LUNG RUAL TEIN
Mtt.5: 21-24; Lam.1: 4, 8; 2:1-4
Rev. Khai Za Nawl
Biahmaitthi
Lungrualnak nih hin teinak a chuahpi ti cu a hopaoh nih cohlan dih a si. Pakhat le pakhat kan i pehtlaihnak ah dawtnak, remnak, le lungrualnak hna hi kan chanbau ngai rih ko rua. Lungrualnak he a ralkahmi cu mah miaknak lawng tuak le hnahchuah hi a si ka ti. Cubantuk umnak hmun ahcun dawtnak zong a leng kho lo, remdaihnak zong a um kho lo. Krifa hna cu a bu in um mi kan si i, lung i rual khawh hi a biapi ngai. Pathian pennak hi vawlei ah tlunter hi kan rian ngan bik cu a si i, hi rian hi tthawng chin le cakchin in kan kalpi khawh nakhnga lung i rual khawh hi a biapi ngai tiah ka hmuh. Aleng ral kan doh khawhnak ding ahcun, a chung ral tei hmasa a hau. A chung ral tei hmasa loin a leng ral kan doh sual ahcun zeitik hmanh ah teinak/hlawhtlinnak taktak cu kan hmu kho lai lo.
Jeim le Johan nih an halmi
Hi hna unau pahnih hi voikhat cu an i chuahsual ve. Annih nih an halmi cu, “A sunglawimi na tthut tikah pakhat na orhlei kam ah, pakhat na kehlei kam ah kan tthut ter ve law kan duh” tiah an ti. Hi kong hi zultu dang hna nih an theih tikah an cungah an thin a hung. Cucaah Bawi Zisuh nih “ mingan si duhmi cu…… nan dihlak sal a si awk a si tiah an lungput a rak remh hna (Mk 10: 35-45 ). Cu ruangah cun pei Bawi Jesuh Khrih nih vawlei caah thla ka cam lo, nangmah nih na ka pekmi hi mi tlawmte ca lawngah thla ka cam. Nang le kei cu pakhat kan si bantuk hin pakhat an si khawh ve nak hnga … tiin kan hmuh ( Jhn. 17:1-26 ). A rian hi zultu hna unau rual nih ttha tein le lungrual tein rak pehzulh te hna seh ti’n saduh a thah nain, hi bantuk bawinak tete an ton tikah Bawi Jesuh Khrih a thin a phang. Cucaah vawlei khamtu Jesuh vawlei caah thla a cam lo, zultu hna mi tlawmte ca lawngah thla a cam. A si nain a donghnak taktak ahcun zultu hna cu an Bawipa saduhthah bangin a leng ral doh khawh dingah an chung ral hi ttha tein an rak tei khawh i Bawi Jesuh Krih Nun Can Pehtu taktak an si kha an langhter khawh.
Matthai 5: 21-22
Hi kong hi Bawi Jesuh Khrih tlangcung cawnpiaknak chungah a telmi a si. Hika zawn ahhin Bawi Jesuh nih a kan cawnpiakmi hi kan chunglei sining ( kan thinlung ) he aa peh ngaimi a si ti cu a fiang. Pathian hi zeitik hmanhah a leng lei nak in a chung lei lawng a zohmi a si ti cu Baibal nih a chim lengmangmi a si. Mah u le nau / mah minung hawi kha a nunnak va lak ( thah ) cu chim lo, an cung i kan thin hungmi le zei ruaram lo/mihrut ti i va nehsawh le chiatserh hmanh khi Bawi Jesuh caah cun hel tlak awk aa tlakmi sualnak tuah a si cang.
Matthai 5: 23-24
Hi Baibal cang kan rel tikah, keimah ka lung fian ning, kan hmuh khawhmi cu u le nau i remlo piin Pathian sinah kan pek lengmangmi kan laksawng vialte hi Pathian nih a cohlan lo ti a si hnga. Bawi Jesuh cu remnak Bawi a si i remnak umlonak ahcun a um kho lo. Cu a si caah ruah a herhmi cu nihin ni ah kan pek chanh lengmangmi kan laksawng (1/10 pek), thlacam, thawngttha chim, mission rianttuan, Khrifabu caah i pum peknak, kan thil tikhawhnak hna, etc..) hna hi u le nau / mah innpa he remnak ngei bu in pekmi a si maw ti hi a si hnga. Chin miphun le Khrifa sinak hi aa tthen kho bak lomi a si. Asi nain nihin ni ah kan ziaza kan sining hi zohtthan tuah u sih. Kan sining hi Bawi Jesuh Khrih he kan tahchunh ngam lo hmanh ah zumtu hmasa hna nunning hi cu i lak/cawn ding bak kan si.
Zultu hmasa hna i nunzia dawh (Lam.1; 2:1-5)
Lungrualnak i theitlai cu Pathian biakam a simi Thiang Thlarau hmuhnak a si. Hi Baibal chungah hin zultu hmasa hna an nunning hi kan hmuh khawh. A tawinak in kan chim ahcun, culio caan ah Jerusalem khua chungah mibu buhnih an um. Pakhat cu vawleicung khuazakip in an ra i biaknak lei ah aa zuam ngaimi bukhat – annih cu Pathian a um tiah an zumhnak Jerusalem Temple chungah. Pakhat cu 120 hrawng lawng an si i ngeih le chiah vialte an i hrawm pinah atu le atu a bu tein lungrual tein thla an cam lengmangmi bukhat – annih cu inn pakhat chungte ah. Pentekos ni cu a hung phan i Jerusalem khuachung veve ah a ummi zei mibu ahdah Thiang Thlarau cu a rung ttum.
Jerusalem timi cu kan theih bantukin Bawi Jesuh an thahnak hmun le a hnuzultu hna zong tlaihkhih an ton khawhnak hmun a si i zultu hna caah cun a hrial in hrial a haumi hmun a si.
A sinain zultu hmasa hna cu an Bawipa nawl pek bantukin Pa Pathian i a biakam a tlinh hlanlo ( Thiang Thlarau in Tipil pek an si hlanlo ) lungtthawng ngai in le lungrual tein cuka khuachung ahcun an hngak. Cucaah Thiang Thlarau nihcun thih tiang zumhawk tlak le Bawi Jesuh tehte ttha si dingah tthawnnak a pek hna. Hika zawnah ka siarem lomi te langhter ka duh zultu hmasa hna nih an hmuhmi le laimi nih kan duhmi Thiang Thlarau zong hi aa khat rualo. Zultu hmasa hna cu Thiang Thlarau an hmuh tikah an tlu lo an ttap fawnlo, lam le kui lawng zong in thlarau mi an sinak hi an langhter fawnlo. Ttap le tluk nemmam cu, tthawnnak tu in an khat i vawleicung khuazakip ah ( Krifabu um lonak hmun ah kan ti lai cu ) an kal i Bawi Jesuh thawngttha cu an chim. Jesuh TEHTE ttha bak an si.
A donghnak ah
Desmond Tutu nih “Khrifa hna cu Bawi Jesuh Khrih i a suiluchin lawng chinh kan duh, a hlingluchin cu chinh kan duh lo” tiah a ti. Hlingluchin loin Suiluchin a um kholo ti hi kan philhlo ah a ttha. Lungrual tein Bawi Khrih tehte ttha kan si khawh nakhnga mah sining i hlawt i Khrih sining i lak a hau. Cu tik lawngah kan lung a rual kho lai i lungrual tein khua kan sak ttinak le thla kan cam ttinak nih hin Thiang Thlarau laksawng a kan hmuh ter lai. Cu Thiang Thlarau nih cun minung tthawnnak lawngin a tuah khawh lomi thih tiang zumhawktlak le tehte ttha sinak laksawng a kan pek lai. Nihin ni chanthar Khrifabu caah cun mah sining i hlawt i, mah miaknak lawng tuak le hnahchuahnak te hna hi kan caah kan Vailamtah (Kan hlingluchin) si ve seh tiah saduh ka thah. Jesuh Khrih a nuncan ning le a sining pehzulh i hnek hna u sih.
No comments:
Post a Comment