raltthatnak a kan pek lai i cu thawng cun Pual nih Filipi 4:13 “ tthawnnak a ka petu Khrih thawngin thil zeipaoh ka tuah khawh ko hna.” A ti ben tuk in a rianthiang kan ttuan nakah kan hmuhtonmi harnak lungretheihnak vansannak a intuar khotu le teitu kan si ko lai.

Ka lawm Pathian nih kan thawngttha ka zapi caah thluachuah in tthahnem santlai mi ah can ter hrem ko seh. Amen.