A HMEBIK

Baibalcangthim: Luka 17:5-6; Lamkaltu hna nih khan Bawipa “Kan zumhnak hi ngan ter deuh tuah,” an ti. Bawipa nih cun a leh hna I, “Nan nih antam ci ngaw zumhnak nan ngeih ahcun hi thingtheihmung kung hi, ‘Na hram in I phawi law rili ah khin vaa phun,’ tiah nan ti lai I nan nawl an ngaih ko hna lai,” tiah a ti.

Biahmaitthi:

Thawngttha chimnak caan ttha ka hmuh caah kaa lawm. Vui khat cu LBC( Lai Baptist Church, Yangon) zing pumh dih in Rev. Dr. E Za Bik , Pu Antony le kei tiah lakphak dawr ah kan tthu hna I, Pu Antony nih Mang Hlawn pa kan hnu zarh thawngttha na chimmi kha a ttha bak tiah a ti, zei kong hme ka chimh tiah a hal I ka philh dih cang tiah a ti. A tuzing thawngttha chim ding ka si tikah ka chimh dih in an philh viar te ko ding cu tthatthi zong timhtuah a ho lem lai lo tiah, capo in Rev. Dr Cung Lian Hup nih a rak chim bal.

Ka ruah seklen ve, kei te hna sermon ttial mi hi a ho nih hme a rel hnga! Timhtuahnak zong ngeih a ho lem hnga maw tiah. Nain a si lo, keimah ca zongah ka chim chih ko cu ta, cun pakhat tal nih cun an rel te ko lai tiah lungtho tein ka timh tthan. Ka chimh hnga mi hi a sen he a nak he, a rang he aa cawh dih te lai. Laimi sermon te bak a si ko lai.

Laimi cheukhat philoshophy

Laimi cu raw ei hlan ah kut ttawl lem lo, I ttawl zongah a sawh tein kan in ttawl. Kan ei khawh hnu tu ah chapiat he thiang tak in ttawl kan hmang. Ei hlan keu le kheng ttawl a um lo. Ei dih hnu tu ah chapiat he tleu lakin kan ttawl. Nitin kan hmanmi cu um le kheng cu kan ngeihmi lakah a chia deuhmi kan hman I a ttha deuh poah cu Bizu chungah dawh tein kan fim hna. Puan ttha lo deuh pawl kha zan ah kan in vorh I a ttha deuh kan ngeichun puan hna cu a dawhnak ah a langhnak hmun ah ka chiah salam. Zan ah inn thiang tein hmun phiah kha a chia ah kan ruat. Thil mansung cu kan nun lio ah I hruk lo in kan ruak cungah ithuam kan hmang. Kan zawt lio ah kan ngeihmi thil zuar cu kan siang lo nain kan thih hnu thlanlung donhnak tu ahcun a tawr le cheng kan dih.

Hi nih hin Theology pakhat a hrin rua tiah ka ruah puhmi cu, kan nun lio nakin kan thih hnu kongah biatak deuh kan in cawn piak theo. Vawilei ah rumnak a herh lo, fimnak degree a herh lo. Thlarua zungzal nunnak kan hmuh ahcun a za ko. Vancung khua ah sui tingtang kan tum lai, van hla kan sak lai kan lam lai I kan in nuam lai ti a si. Thih hnu kan kalnak ding lam caah kan nun lio ah timtuahfel a herh tuk ti hi kan philh sual tawn rua.  A ngaingai tiah cun vawlei ahhin sui tingtang hna kan tum cia chung a herh I, van hla hna hi kan sak cia a hau rua. Cu lo ahcun vancung khua ah timing kan palh sual ahcun kan I chuihpah dih te kho.

A chimtu nakin a ngaitu le ttuantu

Philippines ka phan hnu ah ka hmuh theihmi, Laimi tam u cu chimrel ah kan ilep ngai hna. Kei cu Ramkhel rian kong ka hngalh taktak, ka piangthar taktak,mirang karama ka thiam hei tibantuk a tam ngai. Chimrel kho hi a sang bik ah kan chiah sual rua tawn in. Kei cu hi ti hin ka ruah ko cuh! Rev. Dr. Hre Kio nih Pathian thawngttha a chimmi khi kan zapi tein ngai usih law, inunpi usih law, cu kan inunpi mi cu kan tuahttuannak ah langhter usih law Khrifa kan sinak ahhin a za tuk ko lai tiah. Dr. Liang Hmung Sakhong nih Ramkhel kong hi kan chim sehlaw, kan zapi nih ngai usih law, cucu kan ram caah kan zapi tein tuahttuan tti usihlaw kan ram thlennak caah a za ko lai tiah. A chimrel tam nakin zei ah kan ruat lem lo mi a ngaitu tete le attuantu tete taktak hi tam deuh u sih law Pathian pennak tiah kan in cawnpiak lengmangmi hi kan temh tam deuh men lai dahkaw. Cathiam kan ti mi zong khi ka thiam ti hau lem loin a thiamnak kha a ttuannak ah langhter ve sehlaw hmual a fak deuh lai tiah!

Khrihfa cawnpiaknak

Khrihfa kan in cawnpiaknak ahhin kan nu paw chung kan rak in semka tein felfai tein rak I cawn piak le, chungkhar ah fel tein Khrihfa nunzia I cawn piaknak le Biakinn ah Sunday chool cawnpiaknak hna hi a hmete ah ruah sual a fawi nain a rak ngan tukmi le a rak biapi tukmi a si. Kan upat hnu I Camping le Karuseh ah va khumh I hrinthar va hmuh nakin a tthat hnem deuh saumou rua lai dah! Thingkung cu a no te lio in na thlopbul ahcun hman awk ttha aa chuak hrimhrim lai. A tar hnu na kawih thulh ahcun a kiak lehlam lai.

Ni khat ah thlacam vui zeizat dah na cam tinak in thlacam nun ngeih hi a bia pit tuk. Thlacam hi a cam in cam long loin thlacam nuntu ngeih kho deuh u sih law, Baibal chuak lak in rel vui tam nakin Baibal cang inun pi hi a biapi deuh rua. Khrihfa na si maw? Ka si, na hrintthan/piangthar maw? Vun ti ah piangthar ka si hrinthar ka si ti nakin kan tuah serhnak hna nih kan khrihfa sinak cu a langh ter deuh tawn ko seh. Jeush nih an theih tlai in va zoh ko hna uh, tiah a ti.

Kan minung hawi pakhat sin in bia ka theihmi cu, Haleluiah a uar ve mi Khrihfa bu ahkhan micheu nih Haleluiah a tamtuk, hna a chet tiah an ti I Halaluiah a tlom chim duhmi le tam deuh chim duhmi tiah khrifah bu pahnih in a I thencheu tiah a ti. Zeipipa lo tukmi thil hmete ruangah Khrihfa mui kan chiat ter kho. Laimi hi Pathian kan biaknak ah sital kan duh deuh sual rua tiah ka ruat theo. Haleluiah ti theng le Amen tam theng hna hi a thlarau khun ah kan ruah cuh! Pathian hi a sawhsawh (simple) tein zumh le bochan ahkhin a za tuk ko. A zei ti phun deuh in va zumh le vaa bochan phun khi sital tuah a herh rua lo eh! Paul piangthar ning le Peter te pawl khi an minung khi a uar in kan uar hna cuh. Paul hna cu a mah tein a piangthar kho lo mi dawh a si ko cuh.  A herhmi tu, a muru tu kan tlolh sual tawn rua hlah maw? Tiah ka ruat.

Bia donghnak

Laimi cu Laihpuai kan uar ngai. Peter zong nih a uar ve. Peter kha Jesuh nih na ke kan tawl lai a ti ahkhan na ka ttawl vekvek ahcun Bawipa vuihnih in ka ttawl lawlaw a ti. Tipil hna hi vuihnih in ahhin kan I lungsi deuh tawn ve rua cuh! Zumhnak hna hi sei khat lak in phorh kan duh I zal khat lakin I beih hna kan duh men lai cuh. A si loh! Lam kaltu pawl nih Jesuh kha, Bawipa kan zumhnak hi nganter deuh tuah tiah, an ti ahkhan, Jesuh nih a leh mi hna cu- “Nannih nih a hmebikmi antam ci ngaw zumhnak nan ngeih ahcun hi theihmung kung hi, ‘a hram in I phawi law rili ah khin vaa phun, tiah nan ti lai I nan nawl an ngaih ko hna lai,” tiah fiang phut in a cawn piak ko hna hme hih! (Luka 17:5-6). Kan dihlak caah Pathian nih thlua kan chuak piak hram seh! Amen.

KHAR LING