Kumthar Ngandamnak

Tuzing bawipa thawhtthan zingah Thawngttha bia i hrawm khawhnak an kan pe tu kan Biak Pathian a minthiang kan thangtthat.Kuthar thluachuah nak le Lawmhnak cu PCCF menber dihlak cungah um ko seh. PCCF dawtnak le zawnruahnak he Thawngtthabia a kan chim tu Saya Moses Van Nun Ceu cung zong ah kan i lawm ti kha langhter kan duh. Thawngttha bia kan i hrawmnak a si colh ko lai.

Saya Mose Van Nun Ceu

Kumthar Ngandamnak

Bible caangthim: 1Cor. 3: 16, 17

“Pathian biakinn nan si kha nan hngalh i Pathian Thlarua nan chung i a um zong kha nan hngalh. Cucaah ahohmanh nih Pathian biakinn cu a hrawh ahcun, amah cu Pathian nih a hrawh ve lai. Zeicahtiah Pathian biakinn cu a thiangmi a si i “nanmah hrimhrim” cu biakinn cu nan si.”

Tuzing hi kumthar 2013 January thla thok zarh hmasa biknak a si ca’h ka van aṭha kho taktak thawngṭha chim phunphai in ka kum a vui cang lai tiah ka ruah ko. Hmasabik ah cat lo a dawtnak he lam a kan hruaitu kan Pathian amin ka thangṭhat. Cun caanthiahtu hna cungah tampi in kaa lawm fawn. Kan forum careltu hna nan zapi Pathian nih kumthar thluachuah in pe hram ko hna seh! tiah vun langhter ka duh hmasa.

Tuzing ka tlangtaar hi saya Dawt Mang (Pa Dawt) bia in cun “A rianṭuannak a kau ngaingai” mi a si. Keimah ca lila zongah a kau ngai i a fawi lomi kenrep phun tete an si. Phungchim ngaingai lei deuh si lo in hruaitu hna kan kenrep tete i ruah ṭi ko hna u sih tiah ka achakhri ka vun mer ta duakmi a si. A tlamtlingmi minung a ho hmanh kan um kho taktak lo, sihmanhseh tlamtling khawhnak lei ah a kal khomi minung kan si ve. “Bawipa kan lei a ṭan ahcun zei thil paoh hi kan tei khawh ko hna” timi zumhnak le zuamnak thinlung he kumthar chungah kar hlaang ko hna u sih! tiah  nan sinah mah hngalk tawk ka rak langhter duhmi a si. Kanmah le Khaap cio ṭhathnemnak a phorhtu si hram ko seh!

Kan Bible caangthim ah khan, biapi ngai in a hmanmi hna cafang phun hnih in kan hmuh khawh. 1. Pathian Biakinn timi le, 2. A thiangmi taksa-pum le tuahsernak (nanmah hrimhrim) timi ah khan an si. Kan kawp tikah, kan pum cu a ningpi in Pathian biakinn thiang a si ti kha an langhter. Kan siningpi Pathain Biakinn thiang ah ser/si khawhnak dingah cun a ngandammi kan si a hau hmasat. Cuhe pehtlai in, ngandamnak timi ahhin phun 2 in ka ṭhen;

1.       Pum (taksa, thinlung le thlarau) damnak

2.      Tuanbia (tuahsernak, sining le umtu ṭhutdir) ngandamnak.

Pakhatnak: Kan taksa-pum ngandamnak dingah cun, abikin pastor/hruaitu hna kan ca’h hin Pum thianhlimhnak nun kha kan ngeih hrim a hau ko. Mah le mah biahalnak phun in tuzing ah i hal cio phot thuah hna u sih ti ka duh.

Tahchuannak ah;

1. Mihmai biachiam tikah kam cil-raang a chuak sual maw?

2. Kan thaw chuahmi hna hi hmaitonh biachim tikah mi a namh tuk sual hna maw?

3. Kan kut-ke tin hna an sau tuk sual pang maw?

4. Kan samhriahmi nih kan luval hna a chuahter tuk sual maw?

5. Bia kan chim tikah kan cil a pet tuk sual pang maw?

6. Kan zakkeh hna a nam sual hnga maw?

7. Kan rawlei daan hna hi mi hmaiah kaa kau tukin kan khai sual tawn maw?

8. Rawlei tikah biachim kan duhtuk sual pang maw?

9. Angki, bawngbi kan i hruk tawnmi hna a rim a uih phun in a chuak sual tawn maw?

10. Angki, bawingbi dawh le rem ngai ko nain kan kedenh hna a hnawm tuk sual tawn maw?

11. Zapi he zan ih tikah thang tukin kan hnar sual pang maw?

12. Mizapi sinah voih voih hna kan hmang sual maw?

Cubantuk siarem deuh lomi kan Pum sining pawl hna hi rualrem deuh in kan iremh khawh ko hna ahcun mah ca’h siseh midang ca’h siseh a nagndammi kan si ko hnga!

Pahnihnak: Kan Tuanbia a ngandamnak dingah cun, kanmah le mah hi kan i hngalh khawh a hau. Siloah hngalhtertu(hawikawm ttha, nupi/pasal le, neihniam deuhmi hna tbk.) kan ngeih khawh ahcun attha ngai hnga.

Tahchunnak ah;

1. Kan phungchimmi le thlacammi hna hi zapi ca’h sullam ngei lo in an sau tuk sual tawn maw?

2. Kan aw chuahmi hna hi mizapi ca’h a dingtuk sual maw/an thei kho hnga maw?

3. Kan biachimmi le kan thawngṭha chimmi hna hi tah, kam khatlei lawng a kal tuk sual maw? Siloah mi tuknak hna ah kan achakhri kan mer sual pang maw?

4. Thawngṭha kan chimmi hna hi tah, kanmah pumpak in kan tuah pah tawn el maw?

5. Thlacam nun hna hi kan ngei pah el maw?

6. Bibleca hna hi tah kan rel pah tawn taktak maw?

7. Kan hruaimi hna nakin kan thinlung hi a fual kho deuh vak tawn maw?

8. Midang thil kan ngeihmi kan hrawmh khawh hna tikah kan i nuam ko ve maw?

9. I sumkhawh deuhnak nun hi tah kan chungah a um pah el maw?

10. Ka ngaithiam (sorry) ti chim le kaa lawm (thanks) ti chim hna hi kan i harh tuk sual tawn maw?

11. Mikut tlaih tikah zohlo phun hna in ankut kan tlai sual pang maw?

12. Mi ṭhatlonak kong ceih phunphai kan duhtuk sual pang maw?

Cubantuk pawl kan siningpi ah theih ko buin le theih lo karah a rak phan tawnmi hna hi kan i remh khawh deuh ahcun kan tuanbia/tuahsernak a ngandam suamau ko hnga!

Pum le Tuanbia ngandamnak kan ngeih khawh tikah cun mah ca lawnghlah midang ca zongah kan rianṭuannak a kau ngaingai ko lai i kan Pathian zong aa lawm ngaingai ko lai. Kan pum nih a herhmi paoh le a duhmi paoh thloh/khap(cuaithlai hmasa) lo in tuahpiak le zulhpiak hi Pum le Tuanbia ngandam lonak lei ah a hruai tawn.

Cuca’h tuzing kan Bibleca caangthimmi nih fiang ngai le piang ngai in a chimmi; kan Pum lawng si loin kan Tuanbia ngandamnak leiah kan hruai khawh ahcun (if…) thluachuakmi kan si ko lai. Asinain cubantukin kan hruai khawh lo ahcun (if not…) hrawh kan si dingmi kha a langhter. Kan pum a ngandam tikah, kan muitlor deuh i kan mah le mah ah i lunghmuihnak zong a tthangcho. Kan biachim kan holhrel a tluang i midang ca’h ngaih nuam a si tawn. Kan taksa pum pi a derthawm tikah cun, “Pathian” tiah kan auh mi aw-aan kha a hmual a ding ṭheu tawn.

Cuca’h kan mah le Khaap ciote in kumthar ngandamnak leiah kar a hlangmi kan si khawhnak hnga, tuzing kan i hrawmmi Thawngṭha nih kaupi in rianṭuan hram ko seh!