(September 6, 2009) Zarh Online Sermon

THLACAM NUN

By Dr. Diana Siang Pen

Biahmaitthi

Hmasabik ah dawtmi PCCF u le nau hna he thawngttha i hrawm tti kho dingin caanttha a kan petu Pathian cungah siseh, PCCF chungttuan lutlai upa nan cungah siseh lawmhnak tampi ka ngei ti vun chim ka duh. Caanttha a kan petu Bawipa min cu thangtthat si ko seh. Amen!

Biadawmhnak

Tuzing caan ah nan nih he thawngttha I hrawm tti dingah kaa thim mi Baibal cathiang cu Jeremiah 33:3; “Nan ka auh ahcun kan leh hna lai I a nganmi le a thukmi thil nan hngalh bal lomi hna kha kan chimh hna lai.”
Biatlang tar ka duh mi cu:

THLACAM NUN

Jesuh le Daniel thlacam nun hi cawnttha ngai an si tiah ka ruah. Zumtu hmasa hna nun kan zoh tthan tikah thlacam hi an rawlthaw bik a rak si (Lam. 6: 4). Kan nih chan tu ah hin cun thlacam hi huam le cam ding, huam lo le cam lo ding mi rian pakhat bantuk ah a ruah mi kan tlawm ti lo. Micheu nih thlacam hi biapi tuk ah kan chia ti lo, mah ca cun an chim duh tuk tawnmi bia pakhat cu “zei ruangah hen thlacam lengmang cu a hau (herh)! Kan chim hlan le kan rel hlan in Pathian nih kan duh mi le kan herh mi vialte a theih dih ko” tiah an ti tawn. Mah zumhnak hi a hmaanmi a lo ngai nain ttih a nung ngai mi le zuumtu nun a hrawktu le daithlan zaangzelnak lam ah a kan kalpi tu zumhnak (ruahnak) tthalo ngai a si i a ngaingai ti ah cun cheuchum lawng a hmaanmi (half-truth) a si kan ti khawh. Cheuchum lawng a hmaanmi bia cu lih phunkhat a si kan ti khawh.

Thlacam hi khrihfa mi hna kan caah cun abiapi ngaingai mi le a herh zong a herh ngaingai mi pakhat a si. Paul nih Thesalon zuumtu ca a kuat mi hna ah kan hmuh khawh mi cu “a zungzal in thlacam u” (1 Thesalon 5:17) a ti hna. Jesuh cawnpiaknak zongah kan hmuh khawh mi cu “…tukforhnak chungah nan tlak sual nak hnga lo thlacam tuah u” (Luka 22:40). Thlacam hi Pathian he pehtlaihnak kan ngaih lawng si loin tukforhnak ah kan tlak sual nak hnga lo caah le khrihfa mi kan nun ziaza hrim zong a si awk a si. Phundang in kan chim ah cun a nun in kan I nun pi awk (life-style) a si awk a si. Ahohmanh tukforhnak a inglo le a tonglo khrihfa kan um lai ka zuum lo. Thlacam mi le cam lo mi tu mah zawnah hin kan I hliahnak (dannak) a si. Mi cheu nih cun thlacam hi kan duhmi hal caan le chim caan lawngah a ruat tawk zong kan um lai ka zumh. Sihmanhsehlaw, thlacam nih a sawh duh ngaingai mi cu Pathian he I pehtlaihnak nu le va bantukin I pehtlaihnak (intimate relationship) tu khi a si deuh tawn.

Efesa cakuat chungah Paul nih thlacam a hrilhfiah rih mi cu kan ral hriamnam tthabik pakhat a si a ti (Efesa 6:18). Cucaahcun thlacam hi khrihfa mi hna kan ralthuam le kan hriamnam tthabik a si bang zungzal in thlacam le lungdong lo tein thlacam hi a theih lawng thei loin a nun hrim in I nun pi hna u si law kan ral a si mi Sehtan hlenthawinak in siseh, Pathian nih Jeremiah chungah a kan kamh bang a nganmi le a thukmi thil nan hngalh bal lomi hna kha kan chimh hna lai a kan ti bang thlacam nun hi thli kan dawp bang or ni fatin ti le rawl kan din kan ei bang biapi ah chia hna u si ti kha tawi te in sawm kan duh hna. Thlacam deuh mi cu zumhnak lei ah an puitling deuh I an nun ah lawmhnak mithmai a leng deuh hrim ko ti hi kei mah pumpak ka hmuh ton mi a si.

Biatlangkawmnak

Laimi hi theih lei le hngalh lei ah cun kan bau hrimhrim ti lo, amah belte tuahsarnak lei tu ah hin kan chambau ngaingai hna in ka thei, zumhnak ah kan pale a si mi hna nih an chim tawn mi cu kum 100 kan reng ti lo nain kan nun ning tu cu kum 10 kan lo an ti ttheu. Cucaahcun thlacam nun zong hi kan theih nan theih sa mi si ko lai nain sawm kan duh mi hna cu a nun tu in I nun pi hna u si law zumhnak ah nu tling pa tling dirhmun tiang a kan phanh pi hrim ko lai ti zumhnak ka ngei. Korea missionary pa bia kan rak hal bal mi cu, “Korea, hi ti nan tthanchonak a ruang cem (secret) hi na kan chim kho hnga maw? A kan lehnak cu, “thla kan cam tuk ruangah a si ko, cun kan theihmi hnihchunte hi kan I nun pi caah a si ko” tiah a kan leh bal mi nih khua fak ngai in a ka ruahter ve. 2 Chanrelnak 7:14, “ka min in kawhmi ka mi hna nih khan an lung an tthumh I thla an cam I ka hmai kha an kawl I an lam tthalo khan an I mer ahcun, van khin ka run theih lai I an sualnak cu ka ngaihtiam hna lai I an ram cu ka damter lai.”
Bawipa nih a bia a thar in thlua kan chuah piak hram ko seh.
Tampi kaa lawm.

(Aug 23,2009) Zarh Sermon

Dawtnak

by Thla Tin Fam

Bawikhrih ah unau hawikom nan dih lak Pathian pekmi daihnak nan cungah um ko seh ti buin nan kut kan tlaih hna.

Tuchun caan ah hi ban tuk in PCCF Internet Phungchimnak ah keimah hna zong hi vial te pastor le Pathian rian tuan tu hna lak ah thawngtha chim ding in caan tha/thiang a ka petu PCCF upa hna nan zate cungah lunglawmhnak tampi ka nei. Keimah cu nan ka theih cang bantuk in Thla Tin Fam ka si I Philippines ah Human Resource Development timi course akai ka mi ka si.. Ka chim cang bantuk in kei cu Baibal a cawngmi ka si lo caah saupi zong ka chim thiam lai lo. Pathian nih a kan dawtnak le Minung hna nih dawt kan herh ning he peh tlai in keimah hmuh ning te in van langhter ve ta ka duh.

“Dawtnak” kan ti mi hi minung hna kan nunnak ah hin biapi ngai in rian a tuan kho tu le mi thin lung a thlen nawn ter kho tu zong asi. A bik in Laimi khrihfa kan ca ko hin a biapi khun rua tiah ka ruah. Laimi nih hin dawtnak kong he peh tlai in biafang pahnih kan nei cu hna cu “duhnak” le “dawtnak” an si. Duhnak cu nungak tlangval kar i i dawtnak khin kan hman i mah zawn lawng ruah, duhfah, hnahchuahnak a ngei, Dawtnak cu Pathian nih minung cung i a ngeihmi, nu le pa cung i fa le nih siloah fa le cung i nu le pa nih an kan dawtnak hna ah siseh, cun hawi le kom i dawtnak ah siseh, a phun phun in kan hman. Laimi hna nih hin “Duhnak” hi “Dawtnak” nak in a biapi deuh ah kan chiah tawn rua tiah ka ruah.

Baibal biakam hlun cu Hebrews in tial mi asi i “Dawtnak” biafang hi pakhat lawng si dawh asi. Cucu “Ahava” ti asi i minung kar i i dawtnak ah siseh Pathian le minung kar i i dawtnak ah siseh a pahnih in an hman mi asi. Minung le minung dawtnak le Pathian le minung dawtnak hi Hebrews ahcun a thlei dang bak lo tinak asi. Cu bang si lo in Baibal biakam thar ah hin Greek nih “Dawtnak” cu a phun phun in a rak hman ve, Baibal nih a hman lo mi zong an rak um. Cu hna cu “Agape” “Pathian nih minung a dawtnak”, “Phileo” “u le nau i dawtnak” hna hi kan baibal nih a chim/hman mi hna an si i “eros” “nungak tlangval i dawtnak” le “storge” “fa le hna i nu le pa dawtnak” tiah an si hna. Kan pawng cem I kawl zong nih hin “Dawtnak” cu “achit” an ti ve i a biapi bik in an hman ve mi asi. Kan Lai Baibal Thiang nih a chim bik mi cu dawtnak hi asi: Pathian nih vawlei cung misual a dawtnak kong le nupi nih va a dawt awk asi ning le va nih nupi cungah a dawt ding asi ning kha a chim.

Kan Baibal nih Mithiang Paul hmang in I Kor 13:13 ah a kan chimhmi cu, “A hmun zungzalmi thil pathum an um, cu hna cu zumhnak le ruahchannak le dawtnak an si, cu hna lak i a ngan bik cu dawtnak a si” tiah ati. Kannih Laimi Philippines i a ummi hna nih tehPCCF hi zei tin dah kan tanh “Dawtnak” maw “Duhnak” he dah? Duhnak he kan tanh asi ahcun; pakhat le pakhat kan tisual nak kan i hmu lai i lung tlin lo nak a chuak lai, cun i lungrual lo nak tiang in a chuak kho mi asi. Zeiruangah tiahcun, duhnak cu kan chim cang bantuk khan mah zawn lawng a ruat, mi zawn a ruat ti lo. Cucacun, PCCF mi hna nih PCCF cu dawtnak he tanh hna usih law, na hawi nu na hawi pa i a tuahsual mi siseh na hruaitu upa nih a tuahsual mi siseh dawtnak he mah ca/zawnlawng ruat lo te in hmailei kar hlang ti hna usih …………………

(August 16,'09) Zarh Sermon

NAWLNGEIHNAK IN TEINAK

By Major. Henry Van Thio

Ni hin Pathian nithiang ah on-line in phungchim khawhnak tiang in nunnak a ka pe tu Pathian ka thangthat. Cun caan a ka pe tu upa hna cung zong ah lawmhnak biachim ka duh. Hi ka Manila um mi Bible cawng sang mi le Pastor tam pi lakah keimah caan ka hmuh tik ah ka ar pin lawng si lo in lung siarem lo ngai in ka um. Caan saudeuh khua ka vun ruat than i kai lawm than. Zeicatiah ni hin hi keimah le kan nu (Dr. Anna Sui Hluan) Anniversary kum (12) tlin ni le U Mawia te Tanakha company anniversary kum (2) tlin nak ni a si. Cu ni (2) ai ton ni theng theng ah PCCF ah keimah phung chim le U Mawia te company ah kan nu phungchimnak caan pek kan tong ve ve hoi. Ai tong thiam ti awk a si nain, hi hi Pathian khuakhan a si ti in ka ruah than. Cu caah kan hruai tu hna khuakhan lairelnak cu tuah zulh atha ti in ka hmuh than i cu lungthin nih cun ka lung siarem lo nak lungthin kha a tei. Cucaah thawngthabia chimnak bia tlang pi zong ah
“NAWLNGEIHNAK IN TEINAK” ti in caan ka hman lai.

Pakhatnak ah vulei nunnak lei in zoh hmasa uh si law ka tawk ka zawn lo pi in Pathian nih thluachuah a ka pek mi ralkap chung ah Major tiang kum 23 le Civil ah Virginia Factory (Mandalay) le Alcohol Factory (Belin) ah Factory Manager (Shet Zung Hmu) kum (8) chung ka rak tuan. Hi ka riantuannak kum (31) chung ah ka hmuhton mi le tuah ser mi cu ka kut tang mi lak ah chimh angai mi nawl angai mi pawl hi ka duh deuh hna. Ka dawt deuh hna. Ka tleih chan deuh hna. Hnak kar ka tenh deuh hna. Chimhar nawl ngai lo pawl cu phen hei deuh an si. Hi cu kei mah lawng si lo in a ho mi zei upa poh ngeih cio mi, tuah cio mi lungthin le tuahsernak an si. A tawinak le a fiannak bik in chim ah cun kan kut tang mi hna vialte rengkai nak caan a phanh tik ah nawlngeih le ngeihlo nak a thei par ai thei khun. Thiltikhawh nak ai tluk mi cio cung ah nawlngeih ruang ah duhdawt le tlaihchan a tong mi nih cawisan an tong i an reng a kai. Sihmahsehlaw nawlngeih lo ruang ah mit kem a tong mi hna cu an taang theu. A sullam cu nawlngai mi nih nawlngai lo mi an tei hna ti nak a si.

Chungkhar nunnak lei in zohthan uh si law fanu fapa hna lak ah nawlngai mi fanu fapa hna cung ah le chimh a khawl mi, nawl a ngai lo mi fanu fapa hna cung ah, nu pa hna lungthin put ning ai khat lo. Nu le pa hna i duh dawt tlaih chan le hnak kar tenh nak lung thin zong nawlngai fale cung ah a tam deuh khun i thluachuah zong an hmu deuh khun. Nawlngai lo fa le hna cung ah a zawr deuh i thluachuah zong a tlawm deuh. Khua awng ton lo nak tiang an phan. Cucaah cun kan Lai phungtluk bia hmanh ah “Zubui nu bia ngai lo lam thlang ril” ti a si. A sullam cu chungkhar khua sak tuntuknak hmanh ah nawlngeih cu khua awng tonnak le teinak a si i nawl ngeih lo cu sunghnak zatlaknak a si.

Pahnihnak ah Bible cawnpiak nak lei in zoh uh sih law Joshua 6:2-27 ah kan hmuh mi cu Joshua hruai nak in Israel mi hna Canaan ram an luh i Jericho khua pi an lak ah hin Pathian cah mi le nawl pek mi ning te in an rak tuah caah an rak tei khawh kha kan hmuh. Si hmenh seh law Joshua 7:1-26 chung ah kan hmuh than mi cu Akhan nih pek chanh mi thil cu tlawmpal a lak caah Bawipa thinhunnak Israel mi cung ah a alh. Cu ruang ah Joshua nih Israel (3000) kha Ai khua a va tuk ter tik hna ah an sung, an thi. Ral i thah le dawi an tong. A hnu ah cun Akhan le a chung vial te kha an ngeihchiah, thilri vialte he Akhor nelrawn ah an kal pi hna i Israel mi vialte lungcheh nak in an thi. Cu caah hi Bible ca tlang kan zoh tik zong ah fiangte in kan hmuh khawh mi cu Pathian le nawl ngei tu hna nawl zulh cu tei nak a si i zulh lo cu thih nak le sungh loh nak a si.

Cun Number 21:4-9 tiang kan zoh tik ah Israel mi nih Hor tlang in, Edom ram kha hrial awk ah Rili Sen lam kha an tlaih i lam ah mi hna cu an ing a puang i Pathian le Moses kha an zai hnawh hna. Cu caah Bawipa nih mei rul kha mi lak ah a thlah hna i mi kha an cuk hna caah Israel mi tam pi an thi. Cu tik ah an ra i “Bawipa le nangmah kha kan in mawhchiat hna caah kan sual cang. Kan nih sin in rul kha a lak hna nak hnga Bawipa sin ah thlacam tuah” an ti caah Moses nih thla a cam. Bawipa nih Moses cu, “Meirul pakhat in ser law, tung cung ah tar tuah; rul cuk mi paoh nih an zoh tikah an nung lai,” a ti. Cu caah Moses nih Pathian nawl bia bang in dar rul pa khat a ser i tung cung ah a tar. Rul nih pakhat khat a cuk hna tik ah, darrul an zoh ah cun an nung. A zoh lo mi an thi. Hi Bible cathiang zoh tik ah nawlngeih in nunnak hmuh a si i nawlngeih lo ah thihnak a si ti fiangte in kan hmuh khawh.

Cucaah zumtu hna nunnak le teinak caah nawlngeih in nun a herh. Pathian zong nih a duh. “Nawlngaihnak hi raithawinak nak in a tha deuh.” (1 Sam 15:22).

(August 2, 2009) Zarh Online Sermon

By Rev. Dr. Dennis Shu Maung

TEINAK CAAH I BAWM CIO HNA U SIH
(Let Us Cooperate For Victory)

Ephesians 4:1bff.

"Pathian nih an auhmi hna he a tlakmi nunning khan nung u tiah kan forh hna. Toidornak lungthin ngei u, lung nem le lungsau in um zungzal u. Pakhat le pakhat i bawm u law cuticun nan i dawtnak kha langhter u".

Pathian nih a kan auhnak he a tlakmi nunning. Pathian nih a kan auhning hi pakhat le pakhat a khah cio lo bantuk in cu auhnak he a tlakmi nunning zong hi a khat cio lailo tiah kan ruah khawh. Asinain Paul nih Efesa cakuat chung i a chimmi Pathian auhnak hna hi a vun kan hmuhsakmi a um. Hi cakuat dal 4 nak cang 11 kan zoh ahcun Pathian auhnak hi micheu caah cun:

1. Lamkaltu, 2. Profet, 3. Thawngttha chimtu, 4. Pastor, 5. Cawnpiaktu. ti hna hi an si. Hi bantuk in auhnak sullam cu Kri pum (Church) kha tthanter awkah a si. Bawi Kri a zummi paohpaoh hi auhmi kan si dih ti zong kha Paul nih a kan chimh tthiamtthiam. Cucaah zumtu paoh nih khamhnak thawngttha hi kan phuan ding le Kri ah pumkhat kan sinak kha fehter ding, tthawnter ding le langhter ding kan si. Cu bantuk i kan nun ahcun kan bu cu a tthang ko lai. Auhmi kan si caah auhmi he a tlakmi nunning kha kan nunpi hrimhrim awk a si. Nunning hi kan i dang cio dih ko lai nain Pathian auhmi hna he a tlakmi nunning ahcun kan i khah a hau tiin ka hmuh. "Ning" timi hi "phung" timi he a kaht mi a si. A tlangpi huap in ka chim ahcun Pathian auhmi hna he a tlakmi nunning hna cu:

1. Cathiang rel zungzalnak
2. Thlacamnak
3. Pathian nawl pekmi zulh le ulhnak
4. Mah le mah i tei khawhnak
5. Dawtnak le upatnak
6. Zaangfahnak le zawnruahnak
7. Ngaihthiamnak le lungsau thinfualnak
Cucaah hi kan nunning hin..."kannih cu dawtnak lungthin in biatak kha kan chim deuh awk a si i kan lu a si mi Kri lei ah khan a lam kip in kan tthan awk a si. Pum chung i a ummi nge hna nih an tuah awk cio an tuahnak thawng khan, pum cu a ningpi in dawtnak in a tthang."
TEINAK: Pathian nih Moses kha, "Na sinah keimah ka kal lai i teinak kan pek lai" tiah a ti. Cu bantuk in Krifa bu hruaitu hna le Bawipa Zisu Kri a zummi hna poh cu Pathian nih kalpi mi le teinak pekmi kan si ti kha kan hngalh. Cucaah Pathian he hmai ah nor cuahmah ding kan si ko. Hrawktu, phelhtu, Seitan ruan ttuannak nih kan kalnak lampi ahhin hrawh an kan timh ko lai. Sihmanhsehlaw Pathian min in kan tei ko lai timi zumh tthawnnak kan ngeih le lungsau thinfual tein kan nun a herh. Cucaah cun lam a kan dawntu thil pohpoh le kan tleihchan pengmi sualnak vialte kha hlaw hna u sih law teinak kan hmuh khawhnak hnga kan Bawipa Zisu kha fek tein zohchih u sih. "To be more like Jesus" si khawh kha i zuam hna u sih. Teinak cu neemnak le mah le mah i niam ter nak (toidornak) in a ra mi a si i neemnak le mah le mah i niam ter nak (toidornak) cu dawtnak in a ra mi a si. Filipi 2:5-11. Cucaah pakhat le pakhat kha Kri ah u le nau bantuk in i daw cikcek uh, tthatlonak kha i tei ter hlah u, tthatnak tu khan tthatlonak kha tei i zuam u. Kri ah dawtmi u le nau hna "teinak hmuh ding caah Pathian auhmi hna he a tlakmi nunning in nun i zuam u sih law pakhat le pakhat i bawm hna u sih."
Nan zapi cungah Pathian thluchuah um ko seh. Amen.