Biak Zungzal Awk Asi mi Pathian

By Tluang Peng

Baibal Cangthim : Rev. 14:6-7

Ruahtiawk Biatlang hna:

1. Zungzal Phuan Awk Asi mi Thawngtha (v. 6)

2. Zungzal Biak Awk Asi mi Pathian (v. 7)

Baibal Relnak

Vawlei cung mi vialte, phun kip, ram kip, holh kip le mi kip sin i thanh awk a simi, zungzal Thawngtha aa phorh i vanlai i a zuangmi vancungmi pakhat kha ka hmuh. Aw thang piin, “Pathian kha tih u law a lianhngannak kha thangthat u. zeicahtiah amah nih minung vialte bia a ceih hna lai caan kha a phan cang. Van le vawlei le rili le tiput a sertu kha bia u,” a ti. (Rev. 14:6-7)

Biadomhnak:

Chan nih a kal pi bantuk in vawlei cung ah Khrihfa hna kan biaknak hi a tum chuk chin lengmang in ka hmuh. Hlan ah cun zei tluk in dah Khrihfa kan corrupt hi a theih in kan theih atu cun kan mit in kan hmuh khawh cang. Western, Europe tbk ram pawl ah zei tluk in dah Pathian biak an huam lo le mah duhnak ah caan an hman ning pawl zong kan hmuh theih khawh mi asi. Lailei biafang

in kan chim ahcun tlangrian tuan kan ihnek chih khawh lo bantuk khi asi. Kan biaknak hi tlangrian tuan in kan tuan ti ko usih. Kan tuan lo/biak lo zong ah zei poi lo tiah kan ruah. Sual a tam i dinfelnak a kawl tu kan tlawm. Hi ban tuk chan ah zei tin dah Pathian biak hi Khrihfa mi hna nih kan rian si le kan tuah ding si hi kan theih khawh la i kan huam khawh la ti hi biapi ngai ah chiah awk in ka ruah.

1. Zungzal Phuan Awk Asi mi Thawngtha (v.6)

Ka Baibal cacaang thim kan zoh than asi ahcun Biathlam/hmuhnak pekmi asi kan hmuh. Caan donghnak kong he pehtlai in tialmi asi cu kan theih dih mi asi. Caang 6nak ah kan hmuh mi cu “Thawngtha phorh in vanlai i a zuangmi vangcungmi” ti kan hmuh. A phorhmi Thawngtha cu caang 7nak ah khan tha tein kan hmuh. Pathian nih misual a kan dawt hringhran zia fiang te in alang. Hika Thawngtha phuannak nih a ka theihter thanmi cu Neniveh khua i Jonah phuanmi Thawngtha kha asi. Zei tluk in dah Pathian nih misual a kan sian lo ti hi hi Neniveh khuami hna tuanbia zoh hin a faing tuk mi asi. An luatnak ding caah zei dang tuah a hau lo Pathian sinah an sual ingaihchih i kir than kha asi. Rom. 10:14 ah kan hmuh mi cu asinain, an zumh lo ahcun zeitindah a min cu an auh khawh lai? Cunn bia kha an theih lo ahcun zeitindah an zumh khawh lai? Cun bia cu chimh an si lo ahcun zeitindah an theih khawh lai? tiah a ti. Tuchan a rawk cuahmah mi kan chan ah Thawngtha hi kan thutpi sawh sawh ko hnga maw? Nangmah le keimah diriamhnak men ah kan iceih lengmang mi theology kong ahhin maw kan buai peng rih ko lai. Pathian nih a kan duh piak mi teh zei dah asi hnga? Ka sual ti thei ko na in sual chung i a peih cuah mah ko mi hna sinah zei bantuk Thawngtha dah a herh…ti hi teh kan tuak bal maw?

2. Zungzal Biak Awk Asi mi Pathian (v. 7)

Pathian nih tuah hna seh ti a kan duh bik mi cu kan lungthin dihlak le nunnak dihlak i Amah biak/zumh kha asi. Caang 7nak ah kan hmuh mi cu Pathian kha tih u law a lianhngannak kha thangthat u. zeicahtiah amah nih minung vialte bia a ceih hna lai caan kha a phan cang. Van le vawlei le rili le tiput a sertu kha bia u. Atanglei kan zoh chih asi cun zeitluk in dah minung hna kan lungkhon, sual kan duh le Pathian nih zei tin dah a kan tuah lai ti kha kan hmuh. Zeitluk in dah lungrawk a va si Pathian nih luatlatnak a kan pek mi kha kan ilak riangmang i kan mah duh poh i kan hman tik ah zei tluk in dah Pathian a lung a fah hnga? Israel mi hna Izip ram in an rak kir lio Pathian nih Moses nawlbia pahra a pek kar i ami hna nih sui cawfa an biak kha Pathian zei tluk in dah a lung a fah. Moses hmanh nih a lungtlap khuai dih tiang in a tuar. Kha lio i sual ngaihchih in a kir duh lo pawl biaceihnak cu thah/hngawng tan asi. Daniel le a hawi le hna nih Babylon siangpahrang doh in a kan khamh zong khamh lo zong ah Amah cu kan biak ko lai an ti mi Pathian nih meiphu chungin a khamh hna i zumhmi le bochan awk tlak minungah a cawi san hna. Cucu van le vawlei le rili le tiput a sertu Pathian kha asi. Atu ah nang teh zei bantuk Pathian dah na biak? Na biakmi na Pathian nih nitin na tonmi harsat nak in an khamh kho maw? Kan biakmi kan Pathian zei asi ti hi kan theih le ka hngalh hi a herh ngai ngai.

Biadonghnak:

Tuchan ah thawng tampi kan theih. Baible nih a kan chimhmi cu caan donghnak caan kan phan te lai ti asi. Nang le kei Khrihfa nih kan zumh mi cu Pathian Bia Baibal asi i kan nunnak lam a kan hmuh sak tu asi. Thawng tampi kan theih hna – a ra lai ding mi kum tlawmpal ah ni ka nih cu cu a taih lai i vawlei cungah rawhnak a chuah kho mi si tbk ozone a rawh caah kan ni khua a rawh i ni a linh chin leng mang zong kan kut tongh bak asi ko. Micheu nih le caan dongh ti a um lo an ti fawn. Vawlei pi cu irawk tak seh law teh cu cu caan dongh kan ti kho hnga maw? Bia tampi hal ding a um ziah ti cun minung nih hmai lei a cang ding thil a hman te in kan theih cia khawh lo ruang ah asi. Hi bantuk caan lio hin nang le kei teh zei dah kan tuah. Kan thu sawh ko in kan zoh sawh ko hnga maw? Phungthluk I a ummi cu “A good opportunity never come twice” ti asi khah. Hi bantuk in ni kan hmuh lo caan hi phan tak seh law ti na tuak bal maw? Siloah.. ei tam tuk ka rak tuah cang, mi zong tampi ka thlen cang hna tiah maw na ti in na daih ko lai?

Tu ni ah Jonah le Neniveh kong kha tuak than hna usih ti ka duh. Misual cungah zaangfahnak le dawtnak in a khat mi Pathian kan nei ti hi philh hlah usih. Daniel te zei tin dah an luat ti zong kha thei hna usih law Pathian nih zei dah tuah hna she ti a kan duh ti kha philh hlah usih tiah sawm kan duh hna.

Tampi ka lawm………….