Friday, July 31, 2009

July Thla Pumhnak



A Ni - July 26, 2009
A Hmun -
Major. Van Thio te inn


Tu tan July thla pumh cu a nuam hringhran. PCCF thla fatin pumh ka pumh mi lak ah ka nuam bik pawl si lai. A ruang cu ka chim ti lai lo. Kan President ti mi khah ka rinh. Inn ngeituk cung ah lomhnak tam pi kan ngei. An i manh lo lio pi si ko nan zanriah lawng si lo in a chuankhin tiang zong tuanvo an kan lak piak dih caah kan i lawmtuk hringhran. Pathian tu nih an thabatnak le an heunak tu ah a let in thlawchuah chin ko hna seh.

Tutan i a rak i pumh kho lo mi cu an sung tak tak. Zeicatiah aa pum mi nih kan theih mi, kan hmuhton mi, pakhat le pakhat kan i hawi komh ning, kan experience le kan ei mi nan hngal, nan thei, nan thep kho lo. Hi hnu cu thlakhat voikhat pumh te hi cu zaanghlei zong cawi in pumh khawh i zum lengmang hna uh sih tiah kan sawm hna.
Hmanthlak download duh mi nih ka hin hmeh i download tuah khawh si.
Nan dihlak Pathian nih lam in hruai in thlaw in chuah chin cio ko hna seh.

Sunday, July 26, 2009

(July 26 '09) Zarh Sermon

By - Pastor Ester Hlei Khia

Philippinnes ka phak hnu phungchim cu chim hlah a pumh hmanh ka pum bal rih lo i Biakinn zong ka ngai tuk lio can te ah tuanvo ngei tu pawl nih phungchim an ka thiah caah ka lawm tuk hringhran.

Tu zing can ah i ruah ti ding ka duh mi cu :

Topic: Tinhmi Kawl Tung
Text: I Cor 9:25-27
“Kei cu ka tlik tikah tinh mi kawl fiang tein ka ngei; kaa thongh tikah a ping a pang a thong mi bantuk ka si lo. Zuamnak hmun ah rak I zuam u tuah mi dang kha sawm lengmang tung I a sawm tu keimah kha hlawt mi si sual lai ing ti phang in ka pum cu ka hrem I fekte in ka uk.”

Intro:
Kan ngak chia lio tuanbia an rak kan chimh ton mi pakhat cu Chungkuh le Saveh tlik zuamnak a si. Saveh cu tlik a thawng ngai mi a si caah Chungkuh nih cun a ka phak naisai lai lo a ti i naidem tangah a din i aa hngilh. Cu kar ah Chungkuh cu duhsah te in a kal i a kawltung a phan. Saveh cu a hun i hlauh tik ah a khua ruah a har. A ruang cu a hnulei ah Chungkuh a um ti lo, a hmailei tu ah a um cang. Saveh thinlung ah a um kho ding mi cu midang zeirel lonak le mah le mah i zumh tuk sual nak hna hi a si

Minung kan nunnak ah hin kawltung pa 2 kan ngei.

Thlarau caah Kawltung:
Minung a simi paoh nih a hmasabik kan ruah hnga ding mi cu sersiam tu Pathian, a nungmi Pathian kong hi a si. Keimah hi a hodah ka si i aho nih dah a ka sersiam. Zei ruang ah a ka ser i zeidah tuah seh ti a ka duh ti hi i fian a hau. Cun Krifa a si mi nih krifa kan si nak a muru te hi theih fian a hau. Kan thlarau kawltung theih fian lo ah cun kan vaivuan sual lai. Nihin krifa min pu nain a vaivuan mi tampi an um len cang.

Taksa caah Kawltung:
Laimi cu sifaah kan in khawh ko na in rum kan celh lo ti mi bia kha ka lung ah a tap peng. Laimi cu sipuazi kan tuah i tlawmpal kan rum deuh ah cun chikkhat i din ta i kan rumnak cu (azahta) tep ta kan duh. Kawl mirum cu techin fapar tiang caah an rum. Laimi mirum cu kan chan hmanh a nguh lo mi tampi kan um. Cucu zeiruang ah dah a si hnga. Tinhmi kawltung kan ngeih lo caah a si sual hnga maw?
Sianginn kan kai tik zong ah tinhmi te cu kan ngei a hau. Ka kai mi course hi khuaika zon ah hman ding a si lai ti mi le zeiduh nak thinlung in dah hi course hi ka kai ti mi zong i fian a hau. Kan kai mi course nih keimah pumpak caah le kan community caah zei that hnem nak a chuah pi lai ti mi zong tuak chih in sianginn kai ding a si. Cheukhat cu tinhmi ngei setsai lo in a kai mi tam pi kan um. Lothlo pawl zong tinhmi kawltung um set lo in a phung ning in lo kan thloh caah kan paam chin cang. Inn zuat satil kan zuat tik zong ah tinhmi a ngei lo mi caah cun a vaivuan ko lai. Phungthlukbia chung ah "If there is no vision, the people are perished" timi kha tha tein ruat than a herh rua.
Laimi lakah a um theu ton mi thil pakhat cu pakhat le pakhat i bomh chanh nak in i entai le i soisel nak hi a si. Thlarau le nutling patling kan ti mi hna zong khi a can ah cun kan lam te kal ko lo in hnu lei i mer than i kan mah bantuk a si lo mi kha soisel le zohniam deuh kan hmang. Kan thlarau caah siseh kan taksa caah siseh hmai kan nor cuahmah lio ah mi soisel a hmang tuk mi le mi zeiah a rel lo tuk mi cu Saveh tuan phun bang kan si ko lai. Mi soisel le thangchiat ti mi cu kan mah kan lam kha zoh lo in mi kha kan zoh tuk hna ruang ah a si. Mi kan hnur pah ah cun kan lam a ding kho lai lo i mi zong kan tluk ter hna long si lo in kan mah zong kan tlu ve sual lai. Hmainor kho lo in kan tang sual lai.
Paul nih kei cu ka tlik tik ah tinhmi kawltung fiang te in ka ngei a ti. Mi kha sawm tung I a sawm tu keimah hi hlawt mi si sual lai ti ka phang a ti. Kan nih zong hmailei kan karhlannak ah kan thlarau caah siseh kan taksa caah siseh tinhmi kawltung ngei cio uh sih law cu kan kawltung lei ah cun dinfel nak he Chungkuh bang in duhsah te in kal i zuam cio ko uh sih. (Phiatlan) zong zawh duh hlah uh sih! Phiatlan zawh nih kawltung a kan thelhter sual lai!
Pathian nih thluachuah in pe ko hna seh.

Sunday, July 19, 2009

(July 19,2009) Zarh Sermon

By Dr. Anna Sui Hluan

Atu bantuk cantha le can sung lawi an kan pe tu Pathian min thangthat si ko seh. Cun online in thawngtha chimhnak can a ka pe tu PCCF upa hna nan cung ah kai lawm i PCCF le hraui tu upa hna nan cung ah Pathian nih thluachuah in pe ko hna seh.

Philippine i a um mi Laimi tam deuh cu Pathian rian tuan ding ah Bible siang in a kai mi kan tam deuh ti in ka hmuh. Kan nih chungkhar zong kan phanh kaa te a si ve rih i mah can tawi te chung ah Pathian lam hmuhsaknak ka hmuh mi he ai pehtlai in thazaang laknak ding ah tlawmpal te in chimh ka duh.

Theological education kan ti mi hi head knowlege lawng a si lo. Mi nung ti mi hi lu lawng i a nung mi kan si lo bantuk in taksa le thlarau zong ai tel ve. Cu caah head knowlege kan lak lio ah thlarau lei zong ah (spiritual sight of human) kan than a herh. Cu thanchonak caah nifatin (decision) a tuah tu cu kanmah li la kan si ko. Decision kan tuah tik ah a can ah cun ruah khiar mar te in tuah a um ban tuk in a can ah cun ruah set sai lo in fawituk in kan tuah caan zong a um. Zeibantuk in kan tuah zong ah (effect) cu a um leng mang cio ko.
A dihlak relnak ding caah Read more hi hmet.

Paul nih Romans 7:21-23 ah “Cucaah thil umtuning cu hitihin a si ti kha ka hngalh: a thami thil tuah ka duh tikah khan thatlonak kha ka pawngte ah a rak um ko. Ka chunglei mi cu Pathian phung ah khan aa lawm; sihmanhselaw ka chung i phung dang a rak um ve kha ka hngalh- cu phung cu ka lung nih a tha a timi phung a rak dohtu kha a si. Cu phung nih cun, ka pum chung i rian a tuanmi sualnak phung sal ah khan a ka ser. Mi lungrethei ka va si dah!ti in a lungrethei nak a chim.

Paul bantuk in mi lungrethei kan tam lai ti in ka zumh. Hi Bible ca tlang chung in hmuh khawh mi thil pa hnih (2) cu thlarau nunnak le pumsa duh nak ai dan nak a si. Romans 8:5 ah a ti than mi cu “An minnung sining nih tuah u a ti hna ning paoh in a nungmi cu minung sining nih a duhmi nih khan an lungthin cu a uk hna. Thlarau nih a chimh hna ningin a nungmi cu Thlarau nih a duhmi nih khan an lungthin cu a uk hna” a ti.

Mah Bible ca tlang he pehtlai in America ka um lio ah ka theih mi pakhat cu rul (rat snake) pakhat nih lu pahnih a ngeih i pawpi cu pakhat a si. Lu pahnih lak ah pakhat lawng te rawl an pek ah cun rawl an pek mi lu nih khan a thawn deuh ca ah thazaang a der deuh mi pakhat kha a hraui. Cu bantuk in a tang mi pakhat lawng kha rawl an pek than tikah mahnih cun peklo mi kha a hruai than. Mahhi mi nung pakhat chung ah a um mi thlarau nunnak le pumsa duh nak he ai lo ti in ka hmuh.

Thlarau tha zaang ngeih nak ding ah rawl kan pek le kan ei ah cun thlarau lei tha zaang a thawng deuh lai i pumsa duh nak lei ah tha a der ko lai. Atu Philippine ah um mi Laimi hna nih hin zei lei ah dah kan thawn deuh awk a si? Paul nih Galatian 5:16-18 ah thlarau nih a chuahtermi nun le minung sining nih a tuah tawnmi an i ral nak kong a chim mi ah khan verse 25 ah a ti mi cu, “Thlarau nih nunnak a kan pek cang caah kan nunnak zong hi amah nih a uk awk a si.”

Cu caah nifatin kan thlarau nunnak caah zeibantuk rawl dah ei a that lai? Thlacam (personal prayer time with the Lord), Bible ca rel, devotional ca rel, pumh etc. hna hi thlarau caah rawl tha a si hnga lo maw? Cacawn le riantuan buai ruang ah thlarau nunnak rawl ei kan tlorh maw? Remember! Kan ei mi hoih zat in kan thang ko lai.

Pathian nih thlauchuak in pe ko hna seh.

Saturday, July 11, 2009

(July 12, '09) Zarh Sermon

By Rev. Dr. Hrang Kil

(Biahmai thi) :
Bawikri ah riantuantu hoi vialte hna a hmasabik ah PCCF net thawngttha hrawmnak ah Phung chim can a ka pektu Luthlai chungttuantu nan dihlak cungah lunglawmhnak tampi ka ngei. Cun a pahnihnak ah thawngttha a hrawmmi nan dihlak cungah lunglawmhnak a ngan ko. Apathumnak nak PCCF Pathian tukhal ttha rian fialmi hna nan nih dirkamhnak thawng in damnak ka hmuh i, thawngttha ka dirpi khawhnak a si timi hi lunglawmhnak nan sin langhter lo in ka um kho lo. Thawngtha bia ah kal uh silaw,

TUKHAL THA NIH FIALMI RIAN

Nan nih tukhal hna hi bia hi ruat hmanh uh, a hnuk nan din, a thaumi kha nan thah hna, ahmul kha nan i aih sihmanhsehlaw tuu kha nan cawm hna lo. Abami kha thazang nan pek hna lo, azawmi kha nan hramh hna lo, hma a ingmi khan an menpiak hna lo, a ping ah a kal kha lamhruai lo in a tlaumi kha nan kawl hna lo, a uk in nan uk i, a thek lei lam an i thek hna. Ezkiel 34: 3 – 5

Profet Ezekiel nih Tuukhal ttha, Tuu run zohkhenh rian fialmi le Tuu run hna umtu ziaza dingmi lam kha Israel tuanbia chirhchan in a kan cawnpiak. Tuukhal taktak a rat lainak kawngzong a kan cawnpiak fawn. Cu caah ni hin kan nih cu a tuu run zohkhehding ah fialmi a sal lawnglawng kan si. Cucu Jesu nih salttha le, sal thalo, dum zoh khenhding fialmi u nau pahnih hna tahchunhnak in a kan hmuh sak. Cu caah kan nih Pastor le krifabu upa hna cu Tuukhatu cu kan si lo i tuu run zohkheh dingah fialmi kan si.

Jesu nih a chim i, “ Tuukha ttha cu kei mah ka si, ka Tuu hna caah nunnak zong ka hloh siang fon,” tiah a ti. Johan 10: 11. Ni hin Pathian a salttha sidingah hriamnam kan i tat lio ah Zeihi dah Pathian rian, Zeihi dah tuu run zohkhenhtu fialmi rian, zeihi dah tuu hna rian a si ti theih fiang i riantuan a herh ngaingai.

Luke 9: 35 ”Minmei chung cun Aw pakhat nih amah hi ka fapa ka thimmi cu a si i, a aw kha ngai uh,” tiah a ti. Tuu run zohkhenhtu fialmi nih Jesu sin in a rami biatak Thlarau rianttuannak aw kha ngaiin a tuu run cu kan zoh khenhpiak a herh, cu ti loah cun chiatserh kan si sual lai. Tuu zong nihcun Tuu run zohkhenhtu hna aw cu ngai in ti noi (thinak sivai) a telmi maw a si ti thlum dah ti in cawithlai in din awk a si ve.

Jesu tlangcung mui thlengnak nihhin ramri pahnih cheuh in thil a kan hmuhter. Cu hnacu vancung pennak nun ram le vulei pennak nun ram khuasak ding hna an si. Peter cu ngatlaih paw cawmnak hmun in siseh, Jem le Johan cu lothlo pawcawm an sinak hmun in siseh, Lehtamah pa nih a Tuu ruan zohkhenh rianfial dingah a auh hna. Lothlo pawl hi khuacaan that lo he, eitu dang nih hrawh he cun si ton kaw cawpawm kho huaha lo in a vaimi, rianttuan huamlo mi tampi an um ti cu Jesu bia lila nih a kan chim. Peter zong ngatlaih khawh lo ahcun lungdongh in zing le zan eiding ruatin khuaci a mui ton ve lai dah.

Tlangcung Jesu hmel ai thlenghlan ah, Mi thawngli rawl a dangmi kha chanreu le nga si kaw, lothlotupa Jem le Johan unau pawl siin a chuahmi Chanreu le Peter unau hna chungin tlaihmi nga pahnih kha Jesu nih chirhchan in Mithawngnga rawldanghnak ah a ser lai ti cu ruah damh awk a si ko.

Jesu nih thawngttha cu vanmi caah si hin lo in nan mah vawleimi caah a si a ti peng. Mui hmel thlenghlan ah, Zultu hna chungah vawlei dirhmun in cun, nahchuah, zerngeih, zumhkho lo lunghrinhpeng,i thah le i do, a hodah uktu bawi ah a ngan deuh lai tiah dirhmun i cuhnak in an khat. Cu caah Judahmi sinah a kal pihna i, “ Sadusi le Frasimi hna thilnu i ralring uh a ti hna,” Frasimi cu thawngttha cawnpiaktu hman lo an si i, sadusi pawl cu mipicungah uktu ding lobu an si. I ruangnak, zalennak um lo, sifah le mirun thleidan, mithmai ngeilomi nu lungin thilak cheh, an duhlomipa luru hmun ah sualpuh in thahnak tiang tawhtlaitu hna kha a chim hnawhchanmi a si. Pennak ram ah “Ngan a duhmi cu ngakchiate bang a hmebik si a chuh lai,” tiah a caawnpiak fon hna.

Jesu mui ai thlentik ah Peter le Jem le Johan hna cu LUNGLONAK (Senless) hmun a phanpi hna. Hihi vancung pennak le vawlei pennak ramri pahnih aithennak hmun a si kha zultu pathum hna a hleiin a hung cawnpiaknak a si. Jesuh cu Lehtama sikaw, peter nih inn sak a fial cawlh, Johan le Jem cu lo an thlo lai keimah ngatlaih in tlangcungah Moses, Elija he tiin Jesu inn tthattha sakmi chungah khuasa ti kha an phang ti lo. Hi ka tlangcung um hi zeitluk a nuam ti hi an chim kho lai lo dah ka ti. (Cucu vancung pennak an hung tepter chun kha a si) . An inn le lo, an nupi le fale hmanh an thei ti lo. Jesu nih a chim hnawh chanmi cu Vancung pennak ti cu, dawtnak, zalennak, remnak le saduhthahtling a sinak kha vulei zongah khahter le dirh a herhtimi Social order a si kha a hunglangh ter. Pathian nih mivialte caah a timhpiakmi hmuitimh cu nan tepmi pennak kha tlangcung umpi zungzal ding sihin loin vawleimi sinah vahrawm ter vedingah, fialmi pei nan si cu ti kha JESU nih a vel in chim a duh hna. Cu caah Pathian khamhnak rian cu Thlarau, Taksa, Thinlung damnak a si ti kha a langter duh. Vancung bantuk in leicung zongah daihnak remnak um seh tiah vanmi nih tuukhal hna sin ah zai hla in an phuang. Vawlei ah Cu daihnak le remnak lam aupi dingah cun Jesu nih tuu run zohkhehding fialmi hna sinah fial hnawhchan bikmi rian cu a si.

1. Pathian rian:
Khamhnak rian cu minung rian a si lo, amah Pathian rian (ceremony law) a si. “Ceremony law ti cu vawlei cung sual biachahnak tahfung a si, nawlngeilotu pa nih naih le tonghsual ahcun thahphung a si,” tiah OT nih a kan cawnpiak. Social law tu cu minung le minung kar lak sual biachahnak tahfung a si. Eg. Saul siangpahrang cu social law ah zeihmanh sualnak a ngei lo. Minupi zong a chuh bal lo, nungakthar zong a sualpi bal lo nain a rian a theilo, Tlangbawi ngan rian (Ceremony law) a tuah sual; Aruahnak in Biaktheng a sak, raithawinak a tuah, Profet bia a ngai lo, a ral Agag siangpahrang nun a zuah, Caw no le Tuu no thauthau hna Israel ram ah ratpi in Pathian raihthawinak caah a ti. Mihmai ah minung nun zuah le raithawinak caah pehchanhding a timi caw no le tuu no hnacu thiltha bak asinain Pathian caah cun sual nganbik ngaithiam khawh lomi a rak si ia. Cu caah a si lomi rian a tuah caah Apennak le ram cu chuh in a innpa sinah pek a si. Sual ngaithiam hal zong a thiam lo. Cu caah zungzal ngaithiam lo a si. David cu, Upadi pah in Uriah lai a nawng, Uriah nupi a chuh, a sualpi, social law cu a hrawk a si nain Pathian sin sual si lo in zatlang upadi ah a sual, sual ngaihchihnak a tuahtik ah ngaithiam a si i fasinak in a tlau lo. Ni hin cu Jesu nih Adam sualnak ri thawk in Moses nawlbia tiang micungah nawlngeih thihnak cu Zisu nih zalak in a lak i Kalvaritlang cungah Upadi he a tlak in a thah cang caah Vancung pennak luhding donkhamtu pakhat hmanh upadi kan ngei ti lo. Kol 2: 12-13, Heb 10 15 – 17 ( ceremony law cu Jesu nih a limcang caah vawleimi cungah sualphwtnak upadi a um ti lo cucu thawngttha Pathian sermi a rian kan timi cu a si.

2. Tuu run Zohkhentu fialmi rian:
Jesu nih a zultu hna kha a thawh i, “hlan ahcun, zal lo, phaisa bawm lo in thawngttha chim nan vak lio ah chambaunak nan ngei lo nain atu ri thawk in Zal ngeilomi nih zal i zalh uh law u, phaisa ngeilomi nih phaisa i damh u, vainam ngeilomi nih vainam i tat u, Vancung le vawlei ah a ummi nawlngeihnak cu pek ka si cang i khuazakipah kal uh law, thawngttha hi vaphuang hna u, midam lo hna cungah nan kut chaun ulaw thluachuahpek uh, hithil tikhawhnak vialte hi vulei donghtiang an zulh lai i nan sin ah zungzal kan umpi hna lai.” tiah a ti. Matt 28: 18 – 20

Jesuh nih, “Piter nangmah nih hi hnanak in na ka dawt deuh maw?” tiah a hal: “Bawipa kan dawt le dawt lo cu nangmah nih na hngalh” tiah Peter nih a leh; Johan 21: 15 - 18

1. Ka tuu tete kha cawm hna
2. Ka tuu kha cawm hna
3. Ka tuu kha zohkhenh hna. Biatak kan chimh
4. “Na no lio ahcun na taisawm kha nangmah nih nai sawmh, na duh paoh in na kal tawn; a sinain na tar tik ahcun na kut kha na zao hna lai i, midang nih na kut cu an tem lai i na duh lonak hmunah an kal pi hna lai,” tiah a ti. Tuu run zohkhenh rian hi, Tuu hna karlak ah biaceih hi a si lo. Bia ceihtu cu Tuu khaltu pa rian a si. Tuu khal zohkhenh fialmi rian cu tuu run tlawnlennak hmun a hrawk khotu an ralhna kha dirkanh, ti hal rawltam ah ti le rawl khimte pek le tuurun hnangam te in tlawnlen ter kha a si. Piter nih Jesu bia cu biatak in a ngai i Thlarau hruainak in a kal caah, Tukhaltupa bia tehte a khannak ah zumhawktlak in thih tiang a ngamh, sunparnak cu pek a si i Rom ram cu Pathian pennak hram thawknak hmun khualipi ah ser a rak si.

Tuu run rian
Tuu run nihcun, a khaltupa aw aan le lam a hruainak kha a zulh lai i ramhringlakah, an mah tuurun dang hna he ai khat tein ramhring tamti le bawhti kha an rian a si. Ti dawnghnar kha lamh le noiter loin thiangte in an chiah zungzal lai. Pakhat le pakhar kar lak bia i ceih lo in ding le fel biatak lam zulh kha an rian a si. Tuu run nih a zawtnak kha Tuukhal fialmipa sin ah a chimh zungzal a herh.

Biatlang komhnak:
Nihin kan khalmi tu hna khi zoh hmanh u, muisam, pungsan an ngei ti lo. Sahrang thalo tangah sifah bik le nganfahbik tuar in an hrum. Zalennak um lo thahding in hrenmi tuu fabang an si. Biading a chimtupa cu thah a si i biading lo a chimmi pa cu cawnghlawmh a si. Jesu nih Frasi le Sadusi hna thilnu thalo kong a chimfiang ruangah thitiang a tuar. Nero nih inn a duah krifahna an si tiah sual puh in chiandaih le meiphu chung hlonh an si. Peter nih zatlang nun a ding lo timi Rom ram a hmuhtik ah biading a dirpi i Bawipa caah a nunnak i thaptiang Jesu aw ngai in lam ding a zulh (Johan 21:19). Kan tawng dih cang, kan tawng cuahmah, kan ton rih laimi can ah, chiandeuh nih caw a seh lai i, krifa an si tiah mual pho kan si te than lai. Kan Tuu run hrum le ai ruangmang aw ramchung ah kan theih ko nain zei lam in dah chiandeih kaa chung in kan chanh ve lai tiah na ruah bal maw? Keimah pawcawm khim lahkha ka ei a za ko kan ti hnga maw? Pathian bia chungah ai daw cikcek ding kan si nain zeiruang ah hme kan i daw kho lo? Biatak dirpi can a si nain zeiruangah kan dir pi ngam lo? Bawipa thlarau cu ka cungah a um i, thawngchung a ummi hna luatter ding le mitcawmi hna khua an hmuh tthan khawhnak hnga! Rain fialmi kan si hnga lo maw? Luke 4: 18 - 19 Jesu nih ka tuu run hna an hrum ai lioah zeitin dah na zoh khenh tiah ka hal sehlaw, zeitin dah ka leh ve hnga! Pathian nih thlua in Chuah hram hna seh. Amen.

Monday, July 6, 2009

Pa Fa Hna Khualtlawnnak


By Lewis Thla Peng Cung


Zankhat cu khua ka ruat leng mang I it kho lo in ka khua ruah mi nih aka tuah, asinain ka kuaruah micu ka tuak tthan leng mang tik ah zei bik khi dah ka ruah I zei khi nih dah cucu aka ruah ter ti awk ka thei hlei lo, culak ah cun ka thin lung ah “Duak!’ tiah a hung chuak mi cu, Nitin te kei, hi vawlei cung I khual ka tlawn nak hi zei tin dah ka tlawn I a ho hen dah kan um kal tti ti mi asi, cucaah duak tiah ka tho I hi “pafa hna khual tlawn nak” te hi ka ttial i rel ahuam mi le kan thazaang lak nak ah bawm chan tu ttha asi ve sual ah ti in ka rak thlah.

Pafa hna khual tlawn nak

Pa- Ka fapa ra law khual tlawng usih
Fa- Kapa khoi ka ah dah kan kal lai?
P- Kan um nak in ai hlat nak hmun le ram ah kan kal lai
F- Asiah kan khual tlawn nak cu ahla lai maw?
P- Asi, ahla lai nifa tin te kan tlawng lai
F- Zei tik ah dah kan i tinh mi hmun cu kan phanh te lai?
P- Na caan adongh nak ni ah kan phan te lai
F- Asi ah ho dah kan sin ah ara ve lai?
P- Lung lomh nak le ngaih chiat nak nih an kan zulh lai
F- Ngaihchiat nak cu kan sin ah ara ve ko lai maw?
P- Aw si, kei mah he naih deuh i na um khawh nak hnga arat ve ahrerh misi.
F- Asinain kapa, lomh nak lawnglawng nih kan zul she ti ka duh
P- Ngaih chait nak he lawnglawng hin lunglomh nak taktak he theih khawh asi
F- Zei dah kai ken lai?
P- Kei mah he kal duh nak thinlung lawnglawng kha i ken
F- Kan khual tlawn nak lam thluan chung ah zei dah ka tuah lai?
P- Na tuah ding mi thil pakhat te lawnglawng aum, naihte in ka sin ah um, zeihmanh nih na thinlung in tuai hlah seh
F- Cun zeidah ka hmuh lai?
P- Ka sun par nak na hmuh lai
F- Cun zei dah ka theih lai?
P- Ka thinlung taktak kha na theih lai.


Nikhat cu…

P- Khah ka fa nai ready cang maw? Kal cang usih.
F- Aw si, kai ready cang ko nain kei mah ka mipum dah ti lo in zei hmnah ken ding ka ngei lo
P- Nang mah na mipum dihlak lawnglawng kha ka herh mi dih lak cu asi ko
F- Asinain kei mah ka mipum lawnlawng cu khual tlawn ai tim mi ka lo lo pakhatkhat cu kai ken aherh ko
P- I timh tuah nak kha biapi ah chia hlah, kan khual tlawn hram kan thok cang.
F- Asinain ttih nak in ka khat e ka pa,
P- Zeihmanh ttih ding aherh lo zungzal in kei mah nih kan um pi lai
F- Ka herh mi vial te na ka pek dih lai maw?
P- Na caah zei zong vial te kan pek dih lai
F- Asi-ah zei dah na ka pek lai?
P- Na khual tlawn nak caah aherh mi thil dih lak kan pek lai,
F- Zei dah ka ka khual tlawn nak caah cun aherh?
P- Khual kan tlawn pah in kan hmuhsak lai atu cu na khual tlawn nak ding ah na herh mi na ngeih cang: cucu ka thinlung he i naih deuh nak dingca i na duh nak kha si
F- Kapa kan khual tlawn nak lam ka rakruah nak nak in ahar deuh, ka tha abaa tuk cang
P- Hi vawlei cung ah ka Fapa khual arak tlawn lio zong ah arak baa tuk ve cu ta
F- Ziah mah ti hin asi hnga?
P- Ka pen nak ram ka dirh rih lo caah asi.
F- Kan i tinh mi hmun kan phan deng maw?
P- Na rat nak hmun cu asau ngai cang ko nain na khual tlawn nak ding lam tam tuk a taang rih
F- A taang rih mi lam hna cu tah hi nak hin an fawi deuh lai maw?
P- Kei mah he naih deuh nin na um caan poah ah ka dawt nak chung ah na um lai i ka lam kha na lung afiang thlauh mah lai, cun na khual tlawn nak lam vial te chung i har sat nak vial te na ton mi nak khan “zung zal nun nak” tu hi zei dah asi ti kha na ruat deuh lai.
F- Kapa ngaih chiat nak nih tuk tiang aka zulh peng ko rih.
P- Hi na khual tlawn nak lam hi kei mah nih ka duh ning ban tuk te in ka rak suai (khuakhan) cang mi asi, Hihi harsat nak hna zong hi ka kut chung in na caa i ka duh nak a tlin khawh nak hnga ka rak thim mi asi.
F- Ngaih chiat nak hna hi ka caah ttih nak le thlalau nak ah an cang hna, asinain nang mah um pi nak thawng in ngaihchiat nak nih um pi nak cu ka caah ttih nak an si ti to. Asinain cucu ngaih chiat nak cu ka chung ah thuuk deuhdeuh in khua asa, cucaah hihi zung zal in ka sin ah aum peng lai maw?
P- Ka cung i bochan nak na ngeih chung poahpoah, hihi ngaihchiat nak nih hin an kal tak bal lai lo, asinain kei mah tu nih ka thin lung chung i zung zal na um khawh nak hnga in hruai zung zal ko ning.
F- Asi-ah nang mah na lung thin theih duh nak nak in thil dang theih duh nak ngei deuh ning law, hihi ngaichiat nak nih hin aka um pi peng ko rih lai maw?
P- Si-le ka thin lung kong ah zei dah na theih mi um?
F- Na thin lung phanh ding lawnglawng hi kai tinh mi i ai tlak bik mi asi kha ka theih
P- A-si-ah hi biatak hi zeitin dah na cawn?
F- Nifatin te nang mah he kan um kal tti nak in ka cawn mi asi.
P- Zeitindah ngaihchiat nak le lunglomh nak he nan i komh khawh ning si?
F- Atu cu na lung thin tthadeuh in theih khawh nak kha ka ngeih cang, ngaichiat nak lawnglawng hi nang mah he naih deuh in ka um khawh nak, nang mah cung i i hngat khawh nak le lung thin dih lak in i bochan nak asi kha aka theih ter tthan, cun lomh nak nih ka khual tlawn nak lam i fek te in ka dir khawh nak hnga aka bomh.
P- Ka fapa atu cu zaalak in na cawn dih cang, cucaah na khualtlawn nak lam peh tthan na duh ti maw?
F- Oh! Kappa, atu cu lunglomh nak dang zong ka kawl ti lo i, khual tlawn nak lam dang zong ka duh ti lo, nang mah caah zumh awk thlak te in le nawl ngai te in ka um khawh nak hnga lawnglawng hi thla ka cam.
P- Mi caa i na ttuan mi le na dawt nak hna thawng in lunglomh nak ngan chinchin in na hmuh lai
F- Kacaah hin lunglawm bu tein mirian va ttuan piak hna le va dawt hna hi ahar tuk mi thil an si, zei tin dah ka tuah khawh lai?
P- Ka sei hnam kha i lak in le ka thin fual nak kha i cawn bu in na tuah khawh ko lai
F- Kapa, na seihnam kai bei chung poah cu zei poah hi ka tuah khawh ko hna lai ti ka theih cang
P- Ka fapa ka kut hi fek te in i tlaih, mah hnu in na zulh hnga ding mi na lam hi zungzal nun nak na phanh khawh nak ding le ka dinh nak na hmuh khawh nak hnga ding asi cang lai.
F- Zei ruang ah dah na kut cu fek te in kai tlaih lai?
P- Nang cu ka rian tuan nak hmun chung ah rian ttuan tu ding in kan chiah cang lai, cun nang mah na rian ca i manh lo ngai in na um ih ka kut tlaih kha na phoih i zung zal nun nak na sungh ding kha ka duh lo.
F- And how do i labor in your harvest?
P- By Bringing Me Glory...
(kan tuah mi thil poah hi Khrih sun par nak ca si hram seh)

U le nau hna kan Bawipa Jesuh Khrih nih nan nih cu hi vawlei cung ah khual atlawng lio mi lawng nan si, hi vawlei hi zungzal nan um nak hmun asi lo arak ti mi ka ruah leng mang tik ah ahmanh tuk ka ti, ka lung hrim asi tuk, kan nun nak hna hi chik khat te chung, hi vawlei cung i khual kan tlawn chung ca te lawng ah hlanh mi kan si hi a fiang tuk hring hran. Cucu khual kan tlawn caan chung te ah hin aho hen dah kan kal tti i nitin te zei nih hin dah kan lam thluan hi akan zulh? Hi vawlei duh fah hakkuah nak le vawlei in achuak mi thil orduh cuai in le hi vawlei nih akal pi mi thil he kan nun nak hi ni tin kan kal pi ve sual maw? Asiloah nitin te khual kan tlawn nak ah amah kan biak kan Pathian, Jesuh Krih hen dah nitin kan nun nak hi kan kal tii ti hi ruat tthan hna usih tiah kan sawm hna… hihi pafa hna ka ti mi hi Jesuh Krih le nang mah, kei mah kha kan si ko, ho hen dah nitin te nang khual na tlawn, Jesuh Krih he maw asi lo ah vawlei thil le ri hen dah?!///////
Lunglomh nak ngan pi he,

Saturday, July 4, 2009

(July 5, "09) Zarh Sermon

Dawtmi, PCCF U le Nau hna, tu ni a sunghlawimi Bawipa ni thengte ah kan Bawipa Khrih min in nan kut kan van in tlaih hna. Khrih pekmi daihnak nan sin cio ah um hram ko sehh.

Tuchun nithiang caah Thawngttha phuang dingin thiah ka si caah, caanttha a ka petu kan hruaitu hna cungah kai lawm ii, damnak a ka petu kan Pathian a min ka thang tthat.

Kai thimmi Thawngttha tlangtar cu “TUKHAL TTHA SI I ZUAM HNA USIH” ti asi. A hmasat bikah Bible Thiang rel hna usih;

It was he who gave some to be apostles, some to be prophets, some to be evangelists, and some to be pastors and teachers, (Eph. 4:11)

Be shepherds of God's flock that is under your care, serving as overseers—not because you must, but because you are willing, as God wants you to be; not greedy for money, but eager to serve; (I Peter 5:2)

And when the Chief Shepherd appears, you will receive the crown of glory that will
never fade away (1 Peter 5:4)

NOTE: Dawtmi U le nau hna, a hmasa bik ah hi Tukhal Ttha Si I Zuam Hna Usih hi keimah tonmi, ruahmi, le keimah sinak in a chuakmi a si ii, Pathian rianttuan tu, a hlein in Pastor te kan caah tiin tinhmi asi. Lakawk tlak a um ahcun Pathian sunparnak ca siseh law, chambaunak a um ahcun attialtu keimah mawh asi.

Nikhat cu kai pumhnak Biakinn (Manila) ah nubu upa pakhat nih a ka fuh ii, “Pastor David, Kan Growth Group (GG) nangmah nih na kan hruai kho hnga maw, hruaitu kan nei ti lo ii kan in herh ko” a ka ti. Asi ko hme cu ka van ti ahkhin a nawlhmi cu, “Na umkalnak cu phaang duh hlah, kan in rin ko la” ti asi. Cuticun kan ii tthen. GG ka chimhnak kumkhat cu a dih nain umkalnak rin kha cu a um ruam lo. Ka inn nei nu (kapi) nih, “GG na chimhnak in an in bawm lo maw?” ati hnu lawng in GG inn neitu bia kha ka lung ah a rak chuak. Ka lehmi cu, “Kapi, biacu a ka kamh ko nain” zeihmanh a um lo ka ti. Kapi cu a lung a fak ngai. Kapi ka zoh ceu cun ka chimmi bia cu ka ruat tthan ii keimah le keimah kai mawhchiat. Cucu ziahhme ka va chimduh ka ti. A tatak cu, Pathian rian pei ka ttuan ko cu tiin chir ngai in Pathian sinah zaangfah nawl in thla ka cam.

Khri ah dawtmi u le nau hna, a tatak cu kan phu kan tawk lo in Pathian nih a thiang, a sung ii a lianganmi rian ah a kan auh. A cunglei Bible ca kan hmuh bantuk in, a cheu cu Apostles caah auh ansi. A cheu cu Prophets caah, a cheu cu Evangelists caah, a cheu cu Cawnpiaktu caah, le kannih cu Pastors caah auh kan si. Tuni ah Pastor rian hi a sunghlawi ii a lianngan ko ti ka van chim duh. Khrih nih a rak ttuanmi rian, Pa Pathian nih a ttuanmi rian asi kati ahcun nan ka mawh chiat ka zum lo. Psalm 23:1 nih hitin ati, “The LORD is my shepherd, I shall not be in want.” John 10:11 nih hitin ati ve, "I am the good shepherd.” Kannih cu Bawipa Tukhal kan si.1 (Footnote hi ka ca ttialmi a tam tuk ngakhnga lo ka khumh hrammi asi). Pathian cu a siammi mi zohkhentu vialte Tukhal a si (Tuu neitu zong asi), Khrih cu Vulei cung Khrifabu zohkhenh tu Chief Shepherd asi. Pastors cu kan khrifabu tukhaal kan si.

Cucaah, kan rian hi a lianngan hringhran ko. Kan phu kan tawk lo rian asi. Hi rian ttuantu dingah thim kan si cu thlawchuah tatak asi ko. Kannih cu khamhmi lawng kan si lo, Bawipa rian thiang thiahmi kan si.

Asinain, tuchun thil sining kan zoh tikah Pastor rian hi din lonak, duhfahna le lungthin hman lo in a ttuan mi kan tam pi cang. Cucaah, tuchun ah kan Tukhal Bawi (Chief Shepherd), Jesuh vulei cung a nun lioah zei lungput le zeitin dah rian a rak ttuan ti zoh hna usih a lam zulh ii zuam hna usih ti ka duh. Thil tampi lakah pahnih telawng ka lak lai.

Jesuh cu Vuleicung Chawva Ruat Loin in Rian a Rak Ttuan. Chim duhmi cu vulei cung chawva zeihmanh a ngen lo. Kan theih bantuk in rianttuan hram thawk ai timh tikah Vulei cung chawva le sui le ngun in tukforhnak a rak ing. Asinain anih cu a tei. Atu Pastors nih teh, Vulei chawva leiah kan lungthin zeidah a lawh?

Nikhat cu, Khrifabu Pakhat ( Manila ) ah Pastor pa nih members pawl kha, “Kha nan neihchiah vialte Pathian sinin a ra tin an zum maw?” ati hna an ti. Members nihcun zakhat ah zakhat nih kan zumh ko an ti, ti asi. Pastor pa nih cun ai thawh tthan ii, “Cu a si ahcun, Pathian innthiang ah nan neihchiah tthabik cu van pu hna u, Pathian nih a let in thlua an chuah hna lai” a ti hna ai. Member vialte nih cun an ngeihmi TV, Ref., sui le ngun ti bantuk thil man sung poah an van put ai. Pastor nihcun thluachuah a pek hna ii hnangam te cun an lawi ko. Nikhat cu, an member pakhat pa nih a Radio biakinn ii a chuahpi mi an Pastor tupa inn ah a hmuh ii a lau ko. An chimmi cu, Pastor pa nih a duhmi poah ai lak ii, a duh lomi poah a sahlawh a tthenhphawt hna ti asi. (Hihi a si takmi asi ii, a members hrim nih an ka chimhmi bia asi.)

Kannih Lairam ahcun hi bantuk a um tatak cu ka zum lem lo. Asianin, hi bantuk theng si loin phun dangdang in chawhlawn le neihchiah lei a zuangmi Pastors tampi dawh kan si cang. Zei Khrifabu General Meeting poah ah Pastors lahkhah kaihnak ttinpiah lo le kong ceih lonak a um tuk lo an ti. Kan ram tthat lo ruang zong asi ko lai, khrifabu pekchanh dawhceo zong ai tel ko lai, Pastor a zaimi kan tam cang ko. America ah Nun nuam tuk in khua a sa mi vawleicung minthang pastor pa 5, a cozah nih investigate an tuah hna ti asi. Cu hna lakah pa 2 cu Baptist pastors ansi ti asi. Nu pakhat zong ai tel ve.

Laimi Internet biaruahnak ah cun, a tawinak in mipi nih pekawk tawk in an kan pek lo deuh si ko tiin ttial asi. Keimah le keimah kai halmi cu, bianabia ah, Laitlang khuate inn 60 a ummi khua ah Khrifabu 5 um sehlaw, pastor vialte cu zaate le khimte le duhdim te cun kan cawm in kan chia kho hna hnga maw ti asi. Mah chungkhar ca hmanh rawl kumkhat ca nei tthitth lo lio ah Pastors pa 4 le pa 5 zohkhenh cu a har ko lai. Pastors an phunzai zong phunzai tlak asi ko lai nain, mipi lei zoh ve a hau in ka thei.

Pastor pakhat nih cun mi thluachuah pekding ahcun kanmah hrim duhdim te nun kan hau. Kan sifah tuk ahcun a hau nihdah kan bia an ngaih kun hnga ati. Kan laitlang context cu Pastor pakhat nih hnipuan chia tuk hna ii khuasak cu ningzak asi in kan ii hmu. Inn lo ttha le hnipuan ttha nih lo cu kan ti. Kha lungthin kha mipi lungthin zong ah kan rawnh hna. Chiakha tuk ii khua a sa mi pastor cu Pathian duhning rian a ttuanmi an si zong ah zei kan rel tuk hna lo. Neihchiah a tthawngttha deuhmi pastor thlacam in mi pawfak hmanh a damh lo zong ah kan ttih zah hna.

Prophet cauk (Jeremiah, Ezekiel, Zechariah) rel ahcun pastors (tukhal) le chawhlawn kong buainak kan hmuh. Chawhlawn le phaisa ruah ah a ttuanmi caah Pathian biafak zong hmuh asi. Duhdim nun an rak duh, thau ngai le mil tlengtluang in khua an rak sa hna. Mipi zeitluk an har an rak tuak lem lo. Tuni zongah pastor tampi cu kan khrifabu chung hmanh ah mi kan thleidan ngai hna. Mi sifak, nuhmei le bawmh haumi inn len nakcun mi neinung deuh he ii hawikomh cu kan tha a tho deuh. Khri cu zei hmanh loin rian a ttuan nain kan nih cu har bu ii pastor rian ttuan nakcun refugee si hmanh kan ii duh deuh.

Jesuh cu Toidawrnak Lungthin he Rain a rak Ttuan. Kan pa Dr. Dennis nih cataang sang deuh kai ahcun kan ii toidawr chin lengmang ding a si ati bal. Rua bantuk kan si ding a si a ti. A hmaan kho tuk. Kan Bawipa Jesuh cu sunparnak vialte kaltak in misual kan caah tukhal ttha rian a rak ttuan. A niamnak cem in ai langh ii, a faak cemmi innak tiang kan caah a rak in. Philippians 2: 7-8 ah hitin ai ttial;
7but made himself nothing, taking the very nature of a servant, being made in human likeness.
8And being found in appearance as a man, he humbled himself and became obedient to death— even death on a cross!

Tukhal Bawi asi nain, sal bantuk in a ttuan. Pathian fapa sunglawi asi nain, ai toidawr ii chimhngai mi salttha bantuk in rian a ttuan. Kawlmi nih kan chim tawnmi cu, “Na ka herh le nangmah ra, kan herh le ka ra ve la” ti asi. Atu chan pastors tampi zong kan si ve kho men. Sawm ciammaam lo ahcun mi inn thlacamh ai harh ngaimi kan um. Mah nih mi herh ahcun biathlum ngai in kan chim nain, mi nih herh ahcun kan ruam kan i kaiter ngai. Jesuh nih mi a damh hna tikah voitam pi cu amah nih a fuh hna. Ka van uar cemnak cu John 5 ii Tibual kam mizeng pa a damhnak hi asi. Hitin ai ttial, “When Jesus saw him lying there and learned that he had been in this condition for a long time, he asked him, "Do you want to get well?" Ka damh ve ko ti hmanh ai theih ai thiam ve lomi pa cu Jesuh nih bia in a va thok. “Dam na duh maw?” ati. Laimi pastor tampi nih cun a ka nawlpat lo ai tiin kan lanhtaak ko men lai. Asinain Jesuh nihcun mizeng pa damh ta lo lanh tak cu a celh bak lo. Zisuh cu mica tthatnak ding ahcun nawlpat tuk a hau lo.

Hi zawn ahcun, Rev. Luke (Saya Luke) ka van thei. Voikhat cu Sianginn rawldawr ah kan ii tong ii, “Thatte na laptop cu ka zoh ta ko la a ti” ii ka zoh ter. Kei laptop ve tiah, hnuamtuk kaw, ai tuar ti lo ii amah tein clean up a tuah. Kan unau nu Siangsiang zong nih, “Amah tein na computer ka remh la tiah a ra ii tthatuk in a ka remh piak” ati. Hi bantuk mitthami hna le mi ca tthatnak dingah bawmh a huammi hna hi cu saupi nung ko hna seh tihi ka thlacam asi. Asinain, a poi tukmi cu, kan lai pastors ah nawlpat hau loin dawtnak he toidawr in rian a ttuan mi kan tlawmtuk hi asi. Rev.__ van ti hmanh mi lucung cung kainak tiang ah kan hmang. Mah pastor hawi ciocio hmanh Rev. ngah lo cu kan zoh chuk hna. U le nau hna, kan Bawipa Jesuh cu surparnak vialte kaltak in a nauta cem hmun in tukhal rian a rak ttuan.

Pastors nih Kan ii Ralrin a Hau
Dawtmi u le nau hna, pastor rian hi a lianngan ko tiah ka van nawlh tthan. Old Testament ii the Four Offices kha atu Pastor dirhmun nih a kemh ka ti lai. Pastor cu Prophet bantuk in Pathian bia a phuangtu kan si. Priest bantuk in Pathian le khrifabu biakchawnhnak ah ttavuan latu ding kan si. Sage baktuk in Pathian biathuuk le biatak a thei ii mipi zong a zawnpiaktu ding kan si. King bantuk in kan minung hna a kilveng, a zohkhenh, le a cawmkengtu ding kan si.

Cu caah cun tukhal ttha si ding ahcun thiahmi rian hna he kalh tuk ii kan ttuan sual maw ti ii zoh pah kan hau. Kan rak chambau nakcu ii remh ii Tukhal ttha bang in rian ttuan hna usih. Kanmah le kanmah ii check tthan hna usih!

Kan mipi humhak loin a tthiotu hna kan si sual maw?
Kan mipi thazaang petu si loin mipi lung lila hna kan dongh tuk sual hna maw?
Biatak cawnpiaktu si loin mi lung a buai tertu hna kan si sual maw?
Lamding hruaitu si loin lam a tlaupitu hna kan si sual maw?
Dawtnak a chuahpitu si loin khirfabu ah remlonak a chuahpitu hna kan si sual maw?
Cawmkengtu si loin khrifabu ngunkheeng consumer hna kan si sual maw?
Toidawrnak lungthin nei loin sunpar mintharnak rumro a ruatmi kan si sual maw?
Pekchanh duh ve lo in Mipi nih an kan pek ding pei asi a timi kan si sual maw?
Nuhmui sifak le ngakttah buangro zohkhenh itim loin mirum misaang he rumro a bualcelmi kan si sual maw?

Manpek ruangah a ttuanmi tukhal kan si lo ding asi. Lahkhah le TA (Umkalnak) pek lo zongah a herhnak poah ah kal ding le ttuan ding kan si. Kei ka caah hi rian hi cu a hmetuk timi lungput neih lo a ttul.

Hi rianthiang kan ttuan tikah vulei cung chawva le sunparnak kan ruah tuk lo ding asi. Toidornak le dawtnak tu in lungtho tein kan ttuan awk asi. Cu ti kan ttuan lo ahcun nikhat Pathian lung lawng si loin kan mipi lung tiang ton lo kan fawi. Pathian le Mipi lung kan dongh tuk tik ahcun pastor pawl zong rian ngeilo si kan fawi te. Nikhat khat ah ram ai thleng te lai, zeimaw zatcu luatnak a hmu te lai. Khi tikah politician pawl fakpi in rian an ttuan te lai. Kan theihdingmi cu Politicians nihcun religious minung cu an kan rem tuk te la lo. Khi tikah mipi upat tlak in rian kan ttuan lo ahcun PCCF bangin politicians le mipi nih “zumtu vialte priest kan si dih” an ti te la. Pastors te kan herh hna lo ti caan a phan te kho. Hihi asi kho lo kan ti men lai. Bible ah titin ai ttial.

This is what the Sovereign LORD says: I am against the shepherds (pastors) and will hold them accountable for my flock. I will remove them from tending the flock so that the shepherds can no longer feed themselves. I will rescue my flock from their mouths, and it will no longer be food for them (Ezekiel 34:10).

Khi tikah mipi tampi cungah thlarau mangttam a tlung te lai. Mipi nih khrifa nun phung loin khua ansa te lai. Dawtnak le daihnak a um lai lo. Vulei cung nuamhnak le rumduhnak nih mipi lung a ttawl te la. Khi caan khi ramrawh ai thawk caan cu a si te lai. Kan Lairam FUTURE cu Pastors te kut cungah a um ka ti lai. Lairam a tthat tertu kan si bak tukin a hrawk khotu zong kan si ti thei hna usih ti ka duh.

Kan Ttuan Man Kan Hmuh Te Lai
Dawtmi u le nau hna, a hopoah kan tuh man cu kan zun te lai. Kan ttuan man zong pek kan si te lai. Kan Bawipa duhlo ningin kan ttuan ahcun a cung Bible caang ii kan hmuh bangin dantat kan si te lai. Asinain, kan tikhawh tawkte le kan thiam tawkte in dingte le felte in kan ttuan ahcun minung nih an kan pekmi nakin a sunghlawi deuhmi sunparnak kan hmuh te lai. Kan Bawipa Jesuh Khri (Chief Shepherd) a rat tthan tikah cun sunparnak luchin khumh kan si te lai. And when the Chief Shepherd appears, you will receive the crown of glory that will never fade away (1 Peter 5:4)

Cucaah cun, kan tuah ciami vialte kha van ruat tthan hna usih law, kan rak palhnak a um ahcun lung awttawm loin Pathian sinah zaangfah nawl hna usih. Hika Pathian bia kan cawn chung ahhin lungthin ttha le ruahnak ttha neih ii zuam hna u sih. Khrih (Tukhal ttha) lam kha zulh izuam hna usih law, a rak neihmi lungput kha neih ve izuam hna usih. Bawipa rian thiang kan ttuan hi kanmah tthatnak le sunparnak ca si loin Bawipa ram kauhnak le a sunparnak tu si ko seh. A tawinak in Tukhaal ttha si izuam hna usih!

Kai lawm. Pathian nih nan dihlak hluachuah in pe ko hna seh.

David That Mang

1. The term pastor itself is derived from the Latin word pastor which means shepherd.

The usage of pastor comes from its use in the Bible. In the Hebrew Bible (or Old Testament) the Hebrew word רעה (ra ah) is used. The word is used 173 times and can describe the feeding of sheep as in Genesis 29:7 or the spiritual feeding of human beings as in Jeremiah 3:15, "And I will give you pastors according to mine heart, which shall feed you with knowledge and understanding"

In the New Testament, the Greek noun ποιμήν (poimēn) and verb ποιμαινω (poimaino) are usually translated shepherd or to shepherd.

Friday, July 3, 2009

Minor . . . Minor

By Meng Cung
Cavite

WorldwarII lio i Singapore a hngak mi England ral bawi pawl kha an rawk ngai rua, pa khat hnu pakhat an then leng mang hna. General Tom cu Singapore um mirang ral kap uk ding in rain pek a si i, PM nih tinbaw cung tiang a hong thlah.PM nih bia a cah ta mi cu" Tom. Singapore ah ral tuk ah kan thlah hih , a dang rian tuan ah kan thlah lo" ti asi. England ral bawi pawl hi rianpi ah baui lo rain te(Minor) ah an va buai ko rua hih.Kan nih cio zong minor ah buai ka fawi ve tawn.

1.Kan class(Religion) i a kai ve mi student(Pha-oh-thoh)pa khat kha kan professor pa nih capoah siah. A ti mi cu, hi pa a rain bik cu "degree collecting" a si ti. Kan ni, nain khua a ka ruah ter. Kei hi teh??? cu pa cu rian tuan set tim loin(or) rian tuan tlawlh in degree rori a khawm sua mi a lo.

2.PCU student nu ngak dawh te( pha-oh-thoh) cu ka mit nih a kawl ngai i atu le a tu ka hmuh khawh ngai. Gate kam ah, thut nak ah, rawl ei nak ah tiin lawi lei bus tiang ka ka mit he a tong kho ngai. Ka hmuh caan poh ah a ka zoh bel lo. A zoh peng mi le a tongh peng mi cu a cell phone te kha a si peng. Ka hoi pa ka hal le zei hme a tuah peng cu nu ka ti le " A text" a ti. Univesity kai hi Text ah a ruah rua. Kawi chan bia bang a tha pah te ko lai.

3.Ka room pawng ah ( Pa-o-thoh) pastor pa pa khat a um i atha ngai. A room chung te ah a um peng i ca a zuam tak hi ta ka ti.Thla khat hnu ah ka theih mi cu "down load" a rah tuah peng, cacu kei mah bang a tawng ve bak lo.Ka hoi pa nih "Bible sianginn kai hi down load cawn ah a ruah hnga a ti".Kawi Chan bia bang Charting rumro, talk rum ro i....

4.Thantlang pastor ka tuan lio ah University pawl tun cu kan i ngeih ngai. BYF hla cawn kan sawm hna lai kan ti. Kan sawm hna i a huam mi an tlawm te. Chun he zan he cycle an i cit. Zei ko hme an i chawh peng ko ti ah Upa pa khat ka hal i lung dong ngai i in a ka leh mi cu " Cycle cit hi an rian hrang bik ah an ruah" a ti.

Next time....
.

Ahopoah nih thathmennak kan ngei cio ding a si.

By Chan Chan
PCU
Cavite

Pathian thilser hi ruah lengmang le tuaktan ve lengmang ahcun kawi Celh le keimah bantuk Lai tuak le lai ruah in a tuaktan ve bak mi kan caah cun a tuak le a tan ding hrimhrim zong hi a tam, lungzong a fimttitha kho bal lo pin ah a kan buaiter tuk lawmmam tawn.

Azeidang tahchunhnak lakding zia cu kan va thiam lo hmanh ah, Kan nih laimi, Aculakah PCCF zong zong hi nih le khek, capo a aur ngaimi kan rak si ve cu, a chim le a rel zia kan va thiam lo hmanh ah, a ngaihzia le bialam sail piak kan rak thiam ve,A nih le khek zia rumro ah hin cun kan i khat viar. A chei deuh ee deuh lo ee va ti ding zong kan um hlei ruam lo.


Hmunhmakhat ah pali-nga hrawng kan van i ton kan um tti phot ko ah cun, zeibantuk issue dah an ceih hna tiah khuaruah har ding zong khi kan si ti lo. Azeibantuk Iran ah heh tiah san-dah an piah minung a sawmsawm in an thih , Philippine ramchung hmanh ah zeitluk i thah le i nawn a um ko zong ah le kawlram ah zeidah a cang ti va khuarhlei le va ruah le va ceih zong khi kan ngei deuh rua lo hlah maw, asiloah a herh lem lo ti zong dah kan ruah. mawh! Kan theih lo bia dek. Zeidang theology lei deuh ah kal u sih kan ti ah le kan thawngphan cu manila jeepney pawl thawngnak hmanh in kan tui deuh. Azeimaw caan cun typhoon hlah nih maw a kan tlah hei ti deng awk khin a um. nungak kong van ti ah cun zeitindek kan si hei raut ve cang ko uh...:):):)

Vulei cung thil sining hi lai tuak le tan rori in tuak le tan ve ah cun, ahibator fikfa le hnirhte hna nan rak um ve hi ee, zeihme thathmen nak nan ngeih le, hei ti ding khi a lo. fikfa zong hi nan thathmennak a va um men lai dah, hnirhte hna khi cu i zohchunh ding ah a va thatuk hoi ko. Mah kong phi-sin ding ah cun PCCF kan sin ning hi ready in chiahpiak mi ko ka lo.

PCCF kan i thithruai ning le kan sining hi zoh tik ah ahohmanh a herh lo mi le a hlei mi kan um lo, kanmah le kan si ning, kan thiam ning cio hi a rak herh dih. Mah hi khuaruah har awk ngaingai a rak si. Tahchunhnak ah rian tuan a tawng ngaimi le a fial ngaimi nan rak um lio ah, thapek le forh rumro a thiam mi kan rak um ve. Keimah kai tel lo ahcun nan ba tuk sual lai dacaw tiah a ruat thiam mi zong nan rak um i, no problem a rak ti mi zong kan um ve. Saya Tawk Bawi i nan nih rawl nan chum lale kei ka holh la hei ti khi cu ai reldeuh suammau.ka ha a fak pah tawn ahei ti i kan theihthiam ko. A rori le a rumro hi cu kaltak cang u si law a tha hna.

Azeikhawn asiah, a tha pah te ko lai ti tu in ruat cang ko u si law, thil hmete zong ah kan herhnak, kan tikhawh nak le kan thiam nak a um ve ahcun PCCF ca thatnak ding le miphun zapi ca thatnak ding zong ah hmang ve hna u sih tiah forhfialnak he……..

lawmhnak tampi ka ngei.

Thursday, July 2, 2009

2009 June Thla Pumhnak



A Ni - 28 June, 2009
A Hmun - Dr. Dennis Shu Maung inn

Hi June thla pumh hi voidang pumh sawhsawh bantuk si lo in mithar donnak le kumcheu meeting zong kemh in tuah chih dih a si caah a sunglawi taktak mi caanhmannak a si.
Hmanthlak downloah duh mi nih ka hin hmeh i download khawh a si.
Cun PCCF hmanthlak vialte zoh na duh ah cun ka hin hmet.

Pathian nih PCCF thluachuah chin ko seh.