Bawipa thawhṭhanzingah thawngṭhabia a hrawm mi zumtu nan dihlakcungah Pathian thluachiah a tharin tlung ko seh! Tu zingah thawngṭha a kan chim tu hi Saya Duh Sang a si.  Ruakhua  khua mi a si, nain Than Tlang ah an chungte in um  mi an si i, Than Tlang Baptist Church ah Pastor a tuan mi a s Asia Baptist Graduate Theological Seminary M.A Th akai lio mi si. PCCF ahcun kan i bochan taktak mi zong a si.Khrihfami nih kan herhmi LBC/ NMT  ti mi he pehtlai in thawngṭha bia an kan chimh caah thazang kan la cio i a pumpak cung zongah kan i lawm tuk. Bawipa nih hmai lei a rianṭuannak ah lam hruai in umpi zungzal ko seh tiin PCCF zong nih thlaza kan cam piak.

 

 Pastor Duh Sang

Khrihfami nih kan herhmi LBC/ NMT

Luke 10:38-42

            Pastor Siang Nawl nih a rak chimmi cu, “Kan nih Laimi cu sainginn kai timh zongah daw hawh kan herhmi a tam tuk le a poi tuk cuh. Kanmah kan kainak dingah school fees bawmh kan hau. Eidin bawmh kan herh rih. Cu hnuah kan chung le tiang zohkhenh kan hau rih. Laimi cu ka herhmi a tam tuk lawmmam le midang nih zohkhenh ding zong ah a fawi lo. Kanmah cawm kan hauh pinah kan chung le cawmpiak kan hau hoi” tihi a si. Cucu a si ngai te. Tuzing ah kan dihlak hrawmti dingah sawm kan duhmi hna cu, “Khrihfami nih kan herhmi” ti kha  a si.

            Zei dah khrihfami nih kan herhmi a si ti kha Luke 10:38-42 nih hin a fianter. Jesuh le a zultu hna khual an tlawnnak in khua pakhat Martha le Mary inn an va luhnak a si. Mary nih tha tein a don hna. An caah a buai. Cu lioah cun Mary cu Jesuh chimmi kha a rak ngai. Cu cungin Jesuh nih zeidah a herh ti kha a langhter. Cu cu LBC in fianter I zuam usih.

            Pakhatnak ah Ngaih (Listening) a si (v.39). Mary cu Jesuh nih a chimmi kha a ngai. Pathian bia kha an nunnak in a ngaih. A ngaihning hmanh hi thut bu bak in a si. Kal pah le dir bu men in a si lo. A thu a ti tikah zeitlukin dah ai biatak, caan a pek, a nunnak a thap ti kha a langhter. Jesuh aw ngaihnak caah caan tenh khawh a biapi tuk. Martha tu cu inn lei hnokhnai ah a rak buai ve. A riantuanmi nih Jesus aw ngai kho loin a tuaiter.

            Pahinhnak cu Manhlo (Busy) kha a si (v. 40). Isabela kan kal lioah kan hawi pa John nih busyness hi business he cawh lo ding a si a ti bal. Busy-ness cu i tuai ngai tung in zei hmanh chuahcanh lo kha a si. Kai manh lo ti ngai tung in zei khuhhliahmi ngai ngeih lo kha a si. Business cu riantuammi kha man ngei lakin tuanchuah kha a si. Maartha hi a busy ko nain a tuanmi hi Jesuh hmaiah business a si lem lo ti kha a si. Kan i manh lo ngaimi hi sullam a ngeih tung lo ahcun thei tlai lo hnahhring si khawh a si. Ai manh lonak hi Jesuh caah a si nain Jesuh he a si lo. Jesuh caah ti le Jesuh he tihi ai dang ngai. Mary cu Jesuh caah caan a hmang lo, Jesuh he tu caan an hmang ti. Pathian caah kan tuahmi nih Pathian he caan hmang kho loin a kan tuah sual khawh ko.

            Pathumnak cu Thim (choose) a si (v.42). Minung hi Pathian mui kengmi kan sinak cu duhthimnak nawlngei kan si hi a si. Ka duhthimnak hi kan zia le kan nun ti-lam siamtu a si. Tilam siam ahcun ti nih a zulh ko. Comuter chungah a ummi kha biakhiahnak kan tuah i kan thimmi kha print kan chuah. Kan thim lomi kha printer nih a print lo. Rev. John Cuai Sang nih, “Satan hi tukforhtu lawng a si, sualtertu a si lo” a rak kan ti. Eve le Adam zong rulpi nih a tukforh hna nain, thei a lawhtertu le an ka chung a sanhtu cu anmah duhthimnak a si. Hika cacang ahcun Mary nih cun a herhmi pakhat kha ai thim cang, cucu a hohmanh nih an chut kho ti lai lo a ti.

            Philippine i kan hong phanh cio tikah hin zei aw dah kan ngaih bik? Kan i manh lonak bik zawn hi zeiah dah a si? Atu ah kan i thimmi zeidah a si?

Nihin kan i thimmi hi hmailei kan nun cu a si ko lai. Midang nih chuh awk tha lomi zeidah nai thim lai.? Kan van a thatnak bik cu thimnak nawl kan ngeihmi a si. Kan duhmi hi kan herhmi an si lem lo. Kan herhmi hna hi kan duh set lomi an rak si.

NMT: Ngaih, Manh lo le Thimnak cu Khrihfa nun ah a herhmi a si.