Hi ruang hrimhrim ah hin, nan
zumhnak i ṭhatnak chap kha fak piin i zuam u; cun nan ṭhatnak ah khan hngalhnak
i chap u; nan hngalhnak ah khan mah le mah i uk khawhnak i chap u; mah le mah i
uk khawhnak ah khan in khawhnak i chap u; in khawhnak ah khan Pathian ṭihzahnak
i chap u;Pathian ttih zahnak ah khan unau bantukin i dawtnak i chap u law Unau
bantukin i dawtnak ah khan zawnruahnak i chap u, Hi thil hi nan herhmi an si i
tam piin nan ngeih hna ahcun Bawipa Jesuh Khrih nan hngalhnak ah khan ṭhawnnak
an pek hna lai i rian tampi an ṭuanter khawh hna lai.{2 Peter 1:5-8}.
Khrih ah
zumtu hawi dawt hna Bawipa nih kan relmi ah “ I chap u” a ti mi kha kan
hmuh. Zumtu hna kan nunnak lam tluan cu I chap nun ngeih khawh hi a si kan ti cun
kan palh tuk lai lo. Cucu kan Bible rel mi ah khan fiangtein kan hmuh khawh.
nan zumhnak i ṭhatnak chap kha fak piin i zuam u; zumh sawhsawh lawng kha a
za lo ti a lang. Zumtu hna cu ṭhatnak thinlung ngeih hi fakpi in i zuam
kan herh. Mah pin zongah mah le mah i uk khawh zong kan hau. Can tampi ah cun
kan mah le mah i uk khawh lo ruang ah ṭhat lo nak tampi kan chuah ter tawn. Zumtu
hna kan caah kan ral nganpi pakhat cu mah le mah kan I uk khawh tawn lo mi hi a
si tawn. Cupin zongah cun In khawhnak ngeih hi a rak herh tuk ṭhan. Mi nih kan
cungah thil an tuah sual tikah in khawhnak rak ngei cio hna usih law rem nak a
chuak peng ko hnga mu. Kan mah nih kan rak in khawh ve lo caah midang zong nih
an kan ing kho ve lo ti thei in, kan mah tu nih In khawhnak thinlung ngeih
hmasat kan rak herh. Cu pin zongah I chap rih kan herh mi cu Pathian ṭih
zahnak thinlung te kha ngeih chap a herh. Pathian ṭihzah ko zongah khan
Dawtnak taktak kha ngeih chin kan hau rih fawn. zeiruangah dah dawtnak nun
ngeih cu zumtu vialte nih kan herh ti ahcun vawleicung i a ummi minung vialte
hna hi zei bantuk thil hmanh nih hnangamnak a kan pek khawh lo caah a si. Cu
ruangah cun minung vialte nih dawtnak kan ngeih hi a rak herh tukmi a si. Mi
pakhat nih dawtnak kan ngeih i dawtnakin pawngkam Minung hawi/thil nung vialte
hna sinah dawtnak in an caah thil ttha kan tuahpiak hna a si ahcun cu dawtnak
nih cun an hna a ngamter hna i an lung a lawmhter hna." keimah zong nih ka
tonmi tampi a um..Mirum miṭhawng, mifim hna zong hi a ka lawmhtertu tak le ka hna
a ka ngamtertu tak cu an si hna lo. A ka lawmhtertu le ka hnangamnak a ka petu
hna cu ka cungah dawtnak a ngei zungzal tu, a dawtnak a dawng bal lo in a ka
dawtu Bawi Ka Pathian tu hi a si, Haleluiah.! Cu ve bantukin nihin ah nang zong
nih na nunnak kong kha vung ruat ve law na lung an lawmhtertu le na hna an
ngamtertu tak cu zeidang thil ṭha tampi hna nakin na cungah ui lo te in a dawtnak
an hrawmh tu kha a si ve ko lai. Cu si caah nihin nangle kei nih nitin tein kan
nunnak ah zeidang thil tampi va ngeih nakin dawtnak va ngeih hi i zuam deuh hna
u si. Dawtnak nun in kan nun awk tu kha a kan cawnpiak. Zeicahtiah ahcun Bible
chungah kan hmuhmi cu,"Mi pakhat nih Zeizong thil a hei ngeih ko hnga
cun thiamnak zong a hei ngei ko hnga cun zumhnak zongah a ṭhawng ngai mi a hei
si ko hnga cun a pum zong kangh thawinak caah a hei pek ko hna sihmanhsehlaw cu
vialte thil cu dawtnak a ngeih ṭung lo ahcun zeihmanh a ṭhahnem lo a ti"1
Korin 13:1.3. Cucaah dawtnak nun hi kan rak herh takmi nun a si. Dawtnak
tampi in kan I chap hna a hau.. Dawtnak kan ngeih a si ahcun kan nunnak aa lawm
zungzal lai i hnangam in kan um ko hna lai. Phungthlukbia 15:16.17
ahcun,"Bawipa ṭihbu tein tlawmte ngeih hi tampi ngeih i hnahnok ngai i um nak
in a ṭha deuh.Cun dawtnak aa telnak zanriah cu anhringso he lawnghmanh
sisehlaw, a thaumi caw sa in tuahmi zanriah huatnak aa telmi zanriah nakin a
ṭha deuh"a ti. ,"Keimah nih kan dawt hna bantukin pakhat le
pakhat nan i dawt awk a si. Johan 13:34 a ti. Cun"Kan i dawtnak hi
lungthin taktak in a si awk a si Rom 12:9, a ti. Cun"Keimah nih kan
dawt hna bantukin pakhat le pakhat i daw u, Johan 15:12 a ti ṭhiamṭhiam.
A rummi a ṭhawngmi duh paoh I a ummi zong sihmanh usilaw, dawtnak kan ngeih
ṭung lo ahcun zeihmanh ṭhat hnemnak a ngei lomi a si ko. Cusicaah kannih
zumtu vialte hna cu kan umnak hmun cio in nitinte kan nunnak ah khrih zesuh
dawtnak kha ruat in dawtnak hi ngei hna usilaw dawtnak nun in nung hna usi. Cun
kan Dawtnak ngei mi cung hmanh ah khan zawnruahnak taktak kha ngeih
chap/chih kan hau. Cu nunning cu zumtu vialte kan nunnak ah Pathian zong nih a
kan duh piakmi nunning an si.
Dawtmi hawi le hna a donghnak lei i chim ka duhmi cu
zei rian kan ṭuannak paoh ah mah kan Bible ca te hi rel ṭhan in, i nunpi khawh
cio i zuam hna usih. Pathian ṭihnak in kan i thok lai i dawtnak le zawnruahnak
tiang in i chap nun ngei hna usih. Ka rak tuah cang, ka rel cang, khua
le ram le bu caah kan rak tuah cang i a za cang ti mi thinlung si lo in
I chap ṭhan nun kha ngeih khawh i zuam hna usih law, kan i timhmi
kan rian hlawhtlinnak kan hmu lai i rian tampi in kanṭtuan khawh ko lai.
Cucu Bible kan rel mi zong nih an kan cawnpiak mi a si. Reltu pumpak cio cungah
bawipa nih thluachuahnak kan pekpiak ko she! Amen.
Dawtnak nun in
nun le dawtnak ngeih hi zumtu vialte kan sinah Jesuh khrih hrim nih a kan cah
takmi a si.Cucaah kannih Lai miphun zumtu khrihfa vialte nih vawleicung ramza
kan umnak hmun cio ah khrih zesuh nih a kan duh piakmi dawtnak nun le
vawleicung thil nung vialte nih kan herhmi dawtnak nun hi ngei hna u silaw
dawtnak nun in nung hna u silaw kan tuahsermi thil kipah dawtnak i tel zungzal
ko seh..
Lawmhnak tampi
he…
Pastor Cung Bik (Thawngthawng
pa)
Cavite
Philippines
No comments:
Post a Comment