Jesuh nih mitsur ruang ka si a ka ti

  Jesuh nih mitsur ruang ka si a ka ti!

Pastor Bei Rona

                              John 15: 5 Mitsur ruang cu keimah hi ka si i a nge cu nanmah hi nan si. Ahohmanh ka chungah a um i kei zong a chungah ka um ahcun, amah cu thei tampi a tlai khomi cu a si, zeicahtiah keimah loin nan tuah khawhmi zeihmanh a um lo.               

                               Dawtmi le upatmi PCCF u le nau, ni le far hna nan sianginn kainak le nunnak ah Pathian nih a thluachuhanak he lam in hruai ko hna seh.  kan nunak le sianginn kainak ah harnak le bawinak um ko hmanh seh law Bawi Jesuh he kan i peh tlaih ahcun harnak le bawinak chung in teinak kan hmuh ko lai ti hi ruahchanhnak he kar hlan khawhtu izuam hram ko hna u sih mu.

                           Tuzing i, thawngttha iruah tti dingin ka duhmi cu Kan Bawi Pa Jeusuh nih  Mitsur ruang cu keimah hi ka si a timi te hi ruah tti dingah ka duhmi a si. Hika ah bia halnak a um khomi cu Vawlei le minung vialte khamhtu Bawi Jesuh nih zei ruangah dah Mitsur ruang ka si a ti hnga ti hi a si. A si ngai ko Zei ruangah dah mitsur ruang he ai tah chun hnga ti hi a sullam kawl a ho i, cu sullam nih cun kan nunnak ah thazang ah ilak khawh ding hi a biapi ngai tiah ka ruah.

                          Vawlei cungah hin aa khat lomi hi a tambik  ti a si. Akhat lomi vawlei ahhin kan duhning in  thil zonghi a si kho lomi a tam ngai. Tu ah kan umnak philippine ahhin typhoon um i, rua hna a surtuk tikah rua sur lo dingin thla kan cam lio ah hin Africa ram le india ram cheukhat ahcun rua a sur lo caah ti ei awk hmanh an ngei lo ti hna kha thawng a um tthan ko. Khat lei ah mipa pakhat cu thlakhat ah Million tampi in biaknak a hmuh tiah thawng a um lio ah khat lei ahcun ei awk le umnak an ngei lo timi refugee thawng hna kan theih a tam chinchin. Khat lei ah mei kangh thawng kan theih lio ah khat lei ah tilian thawng kan theih cuah mah hawi. Cucu kan vawlei sining ah a cang ko cang.                       

                        Mitsur a sining taktak kha mifim nih an tuahtan tikah an chimmi cu mitsur hi a kiknak le a linnak, vawlei nawn a tthatnak le vawlei nawn a tthat lonak ti in thleidannak ngei loin a tla i, a thang kho i, tlai khawhnak dir hmun a ngei  an ti. Cucu ka zumh ngai. kawlram a linak hmun Pyinmanaa ah khin mitsur a tam ngai, cun tuhi kawlram ah a kiknak ah ai tel vemi hakha ah khin mitsur a ttha ngaingai. 

                       Bawi Jesuh nih Mitsur ruang ka si a ti tikah hin keimah he nun nan ihrawm ahcun asiloah keimah he nan nun aa pehtlai ahcun nan nunnak ah harnak le bawinak um ko hmanh seh law tei khawhnak nun thazang nan ngei lai ti hi a si. Vawlei ah chikhat kan nun lio can ahhin Jesuh he nun ipeh tlai hi a biapi ngai. Jesuh he nun aa peh tlaimi hna nun taktak ahhin vawlei harnak nih a kan tlun sual can ah teikhawhnak thazang le ruahchannak kan ngei khawh. Lawmhnak in lei thluachuah kan tin co can zongah a lawmh zia le a nunzia ttha a kan hmuh sak fawn.

                       Amah Jesuh he aa pehtlaimi hna cu mitsur bantukin vawlei ah an nun lio canah tuarkhawhnak le innkhawhnak an ngeih lawng hmanh siloin Thil ti khawhnak le thei tlai ttha tampi zong ai tel chih fawn. Dawtmi le upatmi PCCF u le nau, ni le far hna kan nunnak can tawi te chungah Bawi Jesuh he peh khawh izuam hram hna uh sih mu. Thlacam daithlang hin hlah usih. Jesuh dawtnak le kan ca i a tuarnak kha philh lo tein ruah tawn hna usih. A hla thiang hna hi ngeih le sak izuam hna usih. Akong an tialmi ca hna hi rel khawh izuam hna usih. Jesuh kong chimh hi kan tha thawhnak si hram seh. Bawi Pa Jesuh nih a kan dawtnak kha hram ah thlak in nun khawh izuam hram hna usih.   Kai lawmtuk... Pathian nih nannak cio cungah a thar in Thluachuahnak in pek ko hna seh.

 

                  

--
Philippine Chin Christian Fellowship
Manila
Philippine