PATHIAN PENNAK LE ZEIDAH TUAH HNA SEH TI A KAN DUH TIMI TU HI BIAPI DEUH IN RUAT VE HNA U SIH

Tu zing bawipathawh ṭhanzing ah thawngṭha bia hrawmtu nan zapi cungah bawitluachuah a thar in um ko seh! A hlei khun in tu zing thawngṭha a ka cam tu Sayamah Hniang Ṭial ( Ahniang) Cung ah kan i lawm tu tizong chim ka duh fawn. A semon hi na rel ahcun na thinlung ah thlennak pakhatkhat cu na ngei lai ti ah ka zumh, rel hrimhrim ta ti kha ka va in sawm hna.

Mah hi Lai tlangah Pathian rian a ṭuan cangmi a si i a Dau Chim Baptist khrihfabu ah cantling rianṭuan tu pakhat a si ve. Lai nu ah bochan mi a si. Tu lio hi Centre Luzon State University ah Master of Science in Rural Development a kai lio mi ngaknu  te a si. Amah nih can a van lak colh ko lai.

 Pastor Hniang Tial

Matt. 6: 33  " Cucaah zei dang vialte nakin Pathian pennak le zeidah tuah hna seh ti a kan duh timi kha biapi deuh in ruat u law thil dang vialte hna zong hi an pek thiamthiam ko hna lai." (Relchih ding Ps. 14 : 1-3).

A hmasabik ah lam a kan hruaitu Pathian a min ka thangthat. Cun internet thawngtha chimnak caan a ka petu tuanvo ngei nan cung zongah kaa lawm. Pathian nih in hmang chin ko hna seh. Amah balte cu thawngtha hi a tial in ka tial bal lo caah kaa harh ngai te ko. A tlamtlin lonak le ka palhnak a um ahcun careltu nih ka ngai thiam te uh tiah kan nawl hna.

Thawngtha chungah vun lut colh ko hna u sih law, Nihin ah hi Baibal ca cang cherhchan in thawngtha i hrawm hna usih ti ka duh. Hi ca cang ka thiam tikah Pathian bia cu a kau tukmi le a thuk tuk mi a si caah mi tampi nih an chim lengmangmi le kan theih ciami le a phunphun in an chim cio mi a si caah a chungpi purh kaa tim lo ka hnalhnak nih a phak mi zong a si lo, nain kei zong nih ni Baibal cang hi ka nunnakah remind a k ape lengmangtu a si caah ka hun i thim mi a si.

Ni hin ah hin a herhmi cu Pathian sal taktak kan si ding I zum peng hi a si ko. Kan laimi cheu khat kan sining ah a um pah tawnmi cu Lai lei um lio ah bochan pumh a fel ngaimi hna kha, ramdang phanh ahcun zalong tak I um kan hmang. A caan ahcun kan Biakmi Pathian hi Laitlang chung tiang lawng I a ummi Pathian a lo tawn. Nan theih thiam ko lai dah tiah ka ruah. Zeitin dik nan ruah cio hnga?

Phungthluk bia ah an chim tawnmi cu “firtu ningzak lo hmutu ning” zak ti a si, Vawikhat cu Mifir tatak mi, mi inn kam i aa chawhah pang awng in an bih tawn i kan thil a fir sual lai tiah an ven taktak mi pa pakhat a um. Biakinn i Pathian thangthat cu vun chim lo, Biakinn thil hmanh a fir ngam ding khi a si. Vawikhat cu Khrihfabu nih bochan ngaimi, phun dang in chim ahcun ( a hrinthar ) ngaimi khrihfa upa pakhat  nih a cawnpiak , zing fatin zanfa tin a kal hnawh. Mifir pa nih cun kaa lawm tuk hringhran ka rak theih bal lo caah a si,a tu hi zu hna ka ding ti lo fawh, kaa thleng bak cang lai tiah a ti. Khrihfa upa pa cu aa lawmh tuk ah hin Pastor te hmanh nih an thlen lomi keimah nih ka thlawn khawh a ti i, lam a kal hmanh ah khin i lung hmuih tuk kaw van cau nawn in a kal. Thla khat a rauh hnuah Khrihfa upa pa cu a thawh i, thing ka tanmi a um i  ka pa midang nih an ka hal ko nan nangmah kha thing cawk a duh ti ka theih caah ka pe hna lo. Tangka ka pe chung law thaizing ka rak in phorh lai a ti. Khrihfa upa pa nih cun zum tuk kaw Ks.10,0000 a pek. Ni a tam khua a sau i thing ngalh bia a um ti lo. Leiba aniI cawhnak ah mang an tla. A hnuah cun ka pa pek awk ka ngeih lomi cu na ka hal lengmang a ti i chim awk thei loin inn ah a tin. A tu hi an i cawp kho cang maw, cawpmkho lo dik ka thei ti lo.

Chim ka duh mi cu Laimi Khrihfa kan sining le Pathian kan zumh ning langhter ka duh. Ni hin laimi kan Pathian zumhning hi vunchim ningzak a simi minlawng khrihfa tampi kan um. Kan lai nungak tlangval that ha cu, Zarhpi ni hmanh thei lo in motor cycle cungah tlum lo tiangin le Pastor zong zah ngei lo in zalam tlangah an i chawk wine din ah a cheu an kal, a cheu internet, a cheu party ah inn an hrui tikahcun mah hngal loin cycle cung hmanh i thu kho loin a cheu  khawn den tlakruang, a cheu rit ruangah kan nu ngak dawh tete le tlangval no tete cu an lo ko. Choir cawngtu hmanh um setsai a si ti lo. Pathian cu khawika ah dah a um, zarhpi ni le ni lo kan thei lo an ti i, zung ding pawl nih chun ni tlak zu din ni ah an ser, nu le va cheu khat cu zarhpi ni hi an i sik khun ni ah a cang. A cheukhat nih an i thawh i zuding nu zu ding pa Pathian dawtnak a thei deuh cang bang an vun timi hna khi an mah cawnpiakmi an si lo nain, an i thawh i, Egype ram in Isreal ramah na chuah a hau, Egype ram i na um peng ko ahcun na nun a rocar lai Egype ram ahcun thanghnak a um lo Isreal ramah na um hrimhrim a hau an ti ve hna. A cheu ve nih an i thawh i cawnpiaknak kan ngeih a hau ka nun a rocar tuk  khrihfabu nih camp kan tuah piak uh crusade kan auh piak uh tiah an ti hna. Cawnpiak a um taktak tikah kaa manh lo an ti, a cheu a ngai ve mi nih le saya pa cu kong cu kan thei hrimhrim bal lo an ti ve hawi i, an Pastor te i an cawnpiak len ve mi hna cu cawnpiak bal lo tluk ah a cang etc… Hi thil vialte hi Khrihfa ka si aa timi hna chung in a chuakmi thil lawngte an si.

Mi cheu khat cu ramleng ah an fa le an vun phan ram tha deuh an hun um hna, Khuate in khuapi ah, khuapi in Yangon, Mandalay ah tibantuk in an pem hna. Ka nu ka pa rian rak tuan ti hlah uh an ti hna i, nu le pa ve zong nih pheiphah taktak in a um mi an um ve, zing a chuak in lengah zaan a chuak inn chungah, um a har dol i cuh hna u sih, a kik deuh e hunt i ko u sih an ti…biakinn ah i pum u sih vun ti le ka dam set lo eh  an ti an kal le cangka in Vandam khuai kha vun piah tuah an ti colh. Fa le a tangmi hna nih Cycle nan ka cawk piak lo ahcun an ti hna, a bia al cu pakhatkhat a si sual lai ti kan phang i kan cawkpiak ko hih an ti, a thaizan cu sizungah, inn pa chakthlang le Pastor te he phanh dih a si ai,amah mawh maw a si a ho mawh dah?. Laimi cu “Nun san hi kan celh lo”. Nang tah zei level dah na si/ ka si ve hnga? Kan mah tein i chek hna u sih. Ni hin fimnak a cawngmi ramchung ramleng a ummi hna nih kan miphun kan minung pawl caah zei vision dah kan ngeih? Kan tlun tikah lamthar kan serkho hna hnga maw ti ka ruat. laimi Khrihfa hruaitu hna nih tah zeitin dah kan phisin lai. Ruah ngai ngai kan hau.

Ni hin vawlei ah hin hna ngamnak a um lo ti cu chim hau loin, kan mit hmuh le kan hna theih an si ko.  Ps. 14: 1-3, “Mi hrut nih cun an I thawh I Pathian a um lo” an ti,  minung lakah hin a fimmi le keimah a ka biami an um hnga maw ti hngalh duh ah BAWIPA nih vancung khin a run zoh hna a ti. Bawipa nih a kan zoh cio ko.

 U le nau hna kan nun i chek than hna u sih, Keimah pi ti khawh a si ti lo, cucaah scientist  cheukhat hmanh nih Pathian a um ko an ti cang ko tung. Nang le kei tah kan khrihfa nun zetindah kan ser lai. Kan mah tein a hram fek tein kan bunh cio a herh.  Khrihfa a silomi hna nih tamtuk an kan thlau cang. 2010 lio i Japan training kan kai lioah ka hawi nu pakhat ka halmi cu ziah biaknak ngei lo nan tamtuk ka ti, biaknak ngeih a herh lo zeipaoh pei minung nih an tuah dih khawh ko hi a ti, a rauh hlan 2011 chungah harnak fak tak nih a den hna kha kan theih dih ciomi a si. Asinain an nunning kan zoh hna tikah khrihfa mi nakin an nun aa dawh deuh suaimau, an kan tei cikcek cucu al awk tha lo a si. Ni hin khuazakip hmun zakip i kan um cio tikah hin Kan biakmi kan Pathian cupakhat a si ko. Vawlei cung i a thangcho bik mi le minung za lonnak a tam biknak hmun le hma i kan um zongah Pathian aa tel lo ahcun a rawk kho mi a si ko. Cucaah kan nunnak man cu a sung tuk caantha na ngeihmi vialte ah nang na caah zeidah a biapi bik?

 Kan khrihfa sinak a lang lo tuk sual maw? ti hi ka ruat tawn. Hawi dawt nang zeitin na ruah ve. Cuai thlainak ah kan zangtuk sual hnga maw, vun i chek than hna u sih ti ka duh.  Bawi Jesuh  a zultu hna kha  mi nih zeidah an ei lai, nga tlai in an i ngawl hi an ti men ko hna lai, cun an mah zong an chungkhar kong an ruah ah an lungre a theih caan a um ve ko lai, cucaah Bawi Jesuh Matt. 6: 24ff ah zultu hna a cawnpiak hna nak kha kan hmuh.  Cuti ka ti tikah vawlei nunak caah riantuan a hau lo ka tinak si loin kan tuanmi, kan tinmi cungah a mah kha pakhatnak ah kan chiah ahcun kan tuannak cung le kan herhnak cung cio ah amah nih tlam a tlinter ko lai titu hi ka chim duhmi le ka zumhmi cu a si.

Bawi Jesuh Khrih nih a kan cawnpiak mi cu Matt. 6: 33, “Cucaah zeidang vialte nakin Pathian Pennak le zeidah tuah hna seh ti a kan duh timi kha biapi deuh in ruat u law thil dang vialte hna zong hi an pek thiam thiam ko hna lai”. Pathian hi kan har lio lawngah kan Pathian si hlah seh, mifir pa kan lo sual lai tih a nung tuk, a zungzal in a duhnak a kawltu kan si khawhnak hnga thazaang la ti hna u sih ti sawm kan duh hna.

Tlam a tling lomi theihthiam piak buin, A thami a um ahcun Bawipa nih thluachuahnak kan pekpiak ko seh.

Kaa lawm.

Hniang Tail.