Kawltung lei ah tli hna usih!

PCCF hawi dawt hna, tuzing ah Pathian bia chimphuannak caan tha, caan sunglawi a kan petu kan biakmi Cung Nung Bik Pathian cu thangthat in um ko seh, cun PCCF hruaitu hna nan dihlak cung zong ah lawmhnak tampi ka ngei ti kha a hmasabik ah ka lunglomhnak van langhter ka duh. Tuzing I nan sinah I ruahti hna usih ti ka duh mi Bible cu: Filipi 3:12-14 tiang asi lai. Hi thil ah hin ka tlam a tlingcang ti a si lo I ka tlingcang ti zong a si fawn lo. Sihmanhsehlaw a ka ngeitu cu Krih kha a si cang caah cu thil cu ka ta a si khawhnak hnga kaa zuam lengmang.Ka u le ka nau hna, cu thil cu ka phancang tiah ka ruat hrimhrim lo; sihmanhsehlaw thil pakhat ka tuah mi cu, hnulei thil kha philh I hmailei thil banh I zuam kha a si.Cucaah kawltung leiah cun laksawng hmuh awkah khan ka tli I cu laksawng cu Pathian nih Krih Jesuh thawngin cunglei nunnak I a ka kawh hi asi.(Filipi 3:12-14).

                Elijah nih Elisha kha cawtum tuah hleihnih he lei a rak thuan kha a hmuh, amah cu a tuah hleihnihnak sinah cun a rak um. Elijah cu a pawng in a lan I a puan khan a hei cheh. Cun a cawtum kha a kaltak hna I Elijah cu a dawi.Cun, Bawipa nih Elijah cu phuchim in van ah a cawi hnik tikah khan Elijah le Elisha cu Gilgal in an I thawh cang. Cun Elijah nih Elisha cu a thawh i, “Hika ah hin rak um tuah tiah kan nawl; zeitintiah,“Bawipa nih Bethel tiang kal a ka fial ,” tiah a ti. Sihmanhsehlaw, Elisha nih Bawipa a nun bangin le nangmah hrimhrim na nun bangin, kan umtak lai lo,” tiah a ti.Cun profet fapa hna, Bethel I a um mi kha Elisha sinahcun an rak chuak I, “Bawipa nih nihin ah hin na bawipa cu na sinin a lak lai kha na hngal maw?” tiah an ti. Cun anih nih, “ ka hngalh; daite in um ko u,” tiah a ti hna. Bethel an phanh tikah Elijah nih cun a thawh than i, “Elisha, hika ah hin rak um tuah, tiah kan nawl; Bawipa nih Jeriko tiang kal a fial,” tiah a ti. Sihmanhsehlaw Elisha nih Bawipa a nun bangin le nangmah hrimhrim na nun bangin, kan umtak lai lo,” tiah a ti.Cun jerikoh an phan. Jerikoh cu an vun phan I Elijah nih cu Elisha kha hika ah hin rak um tuah tiah kan nawl; zeitintiah Bawipa nih Jordan tiang kal a ka fial tiah a ti. Sihmanhsehlaw Elisha nih Bawipa a nun bangin le nangmah hrimhrim na nun bangin, kan umtak lai lo,” tiah a ti.Cun Elijah le Elisha nih khan Profet fapa sawmnga hna kha an sawm hna I Jordan lei cu an kal. An tan dih in nangmah sin in lak ka si hlanah hin zeidah kan tuahpiak lai ka haltuah tiah a ti. Cun Elisha nih na thlarau hi a let hnih in ka co ter tuah tiah kan nawl a ti. Cun anih nih, “ thil har ngai na ka hal, a sinain, nangmah sin in lak ka si lio kha na ka hmuh ahcun, mah cu cu na ta a si ko lai sihmanhsehlaw na ka hmuh lo ahcun, cu bang cun a si lai lo tiah a ti. Cu bantuk tein Elisha nih a dongh tiang a zulh I amah sinin a Bawipa lak a si lio kha a hmuh caah laksawng cu a co taktak. 

U le nau hna “goal” (kan I ruahchanmi) ah kan kal lio ah hin harnak tampi, lungretheihnak le lungdonghnak kan tong ko lai cu hna cu philh in kan kawl (goal) a simi ah laksawng hmuh awk ah cun lung donglo te le teirial tein tli cio ko hna usih. PCCF unau hna kan sianginn kainak ah harnak tampi kan tong ko lai I a caan ah cun kan lung zong a dong ko lai sihmanhsehlaw kan hnu lei thil a simi harnak, lungretheihnak vialte kha philh I kan hmuh hnga ding laksawng nganpi conak ding caah Elisha nih a hnu lei thil a simi vialte kha a philh I laksawng hmuh dingah a Bawipa kha a dongh tiang a zulh bantukin kan Goal a simi ah cun lungsau le teimaknak he tli cio hna uhsih tiah kan sawm hna. A tu I kan harnak hi cu hmailei I kan hmuh hnga ding laksawng he cun tahchunh awk a tlak lo ti hi philh hlah uhsih. Kan hmuh hnga ding laksawng hi a sunglawi tuk hringhran lai dakaw. A reltu nan dihlak caah Bawipa nih thluachauhnak kan pek piak hram ko seh….Lawmhnak tampi he,,,

Van Thang

Cavite

Philippines

NUN ZIA KA THIAM CANG

Filipi 4:12 Cucaah khuazeika hmanh ah, zeitik caan paoh ah, ka paw a khim ah siseh ka rawl a ṭam ah siseh, tam tuk ka ngeih ah siseh, tlawm tuk ka ngeih ah siseh, lungsi hnangam tein um kha ka thiam cang.

Nun zia thiam kong  fiang lang ngai in Paul nih  Filipi cakuat chung ah a rak chim. Paul background kan zoh si ahcun; Greco – Roman chan lio ah miza ngai pakhat  a si i  -   Biaknak lei in Diaspora Jew lawng si loin Benjamin hrin, Pharisee a si,  Fim cawnnak  lei ah Greek holh hmang catang sang tak tak a ngei mi a si i, Uknak  lei in zoh tik zong ah Roman citizen aa tlaih mi a si fawn.

 Minung mit in zoh ah cun mitling tak tak a si. A mah nak mitling deuh an um kho ti hnga maw ti awk in a um. Asinain kha tluk a tling mi pa nih khan nun zia a rak thiam lo i, Pathian ka tanh ngai a ti lio ah, Pathian mi pawl a hrem tu le a that tu a rak si leh lam.

Bawi Khrih a sin ah dawtnak in aa langh nak tu nih khan nun zia thiam nak kha a rak pek ti kha kan ca thiang nih a kan cawn piak.

Zei ban tuk minung kan si hmanh ah Dawtnak kan ngeih lo ah cun Pakpalawng kan si zia kha Mithiang Paul nih a kan cawnpiak (1Cor 13: 1-3).

Philippines ram phan Lai mi zong har leng mang in mi khua le mi ram ah Fim nak kan rak cawng. Nikhatkhat cu kan hlawh tling te lai i Degrees le Fimnak he kan tlung cio te hna lai. Hi nih hin lung hnga ngam nak le nun zia thiam nak a kan pe ve te hrim lai lo.

Nikhatkhat cu mirum tak tak zong kan si te men lai. Mah zong nih daih nak le nunzia thiam nak a kan pe fawn lai lo.

Nikhatkhat cu minthang ropui tak tak ah kan i chuak te men lai. Mah zong nih cun lunglawmhnak le nuzia thiam nak a kan pe kho te fawn lai lo.

Nun ziathiam nak tak tak le Lunglawmhnak tak tak a kan pe kho tu cu Bawi Khrih nih a kan pek mi DAWTNAK kan cohlan in kan nun pinak thawng lawnglawng in a si. Cucu Dawtnak cu midang nih a kan cheuh  tik ah a tlum i, kan mah nih midang kan cheuh ve tik zong ah a tlum thiamthiam, leng ah kan caah lungthin le phunsa damnak a si.

Cathiang nih minung vial te cu thlacituhtu he a kan tahchunh i, a si zong kan si taktak fawn (Mk 4:3-9).

Bawi Khrih ah ka dawt mi ka U le ka Nua  hna, kan thlaici pawl hi lung ro cung ah le burbuk lak ah tuk sual hna hlah u sih.

DAWTNAK  vawilei tha cung ah,  Fimnak, Rumnak, Minthanak etc., thlaici pawl  hi kan tuh lawnglawng ah,  kan caah a tlamtling mi thei par kan zun khawh lai.

Dawtnak cu thlachiat a ruat i mi cungah zaangfahnak a ngei, a nak a chuak lo, a lung a puam lo, aa porhlaw lo, thlabulbal in khua a sa lo , a mah zawn lawng aa ruat lo, a thin a tawi lo, palhnak kha aa cinken peng lo, midang sualnak cungah khan diriam in a um lo, biatak tu ah khan aa lawm, a lung a dong bal lo, zumh nak a ngei, ruahchannak a ngei, a lung a sua i a thin a fual (1Cor 13: 4-7).

Ka biadonghnak ah, Bawi Khrih Dawtnak cohlan in kan i nun pi nak thawng lawnglawng in, kan nih zumtu dihlak, Nunzia a thiam mi le aa lawm mi,  kan si kho. Bawi Khrih ah ka U le ka Nua hna, Khua zei ka hmanh ah zei tik caan poah ah lungsi hnga ngam tein a um thiam mi si i zuam cio hram hna u sih! Kaa Lawm. 

Weekly Online Sermon

BAWIPA HMAI AH KAN DIR TE LAI

 “Kannih cu Pathian kutchuak kan si i Pathian nih thilttha tuah ding ah a rak kan tinh bantuk in, Khrih he kan i pehtleihnak thawng in thil ttha cu kan tuahkhawhnak hnga a kan ser tthan mi kan si”( Efesa, 2:10).

Biahmaithi: A sunglawimi caan tha ka hmuh  caah a hmasabikah lamhruaitu Pathian min ka thangthat i tuanvo ngeitu upa nan cungah kaa lawm tuk. Pumpak cio nan cungah Pathian nih thluachuahnak in pe ko hna seh. Ni thaizingah ruat ti cio hna usih ti ka duhmi cu, “Bawipa hmaiah kan dir te lai” ti hi a si.

Kan Bawipa Jesuh Khrih nih a kan fialmi cu thiltha tuah a si. Zeiruang ah dah thiltha tuah a kan fial tiah cun kan nunning kha zoh in biaceih nak a um lai caah a si. Zei ruangahdah biaceih kan si lai tiahcun zungzal  nunnak vanram ah maw na kal lai? Hell ram ah dah na kal lai? ti kha biakhiahnak a herh caah a si.

Pathian caah Vawilei ah zeidah na  ttuan

Galati 6:8 A pumsa duhnak lo ah a tuh ahcun, thihnak kha a zun lai; Thlarau lo ah a tuh ahcun, Thlarau nih zungzal nunnak kha a pek lai.

            Vawlei cung kan nunchung I kan tuanmi rian kha zoh in kan Bawipa Jesuh Khrih nih bia a kan ceih te lai tihi kan theih cio mi va si ko kaw nifatin kan tuah kan tuan mi rian hi kan ruah a herh tuk hringhran. Kan mah pumpak caah maw kan nun asiloah Pathian caah dag kan nun tihi kan I fian a hau, minung cu thi le sa he anung mi kan si caah mah pumpak caah a nuung mi kan si ahcun chikhat te cu kan I nuam tuk cio ko hna lai sihmanhsehlaw mah kan I nuamhnak nih aphi a chuah ter mi cu ngeihchiatnak, lungretheihnak, nganfah tuarnak, thihnak tiang hmanh kha a va si ko, a ruang cu Pathian tihzahnak lungput ngei loin mah pumpak nuamhnak menmen ah kan nun kan hman caah asi ko. Pathian/Thlarau caah kan nun a si ah cun harsat nak  kan ton can aum lai, ngeihchiatnak kan ton can aum lai, lunglomhnak kan ton can aum lai aruang cu kan Bawipa Jesuh Khrih hnu zultu hna kalnak lam cu Pangpar phahmi lam bantuk a si lo, hling le so he a khat i retheih tuarin zulhmi lam a si. Sihmanhsehlaw cunbantuk hling le so he a khat mi lam hmanh ahcun kan Bawipa Jesuh Khrih he kan kalti ah cun zeitik can poh ah Abia nih thazaang a kan pek I hngangamnak le lomhnak in kan khat peng ko lai.

Khah kan can ngeihmi hi aroh hlanah a dih cang lai. Vawlei in kan nunnak a dihtik ah Pathian hmaika ah kan dir lai i Vawlei i kan um lio i kan tuanbia kha Bawipa hmai ah kan rel cio te lai,Cu caah a ho kan sipoh ah Bawipa hmaiah ka dir tikah ka konglam zeitin dah ka chim te lai ti kha nihin ni ah kan i ruahcia a herh, Bawipa hmai ahcun UN phit bantuk in lihchim a ngah lai lo, vawlei i mi kan hlen bantuk in Bawipa cu hlenkhawh a si lai lo. Tha tein ruat hmanh u, ni khatkhat cu kan caan cu a dih ve ko lai, ni hin i kan tuah ttuan mi le kan duhtuk mi hna khi kaltak an si dih te lai, Hawikom ttha hna an um ti lai lo, kan lenglei dawhnak a phunphun i kan i ttamhnak vialte hna cu an lo dih lai, khi ni ahcun Pathian nih caan kan pek mi zeitin dah na hman, damnak kan pek i na thazaang vial te zeituahnak ahdah na hman, keimah caah na hmang lo, mi dang ca zongah na hmng lo, nangmah pum saduhnak ca lawng ah na hman i na duhduh in vawlei ah na nun caah nang cu ka mi siding ah na tlak lo, zungzal nunnak hell ram ah na kal lai a kan tiding cu ttih a nung tuk. Hell ram chung I nganfahnak tuar ding cu chim lo meici te nih a kan peh hmanh ah a ing kho lo mi kan si ko hi mu. Kandam chan le kan nunchan taktak cu Bawipa sunparnak ding caah midang va bomh kha a si ko, Jesuh nih,'A hohmanh a nunnak hmuh a duhmi cu a nunnak kha a sung lai, a sinain, Thawngtthabia ruang ah a nunnak a sungmi cu nunnak a hmu lai a ti, Pathian nih mahzawn lawng a ruatmi si lo in midang zawn a ruatmi le midang caah rianttuan tu si ter a kan duh.

Pathian biaceih ni aphak hlanah mah le mah biaceih ta aherh

Mathai 7:1-4 Pathain nih an soi nakhnga lo mi va soi  hna hlah, midang na soi hna ning te khan Pathian nih an soi lai I midang cung I na hmanmi tahnak te kha Pathian nih na cungah ahman ve lai. Na mit chung I aummi thingtan kha ruat tung loin zeicadah na unau mit chung I a ummi mithnawmte kha na zoh? Na mit chung I thingtan a um ko buin zeitindah na unau cu na mithnawm cu in khoihpiak ning na ti ngam?

Mah bible cacaang nih a chimduhmi cu kan I fian cio ko lai dah tiah ka ruah, minung kan si bangin ahopaoh nih “Weakness” kan ngei cio dih hna, mi a va soi ngamding kan si hrimhrim lo tihi kan theih cikcek a hau. kanmah nih mi bia va ceih len kha kan rian a si lo Pathian rian lawng a si aruang cu kanmah lila kha biaceih ding kan si ve. 

Rom 14:10 A si ah cun nan nih anhringso lawng a ei mi nih zei cadah nan unau hna cu nan soi kun hna? Cun nan nih anhringso ei lo pawl zong nih zeicadah nan unau cu nan zawmhtaih ve hna? Kan dihlak in Pathian hmaiah biaceih awkah kan chuak cio ko lai.

            Mah biahi Paul nih nifatin kan I nunpi dingah a kan cawnpiak mi asi I kan tuahding le kan tuahlo ding kha kan I fian a hau. Pathian biaceihni ah soisel mi kan si nak hnga lo kan unau kha soisel hna hlah usih. Khrihfa kan nunnak ah hin “na tuh bang in na zuun than lai” ti le “Mi nih kan cungah tuah hnaseh ti nan duh bantuk te khan midang cung zongah va tuah ve uh” tihi kan I cawnpiak lengmang ko nain kan I nunpi khawh lo mi a si rua tiah ka ruah mah tuah ding hi a har tuk ko maw ti ah le kan tuahkhawh tuk mi a si fawn ko tung. Nang le kei biaceihnak ni kan phak hlan te ah le caan tawite kan ngeihchun mi chung teah hin biaceihni kan reldingmi tuanbiadawh tial cang usih.

Malakhi 3:18 Mitha kha mithalo hna sinin nan thleidan khawh than hna lai I Pathian rian a tuanmi kha a tuan lomi sinin nan thleidan khawh than hna lai, a ti.

Tanghra caminpuai phit bantukin heh law tiah fir (copy) khawhchung in kai copy lai I ka awng te ko lai ti phun cu a ngah hrimhrim lai lo. Kan bia a kan ceih tu ding hi vawleicung lawyer sawhsawh bantuk a si lai lo, a hman mi cu a hman ning in a ceih lai I a hman lo mi cu a hman lo ning in a ceih te ko lai. Bribe tuah a ngah te lai lo, zeicahtiah a dingmi Biaceihtu Ralkap Bawi hmai ah kan dir te lai I kan bia a kan ceih te lai caah a si. Nang zeitindah na tuanbia na tial I zeibantuk tuanbia he dah Biaceihtu Ralkap Bawi sin ah na chuah ve te lai?

Kaa Lawm

Run Tha Hlei Par

Cavite!!!!