By Maa HliapMatthai 22:37-40
Feb 14 cu vawlei cung ram kip nih Valentine’s day tin min an pekmi ni a si. Valentine’s Day cu, kan theih cia bantuk in, nungak le tlangval pawl caah cun special day bak a si. Hi ni a phak ah hin cun nungak tlangval aa duhmi cu chim lo, darling ngei lo mi pawl hmanh hi kan lungthin cu a zeiti maw tein a rak um cio ve ko. Hi ni ah hin pakhat leh pakhat an dawtnak langhternak dingah laksawng maw, biazia dawhdawh in maw, etc.. an i pe tawn. Asinain hi ni ah hin zeibantuk laksawng tha, sui, ngun, biazai an si zong ah, lungthin dihlak le nunnak taktak in langhtermi dawtnak tluk i a man sungmi an um lai lo.
Valentine’s Day hrimhrim hi zeitindah a rak i thawk ti zoh hmanh uh sih:
Kumzabu pathum lio ah, Rome Siangpahrang Claudias II nih 'Nupi ngei ciami mi ralkap nakin nupi ngei rih lomi tlangval pawl hi ralkap caah an ttha deuh' tiah a rak ruah. Cu caah a ralkap pawl kha nupi ngeih a thlauh hna. Tlangval a si mi ralkap paoh nupi ngeih a ngah loh tiah nawl a chuah. Cucu tlangbawi Valentine nih, "hihi a ding lo mi a si" a ti i, a thli tein ralkap pawl caah biakinn ah tthitumh thlacamnak a tuahpiak tawn hna. Cu ti Tlangbawi nih a thli in thil a tuahmi kha siangpahrang nih a theih tikah, Valentine cu thong a thlak i a thah. Mipi caah nunnak tiang pek ngam in zawnruahnak, dawtnak lungthin a rak ngei mi St.Valentine philh lo nak caah Feb-14 cu Valentine’s Day tiah ti a si. (Note: Valentine’s Day kong hi tuanbia phun in an chimmi dang zong a um ve).
Kan nunnak ah dawtnak hi zeitluk a biapit ti hi kan theih cio ko lai. Dawtnak lo in a nung kho mi kan si lo. Dawtnak in zeithilpaoh kan tuah khawh dih. Asinain, I John 3:18 nih cun, “kan i dawtnak hi hmur le kaa lawnglawng a si awk a si lo, dawtnak taktak, thil ti nak ah a lang mi dawtnak a si awk a si” tiah ati. Cucaah dawtnak kan ti tik zong ah hin hmur le ka in a chuak sawhsawh mi si lo in, mit hmuh kuttongh in a lang kho mi dawtnak langhter ding hi Bible nih a kan fial deuhmi cu a si. St. Valentine nih a rak langhter mi dawtnak cu thil ti nak in a rak lang mi dawtnak a rak si. Cubantukin Pathian nih a kan dawtnak zong hi hmur le ka lawng in a kan chimh si lo in a fapa ngeihchun pek nak in zeitluk a kan dawt zia a rak langhter. John 3:16 chungah, “… Pathian nih vawlei hi a dawt hringhran caah a Fapa ngeihchunte kha a pek, cucaah amah a zummi paoh cu an thi lai lo , zungzal nunnak an ngei lai” tiah ati. Zungzal nunnak ka co nak hnga fapa cu kan caah pek asi. Kei mah ca lawng ah a si lo kan dihlak caah a si.
Rom 5:8 zong ah, Paul nih hi kong hi fiang tein a tial ve, “ Asinain Pathian nih cun zeitluk in dah a kan dawt kha hitihin a langh ter: kannih cu misual kan si ko rih lio ah khan Kri cu kan caah a thi” ati. Pathian nih zeitluk in dah a kan dawt ti mi hi a thisen in tehte a piah. Hawidawt nangtah mi cung i dawtnak na ngeihnak hi zeitindah na langhter ve lai? Biathiam sawhsawh le holh thlum chimthiam sawhsawh in maw na langhter lai, asiloah na nunnak in dah? Zeitindah kan langhter lai ti cu a cungah ka rak langhter cang bantuk in Bible nih fiang tein a kan cawnpiak ko. Nifatin kan nunnak ah Pathian kan dawtnak siseh, kan minung hawi kan dawtnak dihlak hna hi biathlum le holhthlum chimthiam sawhsawhnak in si lo in kan nunnak hrimhrim in langhter ve ding a kan cawnpiak. Matthai 22:37-40 zong nih, “ Bawipa na Pathian cu na lungthin dihlak le na ruahnak dihlak le na nunnak dihlak in na dawt lai, ti hi a ngan bikmi le a biapi bik a simi nawlbia cu a si. A hnu changtu biapi bik nawlbia cu…. Na innpa cu nangmah naa dawt bantuk in na dawt lai” ti a si. Lungthin dihlak le ruahnak dihlak in Pathian dawt ding le innpa dawt ding timi hi kanmah tuah ding mi a si. Pathian cung ah le kan innpa cung ah lungthin dihlak le ruahnak dihlak le nunnak dihlak in dawtnak kan langhter khawh asi ah cun cu vialte hna cu a mah Pathian min sunparnak ah a cang lai. Cutin dawtnak kan langhter khawh ah cun kan family chung zong ah lawmhnak a khat lai. PCCF chung zongah hmur le ka sawhsawh si loin lungthin dihlak le nunnak tiang in a lang khomi dawtnak kan langhter khawh a siah cun Pathian thluahchuah kan dong chin lengmang ko lai.
Ka bia donghnak ah, Valentine’s Day ah hin hawidawt nang hi dawtnak co tu na si. Pathian nih an dawt, a dawtmi na si . Pathian sin in a ra mi dawtnak hi vawlei dawtnak bantuk a si lo, hmur le ka ii dawtnak sawhsawh zong asi lo, nangmah le keimah nih thatnak kan hmuhkhawh nak dingah nunnak tiang a pe ngam mi dawtnak asi. A tuah Pathian kan dawtnak ah siseh, kan minung kan dawtnak ah siseh, PCCF kan dawtnak vialte hna hi lungthin dihlak le nunnak tiang a pe ngammi dawtnak siter ve hna uh sih ti sawm bu in ka bia ka donghter.
No comments:
Post a Comment