Tukforhnak Chungin Teinak Nun

Dear Dawtmi PCCF Unau

Tuzing Bawipa thawhṭhan zingah damte le lawmtein a thawngṭhabia a hrawmtu zumtu nan zapicungah Pathian thluachuah a tharin um ko seh! Pathian dawtnak le PCCF dawtnak thinlung he thawngṭhabia a kan chim tu Sayamah Lal Awm Pui (puite) cungah lunglawmhnak langh ter kan van duh. Tukforhnak Chungin Teinak Nun timi pehtlaiin an kan chimh i kan i lawmhnak a sang chin. Mahthawngṭha na rel dihbak ahcun nanunnak ah thlennak le thazangthar tampi na hmuh ko lai.

Thawngṭhachintu tuanbiatawi: Pu Huat Hnin ( Tlang Khua) le Pi Sai Ci (Zang Tlang) i an fanu a si, Than Tlang ah khuasa mi an si, a cungzongah kan i lawm tuk. Asian Baptist Bible College ah Bachelor of Art in Christian Education a dih cangmi a si. Ngaknu fel tak mi, PCCF ah kan i uanthlarngai mi zong asi

Sayamah Lal Awmpui

Tukforhnak Chungin Teinak Nun

Baibal Caangthim: Genesis 39: 1-23 “Josef le Potifar Nupi Kong”.

Biahmaiṭhi:

Genesis 39: 1-23 chung ah kan hmuhmi cu tlangvaalno Josef nih tukforhnak a tonning le cu tukforhnak chungin zeitindah teinak a hmuhning a si ti kha kan hmuh khawh. Josef cu tukforhnak ah tlu loin cu tukforhnak chungtu in teinak a hmuhnak kha kan hmuh. Minung tampi cu Josef bantukin tukforhnak hi tong usilaw atlumi kan tampi men lai tiah ka ruah nain Josef tu cu mahbantuk tukforhnak nih chuum bang a zelh lio ah Pathian a ṭih i thianghlimte in a nung. Tuchun ni ah Josef nunnak hmangin zeidah kan i cawn awk a si ti kha zoh ṭi hna u si tiah kan sawm hna.

I. Josef nunnak ah a langmi thil pathum

a) Pathian nih Josef cu a umpi i pumpak in Pathian he theihngalhnak a ngei (he had a personal relationship with God). Caang 2nak ah kan hmuh mi cu “Bawipa nih Josef cu a umpi I a caah thil kalning a tluang dih ko”.

b) Atuahṭuanmi kipah a hlawh a tling. Caang 3nak ah cun hiti hin kan hmuh “Bawipa nih Josef cu a umpi i zei a tuahnak hmanh ah Bawipa nih a tlam a tlinter ti kha a bawipa nih cun a hmuh.”

c) Thluachuahnak nih Josef cu a zulh. Caang 4nak-6nak tiangah fiangte in kan hmuh khawh.

II. Josef cu tukforhnak a ton tikah a lung asau

1. Tukforhnak umtuning: Josef cu Pathian hmai le minung hmai ah zumhawktlak in a nun ko bu ah tukforhnak nih ngollo in a rathnawh lengmang. Mah bantuk tukforhnak hmangin kan nunnak ah thil tampi kan nih zong cawn awk a um tiah ka ruah.
• Tukforhnak cu a nem ngaingaimi bantuk a si
• Tukforhnak cu lungthin a hninsaitu thil a si
• Tukforhnak cu fawi le bai ah mi ngol a hmanglo

Acunglei points pathum nih a kan cawnpiak duh bik mi cu vawlei pumsa in kan nunchung poah cu tukforhnak nih fawi le bai ah a kan kaltaak lai lo ti hi a si bik ko. Sehtan nih kan darthawmnak le kan chambaunak hi a theih ngaingai mi a si caah mah zawnte cun malo in thluk hi a kan timh peng. Sualtuahduhnak thinlung le tukforhnak nih tei awk ah a zungzal a kan hngah ko hi ti kan i fian dih ko hna lai ka zumh.

2. Tukforhnak a teimi Josef nunnak: Josef nih zeitindah tukforhnak kha a hrialning le a teining ti zohnak in kan nih cio zong tampi fim a kan chimh lai tiah ka zumh.

1) Josef nih tukforhnak kha ralṭhate in a el ngam – Tukforhnak a cung a tlun tikah Josef nih “No” tiah ralṭha tein a doh ngamnak a ruang cu Pathian a ṭiahzahmi a si i sualnak tuah kha a hrial mipa a si.

2) Josef nih tukforhnak kha zumhnak hmangin a doh – pakhatnak ah Potifar nih a ngeihchiah vialte cungah nawlngeibik ah chiah bantukin Josef nih a bawipa leirawi (titsaphoh) a duh lo cun a ruang pakhat cu Pathian he aa pehtlaihnak thawngin sualtuah kha a hrial.

3) Josef nih tukforhnak kha zumhawktlak a sinak hmang in a doh – Potifar nupi nih nichiar tein a lem lengmang nain Josef nih lungdonglo tein a el peng ve.

• Tukforhnak hi Pathian sin in a ra bal lo.
• Tukforhnak hi azungzal in kan mah pawngkam in a ra zungzal.
• Tukforhnak hi ṭhate in theihfian a hau.

III. Josef nih tukforhnak kha a tei

1. Josef nih tukforhnak kha Pathian he aa pehtlaihnak thawngin a tei.
2. Josef nih tukforhnak kha amah le mah aa upatnak thawngin a tei.
3. Josef nih tukforhnak kha Cungnungbik Pathian umpinak thawngin a dongh tiang tlamtlingte in a tei.

Biatlangkawmnak:

Dawtmi u le nau hawi le kom vialte hna, Sehtan nih tukforhnak hmangin kan nun hi rap bang foih a kan timh zungzal i kan nun hrawh awk ah zungzal manhlo ngai in kan mah hen lamnaihte ah a um zungzal ko. Cucaahcun tukforhnak nih kan nun hi tei ter hrim lo dingin Josef bang kan nunzia kan i remh ahau cucun Pathian nih a dongh tiang kan tei khawh zungzal nak hnga a kan bomh lai. Sehtan nih a phunphun in a kan lemsoi lengmang ko lai asinain abia kha ngai hlah mah cucu a safe bikmi option a si. Pathian sin ah kan caan pe hna usilaw caanttha caanrem kan ngeih lio ah hin Pa Pathian lunglomhtertu si i zuam cio hna usih ti kha tuzing na sin ah chim ka duh mi si Pathian tu nih kan dih lak caah thlaw chuah nak kan pek piak ko seh!