“Bawipa kan cungah a tha”

Bawipa cu ka cung i a thatnak vialte ruangah zeidah ka pek khawh lai  (Ps 116: 12).

PCCF unau vialte hna Philippines ram ah cacawng kho dirhmun kan phak khawh hi Bawipa kan cungah a thatnak a langhnak a si. Voikhat ah Tuu ruun hna cu tlimno a umnak hmun ah Tukhal nih a hruaihna. Tuu nih ramhring an tam I, an thau, andam an miltlor ngaingai. Cutik ah Tuu ngeitu nih siseh, midang zong nih Tuu ruun an ei mi cu tlimno tha a si, an tlonlennak hmun cu hmuntha a si ti an hngalh khawh. Tuu nih khan mah hi kan ei mi ram cu a si tiah a luak piak hna lo nain hngalh khawh a si ko. Tuu nih a ei mi cu rak luakpiak hna sehlaw a hmutu caah fih nung taktak a si ko hnga. Cuvebantuk in Pathian bia kan theih kan hngalh mi kan cawnmi, a thatuk mi hna hi kan i nunpi i nifatin kan nunnak ah lam hruaitu tha ah kan i ser khawh ahcun kan ei mi hi tlimno tha a si kha minih an hmuhkhawh lai, Hitihin Bible nih a ti kan ti , hihi kan cawn ning, kan cawnmi, tiah kan kaalawng in kan chimthan ahcun midang caah luak bantuk menmen fihnung a si ko.

Paul nih cun Pathian rian tuan hi, caantha (opportunity) tiah a hmuh.  Pathian rian a tuan khawh cu caantha a si tiah a hmuh. Jesuh Khrih thawngin Pathian cu mi vialte nih an zumh i a nawl an ngaih nakhnga riantuantu sinak ka hmuh a si, a ti (Rom 1:4-5). Roman 15:15 ah Pathian nih vel a ka ngeihnak cu Jentilemi sinah Jesuh a riantuantu sinak kan ngeih hi a si, a ti.  Cucaah Paul nih mission rian a tuan tikah Pathian a dawtnak a vel thawng lawnglawng in riantuan khawhnak a hmuhmi a si tiah a ruah. Cu lungput nih cun mission rian kha zaangdam tein a tuanter khawh. Judahmi sinah siseh Gentilemi hna sinah siseh rian a tuan tikah Pathian dawtnak ka lehrulhnak lam a si ti lungput in a tuan. Cucaah Salm catialtu nih Bawipa cu ka cung i a thatnak vialte ruangah zeidah ka pek khawh lai a rak ti ve (Ps 116: 12). Kannih zong Paul bantuk in midang caah rian a tuantu kan si khawh cu caantha a si tiah kan hmuh I, Pathian a kan dawtnak kan lehrulhnak lam a si ti lungput he kan tuan ahcun midang caah rian tuan piaktu si hi zaang a dam ngaingai ko hnga.

Paul bantukin Pathian dawtnak lehrulhnak caah nunnak pek in Pathian rian a tuanmi hna krihfabu tuanbia ah tampi kan hmuh hna. Laimi khrihfa riantuantu lakah pacan taktak a si mi  Rev. Chan Thang hi Pathian rian a tuannak le a rak i timhtuahning  kong biahalnak an tuah. A bia lehnak cu hitihin a si. “Bawipa Jesuh hna kan ca i fak tuk in temhinnak a tuarmi ka ruah tikah midang caah ka thazaang paam ve seh, ka thlan chuak ve seh, ti ruahchihnak he a rian ka rak i timh I ka tuan hi a si,” a ti.[1] Rev Chan Thang cu Lungler (Thantlang Peng) Khuami a si nain, Tlang Khua ah missionary in a thih tiang Pathian rian zumhawk tlak in a tuan. Paul nih a chimmi, Cucaah ka u le ka nau hna, Pathian a kan dawtnak a nganmi ruangah a nung in pekchanhmi raithawinak bantukin i pe tuah u, a rian ah aa pumpemi le cohlan awktlakmi si tuah u, cucu biaknak taktak Pathian kan pek awk biaknak cu a si, (Rom 12:1) ti hi Rev. Chan Thang  nun nih fiang ngai in a kan cawnpiak. Na cungah ka cungah Bawipa a thatnak ruatthan hmanh usih.

             Hlaphuah thiam Frances R. Havergal nih Pathian a kan dawtnak  a nganzia le a fale hna nih kan lehrulh a herh ve zia cu khrihfa hlabu 207 ah hitihin a langhter. Hi hla hi kan thinlung dihlak in sathan in athar in ruatthan hna sih.

            Nangca keimah ka thi, kathi nangca ka thlet

            Nangmah kha kan tlanh i, nunthan nak kha kan pek

            Nangmah caah kalu ka hloh, keica zeidah na hloh………

            Kapa umnak inntha, vancung a ceu umnak

            Vawlei ka um lio ah, a zapi ka chiahta

            Adihlak in ka chiahtakcang, zeidah nangna chiah tak?......

            Nangca a tam ka huah, holh chim khawh lo tiangin

            Hell in nang khamh awkah, fakbik mi kha ka in

            Nangmah caah a tam ka huah, zeidah kei ca nain ?.........

            Vancung ka umnak in, Khamhnak dawtnak kan put

            Tlanhnak a man lo in, ka dawt sual thlahnak he

            Nangmah ca laksawng tha kaput, keica zeidah na put?..........      

Bawipa cu kan cungah a that caah le a kandawtnak a nganmi ruang ah zeitin dah kan lehrulh khawh ve hna lai?????

Siang Zi

Cavite

---

[1] Joel ling, I Tonnak (Yangon: August, 2007), 45.