Dr. Diana Siang Pen
VANSAN CAAN AH PATHIAN THANGTTHAT HMUAL
Biahmaitthi:
Maivan hmangin dawtmi u le nau nannih hna he thawngttha ihrawmttinak caanttha caansunglawi a kan petu Pa Pathian a hmasabikah aminthiang thangttha si ko seh. Cun PCCF chungttuan upa hna cung zongah hibantukin caanttha an ka pek ve nak cungah tampi kaa lawm ti kha vun langhter ka duh rih. Khrih ah dawtmi u le nau hna nan nih he i ruahtti dingah kaa thimmi tlangtaar cu “Vansan Caan ah Pathian Thangtthat Hmual” ti a si.
Baibalcaangthim:
Filipi 4: 4 “Bawipa chung i nan nunnak ah khan i lawm zungzal ko u ti kan duh hna. I lawm ko u, tiah ka nolh tthan rih ko lai.”
Biadomhnak:
Mithiang Paul nih Filipi Khrihfabu ca a kuat mi hna ka rel ve lengmang tikah hin ka thinlung a ka hninsai ngaitu thil pakhat cu harnak ton lio caan i Pathian thangtthat khawhnun ngeih hi a si. Paul nih Filip Khrihfabu hna sin i ca a kuat lio hna ah hin amah cu thonginn chungah a um lio si ko hmanhselaw Bawipa ah i lomhnun ngeih dingah amah thongtla tu nih a luatmi hna kha alingtalet tu in heh tiah a zungzal i lawm ding in a forhfial hna. Harnak ton lio caan ah le vansanlio caan i Pathian thangtthat khawh hi thilfawi cu a si hrim lo nain kan tuah khawh ahcun kan caah siseh Pathian hrang zongah siseh thiltthabik a rak si. Kan nih cio zong ca nih le tam, phaisa hna tlamtlin huahalo, pumsalei hna damlo, mirangca nih le thiam satsailo, kan visa nih le tlamtlinlo, chungkhar sinin thawngpangchia hna theih, dawtmi chungkhar hna damlo, laihritlai u le nau nu le pa hna nih muihmuhlo karah thlanmual liamtaak ton tibantuk harnakthong le lungretheih sivanghthong chung kan um lio ah Pathian tthachin rel in le a liamcia caan chungah Bawipa kan cungah zeitlukin dah a tthat vun ruah tthan ahcun thangtthatlo in um khawh hrim hi a si lo nain mitampi nih cun a theih lawng kan theih i kan inunpi kho tawnlo. Kan harnak le kan phurrit zoh ahcun lungdong vansang kan si ko lai nain mah harnak le lungretheih vansannak vialte teitu kan Bawipa Khrih zoh ahcun kan nunnak ah lunghnangamnak, daihnak le ruahchannaknung a kan pek ti hi mithiang Paul nunnak hmangin kan hmuh khawh i pumpak kan nunnak cio zongah kan hmuhton tawn cio ttheu lai ka zumh. Hibantuk harnak kan ton lio caan ah hin Khrihfa nun taktak cu hmuhfian khawh a si ttheu bantukin Paul nunnak hmang in kan nih cio zong thazaang la cio hna usilaw Khrih lam kan zulhnak ah nusalttha le pasalttha (Khrih ah nutling patling) si i zuam hna sih tiah sawm kan duh hna. A caancaan ahcun harnak le lungretheihnak kan ton lio caan ah Pathian cungah lungfakmi le a thinhungmi zong minung kan si bantuk in kan um tawn ko lai asinain a tthachin rel hi kan bau deuh tawn caah a sibik rua tiah ka ruah. Ahmunlomi thil ah kan i nuam tawn i kan ngaih a chia tawn. A ngaingai ti ah cun zungzal a hmunmi Khrih chung kan nunnak tu ah hin kan i nomh awk le Pathian kan thangtthat deuh awk tu a si.
I lawm u ti hi Baibal chungah voi 286 kan hmuh aruangbik cu i lomh khawh hi teitunun kan ngeih khawhnak caah abiapi ngaimi pakhat a rak si. Ahmunmi lomhnak taktak cu vawlei thil le ri hna caansau a hmunlomi sin tu in siloin ahmun zungzalmi Khrih chung lawnglawng ah kan hmuh khawhmi a si zia kha Paul nunnak ah hin fiangte in kan hmuh khawh. Paul le Silas kha thongchung an um lio ah thla an cam Pathian kha an thangtthat i Pathian khuaruahhar thilti khawh tthawnnak (miracle) zong zapi theih ah a lang ti kha kan theih dih bantukin Pathian thangtthat hi a kan ttemttawntu harnak (thircikcin) chungin a kan luattertu hriamnam pakhat a si ti zong hi Paul le Silas nun hmangin cathiang nih a kan cawnpiak duhmi a si ti hi kan hmuh khawh.
Cattialthiam pakhat nih cun Pathian nih a fale hna hi, “Harnak le lungretheihnak a caancaan ah cun a kan tonter tawn ko a ruang cu amah kan i bochan chinchin nak hnga caah siseh kan i toidor chinchin nak hnga caah siseh, mah harnak hmangin a sunparnak a langhnak hnga caah a si i mah harnak hna hi a kan hrawktu le a kan hlohraltu siloin Pathian a kan naihtertu an rak si deuh” tiah a ti. Mah bantuk lio caan ah hin mitampi cu kan mah thazaang in heh tiah kan cawl tawn nain zeihmanh a tthahnem hlei tawn lo aruang cu Bawipa sawm le amah tu bochan hi kan rak philh tawn caah a si. Hla pakhat nih ka nun a ka cawnpiak ngaimi cu “I surrender all” ti hi a si. Bawipa ihngatnun a ngeilomi cu zei he dah ka tahchun ti ah cun “Mawtaw aa cit ko nain a thilrit aa phurh peng mi” khualtlawngpa bantuk kan si. Bawipa ah ihngatnun hi Khrih zuumtu kan caah biapi ngaingai mi a si i harcaan le vansancaan ah a kan lomhtertu nun zong a si fawn.
Biatlangkawmnak:
A donghnak ah dawtmi u le nau hna sawm kan duh mi hna cu vansan caan le harnak caan ah Bawipa chung kan nunnak ah i lawm zungzal ko hna u silaw “ihngatnun” (surrender life) hi cawng hna u sih. Harnak, lungretheihnak phunphun kan cungah tlung ko hmanhselaw kan pa Pathian nih mah hna chung hin amah thangtthatnun ngeih hi a kan duhpiakmi a si zia kha philh hna hlah u sih. Siangpahrang David hi Pathian nih ka thin le ka lung tiah a auhnak aruangbik cu David hi thangtthatnun a ngei taktak mi le Bawipa ah lomhcaan, vansan caan le harcaan zongah Bawipa ah aa hngatchan zungzal mi pa a si caah a si.
Habakkuk 3: 17-19 ah kan hmuh mi cu “Theipi kung cu par loin, Mitsurruang zongah a thei um hmanh hlah seh, Oliv thing cu tlai loin Lo zongah tirawl zeihmanh chuak loin um hmanh seh, Kawm chung sattil run kha um loin Sattil inn ah sattil kha um hmanh hna hlah sehlaw, Bawipa ah cun kaa lawm tthiamtthiam ko lai i A ka khamtu Pathian cu ka lawmh tthiamtthiam ko lai” a ti bantukin harnak, vansannak, lungretheihnak phunphun kan cungah tlung ai kun a kan khamhtu Bawipa Pathian tu ah i lawm zungzal ko hna sih mah hi kan caah a tthabikmi lam a si ti hi tuzing Thawngttha aa hrawmmi kan zate sawm le forhfial kan duh hna. Laimi hi a theihlei ah cun kan za ngai cang ko nain a tuah lei tu hi kan bau deuh tiin mifim kan pale hna nih an chim ttheu tawnmi a si.
Bawipa nih a bia kan zate caah a thar in thlua kan chuahpiak tthan ko seh. Amen!
Tampi kaa lawm.
Philippine Chin Christian FellowshipPhilippine
No comments:
Post a Comment