Bible cang thim: Matt. 21:1-11

Tlangtar: Jesuh Citmi Laa

Biahmaithi

                Kan ngakchait lioah hin nihin hi tumkung te put pah in “Hosana” tiah kan au caan a si. Tum kung te kan I put lioah cun kan rak Iawm tuk. Jesuh Khrih Jerusalem a luh caan a si. Sunparnak an rak pek ve bantukin kan thangthat ve awk a si tiah an rak kan cawnpiak. Samah Dar Zing hi a rak kan lumhsat ngai tu a si. nihin ah tumkung kan ngei lo nain, zeitindah Pathian hi sunparnak kan pek khawh lai ti kha     ruah ti dingah ka duh.

                Kan Bible cang thim hi Matt. 21:1-11 a si. Jesuh Khrih Jerusalem ah a luhnak dingah timh tuahnak a ngeihnak le sunparnak he a luhnak tuan bia a si. Hi tuanbia ah this tam nawn langhter khawh a si nain, La fate nunnak zoh in thazang lak dingah kan sawm hna.

                vv. 1-5 tiang kan zoh ahhin Jesuh nih  a zultu hna kha khua chungah nan va kal lai. Hrenmi la kha nan hmuh lai. Cucu nan va phoih lai. Cun mizei maw nih an in hal hna ahcun Bawipa nih a herh tiah nan ti lai ti kha a si. Laa hi pi fa si dawh an si. A zesihmanh ah Jesuh nih si citmi kha a biapi a si. Pathian nih hin cit dingah a kan herh cio. A laa nakin a laa nun kha biapi mi a si.

                Pakhatnak: Khrih caah si khawh a herh.(Available) Laa hi a lawngmi an si. Jesuh caah an i manh. An si kho. Jesuh nih cit khawh nak dingah sithiam (available) kan si a hau. Khrihfabuu chungah hin rian khinh timh ah a hrialmi kan um theu. Buu riantuannak ah kan al caan a um theu. Pathian caah kan i manh kho tawn lo. Monroe tuanbia hi an chim theu. Minthang actress a si. Pastor pa nih Pathian bia ruah dingah caan a hal an ti. Nain, a caan a pe kho lo. Ruah loin zarh khat hnuah a thi. “Did Billy Graham witness to Marilyn Monroe? Marilynn Monroe was visited by Billy Graham during a presentation of a show. He is a preacher and evangelist and the spirit of God had sent him to preach her. After hearing what the preacher had to say, she said: I don’t need your Jesus. A week later she was found dead in her apartment.”[1]  Jesuh caah kan si khawh lo chung poah cu Khrih hi kan caah a si kho ve lo. Pathian nakin kan chawva le thilri hna biapi deuh ah kan chiah ahcun Khrih nih a kan cit dingah a fawi lo ngai hnga. Pathian ram caah, kan nunnak a si kho maw?

                Pahinhnak: Hman awk tha kan si a herh(Useable): vv. 6-8 ahhin, Laa le a fate cu puan an danh hna i Jesuh nih ai cit ti kan hmuh. Laa hi a tlaih hnuah i chan khawh a si. Duh lo  khawh a si. Nain, an I chit ko. Hman khawh an si. Hman khawhmi nunnak tlukin a sunglawi deuhmi  a um lo. Kan pa Steven pa nih tuanbia a rak chim bal “Hakha ah pakhat pa cu lakphak din a huam ngai. A hawi le a sawm theu hna. Tangka 500 ca ai ken tawn. Lakphak an din dih in phaisa pek ai tim tawn nain, dawr ngeitu nih an kah khawh lo caah a hawi le nih an pek tawn” a ti. Cu caah hman khawhmi va si ulaw ka duh a rak kan ti. Kan man a fah tuk ahcun minung hi hman khawh a si lo. Kan man kan thumh deuh deuh tikah midang nih hman awk kan tha. Jesuh zong nih hin hman khawhmi kha a hman ko. Cit khawhmi kha ai cit ko.

                Pathumnak: Hman awk tha sinak nih mi a cawi. Thangthatnak hi vailam he a kal timi an si. (Crown): Crown begins with cross. Vv. 9-11 tiangah cun Jesuh kha an conglawmhnak kha kan hmuh. Jesuh kha an conglawmh nain, an phahmi puan a lamtu cu Laa a si. Laa cu Jesuh nih ai citnak cungin conglawmhmi chungah ai tel ve. Jesuh pennak ai hrawm dingmi cu amah nih a cit khawhmi hna minung an si ve ko lai ti kha a fiangter.

                Laa bantukin Jesuh nih mizei poah a kan herh dih. A kan kawh dih. Nain, a kan hmang dih lai lo. Ai manh ve lomi, a si kho ve lomi, le cit a duh ve lomi cu a lunglawmhnak zong a kan hrawmh kho ve lai lo. Amah nih a kan cit lawngah, minung nunnak hi sullam a ngeimi a si hnga.

                Zeitindah Pathian hi sunparnak kan pek khawh lai? Sikhawhnak in, hmankhawhmi sinak in…

                Pathian sunparnak caah si ko seh. Jesuh caah a lawngmi laa, hman khawhmi laa si ko hna usih. Cu nih cun a sunparnak a kan hrawmh ve lai.

Pastor Duh Sang

---

[1] Answer.com wiki answers> categories> entertainments and arts>celebrities> Did Billy Graham witness to Marilyn Monroe? March 23, 2013(3:30pm)

PATHIAN DAWTNAK FEK

(Psalm 31:7)

 “A fekmi na dawtnak ruang ah ka lung aa lawm lai I ka tha aa nuam lai. Ka temh innak kha na hmuh I ka harnak kha na hngalh”(Psalm 31:7)

Nihin ni thiang damnak a ka pe i lam a ka hruaitu pathian min ka thangthat, hi bantuk in pathian dawtnak kong online sermon in tial khawh ve ding in caan a ka petu hruaitu upa nan dih lak le ni hin hi online sermon a rel tu nan dihlak cung ah lunglomhnak tampi ka ngei  i upatnak kan pek hna, nan dih lak sin ah khrih daihnak a thar in tlung hram ko seh. 

 .

Vawi lei ah hin dawtnak ti mi hi an tampi ko. Hringtu nu le pa dawtnak, u le nau dawtnak, hawi le kom dawtnak le nu ngak tlangval i dawtnak ti in a tlangpi in an um. Mi nung pakhat cio nih hin kan mah le kan sining le kan dir hmun cio te in dawtnak hi kan ngei cio I kan langhter cio thawn. Mi nung kan I dawtnak hi a sung lawi ve ko nain  ri le ruang angeimi dawtnak  asi caah ri a lawnh tawn ah cun le ruang a um ti lo ah khan cun cu dawtnak kan ti mi zong cu a dih ve i a dong ve ko. Mi nung kan I dawtnak tam deuh cu pakhat khat hmuh duh ruang ah le coduh ruang ah hin a rak si tawn.  kan duh lo mi hna le kan cung ah thatlonak a rak tuahtu hna , lungthin afahtertu hna le mual akan phohtu hna  cung ah hin cun dawtnak hi a um kho hrim tawn lo. Kaana khua I nupi thitupa a misur tizu a reu bang khan nule va, nulepa le fa le hna, hawikom hna  kal lak I kan ngeihmi dawtnak zong hi a dih tawn I a reu zau tawn. siseh a dawng bal lomi le a reu bal lomi dawtnak a um, a ruang a um lomi le ri angei lo mi le donghnak a ngei lomi dawtnak  cu“pathian dawtnak” asi.

Pathian dawtnak cu a fek I zungzal tiang in a hmun.  Pathian dawtnak in zeizong vialte hi ser an si I, Pathian dawtnak in minung zong hi ser kan si. Cu Pathian dawtnak nih cun a kan domhtlaih I cu Pathian dawtnak nih cun kan herhmi cio in a kan cawm. Cu Pathian dawtnak cu a mah nawl kan ngaih lo I kan doh lio zong ah kan caah thisen luan ter in kan ningzahnak phen tu ah hnipuan a kan aihtu cu asi. Pathian nih a dawtnak ruang ah kan cung ah a thin hung tawn hmahseh, athin hunnak nih hma a kan inter ko hmanh sehlaw, a dawtnak nih cun a kan menpiak than . A thin hunnak nih thi ding si ko hmanh usih law a dawtnak nih cun kan caah ngaithiamnak lam aser. Isreal mi hna cu ram car ah kum 40 an vai, harnak tampi an tong, raltampi an hmai ah an um, si hmanhsehlaw Pathian dawtnak nih cun hringtu nu nih a fa a cawi bantuk le a puak bantuk in pathian nih a tang chung ah a cawi hna I a kal pi hna. A dawt hna nak a langhnak, a umpi nak hna nih an ral vialte cu an tei dih hna. Voi tampi an doh I a thin an purh ko nain  a van mana, a min mei le a meiceu hna cu a lak kanh hna lo I lungpi chung in ti apek ko hna. Cun Ephriam cu miphun hme te asi nain Bible nih,“maw Ephriam Bawipa duh dawtnak he a khim mi” ti in a auh. Bawipa duhdawtnak in a khim mi si cu zei tluk in dah a sung lawi. Kan nih zong bawipa duh dawtnak in a khim mi le pathian duhdawtnak cotu kan si hi mi vantha kan sinak cu asi. Kan khamhtu le kan bawipa Jesus thawng in  Pathian dawtnak a cotu cu kan si, cu dawtnak he a kan then kho tu ding vawlei ah siseh vancung ah siseh zeihmah an um lo. Amah pathian nih a dawtnak chung ah akan khumh I cu adawtnak cu kan nunnak chung ah a chiah ve. Elijah cu thih tih ruang ah ramchung ah a zam, Pathian nih langak le tivate ti in a cawm, a sinain cherish tiva te cu tuan ah areu than ko I langak zong cu a ra ve ti lo I changreu zong cu a dih ve ko, asi nain Pathian dawtnak cu a reu bal lo mi le a dih ballo mi asi caah, Pathian dawtnak nih  Elijah cu khimtein a chiah ko, Elizah a cawmtu chungkhar hna zong khimte in a chiah chih hna.

David nih, Bawipa nih ka lungretheihnak vialte a hngalh, Bawipa dawtnak a fekmi ruang ah lunglawm tein ka um lai I tha nuam in ka um lai ati. Voitam pi cu  dam lo ruang ah, hawi ka phanh hna lo ruang ah, dawtu ka ngei hna lo ruang ah, ka saduhthah le ka duhmi ka co khawh lo ruang ah le harnak a phun phun ruang ah ngaichia le lungrawk in kan caan tampi cu a liam tawn. David cu tangka ruang ah si lo, hlawn thil ruang le a hlawhtlin ruang ah si lo, Bawipa dawtnak fek mi ruang tu ah ka lung aa lawm lai ati. Ka tonmi thil vialte hna nak in Bawipa dawtnak hi a ngan deuh I a sung deuh ti fiangte in a hngalh. Pathian dawtmi an si zia, pathian dawtnak sung lawi a co tingtu an si zia le Bawipa dawtnak ruang ah thluachuah a cotu an si zia a thei fiangtu hna nun ah cun lunglomh lo khawh asi tawn lo. Kan lunglomhnak hi vawlei thil ruang lawng ah asi sual ah cun a reu kho mi le a dong kho mi an si caah nikhatkhat minmei bang an tian tik ah kan lung lomhnak  zong cu an tian zau ve ko lai.  Asinain Pathian dawtnak a fekmi ruangtu ah kan I lomh ah hin cun cu dawtnak cu a dong ballo mi asi ca le a reu kho ti lo mi asi caah lomhnak zong cu a dong kho ve ti hnga lo.Nehemiah nih “Bawipa ah nan I lomhnak cu nan thazang asi caah nan ngaihchia hlah u” ati.

Pathian dawtnak fek rosung a cotu kan si caah le a dawtmi a mi le a tuu run kan si caah kan lung lawmhnak zong cu a hmun zungzal I  afekmi  Pathian dawtnak fek ruang ah si ve seh law, cu lomhnak cu hmang in Pathian nih a kan khinhmi rian cio kha tuan in a kan chiahnak hmun hma cio ah sui ngun tangka a angeimi hna nih an ngeihmi nak in a sang deuhmi lung lomhnak  hmang in a kan sertu le a kan hringthan tu  Pathian cu lomhter ve hna u sih.  

                                                        

Rev. Ram Hu

Hnangamnak

(Phungchimtu 2:10-11,Matt. 7:24-25)

Ka duh mi pauh kha ka hmuh khawh, nomhnak kha zeihmanh ka tlolh mi a um lo. Thil ka tuah mi pauh nih khan thangthat nak an ka pek I cucu ka laksawng a si. Khi tikah ka tuah mi vialte kha ka zoh hna I ka tuahnak  hna ah khan zei tluk in dah ka re a theih ti kha  ka ruah tik ah, zeihmanh an rak si loti kha ka vun hngalh. Thilitu dawi bantuk ceo kha a rak si ko I zeihmanh thathnemnak a um lo. (Phunchimtu 2:10-11).

Cuccah hi ka bia a thei I a zul mi cu lung cungah a inn a sa mi mifimpa bantuk a si. Ruah a sur, ti a lian, thiltu nih fak pi in a hranh . sihmanhsehlaw lungcung I a sa mi a si caah khan a pur lo. (Matthai 7:24-25)

Solomon siangpahrang mifim pa nih, a nun chung I a fimnak,a rumnak le a tuah sernak nih lomhmnak, hnangamnak a pek khawh lo zia kha Phungchimtu chung ah a kan cawnpiak. Fimnak ka kawl tuah lai ka ti I fimnak a tam deuh pauh ah lungretheihnak tam deuh ngeih a si ve ko a ti , cun thil tam deuh hngalh pauh ah tam deuh tem innak hmuh a si ve fawn ko a ti. Kai nuam tuah lai , lunglomhnak ti mi hi a sullam zeidah a si, ka kawl tuah lai ka ti, sihmanhsehlaw hi zong hi pakpalawng men a si ko.

Fimnak hi cawn deuh pauh ah  thiam chinchin kan duh, cawn chinchin kan duh, theih chinchin kan duh, i lung sinak a kan pe lo. Kan fim cawn mi nih hin Pathian tihnak le a mah duhnak tuahnak lam a ka hmuhsak ding a si. Fimnak hi biatak,nunzia tha, a thiangmi thil ah a um. Mahatma Gandhi nih, hi tin hin a ti, “Unless your education is founded on truth, good character and purity of life, it is nothing worth. It will be like a house built on sand.” Phundang in chim ahcun fimnak kan cawn mi hna nih hin harnak kan ton can ah le lungretheihnak kan ton caan ah lomhnak a kan pe kho tu, in khawhnak a kan pet tu a si lo ah cun cu fim nak cu thetse cung I sak mi inn bantuk cu a si ve ko hnga. (Matthai 7:24)

Hnangamnak taktak le nuamhnak tling taktak cu vawilei fimnak in hmuh khawh a si lo, Pathian tihnak , thil tha tuahnak lei ah a kan hruai tu lawng nih a tlingmi nuamhnak, hnangamnak a kan pek khawh. Johan 14:27 ah, Zisuh nih “daihnak kan chiahtak hna, keimah nih daihnak kan pek mi hna cu Vawlei nih an pek hna bantuk in kan pe hna lo. Lungrethei le vansang au in um hlah u: nan thin zong phang hlah u.” ati. Zisuh chung I kan I lawmnak, hnangamnak nih harnak kan ton tik ah  replace a ka tuah piak lo: kan ton mi harnak tu ah khan in khawh nak le lawmhnak a kan pek tiah Psycholigist, larry Crabb nih a ti. Caan khat te cu pumsaduhnak kan tuah mi nih nuamhnak a kan pek khawh men ko, sihmanhsehlaw caan sau a nguh lo zia kha phungchimtu nih a kan cawnpiak. Caan tampi ah minung hna nih nuamhnak taktak le hnangamnak tak tak hi Pathian sin lawngah  a um ti kan theih ko nain Pathian chung ah kawl lo in fapa tlau pa bang vawlei fimnak, vawlei nuamhnak tu ah kan kawl tawn. Vawilei nih a kan pek mi nuamhnak cu lawlawse, chit khat ca lawng a si. cucaah cun a hmun mi hnangamnak, lomhnak a ngei tu pa sin tu ah kawl deuh hna uhsih.

Vawilei Rumnak ah hin hnangamnak le lawmhnak kan hmu kho maw? Vawlei rumnak in hnangamnak cawk khawh a si lo zia kan pawng kam I thil a si mi in theih khawh asi. Mirum pa nih cun rum chinchin kha a duh, ai lung si kho bal lai lo, a ngeih cia mi a chawva lila nih nuamhlonak, lungretheihnak  tu a pek. Security aa chiah hna, damiah(robber) nih maw ka taih sual lai ti ah. Tam deuh a ngeih ah tam deuh a lungre a thei ve, rumnak ah hnangamnak a um hrim lo.

Ka bia dongh nak ah kan cawn mi fimthiamnak, rumnak hna hi pathian tih nak, kan mah ca I thil ttha tuah nak, inchungkhar caah, kan hawi le kom caah, midang caah hmang hna usih. Kan fimthiamnak cu Pathian chung ah hram kan bunh i  a mah duh mi thil ah kan hman si ah cun mifim pa nih lung cung I inn a sa mi thil chia le tilet nih a hrawh khawh lo bang, harnak, lungretheihnak kan ton tik ah hnangam tein a kan um ter lai.Pathian lawnglawng hi hnangamnak taktak pe kho tu a si. Tuzing Pathian bia in thazang kan I pek nak cu Pakhat cio nan cung ah Pathian nih thluachuahnak kan pek piak ko seh! A men!

Saya Khen Lian Thang

Asia Pacific Nazarene Theological Seminary

Manila

Dear PCCF Hawi le hna,

                                  Bawipa nih damnak le caantha caan sunglawi, a thawhthan niceu dawh a kan phakter than i a hmasa bik ah kan Biakmi kan Pathian a min kan thangthat. Cun, tuzing ah a hleice in lunglomhnak van chim ta ve ka duh. Pathian nih Robert Tum Mang Ling cu damnak a pek i a cawnmi cungah, hlawhtlinnak, teinak (Ph.D) a kan hmuh piak caah Pathin min kan thangthat ko, cun a mah cung zong ah lunglomhnak tampi ka ngei, hmailei ah Pathian nih ram le miphun caah a fimthiamnak hmanghram ko seh. Cun kan president Pastor Beirona zong Pathian nih operation ai tuahnak ah a umpi i dam tein sizung in a chuak kho cang i Pathian min ka thangthat fawn. Cun, tuzing i thlarau ti le rawl a kan pe tu Pastor Charles Cung Bik Thawng cung ah kan i lomhnak a sang chinchin. A mah hi Union Theological Seminary ah M.Div final year a kai lio mi asi, a rohhlan ah M.Div degree a kan lak piak tu ding asi. Pathian nih a min sunpar liannganhtertu ah le a ram kauhnak caah hmang chin lengmang ko seh.

Moderator

!!BAWIPA I BOCHAN NUN!!

(Psalm 20:7-8, Phi.4:12-13)

   *!!Salm 20:7-8“Mi a cheu nih an raltuknak rangleng kha an i bochan i a cheu nih an rangtum kha an i bochan hna; sihmanhsehlaw kannih cu Bawipa kan Pathian thawnnak kha kan i bochan. Annih cu an ril lai i an tlu lai, sihmanhsehlaw kannih cu kan tho lai i fekte in kan dir lai.    *!!Filipi 4:12-13“Herhbau in um kha zeidah a lawh ti ka hngalh, cun a hlei a hluat in ngeih kha zeidah a lawh ti zong kha ka hngalh. Cu caah, khua zei ka hmanh ah, zei tik caan paoh ah, ka paw a khim ah siseh, ka rawl a tam ah siseh, tam tuk ka ngeih ah siseh, tawm tuk ka ngeih ah siseh, hnangam te in um kha ka thiam cang. Khrih nih thawnnak a ka pekmi thawngin zei thil hmanh hung chuak hna sehlaw ka ton khawh ko hna.

*President Obama thimnak i aa cuh lio, cun thim a vun si ka hrawngah mi cheu khat nih cun IN OBAMA WE TRUST tiah an tial. US tuanbia kan zoh tikah an phaisa IN GOD WE TRUST tiah an tial i, cucu Khrihfami nih kan uar ngaimi a si. Pathian kan i bochan an timi nih thluachuah a donter hna, kan ti. Nain, mi tampi nih Pathian bochan loin minung an i bochan. Pathian hmunhma an pe ti lo. Minung bochan hi a palh hrim lo, Pathian kha kan i bochan bikmi a si chung paoh cu. Salm catialtu nih cun Pathian aa bochanmi le anmah thawnnak aa bochanmi hna an i dannak kha fiang tein a langhter. Anmah thawnnak aa bochanmi cu, harnak an ton tikah an tlu, an ril. Nain, Pathian aa bochanmi cu fektein an dir kho ti a si. Pathian kan i bochan ahcun fek tein kan dir kho ve lai, harnak kan ton hmanh ah.Thlacamnak he Bawipa I bochan locun lam palh fawi I minung nunnak tiang rawkral khomi a si.Cu si caah Bawipa a bochan I a nunnak caah teinak a hmuh khawhnak ding thlacam pengmi zumtu ttha kan si hi a herh tukmi a si. Bawipa a bochan I thla a cammi caah cun harnak tete zongah intuar khawhnak thazaang an ngei peng., Pathian nih inkhawhnak tu a ka pek, tiah kan ti. Pathian kha i bochan in thla kan cam tikah kan cammi kan hmuh lo hmanh ah, i lungsi khawh nak, inkhawhnak thazaang a kan pek. Cu nih cun fek tein a kan dir ter. Nain, Pathian aa bochan lomi caah cun, harnak ton tikah tlukrilhnak a si colh. Kan hnulei ah BBC news ah ka relmi cu German mirum taktakmi (millionaire) hi nai vawleicung sipuazi a tlak ruangah, sunghnak nganpi a tong i, a celh lo i, amah le amah aa that (suicide). Inkhawhnak thazaang a ngei lo, harnak a ton dikah. A dang, mah bantuk cu a tampi rih, vawleicung tuanbia ah. Paul nih cun Filipi Khrihfabu sinah ca a kuat hna tikah “Khrih nih thawnnak a ka pekmi thawngin zei thil hmanh hung chuak hna sehlaw ka ton khawh ko hna” tiah a ti. Hihi Pathian aa bochan caah a si. Pathian aa bochan caah Pathian nih thawnnak a pek i, cu thawnnak thawng cun zei thil a ton hmanh ah, harnak a si zong ah, lawmhnak a si zong ah, a ton zia a thiam. Filipi Khrihfabu sinah ca a tial tikah amah cu thonginn chungah a um lio a si. Harnak a ton lio caan ah a tialmi a si. Paul nih Pathian i bochan hlah sehlaw, inkhawhnak a ngei hnga lo. Pathian aa bochan caah, Pathian nih thawnnak a pek i, midang thazaang pe khotu dirhmun tiang a phanhter. Hi vawleicung a si caah, kan lungretheih caan a um lai, kan lunglawmh caan a um lai, kan hlawhtlin caan a um lai, kan hlawhtlin lo caan a um lai. Paul nih thonginn chungin Filipi Khrihbu cu ca a kuat hna i, a timi hna cu: zei bantuk caan hmanh ah a nunzia ka thiam cang ee, Khrih nih a ka pekmi (minung pekmi a ti lo) thawnnak thawngin zei thil paoh ka ton ngam, ka ton khawh ko, a ti. Salm catialtu nih Pathian aa bochanmi cu fek tein an dir kho a timi le Paul nih Pathian pekmi thawnnak thawngin zei thil hmanh ka ton khawh ko, a timi hi pumpak cio nih a thar in thazaang i lak hna usih. Bawipa kan i bochan chung paoh cu fek tein kan dir kho peng lai. Hla phuah thiamtu nih cun, Raldohnak le ngaihchiatnak rili bang lian ko hmanhseh Jesuh thawngin hodah a kan tei hnga.Teinak luchin kan hmuh cio lai, a ti bantuk in Pathian kan i bochannak thawngin vawlei ah teinak kan hmuh pinah vancung ram zong kan co te lai. Cucu philh hna hlah usih. Bawipa I bochan cu kan hlawhtlinnak le kan thluachuah hmuhnak lampi an si zungzal.Bawipa nih kan caah thluachuahnak kan pe piak ko she..A Men..

Pastor Charles Cung Bik Thawng

Union Theological Seminary

Cavite