A HO SAL DAH NA SI?
Rev. Dr. Dennis Shu Maung
2 Pet. 2:1-3, 10, 19b, Cawnpiaktu hmaanlo
Hlan lioah Israel mi hna lakah nal prophet a rak chuah tawn bangin, nanmah lak zongah hin cawnpiaktu hmanlo a chuak ve lai. Thil hrawktu a simi le a hman lomi zumhning kha an chuahpi lai i anmah a tlantu hna kan Bawipa kha an hlawt lai i Cucaah an cungah a rian a rangmi rawhralnak kha an i tlunter lai. An ziaza tthalo kha mi tampi nih an i cawn lai i cu hna ruang ahcun biatak lam kha thangchiatnak a hmu lai. Cawnpiaktu hmaanlo hna cu, hakkaumi an si caah an phuahchommi tuanbia kha an in chimhmi hna cu, nanmah kha zeitindah kan miak khawh hna lai tinak caah a si lai. V.10 Cu hna cu an pumsa duhnak fihnung a zul i Pathian zei i a rel lomi kha an si khun. Hi cawnpiaktu hmaanlo hna hi an ral a ttha i an i porhlaw, cunglei van i a ummi hna kha Zeiah an rel hna lo, an serhsat lehlam hna. V. 18-19 An holh tikah an bia a puam, an i porhlaw i lawkihmi chungin a chuakka tete pawl foihnak ah pumsa duhnak kha an hman. Luatnak nan hmuh lai tiah bia an kam hna, sihmanhsehlaw anmah hmanh kha, rawhralnak a phakpitu hna an ziaza sal kha an si minung hi a teitu poh sal a si ko.
Biahmaitthi
Tuzing caan ah hin Paul nih, "zetindah kan nuncan a si ti kha a ttha tein i zoh u" tiah a kan ti bantukin aho nihdah a kan uk i aho sal dah kan si ti kha zoh ka duh. Nunzia uktu hi mah thimnak in a ra chuakmi a si. Zeidah kan i thim? Ti kha ruah ah a tthami a si. Thim kan thiam lo ruangah harnak kan in tawn caah thim kha i palh loding in a duh.
Dalkhatnak: Kan lung fim a hau
Paul nih Efe. 5:16 ah "atu kan ni khua hi canchia a si" a ti bang artificial le genuine hi tthen a har cang. Nu le pa zong hngalh a har cang. Thim thiam lo ruangah harnak le fahnak a si i micheu cu an thih tiangin an intuar ti kha kan hmuh. Ruahnak ah: nungak thim kha na palh i na duh, na duh i na tthit tikah na nun chung vialte harnak na tong. Kawl nih "ttawngza khuk hma' tahnit, Mingmah Yu hma' Ta tetlong hmoh" tiah an ti. Thim kha kan rak palh hmasa caah kan tuahmi zong kha a pakpalawng lawngte an si dih. Cuccah lungfim tein um kan herh cang. Lungfim ti tikah hin kawl nih "tadih ngapa shihttha yahme" an ti tawn bantukin a zeipaoh ah ralrin tein kan um a herh cang. Ralrin kan herh tuk ningcu: Ruahtuaknak, chimrelnak, cawnhlaannak, cohlaannak, pekchanhnak, cawkphiarnak, hawikomhnak, nihkhehnak, tlunkalnak, ihzaunak, eidinnak, tuahttuannak le duhdawtnak, hna ah hin ralrin tein kan um a hau cang.
Nifatin kan nunnak ah hmuhtonnak a phunphun a tongmi kan si caah hmuhtonmi nihhin lung thin ruahnak le chimrel tuahnak hna kha phun dang piin a kalpi tawn caah hmuhtonmi cungah khan kan lungthin put le kan cohlaan ning kha lungfim tein kan cek a hau.
Cawnpiaknak Chung i kan va um tikah, lung thin ruahnak Rawl kan va hrawn khi a si caah lungthin a pial sualnak hnga lo le lungthin a rawhnak hnga lo kan i ralrin a hau. Lungthin a pial ahcun palh a si cang caah a poi ngaingai tawn. Cubantuk tthiamtthiam in lungthin a dik le a feh ahcun thilttha ngaingai a si ve tawn. Hi kong ah hin cawnpiaknak nih hin lai a rel bik tawn caah "cawnhlannak" kan ngeih tik paoh ah hin, kan lung an kan suk ning le an kan bengh ning khi a ttha tein tuaktan a herh. Mirang nih indoctrination tiah an ti i cucu lung cumh cu a si. Kan cawnpiak ning tein nung hna seh ti khi a si caah cawnpiaknak hmaanlo pawl kha hngalhthiam a hau. Cawnnak tahnak cu: Ka caah a ttha maw? Ka chungkhar caah a ttha maw? Ka rualchan ka sahlawh hna caah a ttha maw? Zatlang nunnak ah a ttha maw? tiah tuak le zoh a si. Dawtmi mino kafa le hna "thildik, thilttha hngalh khawhnak le tuah khawhnak ding caah lungfim tein nun i zuam u."
Dalhnihnak: A ho sal dah Ka si?
Fa le nau hna cathiang nih "minung hi a teitu poh sal a si ko" tiah a kan ti ko i kan nunnak ah hin zei nih dah a kan tei ti kha cek a hau. Pumsa, lungthin, ruahnak, le Thlarau lei in kan zoh tikah ahodah ka Bawi a si i a ho sal dah ka si ti kha kan zoh zungzal a hau. Kuak kan duh tuk ahcun kuak kha kan Bawi a si i Kannih cu kuak sal kan si. Zu kan duh tuk ahcun zu kha kan Bawi a si i Kannih cu zu sal kan si. Khaini kan duh tuk ahcun khaini sal kan si tthan. Paisa kan duh tuk ahcun phaisa sal kan si hoi. Pathian kan duh tuk ahcun Pathian sal kan si ve. Zei nih dah kan nunnak kha a uk?. Porhlawt ruamkainak hna le mah duhnak lawng zulh le tuah nih a kan uk sual maw?. Mi huatnak le nahchuah ziarngeih paanthlaknak hna, soiselnak, thangchiatnak le rawiphiarnak hna nih an uk sual dah ra?. Duhfahnak hakkauhnak le mah zawn lawng i ruahnak hna nih dah an uk ko hi?. A ttha tein i zoh tuah u sih law kan Bawi a tthat lo ahcun hlaw u sih. Bawittha sal kha ttuan u sih. Atu ah hin a ho sal dah na si?
Biadonghnak
Matt. 6:24 chungah "Bawi pahnih hna sal cu a ttuan kho lai lo" tiah a kan ti bantukin Bawi hi i thim kan thiam a hau. Pathian tu kha i thim u sih. Pathian tu nih in uk sehlaw Pathian sal tu kha si i zuam ko. Hi bia a theimi fanau hna nan dihlak tein Pathian nih thluachuah in pe ko hna seh.
No comments:
Post a Comment