Marka 10:45
By
Saya Kio Nawl Hmung
“zeicahtiah Mi Fapa hmanh hi, rian tuanpiakmi si awkah ka rat tung lo, midang rian tuanpiaktu si awk le mi tampi tlanhnak ding ca i ka nunnak pek awkah pei ka rat cu, tiah a ti hna.”
Hi bantukin PCCF unau rual he Pathian bia i ruah ti kho ding in damnak le caantha a ka petu Pathian min ka thangthat i PCCF hruaitu (caantlaitu) kan u le cung zong ah lawmhnak tampi ka ngei ti kha vun chim ta ka duh. Tutan ah kan zaa pi i ruah ti awkah ka duh mi cu tangdornak lungput he a rian thiang ah i pum pe hna u sih timi hi a si. Hi Marka thawngtha nih a kan cawnpiak mi cu Jesuh cu riantuanmi le nawl ngei kho ngaimi a si ti kha a langhter. Marka nih Jesuh kong a tial tikah Jesuh a tuahmi kha biapi deuh ah a chiah. Phundangin chim ah cun kan ca i zohchunhawktlak a si nak le a sunpar a liannganhnak (a thiltikhawhnak) kal tak in kan caah pumpek in a riantuannak le a nunnak pekin a kan tlanhnak kong hi a si. Hi kaa zawn ah hin Jesuh a sunpar a liannganhnak kaltak in tangdornak he a riantuanak (tuahsernak) vun zoh ta u sih ti ka duh. “Nannih nih kei cu saya le Bawipa nan ka ti i cucu ka si taktak caah nan ka ti cu a hmaan ko. Kei nan saya le nan Bawipa a simi nih nan ke kan tawl hna ahcun nannih zong pakhat le pakhat nan ke nan i tawl piak awk a si. Nan caah i zohchun awk kan tuahpiak cang hna: nan ca i ka tuah bantuk khan nannih zong nih nan tuah ve awk a si (Johan 13:13-15).
Jesuh nih tahchunnak tha taktak a kan cawnpiak bantuk in kan nih u nau rual tah zei tin dah pakhat le pakhat tangdornak nunzia le lungput he kan i bawmh chanh cio ti hi tha tein pumpak kakhat cio i zoh than hna u sih ti ka duh. Rian tampi lak ah hin kan tuah khawh mi le kan tuan khawh mi aa dang liang luang cio. Pathian nih kan mah le sining cio in thlarau laksawng thil ti khawhnak a kan pek cio. Cu thil ti khawhnak le rian tuan khawhnak a kan pek mi cio in kan taan ti i tangdornak nun he kan i bawmh chanh cio ah cun kan tuah mi thil le kan tuan mi rian kip ah hin teinak (hlawhtlinnak) kan hmuh lai ti cu zaa pi nih kan theih cio mi a si. Caan tampi ah cun kan tuah khawh mi le kan tuan khawh mi rian ah caan pek in le pumpek in a tuan mi kan um bantuk in caan a pe kho lo mi zong kan um ve men lai. John 13:13-15 ah fiang tein kan hmuh bantuk in tangdornak nun he kan mah le tuah khawh mi cio ah i pumpek ding hi Jesuh a mah pumpak hrimhrim in le a tuahsernak in a kan cawnpiak bantuk in kan tuah kan tuan ve awk hi a ka duh piak zung zal mi a si. Cucu a mah fale kan si nak a langhnak a si pinah zaa pi caah thatnak le pakhat le pakhat kar ah dawtnak a karh ter tu a si.
Cucaah, zei thil kan tuah kan tuan poh ah a mah lei pek chanhnak lung put (Khrih nih a rak ngeihmi lungput) kan ngeih awk hi a biapi tuk mi a si. Cucu a mah he nifatin pehtlaihnak (thlacam nun ) kan ngeih lawng ah kan ngei khawh lai. Minung cu a hohmanh tlamtling mi kan um lo bantuk in caan tam pi ah cun kei mah ti mi lungput kan ngeih caan te zong a um men lai. Keimah ti mi lungput ah hin a si khawhnak (positive) lei lungput keimah tel ve lo in cun ti mi lungput kan ngeih ding le mi bawm kho mi kan si ding hi kan biak kan Pathian nih a kan duh piak mi a si. Cucu a fa le kan si nak, pakhat le pakhat dawt nak in a rian thiang kan tuan ti nak a langhnak pakhat zong a si. Mi Fapa cu Pathian sinak (a thil ti khawhnak) kaltak in sal sinak tu kha lak in le mi toiah dor nak lunput (nawlngaihnak) lam kha thih tiangin a zulh (Filipi 2:5, 8). Jesuh cu kan sual ruangah thihnak phakter a si i Pathian he kan i remnak hnga dingah nunnak ah thawhter a si (Rom 4:25). Cucu Pathian nih zeitluk in dah a kan dawt ti kha a langhter: kannih cu misual kan si ko rih lioah hin Khrih cu kan caah a thi (Rom 5:8). Misual, mi palh, mi tlam tling lo kan si ko nain kan that lonak chungin chanh awkah le a mah ta a simi mithiang si awkah le thatnak tuah a duhmi siter awkah, kan caah a nunnak kha a pek (Titas 2:14). Hi a bia thiang ah fiang tein a kan hmuhsak bantuk in kannih cu a mi fa (mithiang), zohchunawktlak si awk le mi zaa pi caah tangdornak (dawtnak) nun ngeih in kan tuah kan tuan ding le kan i pumpek ding hi Pa Pathian nih a kan duh piak mi a si.
Cucaah, upatmi PCCF u le nau hna kan caah zohchunawktlak tangdornun (lungput) ngeih in kan caah nunnakpek tiangin lam a kan hmuh sak tu kan Bawipa Jesuh nun i zoh bu in le pakhat le pakhat dawtnak zawnruahnak lungput ngei bu in kan thin lung kan ruah nak, kan thazang chuah in kan thil ti khawh nak hna hi a mah sunparnak caah hmang hna u sih ti hi kan zaa pi i ruah ti hna u sih ti ka duh. A bia thiang aa hrawm mi pumpak pakhat cio kan caah Pathian nih a thar in thluachuah kan pek piak hram seh. Amen!!!
No comments:
Post a Comment