Christmas Lungput lak ah ka uar ngai mi
“Lungput Pakhat”
Rev. Dr. Za That
Bible Caang Thim: Matthai 2:14, Josef cu a tho i ngakchia le a nu cu Izipt ram i zampi awk ah zan ah khan a thawhpi hna.
Biahmaitthi: Laimi nih kan ngeih mi puai lak ah a sunglawi khun mi hna cu Christmas le Thawnhthan hi an si. Cu hmanh ah cun Christmas hi kan inuam khun. Philippines ah cun October thla cheu cun Christmas hla an chuah le Christmas thlam a len ter cang. Kan nih laimi tu cu December nikhat a hung chuah bak in Christmas thla kan phan kan ti le zei kan tuah mi paoh ah Christmas thlam kan len ter le kan langh ter ve. Kei le bang cu December a hung chuah bak in cun kan ram le kan khua, kan Khrihfabu ngaih a zual khun. Kan no lio can ah cun hawi he ram kan riak, sur kan hrawng le zankhua dei khuasih zong kan thei lo. Zudawn hna kan van riah i zan khuadei pheikalh or cep kan ven cu a nuam hringhran ve mi pakhat ah ai tel mi a si. Cu vial te cu ram dang ah hmuh khawh lo mi le tuah khawh lo mi an si hna le Christmas can ah hin cun lung a leng khun i khua lei le chungkhar cu ngaih a um khun ko. Hi lunglen can theng le khua lei ngaih lio can theng i Online sermon ka van tinco ve cu pathian min ka thangtthat. Ttuanvo ngeitu PCCF upa hna nan cung ah lunglomhnak bia ka vun chim fawn.
Kan Sermon chung ah van lut colh ko hna uish law, Christmas lungput hi a phunphun in an chim tawn. Herod lungput, Minfim hna lungput, Mary lungput, Josef lungput, Tukhal hna lungput ti bantuk in sermon ah ka theih pah tawn. Tutan ah hin a ho lungput tiah chim awk zong ka thei setsai na lo pi khin Christmas lungput lak ah ka uar ngai mi lungput pakhat ka hei ti ve phawt ko le cu lungput cu van ruat cio in van sut hlam tuah hna usih!
Voikhat cu pakhat pa rap a chiah cuahmah ti a si. A chiah cuahmah lio ah cun mi pakhat a ra le, na rap chiah cu a awh maw ti ah a van hal an ti. Rap a chiah cuahmah mi pa nih cun, na hrut maw rap chiah lio ah cun zeitindah awh seh na ti tiah aw hrang ngai in a van leh ve ti a si. Mipa nih cun a van leh ve tthan mi cu “na rap cu na chiah lio i a awh lo ah na luah hnu ah maw a awh te ne lai” tiah a vun ti ve tthan an ti. Hi hna pa 2 bia halnak le bia lehnak hi a biafang in thlir i nang maw kei ti in i al ah cun i tei awk ah a har ngai ding khi a si.
Bawi Jesuh chuah lio can ah khan Heord nih kum 2 tang ngakchia caah mi lurelnak a tuah ding mi le a thah dih hna ding kha Pathian nih a rak hngalh cia cang. Mi khamhtu Jesuh zong cu thah ding ah ai tel ve. A ruang cu kum 2 tang hngakchia a si ve ruang ah a si. Jesuh thah lo ding in luat ternak lam hi Pathian nih hin a phunphun in a tuah khawh ko lai dah. A duh ah cun Herod zong kha a nunnak tiang hmanh a lak khawh ko. A duh ah cun Herod lungput zong a thlen khawh le a rian zong in a dinh ter khawh. Nawl ngei lo zong ah a chiah khawh ko. Herod teinak ding caah Pathian nih zei paoh a tuah kho ko nain dohnak le teirul icham in nang maw kei tiah rian a ttuan lo. Herod teinak ding caah Pathian hriam nam ttha bik cu Herod hrial kha a si, Matt. 2:14 ah kan hmuh ban tuk in “Josef cu a tho i ngakchia le a nu cu Izipt ram i zampi awk ah zan ah khan a thawhpi hna”. Herod a hrial ter hna tik ah Herod nih Jesuh cung ah le a nu le a pa cung ah fahnak le rawhnak zeihmanh a ttuah kho lo. A donghnak ah cun Pathian nih Herod cu a tei i Jesuh cu vawlei ah Bawi bik ah a hung cang. Mi vial te Khamhtu ah a hung cang. Jesuh Khrih cu Bawipa a si (Filipi 2:11).
Mi bu pakhat a si lo ah Khrihfa bu chung i rian kan tuannak cio le kan tthut kan dirnak cio ah hin mi dang he ihua hlah usih, dawntu si hlah ning, mi dang thil rit si hlah ning ti kan duh ah cun piahtana (problem) a si ding mi thil tuah le ttuan le bia chim hna khi Josef le Mary nih Jesuh he Herod an hrial bantuk in hrial khawh izuam hna usih law Pathian duh ning a si deuh ko hnga lo maw tiah ka ruat tawn. Nang maw kei tiin kan i entainak le tthawn le nawl ngeihnak (power) kan icuhnak nih hin kan khua le kan Khrihfa bu hna ah hin damlonak le rawhralnak hna a chuah pi tawn. Tahchunnak ah Khuabawi nai cuh ruang i nan khua a dam lo le a zawt peng ding ah cun khuabawi cuhnak khan chuak law zam diam ko. Senior Pastor nai cuh ruang i na Khrihfa bu a dam lo peng ding ah cun senior Pastor cuhnak khan chuak law zam diam ko. Founder le president si nai cuh ruang ah bu tthen hmalnak le dohkalhnak a chuah ding ah cun nangmah tu kha i phet diam law zam diam ko, hrial diam ko hna. Nangmah he ai cuh mi hna an dam le khua mi le Khrihfa bu an tthat kha ilawmh awk a si ko. Nangmah an raltu le an duh lo tu hna zong an ziamh caan le an tha a dih caan le an dongh caan a phan ve te ko lai. Caan nih bia a chim ve tik ah cun nangmah kha Khuabawi, President le Senior Pastor ah an in hlam caan a um ve te ko lai. Cu tikah cun daihnak le remnak, dawtnak le zawnruahnak a karh lai. Na rian ttuannak cu a ngan chin lai i na ram cu a kau chinchin lai.
Pathian nih khan Herod kha rak dodal in Jesuh luatnak ding caah lam dang rak kawl seh law piahtana phun dang in a chuak kho tthan men. Lehrul lo le dohdalnak um lo tein a hrial tu in a hrial ter ziar hna tik ah Jesuh Khrih cu Bawipa a sinak le mi Khamhtu a sinak tu ah a lam a tluang. Vawlei teitu ah Pathian nih tthawnnak a pek. Herod tu kha lung rethei in vansang a laam. Jesuh teinak ding ah zeihmanh a tuah kho lo. Cu caah cun sawm kan duh mi hna cu Christmas caan nih hin “Mi Dang Kianhkhawhnak, Hmunhma Pekkhawhnak le Hrialkhawhnak Lungput” hi kan ngeih ter cio seh law cu nih cun kan ram le kan miphun, kan Khrihfa bu a dam ter deuh hnga maw, a tthawn ter deuh hnga maw tiah Christmas Lungput lak ah ka uar ngai mi Lungput Pakhat ti in tlang ka tar duhnak le ruah tti aw ah kan sawm duh mi hna a si.
Christmas Lomhnak le Hnangam Daihnak cu nan dihlak cung ah a thar in tlung ko seh. Amen!
No comments:
Post a Comment