CCF hawi le hna,

                           Nan umnak cio le nan sianginn kainak cio ah dam in nan um lai tiah ruahchannak ka ngei. Bawipa nih damnak le caan tha caan sung lawi a kan pek than i tu zing zong a thawhthan ni ceu dawh a kan phak tertu kan Biakmi kan Pathian a min ka thangthat. Cun, a hleice in tuzing ah Pastor Thawng Hei nih "Pathian Sin ah Zungzal i Lomh, Thlacam le Lomhnakbia Chim Ding" ti mi tlangtar in thawngtha a kan chimhmi cungah a hlei in kan i lawm khun ko, a mah hi nai teah AGST in M.Th tlamtling tein a kan dih piak mi asi i a cung zong ah lunglomhnak van  chim ka duh, Pathian nih a min sunparnak caah le a ram kauhnak caah  hmang chin lengmang ko seh. 

Pathian Sin ah Zungzal i Lomh, Thlacam le Lomhnakbia Chim Ding

(Thessalonain 5:16-18)

A pakhatnak ah Pathian min thangṭhat in um ko seh. Amah lam hruainak ruang ah kum thum le cheu leng hi Philippines ram ah theology ka cawng kho ve i, PCCF chungtel vialte hna he zong  i hawikomhnak thlachuah ka tin conak a si. Cun hi bantuk caan a ka pet tu PCCF ṭuanvo ngei tu dihlak cung zong ah lomhnak bia ka chim. Kumkhat chung an rianṭuannak ah Pathian tu nih thlachuahnak pe hram ko hna seh. Tutan ah kan i ruah ṭi awk ah ka thim mi Bible cu: I Thessalonain 5:16-18 a si lai. Bible vun rel ta hna u sih: A zungzal in i lawm u, a zungzal in thlacam u, zei bantuk thil nan ton hmanh ah lunglawm in um u. Khrih Jesuh chung i nan nunning ah hin hitihin nung hna seh, tiah Pathian nih an duh hna. Hi Bible nih hin Khrih chung a nung mi zumtu vialte nih a zungzal tuah awk thil pathum a kan cawn piak.

1.     

        1).Zungzal i Lomh Ding

Kan Bible rel mi nih a pakhatnak a kan cawnpiak mi cu “a zungzal in i lawm u” ti a si.   Philippines sianghngakchia pakhat sinak (keimah pumpak) ah cun financial stress, paper stress, social stress le a dang dang stress ngeih peng a si tik ah i lomh zungzal ding cu a foi lo. Thil sining zoh ah cun a foi lo. Asinain, Pathian bia nih i lom uh ti si ko. Bawipa chung ah i lawm uh ti si ko (Phi 4:4). Amah Bawipa ruah le zoh bu in, zei tluk in dah nang mah le keimah pumpak caah a that tiah ruah bu in i lomh ding ah fial kan si. Thil sining le midang sining zoh tuk lo ding. Lungrawhnak le buainak tu a si. Mah sining te zoh bu in, Bawipa na cung le ka cung ah a ṭhat ning tu kha kan ruah a si ah cun, Bawipa sin ah kan i lawm kho ko lai.

2.     

           2). Zungzal Thlacam Ding

Sianghnakchia tam deuh kan si ning zoh tik ah hin class chung ah chim le rel hi kan duh ngai hna. Theological theme/topic tete le a dangdang issues pawl i ceih khi kan huam ngai. Thil ṭha ngai a si ko. Degree hna a phunphun kan kai hna i ruahnak le hmuhning a phunphun kan vun i chap hna. Mi bia ngeih/theih dan, chim/el dan hna zong kan thiam ngaingai ko cang. A si nain thlacam kan daithlang tawn. Thlacam cu Bawipa he biaruah le pehtlaihnak phunkhat a si. A kan Sertu, kan nunnak ah nawlngei bik tu, kan thlachuah hrampi a si mi Pathian he biaruahnak kan ngeih lo ah cun ṭih a nung ngaingai. A hlei in theology sianghngakchia pawl caah. Fimnak lei kan ṭhancho bantukin Pathian he kan i pehtlaihnak zong hi a thuh chinchin awk a si. Thlacam nun te hi kan nih cu i tlaih chih ko hna u sih. Bible zong nih a kan fial.

3.      3). Zungzal lomhnak bia chim ding

Lomhnak bia chim hi daithlan lo ding a si. A caan ah hin kan busy kho tuk hna. Pakhat pa le bang cu “ka busy” ti hi a tlaihchih tuk i, a hoipa nih ka busy na ti cu zei hen na tuah ton a hei ti. A leh mi cu “movie ka zoh ko hen cu” ti si. Zeitluk kan busy ko zong ah Bawipa sin ah lomhnak bia chim daitlang hna hlah u sih.  A daihnak hmun pakhat te ah“Bawipa ka lawm tuk” tiah Pathian sin ah kan co mi thlachuah vial te hi rel cio hna usih. Lomhnak bia chim a duh mi kan Pathian nih a let za in thlachuah a kan pek lai.

Pathian nih lam a kan hruai i Philippines ah kan rak phan kho hna i, kan mah le kan si ning cio ah busy cio dih a si. Innkhat ah a um ti mi hna hmanh nikhat chung kan i hmuh lo caan hi a tam ko. Nikhat nazi 24 li kan i za hna lo. A caan ah cun kan ca le rianherh taktak ah kan busy tak zong si kho. A caan ah cun zeiset ah ka busy ti hmanh theih lo in suallam ngei lo pi ah kan busy tawn.  Zei ah dah ka busy tiah a thei tu tak cu kan mah pumpak cio kha kan si.  Hi bantuk caan le sining chung ah hin zumtu Khrihfa kan sinak te hi langhter i zuam hna u sih. Pathian sin ah i lawm hna u sih, thlacam hna u sihlaw lomhnak bia zong tampi chim hna u sih. Bawipa nih thlachuah kan pek piak hram ko seh.

Mega Blessings,

Thawng Hei