Christmas Thawngtha
By Dr. L. Van Cin Thang
Luke 19:10 “ Zeicatiah Mi fapa cu a tlaumi kawl awk le khamh awkah a ra,” tiah a ti.
Luke 2:11 “ Tu zan hrimhrim ah hin David khua chungah nan Khamtu kha a chuak cang- Khrih Bawipa cu!"
Japan ah atu bantuk caan December thla ahhin Television interviewer pa pakhat nih lam ah aa chok mi hna kha interview a tuah hna ti si. Ngaknu pakhat nute cu a dir ter i, “Christmas timi sullam hi zeidah si” tiah a hei hal. Ngaknu nute nihcun nih pah buin.. “aaa… ka theih ve lo, Jesuh thih ni khi si ko lo ma?” tiah a leh ti si. Chim duhmi cu Christmas sullam hi kan hal cio hna sehlaw, a sullam kan hrilhfiah ning le kan langhter ning aa dang cio men lai dah. Atawinak in cun, Christmas timi cu Pathian nih vawlei mi a kan khamh ni tiah kan ti khawh. Zeitiahcun kan caah Bawipa Jesuh vawlei ah a rat ruangah nunnak le khamhnak pe kan si. Cu caah Christmas timi zeidah si timi nakin zeitindah kan hman, kan cohlan timi hi abiapi deuh in ruah a hau tiah ka ruah. Cun Christmas kan ti tikah kan Bawipa Jesuh Krih a chuahnak kong lawnghi a sawh duhmi siloin a thihnak (mission of the cross) zong hi a phuan chung chih cang. Christmas carol hla kan sakmi hna zong hi Cross mission phuan pakhat a si ve. Tu zingah thazang ilak tti dingin ka duhmi cu: David khua chungah a chuahmi Khamtu Bawi Jesuh (Luke 2:11) nih a rak kan phorhmi thawngtha/ laksawng tampi lakah pahnih kong hi a si. A pakhatnak ah;
Kawlnak: Kan Bawipa Jesuh vawlei ah a rat lai nak kong hi Bible chung profet cheukhat (Isaiah, Jeremiah, Hosea) nih BC 700 hrawngah an rak chimhchung cang. Zeitiahcun Pathian nih vawlei mi khamh awkah timhtuahnak a rak ngei cia cang. Paul nih a timi cu “Sihmanhsehlaw caan cu a hung phak tikah, Pathian nih A Fapa kha a run thlah. Nu chung khan a hung chuak i Judah mi Nawlbia tangah khan a um, cu cu Nawlbia tang i a ummi hnakha luatter awk le kannih kha Pathian fa i canter cak caah a si (Gal 4:4,5). Hika i “caan a hungphak tikah” timi nih a langhter mi cu Vawlei pi hi Pathian khamhnak kan herh cang, Khamtu kan caah chuah a herh cang, a tlaumi kan si,” ti hi a si. Atlau mi thil cu kawltu um locun va tlau thai ding khi a si hnga. Tlau timi cu “um nak ding hmun ah um loin hmundang pi ah va um khi” a si ko. Phundang in chim ahcun kan umnak le sining ihngalh lo khi a si. Kawltu ngeilo le a tlaumi ka si lio caanah kan mah kawl awkah Bethlahem ah Bawipa Jesuh a hung chuah. Cucu Christmas kan timi cu a si i, kan caah thawngtha nganbik a si. Cucaah Unau hna, a kan kawltu he kan i ton hi a biapi ngaingai mi a si. Jesuh kanmah kawl awkah vawlei ah a rak tum nak hi kumsau pi a si cang ko nain nihin nitiang a hman (valid) zungzal mi hi kan caah thawngtha nganbik a sinak cu a si.
Khamhnak/Nunnak: Jesuh vawlei ah a rat cu kanmah kawl awk lawng siloin zungzal nunnak pekawk le khamh awkah a si (Luke 19:10),Pathian fa siter awkah a si. Jesuh nih “Midingmi hna kawl awkah siloin misual mi hna kawl awkah le kham awkah ka ra” a ti. Misual mi hna khamhnak kan hmuh mi hi Christmas i a muru te cu a si. Kan Bawipa Jesuh vawlei ah a rak tum i, Bethlehem khua aniam biknak hmun cawrawl einak kuangah a chuahnak nih kan tuanbia a thlen pinah vawlei pi tuanbia zong a thlen chih dih. Kan tuanbia thatlo mi vialte (zeitik hmanah khamhnak a hmuh kho ti lo dingmi dirhmun) a kan thlen piak dih. Muinak in ceunak ah a kan chuahpi. Ruahchanhnak a kan pek. Kan caah Khamtu a hung si i, nunnak thar (zungzal nunnak) a kan pe tu a si. Cu khamhnak a kan petu kan bawipa Jesuh Krih cu a ka khamtu bawi a si tiah kan cohlan taktak lawngah nihin Christmas hi kan caah sullam le man a ngei hnga.
Dawtmi unau hna, hi ni caan sungluai mi, kan Bawipa Jesuh chuahnak ni caan hi holiday in maw kan hman deuh awk si, holy day in maw ti hi tuakawk ngaingai a si. Pathian fa le pawl caah, hi nicaan hi caan sungluai bik ni a si bantukin thil dang nakin kan Bawipa Jesuh cu kan thinlung ah hmunhma thabik (first priority) pek i kan conglomh awk a si. Kan upat awk a si. Kan caan, kan ruahnak le kan nunnak zong a thiangmi Christmas lungput he hman khawh izuam cio hna u sih. Christmas lungput timi cu Khrih lungput ngeih khi a si ko. Cucu “ Pathian nih an(Josep le Mary) mang ah Herod sin i kir ti lo ding i, lam dangin an ram ah kir than dingin a rak chim hna (Matt2:12) bang khan kannih zong nunhlun kha kaltak i Khrih ah nunnak thar (II Cor 5:17) ngeih ding khi kan si ve. Thlarau thazang thar ilak ding kan si ve. Kan Christmas lungput cu Pathian thlarau nih a hmun a rolh zong a herh. Cun Pathian fa le caah cun Christmas hi December thla theng te lawng ahhin siloin nifatin te’n a si awk zong a si fawn.
Nihin kan Bawipa Jesuh cu nang le kei kawl awkah le khamh awkah a sangbiknak hmun in a niambiknak hmunah rak tum riangmang i thawngtha/laksawng a rak kan phorh mi cu pumpak pekchanhnak he conghlawmh cio hna u sih. Paul nih a kan timi cu “ nifate in pei ka thih deng lengmang ko hi”( I die daily) (I Cor 15:31). Jesuh caah nifa te in nun hi Jesuh caah kan laksawng sungbik pakhat a si ve. Kan nunnak ah kan herhbik mi cu a zeidang nakin Khamtu Bawi Jesuh hi a si. Catial thiampa pakhat nih a ti mi cu “Minung nih kan herh bikmi hi seh lei thiamnak (technology) a si ahcun Pathian nih Scientist hna a rak rat ter hnga i, phaisa a si ahcun chawleh thiammi (economist) hna a rak rat ter hnga. Sihmanhsehlaw misual nang le kei nih kan herhbik mi cu Khamtu a si caah Pathian nih a kan Khamtu Bawi Jesuh a rak kan peknak hi a si”. Cucaah dawtmi u le nau hna, Pathian nih a kan pekmi sungluai bikmi laksawng a fapa Jesuh Krih cu pumpak in a cohlan mi ca lawngah sullam a ngei i, nunnak taktak a si caah thinlung le nunnak dihlak in cohlan hna u sih. Conghlawmh cio hna u sih.
Nan dihlak cungah Christmas lawmhnak le deihnak um ko seh!
No comments:
Post a Comment