Dawtmi unau hna, Happy Sunday..! tiah nan kut kan tlaih hna. Tuzing Sermon a kan tialpiaktu Revd Paul Thawng Tin cungah kan i lawm tuk. Amah hi MDiv. in UTS ah a dih hnu in Dmiss. in PCU ah a cacawn a peh cuahmah lio pi a si. Thil hman le thil dik a ttanh ngaimi a si. PCCF ah baochan ngaimi dirkamhtu pakhat a si. Hmailei a riantuannak ah Bawipa nih kau chin thluachuah hram ko seh tiah thlaza kan campiak!

 

Topic: Satan Sianginn chuak kan si sual hnga maw?

Scripture: (Isaiah 14:12-15; John 8:44)

Mitampi ruahnak ah Satan cu thatlonak phunkip a tuahtu tiah kan ruah. Cucu a si lo. Satan cu afim, athiam, adawh, arum, upat awk atlak, thil phunkip a tuah kho ti mi Ezekiel 28 chung ah kan hmuh. Curuangah, alung a puam i, “KEIMAH” ti thinglung a ngeih caah Vangcung in vawlei cungah arun tlami a si (Isaiah 14:12-15). Cu bantuk in, kan cawnmi Degree; B.Th., B.A., M.A., M.Div., M.Th., D.Min., D.Miss., le Ph.D te pawl le, mirangholh te hna kan thiammi hna nih “KEIMAH” timi lungput akan ngeihter ahcun, Satan cawnpiakmi, Satan sianginn chuak kan si lai.

Satan cu, “KEIMAH” timi lungput ruangah Vancung ah hmunhma a ngei ti lo caah Vawlei arat hnu cun Pathian kha aral i, Pathian minung hna kha “lihchim” nak in ahlen cang hna (Gen 3:1; Rev 12:9). Pathian Fapa, Bawi Jesuh hmanh kha “Lihchim” nak in a tukforh ti kan hmuh (Matthew4:1-11; Luke 4:1-13). Cucaah, “lihchim” cu Satan caah hriamnam ttha bik a si.

Philippine ram ah a minthang ngaimi Bible sianginn border sawng pakhat cu, electric an hmanmi kha, meter box akai mi ningin hal lo in thilril an ngeih ningin hal a si. Tachunnak ah, computer pakhat thlakhat ah, 200 pesos, Cellphone pakhat 50 pesos, tibantuk in an hal.Cucaah, cellphone pahninh, pathum a ngeimi lei, laptop, computer, printer, a dang thil vialte a ngeimi hna caah cun electric man ca lawngah thlakhat 2000 pesos renglo a ciah ding a si cang. Akarlak ah, Phaisa tlaitu nih mi nunnem le, mi dai pawl kha cu phaisa a pekcia mi hmanh kha na pe rih lo tiah a hlen hna ti a si. Receipt/voucher an piah khawh lo ahcun liam si cang an ti. Cu ruangah, cu Bible sianginn border sawng ummi pawl nih cun thil an ngeihmi kha kan ngei lo tiin “lih chim” a hau cang ti a si. Cu bantuk in, kum li kum nga chung lih an chim hnu ah a chuakmi Bible siangngakchia hna cu zeidah an lawh te hnga?

Aleng lei i inn a hlangmi pawl nih zetlukin electric an hman zongah minung pakhat nih 400 pesos le 800 pesos tiang lawng an dih ti a si. Cucu a cozah nih, electric bill (meter box) ning in, an hmanmi kha an hal mi hna a si.  

MBC ah rian ka tuan lio, MIT megazine cartoon pakhat ka relmi cu, “MIT sianginn ka kai tikah Krifabu pawl nih cauk akan zuar ter, calendar akan zuar ter, thilzuar cu thate in ka thiam cang” tiah a tial. Cu bantuk tal in lih chimh kan duh lo hmanh ah management ruangah “lih chimh” lengmang ahcun ahnu ahcun, “lih chimh cu character ah a cang lai. MIT siangngakchia pa nih Cartoon atial bantukin sianginn kan dih hnu cu “lih chim” cu ka thiam tuk cang ti ding a si ko lai.

 

Kawlram ah a hohmanh nih 10 awng attuh(adeu) le, B.A., B.Sc degree certificate attuh (adeu)in ria tuan sawk khawh a si lo. An theih ahcun fakpi in dan an tat lai. Asinain, a tu chan cu Pathian rian tuannak ding Bible singinn kai tikah degree certificate attuh(adeu) in sianginn kaimi a tam tuk cang ti theih a si. Minung(Acozah) hmaiah cun kan lih ngam lo i Pathian hmaiah cun lih hi a fawi tuk cang.

Cucaah, lih hi khoika in dah a thawh? Ahodah lih a chim?ti kan zoh tikah kan BawipaJesuh Krih hrimhrim nih fiangte in a kan chimh, “Nannih cu nan pa Khuachia fa kha nan si i, tuah nan duhmi cu nan pa duhnak kha a si. Amah cu, a hramthawk tein lainawng a rak si. Biatak kha zeitikhmanh ah a tanh bal lo, zeicahtiah a chungah biatak zeihmanh a um lo. Lih a chim tikah a tuah tawn zungzalmi kha tuah a si ko, zeicahtiah anih cu  milihchim a si i, lih vialte pa a si” (John 8:44-45).

PathianThiang Thlarau nih fianternak thinglung in pe ko hna seh!

Tampi kalawm. A rianthiang ah,

Paul Thaung Tin