Unau hna,
Nanzapi Happy Sunday!
Tuzing Sunday ah Online Thawngtha a kan hrawmhtu Pastor Duh Sang cungah tampi kan i lawm. Amah hi Thantlang (TBC) church ah pastor tuan lio mi a si. PCU ah Ph.D. in (religious) cawng cuahmah liomi a si. Pathian nih thluachuah pe chin ko seh tiah PCCF nih thlaza kan campiak!

 

Thawhthannak siloin Nunthannak

Bible Cangthim: Luke 24: 1- 12

Laimi nih “Thawhthan” kan timi biafang hi thlen cu a hau lem lo nain, ruahthan cu a herh rua tiah ka ruah. “Thawh” timi a ratnak hi zawt tikah, ihnak in thawh, thutnak in thawh ti bantuk in a hram ai thokmi a si. Nain, “zawt” ai ralkahmi cu “dam” kha a si. A zawtnak in a dam ti kha kan biakal hoih a si. “Thihnak” he ai ralkahmi biafang cu “Nunnak” kha a si. Cu caah kan Bible chirchchcan in Jesuh Khrih cu an thah. Thlan ah an vui. Cuhnuah a nung than. Cucaah “Thawhthan ni” “Nunthan ni” in chim ahcun theih a fawi deuh hnga. A siah, “Nunthannak” “Thawhthannak” hi zumtu hna caah zeicaahdah a herh?

Luke 24:1-3 Nu hna nih kha Jesuh thlan kalnak caah timhtuahnak an ngei. Thlan tiang an kal. Hi nih hin Jesuh Khrih a thihnak kha fiang tein a langhter. Thlan chung hmanh ah an va lut rih. Nain, Jesuh ruak kha an hmu ti lo. Cucaah Jesuh Khrih athihnak hi al awk um loin ahmanmi te a si ko ti kha a lang.

Luke 24: 4-6; Nu hna kha mi pahnih nih bia an hal hna. A nungmi cu a thimi lakah zeicadah nan kawl?an ti hna. (A itmi cu ziah a thothanmi lakah nan kawl ti a si lo). A nih cu nunter than a si cang ti kha an fianh hna. Thihnak hmual cu nunnak nih a teinak kha Jesuh nunthannak nih a langhter.

Luke 24:7-8; Jesuh nih a rak chimhmi hna thil a takin a hong tlinnak kha nunterthan a sinak kha a fianter. Jesuh hi Pathian tling a si nak cu a thih hlan le a thih hnu a chimmi ai kalhnak a um lo. Thihnak in a nunthannak nih a a thih hlan tuanbia vialte a fehter. Thihnak thlan in nunter a si lai nak kong a rak chim lengmang.

Luke 24: 9-12 Nu hna cu thlan khan an kir I Jesuh Khrih a nunthannak kong kha zultu hna le a dang kha an chimh than hna. Hi nih hin al awk tha loin, Jesuh a nunthannak hi, tuanbia nih a fehter, hmuhtonmi mi a fehter ti kha fiang tein a lang.

Mirang nih Nunthannak hi “Resurrection” tiah an ti. HI biafang hi “Resure- rection” tiin komhmi a si. A sullam cu, “zeidah ahman/ ahodah a hman ti van hngalh than” “Becoming sure again of what/ who is right?ti kha  asi.

Cu caah Jesuh a nunthannak hi, Pathian tling a sinak kha “Ahman ko/ a dik ko” ti fehternak a si. Minung phung in a thi ciami/vui ciami ni thum hnuah a nungthanmi an um lo. Jesuh a nunthannak hi a hmanmi te  a si. Amah a zummi hna cu thihnak nih a tei lomi nunnak ah kan lan vet e lai. Nunthannak cu kan zumhnak hrampi a si. Nunthannak nih Jesuh a thihnak, a thih hlan a chimmi le nunnak nih thihnak kha a hrawhnak tehte  a si kha a fianter. Cucaah a nungmi cu a thimi lakah kawl ding a si lo. Zumhnak he a thimi kha thihnak thlanmual ah umter peng lo ding a si.