DANIEL NUN IN CAWNAWK
By Hniang Uk
Daniel 1:8 “…..siangpahrang nih a ka pek mi rawl le zu hin kaa thurhnomh hrimrhim lai lo…….”
Kan ram a si lo mi, kan phanh bal lo nak ram kan phanh tik ah, holh aa dang, nun can ziaza aa dang, ei din aa dang, upadi aa dang, a tam u cu aa dang dih. Pathian kan zumhnak le kan pom ning zong lam a kan pial ter sual lai ti hi phan a um ngaingai.
Babylon siangpahrang Nebukkhadnezzar nih Jerusalem khuapi a tei, a lak tik ah mino cheukhat pawl cu Balylon lei ah an kal pi hna, cu hna lak ah Daniel zong aa tel ve. Babylon an va phanh tik ah Daniel caah thil thar long te a si cang. Daniel le a hoi le pawl cu Siangpahrang inn ah duh poh in ei din khawh nak, siangparang ei din mi kha ei khawh ve nak nawl an ngei. Zeihmanh phan awk um lo, duhpoh in um ding, ei ding khi a si ko. Sihmanhsehlaw, Daniel nih cun “ siangpahrang nih a ka pek mi rawl le zu hin kaa thurhnomh hrimrhim lai lo” a ti.
Nu le pa, chung le khat um ti lo nak ram, kan khrihfabu he kan i hlatnak ram hna kan phanh tik ah tukforhnak phunphun a ra: na chung le an in hmu lai lo, zeihmanh poi lo, an tuah cio mi si ko, nangmah nawl si(human right), hi ka ram ah cun sualnak si ti lo, test ve hnik tuah….etc… ti ban tuk a ra cang. Danial zong hi Babylon a phanh ah cun tlangval mino te dakaw a si, duhpoh in siangpahrang inn ah um i, duh poh ei, din cu a nuam tuk ko lai si. Asinain, Daniel cu dingfel tein a um peng. Nikhat ah voi 3 Jerusalem lei hoih in thla a cam peng. Dingfel ten um le Pathian sin thlacam hi aa nuamhnak ah aa ser.
Sy. Dr. Samuel Ngun Ling cu doctor pa nih ca rel tuk ti hlah, na health he aa kaih tuk lo, na ca rel hi i thumh deuh cang tiah instruction a pek nain, aa thumh kho lo i mitkuh sii tu a pek. A mit a ku lai i a ca rel mi aa din deuh la ti nak a si. Ka chim duh mi cu, sy. Ngun Ling i aa nuamh nak cu ca rel le ca tial kha a si. Philippines um mi PCCF kan dih lak hi sianghngakchia longte kan si ban tuk in kan i nuamhnak cu ca rel, ca tuah le ca tial ah hin ser hna uh sih. Kan i nuamhnak hi a dang si ter hlah uh sih. Daniel nih siangpahrang nih a ka pek mi rawl le zu hin kaa thurhnomh hrimrhim lai lo a ti bang in, kan pum a thurhnomh ter tu a si mi pawl kha hril khawh i zuam hna uh sih law, dinfel le Pathian sin thlacam bu in nun khawh i zuam hna uh sih.
Pathian nih thluachuah in pe ko hna seh.
No comments:
Post a Comment