Khrihfami nih kan tuah ding

  Dear PCCF Unau zapi

PCCF Online sermon kan kuat hna.

Tuzing September 23/2012 bawipa thawhṭhan zingzong damte le lunglawmte in a kan phanhter tu kan Pathian a minthiang kan thangṭhat.  PCCF zongbawipa nih lam a hruai i zarhtin online sermon zong ka peh zulhkhawh caah kan i lawmhnak a ngan hringhran. A hlei khun in Kan I lawmhnak cu PCCF Kan Pa Dr. Dennis Shu Maung Upatpek nak caah Cauk kan chuahmi zong an lim cang. Tu chun ah hin Rangoon khua chungah cun an zuar cang lai.Kan cauk  tluangte in kan zuar khawh nak lai thlacam ṭang cio ko hna usih.

 Tuzing September 23/ 2012 zingzongah Philippines Baptist Theological Seminary ah M.A. kai lio mi Saya Kio Nawl Hmung ( Kiote) nih Thawngṭha bia suanglawi khun in an van kan chimpiak caah kan i lawmnak a sangchin ko. Bawipa nih a sianginn kai nak le Bawipa rian a ṭuannak cungah um pi in a thluachuahnak he lam hruaizungzal sehlaw Bawipa sunpar nak a langhter tu pasal ṭha si ko seh ti in PCCF nih thlaza kan campiak. Tu cu a mah nih a sermon a van pehcolh ko lai…

 Saya Kio Nawl Hmung

   Khrihfami nih kan tuah ding

                                     James 1:19:25

U nau pa hnih aa daw/kom ngaimi an um. Zei thil an tuah paoh ah an tuah ṭi, khawi ka an kal paoh ah an kal ṭi an um ṭi peng. U pa deuh pa hi nu le pa bia a ngai mi a si, a nau pa belte hi biangai duh lo phun a si. A caan caan ah hin a u pa nih a chimhmi hi aa theihter /aa ngaih ter duh tawn lo i an i ṭhua pah lengmang tawn. A ruang cu a u pa nih thilṭha a chimh komi aa theih/ngaih ter duh lo ruangah a si. Thilṭha a si komi i theihter duh lo le i ngaihter duh lo hi piahtana a chuah tertu thil pakhat a si.  Tuzing can ah thilṭha a simi theih le ngaih hi a biapi ko, practical in kan tuah ding a si ti hi James 1:19-27 chungin i ruat ti hna usih ti ka duh.

James 1:19 nih a kan cawnpiakmi cu “bia theih duhnak leiah cun a khul a rangmi si u law biachimnak lei le thinhunnak lei ahcun a khul a nuarmi si u” ti hi a si. Hinih a kan fianter  micu theih le ngaih a biapitnak hi a si. Bia theih/thawngpang theih ran lei hi cu a palh nak a um lem lai lo dah. James nih a kan cawnpiak duh mi cu khrihfami nih zeibantuk dirhmun, harnak kan tawn zongah theih duhnak leiah a khul a rangmi si ter hi a kan duhpiakmi a si. Harnak kan tawn caan hna ah hin Pathian nih a thiangthlarau hmangin kan sinah aa phuang kho, thawngpang kan theih/hngalhmi cung zong in aa phuang kho, cun minung kan hawi le hna hmang in kan sin ah aa phuang kho fawn. Cucaah cun theih/ngaih lei ah a khul a rang mi si kan herh.

Sinpit lo nawn i vun um lio hna i a ngai tu si ding hicu a fawi loh. Cucu kan mah kan minungsinakin kan tuah khawhmi a si loh. Cucaah cun zeithil kan tawn paoh ah Pathian sinin a ra mi theih hngalhnak le lungsaunak kan hal a herh. James 1:19-20 nih a kan fianter mi cu, “biachimnak lei le thinhunnak lei ah a khul a nuarmi si u, minung thinhunnak nih Pathian tinhmi dinnak kha a chuahter lo” ti hi a si. Phundangin chim ahcun lungsaunaknun ngei hna seh ti hi a kan duh piak mi a si. Cucaah cun zeibantuk dirhmun, lungretheihnak kan tawn zongah Pathian bochan buin, lungsaunaknun ngeihin le kan zumhnakah lungthawngngai in kar kan hlanding hi kanbiak kan Pathian nih a kan duh piak mi a si. A hohmanh hi harnak, khuaruahhar vansannakin a luatmi kan um loh, nain kan nih zumtu cu hi bantuk kan tawnmi thilnih hin thinlung thar, ruahnak thar a kan pek i cu nih cun kan nunnak i Pathian a ṭhatnak, zumhawktlak a sinak le a thiltikhawhnak a kan theih ter.

Zumtu kannunnakah theih/ngaih le lungsaunaknun ngeih lawnghi a za lo. Cucaah cun lungsaunak he kan ngaih i kan theih kan hngalhmi thilṭha hi pumpak nih kan tuah a herh. Thilṭha kan theih hngalhmi hi a tuah in kan tuah tatak lo ah cun santlailo a si ko. Theihduhnak lei ah a khul a rang mi kan si i kan theihmi thilṭha hi lungsaunak he kan tuahtak ah cun teinak cu kan hmuh hrim lai. Cucaah cun theihduhnak leiah a khul a rangmi kan si lo sual i a chim lei lawng hna a huammi kan si sual si cun cubantuk ziaza cu hlawnh kan herh (v.21). A bia kan theih ahcun a za tiah nanmah le nanmah i hleng len  hlah u. A bia cu a tuah tuin tuah deuh u (v.22). kan theih nain ka tuah ṭunglo mi cu kanmah tein kan i hlen bantuk a si. Mipa pakhat nih thlalang aa bih i amah le amah cu aa hmu nain a kal i zei ka lawh ti kha a philh colh (vv.23-24). James nih a kan cawnpiak duh mi cu lenglei sinak/langhnak aa zoh mi si loin, luattertu, harnak lakah hnangamnak pe kho tu a mah Pathianbia nih a kan cawnpiakmi zulh le tuah in hmailei kar kan hlan ding hi a kan duhpiak mi a si. Cu Pathianbia i kannunning ṭha tein kan i zoh ṭhan i a kan cawnpiak mi kan tuah si cun kan tuah/ṭuanmi rianah thlachuah kan hmuh lai (v.25).

Khrihfami nih kan i tinhmi cungah teinak le hlawhtlinnak kan hmuhnak hngadingah  cun theihnak lei ah a khul a rangmi si kan herh, kan tuah/ṭuanmi thil cungah lungsaunaknun ngeih kan herh cun lungsau buin kan theih/hngalhmi thilṭha hna hi pumpak in siseh, a bu in siseh kan tuah/ṭuan a herh. Cuti kan tuah ahcun kan tuah/ṭuanmi thilkipah teinak hlawhtlinnak a hmumi kan si ko lai.

Pathian Kong Hngalh le Pathian Hngalh

Dear PCCF Unau

Tuzing bawipa thawhṭhan zingzong damte le lunglawmte in a kan phanhter tu kan Pathian a minthiang kan thangṭhat.  PCCF zongbawipa nih lam a hruai i zarhtin online sermon zong ka peh zulhkhawh caah kan i lawmhnak a ngan hringhran. A hlei khun in caan thiahmi hna nih mah le can tlolh lo te in nan kan hmanpiak khawh caah a si. Hmai lei caan hmang dingmi hna zongnih nan riantampi lak ah nan van kan zuampiak chinchin hna nak lai zong kan van in sawm fawn hna.

Tuzing September 16, 2012 zingzongah  Presbyterian Theological Seminary ( PTS) i, M.Div. kai lio mi Saya Ram Ling ( Rampa) nih Thawngṭha bia suanglawi khun in an van kan chimpiak caah kan i lawmnak a sangchin ko. Bawipa nih a sianginn kai nak le Bawipa rian a ṭuannak cungah um pi in a thluachuahnak he lam hruaizungzal sehlaw Bawipa sunpar nak a langhter tu pasal ṭha si ko seh ti in PCCF nih thlaza kan campiak. Tu cu a mah nih a sermon a van pehcolh ko lai…

 

Saya Ram Ling

“Pathian Kong Hngalh le Pathian Hngalh”

(Knowing about God and knowing God)

Nihin ka vawlei pi hi kan zoh tikah fimthiamnak le tthangchonak a kharh chin lengmang ti cu ka chim hlan in zapi theih a si ko asinain Khrihfami kan zumhnak le Pathian kan hngalhnak (a bik in pumpak kan nunnak ah Pathian kan hngalhnak hi tah a tthang ve maw ti hi ruah awk ngai a si tiah ka ruah. Mah nak in a bia deuh mi cu Pathian hi tah kan hngal tak maw ti hi a si! Cun nihin Khrishfami cheu nih ttha tein kan i fiang rua lo tiah ka ruahmi cu “Pathian kong a hngalmi maw kan si Pathian a hngalmi dah kan si ti hi”. Asitak mi maw a si, tah chunhnak dah a si cu fiang tein ka hngal lo “ tarnu pakhat cu sibawpa sinah a zawtnak aa zoh ter ti a si, sibawpa nih cun tarnu cu bia pakhat a hal “ ka pi John 3:16 kha na cinken maw tiah a ti” tarnu nih cun ka cinken hen ta a ti i voitam nawn a rel piak, sibawpa nih cun ka pi a si le a tu na nunnak dih seh law khuazei ah dah na ka lai hell ah maw vanram ah dah tiah a hal, tarnu nih sibawipa zeitin dah ka theih lai tiah a leh. Tarnu nih John 3:16 cu azah tak a hngal tak maw ti cu rak ruat cio ko uh.

Laimi nin Pathian kan hngalhnak hi tah zoh tthan hna uh sih, a tu chan Laimi dihlak nawn cu Khrihfa chungkhar in a chuakmi le a tthangmi kan si lai tiah ka zumh. Pathian kong cu kan hngakchiat lio tein an kan chawn piak cun Bible tuan bia le hla tampi zong an ka cawn piak, kan caah Pathian kong hi khuaruah har thil cu a si lo tiah ka ruah cun kan thisen chung hrimhrim ah a cam cang tiah ka ruah. Cun Bible Seminary hna kan vungkal chin i Pathian kong kan hngalhnak cu a tthangcho chin lengmang. Kan theology le philosophy hna zong a sang chin lengmang, phunchim zong kan thiam chin lengmang. Kan laimi evangelist minthang pakhat nih a timi cu “John thawngttha cauk hi tlau sehlaw, keimah nih ka ttial khawh lai tial a rak ti bal” a chim duhmi cu zeitluk in dah John cauk hi a hngalh le aa cinken tinak a si tiah ka ruah. Pathian kong kan hngalh le Bible ca kan hngalh cu a ttha lo maw? A ttha tuk hen ta, hngalh chin le theih chin hmanh kan i zuam chin ding a si. Bible a cawngmi zong cawng a cawng lomi zong, Pathian nih rian a ttuanmi zong ttuan lomi zong nih Pathian kong hngalh le Bible rel le hngalh cu kan i zuam chin ding a si. Pakhat kan philh lo ding a simi cu “Pathian kong hngalh cu cu Pathian hngalh a si lo ti hi a si” Pathian dawtnak hngalh tak theih tak lem loin Pathian dawtnak chimmi le a phuangmi kan tam tuk cang. Khrihfabu ah buaibainak le hnahnawhnak a chuah pi tu pawl khi, zuri sabah an si theng lai lo Pathian kong a hngal ngaimi le Bible a hngal ngaimi pawl khi an si deuh tawn. A ruang cu a mah Pathian hngalh tak loin a kong lawng a hngalmi an si.

Kan Bawipa Jesuh nih Johan 10:14-15 chungah “Ka tuu kha ka hngalh hna i annih nih an ka hngalh ve” tiah fiang tein a kan chimh. Pathian fa a simi nihcun Pathian kha an nunnak ah fiang tein an hngalh i a nawlbia kha an zul. Lamkaltu Pawl nih cun a zumhmi kha fiang tein a hngah i mah a hngalh mi pa caah zeitluk in har satnak a in zong ah aa lawm kho, zumtu hmasa zong kha an zumhmi kha fiang tein an hngalh i hremnak, thahnak, harsaknak le soiselnak an ton caan zong ah zumh awk tlak tein an nunnak Bawipa caah an pek. Nitin kan nunnak ah “Bawipa Bawipa ti lawng in a za lo, a chimmi tuah tu hi a bia pi deuh” Luka 6: 46-49. Kan nunnak ah Pathian kan hngalh tak lo ahcun tuforhnak, harsatnak hna kan ton tikah a kong kan theihnak le kan hngalhnak hin khan ral tthatnak le in khawhnak tuar khawhnak thazang a kan pe kho hnga maw? Pathian kha kan hngalh tak lo le a kan chimmi kan tuah tung ahcun thetse cung ah inn a sami bantuk men khi kan si ko lai, sihmanhsehlaw Pathian kha a hngalh hna le a nawl a zulmi hna cu lung cungah inn a sami, thlichia le tilet a thawh caan zong ah fek tein a dir ban tuk kan si ko lai.

Kan zapi kan theih bantukin kan kawl ram cu Pathian dawtnak thawngin Democracy  a hmumi ram a hung si cang ti awk a si ko cang cun lunglawmh awk ngai zong a si. Mah thil a hung cangmi nih hin khua tampi a ka ruah ter, mah lak ah a telmi pakhat cu “Kan Khrihfa sinak” a bik Laimi kan Khrihfa sinak hi a si. Kan ram hi hei tthangcho chin lengmang sehlaw, tah chunnak ah suimilam 24 chung hna hi mei (electricity) hmu kho uh sih, cun innkip ah internet, satellite, leilawng (vehicle) te hna hei hmang kho dih uh sih cun hmun tampi ah Mall tthattha hna hei ngei uh si law, Biakinn ah a kalmi kan tam ti hnga maw tiah ka ruat tawn, a bik in Mino hla cawng le pumh hna hi a hlan lio caan bantukin kan tuah kho ti hnga maw? Pathian kong theihnak le hngalhnak men nih cun kan ram a hruai kho te lai lo, cucaah a mah Pathian kan hngalhnak tu ah khan thukpi in hram bunh kan herh. A hlan ahcun Uganda ram hi Western ram pawl le America i an mission field a si nain a tuahcun Uganda ram zumtu pawl hi America i zumtu pawlnak in percentage atam deuh cang ti a si. Kan ram caah le kan miphun hna caah lam hruai ttha si kan i timh hlan ah kan mah phunpak “Pathian kan hngalhnak” hi i check than a herh rua tiah ka ruah. Pathian kong a hngal ngaimi tung le a mah Pathian hngalh tak lo cu tthih a hung tuk. Nang le kei tah Pathian hi pumpak kan nun ah kan hngal tak maw cun a kan chawn piakmi tah nitin kan nunnak ah kan zul tak maw?

Bawipa nih sungparnak co ko seh!