Zeiruang ah dah Pathian nih kan thlacamnak akan leh tawn lo?

Lewis Cung Cinzah

Voikhat cu Bishop TD Jakes timi pa nih thawngttha a chimmi ka rak ngaih bal. Ih a chim mi cu, “Pathian nih hin zawtter an duh hna lo! Ngaihchia in umter zong an duh hna lo! Sifahter zong an duh hna lo! Nain Pathian nih Chanrelnak 7: 14 ah a timi cu, “Kamin in kawh mi ka mi hna nih khan an lung an itthumh I thla an cam I ka hmai kha an kawl I an lam tthalo khan an I mer ahcun, van khin ka run theih lai I an sualnak cu ka ngaihthiam hna lai I an ram cu ka damter lai” tiah a ti. Cucaahcun, na damnak hngading caah Pathian kha zum ko! Na chawlehthalnak a tthatkhawhnak ding caah Pathian kha zum ko! Na carcer a dam khawhnak hnga ding caah Pathian kha zum ko! Na zawtnak a damnak hnga ding caah Pathian kha zum ko! Pathian nih na dam ding hi a duh mi a si, na damlonak vialte damter kha an duh mi a si I Jesuh Khrih ah zeizong vialte hi teitu siding ah an duh mi a si. Cucaah na pawngkam I a um mi pa/nu kha “Jesuh Khrih nih damter an duh” tiah chim tuah hna tiah hipa nih hin a chim len.

Hibantuk thawngttha hi “tthanghternak thawngttha” ti zong in kan ti khawh. A ngaitu vialte an lung a thawhter dih hna. Sihmanhsehlaw khatlei in thil kan ruahding mi tampi a rak um ve. Khoika hmun paoh ah mah tic un kan chim ngam tak hnga maw? Church pakhatkhat ah va kal law “Pathian nih na cancer damter an duh” tiah va chim tuahngat; nuhmei cheukhat tlaar tthup in an um lai I “zei kong dah na chim len ko?” a luan cang mi kumhnih ah ka pasal cancer in a zaw, ka thinlung um ek dihlak in nifatinte Pathian sin ah thla ka cam sihmanhsehlaw a thi tthiamtthiam. Cucaah hi bantuk kong hi cu chim ti hlah. Ziah tiah cun keimah pumpak hrimhrim nih ka tonmi si I cu caah daite khan um ko tiah a ti ding an tam ngaingai lai.

Cu nihcun kan thinlung chung ah zei biahalnak dah a chuahpi hnga tiah cun, “zeiruang ahdah Pathian nih hin cu mah nuhmei pawl an thlacamnak kha a rak theih piak hna hnga lo, a rak bomh hna hnga lo, zei dah a poinak aruang a si hnga?” Jesuh nih “hal u law pek nan si lai, kawl u law nan hmuh lai, king ulaw innka cu on nan si lai” tiah a ti lo maw? Jesuh Khrih nih “zei zong vialte hi ka min in hal u law pek nan si lai I nan mah ta a si lai” tiah a ti lo maw? Jesuh nih “zeizong vialte ka min in nan hal ahcun kan tuahpiak hna lai” tiah a ti lo maw?

Asi ahcun zeitindah a si kun lai? Cu vialte cu a hmanlomi thawngthanhnak or langhternak menmen maw an si kun lai? Pathian nih hin a kan dehcawh sawhsawh men maw a si kun hnga? Pathian nih hin nichuak capo menmen ah maw a kan hman kun hnga? Game pakhat bantuk menmen in maw akan celh le a si hnga?

A si hrimhrim lo! Pathian nih hin kan thlacamnak hi a kan leh ko. A sinain kan mah nih kan duhning bantuk in cun a kan let lo. Pathian nih zeitikhmanhah “nan thlacamnak hi nan mah nih kan duhning bantuk hin kan let seh ti nan ka duh bantuk in kan leh hrimhrim hna lai” tiah bia akan kamh bal lo. Sihmanhsehlaw thilhman pakhat cu Bible nih a kan cawnpiak bantukin Pathian nih hin a phi (answer) pathum in kan thlacamnak hi a kan leh tawn.

A caan ahcun Pathian nih kan thlacamnak hi “Yes” “OK” a ti bak. Pathian nih ka thlacamnak a ka leh tik ah hin keimah zong ka lawm tuk ve. A ruang cu ka duh mi vialte a ka pek caah si lo in ka duh mi ka hal mi vialte hi Pathian zong nih ka caah a duh mi an rak si mi a si caah kai lawm khun.

A si nain a caan ahcun Pathian nih kan thlacamnak hi “Not yet” “Umrih” Hngakrih” nan duh mi kan pek ko hna lai sihmanhsehlaw caan tlawmpal cu na hngah rih a hau tiah a kan leh tawn. Ka hawipa pakhat nih arak ka chimh bal mi cu nupi ttha te Pathian a daw I keimah zong a ka daw I keimah zong nih ka thih hlan tiang a mah ca lawng bak ah nung kho ve ding in rinhchan awk a tlak mi nupi caah Pathian sin ah thla ka rak cam ee a ti. Sihmanhsehlaw kum riat (8) hnu lawnglawng ah Pathian nih ka thlacamnak aka leh i a tu ka nupi khi ka hmuh khawh mi a si ee a ti. Ih a ti rih mi cu kum riat tiangtiang rak hngah ding hi thei ning law Pathian nih hngak rih ko a ti mi hi Pathian zei bia dah na chim lengmang ko mah tiangtiang cu ka hngah khawh ttung lo tiah ka rak ti hnga ee tiah a ti bal.

Ih a chim rih mi cu, sihmanhsehlaw ka nupi caah thla ka cammi kumriat chung ka rak hngah mi kha ka van ruahtthan tik ah Pathian sin ah hin kai lawm tuk ee a ti rih. Zeiruang ah tiah cun mah lio ah hin kum 21 lawnglawng ka rak si rih I nupi tthit ding ah ready ka rak si rih lo ee a ti. Ka rak no tuk rih, lung nih a rak duh sawhsawh lio, ngeih duh menmen lawng khi a rak si. Cucaah kan thlacamnak Pathian nih a kan leh colh lo tik ah thinhun len nakcha in Pathian sin ah lomhnak bia tu kan chim ding a si tiah ka hawipa nih cun a rak ka ti bal.

Cun Pathian nih hin a caan ahcun kan thlacamnak hi let bak lo in a kan um tawn. No! hihi cu kan pe bak lai lo a kan ti caan zong a um ve. Bible chung ah zumtu hna thlacamnak kha No! tiah a ti mi hna tampi kan hmuh khawh. Moses nih “Mawi Bawipa kamhmi ram (kanaan ram) ah kal ka duh ee” tiah thla a cam. Sihmanhsehlaw Pathian nih NO! a ti. Abraham nih “Bawipa ka fapa Ishmael nih ram thlachuah vialte hi co seh,” tiah thla a cam. Sihmanhsehlaw Pathian nih NO! hihi cu Isaac caah an si tiah a ti. 2 Samuel 11 chungah kan hmuh mi cu David le Bathsheba nih fapa te an hrin I cei lak ten a zawt tik ah David nih vawlei ah a bawk I nifatin te ti awk in rawl ulh bak in Pathian sin ah thla a cam, “Pathian ka fapa nunnak hi na khamh a si ahcun na caah zeipaoh ka tuah ko lai” tiah a hal. Sihmanhsehlaw, Pathian nih NO! a ti tthiamtthiam.

Cucaah Pathian nih Moses le Abraham hmanh nih thla an cam I Pathian nih NO! ati hna ahcun kan mah zong hi No! akan ti caan hi a um ve hrimhrim awk a si ko tiah ka ruah. 2 Corinth 12 chung zong ah kan hmuh khawh mi cu Apostle Paul nunnak hmanh ah Pathian nih No! a ti caan a um ve ko. Caang 1-6 tiang kan rel I kan hmuh khawh mi cu Pathian he zeitluk in dah an i hawikawmhnak a san I visions lianngan taktak hna a hmuhnak le Vancung sunpar nak le lianhngannak vialte hmanh va hmu kho ding in le va tem kho ding tiang a rak sinak kha kan hmuh.

Mi zapi kan dirhmun ahcun Yes! Bawipa ka cawi law cucu Vancung ahcun ka kalpi law keimah hi a nungmi vialte lak ah hmasabik vancung a phan mi si ning hei ti ding khi a fawi taktak mi a si. Bawipa ka cawii law thihnak a tei I nunnak ah a lan tthan cang mi ka Bawipa cu keimah ka mit hrimhrim in hmu ning hei ti khi a fawite mi asi. Ih vawleicung ah hin special minung ngaingai ka hei si hnga I heh tiah ka porhlaw hnga tiah Paul nih a ti.

Ih caan 7nak in a tanglei kan van rel I kan hmuh mi cu, “cucu bantuk thil khuaruahhar thil lianngan vialte ka hmuh mi ruangah porhlaw in ka umnak hnga lo ka takpum cung ah Pathian nih fahnak (miring nih cun thorn a ti tawp I lai cun hling kan ti hnga) pakhat a ka pek I cu fahnak cu Satan thil cu porhlaw in ka um sual nak hnga lo a ka dawntu dingah a hman”, tiah kan hmuh khawh. Ih hika zawnte ih fahnak (thorn) tiah a timi te hi minung tampi nih ruahnak tampi an ngeih mi cu zawtnak a si ko lai tiah an zumh. A ruang cu, Galati 4:13 ah a chim mi cu “zairuang ah dah thawngttha ka rak in chimh hna ti cu nan hngalh: ka zawt caah pei ka rak in chimh hna a si kha” tiah a ti. Cun mi cheu nih cun a ral a si ko lai an ti. Cun mi cheu nih lungrawhnak, I nuamhlonak pakhatkhat a si ko lai an ti. Zei khom a va si ah fiangten kan theih khawh mi cu Paul nunnak ah hin dawnkhantu thil pakhatkhat a um hrimhrim I cucu nih cun Paul hi um thiam lo in a umter ti hi kan hmuh khawh mi a si. Ih Paul nih hin voithum hrengte Pathian sin ah a nawl mi cu “Bawipa ka chung I a um mi fahnak hi ka lak piak sawh ko” toidor tein ka umnak hnga ding caah ka nunak ahhin Satan zong hibantuk fahnak pek ding ah nawl na pek a si ko…Lamkaltu 9 chung zong ah na caah hin zeitluk harnak tuar ding dah ka si tikha na ka chimh mi ka theih ko…sihmanhsehlaw ka Bawipa a za cang ka tuar kho ti lo… hihi fahnak hi ka lakpiak ko cang… ka nunnak chung hrimhrim in hihi fahnak hi run la cang ko” tiah a ti mi kan hmuh.

Sihmanhsehlaw, Pathian nih zei tin dah a ti tiah cun, “NO”! A si lo, “Ka vel hi na caah a za ko” tiah a ti.

Tuchun ni ahhin kan nunnak ah fahnak a tuar mi tampi kan um men lai…na ke ah fahnak a um men ko lai…na kut ah maw na paw ah maw na lu ah maw na takpum cungah hin fahnak nan tuar liangluang men ko lai… caan tampi cu zei hmanh ruat ti lo in Pathian sin ah daitein I dinh cang ding a si ko nain thih zong thih khawh ttung lo in chun nitlak zaan khuadei hna tthutdan cung ah zeihmanh tuah kho lo in chun he zaan he tthut I “Pathian zeiruangah dah mah vialte hi ka cung ah na tlunter…? Ziah ka thlacamnak na ka leh lo? Ziah naka bawmh lo? Ziah hi vialte fahnak ka in mi hi na ka zoh sawh ko na ka lakpiak lo? tiah aphun a zai I heh tiah Pathian sin ah biahalnak a tuah mi tampi kan um men lai…

Sihmanhsehlaw, Pathian nih cun zeitindah a kan ti tiah cun… “Ka vel hi na caah a za ko, hi vialte harnak fahnak vialte hi kan lakpiak khawh ko ih a tuah zong ka tuah men ko lai…a si nain zeidang vialte nak in theihter kan duh mi cu “zeibantuk harnak le fahnak vialte hmanh ing in tuar ko law na caah kan dawtnak le ka vel vialte hi na caah a za tuk mi a si ko” tiah Pathian nih cun a kan ti men ko lai…

Asilo le na taksa I a um mi fahnak hi zawtnak hna a si lo kho men ko… minung pakhatkhat zong khi an rak si kho men ko... na komh ngai mi na sayate pakhatkhat nih a tthutnak hmun in mit sen ruamruam in an zoh tu zong khi a si kho men ko…si lo le na lu cung tiang in an kai hnawh tu na boss pa hna khi a si kho men ko…si lo le, zeitikhmanhah thangtthatnak an pe bal lo tu zong khi a si kho men ko…minung pakhatkhat na cungah um a duh peng tu le zei na tuah paoh ah hinak tthadeuh in tuah tiah an ti lengmang tu pa zong khi a si kho men… mah dihcun Pathian sin ah thla na cam mi cu, “Bawipa hibantuk in ka cungah fahnak a ka petu minung hna hi ka nunnak chung hrimhrim in ka lakpiak ko hna…, a celh hrimhrim ka celh ti lo… na ka lakpiak hna an si ahcun na caah hin thil tampi ka tuah khawh ko lai” tiah na cam hnga.

A sinain Pathian nih cun, “zeitluk hmanh in na cung ah hna an hnawh tu pa va si ko hna seh…zeitulk in huat awktlak le na rem lo mi va si ko hmanh seh…Pathian nih cun “Ka vel hi na caah a za ko, hibantuk thil vialte na in tuar khawhnak hnga ding caah ka tthawnnak le ka dawtnak vialte hi kan pek ko lai… tiah a kan ti. Zohhmanh, a ti mi cu “ka vel hi na caah a za ko, zeicahtiah ka tthawnnak cu derthawmnak ah hin a lang” tiah a ti.

Tuchun ni ah ka lungah a hung chuak ngai mi cu Joni Earachson Tada kong hi a si. Ih kum no te a rak si lio in a zeng mi nu a si. Pathian sin ah thla a cam tawn mi cu, “Maw Bawipa, ziah hihi ka zawtfahnak le ka zennak vialte hi na ka lak piak ko lo ee…? Johan 9 chung zong ah mitcaw mi hna na damter ko hna tung??? Bethesda tibual kam ah kum 38 tiang a zeng cang ko mi zong na damter ko ttung??? Ziah vancung in rungttum duak in kei ka intuarnak vialte zong na ka damter ve lo??? tiah a ti tawn…

A sinain Pathian nih a timi cu, “ka velngeihnak hi na caah a za ko…zeiruang ah tiah cun nangmah bantuk in pumsa/thazaang in a dethawnm mi hna sin ah rianttuan ding ah kan herh caah a si…tiah a ti. U nau hna, kan tthawnnak lawnglawng hi Pathian nih a herh lo a caan ahcun kan derthawmnak hna hi Pathian sunpar langhternak caah a rak biapi tuk mi an rak si tawn ti kha philh hlah hna usih. Cuticun, Joni zong nih cun vawileicung khuazakip ah kal in mitlamtling lo mi hna sin ah rianttuan hram a rak tawk ti kha kan hmuh khawh mi a si. Joni hi amah pumpak hrimhrim in mitlamtling lo rak si hlah sehlaw hibantuk in mitlamtling lo mi hna sin ah rian a ttuan kho lai ti hi na ruat dik maw??? A ttuan bal lai lo…!!! Asinain Pathian nih Joni ih a derthawmnak te kha la riangmang in a tlamtling lo mi hna le a derthawm mi hna thazaang tthawnternak le bawmhnak ding caah a hman. Pathain thiltikhawhnak kha Joni a derthawmnak ah baitak tein a lang.

Cun pakhat ka ruah tthan mi cu a luancia kum zeimaw zat lio I hla ngaingai a rak tli kho mi Terry Fox kong hi a si. A ke ah cancer a rak ngei mi a si ih tan hau ding a rak si I a ke zong cu an rak tan piak…sihmanhsehlaw tuahpiak chawmmi ke a ngeih hnu ah hin Canada ramkulh chung vialte ah a mah bantuk in a damlo mi hna, cancer a ngei mi hna caah zei tin dah damter khawh an si lai ti mi kha heh tiah baitaktein research a rak tuah mi pa a si , ih tuchun ahcun Terry min put tein Canada ramchung ah cancer zawtnak research tuahnak kha an ngei I cancer in a dam lo mi hna caah Terry minput tein phaisa kawl nak hna an ngei…ka chim duh mi cu, Terry hi cancer zawtnak hi rak ngei hlah sehlaw hibantuk hin amah min hmang riangmang in Canada ramkulh chungah canser zawtnak damnak research hna hi an tuah hnga maw??? An tuah lai lo!!! Sihmanhsehlaw Pathian tthawnnak kha Teery ih a dethawmnak bik ah khan a lang…

Cucaah cun dahkaw caang kua (9)nak atanglei deuh ah a ti mi cu, “cucaah cun Khrih tthawnnak nih a ka huhphenh ti kha ka hngalh nak hnga, ka derthawmnak ah hin lunglawmte iin kaa porhlaw cang. Ka derthawmnak ah siseh, nihsawhnak le harnak le hremnak le temhinnnak ka hmuh mi ah siseh, Khrih ruang ah kai lawm ko; zeicahtiah ka derthawm tikah hin ka tthawn a rak si…? tiah kan hmuh khawh.

Ih mah biazai te hi internet ah ka hmuh mi a si I ka uar ngaingai…a bia le hla cu hintin an si…:

Ka zulhtawn mi ka ziaza ttha lo mi vialte kha Bawipa ka lakpiak dih ko sawh tiah Pathian sin ah ka hal,

Sihmanhsehlaw Pathian nih “NO” aka ti.

Keimah nih kan lakpiak ding mi thil a si lo, nangmah te tuin give up na tuah ding mi a si tiah a ka ti

Thinfual lungsaunak kha Pathian sin ah ka hal

Sihmanhsehlaw Pathian nih “NO” aka ti.

Thinfual lungsaunak cu harnak ih a chuahpimi theipar an si aka ti;

Pek chawm mi a si lo, cawnding mi tu a si tiah aka a ti.

Pathian sin ah hnangam lomhnak ka hal

Sihmanhsehlaw Pathian nih “NO” aka ti

Thluachuah vialte kan pek dih cang, lawmhnak vialte cu nangmah nawl a si aka ti

Harnak le temhinnak chung in ka luatter ko tiah Pathian sin ah ka hal,

Sihmanhsehlaw Pathian nih “NO” aka ti.

Harsatnak, temhinnak nih hin nangmah kong si lo in keimah kong tu an cawnpiak lai aka ti.

Ka nunak hi zei tin dah ka nuamhter khawh lai tinak caah zeizong vialte Pathian sin ah ka hal

Sihamnhsehlaw Pathian nih “NO” aka ti

Nunak tu kan pek lai I na nunchung ah zeizong vialte he na nuam lai aka ti.

Pathian, nangmah nih na ka dawt bantuk te hin midang zong run ka dawtter ve ko hna tiah ka hal,

Sihmanhsehlaw Pathian nih Ahhhhh….a donghnak ahcun idea tampi pei na ngeih ko hi a ka ti.

Zeiruang ah dah mi tampi sin ah an thiltuah ning bantuk in thil hi a can tawn hnga ti hi ka thei kho hrimhrim lo. Zumh awktlak taktak a si mi Faye Nevenhoven te hna zawtnak phunkhat hnu phunkhat an tuar cuahmah lio ah zeiruang ahdah mi cheukhat hna hi zawtnak zong an ngeih bal hnga lo ti hi ka thei kho hrimhrim lo…Zeiruang ah dah Pathian nih hin micheukhat thlacam nak cu “Yes” a ti micheukhat thlacamnak cu “NO” a ti hnga…??? ti hi ka ruat kho hrimhrim lo.

Asinain Pathian nih kan thlacamnak kha “NO” a ti tik ah hin, kan mah nih kan ruahkhawh mi le kan duh mi nak lengtiang in akan ruahpiak mi le a kan duh piak mi le pek a kan duh mi thil tampi an rak um ti hi kan theih a hau...na zawtfahnak ahkhan Pathian nih timhtuahnak pakhatkhat a ngeihmi a um ti kha theih ter akan duh…na intuarnak ruang ah khan tinhmi pakhatkhat ka ngei ti kha Pathian nih theihter a kan duh…cucu vialte cu nihin ah na hmu rih men hna lai lo, na lung zong a fiang men lai lo, sihmanhsehlaw ka vel hi na caah a za ko. Pa le Fapa le Thliangthlarau min in na cung ah hin thil lianngan tampi ka tuah” tiah Pathian nih bia a kan kamh…