(December 11, 2011) PCCF Weekly Online Service

“NACHUNG IN UKTU BAWI A CHUAK LAI”

By

Rev. Za Biak Ling

Mathai 2:4: “Judea ram ummi Bethlehem khua, Nangmah cu Judah ram khuapi hna lakah a hmebik na si naisai lo; Zeicahtiah nangmah chung hin hruaitu pakhat, ka mi Israel mi hna tuukhal a si dingmi cu a chuak lai,” a ti.

Na chungin uktu Bawi a chuaklai timi hi (Micah 5:2) chugin lak thanmi a si. “Nangmah Bethlehem Efrath” ti asi. Bethlehem sullam cu “house of bread” tinak a si. Efrath cu ramkulh thennak min a si i, Thantlang peng khin sisehlaw Mara tlang, khuahrintlang, Lautu, Zophei timi he khin a lo hnga. Bethlehem cu David siangpahrang khua or Efrath tiah auh asi.

Kan kawlram dirhmun in ruah tik-ah harsatnak; ngeihchiah chawva ngei lo tuk le sifah tuk lio can ah Bethlehem “house of bread” in khamhtu a chuak lai tiah an aupi tikah, harsatnak hmun, ei le din umlonak hmun in khamhtu a chuak kho lai lo maw? Ngeihchiah chawva a ngeimi hna lawng nih maw uktu an si lai? Ruah bu in biatlang thim ka duh mi asi.

Zudah ram Bethlehem Khua

Bethlehem “House of bread” cu Chin nunphung in chim ahcun ei le din cat lo tein chiahnak khokheng ti a si hnga (holh thukdeu um men lai). Ei le din umnak hnum ti khawh a si hnga. Bethlehem cu Zerusalem chak lei meng 5 tluk hrawng ahlat nak, minung 35,000 tluk umnak hmun a si. Bethlehem khua luh lai te ah Rachel thlan umnak asi i Booz le Ruth umnak hmun kha asi. Prophet Micah chan lio-ah Zudah pawl Babylon sal ah antan lio chan a si. Midang sal an tang cuahmah lio, nautat bik dirhmun an si lio caan a si I, hnabei dongh lio bik caan a si. Cu lio ah Micah nih “ Bethehem Zudah ram ah hme bik hmanh law na chung in khamh tu Bawi a chuak lai (Micah 5:2)” timi nih hin Zudah mi caah thazang taktak a si. Ruahawk pakhat um mi cu;

Bethlehem cu “House of Bread” ti asi nain achung ummi pawl cu an sifak.

Biaceihtu pawl chan ah Bethlehem ah hin thalotein pam a tlung. Cu ruangah Elimelek chungkhat zong kha Moab ram an pempah nak kha a si. Elimelek chungkhat kong cu kan chim ti lai lo. Pakhat te vun char ta kaduh mi belte cu, Noami nih “Akhanu kati uh” a ti chan mi cu, Ei le din umnak hmun Moab ram ah a um nain, mah le chuahnak ram tak asi lo caah “Akhanu” titiang in min aa sak. Ei le din, Chawhlawn um paoh ah a thlum hleice lo i, a um lo ah a kha hleice lo ti kha a fianter ngai. Ni hin Chin mi nih kan ruah can acu ngai cang in ka thei. Moab ram ah Ei le din umko nain an ca-ah akha tuk ko dah kaw…. Ruth cu a ram ah akir tik lawngah Boaz (aminung) hen an ni um i fapa an ngeih kha asi. Mah ram ah kir hi vatha ton nak le fapa tha ngeihnak a siko rua hih. Fapa min ah OBED tiah min an sak sullam cu “ fa pa pasarih nak in santlai deuh mi, nunnak sersiam than tu, na himnak a si lai” tinak a si.

Bethlehem ah Zisuh a chuak

Krisman hmasa bik atuah tu hna cu Tuukhal pawl le ni chuah lei mifim pawl ansi ti khawh a si hnga. Na in kum 200 chung Bethehem cu zumlotu pawl kut ah a tang. Khamhtu timi sullam lak har ngai ko men lai dah! Krihfa timi a um hnu saupi tiang Chrismas hman khawh a si hoi lo. AD 336 lawngah hman hram rak thok asi i, AD 339 May 1 ah Zisuh chuahnak Bethlehem ah Biakinn sak asi ti a si. Cu ni thawk in nihin tiang Krismas hman a si.

Nihin Chrismas kan hman mi cu Bethlehem (house of bread) si ti loin, “Zisuh nih nunnak changreu cu keimah hi ka si… Johan 6:35” kan sin ah a chuak mi Zisuh Khrih cu kan nunnak changreu a si. Jesuh Khrih cu van sunlawinak kal tak in toidornak he vawlei ah ara, vawleicung mi vialte khamhnak caah nawl ngaihnak kha thihtiang a zulh, thihnak a tei i, a thawhthan nak cu nihin kan Christmas muru tak cu a si ko. A ni le a caan ah a si lo. Kan nunnak ah toidornak um sehlaw, mi caah thiltha tuahduhnak ngei in, nawl ngainak in nifa kan kal ahcun nifatin hi kan Christmas cu a si i, chung in khamhtu chuahnak cu a si.

“Judea ram ummi Bethlehem khua, Nangmah cu Judah ram khuapi hna lakah a hme bik na si naisai lo; Zeicahtiah nangmah chung hin hruaitu pakhat, ka mi Israel mi hna tuukhal a si dingmi cu a chuak lai”

A MEN

(December 4, 2011) PCCF Weekly Online Sermon

Minung lungput phunthum/Krismas Lungput Phunthum

by

Dr. Roland Ceu

Hi ban tuk in 2011 December thla kan bawipa zisuhkri chuah thla ah Pathian thawng ttha chim ding in caan ttha caan sunglawi ka hmuh caah kan biak mi kan Pathian a min thiang hlorh in um ko seh. Amen! Hibantuk in caan a ka petu nawl ngeitu PCCF Upate an cungah lunglomhnak tampi ka ngei I Pathian nih an rianttuannak ah thluachuah in lamhruai ko hna seh tiah thlazaa ka campi ve hna.

Bia hmaitthi.

Kan hmuh bal lo mi 2011 December thla hi mi tampi nih phak le chungkhar tlingte in hmantti duh ciomi a si ko nain, hawidawt cheukhat hna cu an nunnak nih a phak khawh lo ruangah thlanmual a liam mi tampi an um. Kan ram a sifah tuk ruang ah na le va, u le nau le ta le far tiin chungtling tein hmunkhat te ah kan Bawipa Jesuh Khrih chuah thla cu nuam tein hman kan duh cio ko nain kadang hmundang ah nu le pa le cingla rualchan he chungkhar tling in hmunkhat te ah mi tampi cu um tti khawh a si lo…Aw!!!! Vawleicung ngai hi mu…, Sweet December thla hi mi cheukhat ca ahcun ngeihchiatnak le lungkuainak ca ah a hmangmi zong mi tampi kan/an um.

Micheu caah cun nuamhnak le duh kip cuainak ca ah a hmang mi zong an um ve. SM or Robinson/ Mall kip ah hin December thla ah cun ni dang ni le thla nak hin an sunsak deuh kan ti lai ma, an ttamh khawh ning le ai dawh khawh ning, mi nung hi an ni chawh khawh ning le Trafic khawh ning hi, motor hi lam ah hin an khat dih kal nak zong hi a ttha lo cun, lam te hna an ttamh khawh ning zan hrim2 ah cun ai dawh tuk ning hi chim khawh ding khi a si lo ti tluk khin an sun sak, cun nu ngak tlangval hna hi December thla ah cun nga fuan khin an fuan rua ti tluk khin an ban te khin an ni tlai hna ii lam an lengtti hna , PCU-UTS um mi belt e cu Lupyewci Apyewci cu kan si hna ii, ai ttuai kho ngai ngai cu kan um rua hna lo, X’mas thla hi cu a thlihran te zong hi ai dang khun tak tak ko… Pathian bia sermon lei ah kan vun kal pah hna lai. Nang le kei nih tah zei ban tuk lungput/lungthin in dah kan bawi pa zisuh krih cu kan don ve kun lai?

Mathai 2:1-12

Minung lungput phunthum/Krismas Lungput Phunthum

(A) Pathian hmuhduh taktaknak lungput

Nichuahlei mifim hna hi kanmah cio bantuk in busy ve mi/ Inn le Lo, chungkhar rualchan, chawva le rumnak, minthannak a ngeimi an rak si ko nain Mikhamhtu or Khamhnak or biatak hmuh duh ah cun vialte cu kaltak in thla tampi mifir le damiah lakah Judah ram ah an kal i Jesuh cu an kawl. A karlak ah lam zong tlau pah hmanh hna seh law lung dong lo in an kawl bantuk in a donghnak ahcun Jesuh cu an hmuh. An ni tinhnak an phak hlan lo ding te in an zulh peng .Jesuh cu nunnak a si caah Jesuh hmuh cu nunnak hmuh a si i, Jesuh hmutu hna lawmhnak cu holh in an chim kho lo. Vawlei an nun chung i rum le fim, minthan le minthat, hlei i mikhamhtu Pathian zong a hmutu hna hi cu mi vantha taktak an si, chuah chan an ngei, an chuah chan a tlamtling hringhran. Hi nih an kan cawn piak mi cu vision/ destination ma kan ngeih mi kha a phichuak ding tiang kan ni tinh mi a tlin hlan lo tiang in ngol lo in kal ding ttuan ding kha an kan fial. Paul nih a chim mi cu kei cu ka tlik tik ah tinh mi ka ngei, ka thongh tik ah a ping a pang a thong mi ka si lo a ti. Sianginn kan kai hna, kan kai mi kan caawn mi hi kan dih hrim2 a hau. A dongh tiang a phi a chuah a hau. A kar lak ah harnak tam pi a um ko lai.

(B) A theih ko na in zei ah a rel lo mi/A thei ko nain a hmu duh lomi

Herod nih Judah siangpahrang cu khoikaahdah a chuah lai tiah a hal tik hna ah "Judah ram Bethlehem khua ah" tiah fawite le fiang tein a theitu le a chim khotu cu phungbia thiammi tlangbawi hna an si. Jesuh chuahnak an thei ko nain "I don't Care" ti phun in zeiah a rel lomi an si. Kawl le hmuh an i timh lo bantuk in an taksa mit in Jesuh an hmuh ko zongah (Jesuh rian a tuan hnuah) Jesuh rat chan khamhnak an hmu kho thai ti lo, zeitluk i fim le thiam, theih le hngalh ko zongah khamhnak hmuh lo khawh a si. Krifa chungkhar in chuah zong ah van ram kai lo khawh a si. Jesuhkri vaw lei i a rat chan nangmah le kei mah caah a si ti a thei ko na in zei ah a rel ve lo mi ca ah cun khamhnak hi co lo khawh a si.Na nu na pa krifa a si ruang ah krifa ka si ve ti in khamhnak co lo khawh a si. Nu le pa zumhnak kha I rinh khawh a si lo, Mah te cio in Jesuh kri kha ton a hau. James 2: 14ff zong nih a ti mi cu Zumhnak cu rian ah langseh a ti. Tuahnak a um lo mi zumhnak cu zumhnak thi a si a ti rih. Degree sang2 le Reverence hna si ko zong ah khamhnak hi co lo khawh a si.

(C) Ziar ngeihnak lungput/Nahchuahnak lungput

Tlangbawi hna nih an chimh hnuah Herod nih Jesuh chuahnak hmun a thei ko nain kawl le hmuh i tim loin keimah nak in a thawng deuh sual lai, a lar deuh sual lai tiah thah in a bawh. KEIMAH (mine) timi lungput ngeih i kanmah nak sang deuhmi le a kan chawhkanh kho dingmi kehlengphelh le zuamcawh duhnak lungthin a ngeimi hi kan si ah cun. Mi tthatnak hmuh khawh lo in, kan mah tthatnak le thil ti khawhnak lawng hi I hmuh a hmang mi kan si ah cun. Midang nih scholarship an ngah ah cun I lawmh lo in hnahchuah in an kong han ceih a hmang mi kan si ah cun hawi nu le nih thil ttha deuh model deuh ngeih ah cun hnahchuah…Mah kha a ngan bik ah i chiah ah cun nau te zisuh cu ton khawh a si lo. Zei bantuk lungthin in dah Nau te zisuh cu kan don kun lai?

Biadonghnak

Tukum 2011 Krismas, Jesuh chuah kan donnak ah zeibantuk lungput hi dah a tha mi le kan ngeih ding a si kan mah te in i thim cio hna usih. Mah pathum chung ah khan nangmah le keimah zong nih thimnak nawl kan ngei ve…zeibantuk lungput hi dah a ttha mi a si i zeibantuk lungput hi dah a chia mi cu a si. zeibantuk lungput kan ngeih ah dah mikhamhtu zisuhkri cu kan ton kun lai.