A Nung In Pekchanh Mi Raithawinak
By Nawl Hre Cin
Bible rel ding: ROM 12:1
Cucaah ka u le ka nau hna, Pathian nih a kan zaangfahnak nganmi ruangah hin, Pathian sinah a nungin pekchanhmi raithawinak bantukin ii pe tuah u; a rian ah aa pumpe mi le cohlan awk tlakmi si tuah u; cucu biaknak taktak Pathian nan pek awk biaknak cu asi.
Rom 12:1 hi kan zoh asiahcun “cucaah” timi biafang in aa thok. “Cucaah” timi biafang cu biapehtu asi ii hi biafang hlanah rak chimmi biatlang pawl a um hrimhrim a hau. Mi pakhatkhat he bia kan ii ruah tikah zeidang chim lo piin cucaah tiin biahram thok khawh asi lo. Bia a zatawk kan chim hnu lawngah “cucaah” ti phunin biapehtu ah hmankhawh asi. Cuning asiahcun, hi Bible cacang ii “cucaah” timi biafang nih tah zei le zei dah pehtlaihnak a tuah tihi theih hmasa ahau.
Rom cakuat kan rel asiahcun a ngan 1 hi mah le mah ii theihternak le kuttlaihnak cabia pawl ansi. Cu dihin a ngan 12 tiang kan rel ahcun, minung kan tlamtlin lonak le kan sualnak pawl nih Pathian dantatnak chung a kan lutpinak ding kong pawl a hrawmthok lei deuh ah a tial, cun a hnu deuh ah misual kan si ko buah zeitindah Pathian nih khamhnak a hun kan pekthan timi kong kan hmuh. Cu dihin cun atu ii “cucaah” timi biafang hi a hun hman. A tawinak in chim ahcun minung hi kan sualnak nih Pathian dantatnak chungah a kan kalpi ding kan si, asinain Pathain nih a kan dawt tuk caah khamhnak lam a kan sialpiak than. Cucaah Pathian dawtnak a theihmi hna nih cun kan nunnak hi a nunin thawimi raithawinak bantuk in ii thawi ding asi tihi Paul nih a chim duhnak asi.
Raithawinak timi cu tah zeidah asi? Mitampi ruahnak ah raithawinak ti poah ahhin thil sual pakhatkhat kan tuah ruangah Pathian sin ii sual ngaihthiamnak ding caah sa thah khi kan lungah a um bik tawn. Cucu sual raithawinak tiah ti asi. Asinain Bible chung ii raithawinak timi hi sual ruang ii thahmi lawng khi raithawi ti asi lem lo. Bible chungah ahmasabik raithawinak kan hmuhmi cu Kain le Abel nih Pathian sinah an hmuh hmasabikmi thawinak an tuahnak kha asi. Kain le Abel nih an satil le an theitlai Pathain sin ii an pek kha sualnak an tuah ruangah ngaithiam halnak ca ding ii an tuahmi asi lo. Pathian dawtnak an temcomi chungin Pathian sinah lawmhnak bia an chimthannak tu asi. Cucaah Rome cakuat chungah Paul nih raithawinak timi biafang a hmanmi zong hi kan sual ruangah Pathian sinah kan nunnak nung na bu in va ii thawi ding tikhi a sawh duhmi asi lo. Cunak cun misual kan si ko buah Pathian nih khamhnak lam a kan sialpiak caah Pathian dawtnak a theimi nih cun kan nunnak le kan pum hi cu Pathian sinah lawmhnak kan langhternak kan laksawng, kan raithawinak siseh tikhi a chim duhmi asi. Paul nih Pathian dawtnak a nganmi ruangah nan chawva kha tampi in Pathian kha pe uh ti sehlaw, mi sifak pawl cu pekawk kan ngei hnga lo. Asinain Paul nih pek a kan fialmi cu kan nunnak tu asi, a nun in pekchanmi raithawinak bantuk in ii pe uh titu asi deuh. Raithawi tikah do a tla lomi thil kha thawi asi bal lo. Cucaah kan nunnak le kan pum rai kan ii thawi tik zongah do tla lo buin ii thawi phung asi lo. Paul zong nih, Pathian caah do a tlami, cohlan a tlakmi, Pathian lung a lawmhtermi raithawinak bantuk in ii pe uh tiah a kan fial.
Cucaah Pathian dawtnak a theih taktakmi caah cun kan nunnak hi kan mah ta asi ti lo ii Pathian sin ii kan pekmi, Pathian lung a lawmhtertu raithawinak tu ah aa cang. Nifatin kan nunnak ah kan sining hi Pathian ii cohlan ding a tlakmi, Pathian lung a lawmhtermi raithawinak kan si maw tihi ii check zungzal a hau. Bible chungah hin cutin kha tin nan nung lai ti a kan cawnpiakmi hi a tling lo ngai. Bible nih night club kal a tha lo ti zong a kan cawnpiak bal lo. Bible chan ah night club a rak um rih lo. Zu ding hlah uh ti ii a kan chimhnak zong kan hmu fawn lo. Asinain, kan nunnak le kan pum thurhnawm tuk buin hin Pathian lung a lawmhtermi raithainak kan tuah kho hnga maw? Pathian caah cun chim lo kan pawngkam a ummi kan hawi le ca hmanhah do kan tla lai lo. Cucaah zeithil kan tuah poah ah kan nunnak hi Pathian sin ii pekmi, pathian cohlan awk tlakmi, Pathian lung a lomh ter khomi nunnak asi maw tihi ruat cio hna uh sih tiah kan sawm hna. Paul nih cun, Pathian nih a kan zaangfahnak nganmi ruangah hin, Kan nunnak le kan pum hi Pathian lung a lawmhtertu raithawinak asi awk asi ati. Cun, a rian ah aa pumpe mi le cohlan awk tlakmi si tuah u a kan ti fawn. A hmanungbik ah, cu ti kan tuahmi cu biaknak taktak Pathian kan pek awk biaknak cu asi a ti. Keimah pumpak ii telhchih in, PCCF u nau kan zapi te nunnak hi, Pathian hmaiah do a tlami raithawinak siter ii zuam cio hna uh sih. Cucu kan biaknak taktak asi awk asi.
Pathian nih thluachuah in pe cio ko hna seh.
No comments:
Post a Comment