August 24, 2014 PCCF Weekly Online Sermon

"NUN"

Pastor Bei Rona

Online in thawngttha chimnak caan ka hmuh caah kai lawm. Siaherhnak he chim ka duhmi cu Kei ka caah Nun hi zeidah a si? Kei ka caah Nun cu Khrih a si ko (Philipi 1:21) timi cathiang hi thazang lak ding in ka duh ngai.

Paul cu Khrihfami hrem ding le thah dingin a kal lio ah Damaska Hauka ah Khrih ceunak nih a ceuh hnu ah Thawngttha phuan le chimhding in a nunnak dihlak le a can pek in a pum pe bakmi a si. Hremnak, Thongtlaknak, pawttamnak, sifahnak, harnak phunphun hna hi Khrih thawngttha a chimhnak ruangah fiang tein a ingtuarmi a si. A ngaingai lo ahcun cawnnak lei le hrinsornak ah cun mi hrinfa le fimnak lei ah thiamsang ngaimi a si. Nain a chimmi cu kei ka caah Nun cu Khrih a si ko a ti.

Minung nunnak cu rilipi cung i khual a tlawngmi tilawng bantuk a si" a can ah thlichia tilet a tho, a can ah aa dawhtuk mi hmun ah kan kal. tiah Billy Graham nih a ti.
Cawley timi pa nih cun " Nunnak hi cu damhkhawh a si tilomi zawtnak pakhat a si " a ti. Rawl ei a hau i, kan ei awk caah rian tuan a hau, cucu kan thih hlan lo kan tuah a hau. Cucu damhkhawh ti lomi zawtnak a sinak cu a si a ti.
Misifak pakhat nih cun " Nunnak hi zuamnak le rianttuannak a si" a ti kho men, nain mirum pa nihcun " Nunnak hi tangka" a ti ve men ko lai.

Kan nih zumtu khrihfa hna le hmailei ah kan Miphun le Ram caah rianttha ttuan ve tuah ning a ti i, Sianginn a kai liomi hna nih Nunnak timi suallam hi kan nunnak ah zeitin dah sullam kan ilak ning a si hnga?

A cunglei hna nih an chimmi bantukin maw kan si ve hnga? Sihmanhdehlaw cathiang nih fiang tein a kan chimhmi cu Nun hi khrih a si a ti. Hi ka zawn ahhin theih tthan le ruahtthan a hau mi cu Khrih timi sullam cu zei dah a si ? tawinak in chiti thuh ti a si. A si kun ah Nun cu Khrih a si kan ti tikah a sullam a kan cawnpiak duhmi taktak cu zei dah a si ti kha theih cu a herh ngai. Ca hlun ahhin chiti thuh timi hi siangpahrang le Tlangbawi hna kha chiti taktak in an rak thuh ko. An caah hmai a suan ding le an hruaitu hna ding kha Thluachuah an pek a si lo ah nawl ngeihnak an pek.
Kan nih kan chan ah chiti thuh timi a sullam taktak cu Profet Isaih casual timi Bawi Jesuh nih a relmi hi a si ( Isaiah 61: 1, Luke 4:18-19) . Chiti thuhmi cu Sifakmi luatnak, Mit cawmi hna khua hmuhnak,( Ca thiam lomi hna ca thiamnak) paw ttammi hna paw khimnak, Thongtlakmi hna luatnak, lung a kuaimi hna damnak, ngaihchiami hna hnemnak caah thlahmi kha a si, a ti. Kan Bawipa Jesuh khrih cu vailamtah thihnak tiang tuar in kan caah khamhnak or Luatnak caah aa pekchanmi or a pumpekmi a si. ( Philipi 1:21) ah Paul nih Kei ka caah Nun hi Khrih a si ko, a ti. kan nih tah zei tin dah kan ti ve hnga? Paul nih cang 22- 24 a chimmi ah milung a suk ngaimi cu ka thih ahhin ka caah thil ttha deuh hmanh a si ko hnga nain Nun rih hi nan caah thilttha tuahnak caah a herh caah nung ko rih ning a ti.
Pathian nih a kan dawt I, kan phu kan tawk lo pi catang hna kan van kai kho . Kan fimnak le thiamnak, thawnnak le thazang hna hi kan Miphun le Ram caah Nun hram ko hna usih. Khrih thawnnak he cun kan Nun khawh ko lai.

Bei Rona

August 3, 2014 PCCF Weekly Online Sermon

"THAI ZING HRUAITU CAAH NIHIN I TAT KAN HERH!"

 Pastor Timothy Dawt Kham 

Bible Cang Thim: “Bawipa nih vainam bantuk in le cantiang bantuk in a ka tat i a thalbawm chungah a ka sanh. A ka thawh i Israel nang cu ka sal na si nangmah thawng in sunparnak ka hmu lai tiah a ka ti. Isaiah 49:2-3 (amp)

Bawi Khrih ah u nau rual nan dam maw? Bawipa Jesuh min in nan kut kan tlaih hna. Tuzing thawngtha nan sin ah chim ka duhmi cu, “Thaizing hruaitu cu nihin kan itat a herh” tihi a si lai. Ram or miphun siseh a thanchonak tawhfung cu hruaitu a si ko ti cu zapi theih silai ti ka zumh. Bible tuanbia kan rel tik zongah miphun a dernak le a thawnnak cu an siangpahrang cung ah ai hngat.

Kan chimduhmi a fiankhawh nakhnga Moses tuanbia kha Bible in langhter ka duh.A tuan bia kan zoh tikah nunning dot thum a kan cawnpiak.

1. Bawhte si lio ah

Moses a chuahlio hrawng ahhin Israel ngakchia an karh liopi a si. Pharaoh siangparhang nih sal, pa ngakchia karh kha aduh lo caah thah dih dingin nawl a chuah. Asinain Moses nu le pa nih cu nawlpekmi cu an pah chih . Zeicaahtiah Moses cu a dawhngaimi ngakchia a si tiah Bible nih a ti. Ni hin kan nun, dawhngai in hmuhmi si a biapi ngai ti. Pathian nih a kan sawi mi cu kanleng lei muisam a si bal lo, kan ziaza, kan umtu kha a sitawn. Cucu Bawipa nih Samuel sin ah a ti. Samuel nangnih cun lenglei muisam na zoh, kei nih cun thinlung kazoh a tinak kha si.

A nu le pa zumhnak nih hruaitu tha a chuahter. Moses nu le pa hi kan zoh tik ah an iphundang tiah ka hmuh. Siangpahrang nawlpek zong an tih lo. Cucu an zumhnak a si tiah kan Bible nih a kan chimh. Heb 11:23.Thaizing fa le hna si cannak kongah hringtu nu le pa, nihin kan dirhmun nih lai a rel ko. .Zumhnak ah kan dirlo ahcun inn chungkhar ivenkhawh ding si ti lo. Pathia bia le thlacamtinak he kal kan herh ko tiin ka hmuh.

2. Siangpahrangchungkhar ah kum 40 a um

Pathian nih kan ca cio ah tinhmi a ngei tiah Isaiah 29:11 nih a kan chimh. Moses cu Pharaoh chungkhar sin phan hlah sehlaw hruaitu tling a sikho hnga lo. Zeicaah, fimcawnnak a chambau hnga. Cu hmun cu Pathian nih fimcawnnak in taat a duh ruangah, a chiahnak a si. Bible nih Moses cu a thabik mi fimnak (the best education) an cawnter a ti. Acts 7:21.Nihin hawidawt mi ramdang kan um tikah hin mah zalonnak men caah siloin kan ram le miphun caah santlaimi kan sinaklai fimcawnnak ram ah Pathian nih taat a kan duh a si, tiin ka ruah. Kan caansunglawi tein ca zohnak (study) caah hmang hna usih ti kan duh hna.

A can ahmangthiamlomi cu thaizing ah kan chambau kho men. Moses a hlawhtlinnak pakhat cu kum 40 chung cawnnak ah a can a pek khawh caah a si ti usihlaw kan palh lai lo. Moses uar um nak pakhat cu a biachim mi hmual a ngei (Acts 7:21). Mipi a hip khomi cu a biachim hmualngeimi khi an si. Cucaah fimcawnnak ah kan itaat lo cun kan bianih mipi a hip kho hna lai lo i Pathian sunparnak a lang kho lai lo.

3. Ramcar ah Bawipa nih a thial than

A tinh bal lomi ram a phan. Cucu Pathiannih a donghnak training a pekmi a si. A muisam zong aithleng dih. Zeicaahtiah ramcar a si. A sinain Moses nun, hika zawn ahhin cawnawk a tlakmi pathum in vun langhter ka duh.

a. Pathian he an itong. Harnak horkuang zong hi Pathianhmai kanhmuhnak ding caah Amah nih a kan serpiak tawn. Job zongnih ka takpum a rawkdih cikcek hnuah Pathian cu ka hmu lai a ti (Job19:26). Bawipa he i ton hi a pakhatnak step a si. Cu lo ahcun Pathian nih hruai tikhi a um kho lo. Moses cu Pathian aw fiang tein a theih hnu in a mi hna hruaiawkah Pathian nih a thlah. Pathian he i ton nun a kan cawn piak.

b. Thil ton zia a thiam cang. Krifa kan nun ah hrialawkthalomi cu nunzia thiam hi a si. Moses cu ramcar a si cah a harnak nih khan nun a cawnpiak, zohhmanh Israel mipi an phunzai lio ah khan a nih cu Pathian hmai tu a kawl. Kan harlio caan zongah Pathian nih a kal tak lo, mitthli he kan um lio zongah a kan zamtak lo tikha philhhlah u si. Cucu hmai lei kan thiltikhawhnak tu ah a cang telai hawidawt.

c. Zumhtlaksinak nun: Moses nun nih a kan cawnpiakmi lak ah ka duh ngaimi pakhat cu zumhtlak nun hi a si. Israel mipi an phohpian cuahmah lio ah mit in hmuhlomi Pathian lei ah tan cu a fawi lai ti ka ruat lo. A sinain Moses cu a dirpi bak. Ramcar ah kum sautuk a umnak nih khan a dirhmun a fehter. Caansau in hmuh mi cu sau a nguh ve. Nihin mi tampi cu lamphawk zulh i kan I tinhmi hmuh kan duh cio. Moses nun kan zoh tikah can saupi chung a hmailei ton dingmi a cawn. Cu ruangah cun kum 40 chung hruaitutha a can khawhnak a si.Zumhtlak tein kal hna u sih.

Ka dawtmi nan dihlak nang le kei hi thaizing hmandingmi kansi. Pathian nih an tinhpiakmi goal na tlolhnak hnga lo a tu ah na nun itaat hram ko.

Bawipa nih thluachuah in pe ko hna seh .

Timothy Dawt Kham
Baguio

July 13, 2014 PCCF Weekly Online Sermon

PCCF unau hna,
Dam in nan um cio hna maw? Weekly Online Sermon kan rak thlah than. Nithaizing thawngtha a kan chimtu cu kan assistant treasurer a si mi Sayamah Run Tha Hlei Par a si. Union Theological Seminary ah M.Div final year a kai lio mi a si. Pathian thawngthabia akan hrawmh caah kan ilawm tuk.

"NGEIHTHIAM NUN"

 Sayamah Run Tha Hlei Par

Baibal Cangthim: Mathai 6:14 “Mi nih nan cungah an tuahmi thatlonak kha nan ngaihthiam hna ah cun, vancung I a ummi nan Pa zong nih an ngaihthiam ve hna lai.”

Bible Biakamthar kan reltik ah Khrihfabu chungah siseh, inn chungkhar ah siseh ngaihthiamnak nun ngeih a herh zia kha tampi kan hmuh khawh. Jesuh Khrih zong nih a kan chimh pengmi cu ahlei in Dawtnak le Ngaihthiamnak nun hi a si. Paul nih a tialmi cakuat kan rel tik zongah kan hmuhkhawh mi cu kan nih zumtu mi cu khrihfabu chungah le inn chungkhar cio ah lungthin in siseh, tuahsernak in siseh, zumhnak in siseh, thlarau in siseh, ngaihthiam nun in siseh kan nun ding asi tihi a telh dih ve. Zei caah tiah ngaihthiamnak le lungrualnak aum lonak inn chungkhar le khrihfabu cu zeitik hmanhah an tinhmi ah an kal ciahmah kho bal lo. Dinnak a umnak hmun ah daihnak aum ve, dawtnak a umnak hmunah lawmhnak a um ve I ngaihthiamnak a um nak hmun paohah lawmhnak a um ve. Dawtnak a umnak hmun paoh ah ngaihthiamnak a um I ngaihthiamnak a umnak hmun paoh ah thlauchuah a tlung ve. Tinhmi aa khatmi lungthin ruahnak aa rualmi bu kip paoh ah lawmhnak a um I daihnak a um zungzal. Zei caah tiah Dawtnak cu sualnak a kawl lo I ngaihthiamnak nun nih remnak le hnangam a chuahter zungzal.

Mathai 18:19-20 ah kan hmuhkhawh mi cu Hi vawleicung ahhin nan halmi thil kongah pahnih nan lung aa khah ah cun nan halmi thil cu vancung I a ummi ka Pa nih an pek hna lai, zeicaahtiah ka min in pahnih pathum nan I pumhnak ah kei zong nan sinah ka um ve” tiah ati. Lungrualnak umnak dingah ngaihthiam nun ngeih a herh hmasa. Ngaihthiam nun nih lungrualnak le dawtnak le zawnruahnak a chuahter. Cu caah Mathai thawngtha nih a kan chimh bantuk in pahnih pathum lungrual tein ka sinah nan halmi cu kan pek hna lai a ti. Khuazing Pathian thluachuah cu lungrual tein Amah a thagthat timi sinah aa phuang/ a tlung ton.

Mithiang Paul nih Korin Khrihfabu sinah ca a kuat mi hna cu 2 Korin 7:10 chungah “Ngaihthiam nun nih khrihfabu a dam ter, a kekkuaimi ruahnak le ruahnak khah lonak hna kha a remhter” tiah a ti. A ngaingai ti ah cun inn chungkhar ah siseh, khrihfabu ah siseh hawikom cungah siseh ngaihthiam khawh lomi thil a um kho lo kan ngaihthiam duh hna lo caah ngaihthiam lonak lam kawl asi ton. Ngaihthiamnak a um lonak hmun ah sualnak kawl a um sualnak I kawlnak nih lunghrinnak a chuah pi i lunghrinhnak um ah cun tinhmi ah an kal ciahmah kho bal lo.

Bible Biakam Hlun chungah Ngaihthiam nunnak hmanthlak dawh Genesis chungah Esau le Jacob tuanbia le Joseph le a unau sinah kan hmuh khawh. Jacob nih fater sinak kha Esau sin in a lak. Esau zong a thin a hung tuk ko nain caan le ni a rauh deuhdeuh ve tikah le an karlak ah palhnak I theihthiam in sual phuannak an tuah hnu in cun ngaihthiamnak lawnglawng nih a zulh cang hna. Pakhat lei ngaihthiamnak lawngin hnangamnak le lawmhnak hmuh khawh a si lo, kaphnih ngaihthiamnak a um lawngah hnangamnak le lawmhnak taktak hmuh khawh a si. Esau le Jacob tuanbia ah hin an pahnih in ngaihthiam nun an ngeih caah an pahnih in an I nuam an chungkhat pahnih cungah lomhnak a tlung I Bawipa thluachuah an co veve.

Ngaihthiam nun a umnak hmun paoh ah dawtnak a leng zawn ruahnak a um I thatlonak le palhnak vialte cu philh a si cang. Dawtnak mit in zeipaoh cuanh/zoh a si cang I hnangamnak le lawmhnak a leng. Cu tikah khuazing thlauchuah a tlung. Jerimiah 31:34 chungah “ an thatlonak kha ka ngaihthiam hna lai I an sualnak kha ka hngal camcin ti lai” ati. Ngaihthiamnak cu sual cinken a si lo sual cinken cu ngaihthiam a si ve lo. Ngaihthiamnak nun um nak ah cun sualnak le ralnak nih hmunhma an ngei ti lo.

Ngaihthiamnak cu a voi in tah a si lo a zungzal in ngaihthiam a herh. Mathai 18 chung kan rel tikah voikhat cu Peter kha Jesuh sinah ara I “Bawipa ka unau pa pakhatkhat nih ka cungah sualnak tuah sehlaw voi zeizat dah ka ngaihthiam lai voi sarih maw? tiah a hal. Jesuh nih cun a leh I “si hlah ee, voi sarih si lo in voi sawm sarih” tiah a leh. Judah cawnpiaknak ah cun minung pakhat kha voithum tiang na ngaihthiam lai ti a si. Peter nih fiang deuh seh tiah voi sarih maw? A ti nak a si. A si nain Jesuh khrih nih cun si hlah ee voi sawm sarih le voi sarih a ti. Voi sawm sarih le voi sarih cu voi 490 tinak a si a chim duhmi cu ngaithiam zungzal ko tinak a si. A ngaingai ti ah cun voikhat voihnih thangchiatnak, kongceihnak te hna ngaithiam khawh lo cu khrih thlarau kan nunnak ah a um lo caah asi ko lai.

Mark thawngtha chungah kan hmuhkhawh mi cu “Midang kha an sualnak nan ngaihthiam hna lo ah cun vancung I a ummi nan Pa zong nih nan sualnak an ngaihthiam ve hna lai lo” ati. Khrihah dawtmi PCCF u le nau hna kan nih pumpak pakhat cio hmailei kan karhlan tinak le khua kan khantinak, lai kan reltinak ah Ngaihthiam nun a ngeimi zumtu, ngaihthiam nun a ngeimi u le nau kan si nak lai Bawipa nih thlau kan chuah hram seh.

Lawmhnak tampi he
Tha Tha
Cavite.

June 29, 2014 PCCF Weekly Online Sermon

"Unau Thinlung Ngei Usih"

By Pastor Duh Sang

Bible Cangthim: Unaurual I rem tein khuasak ti hi zeitlukin dah a that I a nuamh. Aaron luthlung in a khabe ah, a khabe in a angkihngawng ah a rung luangmi Oliv chiti bantuk a si, Hermon tlang dap, Zion tlangcung ah a hongtlami bantuk a si,Bawipa nih bia a kan kamh, zungzal nunnak cu.” (Psalms 133:1-3)

Biahmaithi: Voikhat cu unau hna kha sianginn an kai. A u pa nih a nau kha a ke a bai caah a liang ah aikhinh. Cu ti cun nichiarte in sianginn cu an kai. Zinglei ah sianginn khan tiang a nau cu a chiah. Zanlei lawicaan ah a nau cu a liang ah aikhinh than i inn ah alawi pi. Cucu an saya pa pakhat nih a hmuh tikah, a upa kha bia a hal, “Nifatinte inn na nau na liang in khinh lengmang hi na batuk lo maw?” a ti. A upa nih cun, “Saya pa, kaba lo. Kanau a si” tiah a leh. Unau sinak hi I hnek nak ah alang, dirkamhnak ah a lang. Zeitindah Khrihfami hna nih unau thinlung kan ngeih lai? Hi bialehnak ahhin kan Bible cang chirhchan in (3L) in zohhna usih.

L1: Lungkhahnak/ lungrualnakngeih a herh. Ps. 133:1 “Unau rual lungrual tein khuasak ti hi zeitlukin dah a that i a nuamh” ti ah a ti. Lungrual cu thawnnak a si. Chiandeih hmanh saram lak ah a thawngbik a sinain, naa run nihcun an teiko. Unau thinlung ngeihnakdingah lungrual a herh. Keimah duhmi lawng in siseh ti a sithiam lo. A thami a si ko ahcun midangduhnak kha hmuhthiam a herh. Zapi hruainak kha cohlankhawh a biapituk. Mah dang in peu a sikho lo.

L2: Lung Siaherhnak Ngeih a Herh. Ps. 133: 2 “Aaron lutlung in a khabe ah, a khabe in aangkihngawng ah a rung luangmi Olive chiti bantuk a si.” Lungkhahnak nih a chuahpimi unau sinak cu a um sawhmi a si lo. Hmundang ah a luangthanmi a si.Lu in angkihngawng, angkihngawng in khabe ah a luangthanmi a si. Amah sinak ah a di a riamcolh lo.Siaherhnak he hmundangah rian a tuanthanmi a si. Midang fahnak kha Oliv chiti bantukin a thlopbultu asi. Midang hma a portertu a si lo. A damtertu a si deuh. Kan nunnak hi midang sin tiang a phankhomi a si a biapi ngaingai.

L3: Lungthumhnak a herh. 133:3 “Hermon tlang dap Zion tlangcungah a hongtlami bantuk a si. Bawipanih bia a kan kamh zungzal nunnak cu.” Hermon he a tahchunh. Unau lungrual tein khuasaktinak ahcun a sannak in a niamdeuhnak thumhkhawh a hau.Thumh duh loin tlangcung lawngah um peng ahcun sullam a ngei lo. Dap ti khal cu a zor I midang caah thatnak a chuah pi bantukin, zumtu hna kan nun hi, midang caah thumh a herhnak ah thumh, zor a herhnak ah zor ngam kha asi. Chinmi nih phungtluk kanngei, “Unautha le liangdantha” ti a si. Liangdan cu midang fahnak chawnnakdingah thing putmi tangah a um lawngah mi dang liangfahnak a chawn. Midang harnak chawn hi kan lung kan thumh caan hna hi a rak si. 

Biadonghnak: Zumtu hna nih Unau Thinlung kan ngeihkhawh nakhnga, Lungrualnak a herh, Lung Siaherhnak a herh, Lungthumhnak a herh. Tukum kan hmuitinh/ tlangtar cu, “Unau Thinlung Ngei Usih” ti a si. Pathian Sunparnak Caah Si Ko Seh!

Pastor Duh Sang