Thawngttha Chimtu: Mary Cinzah
Salm 16:2
Bawipa cu kaa thawh i,
"Nangmah cu ka bawipa na si;
thil tha ka ngeihmi vialte hi
nangmah sinin ka hmuhmi an si," ka ti.
Nifatin kan cung i a tlungmi thiltha pawl le thlachuah sunglawi pawl hi cung Pathian sin in a ra mi an si ti cu kan theih cio hna. Sihmanhsehlaw, nifatin kan nunnak ah itheihthan ding, cohlan ding le inunpi ding hi kan philh tawn rua.
PCCF online-sermon ah caan hmannak nawl a ka petu nawlngeimi hna pakhat cio cungah le, abik in, kan biakmi kan Pathian cungah lomhnak tampi ka ngei.
Kawlram ah siahngakchia a zaza a thongthong in kan um. Culakah, mi cheukhat, mi tlawmte hi, Pathian dawtnak pakhat te thawngin Philippines ram ah sianginn kan kai kho hna. Mah bantuk, kan kai khawhnak aruangpi hi Pathian lawng a si timi hi fawi tein kan philh khawh mi a si. Minih ramdang sianginn kai mi tiah a sang in an kan zoh , rualchan cingla nih (kan thiam lo hmanh ah) ca thiam tiah an kan ruah, innchungkhar le miphun nih kan cungah ruahchannak sangpi an i chiah. Mahbantuk pawl nih khan kanmah le kanmah "ka ti kho , ka tuah kho" timi lungput fawite in a kan ngeihter kho i, ramdang sianginn kai khawhnak a hrampi a si mi Pathian dawtnak kha a zeimaw caan ahcun a kan philhter tawn.
Tukum Kharpi kawlram ka va tlun lio ah ka duhbik mi Bible catlang Salm 16:2 kha biatak te caanlak in ka rel manh. A hlanlio ah mi sermon hna ah an rel mi ka theih bal ko nain thuk ngai in le caan pek in ka rak ruat bal lo. Asinain a tutan cu relsawh lawng siloin biatak tein khua ka ruat. Ka ruahnak nih Pathian dah tilocun keimah hi azei taktak hmanh ka si lo, Pathian tel lo cun a zei bantuk man nei mi hmanh ka si lo ti mi hi fiang tein a ka hmuhter. Cuticun Philippines ah rak kir than ding ni a phan. Airticket tiang cawkcia dih si cang, zeipaoh a tlamtling dih cang tiin vanlawngrawn ah ka rak ithawh. Check-in ka vun tuahtik ahcun Malay Air i nawlngei tunih Return ticket na neih lo ruangah vanlawng cung kan in khaiter kho lo an ka ti. Student-visa a dih cang i Tourist-visa in Philippines lutthan ding asi caah Return ticket aherh hrimhrim an ka ti. Airport incun karak chuak i inn ah ka tinthan. Inn ka tinlio, lampi ah ka lungchung te ah a rakchuak micu mah Salm 16:2 kha asi. Ka ruatthan i Philippines kirthan ding ka tuah lio ah, airticket kongah siseh, inn in Airport lei kaa thawh lio ah siseh Pathian hi ka thei hrim lo. Keimah nih tlamtling tein ka tuah kho ko lai ti mi ruahnak ka ngei. Ka cung a phan mi thlachuah vialte hi Pathian sin in ara mi si ti mi kha philh. Keimah nih ka tuah khawh mi si rua ti in ka rak ruah sual. Ka thlachuah vialte hi amah sin in a ra timi kha Pathian nih second pakhat te hmah philhter a ka duh lo caah mah thil ka ton mi hmang in fim aka chimh than.
Mah experience kan share mi hna hi a hmete asi ko hnga. Nain, a hmete in a nganpi tiang ah acangter kho tu kan biakmi kan Pathian, kan thlachuah Hrampi, nih hi keimah ka experience hman in nan nunnak cioah Pathian ruangdah tilocun timi ruahnak voikhat in vun langter hramseh.
Kai Lawm
No comments:
Post a Comment