2015 Weekly Online Sermon

 

Sym, Tha Tha 

Hello, Dawtmi PCCF unau hna, nan zate happy Sunday! Tuzing Weekly Online Sermon ah Thawngthabia a kan hrawmhtu cu Sayamah Run Tha Hlei Par (sym, Tha Tha) a si. Amah hi M.Div. (UTS) in a dih dengmaang cangmi a si. A cungah lawmhnak tampi kan ngei. Bawipa nih thluachuahnak pe chin ko seh!

ILawm Zungzal Usih

Khrih ah Dawtmi PCCF unau nan dihlak Bawi Khrih min in nan kut kan tlaih hna. Tuzing nan sinah Bawipa Thawngthabia phuan chimnak caan tha caan sunglawi a ka hmuh tertu kan Biakmi Pathian amin thangthat si ko seh. Cun tuzing Thangthabia phuang dingin caan sunglawi a ka petu upat mi PCCF hruaitu nan dihlak cung zongah kai lawm tuk ti kha von chim ta ka duh. Tuzing i ruahti dingin kai thim mi Bible ca caang cu:

1 Thessalon 5:16-18 “A zungzal in i lawm u, a zungzal in thlacam u, zei bantuk thil nan ton hmanh ah lunglawm in um u. Khrih Jesuh chung i nan nunning ah hin hitihin nung hna seh, tiah Pathian nih an duh hna” Cathiang kan relmi kan dihlak cungah Bawipa nih thlauchuahnak kan pek piak ko seh. Amen!

Khrih ah dawtmi u le nau hna nihin pumpak kan nunnak von i bih cio tuah hna usih, aa lawmmi kan si maw? Bawipa nih a kan pekmi kan caan hi lunglawm tein a hmangmi kan si hna maw? A kan sertu kan Biakmi kan Pathian hi tah a lung kan lomhter maw? kan cungah aa lawm ngaingai hnga maw? Bawipa nih a kan duh piakmi cu afa le kan nih vialte hi i lawm hna sehlaw keimah zong ka lomhter ve hna seh tihi a kan duhpiak mi cu a si. Vawleicung sining hi kan hmuh kan theih cio bangin nihin thaizing zei kan ton lai ti aa fiang lomi dirhmun in a nungmi kan si pinah aa thleng lengmang mi khuacaan he a kalti cuahmah mi kan si. Sihmanhsehlaw fiangte in kan theihmi zungzal nunnak a ngeitu kan Bawipa Jesuh Khrih he a nungti mi kan si i zeitik hmanh ah ai thleng bal lomi Pathianbia nih a hruaimi le a ukmi kan si tihi kan i fian paoh ahcun kan tonmi thil paoh hi lunglawm tein cohlan a thiammi kan si lai i nifatin Bawipa dawtnak thawngin aa lawmmi kan si zungzal ko lai.

Bibleca kan rel cang bantukin a zungzal in aa lawm ding kan si. Mitampi nih kei cu vawlei cungah mi vanchia bak ka si tiin a phunzai mi kan tam Bawipa nih a kan pekmi thlauchuah hna hi cohlan zia thiam loin a vuivai mi kan tam. Minung kan sining in kan lung aa lawmh lo lengah Bawipa zong a ngaih kan chiatter tawn. Bawipa nih a kan pekmi thlauchuah hna hi nifatin lunglawm tein hmanzia a thiammi si kan herh. Vawleicung ah kutke-tlamtling lo mi tampi liangluang hna lakah Kutke tlamgtling ten a kan pek, mit cawmi tampi lakah thaten khua hmuh khawhnak mit a kan pek, hnachet tampi lakah khua tha tein kan theih khawh, thut-umnak inn le lo ngei lomi tampi lakah inn chungah nuam ten kan thudir kho hna, eidin awk ngeilo in a vakvaimi tampi lakah nifatin eidin a kan pek rih, zawtfahnak phunphun a ingtuarmi hna lakah dam tein a kan chiah rih, u le nau hna Bawipa chimcawk lo thlauchuah kan tinco mi hi nifatin ngaihchia le lungawtawm in a umpi ding kan si hrim lo, nifatin lunglomhnak zaihla sak in a nung peng ding kan si. U le nau hna a zungzal in i lawm hna usih, a zungzal in Bawipa sinah lomhnakbia chim zungzal usih Bawipa nih lunglawm tein nunter hi a kan duh piak mi a si. U le nau hna Khrih chung i kan nunnak thawngin aa lawm zungzal ding kan si. Kan nunnak vialte cu Bawi Jesuh Khrih chungah a um caah Bawipa nih i lawm zungzal ko uh tiah a kan ti. Bawipa chungah a nungmi kan si ahcun kan chungah Bawipa a um ve caah zeitik caan paohah khuazei hmanhah Bawipa Thiangthlarau hruainak le umpinak thawngin aa lawmmi kan si zungzal ko lai.

U le nau hna nifatin te kan nunnak ahhin “Bawipa ka caah na tha, Bawipa kan innchungkhar caah na tha, Bawipa ka hawi le caah na tha, Bawipa kan khrihfabu caah na tha, Bawipa kan miphun caah na tha, Bawipa na tha tuk ee” tiin a zungzal Bawipa sinah lomhnakbia chim kho zungzaltu si i zuam hna usih. Bawipa nih kan caah a zaa tawkin thlauchuahnak a kan pekmi kan tinco mi cungah lawm tein cohlan le um khawh hi Bawipa nih a kan duhpiak mi a si. “A zungzal in i lawm u, a zungzal in thlacam u, zeibantuk thil nan tonhmanh ah lunglawm tein um u. Khrih Jesuh chung i nan nunning ah hin hitihin nung hna seh tiah Pathian nih an duh hna” tiin fiang tein Bawipa nih a kan ti bantukin Nifatin kan tuahmi thil vialte hi Bawipa Jesuh min in si dih ko hna seh. A Biathiang kan chimrel mi Bawipa sunparnak ca’h si ko seh. Amen!

Lomhnak tampi he,

Tha Tha.

2015 Weekly Online Sermon

                                                                   Pastor Dawt Mang

Dawtmi PCCF unau hna, “Bawipa nan cungah i lawm ko seh !” tiin nan kut kan tlaih hna. Nihin Sunday ah Pathian Thawngthabia a kan hrawmhtu cu Pastor Dawt Mang a si. Amah hi Kyar-inn khua um, Thantlang peng Kuhchah a si. DMiss program in PCU ah a dih dengmang cangmi a si. Acungah tampi kan i lawm. Bawipa nih hmang chinchin ko seh!

A Kan Khamh Lo Hmanh Ah Na Pathian Cu Kan Bia Hlei Lai Lo

(Dan. 3: 17-18)

Biblerelnak: “Maw siangpahrang, hi kong ah hin kan in leh awk a herhmi a um ti awk zeihmanh kan hngal lo; a alh hluahmahmi meiphu chungin le na kut chungin kan biakmi Pathian nih a kan khamh khawh ah cun, kan khamh ko seh; a kan khamh lo hmanh ah na pathian cu kan bia hlei lai lo i na phunmi milem hmai zongah cun kan kun hlei lai  lo, ti kha bawipa nangmah nih hngal ko,” tiah an ti.

Moses nih a laakmi nawlbia pahra chungah (Ex.20:3) “Keimah hlei in Pathian dang zeihmanh nan bia lai lo” timi hi a pakhatnak bak ah pekmi a si. (Kol.3:5) ah “Hakkauhnak hi siasal biakning phun khat a si” tiah a ti than. Greek mifim minthang Socrate nih “Mah pumpak miaknak lawng hmuh dingmi rian lawng tuan cu duhfah, hakkhauh a si” tiah a ti. Curuangah (Lk.12:31) ah“Pathian pennak le a duhnak kawl hmasanak” kong a chim. Phundang in cun, kan herhmi a kan pek hrimhrim lai, kan hmuh lai, kan tinco lai tiah i ruahchihnak um lo bak in lungthin dihlak, lungthiangte in thangthat a duh deuh mi Pathian a sinak a kan hmuh ter.

Nebukhadnezzar Siangpahrang nih a milem biak dih dingin nawl a chuah mi cu Babilon ram uknak zohkhentu ah a chiahmi Judah mi Shadrak, Meshak, le Abednego hna nih an biak duh lo mi thawng a theih tikah meiphu chungah paih in khanghthat ding nawl a chuah. Judah tlangval 3 nih cun “Milem pathian kan biak kho lo, na duh ahcun meiphu chungah cun kan paih ko, kan biakmi Pathian nih na kut chungin a kan khamh lo hmanhah na pathian cu kan biak lai lo i a hmai ah kan khun fawn lai lo” tiah an ti. An samfa fakhat hmah a kangh hna lo pinah an ttemnak hri tu a kang dih i, meiphu chungah minung 4 he lam an lengti ko kha siangpahrang le a mizapi nih an hmuh tikah milem biak dih ding nawl a chuahtu siangpahrang lila nih “Judah mi hna an biakmi Pathian cu thangthat si ko seh!, Amah nakin a cungnung bik Pathian dang a um lo, a hohmanh nih cu Pathian serhsatmi poah cu hnawh chuah nan si lai” a ti hna i Judah mi 3 cu Babilon ram ah hmasa an tuanmi rian nakin a sang deuhmi Rank a kaih hna.

Adoniram Judson cu Kawlram ah missionary tuan dingin a nupi Ann he 1813 ah an rak phan, harnak tampi tuarkhawhnak Pathian nih a pek hna i kum 6 hnu (1819) ah zumtu thar hmasa bik U Naw, nu zumtu hmasabik Ma Min Lay, cun adang 30 tluk tipilnak a ngeih hna. (Acheu cu chun caan ah tipil-ing ding an tih i zaan tu ah tipilnak a pek hna). Culio i thihnak le nunnak karlak ah thil a um than mi cu zumtu thar hna an nunnak humhim hi a si. Khrihfa biaknak cu ramdang biaknak a si an ti, Khrihfa a lutmi hna le zumtu hna cu harnak an pek hna, thah ding tiang hmanh an timh lio caan a rak si. Siangpahrang Ba Kyi Daw sin ah Judson nih a zumtu thar hna harnak an tonnak hnga lo le biaknak hnahnawh pek lo dingah a va ton. Temple chungah mizapi dihlak nih Siangpahrang cu kun in an biak lio ah a bia lo tu cu Judson lawng a si, Siangpahrang nih a theih cawlh, Khrihfa a rem lo pinah amah siangpahrang hmai ah a kun duh lo mi ramdang mi Judson cungah a thin aphawh chin. Sihmanhsehlaw lungthin dihlak in Pathian aa bonchan mi Judson cu Siangpahrang pa nih biaknak zalennak le a ram mi nih hna an hnawhnak hnga lo ding nawl a pek.

Naite ti awk in, Kawlram aiawh in muidawh zuam ding mi 20 an thim hna, cu chungin aa dawh bik mi pakhat an thim than lai i, England ram London khuapi ah zuam ding a si. (An i thim cupmap lio pi a si aho dah pakhatnak a si te lai aa fiang rih lo, SMS, Online in Vote thlak/pek khawh an si). Cu minung 20 chung ah kan Lainu Ms. Van Sui Par (Ms. Tin Sandra Myo), Khrihfa mi aa tel ve. An hotu hna hruainak in Swedagone Pura biak ding an kal pi hna. Media tampi nih thawngla ding in an zulh hna. Pura hmaiah cun an dihlak in an kun i an biakter dih hna lio caan ah kan farnu pakhat lawng nih biak lo le kun lo tein a um mi photo kan hmuh tikah kan lawmh pi cio. Kan farnu nih milem a biak lo mi le milem hmai ah a kun lo mi kha Pathian hmai ah le Khrihfa mi hna kan dih lak hmai le kan thinlung ah pakhatnak a kan hmuh piak. Kawlram nih Media hmang in an Buddhist Mission tuan ning phun khat a si kan ti khawh ve. Milem hmai ah biak lo le kun lo ruangah caan tha (Akhunh a Zii) sungh lai ding cu a biak Pathian he a tleng lo. (Kan ram ah biaknak thleidan in le miphun thleidan in rian an tuan rih ko). Caan tampi kan tuaktan setsai lo mi le kan duh mi ruangah tuah lo ding kan tuah theu tawn mi hi Pathian hmai ah kan tlakchamnak a si.